‏1 ”أَذْ ثحْضَامْ مَارَّا ڒُومُورَاثْ إِ زِي ذ أَومْ ؤُمُورغْ أَسّْ-أَ، مَاحنْذْ أَذْ ثنْثْ ثڭّمْ، حِيمَا أَذْ ثدَّارمْ ؤُ أَذْ ثمَّارنْيمْ ؤُشَا أَذْ ثَاذْفمْ ثَامُّورْثْ، ثنِّي إِجِّيدْجْ سِيذِي إِ إِبَابَاثنْ نْومْ، ؤُشَا أَذْ ت ثكْسِيمْ ذ ڒْوَارْثْ. ‏2 أَذْ ثِيذَارذْ مَارَّا أَبْرِيذْ خْ مَانِي شكْ إِڭوّذْ سِيذِي، أَربِّي نّكْ، أَربْعِينْ ن إِسڭّْوُوسَا ذِي ڒخْڒَا حِيمَا أَذْ شكْ إِسّْوَاضعْ ؤُ أَذْ شكْ إِقدْجبْ مَاحنْذْ أَذْ إِسّنْ مِينْ ذِينْ ذڭْ وُوڒْ نّكْ، مَا أَذْ ثحْضِيذْ ڒُومُورَاثْ نّسْ نِيغْ لَّا. ‏3 نتَّا إِسّْوَاضعْ إِ شكْ ؤُ إِسّْڒَاژْ إِ شكْ ؤُ إِوْشَا أَشْ ’مَانَّا‘ ذ مَاشَّا، ثنِّي وَارْ ثسِّينذْ شَا شكْ ؤُڒَا ذ إِبَابَاثنْ نّكْ وَارْ ت سِّيننْ شَا، حِيمَا أَذْ أَشْ إِسّْشنْ بلِّي بْنَاذمْ وَارْ إِتّدَّارْ س وغْرُومْ وَاهَا، مَاشَا أَقَا بْنَاذمْ إِتّدَّارْ س مَارَّا مِينْ د-إِفّْغنْ زڭْ ؤُقمُّومْ ن سِيذِي. ^▪   ‏4 أَرُّوضْ نّكْ عمَّارْصْ وَارْ خَاكْ إِوْسَارْ ؤُڒَا ذ أَضَارْ نّكْ وَارْ يُوفّْ شَا ذِي مَارَّا أَربْعِينْ ن إِسڭّْوُوسَا أَيَا. ^▪  

‏5 سنْ ذڭْ وُوڒْ نّكْ، بلِّي سِيذِي، أَربِّي نّكْ، أَقَا يَاربَّا إِ شكْ، أَمْ مَامّشْ يَاربَّا أَرْيَازْ مِّيسْ ‏6 ؤُشَا حْضَا ڒُومُورَاثْ ن سِيذِي، أَربِّي نّكْ، أَڒَامِي ثدْجِيذْ ذڭْ إِبْرِيذنْ نّسْ ؤُ أَڒَامِي زَّايسْ تّڭّْوذذْ. ‏7 مِينْزِي سِيذِي، أَربِّي نّكْ، أَذْ شكْ إِسِّيذفْ ذڭْ إِشْثْ ن ثمُّورْثْ إِشْنَانْ،

إِشْثْ ن ثمُّورْثْ ن ثْغزْرَاثِينْ ذ ڒْعُونْصَارَاثْ ذ وَامَانْ يُودْجْغنْ

نِّي د-إِفّْغنْ زِي ثيْسَارْثْ ذ وذْرَارْ،

‏8 إِشْثْ ن ثمُّورْثْ ن إِرْذنْ ذ إِمنْذِي ذ ثْزَايَارِينْ ذ وَارْثَانْ ن ثَازَارْثْ ذ إِرمَّامنْ،

إِشْثْ ن ثمُّورْثْ ثشُّورْ س زّشْثْ ن ثْزِيثُونْثْ ؤُ ن ثَامّنْثْ،

‏9 إِشْثْ ن ثمُّورْثْ مَانِي إِ غَا ثشّذْ أَغْرُومْ ؤُمِي وَارْ ذِينْ ڒخْصصْ ؤُ وَارْ شكْ إِتّْخصِّي شَا ذَايسْ،

إِشْثْ ن ثمُّورْثْ، إِژْرَا نّسْ شُّورنْ س وُوزَّاڒْ

ؤُ زڭْ إِذُورَارْ نّسْ أَذْ ثْنقْشذْ نّْحَاسْ.

‏10 مَاڒَا ثشِّيذْ ؤُ ثجِّيوْنذْ، خنِّي أَذْ ثْبَارْكذْ سِيذِي، أَربِّي نّكْ، خْ ثمُّورْثْ إِشْنَانْ نِّي ذ أَشْ إِوْشَا. ^▪  

‏11 حْضَا إِخفْ نّكْ حِيمَا وَارْ ثتُّوذْ سِيذِي، أَربِّي نّكْ، أَڒَامِي وَارْ ثحْضِيذْ ڒُومُورَاثْ نّسْ، لْفَارَايِيضْ نّسْ ذ ثْوصَّا نّسْ نِّي ذ أَشْ ؤُمُورغْ أَسّْ-أَ،

‏12 حِيمَا وَارْ إِتِّيڒِي، مَاڒَا ثشِّيذْ ؤُ ثجِّيوْنذْ ؤُشَا أَقَا ثبْنِيذْ ثُوذْرِينْ إِشْنَانْ نِّي ذِي ثڭِّيذْ أَذْ ذَايْسنْثْ ثْزذْغذْ،

‏13 ؤُشَا إِفُونَاسنْ ذ ثْفُونَاسِينْ نّكْ ذ وُودْجِي نّكْ تّْوَامَارْنِينْ ؤُ نُّوقَارْثْ ذ وُورغْ نِّي غَاركْ أَقَا تّْوَامَارْنِينْ، ؤُ مَارَّا مِينْ غَاركْ أَقَا إِتّْوَامَارْنِي،

‏14 أَذْ ثسّْڭعّْذذْ ؤُڒْ نّكْ، أَذْ ثتُّوذْ سِيذِي، أَربِّي نّكْ، ونِّي شكْ د-إِسُّوفّْغنْ زِي ثمُّورْثْ ن مِيصْرَا، زِي ثَادَّارْثْ ن ثسْمُوغِي،

‏15 - ذ ونِّي شكْ د-إِنذْهنْ ذِي ڒخْڒَا إِمْغَارنْ ؤُ إِسَّاڭّْوَاذنْ مَانِي ثُوغَا إِفِيغْرَانْ يَارْغِينْ ذ ثْغَارْضْمِيوِينْ ؤُڒَا ذ ثَامُّورْثْ إِتّْفَاذَانْ بْڒَا أَمَانْ،

ذ ونِّي د-إِسُّوفّْغنْ أَمَانْ زڭْ وژْرُو ن سّدْجَاحْ، ^▪  

‏16 ذ ونِّي ذ أَشْ إِوْشِينْ ’مَانَّا‘ إِ مَاشَّا ذِي ڒخْڒَا، ’مَانَّا‘ نِّي وَارْ سِّيننْ إِبَابَاثنْ نْومْ، حِيمَا أَذْ شكْ إِسّْوَاضعْ ؤُ حِيمَا أَذْ شكْ إِقدْجبْ ؤُ حِيمَا أَذْ أَشْ إِڭّْ ثْشُونِي غَارْ ؤُنڭَّارْ -، ^▪  

‏17 ؤُشَا خنِّي أَذْ ثِينِيذْ ذڭْ وُوڒْ نّكْ: ’س ثْزمَّارْ إِنُو ذ جّهْذْ ن ؤُفُوسْ إِنُو طّْفغْ مَارَّا ڒكْسِيبثْ-أَ إِ يِيخفْ إِنُو.‘

‏18 إِذَارْ سِيذِي، أَربِّي نّكْ أَقَا نتَّا ذ ونِّي إِوْشَا أَشْ جّهْذْ حِيمَا أَذْ ثْكسْبذْ إِشْثْ ن ڒكْسِيبثْ ثمْغَارْ مَاحنْذْ أَذْ إِمْثنْ أَمُّو ڒْعَاهْذْ نّسْ نِّي ثُوغَا إِجِّيدْجْ إِ إِبَابَاثنْ نّكْ، أَمْ ثدْجْ أَسّْ-أَ.

‏19 مَاڒَا ثِيوْضذْ أَذْ ثتُّوذْ سِيذِي، أَربِّي نّكْ، ؤُشَا أَذْ ثُويُورذْ أَوَارْنِي إِ إِربِّيثنْ نّغْنِي، أَذْ أَسنْ ثْسخَّارذْ ؤُ أَذْ أَسنْ ثَاضَارذْ، نشّْ أَسّْ-أَ بَارّْحغْ أَشْ-د، أَقَا أَذْ ثتّْوَاهلّْكمْ س تِّيذثْ. ‏20 أَذْ ثتّْوَاهلّْكمْ أَمْ ڒڭْنُوسْ نِّي خْ يَاژّڒْ سِيذِي زَّاثْ إِ وُوذمْ نْومْ، مِينْزِي وَارْ ثسْڒِيمْ إِ ثْمِيجَّا ن سِيذِي، أَربِّي نْومْ.“