أَوَاڒْ أَمزْوَارُو خْ ؤُمْسخَّارْ ن سِيذِي
42
1 ”خْزَارْ، أَمْسخَّارْ إِنُو ونِّي تّْعَاوَانغْ، ذ ونِّي فَارْزغْ، ذ ونِّي د-يُوسِينْ خْ ڒْخَاضَارْ إِنُو. نشّْ سَّارْسغْ خَاسْ أَرُّوحْ إِنُو. نتَّا أَذْ إِسُّوفّغْ ڒحْكَامْ غَارْ ڒڭْنُوسْ. ▪ 2 وَارْ إِسْغُويُّو ؤُ وَارْ إِسّْڭِيعِّيذْ ثْمِيجَّا نّسْ ؤُ وَارْ إِتَّارِّي ثْمِيجَّا نّسْ أَذْ أَسْ سْڒنْ ذِي بَارَّا. 3 أَغَانِيمْ إِنْضفْسنْ وَارْ ث إِتَّارژِّي شَا ؤُ ثَافْثِيتْشْ ن ثِيفّسْثْ إِتّْذُوخُّوننْ وَارْ ث إِسّخْسِييْ شَا، وَاهْ، س ثِيذتّْ أَذْ إِسُّوفّغْ ثَاسڭْذَا. 4 نتَّا وَارْ إِتِّيحڒْ ؤُ وَارْ إِتّْوَارژِّي أَڒْ د-إِسّْبدّْ ثَاسڭْذَا خْ ثمُّورْثْ ؤُ غَارْ ثْغُورِي نّسْ أَذْ رَاجَانْثْ ثِيڭْزِيرِينْ.“ 5 ”أَمُّو إِ إِقَّارْ أَربِّي، سِيذِي، ونِّي إِڭِّينْ ؤُ إِبزّْعنْ إِجنْوَانْ، ونِّي إِڭِّينْ ثَامُّورْثْ ذ مِينْ خَاسْ إِغمّْينْ، ونِّي إِتِّيشنْ ثْوَارِّيثْ ن نّفْسْ إِ ڒْڭنْسْ إِ ذَايسْ إِزدّْغنْ، ؤُ بُوحْبڒْ إِ ينِّي خَاسْ إِڭُّورنْ: 6 ’نشّْ، سِيذِي، ڒَاغِيغْ أَشْ ذِي ثْسڭْذَا ؤُشَا أَذْ شكْ منْعغْ زڭْ ؤُفُوسْ، أَذْ شكْ حْضِيغْ ؤُشَا أَذْ شكْ أَرّغْ ذ ڒْعَاهْذْ إِ ڒْڭنْسْ ذ ثْفَاوْثْ إِ ڒڭْنُوسْ، 7 حِيمَا أَذْ ثَارْزْمذْ ثِيطَّاوِينْ إِذَاغَاڒنْ، أَذْ ثسُّوفّْغذْ إِمحْبَاسْ زِي ڒحْبسْ ؤُ ينِّي إِقِّيمنْ ذِي ثَادْجسْثْ زِي ثَادَّارْثْ ن ثْعسَّاسْثْ. 8 نشّْ ذ سِيذِي، وَا ذ إِسمْ إِنُو، ؤُشَا وَارْ تِّيشغْ شَّانْ إِنُو إِ ونّغْنِي ؤُ أَسمْغَارْ إِنُو وَارْ ث تِّيشغْ إِ ڒخْيَاڒَاثْ إِنقْشنْ. ▪ 9 خْزَارْ، ثِيمسْڒَايِينْ ثِيمزْوُورَا إِوْضنْثْ ؤُشَا ثِيمسْڒَايِينْ ن جْذِيذْ أَذْ ثنْثْ بَارّْحغْ، قْبڒْ مَّا أَذْ فّْغنْثْ، أَذْ أَومْ ثنْثْ سّشْنغْ.‘ “
أَسمْغَارْ إِ سِيذِي
10 ”غنّْجمْ إِزْڒِي ن جْذِيذْ إِ سِيذِي، أَسمْغَارْ نّسْ زڭْ إِنڭُّورَا ن ثمُّورْثْ، كنِّيوْ إِنِّي إِندّْهنْ ڒبْحَارْ ذ مَارَّا مِينْ ذَايسْ، كنِّينْثْ أَ ثِيڭْزِيرِينْ ذ إِمزْذَاغْ نْسنْثْ. ▫ ▪
11 أَذْ إِسّْڭعّذْ ڒخْڒَا ذ ثْندَّامْ نّسْ ثْمِيجَّا نْسنْ، جْمِيعْ أَكْ-ذ ڒذْشُورْ نِّي ذِي إِزدّغْ قِيذَارْ. أجّْ إِنِّي إِزدّْغنْ ذِي ڒجْرُوفْ أَذْ سْڒِيوْڒونْ، أجّْ إِ-ثنْ أَذْ سْغُويّنْ س ڒفْرَاحثْ خْ ثْقِيشِّيثِينْ ن إِذُورَارْ،
12 أجّْ إِ-ثنْ أَذْ سّْعُودْجنْ سِيذِي، أَذْ بَارّْحنْ شَّانْ نّسْ خْ مَارَّا ثِيڭْزِيرِينْ.“
شْضَارثْ ن سِيذِي
13 ”سِيذِي أَذْ د-إِفّغْ أَمْ بُو-ثغْرُوضْطْ، أَذْ إِسّكَّارْ مژْرِي ذڭْ ؤُمنْغِي أَمْ ورْيَازْ إِمحْضنْ، نتَّا أَذْ إِسْڒِيوْڒوْ، أَذْ إِسْغُويّْ إِ ؤُمنْغِي، أَذْ إِحْصَارْ قَاعْ ڒْعذْيَانْ نّسْ.
14 نشّْ ثُوغَا سّغْذغْ زڭْ وشْحَاڒْ ؤُيَا، ثُوغَا سْقَارغْ ذ ثبَّاثغْ إِخفْ إِنُو. أَذْ سْغُويّغْ أَمْ إِشْثنْ إِتَّارُونْ، أَذْ ثنْ أَردّْدْجغْ ؤُ أَذْ ثنْ صَارْضغْ جْمِيعْ.
15 إِذُورَارْ ذ ثوْرِيرِينْ أَذْ ثنْ أَرّغْ ذ أَمسُّوشِي ؤُ أَذْ جّغْ أَغمُّويْ أَزِيزَا نْسنْ مَارَّا أَذْ يَاژغْ، إِغزْرَانْ أَذْ ثنْ ڭّغْ ذ ثِيڭْزِيرِينْ، ؤُشَا أَذْ سِّيژْغغْ إِيڒْمَامنْ.
16 إِذَارْغَاڒنْ أَذْ ثنْ نذْهغْ خْ إِجّْ ن وبْرِيذْ وَارْ ث سِّيننْ، أَذْ ثنْ جّغْ أَذْ ؤُيُورنْ خْ ثْبْرِيذِينْ وَارْ ثنْثْ أَرْڭْبنْ. طّْرَامْ زَّاثْ إِ ثِيطَّاوِينْ نْسنْ أَذْ ث ڭّغْ ذ ثْفَاوْثْ، مِينْ إِفَارْغنْ، أَذْ ث سڭّْذغْ. ثِينَا ذ ثِيمسْڒَايِينْ إِ غَا ڭّغْ ذِي طّْوعْ نْسنْ ؤُ وَارْ ذَايْسنْ سمْحغْ.
17 إِنِّي إِتّْشَاڒَانْ خْ ڒخْيَاڒَاثْ إِنقْشنْ، إِنِّي إِقَّارنْ إِ ڒخْيَاڒَاثْ إِفسْينْ: ’كنِّيوْ ذ إِربِّيثنْ نّغْ!‘، أَقَا نِيثْنِي أَذْ ذوْڒنْ غَارْ ضفَّارْ، أَذْ سّضْحَانْ أَطَّاسْ.“ ▪
أَمْسخَّارْ أَذَارْغَاڒْ
18 ”سْڒمْ، كنِّيوْ إِذُوهْشَارْ! إِذَارْغَاڒنْ، خْزَارمْ ؤُ وَاڒَامْ.
19 مَانْ ونْ إِدْجَانْ ذ أَذَارْغَاڒْ أَمْ ؤُمْسخَّارْ إِنُو، ذ أَذهْشُورْ أَمْ ؤُرقَّاسْ إِنُو؟ مَانْ ونْ إِدْجَانْ ذ أَذَارْغَاڒْ أَمْ ؤُمْثِيقِّي ؤُ ذ أَذَارْغَاڒْ أَمْ ؤُمْسخَّارْ ن سِيذِي؟ 20 أَطَّاسْ إِ ثتّْوَاڒِيذْ، مَاشَا وَارْ ثُوشِيذْ وَالُو، إِوَا نتَّا يَارْزمْ إِمزُّوغنْ، مَاشَا وَارْ إِتّسْڒِي شَا.▪ 21 ثُوغَا يَارْضَا سِيذِي ذِي طّْوعْ ن ثْسڭْذَا نّسْ مَاحنْذْ أَذْ إِسّمْغَارْ ذ إِسّْعُودْجْ شَّارِيعَا. 22 مَاشَا ڒخُّو نِيثْنِي ذ إِجّْ ن ڒْڭنْسْ إِتّْوَاشَارْ، إِتّْوَاكشّضْ. مَارَّا تّْوَاشدّنْ ذڭْ إِفْرَانْ، تّْوَاقّْننْ ذِي ڒحْبسْ. نِيثْنِي ذوْڒنْ ذ ثَايْمَارْثْ، أَمْ وَارْ ذِينْ إِدْجِي ؤُمْسنْجمْ، ذوْڒنْ إِ ثْكشَّاضْثْ، مَاشَا ؤُڒَا ذ إِجّْ مَا إِقَّارْ: ’أَرّْ إِ-ث-إِ-ذ!‘ “
23 ”مَانْ ونْ زَّايْومْ أَذْ إِوْشْ أَمزُّوغْ إِ مَانْ أَيَا؟ مَانْ ونْ إِ غَا إِحكَّارنْ، مَانْ ونْ إِ غَا إِسڒْ ذِي طّْوعْ ن مِينْ غَا يِيڒِينْ ثِيوشَّا؟ 24 مَانْ ونْ إِسِّيوْضنْ يَاعْقُوبْ أَمْ ثيْمَارْثْ ذ إِسْرَائِيل إِ إِخوَّاننْ؟ مَا وَارْ ث إِڭِّي سِيذِي، ونِّي ذِي نخْضَا؟ مَاغَارْ نِيثْنِي وَارْ خْسنْ أَذْ ؤُيُورنْ خْ إِبْرِيذنْ نّسْ، وَارْ سْڒِينْ غَارْ شَّارِيعَا نّسْ. 25 س ؤُينِّي خَاسنْ إِزدْجعْ ڒْحَاذُوقْ ن وغْضَابْ نّسْ ؤُڒَا ذ لْعُونْفْ ن ڭَارَّا. إِقوَّارْ أَسنْ س إِشعَّاڒنْ، مَاشَا نِيثْنِي وَارْ ذ أَسْ حكَّارنْ، إِقّذْ أَسنْ ثِيمسِّي، مَاشَا نِيثْنِي وَارْ ث كْسِينْ غَارْ وُوڒْ نْسنْ.“