أَسّْ ن تُّوبثْ ذ ثْژَادْجِيثْ
9
1 ذڭْ وَاسّْ وِيسّْ أَربْعَا ؤُ-عِيشْرِينْ ن ؤُيُورْ-أَ مُوننْ أَيْثْ ن إِسْرَائِيل س ؤُژُومِّي ؤُ ڒحّْفنْ ذڭْ وَارُّوضْ ن وشْضَانْ ؤُ س ثْعجَّاجْثْ خْ ؤُزدْجِيفْ. ▫ 2 بْضَانْ زَّارِيعثْ ن إِسْرَائِيل إِخفْ نْسنْ زِي مَارَّا إِبَارَّانِييّنْ، كَّارنْ ؤُ نعْمنْ زِي دّْنُوبْ نْسنْ ذ ڒْمُوعْصِييّثْ ن إِبَابَاثنْ نْسنْ. 3 نِيثْنِي كَّارنْ، بدّنْ ذڭْ ومْشَانْ نْسنْ ؤُشَا غْرِينْ إِشْثْ ن ثرْبَاعْثْ ن وَاسّْ زڭْ وذْلِيسْ إِتّْوَانّْضنْ ن شَّارِيعَا ن سِيذِي، أَربِّي نْسنْ، ؤُشَا إِشْثْ ن ثرْبَاعْثْ نّغْنِي نعْمنْ س دّْنُوبْ نْسنْ ؤُشَا سجْذنْ إِ سِيذِي، أَربِّي نْسنْ. 4 خْ دّْرُوجْ ن إِلَاوِييّنْ إِبدّْ يشُوعَا ذ بَانِي، قَاذْمِييِيلْ، شَابَانْيَا، بُونِّي، شَارَابْيَا، بَانِي ذ كَانَانِي، ڒَاغَانْ س ثْمِيجَّا إِجهْذنْ غَارْ سِيذِي، أَربِّي نْسنْ. 5 ؤُشَا إِلَاوِييّنْ، يشُوعَا ذ قَاذْمِييِيلْ، بَانِي، حَاشَابْنِييَا، شَارَابْيَا، هُوذِييَا، شَابَانْيَا ذ فَاثَاحْيَا، نَّانْ: ”كَّارمْ، ثْبَارْكمْ سِيذِي، أَربِّي نْومْ، زِي ڒبْذَا أَڒْ ڒبْذَا! إِڒِي أَذْ إِتّْوَابَاركْ إِسمْ ن ؤُعُودْجِي نّكْ، ونِّي يُوعْڒَانْ خْ مَارَّا لْبَارَاكَا ذ ؤُسمْغَارْ!“ 6 ”شكْ ذ سِيذِي، مْغِيرْ شكْ. شكْ ثڭِّيذْ أَجنَّا ؤُڒَا ذ أَجنَّا ن إِجنْوَانْ ذ مَارَّا ثِيزمَّارْ نْسنْ، ثَامُّورْثْ ذ مَارَّا مِينْ خَاسْ إِدْجَانْ، ڒبْحُورْ ذ مَارَّا مِينْ ذَايسْ إِدْجَانْ ؤُ شكْ ثوْشِيذْ أَسنْ ثُوذَارْثْ ؤُشَا ثِيزمَّارْ ن ؤُجنَّا تَّاضَارنْ أَشْ إِ شكْ. ▪
7 شكْ ذ سِيذِي، أَربِّي، ونِّي إِفَارْزنْ أَبْرَامْ. شكْ ثسُّوفّْغذْ ث-إِ-د زِي ؤُرْ ن إِكَالْذَانِييّنْ ؤُشَا ثڭِّيذْ أَسْ إِبْرَاهِيمْ. ▪
8 شكْ ثُوفِيذْ ؤُڒْ نّسْ ذَايسْ ڒَامَانْ زَّاثْ إِ وُوذمْ نّكْ ؤُ ثڭِّيذْ أَكِيذسْ ڒْعَاهْذْ بلِّي شكْ أَذْ ثوْشذْ إِ زَّارِيعثْ نّسْ ثَامُّورْثْ ن إِكنْعَانِييّنْ ؤُ ن إِحِيتِّييّنْ ؤُ ن إِمُورِييّنْ ؤُ ن إِفَارِيزِييّنْ ؤُ ن إِيَاپُوسِييّنْ ؤُ ن إِجِيرْجَاسِييّنْ ؤُشَا ثڭّذْ عْلَاحْسَابْ أَوَاڒنْ نّكْ، مِينْزِي شكْ ذ أَمْسڭّذْ إِ ثدْجِيذْ. ▪
9 شكْ ثژْرِيضْ ثَامَارَا ن إِبَابَاثنْ نّغْ ذِي مِيصْرَا ؤُ ثسْڒِيذْ إِغُويَّانْ نْسنْ زِي غَارْ ڒبْحَارْ ن ثلْڭَا. ▪
10 شكْ ثڭِّيذْ ڒعْڒَامَاثْ ذ لْمُوعْجِيزَاثْ غَارْ فِيرْعُونْ ؤُ غَارْ مَارَّا إِمْسخَّارنْ نّسْ ؤُ جَارْ ڒْڭنْسْ ن ثمُّورْثْ، مِينْزِي شكْ ثسّْنذْ، أَقَا نِيثْنِي ڭِّينْ ضِيدّْ نْسنْ س ؤُعفَّارْ ؤُ شكْ ثڭِّيذْ إِ إِخفْ نّكْ إِجّْ ن إِسمْ، أَمْ ثدْجْ أَسّْ-أَ. ▪
11 شكْ ثبْضِيذْ ڒبْحَارْ زَّاثْ إِ وُوذمْ نْسنْ أَڒَامِي نِيثْنِي عْذُونْ خْ ثمُّورْثْ يُوژْغنْ ذِي ڒْوسْثْ ن ڒبْحَارْ ؤُشَا إِنِّي خَاسنْ إِتَّاژّْڒنْ ثنْضَارذْ ثنْ ذِي ڒَادْجَاغْ أَمْ إِجّْ ن وژْرُو ذڭْ وَامَانْ إِجهْذنْ. ▪
12 زڭْ إِجّْ ن ؤُقلِّيجْ ن ؤُسيْنُو ثْڭوّْذذْ ثنْ س وَاسّْ ؤُ س يِيجّْ ن ؤُقلِّيجْ ن ثْمسِّي س دْجِيڒثْ حِيمَا أَذْ أَسنْ ثوْشذْ ثَافَاوْثْ خْ وبْرِيذْ إِ خْ إِ غَا ؤُيُورنْ. ▪
13 شكْ ثهْوِيذْ-د خْ وذْرَارْ ن سِينَا ؤُ ثسِّيوْڒذْ أَكِيذْسنْ زڭْ ؤُجنَّا ؤُشَا ثوْشِيذْ أَسنْ لْفَارَايِيضْ إِسڭّْذنْ ذ إِزرْفَانْ إِ ذِي إِدْجْ ڒَامَانْ ذ ثْوصَّا ذ ڒُومُورَاثْ إِصبْحنْ. ▪
14 ثسّشْنذْ أَسنْ سّبْثْ نّكْ إِقدّْسنْ ؤُشَا ثڭِّيذْ خَاسنْ ڒُومُورَاثْ ذ ثْوصَّا ذ شَّارِيعَا س ؤُفُوسْ ن مُوسَا، أَمْسخَّارْ نّكْ.
15 شكْ ثوْشِيذْ أَسنْ أَغْرُومْ زڭْ ؤُجنَّا إِ ڒَاژْ نْسنْ ؤُشَا ثسُّوفّْغذْ أَسنْ-د أَمَانْ زِي ثصْضَارْثْ إِ ؤُفَاذِي نْسنْ ؤُشَا ثنِّيذْ أَسنْ أَذْ أَذْفنْ غَارْ ثمُّورْثْ، ثنِّي خْ ثسّْڭعّْذذْ أَفُوسْ نّكْ حِيمَا أَذْ ثجَّادْجذْ أَذْ ثنْ ت-إِ-د-ثوْشذْ، حِيمَا أَذْ ت طّْفنْ ذ ڒْوَارْثْ.“ ▪
16 ”أَقَا نِيثْنِي أَكْ-ذ إِبَابَاثنْ نّغْ ڭِّينْ س ؤُعفَّارْ ذ ثْغنَّانْثْ ؤُ وَارْ سْڒِينْ شَا غَارْ ڒُومُورَاثْ نّكْ.
17 نِيثْنِي ؤُڭِينْ أَذْ غَارسْ سْڒنْ، وَارْ فكَّارنْ ذِي لْمُوعْجِيزَاثْ نّكْ إِ غَارْسنْ ثڭِّيذْ ؤُ نِيثْنِي غنَّانْ ؤُ ذڭْ ؤُغوّغْ نْسنْ ڭِّينْ إِجّْ ذ ؤُزدْجِيفْ خْ يِيخفْ نْسنْ حِيمَا أَذْ عقْبنْ غَارْ ثسْمُوغِي نْسنْ. مَاشَا شكْ ذ إِجّْ ن أَربِّي إِغفَّارنْ، ذَايكْ ڒْخَاضَارْ ذ أَرّحْمثْ، غَاركْ تَّاسِيعْ ن ڒْخَاضَارْ ذ ثَامخْسِيوْثْ إِشوَّارنْ س وَاطَّاسْ، ؤُ شكْ وَارْ ذَايْسنْ ثسْمِيحذْ شَا. ▪
18 عَاذْ، ؤُمِي ڭِّينْ نِيثْنِي إِجّْ ن ؤُينْذُوزْ إِفسْينْ إِ يِيخفْ نْسنْ، نَّانْ: ’وَا ذ أَربِّي نّكْ إِ شكْ إِ د-إِسُّوفّْغنْ زِي مِيصْرَا‘، ؤُشَا شقّْفنْ أَطَّاسْ، ▫ ▪
19 أَقَا شكْ ذِي أَرّحْمثْ نّكْ ثَامقّْرَانْثْ وَارْ ثنْ ثجِّيذْ شَا ذِي ڒخْڒَا. أَقلِّيجْ ن ؤُسيْنُو إِ إِدْجَانْ حِيمَا أَذْ ثنْ إِڭوّذْ س وَاسّْ وَارْ خَاسنْ إِڭّْوِيجْ شَا ؤُڒَا ذ أَقلِّيجْ ن ثْمسِّي إِ إِدْجَانْ حِيمَا أَذْ أَسنْ إِوْشْ ثَافَاوْثْ ذڭْ وبْرِيذْ إِ خْ إِ غَا ؤُيُورنْ، وَارْ خَاسنْ إِڭّْوِيجْ شَا س دْجِيڒثْ. ▪
20 شكْ ثوْشِيذْ أَرُّوحْ نّكْ أَصبْحَانْ، حِيمَا أَذْ ثنْ إِسّڒْمذْ ؤُ شكْ وَارْ ذ أَسنْ ثكِّيسذْ شَا ’مَانَّا‘ زڭْ ؤُقمُّومْ نْسنْ ؤُشَا ثوْشِيذْ أَسنْ أَمَانْ إِ ؤُفَاذِي نْسنْ. ▪
21 أَربْعِينْ ن إِسڭّْوُوسَا شكْ ثتّْهلِّيذْ ذَايْسنْ ذِي ڒخْڒَا. وَارْ غَارْسنْ إِتّْخِيصَّا ؤُڒَا ذ شَا ن ڒْحَاجّثْ، أَرُّوضْ نْسنْ وَارْ يَارْشِي شَا ؤُشَا إِضَارنْ نْسنْ وَارْ ؤُفّنْ. ▪
22 شكْ ثوْشِيذْ أَسنْ مَارَّا ثِيڭلْذِيوِينْ ذ ڒڭْنُوسْ ؤُشَا ثبْضِيذْ أَسنْ جّْوَايهْ. نِيثْنِي طّْفنْ ثَامُّورْثْ ن سِيحُونْ ذ ڒْوَارْثْ، أَقَا-ت ذ ثَامُّورْثْ ن ؤُجدْجِيذْ ن حَاشْپُونْ، ذ ثمُّورْثْ ن عُوجْ، أَجدْجِيذْ ن بَاشَانْ. ▪
23 شكْ ثَارِّيذْ إِحنْجِيرنْ نْسنْ أَطَّاسْ أَمشْنَاوْ إِثْرَانْ ذڭْ ؤُجنَّا ؤُ ثسِّيذْفذْ ثنْ غَارْ ثمُّورْثْ إِ خْ ثُوغَا ثنِّيذْ إِ إِبَابَاثنْ نْسنْ، أَذْ غَارسْ د-أَذْفنْ حِيمَا أَذْ ت طّْفنْ ذ ڒْوَارْثْ. ▪
24 يُوذفْ وَارَّاوْ ؤُشَا طّْفنْ ت ذ ڒْوَارْثْ ؤُ زَّاثْ إِ وُوذمْ نْسنْ أَقَا ثڭِّيذْ إِمزْذَاغْ ن ثمُّورْثْ سَاذُو أَفُوسْ نْسنْ، ؤُڒَا ذ إِجدْجِيذنْ نْسنْ ذ ڒڭْنُوسْ ن ثمُّورْثْ، حِيمَا أَذْ زَّايْسنْ ڭّنْ مِينْ إِ ذ أَسنْ إِتّْغِيڒْ مْلِيحْ. ▪
25 نِيثْنِي حوّْسنْ ثِيندَّامْ إِفَارْينْ ذ إِشْثْ ن ثمُّورْثْ إِسّغْمَاينْ ؤُ نِيثْنِي طّْفنْ عَاوذْ ثُوذْرِينْ ذ ڒْوَارْثْ شُّورنْثْ س مَارَّا ڒْخَارْ، أَنُوثنْ إِتّْوَاغْزنْ، إِمَارْجَاعنْ ن ؤُضِيڒْ ذ ڒعْرَاصِيثْ ن زِّيثُونْ ذ ثْشجِّيرَا ن فْرُوثَا س ؤُفيّضْ، ؤُشَا نِيثْنِي شِّينْ جِّيوْننْ، ذوْڒنْ صحّنْ ؤُشَا أَرِّينْ-د مژْرِي س ثْشُونِي نّكْ ثَامقّْرَانْثْ.
26 خنِّي مَاشَا ذوْڒنْ وَارْ طِّيعنْ ؤُشَا غوّْغنْ خَاكْ ؤُشَا نْضَارنْ شَّارِيعَا نّكْ ؤُ نْغِينْ إِنَابِييّنْ نّكْ إِنِّي ثُوغَا إِشهّْذنْ جَارْ أَسنْ مَاحنْذْ أَذْ ثنْ د-أَرّنْ غَاركْ. أَقَا شقّْفنْ ذَايكْ س يِيجّْ ن ؤُشقّفْ إِمْغَارْ. ▪
27 س ؤُيَا ثَارِّيذْ ثنْ ذڭْ ؤُفُوسْ ن إِمحْصَارنْ نْسنْ إِنِّي إِ ثنْ إِحْصَارنْ، مَاشَا مَاڒَا ڒَاغَانْ-د خَاكْ ذِي ڒْوقْثْ ن ڒحْصَارثْ نْسنْ، خنِّي ثسْڒِيذْ غَارْسنْ زڭْ ؤُجنَّا ؤُشَا ذِي أَرّحْمثْ نّكْ ثَامقّْرَانْثْ ثوْشِيذْ أَسنْ إِمْسنْجَامنْ نِّي إِ ثنْ إِفكّنْ زڭْ ؤُفُوسْ ن إِمحْصَارنْ نْسنْ. ▪
28 مَاڒَا ؤُفِينْ ڒْهُوذْنثْ، ڭِّينْ عَاوذْ ڒْغَارْ زَّاثْ إِ وُوذمْ نّكْ ؤُشَا ثڭِّيذْ ثنْ ذڭْ ؤُفُوسْ ن ڒْعذْيَانْ نْسنْ ؤُشَا نِيثْنِي سدْجْضنْ خَاسنْ. ؤُمِي ثُوبنْ، ڒَاغَانْ-د خَاكْ، أَقَا ثسْڒِيذْ أَسنْ زڭْ ؤُجنَّا ؤُ ثْفكّذْ إِ-ثنْ س أَرّحْمثْ نّكْ أَطَّاسْ ن ثْوَاڒَاوِينْ.
29 شكْ ثْشهْذذْ ضِيدّْ نْسنْ حِيمَا أَذْ د-عقْبنْ غَارْ شَّارِيعَا نّكْ، مَاشَا نِيثْنِي ڭِّينْ س ؤُعفَّارْ ؤُ وَارْ سْڒِينْ شَا غَارْ ثْوصَّا نّكْ. أَقَا خْضَانْ زِي جِّيهثْ ن لْفَارَايِيضْ نّكْ، ؤُمِي بْنَاذمْ ونِّي إِ زَّايْسنْ إِ غَا يڭّْ أَذْ زَّايْسنْثْ إِدَّارْ، ؤُشَا نِيثْنِي أَرِّينْ-د غَارْسنْ أَعْرُورْ، ثُوغَا سّْقسْحنْ إِرِي نْسنْ، وَارْ غَاركْ د-سْڒِينْ. ▪
30 أَطَّاسْ ن إِسڭّْوُوسَا ثْحمّْڒذْ أَكِيذْسنْ، ثْشهْذذْ ضِيدّْ إِ نْسنْ س أَرُّوحْ نّكْ، س ثْسخَّارْثْ ن إِنَابِييّنْ، مَاشَا نِيثْنِي وَارْ سْڒِينْ شَا ؤُشَا ثوْشِيذْ ثنْ ذڭْ ؤُفُوسْ ن ڒڭْنُوسْ ن ثمُّورَا. ▪
31 ذِي أَرّحْمثْ نّكْ ثَامقّْرَانْثْ وَارْ ثنْ ثَارذْدْجذْ شَا ؤُ وَارْ ذَايْسنْ ثسْمِيحذْ شَا، مَاغَارْ شكْ ذ إِجّْ ن أَربِّي ذ أَحْنِينْ ذ أَرْحِيمْ.
32 ”خنِّي ڒخُّو، أَربِّي نّغْ، أَقَا شكْ، أَربِّي ذ أَمقّْرَانْ، إِزمَّارنْ، إِسَّاڭّْوَاذنْ، ونِّي إِطّْفنْ ذِي ڒْعَاهْذْ ؤُ ذِي ثْمخْسِيوْثْ إِشوَّارنْ، وَارْ حسّبْ شَا ذْرُوسْ زَّاثْ إِ وُوذمْ نّكْ مَارَّا ڒغْبنْ إِ خَانغْ د-إِكِّينْ، خْ إِجدْجِيذنْ نّغْ، خْ ڒْحُوكَّامْ نّغْ ؤُ خْ إِكهَّاننْ نّغْ ؤُ خْ إِنَابِييّنْ نّغْ ؤُ خْ إِبَابَاثنْ نّغْ ؤُ خْ مَارَّا ڒْڭنْسْ نّغْ زڭْ وُوسَّانْ ن إِجدْجِيذنْ ن أَشُّورْ أَڒْ أَسّْ-أَ.
33 ثُوغَا شكْ ذ أَمْسڭّذْ ذِي مَارَّا مِينْ خَانغْ إِكِّينْ، مَاغَارْ شكْ ثڭِّيذْ أَنغْ س ڒَامَانْ، نشِّينْ مَاشَا نڭَّا س ڒقْجَاحثْ. ▪
34 إِجدْجِيذنْ نّغْ، ڒْحُوكَّامْ نّغْ، إِكهَّاننْ نّغْ ذ إِبَابَاثنْ نّغْ وَارْ ضفَّارنْ شَّارِيعَا نّكْ ؤُشَا وَارْ سْڒِينْ غَارْ ڒُومُورَاثْ نّكْ ؤُڒَا غَارْ شّْهَاذَاثْ نّكْ نِّي ثْشهْذذْ ضِيدّْ إِ نْسنْ.
35 س ثْڭلْذِيثْ نْسنْ ؤُ س ڒْخَارْ نْسنْ أَطَّاسْ إِ ذ أَسنْ ثوْشِيذْ ؤُ س ثمُّورْثْ ثَامقّْرَانْثْ إِسّغْمَاينْ إِ ذ أَسنْ ثوْشِيذْ، وَارْ شكْ سخَّارنْ شَا ؤُشَا وَارْ ثُوبنْ زِي ثْمڭَّا نْسنْ ثِيعفَّانِينْ.
36 خْزَارْ أَسّْ-أَ أَقَا نشِّينْ ذ إِمْسخَّارنْ ؤُ ثَامُّورْثْ إِ ثوْشِيذْ إِ إِبَابَاثنْ نّغْ مَاحنْذْ أَذْ زَّايسْ نشّْ ڒْغِيدْجثْ ذ ڒْخَارْ، خْزَارْ أَقَا نشِّينْ ذ إِمْسخَّارنْ إِ ذَايسْ ندْجْ.
37 ڒْغِيدْجثْ ثَامقّْرَانْثْ نّسْ أَذْ ثْرَاحْ غَارْ إِجدْجِيذنْ، إِنِّي إِ خَانغْ ثڭِّيذْ ذِي سِّيبّثْ ن دّْنُوبْ نّغْ، ؤُشَا نِيثْنِي تّْصدْجَاضنْ خْ أَرَّايمْ نّغْ ؤُ خْ ڒْمَاڒْ نّغْ أَمْ مَامّشْ إِ ذ أَسنْ إِتّْغِيڒْ مْلِيحْ، ؤُ نشِّينْ أَقَا أَنغْ ذِي ڒحْصَارثْ ذ ثَامقّْرَانْثْ.“