‏1 ”مَاشَا ڒخُّو، أَمُّو إِ إِقَّارْ سِيذِي، ونِّي شكْ د-إِخڒْقنْ، أَ يَاعْقُوبْ، ذ ونِّي ذ أَمْكوَّانْ نّكْ، أَ إِسْرَائِيل، وَارْ تّڭّْوذْ شَا، مَاغَارْ نشّْ فكّغْ شكْ، ڒَاغِيغْ أَشْ س يِيسمْ نّكْ، شكْ إِنُو. ‏2 مَاڒَا ثْشُوقّذْ ذڭْ وَامَانْ، أَذْ إِڒِيغْ أَكِيذكْ، مَاڒَا ذڭْ إِغزْرَانْ، وَارْ شكْ تِّيوْينْ. مَاڒَا ثژْوِيذْ خْ ثْمسِّي، وَارْ ثْشمّْضذْ، ؤُشَا أَشعَّاڒْ وَارْ شكْ إِسّْرُوغَا. ^▪   ‏3 مَاغَارْ نشّْ ذ سِيذِي، أَربِّي نّكْ، أَمْقدَّاسْ ن إِسْرَائِيل، أَمْسنْجمْ نّكْ. نشّْ وْشِيغْ مِيصْرَا ذ تَّامَانْ ن وصْڒَاحْ إِ شكْ، كُوشْ ذ سَابَا ذڭْ ومْشَانْ نّكْ. ‏4 مِينْزِي ثْسكّْوِيذْ أَطَّاسْ ذِي ثِيطَّاوِينْ إِنُو، أَقَا ثتّْوَاسْعُودْجذْ ؤُ نشّْ تّخْسغْ شكْ. س ؤُيَا وْشِيغْ إِوْذَانْ ذڭْ ومْشَانْ نّكْ ذ شُّوعُوبْ ذڭْ ومْشَانْ ن ڒعْمَارْ نّكْ. ‏5 وَارْ تّڭّْوذْ شَا، مَاغَارْ نشّْ أَكِيذكْ. أَذْ أَوْيغْ إِحنْجِيرنْ نّكْ زِي مَانِي د-ثْنقَّارْ ثْفُوشْثْ، أَذْ شكْ سّْمُونغْ زِي مَانِي د-ثْغدْجِي ثْفُوشْثْ. ^▪   ‏6 نشّْ أَذْ إِنِيغْ إِ شَّامَالْ: ’أوْشْ!‘ ؤُ إِ لْجَانُوبْ: ’وَارْ تّطّفْ!‘، أَركّْوحْ إِحنْجِيرنْ إِنُو زِي ڒَاڭّْوَاجْ، يسِّي زِي ثْمَا ن ثمُّورْثْ، ‏7 كُوڒْ  إِجّنْ ونِّي ؤُمِي تّْڒَاغَانْ س يِيسمْ إِنُو، ونِّي د-خڒْقغْ إِ شَّانْ إِنُو، ونِّي كوّْنغْ ذ ونِّي ڭِّيغْ عَاوذْ.“

‏8 ”أجّْ أَذْ إِفّغْ ڒْڭنْسْ أَذَارْغَاڒْ، وَاخَّا غَارْسنْ ثِيطَّاوِينْ، ؤُڒَا ذ إِذُوهْشَارنْ، وَاخَّا غَارْسنْ إِمزُّوغنْ.

‏9 أجّْ أَذْ تّْوَاسْمُوننْ مَارَّا ڒڭْنُوسْ ؤُشَا أجّْ شُّوعُوبْ أَذْ نّْجَارْونْ! مَانْ ونْ زَّايْسنْ إِزمَّارْ أَذْ إِبَارّحْ ثَا ذ مَانْ ونْ إِزمَّارْ أَذْ أَنغْ يِينِي مِينْ ثُوغَا إِدْجَانْ زِيشْ؟ أجّْ إِ-ثنْ أَذْ أَوْينْ ڒشْهُوذْ نْسنْ مَاحنْذْ أَذْ تّْوَاسڭّْذنْ، ؤُشَا أجّْ ڒشْهُوذْ أَذْ سْڒنْ، أَذْ إِنِينْ: ’ذ ثِيذتّْ!‘

‏10 كنِّيوْ ذ ڒشْهُوذْ إِنُو ؤُڒَا ذ أَمْسخَّارْ إِنُو نِّي فَارْزغْ، حِيمَا أَذْ ثسّْنمْ، أَذْ ذَايِي ثَامْنمْ، أَذْ ثْفهْممْ أَقَا نشّْ ذ نتَّا. قْبڒْ نشّْ وَارْ إِتّْوَاڭّْ ؤُڒَا ذ إِجّْ ن أَربِّي ؤُشَا أَوَارْنِي أَيِي وَارْ إِتِّيڒِي ؤُڒَا ذ إِجّنْ!، إِقَّارْ سِيذِي. ^▪  

‏11 نشّْ، نشّْ ذ سِيذِي، ؤُ وَارْ إِدْجِي ؤُمْسنْجمْ مْغِيرْ نشّْ.

‏12 نشّْ بَارّْحغْ ؤُ سّْنجْمغْ ؤُ نشّْ إِوْيغْ أَومْ ث-إِ-د غَارْ ؤُمجِّينْ. ؤُڒَا ذ إِجّْ ن أَربِّي ڒْبَارَّانِي وَارْ ثُوغِي جَارْ أَومْ. كنِّيوْ ذ ڒشْهُوذْ أَقَا نشّْ ذ أَربِّي، أَمُّو إِ إِقَّارْ سِيذِي.

‏13 ؤُڒَا زڭْ وَاسّْ-أَ، أَقَا نشّْ ذ نتَّا ؤُشَا ؤُڒَا ذ إِجّْ وَارْ إِزمَّارْ أَذْ إِسّْفكّْ زڭْ ؤُفُوسْ إِنُو! مَاڒَا نشّْ خذْمغْ، مَانْ ونْ إِزمَّارنْ أَذْ ث يَارّْ؟“ ^▪  

‏14 ”أَمُّو إِ إِقَّارْ سِيذِي، أَمفْذِي نْومْ، أَمْقدَّاسْ ن إِسْرَائِيل: ’ذِي طّْوعْ نْومْ سّكّغْ إِجّنْ غَارْ بَابِيلْ ؤُشَا أَذْ ثنْ أَرّغْ أَذْ أَروْڒنْ، ؤُشَا أَذْ هْوَانْ مَارَّا إِكَالْذَانِييّنْ ذڭْ إِغُورَّابَا نِّي زِي ثُوغَا فَارّْحنْ أَمُّو قْبڒْ.

‏15 نشّْ ذ سِيذِي، أَمْقدَّاسْ نْومْ، ونِّي د-إِخڒْقنْ إِسْرَائِيل، أَجدْجِيذْ نْومْ.‘ “

‏16 ”أَمُّو إِ إِقَّارْ سِيذِي نِّي إِڭِّينْ أَبْرِيذْ ذِي ڒبْحَارْ ذ ثبْرِيذْثْ ذڭْ وَامَانْ إِجهْذنْ،

‏17 ونِّي إِجِّينْ إِكَارُّوثنْ ذ ييْسَانْ، ڒْعسْكَارْ ذ جّهْذْ أَذْ فّْغنْ - أَقَا ذَا، زّْڒنْ مُوننْ، وَارْ تّْنكَّارنْ عمَّارْصْ، خسْينْ، قْضَانْ أَمْ ثفْثِيتْشْ ن ثِيفّسْثْ! -

‏18 أَمُّو إِ إِقَّارْ سِيذِي: ’وَارْ تّْعقْڒمْ عَاذْ خْ مِينْ ثُوغَا إِدْجَانْ زِيشْ، وَارْ تِّيذَارمْ عَاذْ مِينْ إِعْذُونْ.

‏19 خْزَارْ، أَذْ ڭّغْ مِينْ إِدْجَانْ ن جْذِيذْ، ڒخُّو أَذْ د-إِفّغْ. مَا وَارْ ذ أَسْ ثْحكَّارمْ شَا؟ وَاهْ، نشّْ أَذْ سَّارْسغْ أَبْرِيذْ ذِي ڒخْڒَا، إِغْزَارنْ ذِي ثْنزْرُوفْثْ. ^▪   ‏20 ڒْمَاڒْ ن ڒخْڒَا أَذْ أَيِي سّْعُودْجَانْ، ؤُشَّاننْ ن ڒخْڒَا ذ يسِّيسْ ن نّْعَامثْ، مَاغَارْ نشّْ أَذْ ڭّغْ أَمَانْ أَذْ أَزّْڒنْ ذِي ڒخْڒَا ؤُڒَا ذ إِغزْرَانْ ذِي ثْنزْرُوفْثْ، حِيمَا أَذْ سّسْوغْ ڒْڭنْسْ إِنُو، إِنِّي فَارْزغْ. ‏21 ڒْڭنْسْ-أَ ڭِّيغْ ث إِ نشّْ، نِيثْنِي أَذْ بَارّْحنْ شَّانْ إِنُو.‘ “ ^▪  

‏22 ”مَاشَا شكْ وَارْ ذ أَيِي د-ثْڒَاغِيذْ، أَ يَاعْقُوبْ، وَارْ ثسِّيحْڒذْ إِخفْ نّكْ أَكِيذِي، أَ إِسْرَائِيل! ‏23 شكْ وَارْ ذ أَيِي د-ثِيوْيذْ إِجّنْ زڭْ وُودْجِي ن ثْغَارْصَا نّكْ ن وشْمَاضْ، ؤُشَا س ثْغَارْصِي نّكْ وَارْ ذ أَيِي ثْشنْعذْ. عمَّارْصْ وَارْ شكْ حْصَارغْ غَارْ ثوْهِيبِينْ ن ڒْغِيدْجثْ ؤُ وَارْ شكْ سِّيحْڒغْ عمَّارْصْ س جَّاوِي. ‏24 شكْ وَارْ ذ أَيِي ثسْغِيذْ أَغَانِيمْ ن ؤُحمُّومْ إِتّْفُوحنْ س تّْمنْيَاثْ ن نُّوقَارْثْ ؤُشَا وَارْ ذ أَيِي ثسّْجِيوْنذْ س ثَاذُونْثْ ن ثْغَارْصَا نّكْ، مَاشَا س دّْنُوبْ نّكْ ثَارْنِيذْ أَيِي-د ڒْخذْمثْ، س ڒْمُوعْصِييَّاثْ نّكْ ثسِّيحْڒذْ أَيِي.“

‏25 ”نشّْ، ذ نشّْ، ونِّي إِ غَا إِمسْحنْ إِعذِّيينْ نّكْ ذِي طّْوعْ إِنُو، نشّْ وَارْ تِّيذَارغْ عَاذْ دّْنُوبْ نّكْ. ^▪   ‏26 أَرّْ إِ-ثنْ غَارْ ڒْبَاڒْ إِنُو، أجّْ أَنغْ أَذْ نمْشَارّعْ، وّثْ خْ يِيخفْ نّكْ مَاحنْذْ أَذْ د-ثَاوْيذْ ثَاسْغَارْثْ نّكْ. ^▪   ‏27 بَابَاشْ أَمزْوَارُو إِخْضَا ؤُ ؤُڒَا ذ إِمْسصْڒَاحنْ نّكْ عْذُونْ خَافِي. ^▫   ‏28 س ؤُيَا سّْعِيدْجْثغْ إِمقّْرَاننْ ن زَّاوشْثْ إِقدّْسنْ، ؤُ أَرِّيغْ يَاعْقُوبْ إِ ؤُثحِّي ؤُشَا جِّيغْ إِسْرَائِيل مَاحنْذْ أَذْ ث عيّْبنْ.“