‏1 ؤُمِي إِقِّيمْ ؤُجدْجِيذْ ذِي ثَادَّارْثْ نّسْ ؤُ سِيذِي ثُوغَا إِڭَّا أَسْ ڒهْنَا زِي مَارَّا ڒْعذْيَانْ نّسْ إِ ذ أَسْ د-إِنّْضنْ، إِمْسَارْ، ‏2 أَقَا إِنَّا ؤُجدْجِيذْ إِ ؤُنَابِي نَاثَانْ: ”خْزَارْ، نشّْ زدّْغغْ ذڭْ إِشْثْ ن ثَادَّارْثْ ن ؤُكشُّوضْ ن ثْشجَّارْثْ ن ثنْڭلْثْ، مَاشَا تَّاپُوثْ ن أَربِّي ثْڒحّفْ سَاذُو ثَاجَارْثِيڒْثْ ن ؤُقِيضُونْ.“ ‏3 نَاثَانْ إِنَّا إِ ؤُجدْجِيذْ: ”ؤُيُورْ وَاهَا، أڭّْ مَارَّا مِينْ غَاركْ ذڭْ وُوڒْ نّكْ، مَاغَارْ سِيذِي أَكِيذكْ.“

‏4 ذِي دْجِيڒثْ نِّي إِمْسَارْ أَقَا إِفّغْ وَاوَاڒْ ن سِيذِي غَارْ نَاثَانْ، إِنَّا: ‏5 ”ؤُيُورْ، إِنِي إِ ؤُمْسخَّارْ إِنُو، إِ ذَاوُوذْ: ”أَمُّو إِ إِقَّارْ سِيذِي: ’مَا شكْ ثخْسذْ أَذْ أَيِي ثبْنِيذْ إِشْثْ ن ثَادَّارْثْ، مَاحنْذْ أَذْ ذَايسْ زذْغغْ؟ ‏6 عمَّارْصْ وَارْ زْذِيغغْ ذڭْ إِشْثْ ن ثَادَّارْثْ زڭْ وَاسّْ ؤُمِي د-سّْڭعّْذغْ أَيْثْ ن إِسْرَائِيل زِي مِيصْرَا غَارسْ أَڒْ أَسّْ-أَ، مَاشَا ذُورّْيغْ ذڭْ إِجّْ ن ؤُقِيضُونْ، ذڭْ إِشْثْ ن ثْزذِّيغْثْ. ‏7 مَانِي مَا ذُورّْيغْ أَكْ-ذ أَيْثْ ن إِسْرَائِيل، مَا نشّْ سِّيوْڒغْ عمَّارْصْ ؤُڒَا س يِيجّْ ن وَاوَاڒْ إِ يِيشْثْ زِي ثْقبَّاڒْ ن إِسْرَائِيل ثِينِّي إِ ؤُمُورغْ أَذْ أَرْوسنْ ڒْڭنْسْ إِنُو إِسْرَائِيل، ؤُ نِّيغْ: ’مَايمِّي وَارْ ذ أَيِي ثبْنِيمْ إِشْثْ ن ثَادَّارْثْ ن ؤُكشُّوضْ ن ثْشجَّارْثْ ن ثنْڭلْثْ؟‘ ‏8 خنِّي ڒخُّو، أَمُّو إِ إِتّْخصَّا أَذْ ثِينِيذْ إِ ؤُمْسخَّارْ إِنُو، إِ ذَاوُوذْ: ’أَمُّو إِ إِقَّارْ سِيذِي ن ڒْعسْكَارَاثْ: نشّْ إِوْيغْ-د شكْ زِي ڒْكُورِي، زِي ضفَّارْ ن وُودْجِي، مَاحنْذْ أَذْ ثِيڒِيذْ ذ أَمْڭوّذْ خْ ڒْڭنْسْ إِنُو، خْ إِسْرَائِيل. ‏9 مَانِي مَا ثُويُورذْ، نشّْ أَقَا أَيِي أَكِيذكْ ؤُ نشّْ قْضِيغْ خْ مَارَّا ڒْعذْيَانْ زَّاثْ إِ وُوذمْ نّكْ. نشّْ ڭِّيغْ أَشْ إِجّْ ن إِسمْ ذ أَمقّْرَانْ أَمشْنَاوْ إِسْمَاونْ ن إِمقّْرَاننْ نِّي إِدْجَانْ خْ ثمُّورْثْ. ^▪  

‏10 نشّْ نيّْشغْ إِجّْ ن ومْشَانْ إِ ڒْڭنْسْ إِنُو، إِ إِسْرَائِيل، ؤُشَا ژُّوغْ ث ذِينْ، مَاحنْذْ أَذْ إِزْذغْ ذڭْ ومْشَانْ نّسْ ؤُ وَارْ ڭُّورْ أَذْ إِتّْوَانْهزّْ عَاذْ ؤُ وَارْ ث سّْحصَّارِينْ عَاذْ أَيْثْ ن ڒْمُوعْصِييّثْ أَمْ ؤُمزْوَارُو،

‏11 زڭْ وَاسّْ نِّي ڭِّيغْ نشّْ ڒْقُوضَاثْ خْ ڒْڭنْسْ إِنُو إِسْرَائِيل. نشّْ وْشِيغْ أَشْ ڒهْنَا زِي مَارَّا ڒْعذْيَانْ نّكْ ؤُشَا ڒخُّو أَذْ أَشْ إِسّْشنْ سِيذِي، أَقَا سِيذِي أَذْ أَشْ إِڭّْ إِشْثْ ن ثَادَّارْثْ.

‏12 ڒَامِي تّْوَاكمّْڒنْ وُوسَّانْ نّكْ ؤُشَا ثتّْوَاسَارْسذْ ذڭْ ونْضڒْ جَارْ ڒجْذُوذْ نّكْ، أَذْ د-سّكَّارغْ زَّارِيعثْ نّكْ إِ د-إِتّفّْغنْ زِي ذَاخڒْ نّكْ ؤُ نشّْ أَذْ سّْمثْنغْ ثَاڭلْذَا نّسْ. ^▪  

‏13 نتَّا أَذْ إِبْنَا إِشْثْ ن ثَادَّارْثْ إِ يِيسمْ إِنُو ؤُ نشّْ أَذْ سّْمثْنغْ ڒْعَارْشْ ن ثَاڭلْذَا نّسْ إِ ڒبْذَا. ^▪  

‏14 نشّْ أَذْ إِڒِيغْ ذ بَابَاسْ إِ نتَّا ؤُ نتَّا أَذْ يِيڒِي إِ نشّْ ذ مِّي. مَاڒَا نتَّا إِفَّارْيضْ، أَذْ ث أَربِّيغْ س وعْمُوذْ ذ ثيِّيثَا ن أَيْثْ ن بْنَاذمْ. ^▪  

‏15 ثَامخْسِيوْثْ إِنُو إِشوَّارنْ وَارْ زَّايسْ تّْخنّسْ أَمْ مَامّشْ تّسّْخنْسغْ نشّْ خْ شَاوُولْ، ونِّي د-كّْسغْ زِي زَّاثْ ن وُوذمْ نّكْ.

‏16 ثَادَّارْثْ نّكْ ذ ثْڭلْذَا نّكْ أَذْ تّْوَاسْمثْننْثْ زَّاثْ إِ وُوذمْ نّكْ إِ ڒبْذَا، ڒْعَارْشْ نّكْ أَذْ إِقِّيمْ إِبدّْ إِ ڒبْذَا.‘ “ ^▫  

‏17 نَاثَانْ إِسِّيوڒْ غَارْ ذَاوُوذْ نِيشَانْ أَوَاڒنْ-أَ ذ إِجّنْ ذ مَارَّا أَسَارْڭبْ-أَ إِ إِژَارْ.

‏18 خنِّي يُوذفْ ؤُجدْجِيذْ ذَاوُوذْ ؤُشَا إِقِّيمْ زَّاثْ إِ وُوذمْ ن سِيذِي، إِنَّا: ”مِينْ عْنِيغْ نشّْ، سِيذِي إِنُو سِيذِي، ؤُ مِينْ ثعْنَا ثَادَّارْثْ إِنُو أَقَا شكْ ثْنذْهذْ أَيِي-د غَارسْ أَڒْ ذَانِيثَا؟

‏19 ذِي ثِيطَّاوِينْ نّكْ ذ مَانْ أَيَا عَاذْ ذْرُوسْ، أَ سِيذِي إِنُو، سِيذِي، ؤُ شكْ ثسِّيوْڒذْ ڒخُّو عَاذْ خْ ثَادَّارْثْ ن ؤُمْسخَّارْ نّكْ إِ وُوسَّانْ إِڭّْوجنْ إِ د إِتَّاسنْ. ذ مَانْ أَيَا ذ ثَاغُورِي ن شَّارِيعَا إِ بْنَاذمْ، سِيذِي إِنُو، سِيذِي.

‏20 مِينْ ذ أَشْ إِ غَا يِينِي ذَاوُوذْ عَاذْ كْثَارْ؟ شكْ ثسّْنذْ أَمْسخَّارْ نّكْ، سِيذِي، إِنُو سِيذِي! ‏21 ذِي طّْوعْ ن وَاوَاڒْ نّكْ ؤُ عْلَاحْسَابْ ؤُڒْ نّكْ أَقَا ثڭِّيذْ مَارَّا ڒمْغَارثْ-أَ، حِيمَا أَذْ ت ثسَّارْڭْبذْ إِ ؤُمْسخَّارْ نّكْ. ‏22 س ؤُينِّي شكْ ذ أَمقّْرَانْ، سِيذِي إِنُو، سِيذِي، مَاغَارْ وَارْ ذِينْ إِدْجِي ؤُڒَا ذ إِجّْ أَمْ شْكْ ؤُ وَارْ ذِينْ إِدْجِي ؤُڒَا ذ إِجّْ ن سِيذِي مْغِيرْ شكْ عْلَاحْسَابْ مَارَّا مِينْ نسْڒَا س إِمزُّوغنْ نّغْ. ^▪   ‏23 مَانْ ونْ إِ إِدْجَانْ أَمْ ڒْڭنْسْ نّكْ، أَمْ إِسْرَائِيل، أَينِّي ن ڒْڭنْسْ خْ ثمُّورْثْ إِ غَارْ إِرَاحْ أَربِّي حِيمَا أَذْ ث إِفْذِي إِ يِيخفْ نّسْ ذ ڒْڭنْسْ ؤُ حِيمَا أَذْ إِڭّْ إِ يِيخفْ نّسْ إِجّْ ن يِيسمْ ؤُ حِيمَا أَذْ أَونْ إِڭّْ إِشْثْ ن ڒْخذْمثْ ذ ثَامقّْرَانْثْ ؤُڒَا ذ ثْمڭَّا ذ ثِيمقّْرَانِينْ إِ ثمُّورْثْ نّكْ زَّاثْ إِ وُوذمْ ن ڒْڭنْسْ نّكْ نِّي ثفْذِيذْ إِ يِيخفْ نّكْ زِي مِيصْرَا، زِي ڒڭْنُوسْ ؤُ زڭْ إِربِّيثنْ نْسنْ. ^▫  ▪   ‏24 شكْ ثڭِّيذْ ڒْڭنْسْ نّكْ إِسْرَائِيل ذ إِجّْ ن ڒْڭنْسْ إِ يِيخفْ نّكْ إِ ڒبْذَا. شكْ، أَ سِيذِي، أَقَا شكْ ثْذوْڒذْ ذ أَربِّي إِ نِيثْنِي.

‏25 خنِّي ڒخُّو، سِيذِي أَربِّي، أجّْ أَوَاڒْ نِّي ثسِّيوْڒذْ خْ ؤُمْسخَّارْ نّكْ ؤُ خْ ثَادَّارْثْ نّسْ أَذْ إِبدّْ إِ ڒبْذَا ؤُ أڭّْ أَمْ مَامّشْ ثسِّيوْڒذْ. ‏26 أجّْ إِسمْ نّكْ أَذْ إِتّْوَاسّمْغَارْ إِ ڒبْذَا، أَذْ إِنِينْ: ’سِيذِي ن ڒْعسْكَارَاثْ إِجهْذنْ أَقَا-ث ذ أَربِّي خْ إِسْرَائِيل!‘، ؤُشَا إِڒِي أَذْ ثتّْوَاسّمْثنْ ثَادَّارْثْ ن ؤُمْسخَّارْ نّكْ ذَاوُوذْ زَّاثْ إِ وُوذمْ نّكْ. ‏27 مَاغَارْ شكْ، سِيذِي ن ڒْعسْكَارَاثْ، أَربِّي ن إِسْرَائِيل، أَقَا ثسَّارْڭْبذْ ذڭْ إِمزُّوغنْ ن ؤُمْسخَّارْ نّكْ، ثنِّيذْ: ’نشّْ أَذْ أَشْ سّْبدّغْ إِشْثْ ن ثَادَّارْثْ!‘ س ؤُينِّي ثُوسَا-د ذڭْ وُوڒْ ن ؤُمْسخَّارْ نّكْ مَاحنْذْ أَذْ إِژَّادْجْ ثَاژَادْجِيثْ-أَ غَاركْ. ‏28 خنِّي ڒخُّو، سِيذِي إِنُو، سِيذِي، شكْ ذ أَربِّي نِّي ؤُشَا أَوَاڒنْ نّكْ ذ ثِيذتّْ ؤُ شكْ ثسِّيوْڒذْ س مَارَّا ثْشُونِي أَيَا غَارْ ؤُمْسخَّارْ نّكْ. ^▪   ‏29 خنِّي ڒخُّو، مَاڒَا ثُوسَا أَشْ-د خْ ڒْخَاضَارْ، بَاركْ ثَادَّارْثْ ن ؤُمْسخَّارْ نّكْ حِيمَا أَذْ ثِيڒِي زَّاثْ إِ وُوذمْ نّكْ إِ ڒبْذَا، مِينْزِي شكْ، أَ سِيذِي إِنُو، سِيذِي، ثسِّيوْڒذْ أَيَا ؤُ س لْبَارَاكَا نّكْ أَذْ ثتّْوَابَاركْ ثَادَّارْثْ ن ؤُمْسخَّارْ نّكْ إِ ڒبْذَا.‘ “