‏1 إِسمْ إِصْبحْ إِحْڒَا خْ زّشْثْ إِصبْحنْ، أَسّْ ن ڒْموْثْ إِحْڒَا خْ وَاسّْ ن ثَارْوَا. ^▪   ‏2 ثحْڒَا ثْوَاحِيثْ غَارْ ثَادَّارْثْ ن وشْضَانْ، خْ ثْوَاحِيثْ غَارْ ثَادَّارْثْ مَانِي تّْقدَّامنْ مَاشَّا.، مِينْزِي ذَايسْ إِ إِدْجْ قطُّو ن بْنَاذمْ مَارَّا ؤُ ونِّي إِدَّارنْ إِتّڭّْ إِ-ت ذڭْ وُوڒْ نّسْ. ‏3 إِحْڒَا وشْضَانْ خْ ثْذحَّاشْثْ، مَاغَارْ س إِجّْ ن ؤُغمْپُوبْ إِشضْننْ إِتّْذَاكّْوَاڒْ وُوڒْ حْسنْ. ‏4 ؤُڒْ ن إِمِيغِيسنْ أَقَا-ث ذِي ثَادَّارْثْ ن وشْضَانْ، مَاشَا ؤُڒْ نْ إِپُوهَاڒِييّنْ أَقَا-ث ذِي ثَادَّارْثْ ن ڒفْرَاحثْ.

‏5 إِحْڒَا أَذْ ثسْڒذْ غَارْ ؤُوبّخْ زڭْ إِمِيغِيسنْ خْ وسْحسِّي إِ يزْڒِي ن إِپُوهَاڒِييّنْ. ^▪   ‏6 مَاغَارْ أَمْ ؤُثَارْثكْ ن إِسنَّاننْ سَاذُو ؤُمقْرَاجْ، أَمُّو إِ ثڭَّا ثْضحَّاشْثْ ن ؤُپُوهَاڒِي. ؤُڒَا ذ مَانْ أَيَا أَقَا-ث ذِي ڒْبَاطڒْ. ^▪  

‏7 مَاغَارْ ڒحْصَارثْ ڭُّورْ أَذْ ثسّْپُوهْڒِي أَمِيغِيسْ، ؤُ ثَارْزفْثْ إِ أَرّشْوثْ ثسّخْسَارَا ؤُڒْ.

‏8 أَنڭَّارُو ن ثْمسْڒَاشْثْ ثحْڒَا خْ ؤُمزْوَارُو نّسْ. ونِّي غَارْ إِدْجْ تَّاسِيعْ نْ ڒْخَاضَارْ أَطَّاسْ إِحْڒَا خْ ؤُمْعفَّارْ.

‏9 وَارْ سخّضْ ذغْيَا ذِي بُوحْبڒْ نّكْ، مَاغَارْ ذڭْ وحْسِينْ ن إِپُوهَاڒِييّنْ إِزدّغْ ؤُخيّقْ. ^▫  

‏10 وَارْ ثقَّارْ: ”مِينْ ثُوغَا ذِينْ إِحْڒَانْ ذڭْ وُوسَّانْ ن زِيشْ خْ مَامّشْ دْجَانْ وُوسَّانْ-أَ؟“ مَاغَارْ أَسقْسِي أَيَا وَارْ إِزمَّارْ أَذْ إِفّغْ زِي ثِيغِيثْ.

‏11 ثِيغِيثْ أَكْ-ذ ثسْغَارْثْ ثشْنَا ؤُ أَقَا-ت ذ ڒفْضڒْ إِ ينِّي إِتّْوَاڒَانْ ثَافُوشْثْ.

‏12 مَاغَارْ ثِيغِيثْ أَقَا-ت إِ ثِيڒِي ؤُڒَا ذ تّْمنْيَاثْ أَقَا أَثنْثْ إِ ثِيڒِي. ڒفْضڒْ ن ثُوسّْنَا أَقَا ثِيغِيثْ ثتِّيشْ ثُوذَارْثْ إِ أَيْثْبَابْ نّسْ.

‏13 خْزَارْ مِينْ إِڭَّا أَربِّي، مَاغَارْ وِي إِزمَّارنْ أَذْ إِسڭّمْ مِينْ إِسّْفَارْغْ نتَّا؟

‏14 أَرّْ مژْرِي س ڒْخَارْ ذڭْ وَاسّْ ن ڒفْرَاحثْ ؤُشَا حْضَا ذڭْ وَاسّْ ن أَرْژِييّثْ، مَاغَارْ ؤُڒَا ذ وَا إِڭَّا إِ-ث أَربِّي نِيشَانْ أَمْ ونّغْنِي حِيمَا بْنَاذمْ وَارْ إِتِّيفْ ؤُڒَا ذ وَالُو أَوَارْنِي أَسْ. ^▫  

‏15 مَارَّا أَيَا إِ ژْرِيغْ ذڭْ وُوسَّانْ ن ثُوذَارْثْ إِنُو إِفنَّانْ. أَقَا ذِينْ أَمْسڭّذْ نِّي إِتّْوَاهلّْكنْ ذِي ثْسڭْذَا نّسْ ؤُشَا أَقَا ذِينْ أَعفَّانْ نِّي إِسْزُوڭَّارْثنْ ؤُسَّانْ نّسْ ذِي مَارَّا ثُوعفّْنَا نّسْ.

‏16 وَارْ ثڭّْ إِخفْ نّكْ ذ أَمْسڭّذْ أَطَّاسْ، ؤُ وَارْ ثڭّْ إِخفْ نّكْ ذ أَمِيغِيسْ أَطَّاسْ.

مَايمِّي إِ غَا ثْضيّْعذْ إِخفْ نّكْ؟

‏17 وَارْ تِّيڒِي ذ أَعفَّانْ أَطَّاسْ ؤُ وَارْ تِّيڒِي عَاوذْ ذ أَپُوهَاڒِي أَطَّاسْ.

مَايمِّي إِ غَا ثمّْثذْ مَاڒَا وَارْ د-يِيوِيضْ عَاذْ ڒْمِيجَاڒْ نّكْ؟

‏18 مْلِيحْ مَاڒَا شكْ ثْشبَّارذْ ذِي مَانْ أَيَا ؤُشَا وَارْ ذ أَسْ ثَارخُّوذْ عَاذْ، مَاغَارْ ونِّي إِتّڭّْوذنْ أَربِّي، أَذْ إِتّْوَافكّْ زِي مَارَّا أَيَا.

‏19 ثِيغِيثْ ثسّجْهذْ أَمِيغِيسْ خْ عشْرَا ن أَيْثْ ن جّهْذْ نِّي إِدْجَانْ ذڭْ إِشْثْ ن ثنْذِينْثْ.

‏20 وَاهْ نِيشَانْ، وَارْ إِدْجِي ؤُڒَا ذ إِجّْ ن بْنَاذمْ ذ أَمْسڭّذْ خْ ثمُّورْثْ، ؤُڒَا ذ إِجّْ إِتّڭّْ ڒْخَارْ ؤُ وَارْ إِخطِّي شَا. ^▪  

‏21 وَارْ تِّيشْ ثَايْنِيثْ نّكْ إِ مَارَّا أَوَاڒنْ نِّي قَّارنْ إِوْذَانْ، حِيمَا عمَّارْصْ وَارْ ثتّسْڒِيذْ أَقَا أَمْسخَّارْ نّكْ أَذْ شكْ إِنْعڒْ. ‏22 مَاغَارْ ؤُڒْ نّكْ يُوشَا أَطَّاسْ ن ثْوَاڒَاوِينْ، أَقَا ؤُڒَا ذ شكْ ثْنعْڒذْ إِنّغْنِي.

‏23 مَارَّا أَيَا بقّْشغْ ث س ثِيغِيثْ. نشّْ نِّيغْ: ”خْسغْ أَذْ كسْبغْ ثِيغِيثْ!“، مَاشَا ثِيغِيثْ ثقِّيمْ أَيِي غَارْ ڒَاڭّْوَاجْ. ‏24 مَاغَارْ مِينْ إِڭّْوجنْ ذ مِينْ يُودْجْغنْ، وَاهْ يُودْجْغنْ، مَانْ ونْ إِزمَّارنْ أَذْ ث يَافْ؟ ‏25 نّْقڒْبغْ، ؤُڒَا ذ ؤُڒْ إِنُو أَكِيذِي، مَاحنْذْ أَذْ أَفغْ ثُوسّْنَا، مَاحنْذْ أَذْ بقّْشغْ، أَذْ أَرْزُوغْ ثِيغِيثْ ذ ونْوَايْ إِ ذَايسْ، مَاحنْذْ أَذْ سّْنغْ س ثِيذتّْ أَقَا ڒْغَارْ ذ ثَاغْيُوڒِي ؤُ ثَاغْيُوڒِي ذ ثُوبُّوهڒْيَا. ^▪  

‏26 ؤُفِيغْ مِينْ إِدْجَانْ ذ أَمرْزَاڭْ خْ ڒْموْثْ: ثَامْغَارْثْ ثنِّي إِدْجَانْ أَمْ ثْرَاشَّاوِينْ ؤُ ؤُڒْ نّسْ أَمشْنَاوْ ثِيخشْفِينْ إِنقّنْ ؤُ إِفَاسّنْ نّسْ أَمشْنَاوْ إِشذِّييّنْ. ونِّي يَارْضَانْ زَّاثْ إِ وُوذمْ ن أَربِّي، إِزمَّارْ أَذْ زَّايسْ إِنْفكّْ، مَاشَا أَمذْنُوبْ أَذْ ذَايْسنْ إِمْخُومْبرْ. ^▪  

‏27 خْزَارْ، أَيَا إِ ؤُفِيغْ، إِقَّارْ ؤُمْبَارّحْ، ؤُمِي أَرنْيغْ إِشْثْ ن ڒْحَاجّثْ إِ يِيشْثنْ نّغْنِي مَاحنْذْ أَمُّو إِ غَا يَافغْ ڒْحَاسُوڒْ نّسْ: ‏28 مِينْ ثُوغَا يَارزُّو ڒعْمَارْ إِنُو عَاذْ، مَاشَا وَارْ ث ؤُفِيغْ: وَاهْ ؤُفِيغْ إِجّْ ن ورْيَازْ ذڭْ وَاڒفْ، مَاشَا إِشْثْ ن ثمْغَارْثْ وَارْ ت ؤُفِيغْ جَارْ مَارَّا يِينَا. ‏29 خْزَارْ، إِشْثْ وَاهَا إِ ؤُفِيغْ: أَقَا أَربِّي إِڭَّا بْنَاذمْ نِيشَانْ، مَاشَا نِيثْنِي أَرْزُونْ ذڭْ وَاطَّاسْ ن يبْرِيذنْ إِحْرَايْميّنْ.