‏1 وَارْ إِدْجِي إِ نشِّينْ، أَ سِيذِي، وَارْ إِدْجِي إِ نشِّينْ،

مَاغَارْ إِ يِيسمْ نّكْ أَذْ يِيڒِي ؤُعُودْجِي،

ذِي سِّيبّثْ ن ثْمخْسِيوْثْ نّكْ إِشوَّارنْ ذ ڒَامَانْ نّكْ.

‏2 مَايمِّي إِ غَا قَّارنْ ڒڭْنُوسْ:

’مَانِي إِدْجْ خنِّي أَربِّي نْسنْ؟‘

‏3 أَربِّي نّغْ أَقَا-ث ذڭْ ؤُجنَّا،

إِڭَّا مَارَّا مِينْ ذ أَسْ يَارْضَانْ.

‏4 ڒخْيَاڒَاثْ نْسنْ ن صَّانَامْ أَقَا أَثنْثْ س نُّوقَارْثْ ذ وُورغْ،

ڒْخذْمثْ ن إِفَاسّنْ ن إِوْذَانْ. ^▫  

‏5 غَارْسنْ أَقمُّومْ، مَاشَا وَارْ سِّيوِيڒنْثْ،

غَارْسنْثْ ثِيطَّاوِينْ مَاشَا وَارْ تّْوِيڒِينْثْ، ^▪  

‏6 غَارْسنْثْ إِمزُّوغنْ، مَاشَا وَارْ تّسْڒِينْثْ،

غَارْسنْثْ وَانْزَارنْ، مَاشَا وَارْ تّْشمِّينْثْ.

‏7 إِفَاسّنْ نْسنْ وَارْ زمَّارنْ أَذْ شبَّارنْ،

إِضَارنْ نْسنْ وَارْ زمَّارنْ أَذْ ؤُيُورنْ.

نِيثْنِي وَارْ سُّوفُّوغنْ ڒْحسّْ زِي ثْمِيجَّا نْسنْ.

‏8 أجّْ إِنِّي ثنْثْ إِڭِّينْ أَذْ ذَايْسنْثْ أَروْسنْ،

كُوڒْ  إِجّْ زڭْ إِنِّي خَاسنْثْ إِتّشْڒنْ.

‏9 إِسْرَائِيل، تّْشڒْ خْ سِيذِي.

نتَّا ذ ثْوِيزَا نْسنْ ذ ثَاسدَّارْثْ نْسنْ إِ ؤُسڒْقِي.

‏10 ثَادَّارْثْ ن هَارُونْ، تّْشڒْ خْ سِيذِي.

نتَّا ذ ثْوِيزَا نْسنْ ذ ثَاسدَّارْثْ نْسنْ إِ ؤُسڒْقِي.

‏11 مَارَّا كنِّيوْ إِنِّي إِتّڭّْوذنْ سِيذِي، تّشْڒمْ خْ سِيذِي.

نتَّا ذ ثْوِيزَا نْسنْ ذ ثَاسدَّارْثْ نْسنْ إِ ؤُسڒْقِي.

‏12 سِيذِي إِعْقڒْ خَانغْ، نتَّا أَذْ إِبَاركْ.

أَذْ إِبَاركْ ثَادَّارْثْ ن إِسْرَائِيل،

أَذْ إِبَاركْ ثَادَّارْثْ ن هَارُونْ.

‏13 نتَّا أَذْ إِبَاركْ إِنِّي ث إِتّڭّْوذنْ زِي سِيذِي،

إِمژْيَاننْ جْمِيعْ أَكْ-ذ إِمقّْرَاننْ.

‏14 سِيذِي أَذْ أَومْ إِسّْمَارْنِي ثَارْوَا،

إِ كنِّيوْ ؤُڒَا إِ إِحنْجِيرنْ نْومْ.

‏15 كنِّيوْ ثتّْوَابَارْكمْ زِي سِيذِي،

ونِّي إِڭِّينْ أَجنَّا ذ ثمُّورْثْ.

‏16 إِجنْوَانْ، وَاهْ إِجنْوَانْ ن سِيذِي،

مَاشَا ثَامُّورْثْ إِوْشَا إِ-ت إِ ثَارْوَا ن بْنَاذمْ.

‏17 إِمتَّانْ وَارْ زمَّارنْ أَذْ سّمْغَارنْ سِيذِي،

ؤُڒَا ذ إِنِّي د-إِهْوَانْ ذڭْ ؤُسُوسمْ.

‏18 نشِّينْ أَذْ نْبَاركْ سِيذِي،

زِي ڒخُّو أَڒْ إِ ڒبْذَا. هَالِّيلُو-يَاهْ!