‏1 أَوَارْنِي أَيَا إِمْسَارْ أَقَا ذَاوُوذْ إِغْڒبْ خْ إِفِيلِيسْطِينِييّنْ ؤُشَا يَارَّا إِ-ثنْ سَاذُو أَفُوسْ نّسْ ؤُ ذَاوُوذْ إِكّسْ مِيثِيڭْ-هَأَمَّا زڭْ ؤُفُوسْ ن إِفِيلِيسْطِينِييّنْ. ‏2 عَاوذْ إِغْڒبْ نتَّا مُوآبَ ؤُشَا إِعْبَارْ إِ-ثنْ س يِيجّْ ن ؤُفِيڒُو ن ڒعْبَارْ أَمْ زّْڒنْ ذِي ثمُّورْثْ، ؤُشَا نتَّا إِعْبَارْ ثْنَاينْ ن إِفِيڒَانْ ن ڒعْبَارْ حِيمَا أَذْ ثنْ إِنغْ ؤُڒَا ذ إِجّْ ن ؤُفِيڒُو إِمُونْ حِيمَا أَذْ ثنْ يجّْ دَّارنْ. أَمُّو إِ ذوْڒنْ إِمُوآبِييّنْ ذ إِمْسخَّارنْ إِ ذَاوُوذْ إِنِّي إِتّْخصَّانْ أَذْ أَسْ وْشنْ ثِيرْزِيفِينْ.

‏3 ذَاوُوذْ إِغْڒبْ عَاوذْ خْ هَاذَاذْ-عَازَارْ، مِّيسْ ن رَاحُوبْ، أَجدْجِيذْ ن صُوبَا، ؤُمِي ثُوغَا د-إِفّغْ وَانِيثَا حِيمَا أَذْ غَارسْ د-يَارّْ ڒحْكَامثْ نّسْ غَارْ يغْزَارْ ن لْفُورَاطْ. ^▫   ‏4 ذَاوُوذْ إِكّسْ زَّايسْ أَڒفْ ؤُ سبْعَا-مْيَا ن إِمْنَاينْ ذ عِيشْرِينْ-أَڒفْ ن يرْيَازنْ خْ إِضَارنْ ؤُ إِقسّْ ذَاوُوذْ إِضَارنْ ن مَارَّا إِيْسَانْ ن إِكَارُّوثنْ ؤُشَا إِجَّا زَّايسْ مْيَا ن إِيْسَانْ ن إِكَارُّوثنْ. ^▪   ‏5 يُوسَا-د أَرَامْ زِي ذِيمَاشْقْ حِيمَا أَذْ إِوْشْ أَفُوسْ إِ هَاذَاذْ-عَازَارْ، أَجدْجِيذْ ن صُوبَا، ؤُ ذَاوُوذْ إِغْڒبْ خْ ثْنَاينْ ؤُ-عِيشْرِينْ-أَڒفْ ن يرْيَازنْ ن أَرَامْ. ‏6 ذَاوُوذْ إِڭَّا ڒْعسْكَارَاثْ ن ؤُحوّسْ جَارْ إِرَامِييّنْ ن ذِيمَاشْقْ ؤُ إِرَامِييّنْ ذوْڒنْ ذ إِمْسخَّارنْ ن ذَاوُوذْ إِنِّي إِتّْخصَّانْ أَذْ أَسْ وْشنْ ثِيرْزِيفِينْ. سِيذِي إِڭَّا تَّاسِيعْ إِ ذَاوُوذْ مَانِي مَا إِرُوحْ. ‏7 ذَاوُوذْ إِكْسِي ثِيسدَّارِييِينْ إِقسْحنْ ن ؤُعسْكَارِي نِّي تّْوَاڭّنْثْ س وُورغْ، ثِينِّي ثُوغَا إِدْجَانْ ن إِمْسخَّارنْ ن هَاذَاذْ-عَازَارْ ؤُ يِيوْيِي ثنْثْ غَارْ ؤُرْشَالِيمْ. ‏8 إِكْسِي ذَاوُوذْ أَطَّاسْ ن نّْحَاسْ زِي بَاثَاحْ ؤُ زِي بِيرَاثَايْ، ثِيندَّامْ ن هَاذَاذْ-عَازَارْ.

‏9 ؤُمِي ثُوعِي، أَجدْجِيذْ ن حَامَاثْ، إِسْڒَا أَقَا ذَاوُوذْ إِغْڒبْ خْ مَارَّا ڒْعسْكَارْ ن هَاذَاذْ-عَازَارْ،

‏10 إِسّكّْ ثُوعِي مِّيسْ يُورَامْ غَارْ ؤُجدْجِيذْ ذَاوُوذْ حِيمَا أَذْ إِسّقْسَا خْ ؤُمدُّورْ نّسْ ؤُ حِيمَا أَذْ أَسْ إِبَاركْ، مِينْزِي نتَّا إِمْنغْ أَكِيذسْ ؤُ إِغْڒبْ خَاسْ، مَاغَارْ هَاذَاذْ-عَازَارْ ثُوغَا إِ ثُوعِي ذ إِجّْ ن ورْيَازْ يَارزُّو أَمنْغِي. نتَّا يِيوِي أَكِيذسْ ذڭْ ؤُفُوسْ نّسْ ڒقْشُوعْ ن نُّوقَارْثْ ذ ڒقْشُوعْ ن وُورغْ ذ ڒقْشُوعْ ن نّْحَاسْ، ^▫  

‏11 إِنِّي إِسّْقدّسْ ؤُجدْجِيذْ ذَاوُوذْ عَاوذْ إِ سِيذِي، إِمُونْ أَكْ-ذ نُّوقَارْثْ ذ وُورغْ نِّي ثُوغَا إِسّْقدّسْ زِي مَارَّا ڒڭْنُوسْ نِّي ثُوغَا يَارَّا سَاذُو نّسْ،

‏12 زِي أَرَامْ ؤُ زِي مُوآبَ ؤُ زڭْ أَيْثْ ن عَامُّونْ ؤُ زڭْ إِفِيلِيسْطِينِييّنْ ؤُ زِي عَامَالِيقْ ؤُڒَا زِي ثْكشَّاضْثْ ن هَاذَاذْ-عَازَارْ، مِّيسْ ن رَاخُوبْ، أَجدْجِيذْ ن صُوبَا.

‏13 إِڭَّا ذَاوُوذْ عَاوذْ إِجّْ ن يِيسمْ، ؤُمِي د-إِعْقبْ نتَّا زڭْ ڒغْڒبْ خْ أَرَامْ ذِي ثغْزُورْثْ ن ثْمدْجَاحْثْ، ثْمنْطَاشْ-أَڒفْ ن يرْيَازنْ. ^▪  

‏14 نتَّا إِڭَّا ڒْعسْكَارَاثْ ن ؤُحوّسْ ذِي إِذُومْ. ذِي مَارَّا إِذُومْ إِڭَّا ڒْعسْكَارَاثْ ن ؤُحوّسْ ؤُ مَارَّا إِذُومِييّنْ ذوْڒنْ ذ إِمْسخَّارنْ إِ ذَاوُوذْ. سِيذِي إِڭَّا تَّاسِيعْ إِ ذَاوُوذْ مَانِي مَا إِفّغْ نتَّا.

‏15 ذَاوُوذْ إِحْكمْ خْ مَارَّا إِسْرَائِيل ؤُ ذَاوُوذْ إِڭَّا س ڒْحقّْ ذ ثْسڭْذَا إِ مَارَّا ڒْڭنْسْ نّسْ.

‏16 يُووَابْ، مِّيسْ ن صَارُويَا، ثُوغَا-ث خْ ڒْعسْكَارْ ؤُ يَاهُوشَافَاطْ، مِّيسْ ن أَخِيلُوذْ، ثُوغَا-ث ذ أَمَارِيرْ ن ؤُمزْرُويْ.

‏17 صَاذُوقْ، مِّيسْ ن أَخِيطُوبْ، ذ أَخِيمَالِيكْ، مِّيسْ ن أَبْيَاثَارْ، ثُوغَا أَثنْ ذ إِكهَّاننْ ؤُ سَارَايَا ثُوغَا-ث ذ أَمَارِيرْ.

‏18 بَانَايَا، مِّيسْ ن يَاهُويَاذَاعْ، ثُوغَا-ث خْ إِعسَّاسنْ ن أَرِّيمثْ ن ؤُجدْجِيذْ ؤُ خْ إِرقَّاسنْ ن ثَازْڒَا. إِحنْجِيرنْ ن ذَاوُوذْ ثُوغَا أَثنْ ذ إِمْثِيقَّانْ نّسْ.