إِزْڒِي ن هَانَّا
2
1 خنِّي ثژُّودْجْ حَانَّا، ثنَّا: ”ؤُڒْ إِنُو إِتّسْڒِيوْڒِيوْ س ڒفْرَاحثْ ذِي سِيذِي.
إِشّْ إِنُو إِتّْوَاسْڭعّذْ زِي سِيذِي.
أَقمُّومْ إِنُو يَارْزمْ ذ أَرْزَامْ خْ ڒْعذْيَانْ إِنُو،
مَاغَارْ فَارْحغْ خْ ؤُسنْجمْ نّكْ. ▪
2 ؤُڒَا ذ إِجّْ مَا ذ أَمْقدّسْ أَمْ سِيذِي،
مَاغَارْ وَارْ ذِينْ إِدْجِي حذْ مْغِيرْ شكْ
ؤُ وَارْ ذِينْ ثدْجِي ثصْضَارْثْ أَمْ أَربِّي نّغْ! ▪
3 وَارْ ثَارنِّيمْ ثسَّاوَاڒمْ أَمُّو س نّْفَاخثْ،
وَارْ د-تّفِّيغْ ؤُڒَا ذ شَا ن ثُوفّثْ ن وَاوَاڒْ زڭْ ؤُقمُّومْ نْومْ،
مَاغَارْ سِيذِي ذ إِجّْ ن أَربِّي إِسّنْ مَارَّا،
ؤُ ثِيمڭَّا نّسْ تّْوَاوزْننْثْ.
4 ڒْقوْسْ ن أَيْثْ ن بُو-ثغْرُوضْثْ تّْوَارْژنْ،
مَاشَا إِنِّي إِنْقَارْضنْ حزّْمنْ س جّْهذْ.
5 إِنِّي إِجِّيوْننْ أَرهْننْ إِخفْ نْسنْ إِ وغْرُومْ،
مَاشَا إِنِّي إِدْجُوژنْ، وَارْ قِّيمنْ عَاذْ دْجُوزنْ.
ثنِّي وَارْ إِتِّيرْونْ ثُورُووْ-د سبْعَا ن إِحنْجِيرنْ،
مَاشَا ثنِّي إِ غَارْ إِدْجْ ؤُبَارُّو ن إِحنْجِيرنْ، ثِيسْڒَاوْ.▪
6 أَربِّي إِنقّْ ؤُ إِتِّيشْ ثُوذَارْثْ.
نتَّا إِسّْهكّْوَّا غَارْ ڒَاخَارْثْ
ؤُ إِسّْڭعَّاذْ-د سّنِّي. ▪
7 سِيذِي إِتَّارَّا إِجّْ ذ أَمزْڒُوضْ ؤُ إِجّْ نّغْنِي يَارَّا إِ-ث ذ بُو-وَاڭْڒَا،
إِسّْهكّْوَا ؤُ د-إِسّْڭعَّاذْ.
8 ڒْمسْكِينْ إِسّكَّارْ إِ-ث زِي ثْعجَّاجْثْ
ؤُشَا ڒْمسْكِينْ إِجبْذْ إِ-ث-إِ-د زڭْ وفْرَاضْ
مَاحنْذْ أَذْ ث إِسّْغِيمْ غَارْ ثَارْوَا ن ثَاصِيڒثْ
ؤُ مَاحنْذْ أَذْ ثنْ سّشْننْ إِجّْ ن ڒْكُورْسِي ن ڒْعزّْ،
مِينْزِي ذْسُوسَا ن ثمُّورْثْ إِدْجَانْ ن سِيذِي
ؤُ نتَّا إِسّْبدّْ خَاسنْ دُّونشْثْ. ▪
9 نتَّا إِ إِسّْڒقَّانْ خْ إِصُورَافْ ن إِمْثِيقَّانْ نّسْ،
مَاشَا إِعفَّاننْ أَذْ تّْوَاسْبكْمنْ ذِي ثَادْجسْثْ،
مِينْزِي أَرْيَازْ وَارْ إِتِّيڒِي شَا ذ بُو ثغْرُوضْثْ زِي ثْزمَّارْ ن يِيخفْ نّسْ.
10 ونِّي إِتّمْشُوبُّوشنْ أَكْ-ذ سِيذِي، أَذْ إِتّْوَارْژْ.
أَذْ خَاسنْ إِسّْهمْهمْ ذڭْ ؤُجنَّا.
سِيذِي أَذْ إِحْكمْ ثِينڭُّورَا ن دُّونشْثْ.
أَذْ إِوْشْ ثِيزمَّارْ إِ ؤُجدْجِيذْ
ؤُشَا أَذْ إِسّْڭعّذْ إِشّْ ن لْمَاسِيحْ نّسْ.“ ▪
إِحنْجِيرنْ ن عَالِي
11 إِعْقبْ إِلْقَانَا عَاوذْ غَارْ ثَادَّارْثْ نّسْ غَارْ رَامَا، مَاشَا أَحنْجِيرْ إِسخَّارْ إِ سِيذِي زَّاثْ إِ وُوذمْ ن ؤُكهَّانْ عَالِي.
12 مَاشَا ثَارْوَا ن عَالِي ثُوغَا ذ ثَارْوَا إِ وَارْ إِسكّْوِينْ. نِيثْنِي وَارْ سِّيننْ شَا سِيذِي.
13 إِكهَّاننْ نُّومنْ أَذْ ڭّنْ أَكْ-ذ ڒْڭنْسْ أَمُّو: مَاڒَا يِيوِي إِجّْ ن ورْيَازْ إِشْثْ ن ثْغَارْصْثْ، خنِّي، ؤُمِي ثُوغَا إِتّْننَّا ويْسُومْ، يُوسَا-د إِجّْ ن ؤُحُوذْرِي ن إِكهَّاننْ أَكْ-ذ إِشْثْ ن فُورْشِيثَا ن ثْڒَاثَا ن إِشُوكْضَانْ ذڭْ ؤُفُوسْ،
14 إِجِّي ت ذِي ڒْپُورْمثْ نِيغْ ذڭْ ؤُطنْجِيرْ نِيغْ ذِي مَارْمِيثَا نِيغْ ذِي ثيْذُورْثْ ؤُ مَارَّا مِينْ غَا ثكْسِي فُورْشِيثَا، إِكْسِي ث ؤُكهَّانْ إِ يِيخفْ نّسْ. أَمُّو إِ ث ڭِّينْ غَارْ مَارَّا أَيْثْ ن إِسْرَائِيل إِنِّي د-يُوسِينْ غَارْ شِيلُو.
15 أَمُّو عَاوذْ، قْبڒْ مَا إِ غَا بخَّارنْ ثَاذُونْثْ، يُوسَا-د إِجّْ ن ؤُحُوذْرِي ن إِكهَّاننْ، إِنَّا إِ ورْيَازْ نِّي د-إِوْينْ ثَاغَارْصْثْ: ”أوْشْ أَيِي أَيْسُومْ حِيمَا أَذْ ث قْڒِيغْ إِ ؤُكهَّانْ، مِينْزِي نتَّا وَارْ خَاكْ إِكْسِي شَا أَيْسُومْ إِتّْوَاننَّانْ، مَاشَا مْغِيرْ أَزِيزَا.“ ▫
16 مَاڒَا يَارَّا-د خَاسْ ورْيَازْ: ”أَمزْوَارْ إِتّْخصَّا أَذْ بخَّارنْ ثَاذُونْثْ مَارَّا. خنِّي كْسِي مِينْ إِخْسْ وُوڒْ نّكْ إِ يِيخفْ نّكْ!“، خنِّي إِنَّا أَسْ: ”لَّ، إِتّْخصَّا أَذْ ث ثوْشذْ ڒخُّو، مَاڒَا لَّا، أَذْ ث كْسِيغْ س ؤُغِيڒْ!“
17 دّنْبْ ن إِحُوذْرِييّنْ ثُوغَا إِمْغَارْ أَطَّاسْ زَّاثْ إِ وُوذمْ ن سِيذِي، مَاغَارْ إِرْيَازنْ سّحْقَارنْ ثَاوْهِيبْثْ ن ڒْغِيدْجثْ ن سِيذِي.
18 شَامْوِيلْ ثُوغَا إِتّْسخَّارْ زَّاثْ إِ وُوذمْ ن سِيذِي. نتَّا ذ إِجّْ ن ؤُحنْجِيرْ إِحزّْمنْ س يِيجّْ ن ؤُبَالْطُو ن ؤُكهَّانْ ن ڒقْطنْ.
19 يمَّاسْ ثڭَّا أَسْ إِجّْ ن ؤُسڒْهَامْ ؤُشَا ثتَّاوْيِي أَسْ ث-إِ-د زڭْ ؤُسڭّْوَاسْ غَارْ ؤُسڭّْوَاسْ، خْمِي ثْڭعَّاذْ أَكْ-ذ ورْيَازْ نّسْ حِيمَا أَذْ ثَاوِي ذِينْ ثَاغَارْصْثْ ن كُوڒْ أَسڭّْوَاسْ. 20 إِبَاركْ عَالِي إِلْقَانَا ذ ثمْغَارْثْ نّسْ، إِنَّا: ”إِڒِي أَذْ أَشْ إِوْشْ سِيذِي زِي ثمْغَارْثْ-أَ إِجّْ ن ؤُحنْجِيرْ ذڭْ ومْشَانْ ن ؤُحنْجِيرْ إِ إِتّْوَاتَّارنْ، إِ ؤُمِي إِتّْوَاتَّارْ إِ سِيذِي.“ خنِّي عقْبنْ نِيثْنِي غَارْ ومْشَانْ ن ثْزذِّيغْثْ نّسْ. ▫ 21 سِيذِي مَاشَا إِخْزَارْ غَارْ حَانَّا ؤُ نتَّاثْ ثكْسِي س دّيْسثْ ؤُشَا ثُورُووْ-د ثْڒَاثَا ن إِحنْجِيرنْ ذ ثْنَاينْ ن ثْحنْجِيرِينْ، أَمْ ثُوغَا إِمقَّارْ شَامْوِيلْ غَارْ سِيذِي.
22 إِذْوڒْ عَالِي إِوْسَارْ أَطَّاسْ. نتَّا إِسْڒَا خْ مَارَّا مِينْ ڭِّينْ إِحنْجِيرنْ نّسْ إِ مَارَّا إِسْرَائِيل ؤُشَا إِسْڒَا عَاوذْ أَقَا نِيثْنِي طّْصنْ أَكْ-ذ ثمْغَارِينْ إِ ثُوغَا إِتّْسخَّارنْ غَارْ وَاذَافْ ن ؤُقِيضُونْ ن ؤُمْسَاڭَارْ. 23 نتَّا إِنَّا أَسنْ: ”مَايمِّي ثڭّمْ أَيَا أَمُّو، أَڒَامِي إِ تّسْڒِيغْ زِي مَارَّا ڒْڭنْسْ-أَ خْ ثْمڭَّا نْومْ ثِيعفَّانِينْ؟ 24 لَّ، أَ إِحنْجِيرنْ إِنُو، أَيَا وَارْ إِدْجِي ذ إِجّْ ن ڒخْبَارْ إِحْڒَا إِ سْڒِيغْ. كنِّيوْ ثتَّارَّامْ ڒْڭنْسْ-أَ ن سِيذِي أَذْ إِوْضَا ذِي خطُّو. 25 مَاڒَا إِجّْ ن بْنَاذمْ إِخْضَا أَكْ-ذ إِجّْ بْنَاذمْ نّغْنِي، خنِّي أَذْ خَاسْ إِحْكمْ أَربِّي، مَاشَا مَاڒَا إِجّْ ن بْنَاذمْ أَذْ إِخْضَا خْ سِيذِي، وِي إِ خَاسْ إِ غَا إِوْثنْ؟“ مَاشَا نِيثْنِي وَارْ سْڒِينْ شَا غَارْ بَابَاثْسنْ، مَاغَارْ سِيذِي ثُوغَا إِخْسْ أَذْ ثنْ إِنغْ. ▫ 26 شَامْوِيلْ أَمژْيَانْ ثُوغَا إِمقَّارْ ؤُشَا يَارْنِي إِتَّاسْ-د خْ ڒْخَاضَارْ إِ سِيذِي ؤُڒَا غَارْ إِوْذَانْ. ▪
أَوَاڒْ ن أَربِّي خْ عَالِي ذ ثَارْوَا نّسْ
27 ؤُشَا يُوسَا-د إِجّْ ن ورْيَازْ ن سِيذِي غَارْ عَالِي، إِنَّا أَسْ: ”أَمُّو إِ إِقَّارْ سِيذِي: ’مَا وَارْ د-سّشْنغْ إِخفْ إِنُو نِيشَانْ إِ ثَادَّارْثْ ن بَابَاشْ، ؤُمِي ثنْ ثُوغَا ذِي مِيصْرَا، ذِي ثَادَّارْثْ ن فِيرْعُونْ؟ ▪
28 نشّْ فَارْزغْ ث زِي مَارَّا ثِيقبَّاڒْ ن إِسْرَائِيل ذ أَكهَّانْ إِ نشّْ مَاحنْذْ أَذْ إِڭعّذْ غَارْ ؤُعَالْطَارْ إِنُو حِيمَا أَذْ ذِينْ إِسَّارْغْ ڒبْخُورْ ؤُ مَاحنْذْ أَذْ يَارْضْ أَبَالْطُو ن ؤُكهَّانْ زَّاثْ إِ وُوذمْ إِنُو ؤُ نشّْ وْشِيغْ عَاوذْ إِ ثَادَّارْثْ ن بَابَاشْ مَارَّا ثِيغَارْصَا ن ثْمسِّي ن أَيْثْ ن إِسْرَائِيل. ▪ 29 مَايمِّي ثْعفّْسمْ كنِّيوْ خْ ثْغَارْصْثْ إِنُو ذ ثوْهِيبْثْ ن ڒْغِيدْجثْ إِ زِي ؤُمُورغْ مَاحنْذْ أَذْ ثنْثْ ثْوهّْبمْ ذِي ثْزذِّيغْثْ إِنُو ؤُ مَايمِّي ثتّْوقَّارمْ إِحنْجِيرنْ نْومْ أَطَّاسْ خَافِي ؤُمِي ثْمسْڒمْ كنِّيوْ إِخفْ نْومْ س مُومُّو ن مَارَّا ثِيوْهِيبِينْ ن ڒْغِيدْجثْ ن ڒْڭنْسْ إِنُو إِسْرَائِيل؟ ▪ 30 س ؤُينِّي إِقَّارْ سِيذِي، أَربِّي ن إِسْرَائِيل: ’نشّْ نِّيغْ نِيشَانْ: ثَادَّارْثْ نّكْ ذ ثَادَّارْثْ ن بَابَاشْ أَذْ ؤُيُورنْثْ زَّاثْ إِ وُوذمْ إِنُو إِ ڒبْذَا!‘، مَاشَا ڒخُّو إِقَّارْ سِيذِي: ’أَيَا أَقَا إِڭّْوجْ خَافِي، مَاغَارْ إِنِّي ذ أَيِي إِتّْوقَّارنْ، أَذْ ثنْ وقَّارغْ، إِنِّي مَاشَا إِ ذ أَيِي إِسّحْقَارَانْ، أَذْ تّْوَاحسْبنْ ذ إِمُوقْڒِيڒنْ.‘ ▪ 31 خْزَارْ أَذْ أَسنْ وُوسَّانْ، أَذْ قضْعغْ أَغِيڒْ نّكْ ذ ؤُغِيڒْ ن ثَادَّارْثْ ن بَابَاشْ أَڒَامِي وَارْ إِتِّيڒِي عَاذْ ذ أَوسَّارْ ذِي ثَادَّارْثْ نّكْ. 32 شكْ أَذْ ثخْزَارذْ بلِّي أَذْ د-يَاسْ إِجّْ ن وغْرِيمْ ن ثْزذِّيغْثْ وَاخَّا مَارَّا ثْشُونِي نِّي إِتّڭّْ نتَّا إِ إِسْرَائِيل، ؤُشَا عمَّارْصْ أَذْ يِيڒِي إِجّْ ن ؤُوسَّارْ ذِي ثَادَّارْثْ نّكْ عَاذْ، مَارَّا ؤُسَّانْ. 33 ؤُشَا كُوڒْ أَرْيَازْ زَّايكْ، ونِّي وَارْ قطّْعغْ شَا خْ ؤُعَالْطَارْ إِنُو، أَذْ إِسِّيحڒْ ثِيطَّاوِينْ نّكْ ؤُ أَذْ إِقّسْ إِ ڒعْمَارْ نّكْ ؤُ مَارَّا ثْيُومِي ن ثَادَّارْثْ نّكْ أَذْ مّْثنْ ذ إِرْيَازنْ.
34 ذ ثَا إِ ذ أَكْ إِ غَا ثِيڒِي ذ ڒعْڒَامثْ، ثنِّي إِ د غَا ثَاسْ خْ ثْنَاينْ ن إِحنْجِيرنْ نّكْ، حُوفْنِي ذ فِينَاحَاسْ: أَذْ مّْثنْ س ثْنَاينْ ذڭْ إِجّْ ن وَاسّْ. 35 نشّْ مَاشَا أَذْ ڭّغْ إِ إِخفْ إِنُو إِجّْ ن ؤُكهَّانْ ذ أَمْثِيقِّي. نتَّا أَذْ إِڭّْ عْلَاحْسَابْ ؤُڒْ ذ ڒعْمَارْ إِنُو. نشّْ أَذْ أَسْ سّْبدّغْ إِشْثْ ن ثَادَّارْثْ ثمْثنْ ؤُشَا نتَّا أَذْ يُويُورْ ڒبْذَا زَّاثْ إِ وُوذمْ ن لْمَاسِيحْ إِنُو. 36 ؤُشَا أَذْ إِمْسَارْ، بلِّي مَارَّا وِي إِ غَا إِقِّيمنْ زِي ثَادَّارْثْ نّكْ، أَذْ د-يَاسْ أَذْ أَسْ يَاضرْ إِ يِيشْثْ ن ثُوقِييَّاثْ ن نُّوقَارْثْ نِيغْ إِ يِيشْثْ ن ثشْنِيفْثْ ن وغْرُومْ، أَذْ يِينِي: ’أَرْنِي أَيِي مْغِيرْ غَارْ إِشْثْ ن ڒْخذْمثْ ن ثْسخَّارْثْ ن إِكهَّاننْ، مَاحنْذْ أَذْ غَارِي يِيڒِي إِجّْ ن ؤُڒقِّيمْ ن وغْرُومْ إِ مَاشَّا.‘ “