‏1 شَامْوِيلْ أَمژْيَانْ ثُوغَا إِتّْسخَّارْ إِ سِيذِي زَّاثْ إِ وُوذمْ ن عَالِي. ذڭْ وُوسَّانْ نِّي ثُوغَا أَوَاڒْ ن سِيذِي إِقِّيدْجثْ. وَارْ ثُوغِي ثتّفّغْ شَا ن ثْمژْرِيوْثْ. ‏2 إِجّْ ن وَاسّْ، ؤُمِي عَالِي إِطّصْ ذڭْ ومْشَانْ نّسْ، -ثِيطَّاوِينْ نّسْ ذوْڒنْثْ أَرْخُونْثْ ؤُ نتَّا ثُوغَا وَارْ إِزمَّارْ أَذْ إِتّْوَاڒَا - ، إِمْسَارْ، ^▪  

‏3 قْبڒْ مَا إِخْسِي ڒفْنَارْ ن أَربِّي ؤُ شَامْوِيلْ ثُوغَا إِطّصْ ذِي زَّاوشْثْ ن سِيذِي مَانِي ثدْجْ تَّاپُوثْ ن أَربِّي، ‏4 أَقَا سِيذِي إِڒَاغَا إِ شَامْوِيلْ. ؤُشَا نتَّا يَارَّا-د خَاسْ: ”نشّْ أَقَا أَيِي ذَا!“ ‏5 نتَّا يُوژّڒْ غَارْ عَالِي، إِنَّا: ”ذَانِيثَا إِ دْجِيغْ، شكْ ثْڒَاغِيذْ أَيِي-د.“ مَاشَا نتَّا إِنَّا: ”نشّْ وَارْ خَاكْ-د ڒَاغِيغْ شَا، عْقبْ، أَذْ ثزّْڒذْ!“ ؤُشَا إِعْقبْ، إِزّڒْ.

‏6 خنِّي سِيذِي إِڒَاغَا إِ شَامْوِيلْ ثْوَاڒَا نّغْنِيثْ ؤُشَا إِكَّارْ-د شَامْوِيلْ، يُويُورْ غَارْ عَالِي، إِنَّا: ”نشّْ أَقَا أَيِي ذَا، مِينْزِي شكْ ثْڒَاغِيذْ أَيِي-د.“ يَارَّا-د خَاسْ نتَّا: ”نشّْ وَارْ خَاكْ-د ڒَاغِيغْ شَا، مِّي، عْقبْ، أَذْ ثزّْڒذْ!“ ‏7 شَامْوِيلْ عَاذْ وَارْ إِسِّينْ سِيذِي ؤُ أَوَاڒْ ن سِيذِي ثُوغَا عَاذْ وَارْ ذ أَسْ إِتّْوَاسَّارْڭبْ.

‏8 خنِّي إِڒَاغَا-د سِيذِي خْ شَامْوِيلْ عَاوذْ إِ ثْوَاڒَا وِيسّْ ثْڒَاثَا ؤُ نتَّا إِكَّارْ-د، يُويُورْ غَارْ عَالِي، إِنَّا: ”نشّْ أَقَا أَيِي ذَا، شكْ ثْڒَاغِيذْ أَيِي-د.“ خنِّي إِحكَّارْ عَالِي، أَقَا سِيذِي ثُوغَا إِڒَاغَا خْ ؤُحنْجِيرْ ‏9 ؤُشَا عَالِي إِنَّا إِ شَامْوِيلْ: ”رُوحْ، أَذْ ثطّْصذْ! مَاڒَا نتَّا إِڒَاغَا أَشْ-د عَاوذْ، خنِّي أَرّْ خَاسْ: ’سِيوڒْ، سِيذِي، مَاغَارْ أَمْسخَّارْ نّكْ إِتّسْڒَا!‘ “ ؤُشَا إِعْقبْ شَامْوِيلْ، إِزّڒْ ذڭْ ومْشَانْ نّسْ.

‏10 خنِّي يُوسَا-د سِيذِي ؤُشَا إِبدّْ ذِينْ ؤُشَا إِڒَاغَا أَمْ ثْوَاڒَاوِينْ نّغْنِي: ”شَامْوِيلْ، شَامْوِيلْ!“ ؤُشَا إِنَّا شَامْوِيلْ: ”سِيوڒْ، مَاغَارْ أَمْسخَّارْ نّكْ إِتّسْڒَا!“

‏11 سِيذِي إِنَّا إِ شَامْوِيلْ: ”خْزَارْ، نشّْ أَذْ ڭّغْ شَا ذِي إِسْرَائِيل أَڒَامِي مَارَّا وِي خَاسْ إِ غَا إِسْڒنْ، ثْنَاينْ ن إِمزُّوغنْ نّسْ أَذْ طْنطْننْ. ^▪  

‏12 ذڭْ وَاسّْ نِّي أَذْ قفْڒغْ مَارَّا إِ عَالِي، زڭْ ؤُمزْوَارُو غَارسْ أَڒْ أَنڭَّارُو، مِينْ زِي سِّيوْڒغْ خْ ثَادَّارْثْ نّسْ. ^▪  

‏13 مِينْزِي نشّْ عڒْمغْ أَسْ، أَقَا نشّْ أَذْ حكْمغْ ثَادَّارْثْ نّسْ إِ ڒبْذَا خْ ڒْمُوعْصِييّثْ مِينْ خفْ إِسّنْ، مِينْزِي ڒَامِي سِّيوْضنْ إِحنْجِيرنْ نّسْ نّعْڒثْ خْ يِيخفْ نْسنْ، نتَّا وَارْ ثنْ إِطِّيفْ شَا.

‏14 س ؤُينِّي نشّْ جُّودْجغْ إِ ثَادَّارْثْ ن عَالِي: ’وَارْ ثتّْوَافْذِي إِ ڒبْذَا ڒْمُوعْصِييّثْ ن ثَادَّارْثْ ن عَالِي س ثْغَارْصْثْ ؤُڒَا س ثوْهِيبْثْ ن ڒْغِيدْجثْ!‘ “

‏15 شَامْوِيلْ إِقِّيمْ إِزّڒْ أَڒْ ضّْبحْ، خنِّي يَارْزمْ ثِيوُّورَا ن ثَادَّارْثْ ن سِيذِي. شَامْوِيلْ إِڭّْوذْ مَاشَا أَذْ إِحَاجَا ثَامژْرِيوْثْ إِ عَالِي.

‏16 خنِّي إِڒَاغَا عَالِي خْ شَامْوِيلْ، إِنَّا: ”شَامْوِيلْ، مِّي!“ نتَّا يَارَّا-د خَاسْ: ”نشّْ أَقَا أَيِي ذَا!“

‏17 خنِّي إِنَّا: ”مَانْ أَوَاڒْ إِ ذ أَشْ إِنَّا؟ تّْزَاوْڭغْ شكْ، وَارْ خَافِي سْنُوفَّارْ! أجّْ أَذْ أَشْ إِڭّْ أَربِّي أَمُّو نِيغْ مَاهُو، مَاڒَا شكْ ثسّْنُوفَّارذْ خَافِي إِجّْ ن وَاوَاڒْ وَاهَا زِي مَارَّا أَوَاڒْأنْ إِ كِيذكْ إِسِّيوڒْ نتَّا.“

‏18 خنِّي إِحَاجَا أَسْ شَامْوِيلْ مَارَّا أَوَاڒنْ ؤُ وَارْ خَاسْ ثنْ إِفَّارْ. ؤُشَا يَارَّا-د خَاسْ عَالِي: ”أَقَا-ث ذ سِيذِي، أجّْ إِ-ث أَذْ إِڭّْ مِينْ إِدْجَانْ نِيشَانْ ذِي ثِيطَّاوِينْ نّسْ!“

‏19 شَامْوِيلْ ثُوغَا إِمقَّارْ ؤُ سِيذِي ثُوغَا-ث أَكِيذسْ ؤُ وَارْ إِجِّي ؤُڒَا ذ إِجّنْ زِي مَارَّا أَوَاڒنْ نّسْ أَذْ وْضَانْ غَارْ ثمُّورْثْ. ‏20 مَارَّا إِسْرَائِيل، زِي ذَانْ غَارسْ أَڒْ بِئرْ-سبْعَا، ثُوغَا إِتّْوَاڒَا أَقَا شَامْوِيلْ ثُوغَا إِتّْوَاڒقّمْ ذ أَنَابِي ن سِيذِي. ‏21 سِيذِي إِقِّيمْ أَذْ د-إِضْهَارْ ذِي شِيلُو، مِينْزِي سِيذِي إِسَّارْڭبْ إِخفْ نّسْ إِ شَامْوِيلْ ذِي شِيلُو س وَاوَاڒْ ن سِيذِي.