‏1 مَارَّا غَارسْ ڒْمِيجَاڒْ نّسْ ؤُ أَقَا ذِينْ ثَاسَاعّثْ إِتّْوَاڭّنْ إِ كُوڒْ ثَامسْڒَاشْثْ سَاذُو أَجنَّا.

‏2 أَقَا ذِينْ إِشْثْ ن ثْسَاعّثْ ن ثَارْوَا ذ إِشْثْ ن ثْسَاعّثْ ن ڒْموْثْ،

إِشْثْ ن ثْسَاعّثْ ن ثَاژُّوثْ ؤُ ذ إِشْثْ ن ثْسَاعّثْ ن وقْڒَاعْ ن مِينْ إِثْوَاژُّونْ،

‏3 إِشْثْ ن ثْسَاعّثْ ن ثْمنْغِيوْثْ ذ إِشْثْ ن ثْسَاعّثْ ن ؤُسْڭنْفِي،

إِشْثْ ن ثْسَاعّثْ ن وهْذَامْ ذ إِشْثْ ن ثْسَاعّثْ ن ڒبْنِي،

‏4 إِشْثْ ن ثْسَاعّثْ ن إِمطَّاونْ ذ إِشْثْ ن ثْسَاعّثْ ن ثْضحَّاشْثْ،

إِشْثْ ن ثْسَاعّثْ ن وشْضَانْ ذ إِشْثْ ن ثْسَاعّثْ ن شّْضِيحْ،

‏5 إِشْثْ ن ثْسَاعّثْ ن ؤُحجَّارْ ن وژْرُو ذ إِشْثْ ن ثْسَاعّثْ ن وجْرَاوْ ن وژْرُو،

إِشْثْ ن ثْسَاعّثْ ن ؤُذَارّعْ ذ إِشْثْ ن ثْسَاعّثْ ن ڒَاڭّْوَاجْ خْ ؤُذَارّعْ، ^▪  

‏6 إِشْثْ ن ثْسَاعّثْ ن ثَارزُّوثْ ذ إِشْثْ ن ثْسَاعّثْ ن ؤُودَّارْ،

إِشْثْ ن ثْسَاعّثْ ن ؤُخمّرْ ذ إِشْثْ ن ثْسَاعّثْ ن ؤُسيّبْ،

‏7 إِشْثْ ن ثْسَاعّثْ ن ؤُشَارّڭْ ذ إِشْثْ ن ثْسَاعّثْ ن ؤُخيّضْ،

إِشْثْ ن ثْسَاعّثْ ن ؤُسغْذِي ذ إِشْثْ ن ثْسَاعّثْ ن ڒْهَارْضْ،

‏8 إِشْثْ ن ثْسَاعّثْ ن ثَايْرِي ذ إِشْثْ ن ثْسَاعّثْ ن وشْرَاهْ،

إِشْثْ ن ثْسَاعّثْ ن ڭَارَّا ذ إِشْثْ ن ثْسَاعّثْ ن ڒهْنَا.

‏9 مَانْ ثِيزِي غَارْ ونِّي إِخدّْمنْ خْ مِينْ خفْ يَاربّڒْ؟ ^▪  

‏10 نشّْ ژْرِيغْ شّْغڒْ نِّي إِوْشَا أَربِّي إِ ثَارْوَا ن بْنَاذمْ مَاحنْذْ أَذْ زَّايسْ سِّيحْڒنْ إِخفْ نْسنْ.

‏11 نتَّا إِڭَّا مَارَّا ذ أَصبْحَانْ ذِي ڒْوقْثْ نّسْ. إِڭَّا ؤُڒَا ذ أَكُوذْ إِ ڒبْذَا ذڭْ وُوڒْ نْسنْ، بْڒَا مَا إِزمَّارْ بْنَاذمْ أَذْ إِحَاكَا ذِي ثْمڭَّا نِّي إِڭَّا أَربِّي زڭْ ؤُمزْوَارُو غَارسْ أَڒْ أَنڭَّارُو.

‏12 نشّْ ؤُفِيغْ وَارْ غَارْسنْ إِدْجِي مِينْ إِحْڒَانْ خْ مِينِّي فَارّْحنْ إِوْذَانْ نِيغْ أَذْ أَرّنْ مژْرِي مڒْمِي نِيثْنِي عَاذْ ذِي ثُوذَارْثْ نْسنْ.

‏13 ؤُ عَاوذْ أَقَا كُوڒْ بْنَاذمْ أَذْ إِشّْ ؤُ أَذْ إِسُو ؤُشَا أَذْ يَارّْ مژْرِي ذِي مِينْ إِصبْحنْ ذِي مَارَّا أَمَارّثْ نّسْ. أَيَا ذ إِشْثْ ن ثَارْزفْثْ ن أَربِّي.

‏14 نشّْ سّْنغْ أَقَا مَارَّا مِينْ إِتّڭّْ أَربِّي، أَذْ يِيڒِي إِ ڒبْذَا. وَارْ غَارسْ إِتّْمَارْنِي وَالُو ؤُ وَارْ زَّايسْ إِتّْوَاسنْقِيسْ وَالُو. أَربِّي إِڭَّا إِ-ث مَاحنْذْ أَذْ ڭّْوذنْ زَّاثْ إِ وُوذمْ نّسْ.

‏15 مِينْ إِدْجَانْ، ثُوغَا إِدْجْ قْبڒْ، ؤُشَا مِينْ غَا يِيڒِينْ، ثُوغَا إِدْجْ عَاذْ. أَربِّي يَارزُّو خْ مِينْ إِعْذُونْ.

‏16 أَقَا ژْرِيغْ سَاذُو ثْفُوشْثْ عَاوذْ أَمْشَانْ ن ڒْحقّْ، أَقَا إِسلّطْ ذِينْ ڒْغشّْ، ؤُڒَا ذ أَمْشَانْ ن ثْسڭْذَا، أَقَا ذِينْ ڒْغَارْ.

‏17 نشّْ نِّيغْ ذڭْ وُوڒْ إِنُو: ”أَربِّي أَذْ إِحْكمْ أَمْسڭّذْ ذ ؤُعفَّانْ، مَاغَارْ ذِينِّي إِشْثْ ن ثْسَاعّثْ إِ كُوڒْ ثَامسْڒَاشْثْ ؤُ إِ قَاعْ ڒْخذْمثْ.“

‏18 نشّْ نِّيغْ ذڭْ وُوڒْ إِنُو: ”أَقَا ذِي طّْوعْ ن ثَارْوَا ن بْنَاذمْ، أَقَا أَربِّي أَذْ ثنْ إِسِّيففْ ؤُ نِيثْنِي ڭُّورْ أَذْ ثْوَاڒَانْ أَقَا نِيثْنِي أَمشْنَاوْ ڒْمَاڒْ، نِيثْنِي ذڭْ إِخفْ نْسنْ.“

‏19 مَاغَارْ خْ ثِيرَا ن ثَارْوَا ن بْنَاذمْ ؤُ خْ ثِيرَا ن ڒْمَاڒْ: نِيثْنِي غَارْسنْ ثِيرَا ذ إِشْثْ. أَمْ مَامّشْ إِمُّوثْ وَا، إِمُّوثْ ؤُڒَا ذ ونّغْنِي، مَارَّا إِذْسنْ غَارْسنْ ذ ثْوَارِّيثْ ن نّفْسْ ذ إِجّْ. وَارْ ذِينْ إِدْجِي ڒفْضڒْ إِ بْنَاذمْ خْ ڒْمَاڒْ، مَاغَارْ مَارَّا أَقَا-ث ذِي ڒْبَاطڒْ. ‏20 مَارَّا إِذْسنْ ڭُّورنْ غَارْ إِجّْ ن ومْشَانْ، مَارَّا نِيثْنِي زڭْ ؤُشَاڒْ ؤُشَا أَذْ د-ذوْڒنْ غَارْ ؤُشَاڒْ. ^▪   ‏21 وِي إِسّْننْ مَا بُوحْبڒْ ن ثَارْوَا ن بْنَاذمْ أَذْ إِڭعّذْ غَارْ سنّجْ ؤُ بُوحْبڒْ ن ڒْمَاڒْ أَذْ د-إِهْوَا غَارْ ثمُّورْثْ؟ ‏22 أَمُّو إِ ثْوَاڒِيغْ وَارْ إِدْجِي مِينْ إِحْڒَانْ خْ مِينِّي إِفَارّحْ بْنَاذمْ ذِي ثْمڭَّا نّسْ، مَاغَارْ مَانْ أَيَا ذ ثَاسْغَارْثْ نّسْ، مِينْزِي مَانْ ونْ إِزمَّارنْ أَذْ ث يَارّْ أَڒْ غَا إِژَارْ مِينْ غَا يِيڒِينْ أَوَارْنِي أَسْ؟