‏1 بُوحْبڒْ إِنُو يَارْجفْ،

ؤُسَّانْ إِنُو إِنڭُّورَا خسْينْ،

مْغِيرْ إِمضْڒَانْ ذ أَيِي إِقِّيمنْ.

‏2 س ثِيذتّْ، إِنِّي إِسْثهْزَانْ أَقَا أَثنْ غَارِي،

ؤُ ثِيطّْ إِنُو ثسّْعدُّو دْجِيڒثْ جَارْ إِخَارِّيصنْ نْسنْ إِمَارْزَاڭنْ!

‏3 أڭّْ إِخفْ نّكْ ذ أَضْمَانْ إِ نشّْ ذِينْ غَاركْ.

مَانْ ونْ خنِّي إِ غَا إِوْثنْ أَفُوسْ نّسْ ذڭْ ؤُفُوسْ إِنُو إِ مَانْ أَيَا؟

‏4 مَاغَارْ شكْ ثكّْسذْ مَارَّا ڒفْهَامثْ خْ وُوڒْ نْسنْ،

خْ ؤُينِّي شكْ وَارْ ثنْ ثسّْعُودْجِيذْ شَا.

‏5 وِي إِ غَا إِغْذَارنْ إِمدُّوكَّاڒْ نّسْ ذِي طّْوعْ ن ثْكشَّاضْثْ،

ثِيطَّاوِينْ ن إِحنْجِيرنْ نّسْ أَذْ نْعذْمنْثْ.

‏6 نتَّا إِڭَّا أَيِي ذ لْمَاثَالْ جَارْ ڒڭْنُوسْ،

أَڒَامِي ذوْڒغْ أَمْ إِجّنْ سُّوسُوفنْ أَسْ خْ ؤُغمْپُوبْ. ^▪  

‏7 س ؤُيَا إِ ثعْمشْ ثِيطّْ إِنُو زڭْ وشْضَانْ،

مَارَّا إِغزْذِيسنْ إِنُو أَقَا أَثنْ أَمْ ثِيڒِي.

‏8 إِنِّي إِڭُّورنْ نِيشَانْ تّْنخْڒَاعنْ زِي مَانْ أَيَا،

ؤُ أَمزْذَاڭْ إِتّْنقْڒَابْ خْ ؤُمْنَافقْ.

‏9 أَمْسڭّذْ إِمنّعْ ذڭْ وبْرِيذْ نّسْ،

ونِّي غَارْ إِدْجْ إِفَاسّنْ إِمزْذَاڭنْ، يَارنِّي ذِي جّْهذْ.

‏10 س ؤُيَا مَارَّا كنِّيوْ، ذوْڒمْ-د، أَستِّيوْ-د ذَا،

مَاغَارْ وَارْ ؤُفِيغْ ؤُڒَا ذ إِجّْ ن ؤُمِيغِيسْ جَارْ أَومْ. ^▪  

‏11 عْذُونْ وُوسَّانْ إِنُو،

تّْوَاقضْعنْ إِنْوَاينْ إِنُو،

مَارَّا مژْرِي ن وُوڒْ إِنُو. ^▪  

‏12 دْجِيڒثْ تّڭّنْ ت ذ أَسّْ،

قَّارنْ: أَقَا ثَافَاوْثْ ثتَّاذسْ-د خْمِي د غَا ثوْضَا ثَادْجسْثْ.

‏13 مَاڒَا سِّيثْمغْ عَاذْ، سِّيثِيمغْ أَقَا ڒَاخَارْثْ أَذْ ثِيڒِي ذ ثَادَّارْثْ إِنُو،

أَذْ بزّْعغْ ثَاسُّوثْ إِنُو ذِي ثَادْجسْثْ.

‏14 غَارْ ونْضڒْ ڒَاغِيغْ: ’شكْ ذ بَابَا!‘،

غَارْ إِكشَّا: ’يمَّا!‘ ذ: ’ؤُتْشْمَا!‘

‏15 مَانِي إِدْجْ خنِّي ڒَايَاسْ إِنُو؟

ڒَايَاسْ إِنُو، مَانْ ونْ إِزمَّارنْ أَذْ ث إِژَارْ؟

‏16 إِهْوَا غَارْ طّْرُوفَا ن ڒَاخَارْثْ،

مَاغَارْ مَاڒَا نْمُومْ ذڭْ ؤُشَاڒْ، أَقَا ذِينْ أَرَّاحثْ. ^▪