‏1 ثِينَا ذ ثْسقَّارْ إِ طّْفنْ أَيْثْ ن إِسْرَائِيل ذِي ثمُّورْثْ ن كنْعَانْ، ثِينِّي إِ ذ أَسنْ إِبْضَا ذ ڒْوَارْثْ ؤُكهَّانْ أَلِيعَازَارْ ذ يَاشُووَا، مِّيسْ ن نُونْ، ذ إِزدْجِيفنْ ن ثُوذْرِينْ ن إِبَابَاثنْ ن ثْقبَّاڒْ ن أَيْثْ ن إِسْرَائِيل. ^▪   ‏2 س ثْقدُّوحْثْ طّْفنْ مَارَّا ثَاسْغَارْثْ نْسنْ، أَمْ مَامّشْ ث يُومُورْ سِيذِي س ؤُفُوسْ ن مُوسَا زِي جِّيهثْ ن ثسْعَا ن ثْقبَّاڒْ ذ وزْينْ ن ثقْبِيتْشْ. ^▪   ‏3 مَاغَارْ مُوسَا ثُوغَا إِوْشَا إِ ثْنَاينْ ن ثْقبَّاڒْ ذ وزْينْ ن ثقْبِيتْشْ إِشْثْ ن ثسْغَارْثْ أَغِيرِينْ إِ لْ'ؤُرْذُونْ، مَاشَا إِ إِلَاوِييّنْ وَارْ ذ أَسنْ إِوْشِي شَا ثَاسْغَارْثْ ذِي ڒْوسْثْ نْسنْ. ‏4 أَقَا أَيْثْ ن يُوسُوفْ ڭِّينْ ثْنَاينْ ن ثْقبَّاڒْ، مَانَاسَّا ذ إِفْرَايِيمْ، ؤُ إِ إِلَاوِييّنْ وَارْ ذ أَسْ وْشِينْ شَا ثَاسْغَارْثْ ذِي ثمُّورْثْ مَاشَا مْغِيرْ ثِيندَّامْ إِ ثْزذِّيغْثْ ذ مِينْ إِدْجَانْ زَّاثْسنْثْ ن دّْمَانِي ن ثَاروْسَا إِ ڒبْهَايمْ ؤُ إِ مِينْ غَارْسنْ إِدْجَانْ. ^▫   ‏5 أَمْ مَامّشْ ثُوغَا يُومُورْ سِيذِي إِ مُوسَا، أَمُّو إِ ڭِّينْ أَيْثْ ن إِسْرَائِيل ڒَامِي بْضَانْ ثَامُّورْثْ.

‏6 خنِّي قَارّْبنْ-د أَيْثْ ن يَاهُوذَا غَارْ يَاشُووَا ذِي جِيلْجَالْ. كَالِيبْ، مِّيسْ ن يَافُونِّي، أَقِينِيزِي، إِنَّا أَسْ: ”شكْ ثسّْنذْ مِينْ خَافِي ذ خَاكْ إِنَّا سِيذِي إِ مُوسَا، أَرْيَازْ ن أَربِّي، ذِي قَاذَاشْ-بَارْنِيعْ. ^▪   ‏7 نشّْ ڭِّيغْ أَربْعِينْ ن إِسڭّْوُوسَا، ؤُمِي إِ د أَيِي إِسّكّْ مُوسَا، أَمْسخَّارْ ن سِيذِي، زِي قَاذَاشْ-بَارْنِيعْ مَاحنْذْ أَذْ برْڭَاڭغْ ثَامُّورْثْ ؤُ نشّْ عقْبغْ غَارسْ، خبَّارغْ أَسْ أَمْ مَامّشْ ث ثُوغَا إِدْجَانْ ذڭْ وُوڒْ إِنُو. ‏8 وَاخَّا أَمنِّي أَيْثْمَا، إِنِّي إِ ثُوغَا أَكِيذِي إِڭعّْذنْ، سّْفسّْينْ ؤُڒْ ن ڒْڭنْسْ، مَاشَا نشّْ ثُوغَا ڒبْذَا ضفَّارغْ سِيذِي، أَربِّي إِنُو. ^▪   ‏9 ذڭْ وَاسّْ نِّي إِجِّيدْجْ مُوسَا، إِنَّا: ”وَايَّاوْ ، مَاڒَا ثَامُّورْثْ إِ ذِي ثسَّارْسذْ أَضَارْ نّكْ، وَارْ ثتِّيڒِي إِ شكْ ذ إِحنْجِيرنْ نّكْ ذ ثَاسْغَارْثْ إِ ڒبْذَا، مِينْزِي ثُوغَا شكْ ڒبْذَا ثْضفَّارذْ سِيذِي، أَربِّي إِنُو!“

‏10 ڒخُّو، خْزَارْ، سِيذِي إِجَّا أَيِي دَّارغْ، أَمْ مَامّشْ إِسِّيوڒْ. ڒخُّو أَقَا خمْسَا ؤُ-ربْعِينْ ن إِسڭّْوُوسَا زڭْ وَامِي إِسِّيوڒْ سِيذِي غَارْ مُوسَا أَوَاڒْ-أَ، ؤُمِي إِسْرَائِيل يُويُورْ ذِي ڒخْڒَا. ؤُشَا ڒخُّو، أَقَا ذَا، أَمْ مَامّشْ ثتّْوَاڒِيذْ، غَارِي خمْسَا ؤُ-ثْمَانْيِينْ ن إِسڭّْوُوسَا.

‏11 نشّْ عَاذْ محْضغْ أَمشْنَاوْ مَامّشْ محْضغْ ذڭْ وَاسّْ نِّي ؤُمِي إِ ذ أَيِي د-إِسّكّْ مُوسَا. أَمْ مَامّشْ ثُوغَا جهّْذغْ ذڭْ وُوسَّانْ نِّي، أَمُّو إِ جهّْذغْ عَاوذْ إِضَا إِ ؤُمنْغِي مَاحنْذْ أَذْ فّْغغْ ؤُ أَذْ أَرڭّْوْحغْ. ^▪  

‏12 ڒخُّو خنِّي، أوْشْ أَيِي ثَامُّورْثْ-أَ ن إِذُورَارْ إِ خْ إِسِّيوڒْ سِيذِي ذڭْ وَاسّْ نِّي، مَاغَارْ شكْ ثسْڒِيذْ سِيمَانْثْ نّكْ ذڭْ وَاسّْ نِّي، أَقَا أَيْثْ ن إِعَانَاقِييّنْ أَقَا أَثنْ ذِينِّي ؤُڒَا ذ ثِيندَّامْ مْغَارنْثْ ؤُ فَارْينْثْ. أَذْ ثَاغْ أَذْ كِيذِي يِيڒِي سِيذِي ؤُ أَذْ أَوْضغْ أَذْ خَاسنْ أَژّْڒغْ أَمشْنَاوْ مَامّشْ إِنَّا سِيذِي.“

‏13 خنِّي إِبَاركْ إِ-ث يَاشُووَا ؤُشَا إِوْشَا حَابْرُونْ ذ ڒْوَارْثْ إِ كَالِيبْ، مِّيسْ ن يَافُونِّي.

‏14 س ؤُينِّي ثدْجْ ثنْذِينْثْ ن حَابْرُونْ ذ ڒْوَارْثْ ن كَالِيبْ، مِّيسْ ن يَافُونِّي، أَقِينِيزِي، غَارسْ أَڒْ أَسّْ-أَ، مِينْزِي نتَّا ثُوغَا ڒبْذَا إِضفَّارْ سِيذِي، أَربِّي ن إِسْرَائِيل.

‏15 حَابْرُونْ ثُوغَا قَّارنْ أَسْ زِيشْ ’ثَانْذِينْثْ ن أَرْبَاعْ‘. ثُوغَا أَرْبَاعْ ذ أَرْيَازْ ذ أَمقّْرَانْ ذڭْ أَيْثْ ن إِعَانَاقِييّنْ. ؤُشَا ثَامُّورْثْ ثُوغَا ذَايسْ ڒْهُوذْنثْ زڭْ ؤُمنْغِي. ^▫