‏1 ونِّي إِتّخْسنْ تَّارْبِييّثْ، إِتّخْسْ ثُوسّْنَا،

مَاشَا ونِّي إِشَارّْهنْ أَوبّخْ أَقَا نتَّا ذ أَقفُّوحْ.

‏2 بْنَاذمْ ذ أَصبْحَانْ إِتَّافْ أَرْضَا ن سِيذِي،

مَاشَا أَرْيَازْ إِنكّْوَانْ ثَاحْرَايْمشْثْ أَذْ ث إِبَارّحْ ذ بُو-ؤُمَارْوَاسْ.

‏3 بْنَاذمْ وَارْ إِزمَّارْ أَذْ إِقِّيمْ إِبدّْ ؤُمِي إِتّڭّْ ڒْغَارْ،

مَاشَا أَژْوَارْ ن إِمْسڭَّاذنْ وَارْ إِزمَّارْ أَذْ إِنْهزّْ. ^▪  

‏4 ثَامْغَارْثْ إِمحْضنْ ذ تَّاجْ ن ورْيَازْ نّسْ،

مَاشَا ثنِّي ث يَارِّينْ إِتّْسضْحَا، ذ ثنِّي أَمْ وَارصُّوضْ ذڭْ إِخْسَانْ نّسْ. ^▪  

‏5 إِخمِّيمنْ ن إِمْسڭَّاذنْ ذ ڒْحقّْ،

مَاشَا إِخَارِّيصنْ ن إِعفَّاننْ ذ ڒْغشّْ مَارَّا.

‏6 أَوَاڒنْ ن إِعفَّاننْ ڒبْثنْ ذڭْ إِذَامّنْ،

مَاشَا أَقمُّومْ ن يِينِّي إِڭُّورنْ نِيشَانْ ڭُّورْ أَذْ ثنْ إِسّنْجمْ.^▪  

‏7 إِعفَّاننْ تّْنقْڒَابنْ ؤُ وَارْ دْجِينْ عَاذْ،

مَاشَا ثَادَّارْثْ ن إِمْسڭَّاذنْ ڭُّورْ أَذْ ثقِّيمْ ثْبدّْ. ^▪  

‏8 إِتّْوَاسّمْغَارْ بْنَاذمْ عْلَاحْسَابْ ڒْقدّْ ن ڒعْقڒْ نّسْ،

مَاشَا ونِّي ذِي إِدْجْ وُوڒْ إِفَارْغنْ، أَذْ إِتّْوَاسّحْقَارْ.

‏9 إِحْڒَا ونِّي وَارْ إِحسّْبنْ خْ إِخفْ نّسْ أَطَّاسْ، مَاشَا غَارسْ إِجّْ ن ؤُمْسخَّارْ،

خْ ونِّي إِتّْشنّْعنْ س إِخفْ نّسْ، مَاشَا أَغْرُومْ وَارْ غَارسْ يدْجِي. ^▪  

‏10 أَمْسڭّذْ إِسّنْ ڒعْمَارْ ن ڒبْهِيمثْ نّسْ،

مَاشَا أَرّحْمَاثْ ن ؤُعفَّانْ قسْحنْثْ. ^▪  

‏11 ونِّي إِشَارّْزنْ ثَامُّورْثْ نّسْ، أَذْ إِجَّاونْ س وغْرُومْ،

مَاشَا ونِّي يَاردّْفنْ مِينْ إِدْجَانْ إِخْوَانْ، وَارْ غَارسْ شَا وُوڒْ إِمْثنْ. ^▪  

‏12 أَعفَّانْ إِتّخْسْ مِينْ إِدْجَانْ ذِي ثْرَاشَّا ن يِينِّي إِتّڭّنْ ڒْغَارْ،

مَاشَا أَژْوَارْ ن إِمْسڭَّاذنْ إِتّْغِيمَا إِتِّيشْ ڒْغِيدْجثْ.

‏13 ذڭْ ؤُخطُّو ن إِينْشِيشنْ ذَايسْ إِجّْ ن ڒْفخْ ذ أَعفَّانْ،

مَاشَا أَمْسڭّذْ أَذْ إِنْجمْ زِي ڒحْصَارثْ. ^▪  

‏14 زِي ڒْغِيدْجثْ ن ؤُقمُّومْ نّسْ إِتّْوَاسْيِيونْ كُوڒْ  إِجّْ س ڒْخِيرْ،

ؤُ مِينْ د-تَّاوْينْ إِفَاسّنْ ن بْنَاذمْ أَذْ غَارسْ د-إِذْوڒْ. ^▪  

‏15 أَبْرِيذْ ن ؤُپُوهَاڒِي نِيشَانْ ذِي ثِيطَّاوِينْ نّسْ،

مَاشَا ونِّي إِتّسْڒَانْ إِ شّْوَارْ، أَقَا نتَّا ذ أَمِيغِيسْ. ^▪  

‏16 أَپُوهَاڒِي إِسّْشَانَا ڒْهمّْ نّسْ ذڭْ وَاسّْ ذ إِجّْ،

مَاشَا ونِّي إِفتّْننْ، إِتّْذَاڒَا ڒحْيَا نّسْ.

‏17 ونِّي د-إِنطّْقنْ ثِيذتّْ، إِسّْشَانَا ثَاسڭْذَا،

مَاشَا أَشهَّاذْ بُو-إِخَارِّيقنْ إِسّْشَانَا أَشْمَاثْ. ^▪  

‏18 أَقَا ذِينْ ونِّي إِتّْهَارْوَاضنْ أَمْ ثجِّيثْ ن سِّيفْ،

مَاشَا إِڒسْ ن إِمِيغِيسنْ إِتَّاوِي-د أَڭنْفُو. ^▪  

‏19 إِينْشِيشنْ إِشُّورنْ س ثِيذتّْ أَذْ تّْوَاضْمنْ إِ ڒبْذَا،

مَاشَا إِڒسْ إِسّْخَارِّيقنْ مْغِيرْ إِ يِيجّْ ن ؤُمُورْ وَاهَا.

‏20 أَشْمَاثْ أَقَا-ث ذڭْ وُوڒْ ن يِينِّي إِنكّْوَانْ ثُوعفّْنَا،

مَاشَا إِ ينِّي إِنسّْحنْ ڒهْنَا، أَقَا ذِينْ ڒفْرَاحثْ.

‏21 أَمْسڭّذْ وَارْ ث إِڒقّفْ ڒْغشّْ،

مَاشَا إِعفَّاننْ أَذْ تّْوَاشُّورنْ س ڒْغَارْ.

‏22 إِينْشِيشنْ إِسْخَارِّيقنْ ذ نّْعِي إِ سِيذِي،

مَاشَا إِنِّي إِتّمْصُورُّوفنْ س ڒَامَانْ يَارْضَانْ أَسْ.

‏23 بْنَاذمْ إِفثْننْ إِسّْذُوڒُويْ ثُوسّْنَا نّسْ،

مَاشَا ؤُڒْ ن إِپُوهَاڒِييّنْ إِسْغُويُّو س ثُوبُّوهڒْيَا ذِي ڒخْڒَا. ^▪  

‏24 أَفُوسْ ن ونِّي إِمحْضنْ ڭُّورْ أَذْ إِحْكمْ،

مَاشَا ڒعْڭزْ إِندّهْ غَارْ ثسْمُوغِي. ^▪  

‏25 أَمْنُوسْ ذڭْ وُوڒْ ن بْنَاذمْ إِسّْهكّْوَا إِ-ث،

مَاشَا أَوَاڒْ إِصبْحنْ إِسّْفَارَّاحْ إِ-ث. ^▪  

‏26 أَمْسڭَّاذْ إِسّْشَانَا أَبْرِيذْ إِ ؤُمْقَارّبْ نّسْ،

مَاشَا أَبْرِيذْ ن ؤُعفَّانْ يَارَّا إِ-ثنْ أَذْ ودَّارنْ.

‏27 أَمعْڭُوزْ وَارْ إِضفَّارْ شَا أَنيْمَارْ نّسْ.

مَاشَا أَڭْڒَا إِغْڒَانْ ن إِوْذَانْ أَقَا ذ أَمْحَاضْ.

‏28 ذڭْ ؤُمسْرُوقْ ن ثْسڭْذَا ثدْجْ ثُوذَارْثْ،

أَبْرِيذْ ن ڒَاثَارْ نّسْ وَارْ ذَايسْ بُو ڒْموْثْ.