‏1 ذَاوُوذْ إِڭَّا إِ يِيخفْ نّسْ ثُوذْرِينْ ذِي ثنْذِينْثْ ن ذَاوُوذْ ؤُ نتَّا إِڭَّا عَاوذْ إِجّْ ن ومْشَانْ إِ تَّاپُوثْ ن أَربِّي ؤُشَا إِسّْبدّْ أَسْ إِجّْ ن ؤُقِيضُونْ. ‏2 خنِّي إِنَّا ذَاوُوذْ: ”ؤُڒَا ذ إِجّنْ وَارْ إِزمَّارْ أَذْ يَارْپُو تَّاپُوثْ ن أَربِّي مْغِيرْ إِلَاوِييّنْ وَاهَا، مَاغَارْ سِيذِي إِفَارْزْ إِ-ثنْ حِيمَا أَذْ أَرْپُونْ تَّاپُوثْ ن أَربِّي ؤُ حِيمَا أَذْ أَسْ سخَّارنْ إِ ڒبْذَا.“ ‏3 ذَاوُوذْ إِسّْمُونْ-د مَارَّا إِسْرَائِيل غَارْ ؤُرْشَالِيمْ حِيمَا أَذْ سّْڭعّْذنْ تَّاپُوثْ ن سِيذِي غَارْ ومْشَانْ نّسْ نِّي ثُوغَا ذ أَسْ إِڭَّا.

‏4 ذَاوُوذْ إِسّْمُونْ ؤُڒَا ذ إِحنْجِيرنْ ن هَارُونْ ذ إِلَاوِييّنْ.

‏5 زڭْ إِحنْجِيرنْ ن قَاهَاثْ ثُوغَا ؤُرِييِيلْ ذ ڒْقبْطَانْ نْسنْ. أَيْثْمَاسْ ثُوغَا أَثنْ ذِي مْيَا ؤُ-عِيشْرِينْ.

‏6 زڭْ إِحنْجِيرنْ ن مَارَارِي ثُوغَا عَاسَايَا ذ ڒْقبْطَانْ نْسنْ. أَيْثْمَاسْ ثُوغَا أَثنْ ذِي مِيثَاينْ ؤُ-عِيشْرِينْ.

‏7 زڭْ إِحنْجِيرنْ ن جَارْشُومْ ثُوغَا يُووِيلْ ذ ڒْقبْطَانْ نْسنْ. أَيْثْمَاسْ ثُوغَا أَثنْ ذِي مْيَا ؤُ-ثْڒَاثِينْ.

‏8 زڭْ إِحنْجِيرنْ ن إِلِيصَافَانْ ثُوغَا شْمَاعْيَا ذ ڒْقبْطَانْ نْسنْ. أَيْثْمَاسْ ثُوغَا أَثنْ ذِي مِيثَاينْ.

‏9 زڭْ إِحنْجِيرنْ ن حَابْرُونْ ثُوغَا إِلِييِيلْ ذ ڒْقبْطَانْ نْسنْ. أَيْثْمَاسْ ثُوغَا أَثنْ ذِي ثْمنْيِينْ.

‏10 زڭْ إِحنْجِيرنْ ن عُوزِّييِيلْ ثُوغَا عَامِّينَاذَابْ ذ ڒْقبْطَانْ نْسنْ. أَيْثْمَاسْ ثُوغَا أَثنْ ذِي مْيَا ؤُ-ثنْعَاشْ ن يرْيَازنْ.

‏11 ذَاوُوذْ إِڒَاغَا إِ إِكهَّاننْ صَاذُوقْ ذ أَبْيَاثَارْ ؤُڒَا إِ إِلَاوِييّنْ ؤُرِييِيلْ، عَاسَايَا، يُووِيلْ، شْمَاعْيَا، إِلِييِيلْ ذ عَامِّينَابْ.

‏12 نتَّا إِنَّا أَسنْ: ”كنِّيوْ ذ إِزدْجِيفنْ ن إِبَابَاثنْ ن ڒَادْجَاثْ ن إِلَاوِييّنْ. سْقدّْسمْ إِخفْ نْومْ، كنِّيوْ ذ أَيْثْمَاثْومْ، حِيمَا أَذْ ثسّْڭعّْذمْ تَّاپُوثْ ن سِيذِي، أَربِّي ن إِسْرَائِيل غَارْ ومْشَانْ نِّي ذ أَسْ سّْوجْذغْ.

‏13 مِينْزِي كنِّيوْ وَارْ ثڭِّيمْ أَيَا ثْوَاڒَا ثَامزْوَارُوثْ، أَقَا سِيذِي، أَربِّي نّغْ، إِسْعَارْ خَانغْ، مِينْزِي وَارْ خَاسْ نَارْزُو عْلَاحْسَابْ لْفَارِيضَا.

‏14 إِكهَّاننْ ذ إِلَاوِييّنْ سّْقدّْسنْ إِخفْ نْسنْ حِيمَا أَذْ سّْڭعّْذنْ تَّاپُوثْ ن سِيذِي، أَربِّي ن إِسْرَائِيل.

‏15 أَيْثْ ن لَاوِي أَرْپُونْ تَّاپُوثْ ن أَربِّي خْ ثْغَارْضِينْ نْسنْ، أَمْ مَامّشْ ث يُومُورْ مُوسَا عْلَاحْسَابْ أَوَاڒْ ن سِيذِي، ؤُ إِعُومَاذْ ن ثْربُّوثْ ثُوغَا خَاسنْ مَّارْسنْ.

‏16 ذَاوُوذْ إِنَّا إِ ڒْقبْطَانَاثْ ن إِلَاوِييّنْ، أَقَا أَذْ سّْبدّنْ أَيْثْمَاثْسنْ، إِمذْيَازنْ أَكْ-ذ دُّوزَانْ ن دْجْغَا، أَكْ-ذ لْهَارْبَاثْ، أَكْ-ذ ڒْڭَامْبْرِييَاثْ ؤُ أَكْ-ذ ثَادْجُونِينْ ن وُوزَّاڒْ، مَاحنْذْ أَذْ إِتّْوَاسڒْ ڒْحسّْ إِسّفْرَاحنْ إِجْهذْ.

‏17 نِيثْنِي سّْبدّنْ هَايْمَانْ، مِّيسْ ن يُووِيلْ، ؤُ زڭْ أَيْثْمَاسْ: أَسَافْ، مِّيسْ ن بَارَاخْيَا، ؤُ زڭْ أَيْثْ ن مَارَارِي، ؤُمَاثْسنْ، إِثَانْ، مِّيسْ ن قُوشَايَا،

‏18 ؤُ أَكِيذْسنْ أَيْثْمَاثْسنْ ذِي دُّوقْ ن ثْعسَّاسْثْ وِيسّْ ثْنَاينْ: زَاكَارِييَّا، بِينْ، يَاعْزِييِيلْ، شَامِيرَامُوثْ، يَاحِييِيلْ، عُونِّي، إِلِييَابْ، بَانَايَا، مَاعَاسْيَا، مَاتِّيثْيَا، إِلِيفَالْيَا، مَاقْنِييَا، عُوبِيذْ-إِذُومْ ذ يَاعِييِيلْ، نِيثْنِي ثُوغَا أَثنْ ذ إِعسَّاسنْ ن ثوَّارْثْ.

‏19 إِمذْيَازنْ ثُوغَا أَثنْ ذ هَايْمَانْ ذ أَسَافْ ذ إِثَانْ أَكْ-ذ ثدْجُونِينْ ن نّْحَاسْ حِيمَا أَذْ ثنْثْ جّنْ أَذْ دّنْذُوننْ، ‏20 ؤُ زَاكَارِييَّا ذ عُوزِّييِيلْ ذ شَامِيرَامُوثْ ذ يَاحِييِيلْ ذ عُونِّي ذ إِلِييَابْ ذ مَاعَاسْيَا ذ بَانَايَا أَكْ-ذ لْهَارْبَاثْ إِتّْوَارِّيڭْلَانْ غَارْ سنّجْ، ‏21 ذ مَاتِّيثْيَا ذ إِلِيفَالْيَا ذ مَاقْنِييَا ذ عُوبِيذْ-إِذُومْ ذ يَاعِييِيلْ ذ عَازَازْيَا أَكْ-ذ ڒْڭَامْبْرِييَاثْ ذِي ڒْمفْثَاحْ ثْمنْيَا حِيمَا أَذْ سُّويُورنْ إِزْڒَانْ. ‏22 كَانَانْيَا، ڒْقبْطَانْ ن إِلَاوِييّنْ، ثُوغَا-ث خْ لّْغَا. نتَّا إِسّڒْمذْ أَسنْ لْمُوسِيقَا، مَاغَارْ نتَّا إِسّنْ أَسْ. ‏23 بَارَاخْيَا ذ إِلْقَانَا ثُوغَا أَثنْ ذ إِعسَّاسنْ ن ثوَّارْثْ غَارْ تَّاپُوثْ. ‏24 إِكهَّاننْ شَابَانْيَا ذ يَاهُوشَافَاطْ ذ نَاثَانَايِيلْ ذ عَامَاسَايْ ذ زَاكَارِييَّا ذ بَانَاجَا ذ إِلِيعَازَارْ صُوضنْ ذِي ڒْغَايْطَاثْ زَّاثْ إِ تَّاپُوثْ ن أَربِّي ؤُ عُوبِيذْ-إِذُومْ ذ يَاحِييَا ثُوغَا أَثنْ ذ إِعسَّاسنْ ن ثوَّارْثْ غَارْ تَّاپُوثْ.

‏25 أَمُّو إِ إِمْسَارْ، أَقَا ذَاوُوذْ ذ إِمقّْرَاننْ ن إِسْرَائِيل ذ ڒْقبْطَانَاثْ خْ وَاڒفْ طّْفنْ أَبْرِيذْ حِيمَا أَذْ سّْڭعّْذنْ تَّاپُوثْ ن ڒْعَاهْذْ ن سِيذِي س ڒفْرَاحثْ زِي ثَادَّارْثْ ن عُوبِيذْ-إِذُومْ. ‏26 ڒَامِي أَرْپُونْ إِلَاوِييّنْ تَّاپُوثْ ن ڒْعَاهْذْ ن سِيذِي أَمْ ذ أَسنْ إِوْشَا أَربِّي أَفُوسْ، إِمْسَارْ أَقَا نِيثْنِي قدّْمنْ سبْعَا ن إِينْذُوزنْ ذ سبْعَا ن إِشَارِّييّنْ ذ ثَاغَارْصْثْ. ‏27 ذَاوُوذْ ثُوغَا يَارْضْ إِجّْ ن ؤُسڒْهَامْ ن ڒقْطنْ أَزْذَاذْ، ؤُڒَا مَارَّا إِلَاوِييّنْ، إِنِّي يَارْپُونْ تَّاپُوثْ ذ ينِّي ثُوغَا إِتّْغنَّاجنْ، ذ كَانَانْيَا، أَمحْضَايِي خْ ينِّي إِتّْغنَّاجنْ. ذَاوُوذْ يَارْضْ ؤُڒَا ذ نتَّا إِجّْ ن ؤُبَالْطُو ن ؤُكهَّانْ ن ڒقْطنْ. ‏28 أَمُّو إِ إِسّْڭعّذْ مَارَّا إِسْرَائِيل تَّاپُوثْ ن ڒْعَاهْذْ ن سِيذِي س إِغُويَّانْ ن ڒفْرَاحثْ ؤُ س ؤُصُوضِي ذڭْ ؤُيِيشّْ ن إِشَارِّي، س وسْرُودّحْ ن ڒْغَايْطَاثْ ؤُ س ڒْحسّْ ن ثَادْجُونِينْ ن وُوزَّاڒْ، ؤُ نِيثْنِي ثُوغَا تِّيرَارنْ س لْهَارْبَاثْ ذ ڒْڭَامْبْرِييَاثْ. ‏29 ڒَامِي د-ثِيوضْ تَّاپُوثْ ن ڒْعَاهْذْ ن سِيذِي غَارْ ثنْذِينْثْ ن ذَاوُوذْ، إِمْسَارْ، أَقَا مِيخَالْ، يدْجِيسْ ن شَاوُولْ، ثخْزَارْ زِي ڒْكَازِي ؤُشَا ثژْرَا مَامّشْ إِنڭّزْ ؤُ مَامّشْ إِشطّحْ ؤُجدْجِيذْ ذَاوُوذْ ؤُشَا ثسّحْقَارْ إِ-ث ذڭْ وُوڒْ نّسْ.