‏1 إِمْسَارْ أَوَارْنِي إِ ڒْموْثْ ن شَاوُولْ، ؤُمِي د-إِعْقبْ ذَاوُوذْ زِي ڒغْڒبْ خْ إِعَامَالِيقِييّنْ، إِقِّيمْ ذَاوُوذْ ثْنَاينْ ن وُوسَّانْ ذِي صِيقْلَاغْ. ^▪   ‏2 خنِّي إِمْسَارْ ذڭْ وَاسّْ وِيسّْ ثْڒَاثَا، أَقَا ذَا، يُوسَا-د إِجّْ ن ورْيَازْ زِي ڒْمَارْڭحْ ن ڒْعسْكَارْ ن شَاوُولْ س وَارُّوضْ إِشَارّڭْ ؤُ س ؤُشَاڒْ خْ ؤُزدْجِيفْ نّسْ. ؤُمِي د-يِيوضْ نتَّا غَارْ ذَاوُوذْ، إِوْضَا غَارْ ثمُّورْثْ، يُوضَارْ أَسْ. ‏3 ذَاوُوذْ إِنَّا أَسْ: ”مَانِيسْ إِ د-ثُوسِيذْ شكْ؟“ نتَّا إِنَّا أَسْ: ”نشّْ سّْنجْمغْ-د إِخفْ إِنُو زِي ڒْمَارْڭحْ ن ڒْعسْكَارْ ن إِسْرَائِيل.“ ‏4 ذَاوُوذْ إِنَّا أَسْ: ”مِينْ ذِينْ ذ ڒخْبَارْ؟ إِنِي أَيِي ث!“ نتَّا يَارَّا-د خَاسْ: ”ڒْڭنْسْ يَارْوڒْ زڭْ ؤُمنْغِي ؤُ أَطَّاسْ نْ ڒْڭنْسْ إِ إِتّْوَاوْثنْ، مُّوثنْ. ؤُڒَا ذ شَاوُولْ ذ مِّيسْ يُونَاثَانْ مُّوثنْ.“ ‏5 ذَاوُوذْ إِنَّا إِ ؤُحُوذْرِي نِّي ذ أَسْ د-يِيوْينْ ڒخْبَارْ: ”مَامّشْ ثڭِّيذْ شكْ ثسّْنذْ، بلِّي شَاوُولْ ذ مِّيسْ يُونَاثَانْ مُّوثنْ؟“ ‏6 خنِّي إِنَّا ؤُحُوذْرِي إِ ذ أَسْ د-يِيوْينْ ڒخْبَارْ: ”نشّْ ؤُسِيغْ-د أَمنِّي وَاهَا غَارْ إِذُورَارْ ن جِيلْپُوعَا ؤُشَا ژْرِيغْ مَامّشْ إِسنّذْ شَاوُولْ خْ لَانْسَا نّسْ ؤُ إِكَارُّوثنْ ن ؤُمنْغِي ذ إِمْنَاينْ إِنِّي خَاسنْ إِنْيِينْ ضفَّارنْ ث بْڒَا قطُّو. ^▫   ‏7 نتَّا، أَمْ د-إِنّقْڒبْ، إِژْرَا أَيِي، إِڒَاغَا أَيِي-د ؤُ نشّْ نِّيغْ أَسْ: ’أَقَا-يِي ذَا!‘ ‏8 نتَّا إِنَّا أَيِي: ’مِينْ ثعْنِيذْ شكْ؟‘ نشّْ نِّيغْ أَسْ: ’نشّْ ذ إِجّْ ن ؤُعَامَالِيقِي.‘ ‏9 ؤُشَا إِنَّا أَيِي نتَّا: ’أَسْ-د غَارِي ؤُ نغْ أَيِي، مَاغَارْ نشّْ ثڒْقفْ أَيِي ثُوشّنْثْ، مَاشَا وَاخَّا أَمنِّي عَاذْ ثُوذَارْثْ أَقَا-ت ذَايِي.‘ ^▫  

‏10 ڒخْذنِّي نشّْ ؤُيُورغْ ؤُ نْغِيغْ ث، مَاغَارْ نشّْ سّْنغْ، أَقَا وَارْ إِتّدَّارْ أَوَارْنِي إِ ؤُوطُّو نّسْ. خنِّي كْسِيغْ ثَامْرِيسْثْ ن وعْزَاڒْ نِّي خْ ؤُزدْجِيفْ نّسْ ذ ثْمقْيَاسْثْ إِ ثُوغَا غَارسْ ذڭْ ؤُغِيڒْ، إِوْيغْ ثنْثْ-إِ-د ڒخُّو ذَا إِ سِيذِي إِنُو.“

‏11 ڒخْذنِّي إِطّفْ ذَاوُوذْ أَرُّوضْ نّسْ، إِشَارّڭْ إِ-ث. أَمُّو إِ ت ڭِّينْ ؤُڒَا ذ مَارَّا إِرْيَازنْ إِ ثُوغَا غَارسْ إِدْجَانْ. ^▪  

‏12 نِيثْنِي وْثِينْ أَڭجْذُورْ، رُونْ ؤُ ژُومّنْ غَارسْ أَڒْ ثَامذِّيثْ خْ شَاوُولْ ؤُ خْ مِّيسْ يُونَاثَانْ ؤُ خْ ڒْڭنْسْ ن سِيذِي ؤُ خْ ثَادَّارْثْ ن إِسْرَائِيل، مِينْزِي وْضَانْ س سِّيفْ.

‏13 خنِّي إِنَّا ذَاوُوذْ إِ ؤُحُوذْرِي نِّي ثُوغَا إِ ذ أَسْ-د يِيوْينْ ڒخْبَارْ: ”زِي مَانِيسْ د-ثُوسِيذْ شكْ؟“ نتَّا إِنَّا أَسْ: ”نشّْ ذ مِّيسْ ن إِجّْ ن ؤُبَارَّانِي، ن إِجّْ ن ؤُعَامَالِيقِي.“

‏14 ذَاوُوذْ إِنَّا أَسْ: ”مَامّشْ ثڭِّيذْ، شكْ وَارْ ثڭّْوِيذذْ شَا أَذْ ثسّْوِيژّْضذْ س ؤُفُوسْ حِيمَا أَذْ ثنْغذْ أَمذْهُونْ ن سِيذِي؟“

‏15 خَاسْ ؤُشَا إِڒَاغَا-د ذَاوُوذْ خْ إِجّنْ زڭْ إِحُوذْرِييّنْ، إِنَّا: ”قَارّبْ-د، حيّحْ خَاسْ!“ ؤُ نتَّا إِحيّحْ خَاسْ أَڒَامِي ث إِنْغَا.

‏16 ذَاوُوذْ إِنَّا أَسْ: ”إِذَامّنْ نّكْ أَذْ إِڒِينْ خْ ؤُزدْجِيفْ نّكْ، مَاغَارْ أَقمُّومْ نّكْ إِشْهذْ خَاكْ ؤُمِي ثنِّيذْ: ’نشّْ نْغِيغْ أَمذْهُونْ ن سِيذِي.‘ “

‏17 ذَاوُوذْ إِغنّجْ أَيَا ن يزْڒِي ن وشْضَانْ خْ شَاوُولْ ؤُ خْ مِّيسْ يُونَاثَانْ.

‏18 نتَّا إِنَّا: ”أَذْ ڒمْذنْ أَيْثْ ن يَاهُوذَا إِزْڒِي ن ڒْقوْسْ.“ خْزَارْ، إِتّْوَارِي ذڭْ وذْلِيسْ ن ؤُمْسڭّذْ. ^▪  

‏19 ”ثَالْوِيزْثْ ن إِسْرَائِيل إِتّْوَانغْ خْ ڒڭْعُوذِي نّكْ.

مَامّشْ وْضَانْ أَيْثْ ن بُو-ثغْرُوضْثْ!

‏20 وَارْ ث تّْحَاجَامْ ذِي جَاثْ، وَارْ تّْصِيوْضمْ ڒخْبَارْ ذڭْ إِبْرِيذنْ ن أَشْقَالُونْ،

مَاحنْذْ يسِّيسْ ن إِفِيلِيسْطِينِييّنْ وَارْ فَارّْحنْثْ،

مَاحنْذْ يسِّيسْ ن يِينِّي وَارْ إِتّْوَاخثْننْ وَارْ سّْڒِيوْڒِيونْثْ. ^▪  

‏21 أَ إِذُورَارْ ن جِيلْپُوعَا، وَارْ خَاومْ إِتِّيڒِي نّْذَا نِيغْ أَنْژَارْ،

ؤُڒَا ذ إِيَّارنْ س ثوْهِيبِينْ ن ؤُسْڭعّذْ ن صَّابثْ،

مَاغَارْ ذِينْ إِتّْوَابقّضْ س ڒْعَارْ ثَاسدَّارْثْ ن أَيْثْ ن بُو-ثغْرُوضْثْ،

ثَاسدَّارْثْ ن شَاوُولْ، أَخْمِي نتَّا وَارْ إِدْجِي ذ أَمذْهُونْ س زّشْثْ.

‏22 زڭْ إِذَامّنْ ن يِينِّي إِتّْوَانْغنْ ؤُ زِي ثَاذُونْثْ ن أَيْثْ ن بُو-ثغْرُوضْثْ،

وَارْ ذ إِمْنِيعْ ڒْقوْسْ ن يُونَاثَانْ

ؤُ سِّيفْ ن شَاوُولْ وَارْ د-إِعْقِيبْ بَاطڒْ.

‏23 شَاوُولْ ذ يُونَاثَانْ تّْوَاعِيزّنْ ؤُ إِغْڒَانْ غَارْ إِوْذَانْ ذِي ثُوذَارْثْ نْسنْ

ؤُ ذِي ڒْموْثْ نْسنْ وَارْ مّْسبْضِينْ.

نِيثْنِي ثُوغَا أَثنْ فْسُوسنْ خْ إِڭِيذَارنْ ذ جهْذنْ خْ وَايْرَاذنْ.

‏24 أَ يسِّيسْ ن إِسْرَائِيل، رُونْثْ خْ شَاوُولْ،

ونِّي كنِّينْثْ إِسّْيَارْضنْ س ؤُزڭّْوَاغْ، س ڒقْشُوعْ إِغْڒَانْ،

ذ ونِّي إِڭِّينْ إِشْثْ ن ثلْوِيزْثْ ن وُورغْ خْ وَارُّوضْ نْكنْثْ.

‏25 مَامّشْ إِ وْضَانْ أَيْثْ ن بُو-ثغْرُوضْثْ ذڭْ ؤُمنْغِي!

يُونَاثَانْ إِتّْوَانغْ خْ ڒڭْعُوذِي نّكْ.

‏26 ذِي سِّيبّثْ نّكْ تّْوَاحْصَارغْ، أَ ؤُمَا إِنُو يُونَاثَانْ!

شكْ ثُوغَا ثتّْوَاعِيزّذْ غَارِي أَطَّاسْ.

ثُوغَا ثَايْرِي نّكْ غَارِي ذ سَّارْ كْثَارْ خْ ثَايْرِي ن ثمْغَارِينْ.

‏27 مَامّشْ إِ وْضَانْ أَيْثْ ن بُو-ثغْرُوضْثْ