‏1 ذڭْ وُوسَّانْ نِّي إِحْڒشْ حِيزْقِييَا س إِجّْ ن ڒحْڒَاشْ إِنقّنْ. يُوسَا-د غَارسْ ؤُنَابِي إِشَاعْيَا، مِّيسْ ن أَمُوصْ، إِنَّا أَسْ: ”أَمُّو إِ إِقَّارْ سِيذِي: ’أوْشْ ڒُومُورَاثْ إِ ثَادَّارْثْ نّكْ، مَاغَارْ أَذْ ثمّْثذْ، وَارْ ثتّْغِيمِيذْ ثدَّارذْ عَاذْ كْثَارْ.‘ “ ‏2 خنِّي إِنّقْڒبْ حِيزْقِييَا س ؤُغمْپُوبْ نّسْ غَارْ ڒْحِيضْ ؤُشَا إِژُّودْجْ غَارْ سِيذِي، ‏3 إِنَّا: ”أَ، سِيذِي، عْقڒْ أَقَا نشّْ ؤُيُورغْ زَّاثْ إِ وُوذمْ نّكْ س ڒَامَانْ ؤُ س يِيجّْ ن وُوڒْ إِكمّْڒنْ ؤُ ڭِّيغْ مِينْ إِدْجَانْ نِيشَانْ ذِي ثِيطَّاوِينْ نّكْ.“ ؤُشَا إِبْذَا حِيزْقِييَا إِتّْرُو س جّْهذْ.

‏4 يُوسَا-د وَاوَاڒْ ن سِيذِي غَارْ إِشَاعْيَا، إِنَّا:

‏5 ”ؤُيُورْ، إِنِي إِ حِيزْقِييَا: ’أَمُّو إِ إِقَّارْ سِيذِي، أَربِّي ن بَابَاشْ ذَاوُوذْ: نشّْ سْڒِيغْ إِ ثْژَادْجِيثْ نّكْ ؤُ ژْرِيغْ إِمطَّاونْ نّكْ. خْزَارْ، نشّْ أَذْ أَرْنِيغْ خمّسْطَاشْ ن إِسڭّْوُوسَا إِ وُوسَّانْ ن ثُوذَارْثْ نّكْ. ‏6 نشّْ أَذْ شكْ سّْنجْمغْ زڭْ ؤُفُوسْ ن ؤُجدْجِيذْ ن أَشُّورْ، ؤُڒَا ذ ثَانْذِينْثْ. نشّْ أَذْ سّڒْقِيغْ خْ ثنْذِينْثْ-أَ. ‏7 أَيَا أَذْ يِيڒِي ذ ڒعْڒَامثْ ن سِيذِي إِ شكْ، أَقَا سِيذِي أَذْ إِڭّْ أَوَاڒْ-أَ نِّي إِنَّا. ‏8 خْزَارْ، أَذْ سّْعقْبغْ ثِيڒِي خْ ثْرفِّيذِينْ ن أَحَازْ نِّي د-إِهْوَانْ خْ ثْرفِّيذِينْ ن دّْرُوجْ ن ثْفُوشْثْ، عشْرَا ن ثْرفِّيذِينْ.‘ “ خنِّي ثعْقبْ-د ثْفُوشْثْ عشْرَا ن ثْرفِّيذِينْ خْ ثْرفِّيذِينْ نِّي زِي د-ثهْوَا.

‏9 ثِيرَا ن حِيزْقِييَا، أَجدْجِيذْ ن يَاهُوذَا، ڒَامِي ثُوغَا إِحْڒشْ ؤُشَا إِڭّنْفَا زِي ڒهْڒَاشْ نّسْ.

‏10 ”نشّْ نِّيغْ: ’ڒخُّو ذڭْ وزْينْ ن وُوسَّانْ ن ثُوذَارْثْ إِنُو إِتّْخصَّا أَذْ ؤُيُورغْ خْ ثوُّورَا ن ڒَاخَارْثْ. مِينْ إِقِّيمنْ ن إِسڭّْوُوسَا إِنُو تّْوَاكّْسنْ زَّايِي.‘

‏11 نشّْ نِّيغْ: ’وَارْ ژَترّغْ عَاذْ سِيذِي، سِيذِي، ذِي ثمُّورْثْ ن يِينِّي إِدَّارنْ، وَارْ تّْوِيڒِيغْ عَاذْ إِوْذَانْ أَكْ-ذ إِمزْذَاغْ ن ڒَاخَارْثْ.‘

‏12 ثِيشْڒِي ن ثُوذَارْثْ إِنُو أَذْ ت خَافِي أَرْژنْ، أَذْ زَّايِي ت كّْسنْ أَمْ كّْسنْ أَقِيضُونْ ن ؤُمكْسَاوْ. أَمْ بُو-ؤُزطَّا ضفْسغْ ثُوذَارْثْ إِنُو. أَذْ أَيِي إِقسّْ زِي دّبُّوزْ ن ثْخيَّاضْثْ: ’أَذْ ثقْضِيذْ ثُوذَارْثْ إِنُو جَارْ وَاسّْ ذ دْجِيڒثْ!‘ ^▫  

‏13 رَاجِيغْ س ضّْبَارْ أَڒْ أَثفُّو. نتَّا أَذْ يَارْژْ إِخْسَانْ إِنُو أَمْ وَايْرَاذْ: ’أَذْ ثقْضِيذْ ثُوذَارْثْ إِنُو جَارْ ؤُثفُّو ذ دْجِيڒثْ!‘

‏14 تّْجِيوْجِيوغْ أَمْ ثْفَاڒْدْجسْثْ إِتّنّْضنْ أَمْ ثطَّاوْ، تّْڭرْڭُورغْ أَمْ ثذْبِيرْثْ. سّْڭعّْذغْ ثِيطَّاوِينْ إِنُو: ’أَ سِيذِي إِنُو، نشّْ تّْوَاحْصَارغْ، إِڒِي ذ أَضْمَانْ إِ نشّْ!‘ ^▪  

‏15 مِينْ إِ غَا إِنِيغْ؟ مِينْ ذ أَيِي إِنَّا، أَقَا إِڭَّا إِ-ث. مَارَّا إِسڭّْوُوسَا ن ثُوذَارْثْ إِنُو أَذْ كّغْ خْ ثَارْزُوڭِي ن ڒعْمَارْ إِنُو.

‏16 ’أَ سِيذِي إِنُو، خْ مَانْ أَيَا إِزمَّارْ بْنَاذمْ أَذْ إِدَّارْ ؤُشَا سنّجْ إِ مَارَّا أَيَا ذَايسْ ثدْجْ ثُوذَارْثْ ن بُوحْبڒْ إِنُو، مَاغَارْ شكْ أَذْ أَيِي ثڭّنْفِيذْ ؤُشَا أَذْ أَيِي ثَارِّيذْ أَذْ ذوْڒغْ غَارْ ثُوذَارْثْ!

‏17 خْزَارْ، مِينْ ثُوغَا أَيِي ذ ثَارْزُوڭِي يَارزْڭنْ، إِذْوڒْ إِ ڒهْنَا. شكْ ثْڒسْقذْ غَارْ ڒعْمَارْ إِنُو أَطَّاسْ أَڒَامِي ذ أَيِي ثحْضِيذْ زڭْ وحْفُورْ ن ؤُهلّكْ، مَاغَارْ ثنْضَارذْ مَارَّا دّْنُوبْ إِنُو أَوَارْنِي إِ وعْرُورْ نّكْ.

‏18 مَاغَارْ ڒَاخَارْثْ وَارْ شكْ ثْقَاذَا شَا، ڒْموْثْ وَارْ شكْ إِسّمْغَارْ. وِي إِ غَا إِهْوَانْ ذڭْ وحْفُورْ، وَارْ تّْرِيجِينْ ڒَامَانْ نّكْ.

‏19 ونِّي إِدَّارنْ، أَ ونِّي إِدَّارنْ، أَقَا نتَّا أَذْ شكْ إِقَاذَا. بَابَاثْسنْ أَذْ إِسّْشنْ ڒَامَانْ نّكْ إِ إِحنْجِيرنْ نّسْ.‘ “

‏20 ”سِيذِي يُوسَا-د حِيمَا أَذْ أَيِي إِسّنْجمْ. س ؤُينِّي أَذْ نُورَارْ س ؤُزنْزُونْ إِنُو مَارَّا ؤُسَّانْ ن ثُوذَارْثْ نّغْ ذِي ثَادَّارْثْ ن سِيذِي.“

‏21 أَقَا إِنَّا إِشَاعْيَا: ”أجّْ إِ-ثنْ أَذْ أَوْينْ إِجّْ ن وغْرُومْ ن ثَازَارْثْ ؤُشَا أَذْ ث ڒثْفنْ خْ ثْحبُّوشْثْ، خنِّي أَذْ إِڭّنْفَا.“ ^▪  

‏22 حِيزْقِييَا أَقَا إِنَّا: ”مَانْ إِ غَا ثِيڒِي ڒعْڒَامثْ أَقَا نشّْ أَذْ سّْڭعّْذغْ عَاوذْ غَارْ ثَادَّارْثْ ن سِيذِي؟“