‏1 ؤُمِي إِزْذغْ ذَاوُوذْ ذِي ثَادَّارْثْ نّسْ، إِنَّا ذَاوُوذْ إِ ؤُنَابِي نَاثَانْ: ”خْزَارْ، نشّْ زدّْغغْ ذڭْ إِشْثْ ن ثَادَّارْثْ ن ؤُكشُّوضْ ن ثْشجَّارْثْ ن ثنْڭلْثْ، مَاشَا تَّاپُوثْ ن ڒْعَاهْذْ ن سِيذِي أَقَا-ت ذِي ڒْكتَّانْ ن ؤُقِيضُونْ.“ ‏2 نَاثَانْ يَارَّا-د خْ ذَاوُوذْ: ”أڭّْ مَارَّا مِينْ غَاركْ ذڭْ وُوڒْ نّكْ، مَاغَارْ أَربِّي أَكِيذكْ.“

‏3 ذِي دْجِيڒثْ نِّي إِمْسَارْ أَقَا يُوسَا-د وَاوَاڒْ ن أَربِّي غَارْ نَاثَانْ، إِنَّا: ‏4 ”ؤُيُورْ، إِنِي إِ ؤُمْسخَّارْ إِنُو ذَاوُوذْ: ’أَمُّو إِ إِقَّارْ سِيذِي: وَارْ ذ أَيِي ثْبنِّيذْ ثَادَّارْثْ إِ نشّْ حِيمَا أَذْ ذَايسْ زذْغغْ، ‏5 مَاغَارْ زڭْ وَاسّْ ؤُمِي د-سّْڭعّْذغْ إِسْرَائِيل زِي مِيصْرَا، نشّْ وَارْ زْذِيغغْ عمَّارْصْ ذڭْ إِشْثْ ن ثَادَّارْثْ. مَاشَا نشّْ ثُوغَا ڭُّورغْ زڭْ ؤُقِيضُونْ غَارْ ؤُقِيضُونْ، زِي ثْزذِّيغْثْ غَارْ ثْزذِّيغْثْ. ‏6 مَانِي مَا ؤُيُورغْ أَكْ-ذ مَارَّا إِسْرَائِيل، مَا نشّْ سِّيوْڒغْ عمَّارْصْ ؤُڒَا س إِجّْ ن وَاوَاڒْ أَكْ-ذ إِجّنْ زِي ڒْقُوضَاثْ ن إِسْرَائِيل، إِنِّي ثُوغَا ڭِّيغْ أَذْ أَروْسنْ ڒْڭنْسْ إِنُو إِسْرَائِيل، نِّيغْ: ’مَايمِّي كنِّيوْ وَارْ ذ أَيِي ثْبنِّيمْ شَا ثَادَّارْثْ س ؤُكشُّوضْ ن ثْشجَّارْثْ ن ثنْڭلْثْ؟‘ “

‏7 خنِّي ڒخُّو، أَمُّو إِ غَا ثِينِيذْ إِ ؤُمْسخَّارْ إِنُو، إِ ذَاوُوذْ: ”أَمُّو إِ إِقَّارْ سِيذِي ن ڒْعسْكَارَاثْ إِجهْذنْ: ’نشّْ إِوْيغْ-د شكْ زِي ڒْكُورِي، زِي ضفَّارْ ن وُودْجِي، مَاحنْذْ أَذْ ثْذوْڒذْ ذ أَمْڭوّذْ خْ ڒْڭنْسْ إِنُو إِسْرَائِيل. ‏8 مَانِي مَا ثُويُورذْ، ثُوغَا أَيِي أَكِيذكْ ؤُ نشّْ ثحِّيغْ مَارَّا ڒْعذْيَانْ زَّاثْ إِ ثِيطَّاوِينْ نّكْ ؤُ نشّْ ڭِّيغْ أَشْ إِجّْ ن يِيسمْ أَمْ يِيسمْ ن إِمقّْرَاننْ خْ ثمُّورْثْ. ‏9 نشّْ نيّْشغْ إِجّْ ن ومْشَانْ إِ ڒْڭنْسْ إِنُو ؤُشَا ژُّوغْ ث ذِينْ مَاحنْذْ أَذْ إِزْذغْ ذڭْ ومْشَانْ نّسْ ؤُ وَارْ إِتّْوَاسّنْهزِّي عَاذْ ؤُ وَارْ ث حصَّارنْ عَاذْ أَيْثْ ن ڒْمُوعْصِييّثْ، أَمْ ذڭْ ؤُمزْوَارُو،

‏10 زڭْ وُوسَّانْ ؤُمِي نشّْ ڭِّيغْ ڒْقُوضَاثْ خْ ڒْڭنْسْ إِنُو إِسْرَائِيل. نشّْ سّْوَاضْعغْ مَارَّا ڒْعذْيَانْ نّكْ ؤُ سَّارْڭْبغْ شكْ بلِّي سِيذِي أَذْ أَشْ إِبْنَا إِشْثْ ن ثَادَّارْثْ.

‏11 خْ مِينِّي إِ غَا قفْڒنْ وُوسَّانْ نّكْ ؤُ أَذْ ثتّْوَاسَارْسذْ ذڭْ ونْضڒْ أَكْ-ذ ڒجْذُوذْ نّكْ، أَذْ إِمْسَارْ، نشّْ أَذْ سّكَّارغْ مِّيشْ أَوَارْنِي أَشْ، ونِّي إِ غَا إِفّْغنْ زڭْ إِحنْجِيرنْ نّكْ، ؤُ نشّْ أَذْ سّْمثْنغْ ثَاڭلْذِيثْ نّسْ. ^▫  

‏12 نتَّا أَذْ أَيِي إِبْنَا إِشْثْ ن ثَادَّارْثْ ؤُ نشّْ أَذْ سّْبدّغْ ڒْعَارْشْ نّسْ إِ ڒبْذَا.

‏13 نشّْ أَذْ إِڒِيغْ ذ بَابَاسْ إِ نتَّا ؤُ نتَّا أَذْ أَيِي يِيڒِي ذ مِّي ؤُ نشّْ وَارْ خَاسْ سّْحيِّيذغْ شَا ثَامخْسِيوْثْ إِنُو إِشوَّارنْ أَمْ مَامّشْ ت سْحيّْذغْ خْ ونِّي ثُوغَا ذ أَشْ إِزْوَارنْ.

‏14 نشّْ أَذْ ث سّْمثْنغْ ذِي ثَادَّارْثْ إِنُو ؤُ ذِي ثْڭلْذِيثْ إِنُو إِ ڒبْذَا ؤُ ڒْعَارْشْ نّسْ أَذْ إِبدّْ إِمْثنْ إِ ڒبْذَا.‘ “

‏15 إِسِّيوڒْ نَاثَانْ أَكْ-ذ ذَاوُوذْ نِيشَانْ أَمْ مَامّشْ مَارَّا أَوَاڒنْ-أَ ؤُ أَمْ مَامّشْ مَارَّا ثَامژْرِيوْثْ-أَ.

‏16 خنِّي يُوذفْ ؤُجدْجِيذْ ذَاوُوذْ ؤُشَا إِقِّيمْ زَّاثْ إِ وُوذمْ ن سِيذِي، إِنَّا: ”مِينْ عْنِيغْ نشّْ، سِيذِي أَربِّي، ؤُ مِينْ ثعْنَا ثَادَّارْثْ إِنُو أَقَا شكْ ثْنذْهذْ أَيِي-د أَڒْ ذَانِيثَا؟

‏17 ذِي ثِيطَّاوِينْ نّكْ ثُوغَا مَانْ أَيَا ذْرُوسْ وَاهَا، أَ أَربِّي، ؤُ ڒخُّو ثسِّيوْڒذْ عَاذْ خْ ثَادَّارْثْ ن ؤُمْسخَّارْ نّكْ ذڭْ إِجّْ ن يِيمَارْ إِڭّْوجْ ؤُ ثْخزَّارذْ ذَايِي أَمْ إِجّْ ن ؤُفِيڒُو ن إِحنْجِيرنْ ن بْنَاذمْ إِ د-إِتَّاوْينْ غَارْ سنّجْ، أَ سِيذِي، أَربِّي!

‏18 مِينْ ذ أَشْ إِ غَا يِينِي ذَاوُوذْ عَاذْ كْثَارْ خْ شّنْعثْ إِ ثسّشْنذْ إِ ؤُمْسخَّارْ نّكْ؟ أَقَا شكْ ثسّْنذْ أَمْسخَّارْ نّكْ!

‏19 أَ سِيذِي، أَقَا ثڭِّيذْ مَارَّا ڒمْغَارثْ-أَ ذِي طّْوعْ ن ؤُمْسخَّارْ نّكْ ؤُ عْلَاحْسَابْ ؤُڒْ نّكْ، حِيمَا أَذْ ثسَّارْڭْبذْ أَمُّو مَارَّا ثِيمسْڒَايِينْ-أَ ثِيمقّْرَانِينْ. ‏20 أَ سِيذِي، ؤُڒَا ذ إِجّْ وَارْ إِدْجِي أَمْ شكْ. وَارْ ذِينْ أَربِّي مْغِيرْ شكْ، س مَارَّا مِينْ نسْڒَا س إِمزُّوغنْ نّغْ. ‏21 مَانْ ونْ إِ إِدْجَانْ أَمْ ڒْڭنْسْ نّكْ إِسْرَائِيل، أَينِّي ن ڒْڭنْسْ إِ إِدْجَانْ خْ ثمُّورْثْ إِ غَارْ إِڒَاحْ أَربِّي حِيمَا أَذْ ث إِفْذِي إِ يِيخفْ نّسْ ذ ڒْڭنْسْ حِيمَا أَذْ إِڭّْ إِ يِيخفْ نّسْ إِسمْ س ثْمڭَّا ثِيمقّْرَانِينْ ذ إِسِّيڭّْوْذنْ ؤُ حِيمَا أَذْ يَاژّڒْ خْ ڒڭْنُوسْ زَّاثْ إِ وُوذمْ ن ڒْڭنْسْ نّكْ، ونِّي ثفْذِيذْ زِي مِيصْرَا؟ ^▫   ‏22 شكْ ثڭِّيذْ ڒْڭنْسْ نّكْ إِسْرَائِيل ذ إِجّْ ن ڒْڭنْسْ إِ يِيخفْ نّكْ إِ ڒبْذَا. شكْ، أَ سِيذِي، أَقَا شكْ ثْذوْڒذْ ذ أَربِّي إِ نِيثْنِي.

‏23 خنِّي ڒخُّو، أَ سِيذِي أَربِّي، أجّْ أَوَاڒْ نِّي ثسِّيوْڒذْ خْ ؤُمْسخَّارْ نّكْ ؤُ خْ ثَادَّارْثْ نّسْ أَذْ إِبدّْ إِ ڒبْذَا ؤُ أڭّْ أَمْ مَامّشْ ثسِّيوْڒذْ. ‏24 أجّْ إِسمْ نّكْ أَذْ إِتّْوَاسّمْغَارْ إِ ڒبْذَا ؤُمِي غَا إِنِينْ: ’سِيذِي ن ڒْعسْكَارَاثْ إِجهْذنْ، أَربِّي ن إِسْرَائِيل، أَقَا-ث ذ أَربِّي خْ إِسْرَائِيل‘ ؤُشَا إِڒِي أَذْ ثتّْوَاسمْثنْ ثَادَّارْثْ ن ؤُمْسخَّارْ نّكْ ذَاوُوذْ زَّاثْ إِ وُوذمْ نّكْ. ‏25 مَاغَارْ شكْ، أَربِّي إِنُو، ثسَّارْڭْبذْ ذڭْ إِمزُّوغنْ ن ؤُمْسخَّارْ نّكْ أَقَا شكْ أَذْ أَسْ ثبْنِيذْ إِشْثْ ن ثَادَّارْثْ. س ؤُينِّي ثُوسَا-د إِ ؤُمْسخَّارْ نّكْ ذڭْ وُوڒْ حِيمَا أَذْ إِژَّادْجْ زَّاثْ إِ وُوذمْ نّكْ. ‏26 خنِّي ڒخُّو، أَ سِيذِي، شكْ ذ أَربِّي نِّي ؤُ شكْ ثسِّيوْڒذْ س مَارَّا ثْشُونِي أَيَا خْ ؤُمْسخَّارْ نّكْ. ‏27 خنِّي ڒخُّو، أَقَا يَارْضَا إِ شكْ أَذْ ثْبَارْكذْ ثَادَّارْثْ ن ؤُمْسخَّارْ نّكْ حِيمَا أَذْ ثِيڒِي زَّاثْ إِ وُوذمْ نّكْ إِ ڒبْذَا. مِينْزِي شكْ، أَ سِيذِي، ثْبَارْكذْ ت ؤُشَا أَذْ ثتّْوَابَاركْ إِ ڒبْذَا.“