‏1 ؤُمِي إِسْڒَا ؤُجدْجِيذْ حِيزْقِييَا أَيَا، إِشَارّڭْ أَرُّوضْ نّسْ، إِذْڒَا إِخفْ نّسْ س إِشْثْ ن ثْخَانْشثْ ن وشْضَانْ ؤُشَا يُوذفْ غَارْ ثَادَّارْثْ ن سِيذِي. ‏2 خنِّي إِسّكّْ نتَّا أَلْيَاقِيمْ، ڒمْقدّمْ ن ثْزذِّيغْثْ ن ؤُجدْجِيذْ، ذ شَابْنَا، أَمَارِيرْ، ذ إِمْغَارنْ ن إِكهَّاننْ ذڭْ وَارُّوضْ ن ثْخُونْشَايْ ن وشْضَانْ غَارْ ؤُنَابِي إِشَايَا، مِّيسْ ن أَمُوصْ. ‏3 نِيثْنِي نَّانْ أَسْ: ”أَمُّو إِ إِقَّارْ حِيزْقِييَا: ’أَسّْ-أَ ذ إِجّْ ن وَاسّْ ن ڒحْصَارثْ ؤُ ن وعْقَابْ ؤُ ن ؤُبهْذڒْ، مَاغَارْ إِحنْجِيرنْ إِوْضنْ-د غَارسْ أَڒْ أَرْزَامْ ن ؤُعذِّيسْ ن يمَّاثْسنْ، مَاشَا وَارْ ذِينْ جّهْذْ إِ ثْوَارُوثْ. ‏4 أَذْ ثَاغْ سِيذِي، أَربِّي نّكْ، إِسْڒَا مَارَّا أَوَاڒنْ ن ؤُكُومَانْذَارْ ن ڒْعسْكَارْ ونِّي د-إِسّكّْ سِيذِيسْ، أَجدْجِيذْ ن أَشُّورْ، حِيمَا أَذْ إِسْثهْزَا زِي أَربِّي إِدَّارنْ، ؤُ أَذْ ثَاغْ سِيذِي، أَربِّي نّكْ، أَذْ إِعَاقبْ أَوَاڒنْ نِّي إِسْڒَا. سْڭعّذْ خنِّي إِشْثْ ن ثْژَادْجِيثْ ذِي طّْوعْ ن ڒْبَاقِي نِّي إِ غَا إِتّْوَافنْ عَاذْ.‘ “

‏5 أَمُّو إِوْضنْ إِمْسخَّارنْ ن ؤُجدْجِيذْ حِيزْقِييَا غَارْ إِشَاعْيَا. ‏6 إِنَّا أَسنْ إِشَاعْيَا: ”أَمُّو إِتّْخصَّا أَذْ ثِينِيمْ إِ سِيذِيثْومْ: ’أَمُّو إِ إِقَّارْ سِيذِي: وَارْ ثڭّْوذْ شَا زڭْ وَاوَاڒنْ إِ ثسْڒِيذْ، إِ زِي إِ ذ أَيِي شقّْفنْ إِمْسخَّارنْ ن ؤُجدْجِيذْ ن أَشُّورْ. ‏7 خْزَارْ، نشّْ أَذْ ذَايسْ ڭّغْ إِجّْ ن بُوحْبڒْ ؤُ نتَّا أَذْ إِسڒْ إِجّْ ن ڒخْبَارْ ؤُشَا خنِّي أَذْ إِعْقبْ غَارْ ثمُّورْثْ نّسْ ؤُ نشّْ أَذْ ث نْغغْ ذِينْ ذِي ثمُّورْثْ نّسْ س سِّيفْ.‘ “

‏8 خنِّي إِعْقبْ-د ؤُكُومَانْذَارْ ن ڒْعسْكَارْ ؤُشَا يُوفَا أَجدْجِيذْ ن أَشُّورْ إِتّْمنْغَا أَكْ-ذ ثنْذِينْثْ ن لِيبْنَا، مَاغَارْ إِسْڒَا أَقَا إِقْڒعْ إِقِيضَانْ نّسْ إِفّغْ زِي لَاخِيشْ. ‏9 ؤُمِي إِسْڒَا أَقَا نَّانْ خْ ثِيرْهَاقَا، أَجدْجِيذْ ن كُوشْ، ”خْزَارْ، إِفّغْ-د حِيمَا أَكِيذكْ إِمْنغْ!“، ؤُمِي ث إِسْڒَا، إِسّكّْ عَاوذْ إِرقَّاسنْ غَارْ حِيزْقِييَا، إِنَّا:

‏10 ”أَمُّو إِ إِتّْخصَّا أَذْ ثسِّيوْڒمْ أَكْ-ذ حِيزْقِييَا، أَجدْجِيذْ ن يَاهُوذَا، أَذْ ثِينِيمْ: ’وَارْ تّجِّي أَذْ شكْ إِغْوَا أَربِّي نّكْ ونِّي خْ ثتّْشَاڒذْ أَمْ إِقَّارْ: ؤُرْشَالِيمْ وَارْ ثْوطِّي إِ ؤُجدْجِيذْ ن أَشُّورْ ذڭْ إِفَاسّنْ!

‏11 خْزَارْ، ثسْڒِيذْ مِينْ ڭِّينْ إِجدْجِيذنْ ن أَشُّورْ أَكْ-ذ مَارَّا ثِيمُّورَا نّغْنِي، ثِينِّي حَارّْمنْ نِيثْنِي إِ ؤُثحِّي. مَا إِتّْغِيڒْ أَشْ أَذْ ثتّْوَاسْنجْمذْ؟

‏12 مَا سّْنجْمنْ ثنْ إِربِّيثنْ ن ڒڭْنُوسْ نِّي إِتّْوَاردّْدْجنْ زِي ڒجْذُوذْ إِنُو؟ جُوزَانْ ذ حَارَانْ ذ رَاصَافْ ذ أَيْثْ ن عَاذَانْ إِنِّي ثُوغَا إِزدّْغنْ ذِي ثَالَاسَّارْ؟

‏13 مَانِي إِدْجْ ؤُجدْجِيذْ ن حَامَاثْ ذ ؤُجدْجِيذْ ن أَرْفَاذْ ذ ؤُجدْجِيذْ ن ثنْذِينْثْ ن سَافَارْوَايِيمْ ؤُڒَا ذ أَجدْجِيذْ ن هَانَاعْ ذ عِيوَّا؟‘ “

‏14 حِيزْقِييَا إِكْسِي ثِيبْرَاثِينْ زڭْ ؤُفُوسْ ن إِرقَّاسنْ ؤُشَا إِغْرِي ثنْثْ. خنِّي إِڭعّذْ نتَّا غَارْ ثَادَّارْثْ ن سِيذِي ؤُشَا إِبزّعْ إِ-ثنْثْ حِيزْقِييَا زَّاثْ إِ وُوذمْ ن سِيذِي،

‏15 ؤُ حِيزْقِييَا إِژُّودْجْ إِ سِيذِي، إِنَّا:

‏16 ”أَ سِيذِي، أَربِّي ن إِسْرَائِيل، ونِّي إِتّْغِيمَانْ سنّجْ إِ إِكِيرُوبنْ! شكْ، وَاهْ شكْ وحّْذكْ ذ أَربِّي ن مَارَّا ثِيڭلْذِيوِينْ ن دُّونشْثْ. شكْ ثڭِّيذْ إِجنْوَانْ ذ ثمُّورْثْ. ^▫  

‏17 أوْشْ أَمزُّوغْ نّكْ، أَ سِيذِي، أَرْزمْ ثِيطَّاوِينْ نّكْ ؤُشَا ثخْزَارذْ! سڒْ مَارَّا أَوَاڒنْ ن سَانْحَارِيبْ ونِّي د-إِسّكّْ نتَّا حِيمَا أَذْ إِعيّبْ أَربِّي إِدَّارنْ.

‏18 ذ ثِيذتّْ، أَ سِيذِي، إِجدْجِيذنْ ن أَشُّورْ قْضَانْ ثِيمُّورَا نِّي، خَارّْبنْ ثَامُّورْثْ نْسنْ

‏19 ؤُ نْضَارنْ إِربِّيثنْ نْسنْ ذِي ثْمسِّي، مَاغَارْ ثُوغَا وَارْ دْجِينْ ذ إِربِّيثنْ، مَاشَا ذ ثِيمڭَّا ن ؤُفُوسْ ن يوْذَانْ وَاهَا، زڭْ ؤُكشُّوضْ ذ وژْرُو ؤُشَا نِيثْنِي قْضَانْ ثنْ. ‏20 ڒخُّو مَاشَا، أَ سِيذِي، أَربِّي نّغْ، سنْجمْ أَنغْ زڭْ ؤُفُوسْ نّسْ، مَاحنْذْ مَارَّا ثِيڭلْذِيوِينْ ن دُّونشْثْ أَذْ سّْننْ، أَ سِيذِي، أَقَا شكْ وحّْذكْ ذ أَربِّي.“

‏21 خنِّي إِسّكّْ إِشَاعْيَا، مِّيسْ ن أَمُوصْ، إِجّْ ن ؤُرقَّاسْ غَارْ حِيزْقِييَا، إِنَّا: ”أَمُّو إِ إِقَّارْ سِيذِي، أَربِّي ن إِسْرَائِيل: ’نشّْ سْڒِيغْ س مِينْزِي ثژُّودْجذْ-د غَارِي خْ سَانْحَارِيبْ، أَجدْجِيذْ ن أَشُّورْ. ‏22 وَا ذ أَوَاڒْ إِ خَاسْ إِنَّا سِيذِي: ’ثَاعْزَارْشْثْ، ثَايدْجِيثْ صِيهْيُونْ، ثسّحْقَارْ إِ شكْ، نتَّاثْ ثسْثهْزَا زَّايكْ، ثَايدْجِيثْ ؤُرْشَالِيمْ ثْهزّْ أَزدْجِيفْ أَوَارْنِي أَشْ. ‏23 مَانْ ونْ ثْعيّْبذْ ؤُ ذِي مَانْ ونْ ثْشقّْفذْ، مَانْ ونْ غَارْ ثسّْڭعّْذذْ ثْمِيجَّا ؤُ خْ مَانْ ونْ إِ خفْ ثسّْڭعّْذذْ س نّْفَاخثْ ثِيطَّاوِينْ نّكْ؟ شكْ ثتّْغنَّانذْ خْ ؤُمْقدَّاسْ ن إِسْرَائِيل! ‏24 س ؤُقمُّومْ ن إِمْسخَّارنْ نّكْ ثذْعِيذْ سِيذِي إِنُو، ثنِّيذْ: س ؤُبَارُّو ن إِكَارُّوثنْ إِنُو ڭعّْذغْ إِذُورَارْ يُوعْڒَانْ، إِغزْذِيسنْ ن لُوبْنَانْ. نشّْ أَذْ زذْمغْ ثِيشجِّيرَا نّسْ ن ثنْڭلْثْ يُوعْڒَانْ ؤُڒَا ذ ثِيشجِّيرَا نّسْ إِشْنَانْ قَاعْ ن إِمرْزَا ؤُ نشّْ أَذْ د-أَسغْ أَڒْ ثَاقِيشَّاثْ نّسْ يُوعْڒَانْ قَاعْ، غَارْ وزْغَارْ ن ؤُمَارْجُوعْ نّسْ ن ؤُضِيڒْ. ^▫   ‏25 نشّْ غْزِيغْ أَنُوثنْ ؤُ سْوِيغْ أَمَانْ. س ثْڒقَّا ن إِضَارنْ إِنُو سِّيژْغغْ مَارَّا إِغزْرَانْ ن مِيصْرَا!‘ “

‏26 ”مَا وَارْ ثسْڒِيذْ أَقَا أَطَّاسْ زڭْ وَامِي ڭِّيغْ مَانْ أَيَا ؤُشَا وْشِيغْ أَسْ ؤُذمْ ذڭْ وُوسَّانْ ن مشْحَاڒْ ؤُيَا؟ ڒخُّو جِّيغْ ث أَذْ د-إِفّغْ، أَقَا شكْ ذ ونِّي إِ غَا يَارّنْ ثِيندَّامْ إِفَارْينْ ذ ڒْخِيرْبَاثْ. ‏27 إِمزْذَاغْ نْسنْ ثُوغَا أَرْخُونْ، أَرْژِينْ، سّضْحَانْ. نِيثْنِي ثُوغَا أَثنْ أَمْ ؤُفْسُو ذڭْ إِيَّارْ، أَمْ ؤُغمُّويْ أَزِيزَا، أَمْ ؤُڒُومْ خْ ثْزغْوِينْ، ؤُ أَمْ إِمنْذِي إِشمْضنْ س ؤُسمِّيضْ قْبڒْ إِ غَا إِفّغْ. ‏28 مَاشَا نشّْ سّْنغْ أَغِيمِي نّكْ ذ ؤُفُّوغْ نّكْ ذ ثْوَاسِيثْ نّكْ ذ ؤُغوّغْ نّكْ خَافِي. ‏29 مِينْزِي شكْ ثْغوّْغذْ خَافِي ؤُ ثُوفّثْ نّكْ ثِيوضْ-د غَارْ إِمزُّوغنْ إِنُو، أَذْ أَشْ د-سّكّغْ إِشْثْ ن ثْسنَّارْثْ ذڭْ ونْزَارنْ ؤُ أَذْ ڭّغْ إِشْثْ ن سْڒِيمثْ جَارْ إِينْشِيشنْ نّكْ ؤُ نشّْ أَذْ شكْ أَرّغْ خْ وبْرِيذْ إِ ذِي د-ثُوسِيذْ ذَا.“

‏30 ”ثَا أَذْ أَشْ ثِيڒِي ذ ڒعْڒَامثْ: ذڭْ ؤُسڭّْوَاسْ-أَ أَذْ ثشّمْ مِينْ غَا إِغمْينْ س يِيخفْ نّسْ ؤُ ذڭْ ؤُسڭّْوَاسْ وِيسّْ ثْنَاينْ مِينْ زَّايسْ غَا إِغمْينْ عَاوذْ، مَاشَا ذڭْ ؤُسڭّْوَاسْ وِيسّْ ثْڒَاثَا أَذْ ثْزَارْعمْ ؤُ أَذْ ثمْجَارمْ، أَذْ ثژُّومْ ثِيزَايَارِينْ ذڭْ إِمَارْجَاعنْ ؤُشَا أَذْ ثشّمْ ڒْغِيدْجثْ نّسْ. ‏31 مَاغَارْ مِينْ إِنجْمنْ، مِينْ إِقِّيمنْ زِي ثَادَّارْثْ ن يَاهُوذَا، أَذْ إِوّثْ عَاوذْ إِژوْرَانْ غَارْ سْوَادَّايْ ؤُ سنّجْ أَذْ يَاوِي ڒْغِيدْجثْ. ‏32 مَاغَارْ زِي ؤُرْشَالِيمْ أَذْ د-إِفّغْ مِينْ إِقِّيمنْ ؤُ زڭْ وذْرَارْ ن صِيهْيُونْ أَذْ إِفّغْ مِينْ إِنّجْمنْ، شْضَارثْ ن سِيذِي ن ڒْعسْكَارَاثْ أَذْ ت إِڭّْ.“

‏33 ”س ؤُينِّي، أَمُّو إِ إِقَّارْ سِيذِي خْ ؤُجدْجِيذْ ن أَشُّورْ: ’نتَّا وَارْ د-إِتِّيذفْ شَا غَارْ ثنْذِينْثْ-أَ ؤُ وَارْ ذَايسْ إِشِّيثْ شَا ؤُڒَا ذ إِشْثْ ن فْڒِيثْشَا ؤُ وَارْ غَارسْ د-إِقَارّبْ شَا س ؤُڒَا ذ إِشْثْ ن ثْسدَّارْثْ ن ؤُعسْكَارِي ؤُ وَارْ خَاسْ إِتّْبقِّيضْ ؤُڒَا ذ إِجّْ ن لْبَارَاجْ إِ ڒحْصَارثْ. ‏34 خْ وبْرِيذْ إِ خْ د-يُوسَا، أَذْ د-إِعْقبْ. وَارْ إِتِّيذِيفْ شَا غَارْ ثنْذِينْثْ-أَ، إِنَّا سِيذِي. ‏35 نشّْ أَذْ سّڒْقِيغْ خْ ثنْذِينْثْ-أَ حِيمَا أَذْ ت سّْنجْمغْ ذِي طّْوعْ إِنُو ؤُ ذِي طّْوعْ ن ؤُمْسخَّارْ إِنُو ذَاوُوذْ.‘ “ ^▪  

‏36 خنِّي إِفّغْ لْمَالَاكْ ن سِيذِي ؤُشَا إِنْغَا مْيَا ؤُ-خمْسَا ؤُ-ثْمنْيِينْ-أَڒفْ ن يرْيَازنْ ذِي ڒْمَارْڭحْ ن ڒْعسْكَارْ ن أَشُّورْ. ؤُمِي د-كَّارنْ نِيثْنِي ثِيوشَّا نّسْ، خْزَارْ، أَقَا أَثنْ مَارَّا إِذْسنْ ذ ڒْخشْبَاثْ. ^▪  

‏37 ؤُشَا إِفْسِي سَانْحَارِيبْ، أَجدْجِيذْ ن أَشُّورْ، إِقِيضَانْ نّسْ، إِرُوحْ، إِعْقبْ غَارْ ثمُّورْثْ نّسْ. إِقِّيمْ إِزدّغْ ذِي نِينْوَا.

‏38 ؤُمِي يُوضَارْ إِجّْ ن وَاسّْ ذِي ثَادَّارْثْ ن أَربِّي نّسْ نِيسْرُوخْ، إِمْسَارْ، أَقَا إِحنْجِيرنْ نّسْ أَذْرَامِّيلِيكْ ذ شَارَاصَارْ نْغِينْ ث س سِّيفْ. نِيثْنِي أَروْڒنْ غَارْ ثمُّورْثْ ن أَرَارَاثْ. مِّيسْ أَسَارْحَادُّونْ إِذْوڒْ ذ أَجدْجِيذْ ذڭْ ومْشَانْ نّسْ.