104
1 بَاركْ سِيذِي، أَ ڒعْمَارْ إِنُو! أَ سِيذِي، أَربِّي إِنُو، مَامّشْ ذ أَمقّْرَانْ شكْ!
شكْ ثْيَارْضذْ س لْعَاضَامَا ذ ڒْعزّْ.
2 نتَّا إِڒحّفْ إِخفْ نّسْ س ثْفَاوْثْ أَمشْنَاوْ س إِجّْ ن ؤُبَارْثسُّو،
نتَّا إِتّْبزّعْ أَجنَّا أَمْ ثْجَارْثِيڒْثْ ن ؤُقِيضُونْ. ▪
3 أَقَا نتَّا ذ ونِّي إِسَّارْسنْ ثْحنْيَا ن وسْقفْ سَاذُو إِخَّامنْ نّسْ خْ وَامَانْ،
ذ ونِّي إِڭِّينْ إِسيْنُوثنْ ذ أَكَارُّو نّسْ،
ذ ونِّي إِڭُّورنْ خْ وَافْرِيونْ ن ؤُسمِّيضْ، ▪
4 ذ ونِّي إِڭِّينْ لْمَالَاكَاثْ نّسْ أَمْ إِسمِّيضنْ،
ؤُ إِمْسخَّارنْ نّسْ ذ إِشْثْ ن ثْمسِّي إِتّحْذُوذُوقنْ. ▪
5 نتَّا إِسّْبدّْ ثَامُّورْثْ خْ ذْسُوسَا نّسْ،
وَارْ ڭُّورْ أَذْ ثنْهزّْ عمَّارْصْ إِ ڒبْذَا. ▪
6 شكْ ثْڒحّْفذْ أَسْ س وَامَانْ يُوژْغنْ أَمْ س يِيجّْ ن وَارُّوضْ،
أَمَانْ بدّنْ ثِيوَا إِ إِذُورَارْ.
7 نِيثْنِي أَروْڒنْ زڭْ ؤُسِيڭّْوذْ نّكْ،
قدْجْقنْ أَذْ فّْغنْ زِي ثْمِيجَّا ن وَاجَّاجْ نّكْ.
8 تّْوَاسّْڭعّْذنْ إِذُورَارْ، هكّْوَانْثْ ثيْسَارِينْ،
ذڭْ ومْشَانْ إِ ذ أَسنْ ثڭِّيذْ.
9 شكْ ثڭِّيذْ أَيْمِيرْ إِ وَامَانْ ؤُ وَارْ ڭُّورْ أَذْ ث عْذُونْ،
وَارْ د-ذكّْوِيڒنْ مَاحنْذْ أَذْ ذْڒنْ ثَامُّورْثْ.
10 شكْ ذ ونِّي إِندّْهنْ ثَاڒَاوِينْ ذِي ثغْزُورِينْ،
أَقَا تَّازّْڒنْثْ ذِينْ جَارْ إِذُورَارْ.
11 أَقَا وَارّْذنْثْ مَارَّا ڒْمَاڒْ ن ييَّارْ،
إِغْيَاڒْ ن ڒخْڒَا تّكّْسنْ أَفَاذِي نْسنْ زَّايْسنْثْ.
12 إِجْضَاضْ ن ؤُجنَّا زدّْغنْ غَارْ ثمَّاوِينْ نْسنْ،
زِي جَارْ ڒفْرُوعْ ثتّكّْ-د ثْمِيجَّا نْسنْ.
13 نتَّا أَقَا ذ ونِّي إِتّسُّونْ إِذُورَارْ زڭْ إِخَّامنْ نّسْ ذڭْ ؤُجنَّا،
ثَامُّورْثْ ثتّْيَاوَانْ زِي ڒْغِيدْجثْ إِ د-إِفّْغنْ زِي مِينْ ثڭِّيذْ شكْ. ▫
14 نتَّا إِڭَّا أَرّْبِيعْ إِغمِّي إِ ڒْمَارْ،
ؤُڒَا ذ أَغمُّويْ ذِي طّْوعْ ن بْنَاذمْ،
مَاحنْذْ أَذْ د-يَاوِي أَغْرُومْ زِي ثمُّورْثْ
15 ؤُ بِينُو نِّي إِسّْفَارَّاحنْ ؤُڒْ ن بْنَاذمْ.،
أَڒَامِي إِغمْبَابْ أَذْ زَّايسْ وسّْڭنْ مَاهُو زِي زّشْثْ،
ؤُڒَا ذ أَغْرُومْ نِّي إِسّجْهذْ ؤُڒْ ن بْنَاذمْ.
16 ثِيشجِّيرَا ن سِيذِي تّْيَاوَاننْثْ،
ثِيشجِّيرَا ن ثنْڭلْثْ ن لُوبْنَانْ نِّي إِژُّو نتَّا،
17 مَانِي تّڭّنْ إِجْضَاضْ ڒْعُوشّْ نْسنْ،
مَانِي إِ ثدْجْ ثَادَّارْثْ ن ؤُبلَّارْجْ ذِي ثْشجِّيرَا ن ؤُمرْزِي. ▫
18 إِذُورَارْ يُوعْڒَانْ أَقَا أَثنْ إِ إِغَايْضنْ ن ثْصُوضَارْ،
ڒجْرُوفْ ذ أَمْشَانْ ن ثَاروْڒَا إِ إِكَاوْكَاونْ ن ثصْضَارْثْ.
19 نتَّا إِڭَّا ثَازِيرِي ذ ڒعْبَارْ إِ إِكُوذنْ إِتّْوَاڭّنْ،
ثَافُوشْثْ ثسّنْ مڒْمِي إِ غَا ثغْڒِي.
20 شكْ ثسّكِّيذْ-د ثَادْجسْثْ ؤُ ثوْضَا-د دْجِيڒثْ،
إِ ذِي تّخْثُوثْينْ مَارَّا ڒوْحُوشْ ن وزْغَارْ. ▫
21 أَيْرَاذنْ إِمژْيَاننْ زهَّارنْ خْ زَّارْذثْ،
مَاحنْذْ أَذْ أَرْزُونْ خْ مَاشَّا نْسنْ زِي أَربِّي. ▪
22 مَاڒَا ثفّغْ-د خنِّي ثْفُوشْثْ، تّشْرُورُوذنْ غَارْ ڒْمَارْڭحْ،
ؤُشَا تّْغمَّارنْ ذڭْ إِفْرَانْ نْسنْ.
23 خنِّي إِتّفّغْ بْنَاذمْ غَارْ ڒْخذْمثْ نّسْ،
غَارْ ثوُّورِي نّسْ أَڒْ ثَامذِّيثْ.
24 مَامّشْ أَطَّاسْ إِ ثڭِّيذْ، أَ سِيذِي،
س ثِيغِيثْ إِ ثڭِّيذْ مَارَّا ثِيمسْڒَايِينْ،
ثَامُّورْثْ ثتّْوَاشُّورْ س وَاڭْڒَا نّكْ.
25 أَقَا ذِينْ ڒبْحَارْ إِمْغَارْ، يِيرِيوْ غَارْ مَارَّا إِغزْذِيسنْ نّسْ،
مَانِي إِسّْفُوفّيْ مَارَّا س إِمُودَّارنْ إِمقّْرَاننْ ذ إِمژْيَاننْ، بْڒَا ڒحْسَابْ،
26 مَانِي ڭُّورنْ إِغَارُّوبَا،
’لِيبِييَاثَانْ‘ نِّي ثڭِّيذْ حِيمَا أَذْ ذَايسْ إِتِّيرَارْ.
27 نِيثْنِي مَارَّا تّْرَاجَانْ شكْ،
أَذْ أَسنْ ثوْشذْ مَاشَّا نْسنْ ذِي ڒْوقْثْ نّسْ. ▪
28 مَاڒَا ثوْشِيذْ أَسنْ، يَارّْونْ نِيثْنِي،
مَاڒَا ثَارْزْمذْ أَفُوسْ نّكْ،
دَّاكّْوَاڒنْ جِّيوْننْ س ڒْخَارْ.
29 مَاڒَا ثفَّارذْ ؤُذمْ نّكْ،
أَقَا تّْنخْڒَاعنْ،
مَاڒَا ثْكسِّيذْ أَسنْ نّفْسْ،
أَذْ سُّوفّْغنْ بُوحْبڒْ ؤُ أَذْ د-ذوْڒنْ غَارْ ؤُشَاڒْ نْسنْ. ▪
30 مَاڒَا ثسّكّذْ-د أَرُّوحْ نّكْ،
خنِّي تّْوَاخڒْقنْ-د نِيثْنِي،
ؤُ أَذْ ثَارِّيذْ أَغمْپُوبْ ن ثمُّورْثْ ذ أَمَايْنُو.
31 أَعُودْجِي ن سِيذِي أَذْ يِيڒِي إِ ڒبْذَا،
سِيذِي أَذْ إِفَارْحْ إِ مَارَّا مِينْ إِڭَّا.
32 مَاڒَا نتَّا إِخزَّارْ ذِي ثمُّورْثْ، ثتَّارْجِيجِي،
مَاڒَا إِحَاذَا إِذُورَارْ، أَذْ دُّوخّْننْ.
33 نشّْ خْسغْ أَذْ غنّْجغْ إِ سِيذِي مِينْ غَا كّغْ دَّارغْ،
أَذْ زهّْذغْ إِ أَربِّي إِنُو مِينْ ذَا إِ غَا كّغْ دْجِيغْ. ▪
34 أَخمّمْ إِنُو أَذْ د-يَاسْ خْ ڒْخَاضَارْ نّسْ،
أَذْ فَارْحغْ ذِي سِيذِي.
35 إِمذْنَابْ أَذْ تّْوَاثحَّانْ قَاعْ زِي ثمُّورْثْ،
إِعفَّاننْ وَارْ تِّيڒِينْ عَاذْ.
بَاركْ سِيذِي، أَ ڒعْمَارْ إِنُو. هَالِّيلُو-يَاهْ!