‏1 ذَاوُوذْ إِنَّا: ”مَا إِقِّيمْ عَاذْ شَا ن يِيجّنْ زِي ثَادَّارْثْ ن شَاوُولْ، حِيمَا نشّْ أَذْ أَسْ سّشْنغْ ثَامخْسِيوْثْ إِنُو إِشوَّارنْ ذِي طّْوعْ ن يُونَاثَانْ؟“ ‏2 ثُوغَا ذِينْ إِجّْ ن ؤُمْسخَّارْ غَارْ ثَادَّارْثْ ن شَاوُولْ تّْڒَاغَانْ أَسْ صِيبَا. ڒَاغَانْ أَسْ-د غَارْ ذَاوُوذْ. إِنَّا أَسْ ؤُجدْجِيذْ: ”مَا شكْ ذ صِيبَا؟“ نتَّا إِنَّا: ”ذ أَمْسخَّارْ نّكْ.“ ^▪   ‏3 أَجدْجِيذْ إِنَّا: ”مَا إِقِّيمْ عَاذْ شَا ن إِجّْ زِي ثَادَّارْثْ ن شَاوُولْ إِدَّارْ، حِيمَا أَذْ أَسْ سّشْنغْ ثَامخْسِيوْثْ إِشوَّارنْ ن أَربِّي؟“ خنِّي إِنَّا صِيبَا إِ ؤُجدْجِيذْ: ”أَقَا ذِينْ عَاذْ إِجّْ ن مِّيسْ ن يُونَاثَانْ ونِّي ذ أَنعْضَابْ زِي ثْنَاينْ ن إِضَارنْ.“ ^▪   ‏4 إِنَّا أَسْ ؤُجدْجِيذْ: ”مَانِي إِدْجْ نتَّا؟“ صِيبَا إِنَّا أَسْ إِ ؤُجدْجِيذْ: ”خْزَارْ، نتَّا أَقَا-ث ذِي ثَادَّارْثْ ن مَاخِيرْ، مِّيسْ ن عَامِّييِيلْ ذِي لُوذَابَارْ.“

‏5 خنِّي إِسّكّْ ؤُجدْجِيذْ ذَاوُوذْ ذِينْ ؤُ يِيوْيِي ث-إِ-د زِي ثَادَّارْثْ ن مَاخِيرْ، مِّيسْ ن عَامِّييِيلْ ذِي لُوذَابَارْ. ‏6 ؤُمِي مَافِيپُوشَاثْ، مِّيسْ ن يُونَاثَانْ، مِّيسْ ن شَاوُولْ، يُوذفْ غَارْ ذَاوُوذْ، إِوْضَا خْ ؤُغمْپُوبْ نّسْ، يُوضَارْ. ذَاوُوذْ إِنَّا: ”مَافِيپُوشَاثْ!“ نتَّا إِنَّا: ”خْزَارْ، أَقَا ذَا أَمْسخَّارْ نّكْ.“ ‏7 ذَاوُوذْ إِنَّا أَسْ: ”وَارْ تّڭّْوذْ، مَاغَارْ نشّْ أَذْ أَشْ سّشْنغْ ثَامخْسِيوْثْ إِنُو إِشوَّارنْ ذِي طّْوعْ ن بَابَاشْ يُونَاثَانْ. نشّْ أَذْ أَشْ أَرّغْ مَارَّا إِيَّارنْ ن جدّْ نّكْ شَاوُولْ ؤُ شكْ أَذْ ثشّذْ ڒبْذَا مَاشَّا غَارْ طَّابْڒَا إِنُو.“ ^▫   ‏8 خنِّي يُوضَارْ أَسْ، إِنَّا: ”مِينْ إِعْنَا ؤُمْسخَّارْ نّكْ أَڒَامِي شكْ ثخْزَارذْ غَارْ إِجّْ ن وقْزِينْ إِمُّوثنْ أَمْ مَامّشْ دْجِيغْ نشّْ؟“ ‏9 خنِّي إِڒَاغَا ؤُجدْجِيذْ خْ صِيبَا، أَمْسخَّارْ ن شَاوُولْ، إِنَّا أَسْ: ”مَارَّا مِينْ إِدْجَانْ ن شَاوُولْ ذ مَارَّا ثَادَّارْثْ نّسْ، وْشِيغْ ث إِ مِّيسْ ن سِيذِي نّكْ.

‏10 شكْ أَذْ أَسْ ثْشَارْزذْ ثَامُّورْثْ، شكْ ذ إِحنْجِيرنْ نّكْ ذ إِمْسخَّارنْ نّكْ، حِيمَا مِّيسْ ن سِيذِي نّكْ أَذْ غَارسْ يِيڒِي وغْرُومْ أَذْ يشّْ. مَافِيپُوشَاثْ، مِّيسْ ن سِيذِي نّكْ، أَذْ يشّْ ڒبْذَا أَغْرُومْ غَارْ طَّابْڒَا إِنُو.“ صِيبَا ثُوغَا غَارسْ خمّسْطَاشْ ن إِحنْجِيرنْ ذ عِيشْرِينْ ن إِمْسخَّارنْ.

‏11 صِيبَا إِنَّا إِ ؤُجدْجِيذْ: ”أَمْسخَّارْ نّكْ أَذْ إِڭّْ عْلَاحْسَابْ مَارَّا مِينْ يُومُورْ سِيذِي أَجدْجِيذْ إِ ؤُمْسخَّارْ نّسْ!“ ذَاوُوذْ إِنَّا عَاذْ: ”مَافِيپُوشَاثْ أَذْ إِشّْ غَارْ طَّابْڒَا إِنُو أَمْ إِجّنْ زڭْ إِحنْجِيرنْ ن ؤُجدْجِيذْ.“

‏12 مَافِيپُوشَاثْ ثُوغَا غَارسْ إِجّْ ن مِّيسْ تّْڒَاغَانْ أَسْ مِيخَا. مَارَّا إِنِّي ثُوغَا إِزدّْغنْ ذِي ثَادَّارْثْ ن صِيبَا ثُوغَا أَثنْ ذ إِمْسخَّارنْ ن مَافِيپُوشَاثْ.

‏13 ؤُ مَافِيپُوشَاثْ ثُوغَا إِزدّغْ ذِي ؤُرْشَالِيمْ، مَاغَارْ نتَّا إِتّتّْ ڒبْذَا غَارْ طَّابْڒَا ن ؤُجدْجِيذْ. نتَّا ثُوغَا-ث ذ أَنعْضَابْ زِي ثْنَاينْ ن إِضَارنْ.