‏1 نِيثْنِي سِّيذْفنْ تَّاپُوثْ ن أَربِّي غَارْ ذَاخڒْ ؤُشَا سَّارْسنْ ت ذِي ڒْوسْثْ ن ؤُقِيضُونْ نِّي ثُوغَا ذ أَسْ د-إِشدّْ ذَاوُوذْ ؤُشَا ذَاوُوذْ إِقدّمْ ثِيغَارْصَا ن وشْمَاضْ ذ ثِيغَارْصَا ن ڒهْنَا زَّاثْ إِ وُوذمْ ن أَربِّي. ‏2 ؤُمِي إِكمّڒْ ذَاوُوذْ أَقدّمْ ن ثْغَارْصْثْ ن وشْمَاضْ ذ ثْغَارْصَا ن ڒهْنَا، إِبَاركْ ڒْڭنْسْ ذڭْ يِيسمْ ن سِيذِي. ‏3 نتَّا إِبْضَا إِ مَارَّا ذِي إِسْرَائِيل، إِ يرْيَازنْ ذ ثمْغَارِينْ، إِ كُوڒْ إِجّْ إِجّْ ن ونْڭُورْ ن وغْرُومْ، إِجّْ ن ؤُشدْجِيقْ ن ويْسُومْ ن ؤُفُونَاسْ ذ إِجّْ ن وَارقِّيعْ ن زّْبِيبْ. ‏4 نتَّا إِڭَّا شَا ن إِلَاوِييّنْ ذ إِمْسخَّارنْ إِ تَّاپُوثْ ن سِيذِي ؤُ حِيمَا أَذْ سّْعقْڒنْ ؤُ أَذْ قَاذَانْ ؤُ أَذْ سّمْغَارنْ سِيذِي، أَربِّي ن إِسْرَائِيل. ‏5 أَسَافْ ثُوغَا-ث ذ أَزدْجِيفْ ذ زَاكَارِييَّا ثُوغَا-ث ذ وِيسّْ ثْنَاينْ أَوَارْنِي أَسْ ؤُ خنِّي يَاعِييِيلْ، شَامِيرَامُوثْ، يَاحِييِيلْ، مَاتِّيثْيَا، إِلِييَابْ، بَانَايَا، عُوبِيذْ-إِذُومْ ذ يَاعِييِيلْ س دُّوزَانَاثْ أَمْ لْهَارْبَاثْ ذ ڒْڭَامْبْرِييَاثْ ؤُشَا أَسَافْ إِڭَّا أَذْ أَسْ سْڒنْ س ثدْجُونِينْ ن وُوزَّاڒْ. ‏6 إِكهَّاننْ بَانَايَا ذ يَاحْزِييِيلْ ؤُيُورنْ س ڒْغَايْطَاثْ زَّاثْ إِ تَّاپُوثْ ن ڒْعَاهْذْ ن أَربِّي.

‏7 ذڭْ وَاسّْ نِّي إِڭَّا ذَاوُوذْ إِ ثْوَاڒَا ثَامزْوَارُوثْ خْ أَسَافْ ذ أَيْثْمَاسْ مَاحنْذْ أَذْ سّمْغَارنْ سِيذِي.

‏8 ”قَاذَامْ سِيذِي، ڒَاغَامْ خْ يِيسمْ نّسْ،

بَارّْحمْ س ثْمڭَّا نّسْ جَارْ ڒڭْنُوسْ.

‏9 غنّْجمْ أَسْ، زهّْذمْ إِ نتَّا،

سِيوْڒمْ خْ مَارَّا لْمُوعْجِيزَاثْ نّسْ.

‏10 شنّْعمْ س يِيسمْ نّسْ أَمْقدّسْ،

حِيمَا ؤُڒْ ن يِينِّي يَارزُّونْ سِيذِي، أَذْ إِفَارْحْ.

‏11 سقْسَامْ خْ سِيذِي ذ جّهْذْ نّسْ،

أَرْزُومْ ؤُذمْ نّسْ ڒبْذَا.

‏12 عقْڒمْ خْ ڒعْجَايبْ نّسْ إِ إِڭَّا،

خْ ڒعْڒَامثْ نّسْ ؤُ ذِي ڒحْكَامَاثْ ن ؤُقمُّومْ نّسْ.

‏13 زَّارِيعثْ ن إِسْرَائِيل، أَمْسخَّارْ نّسْ،

أَيْثْ ن يَاعْقُوبْ، إِنِّي زَّايسْ إِتّْوَافَارْزنْ!

‏14 نتَّا ذ سِيذِي، أَربِّي نّغْ.

ڒحْكَامَاثْ نّسْ إِ د-إِتَّاسنْ خْ مَارَّا ثَامُّورْثْ.

‏15 عقْڒمْ خْ ڒْعَاهْذْ نّسْ إِ ڒبْذَا،

أَوَاڒْ نِّي إِ إِوصَّا إِ أَڒفْ ن ڒشْيُورْ،

‏16 ڒْعَاهْذْ إِ إِڭَّا أَكْ-ذ إِبْرَاهِيمْ،

إِسّمْثنْ إِ-ث س ثْجَادْجِيثْ نّسْ إِ إِسْحَاقْ.

‏17 نتَّا إِڭَّا إِ-ث ذ إِشْثْ ن ثوْصيّثْ إِ يَاعْقُوبْ،

إِ إِسْرَائِيل إِڭَّا إِ-ث ذ إِجّْ ن ڒْعَاهْذْ إِ ڒبْذَا

‏18 ؤُمِي إِنَّا: ”أَذْ أَشْ وْشغْ ثَامُّورْثْ ن كنْعَانْ،

ثَاسْغَارْثْ إِ ذ أَومْ د-إِكَّارنْ!“،

‏19 ؤُمِي كنِّيوْ ثُوغَا ذ إِجّْ ن وُورُو ن يرْيَازنْ، س ذْرُوسْثْ وَاهَا،

ذ إِبَارَّانِييّنْ ذِي ثمُّورْثْ.

‏20 ثلْعنْ زِي ڒْڭنْسْ غَارْ ڒْڭنْسْ نّغْنِي،

زڭْ إِشْثْ ن ثْڭلْذِيثْ غَارْ إِجّْ ن ڒْڭنْسْ نّغْنِي.

‏21 نتَّا وَارْ إِجِّي ؤُڒَا ذ إِجّْ أَذْ ثنْ إِحْصَارْ،

ؤُ نتَّا إِعَاقبْ إِجدْجِيذنْ ذِي طّْوعْ نْسنْ.

‏22 ’وَارْ تّْحَاذَامْ شَا إِمذْهَانْ إِنُو،

ؤُ وَارْ تّڭّمْ ڒْغَارْ ذڭْ إِنَابِييّنْ إِنُو!‘

‏23 غنّْجمْ إِ سِيذِي، مَارَّا ثَامُّورْثْ،

بَارّْحمْ إِ ؤُسنْجمْ نّسْ أَسّْ خْ وَاسّْ.

‏24 حَاجَامْ أَعُودْجِي نّسْ جَارْ ڒڭْنُوسْ،

ڒعْجَايبْ نّسْ جَارْ مَارَّا ڒڭْنُوسْ.

‏25 مَاغَارْ سِيذِي ذ أَمقّْرَانْ، إِسّْذَاحدْجْ أَسمْغَارْ أَطَّاسْ،

نتَّا ذ أَمَاڭّْوذْ مَاهُو مَارَّا إِربِّيثنْ.

‏26 مِينْزِي مَارَّا إِربِّيثنْ ن ڒڭْنُوسْ أَقَا أَثنْ ذ لْ-أَصْنَامْ،

مَاشَا سِيذِي إِڭَّا إِجنْوَانْ.

‏27 ثِيسِّيقْثْ ذ ڒْعزّْ أَقَا أَثنْ زَّاثْ إِ وُوذمْ نّسْ،

جّهْذْ ذ ڒفْرَاحثْ ذڭْ ومْشَانْ نّسْ.

‏28 وْشمْ إِ سِيذِي، أَ ثِيقبَّاڒْ ن ڒڭْنُوسْ،

وْشمْ إِ سِيذِي أَعُودْجِي ذ جّهْذْ.

‏29 وْشمْ إِ سِيذِي أَعُودْجِي ن يِيسمْ نّسْ،

أَوْيمْ ثَاوْهِيبْثْ ؤُشَا أَسمْ-د زَّاثْ إِ وُوذمْ نّسْ،

سجْذمْ إِ سِيذِي س ؤُشوَّارْ إِقدّْسنْ.

‏30 أَرْجِيجّمْ زَّاثْ إِ وُوذمْ نّسْ، أَ مَارَّا ثَامُّورْثْ!

نِيشَانْ، ڒخُّو دُّونشْثْ ثْبدّْ ثمْثنْ، وَارْ تّنْهزِّي عَاذْ.

‏31 أجّْ أَجنَّا أَذْ إِفَارْحْ ؤُ ثَامُّورْثْ أَذْ ثْفَارْحْ،

أَذْ إِنِينْ جَارْ ڒڭْنُوسْ:

سِيذِي إِحكّمْ.

‏32 أجّْ أَذْ إِزْهَارْ ڒبْحَارْ ذ ؤُعمَّارْ نّسْ،

أجّْ أَذْ إِسْڒِيوْڒوْ ييَّارْ س ڒفْرَاحثْ،

س مَارَّا مِينْ ذَايسْ.

‏33 خنِّي أَذْ سْڒِيوْڒِيونْثْ مَارَّا ثِيشجِّيرَا ن وزْغَارْ زَّاثْ إِ وُوذمْ ن سِيذِي،

مَاغَارْ نتَّا أَذْ د-يَاسْ، حِيمَا أَذْ إِسڭّذْ ثَامُّورْثْ. ^▫  

‏34 قَاذَامْ سِيذِي، مَاغَارْ نتَّا إِصْبحْ،

مَاغَارْ ثَامخْسِيوْثْ نّسْ إِشوَّارنْ ثتّْغِيمَا إِ ڒبْذَا.

‏35 إِنِيمْ: سنْجمْ أَنغْ، أَ أَربِّي ن ؤُسنْجمْ نّغْ،

نْذهْ أَنغْ نْمُونْ، سنْجمْ أَنغْ زِي ڒڭْنُوسْ،

حِيمَا أَذْ نْقَاذَا إِسمْ أَمْقدَّاسْ نّكْ

ؤُ أَذْ شكْ نْصبّحْ س إِزْڒَانْ ن ؤُصبّحْ.

‏36 أَذْ إِتّْوَابَاركْ سِيذِي، أَربِّي ن إِسْرَائِيل،

زِي ڒبْذَا أَڒْ ڒبْذَا!“

ؤُ مَارَّا ڒْڭنْسْ إِنَّا: ”أَمِينْ!“ ؤُشَا إِمْذحْ سِيذِي.

‏37 نتَّا إِڭَّا ذِينْ، زَّاثْ إِ وُوذمْ ن تَّاپُوثْ ن سِيذِي، إِ أَسَافْ ذ يَايْثْمَاسْ حِيمَا أَذْ سخَّارنْ ڒبْذَا زَّاثْ إِ وُوذمْ ن تَّاپُوثْ، حِيمَا أَذْ ڭّنْ كُوڒْ أَسّْ مِينْ يُورِينْ إِ وَاسّْ نِّي. ‏38 عُوبِيذْ-إِذُومْ، ... أَكْ-ذ أَيْثْمَاثْسنْ، ثُوغَا أَثنْ جْمِيعْ ثْمنْيَا ؤُ-ستِّينْ ن يرْيَازنْ. عُوبِيذْ-إِذُومْ، مِّيسْ ن يَاذِيثُونْ، ذ حُوسَا ثُوغَا أَثنْ ذ إِعسَّاسنْ ن ثِيوُّورَا، ‏39 ؤُشَا أَكهَّانْ صَاذُوقْ ذ يَايْثْمَاسْ، إِكهَّاننْ، ثُوغَا تّْسخَّارنْ زَّاثْ إِ ثْزذِّيغْثْ ن سِيذِي خْ ڒْڭعّْذثْ نِّي إِدْجَانْ غَارْ جِيبْعُونْ، ‏40 حِيمَا أَذْ أَوْينْ ثِيغَارْصَا ن وشْمَاضْ بْڒَا أَقطُّو إِ سِيذِي خْ ؤُعَالْطَارْ ن وشْمَاضْ، غَارْ ثُوفُّوثْ ؤُ غَارْ ثْمذِّيثْ، أَمْ مَامّشْ مَارَّا مِينْ يُورَانْ ذِي شَّارِيعَا ن سِيذِي، ثنِّي إِڭَّا ذ ثوْصيّثْ إِ إِسْرَائِيل. ‏41 غَارْسنْ ثُوغَا هَايْمَانْ ذ يَاذُوثُونْ أَكْ-ذ إِنّغْنِي إِنِّي إِتّْوَافَارْزنْ ؤُ إِتّْوَاڭّنْ س يِيسْمَاونْ نْسنْ حِيمَا أَذْ قَاذَانْ سِيذِي: ’مَاغَارْ ثَامخْسِيوْثْ نّسْ إِشوَّارنْ ثتّْغِيمَا إِ ڒبْذَا!‘ ‏42 ثُوغَا غَارْ هَايْمَانْ ذ يَاذُوثُونْ ذ ونّغْنِي ڒْغَايْطَاثْ ذ ثَادْجُونِينْ ن وُوزَّاڒْ مَاحنْذْ أَذْ ڭّنْ أَذْ أَسنْ سْڒنْ يوْذَانْ، ؤُڒَا ذ دُّوزَانَاثْ ن لْمُوسِيقَا إِنّغْنِي إِ ؤُسمْغَارْ ن أَربِّي. أَرَّاونْ ن يَاذُوثُونْ ثُوغَا بدّنْ غَارْ ثوَّارْثْ ن وَاذَافْ.

‏43 خنِّي يُويُورْ مَارَّا ڒْڭنْسْ، كُوڒْ إِجّْ غَارْ ثَادَّارْثْ نّسْ. ؤُڒَا ذ ذَاوُوذْ إِعْقبْ غَارْ ثَادَّارْثْ نّسْ حِيمَا أَذْ إِبَاركْ ثَادَّارْثْ نّسْ.