147
1 هَالِّيلُو-يَاهْ، مَاغَارْ أَزهّذْ إِ أَربِّي نّغْ ذ أَصبْحَانْ، مِينْزِي إِشْنَا، إِتَّاسْ-د أَكِيذسْ أَذْ أَسْ نْصبّحْ. ▪
2 سِيذِي إِبنَّا ؤُرْشَالِيمْ،
إِسّْمُونْ إِمّنعْرَاقْ ن إِسْرَائِيل.
3 نتَّا إِسّْڭنْفَا إِنِّي غَارْسنْ ؤُڒْ يَارْژنْ،
إِتّْشدَّا إِيزِّيمنْ نْسنْ إِتّقْسنْ. ▪
4 إِحسّبْ قدَّا ن إِثْرَانْ،
إِتّْڒَاغَا-د خَاسنْ مَارَّا س يِيسمْ. ▪
5 سِيذِيثْنغْ ذ أَمقّْرَانْ ؤُ جّهْذْ نّسْ إِمْغَارْ.
ڒعْقڒْ نّسْ وَارْ غَارسْ بُو ڒعْبَارْ.
6 سِيذِي إِتّْسنّذْ إِمْوَاضْعنْ،
إِسّْهكّْوَا إِعفَّاننْ أَڒْ ثَامُّورْثْ.
7 قَاذَامْ سِيذِي س ؤُغنّجْ،
زهّْذمْ إِ أَربِّي نّغْ س ڒْڭَامْبْرِي.
8 نتَّا ذ ونِّي إِدَّاڒنْ أَجنَّا س إِسيْنُوثنْ،
ذ ونِّي إِسّوْجَاذنْ أَنْژَارْ إِ ثمُّورْثْ،
ذ ونِّي إِسّْغمَّاينْ أَرّْبِيعْ خْ إِذُورَارْ. ▪
9 ذ ونِّي إِتِّيشنْ إِ ڒْمَاڒْ مَاشَّا نّسْ،
إِ ثَارْوَا ن إِبَاغْڒِيونْ خْمِي إِ غَا سْغُويّنْ.
10 نتَّا وَارْ ذ أَسْ إِتّعْجِيبْ جّهْذْ ن ؤُيِيسْ،
وَارْ يَارطِّي س إِضَارنْ ن ورْيَازْ.
11 يَارطَّا أَسْ إِ سِيذِي إِنِّي ث إِتّڭّْوذنْ،
إِنِّي إِسِّيثْمنْ ذِي ثْمخْسِيوْثْ نّسْ إِشوَّارنْ.
12 أَ ؤُرْشَالِيمْ، صبّحْ إِ سِيذِي،
أَ صِيهْيُونْ، صبّحْ إِ أَربِّي نّمْ.
13 مَاغَارْ نتَّا إِسّمْحذْ زّكْرُونَاثْ ن ثوُّورَا نّكْ،
إِبَاركْ إِحنْجِيرنْ نّكْ ذِي ڒْوسْثْ نّكْ،
14 نتَّا إِوْشَا ڒهْنَا إِ إِيْمِيرنْ نّكْ،
إِسّْيِيونْ إِ شكْ س مِينْ إِصبْحنْ قَاعْ ن يِيرْذنْ.
15 نتَّا إِسّكَّا ثِيوَاڒِينْ نّسْ غَارْ ثمُّورْثْ،
أَوَاڒْ نّسْ إِتَّازّڒْ أَطَّاسْ. ▪
16 إِتِّيشْ أَذْفڒْ أَمْ ثْضُوفْثْ،
إِزُّوزَّارَا نّْذَا إِڭرْسنْ أَمْ إِغّضْ.
17 إِسّكَّا أَذْفڒْ نّسْ ذ إِبْقُوقنْ،
وِي إِزمَّارنْ أَذْ إِقِّيمْ إِبدّْ زَّاثْ إِ ثسْمُوضِي نّسْ؟
18 إِسّكَّا أَوَاڒْ نّسْ ؤُشَا إِتَّارَّا ثنْ أَذْ فسْينْ،
نتَّا إِتّجَّا أَسمِّيضْ نّسْ إِتّْصُوضْ، خنِّي تُّوشْرُورنْ وَامَانْ.
19 نتَّا إِبَارّحْ إِ يَاعْقُوبْ أَوَاڒنْ نّسْ،
إِ إِسْرَائِيل ثِيوصَّا نّسْ ذ لْفَارَايِيضْ نّسْ.
20 ؤُڒَا إِ يِيجّْ ن ڒْڭنْسْ نّغْنِي وَارْ ذ أَسْ إِڭِّي أَمُّو،
ؤُ نِيثْنِي وَارْ سِّيننْ شَا لْفَارَايِيضْ نّسْ. هَالِّيلُو-يَاهْ! ▪