‏1 ”خْمِي سِيذِي، أَربِّي نّكْ، أَذْ شكْ إِسِّيذفْ ذِي ثمُّورْثْ مَانِي إِ غَا ثْرَاحذْ مَاحنْذْ أَذْ ت ثكْسِيذْ ذ ڒْوَارْثْ، ؤُشَا نتَّا أَذْ يَاژّڒْ زِي زَّاثكْ أَطَّاسْ ن ڒڭْنُوسْ، إِحِيتِّييّنْ ذ إِجِيرْجَاشِييّنْ ذ إِمُورِييّنْ ذ إِكنْعَانِييّنْ ذ إِفِيرِيزِييّنْ ذ إِحِيوِييّنْ ذ إِيَاپُوسِييّنْ، سبْعَا ن ڒڭْنُوسْ مْغَارنْ ؤُ جهْذنْ خَاكْ أَطَّاسْ، ^▪   ‏2 ؤُشَا سِيذِي، أَربِّي نّكْ، أَذْ ثنْ إِسلّمْ زَّاثْ إِ وُوذمْ نّكْ ؤُ شكْ أَذْ ثنْ ثْغڒْبذْ، خنِّي إِتّْخصَّا أَذْ ثنْ ثْحَارّْمذْ قَاعْ إِ ؤُثحِّي. وَارْ كِيسنْ تّڭّْ ڒْعَاهْذْ ؤُ وَارْ ذ أَسنْ سّْشنْ ڒحْنُونشْثْ نّكْ. ^▪   ‏3 وَارْ ثذِّيكّْوِيڒمْ ذ إِضڭّْوَاڒنْ عَاوذْ أَكِيذْسنْ. وَارْ تِّيشْ يدْجِيشْ إِ مِّيسْ ؤُ وَارْ د-تَّاوِي يدْجِيسْ إِ مِّيشْ، ^▪   ‏4 مِينْزِي أَيَا أَذْ يَارّْ مِّيشْ أَذْ د-إِذْوڒْ زِي ضفَّارْ إِنُو ؤُشَا أَذْ إِسخَّارْ إِ إِربِّيثنْ نّغْنِي ؤُشَا أَمُّو أَذْ خَاومْ يَارغْ وغْضَابْ ن سِيذِي ؤُشَا أَذْ كنِّيوْ إِثحَّا ذغْيَا. ‏5 أَمُّو مَاشَا إِ إِتّْخصَّا أَذْ كِيسنْ ثڭّمْ: أَذْ ثْهذْممْ إِعَالْطَارنْ نْسنْ، أَذْ ثَارْژَامْ إِمَايْضُوثنْ نْسنْ إِقدّْسنْ ؤُ أَذْ ثْهذْمنْ ثِيربِّينْ نْسنْ ن شْوَارْثِي ؤُشَا أَذْ ثسّْشمْضمْ ڒخْيَاڒَاثْ نْسنْ إِنقْشنْ ن ؤُكشُّوضْ س ثْمسِّي. ^▪   ‏6 مِينْزِي شكْ ذ إِجّْ ن ڒْڭنْسْ إِقدّسْ إِ سِيذِي، أَربِّي نّكْ. سِيذِي، أَربِّي نّكْ، ونِّي شكْ إِفَارْزنْ حِيمَا أَذْ أَسْ ثِيڒِيذْ ذ إِجّْ ن ڒْڭنْسْ إِغْڒَانْ خْ مَارَّا ڒڭْنُوسْ نِّي يدْجَانْ خْ وُوذمْ ن ثمُّورْثْ. ^▪  

‏7 سِيذِي وَارْ ذ أَومْ إِڭِّي ثَاسْغُونْثْ ن ثَايْرِي ؤُ وَارْ كنِّيوْ إِخْضَارْ ؤُمِي ثُوغَا كنِّيوْ ذ أَطَّاسْ زِي مَارَّا ڒڭْنُوسْ، مِينْزِي ثُوغَا كنِّيوْ ثسْوَامْ قلّْ جَارْ مَارَّا ڒڭْنُوسْ، ‏8 مَاشَا ثَايْرِي ن سِيذِي إِ كنِّيوْ ذ ؤُحطُّو نّسْ خْ ثْجَادْجِيثْ نِّي إِجِّيدْجْ إِ إِبَابَاثنْ نْومْ، أَقَا ذ إِنَا إِ زِي كنِّيوْ د-إِسُّوفّغْ سِيذِي س ؤُفُوسْ إِجهْذنْ ؤُ ذ إِنَا إِ زِي شكْ إِسّنْجمْ زِي ثَادَّارْثْ ن ثسْمُوغِي، زڭْ ؤُفُوسْ ن فِيرْعُونْ، أَجدْجِيذْ ن مِيصْرَا. ^▪   ‏9 سّنْ خنِّي، بلِّي سِيذِي، أَربِّي نّكْ، ذ أَربِّي، أَقَا نتَّا ذ أَربِّي أَمْثِيقِّي ونِّي إِحطَّانْ ڒْعَاهْذْ ذ ثْمخْسِيوْثْ إِشوَّارنْ زِي جِّيهثْ ن يِينِّي ث إِتّخْسنْ ؤُشَا حطَّانْ ڒُومُورَاثْ نّسْ، أَڒْ جِّيڒْ وِيسّْ أَڒفْ، ^▪  

‏10 مَاشَا مَارَّا وِي ث إِشَارّْهنْ ذڭْ ؤُغمْپُوبْ نّسْ، أَقَا نتَّا أَذْ ثنْ إِخدْجصْ. وَارْ ڭُّورْ أَذْ إِشكّْ مَاحنْذْ أَذْ إِخدْجصْ ونِّي ث إِشَارّْهنْ ذڭْ ؤُغمْپُوبْ نّسْ. ^▪  

‏11 حْضَا خنِّي ڒُومُورَاثْ ذ ثْوصَّا ذ لْفَارَايِيضْ نِّي ذ أَشْ ؤُمُورغْ نشّْ أَسّْ-أَ مَاحنْذْ أَذْ زَّايْسنْثْ ثڭّذْ.

‏12 أَذْ إِمْسَارْ، ؤُمِي ثسْڒِيمْ إِ لْفَارَايِيضْ-أَ ؤُشَا أَذْ ثنْثْ ثحْضَامْ أَمْ ثنْثْ إِ غَا ثڭّمْ، أَقَا سِيذِي، أَربِّي نّكْ، أَذْ أَشْ إِبدّْ خْ ڒْعَاهْذْ ذ ثَامخْسِيوْثْ إِشوَّارنْ نِّي خْ ثُوغَا إِجِّيدْجْ إِ إِبَابَاثنْ نّكْ. ^▪  

‏13 نتَّا أَذْ شكْ إِخْسْ، أَذْ شكْ إِبَاركْ ؤُ أَذْ شكْ يَارّْ ذڭْ وَاطَّاسْ. أَذْ إِبَاركْ ڒْغِيدْجثْ ن ؤُعذِّيسْ نّكْ ذ ڒْغِيدْجثْ ن ثمُّورْثْ نّكْ، إِرْذنْ نّكْ، بِينُو نّكْ ن جْذِيذْ، زّشْثْ نّكْ ن طّْرِي، ثَارَّاوْثْ ن ثْفُونَاسِينْ نّكْ ذ ثْيُومِي ن وُودْجِي نّكْ، ذِي ثمُّورْثْ نِّي ثُوغَا إِجِّيدْجْ أَذْ ت إِوْشْ إِ إِبَابَاثنْ نْومْ.

‏14 أَقَا شكْ ثتّْوَابَارْكذْ جَارْ ڒڭْنُوسْ! وَارْ ذَايكْ إِتّْغِيمِي عَاذْ حذْ إِ وَارْ د-إِتّجِّينْ ؤُڒَا ذ ثنِّي وَارْ إِتِّيرِيونْ، ؤُشَا أَمُّو ؤُڒَا ذِي ڒبْهَايمْ نّكْ. ^▪  

‏15 أَذْ زَّايكْ إِكّسْ سِيذِي مَارَّا ڒهْڒَاشْ ؤُ وَارْ شكْ إِڒقّفْ ؤُڒَا س شَا ن ڒهْڒَاشَاثْ إِعفَّاننْ إِ غَاركْ إِتّْوَاسّْننْ زِي مِيصْرَا ؤُ أَذْ ثنْثْ إِسِّيوضْ خْ مَارَّا إِنِّي إِ شكْ إِشَارّْهنْ.

‏16 أَذْ ثشّذْ مَارَّا ڒڭْنُوسْ نِّي ذ أَشْ إِ غَا إِوْشْ سِيذِي، أَربِّي نّكْ. ثِيطّْ نّكْ وَارْ خَاسنْ ثتّْحِينِّي شَا ؤُ إِربِّيثنْ نْسنْ وَارْ ثنْ ثْسخَّارذْ، مِينْزِي أَيَا أَذْ يِيڒِي ذ ثَاخْشفْثْ إِ شكْ.

‏17 مَاڒَا ثنِّيذْ ذڭْ وُوڒْ نّكْ: ’ڒڭْنُوسْ-أَ مْغَارنْ خَافِي، مَامّشْ إِ غَا زمَّارغْ أَذْ زَّايْسنْ كّْسغْ عمَّارْصْ ڒْوَارْثْ نْسنْ؟‘،

‏18 خنِّي وَارْ زَّايْسنْ تّڭّْوذْ. خَارّصْ مْلِيحْ ذِي مِينْ إِڭَّا سِيذِي، أَربِّي نّكْ، أَكْ-ذ فِيرْعُونْ ؤُ أَكْ-ذ مَارَّا إِمِيصْرِييّنْ،

‏19 خَارّصْ ذِي ثْقدْجَابِينْ إِمْغَارنْ نِّي ثژْرِيذْ س ثِيطَّاوِينْ نّكْ ؤُ ذِي ڒعْڒَامَاثْ ذ لْمُوعْجِيزَاثْ ذ ؤُفُوسْ إِجهْذنْ ذ ؤُغِيڒْ إِسّْوِيژّْضنْ أَكْ-ذ وِي شكْ د-إِسُّوفّغْ سِيذِي، أَربِّي نّكْ. أَمُّو إِ غَا يڭّْ سِيذِي، أَربِّي نّكْ، س مَارَّا ڒڭْنُوسْ إِ زِي تّڭّْوذذْ. ^▪   ‏20 سِيذِي، أَربِّي نّكْ، أَذْ إِسّكّْ إِرزَّانْ إِضَارْغَاڒنْ جَارْ أَسنْ، أَڒْ غَا تّْوَاهلّْكنْ عَاوذْ إِنِّي إِقِّيمنْ، إِنِّي إِتّْوَاسْنُوفَّارنْ زَّاثكْ. ^▪   ‏21 وَارْ تّڭّْوذْ زَّاثْ إِ وُوذمْ نْسنْ، مِينْزِي سِيذِي، أَربِّي نّكْ، أَقَا-ث ذِي ڒْوسْثْ نّكْ، أَقَا-ث ذ أَربِّي إِمْغَارنْ ؤُ إِسَّاڭّْوَاذنْ. ‏22 سِيذِي، أَربِّي نّكْ، أَذْ إِسُّوفّغْ ڒڭْنُوسْ-أَ زَّاثكْ شْوَايْثْ شْوَايْثْ. وَارْ إِزمَّارْ أَذْ خَاسنْ ثقْضِيذْ ذغْيَا، مَاڒَا لَّا أَذْ مَّارنْينْ ڒوْحُوشْ ذڭْ إِيَّارْ أَطَّاسْ خَاكْ. ‏23 سِيذِي، أَربِّي نّكْ، أَذْ ثنْ إِسلّمْ زَّاثْ إِ وُوذمْ نّكْ ؤُ أَذْ ثنْ إِسّْخَارْوضْ س يِيجّْ ن ؤُخَارْوضْ إِمْغَارْ أَڒْ غَا تّْوَاثحَّانْ. ‏24 أَذْ إِسلّمْ إِجدْجِيذنْ نْسنْ ذڭْ ؤُفُوسْ نّكْ ؤُشَا أَذْ ثمْحِيذْ إِسمْ نْسنْ زِي سَاذُو أَجنَّا. ؤُڒَا ذ إِجّْ ورْيَازْ وَارْ إِزمَّارْ أَذْ إِبدّْ زَّاثْ إِ وُوذمْ نّكْ أَڒْ ثنْ غَا ثتّحِّيذْ. ‏25 ڒخْيَاڒَاثْ إِنقْشنْ أَذْ ثنْثْ ثسّْشمْضذْ س ثْمسِّي. نُّوقَارْثْ ذ وُورغْ إِ خَاسنْثْ إِدْجَانْ وَارْ ذَايسْ عشّقْ ؤُ وَارْ ث كسِّي إِ يِيخفْ نّكْ، حِيمَا وَارْ زَّايسْ ثتّْخَارْوِيضذْ، مِينْزِي أَيَا ذ إِشْثْ ن جّْعِيفشْثْ إِ سِيذِي، أَربِّي نّكْ. ‏26 وَارْ تِّيوِي إِشْثْ ن جّْعِيفشْثْ أَمْ ثَا غَارْ ثَادَّارْثْ نّكْ، مَاڒَا لَّا أَذْ ثْذوْڒذْ س يِيخفْ نّكْ ذ إِشْثْ ن ڒْقشْعثْ ن ڒحْرَامْ. أَذْ زَّايسْ ثْعِيفّذْ أَطَّاسْ ؤُ أَذْ أَشْ ثِيڒِي ذ ثَامنّْعِيثْ، مِينْزِي أَقَا-ت ذ إِشْثْ ن ڒْقشْعثْ ن ڒحْرَامْ.“