11
1 ڒْمِيزَانْ أَغشَّاشْ ذ نّْعِي إِ سِيذِي، مَاشَا أَژْرُو ن ڒوْزنْ نِيشَانْ إِتَّافْ أَرْضَا نّسْ. ▪
2 مَاڒَا ثُوسَا-د نّْفَاخثْ، ثُوسَا-د ؤُڒَا ذ ڒفْضِيحثْ،
مَاشَا غَارْ إِمْوَاضْعنْ ثدْجْ ثِيغِيثْ. ▪
3 ڒصْفَايثْ ن إِنِّي إِڭُّورنْ نِيشَانْ ثْندّهْ إِ-ثنْ،
مَاشَا ثَاحْرَايْمشْثْ ن إِغدَّارنْ ثَاڒدّدْجْ إِ-ثنْ. ▪
4 أَڭْڒَا وَارْ إِنفّعْ غَارْ وَاسّْ ن ؤُذُوقّزْ ن ؤُفُوڭمْ،
مَاشَا ثَاسڭْذَا ثسّنْجَامْ زِي ڒْموْثْ. ▪
5 ثَاسڭْذَا ن ونِّي إِڭُّورنْ نِيشَانْ إِتَّارَّا أَبْرِيذْ نّسْ نِيشَانْ،
مَاشَا أَعفَّانْ إِوطَّا س ثُوعفّْنَا نّسْ.
6 ثَاسڭْذَا ن إِنِّي إِڭُّورنْ نِيشَانْ أَذْ ثنْ ثسّنْجمْ،
مَاشَا إِغدَّارنْ أَذْ تّْوَاشَارْفنْ ذڭْ ؤُمژْرِي نْسنْ.
7 مَاڒَا إِمُّوثْ بْنَاذمْ أَعفَّانْ، إِفْنَا ؤُسِيثمْ نّسْ،
ؤُڒَا ذ مِينْ تّْرَاجَانْ يرْيَازنْ إِتّْغشَّانْ أَذْ إِفْنَا.
8 أَمْسڭّذْ أَذْ د-إِتّْوَافكّْ زِي ڒحْصَارثْ،
ؤُشَا خنِّي أَعفَّانْ أَذْ د-يَاسْ ذڭْ ومْشَانْ نّسْ.▪
9 أَمْنَافقْ إِتَّاردّدْجْ أَمْقَارّبْ نّسْ س ؤُقمُّومْ نّسْ،
مَاشَا إِمْسڭَّاذنْ أَذْ تّْوَافكّنْ س ثُوسّْنَا. ▫
10 ثَانْذِينْثْ ثتّسْڒِيوْڒِيوْ مَاڒَا إِمْسڭَّاذنْ أَقَا أَثنْ مْلِيحْ،
ؤُ مَاڒَا تّْوَاهلّْكنْ إِعفَّاننْ، أَقَا ذِينْ أَسْڒِيوْڒوْ.
11 ثتّْوَاسْڭعّذْ ثنْذِينْثْ س لْبَارَاكَا ن إِنِّي إِڭُّورنْ نِيشَانْ،
مَاشَا س ؤُقمُّومْ ن إِعفَّاننْ أَذْ ثتّْوَاهْذمْ.
12 ونِّي وَارْ غَارْ إِدْجِي شَا وُوڒْ إِمْثنْ، إِسّحْقَارَا أَمْقَارّبْ نّسْ،
مَاشَا أَرْيَازْ ونِّي غَارْ إِدْجْ ڒفْهَامثْ إِتّسْقَارْ.
13 ونِّي إِڭُّورنْ ذَا ذ ذِيهَا س ثخْبَارْجِيثْ، إِتّْعَارَّا مِينْ إِنُّوفَّارنْ،
مَاشَا ونِّي إِ ذِي إِدْجْ أَرُّوحْ ذَايسْ ڒَامَانْ، أَقَا إِسّْنُوفَّارَا ثَامسْڒَاشْثْ.
14 مَاڒَا وَارْ ذِينْ أَذبَّارْ، إِوطَّا ڒْڭنْسْ،
مَاشَا أَذْ يِيڒِي ؤُسنْجمْ س ڒمْغَارثْ ن ؤُمْشَاوَارْ. ▪
15 ونِّي إِضمّْننْ ڒْبَارَّانِي، وَارْ د أَسْ ثتّفّغْ شَا مْلِيحْ،
مَاشَا ونِّي إِشَارّْهنْ إِنِّي إِتّڭّنْ ثِيشْثِي خْ ؤُفُوسْ إِ مَانْ أَيَا، أَقَا-ث ذِي ڒَامَانْ.
16 ثَامْغَارْثْ ثتَّافْ أَرْضَا، ثطّفْ ذِي ڒْعزّْ نّسْ،
مَاشَا أَيْثْ ن بُو-ڒخْشُونثْ تّطّْفنْ ذڭْ وَاڭْڒَا.
17 بْنَاذمْ س ثْمخْسِيوْثْ إِشوَّارنْ إِتّڭّْ ڒْخَارْ إِ ڒعْمَارْ نّسْ،
مَاشَا ونِّي إِتّْغزَّانْ أَرِّيمثْ ن يِيخفْ نّسْ، أَقَا نتَّا ذ أَقسَّاحْ.
18 أَعفَّانْ إِمجَّارْ ڒْغِيدْجثْ ن ڒْغشّْ،
مَاشَا ونِّي إِزَارّْعنْ ثَاسڭْذَا، إِمجَّارْ إِشْثْ نْ ڒْمُونثْ إِمثْننْ.
19 ثَاسڭْذَا نِيشَانْ ثتَّاوِي غَارْ ثُوذَارْثْ،
ونِّي يَاردّْفنْ ڒْغَارْ، يَارزُّو ڒْموْثْ نّسْ.
20 إِنِّي غَارْسنْ ؤُڒْ إِفَارْغنْ أَقَا أَثنْ ذ نّْعِي إِ سِيذِي،
مَاشَا إِنِّي إِڭُّورنْ نِيشَانْ نتَّا يَارطَّا ذَايْسنْ.
21 س ثِيذتّْ، أَعفَّانْ وَارْ إِتّْغِيمِي بْڒَا ڒخْڒَاصْ،
مَاشَا ثَارْوَا ن إِمْسڭَّاذنْ أَذْ تّْوَاسْنجْمنْ. ▪
22 أَمشْنَاوْ إِشْثْ ن ثْخَاذنْثْ ن وُورغْ ذِي ثِينْزَارْ ن يِيڒفْ،
أَمُّو إِ ثدْجْ إِشْثْ ن ثمْغَارْثْ ثشْنَا وَارْ ذِي إِدْجْ ؤُميّزْ.
23 مژْرِي ن إِمْسڭَّاذنْ مْغِيرْ غَارْ مِينْ إِصبْحنْ،
مَاشَا أَسِيثمْ ن إِعفَّاننْ أَقَا-ث نْهْڒَا ڒعْبَارْ.
24 أَقَا ذِينْ إِجّنْ ونِّي إِبطَّانْ س وشْرِيمْ، وَاخَّا أَمنِّي إِتّْوَارْنِي أَسْ عَاذْ كْثَارْ،
ؤُ أَقَا ذِينْ إِجّنْ ونِّي إِمنّْعنْ كْثَارْ خْ مِينْ إِشُووَّارنْ،
وَاخَّا أَمنِّي أَيَا إِندّهْ غَارْ زّڒْضْ.
25 ڒعْمَارْ نِّي إِتّْبَارْكنْ أَذْ إِتّْوَاسْجِيونْ،
ؤُ ونِّي إِتِّيشنْ أَمَانْ، أَذْ أَسْ إِمّوْشْ وَامَانْ إِ نتَّا سِيمَانْثْ نّسْ. ▪
26 ونِّي إِتّْخمَّاڒنْ إِمنْذِي، إِنعّڒْ إِ-ث شّعْبْ،
مَاشَا لْبَارَاكَا أَذْ ثِيڒِي خْ ؤُزدْجِيفْ ن ونِّي إِزْنُوزَانْ إِمنْذِي.
27 ونِّي إِتّْشطَّارنْ ذِي طّْوعْ ن مِينْ إِصبْحنْ، يَارزُّو مِينْ يَارْضَانْ،
مَاشَا ونِّي إِتّْحَامَانْ ڒْغَارْ، أَذْ ث إِڒْقفْ. ▪
28 ونِّي إِتّْشَاڒنْ خْ وَاڭْڒَا نّسْ، أَذْ إِوْضَا،
مَاشَا إِمْسڭَّاذنْ تّْنعْنِيعنْ أَمْ إِفثْوَانْ إِزِيزَاونْ.▪
29 ونِّي إِهكّْوْڒنْ أَيْثْبَابْ ن ثَادَّارْثْ نّسْ، أَذْ إِوَارْثْ أَسمِّيضْ،
ؤُ أَپُوهَاڒِي أَذْ يِيڒِي ذ أَمْسخَّارْ ن ونِّي ذِي إِدْجْ وُوڒْ أَمِيغِيسْ.
30 ڒْغِيدْجثْ ن ؤُمْسڭَّاذْ ذ إِشْثْ ن ثْشجَّارْثْ ن ثُوذَارْثْ،
ونِّي يَاربّْحنْ ڒعْمُورْ أَقَا-ث ذ أَمِيغِيسْ. ▫
31 خْزَارْ، أَقَا أَذْ إِتّْوَاخدْجصْ ؤُمْسڭّذْ ذِي ثمُّورْثْ،
خنِّي مَاهُو أَعفَّانْ ذ ؤُمذْنُوبْ. ▪