‏1 إِژْرَا بَالْعَامْ بلِّي أَقَا يَارْضَا إِ ثِيطَّاوِينْ ن سِيذِي ؤُمِي إِبَاركْ إِسْرَائِيل ؤُشَا خنِّي وَارْ ڭُّورْ أَذْ يَارْزُو، أَمشْنَاوْ أَمُورْ أَمزْوَارُو ذ ؤُمُورْ وِيسّْ ثْنَاينْ، ذِي ثْڭزَّانْثْ، مَاشَا يَارَّا ؤُذمْ نّسْ غَارْ ڒخْڒَا. ‏2 ؤُمِي إِسّْڭعّذْ ثَامُوغْڒِي نّسْ، إِژْرَا إِسْرَائِيل إِزْذغْ ذِينْ، عْلَاحْسَابْ ثِيقبَّاڒْ نّسْ، خنِّي يُوسَا-د أَرُّوحْ ن أَربِّي خَاسْ. ‏3 خنِّي إِبْذَا نتَّا أَوَاڒْ نّسْ إِوزْننْ، إِنَّا:

”أَوَاڒْ ن بَالْعَامْ، مِّيسْ ن بَاعُورْ،

أَوَاڒْ ن ورْيَازْ إِجهْذنْ، ونِّي ؤُمِي ثقّنْ ثِيطّْ،

‏4 إِجّْ ن وَاوَاڒْ ن ونِّي إِسْڒِينْ أَوَاڒنْ ن أَربِّي،

ذ ونِّي، أَمْ إِخزَّارْ ثَامژْرِيوْثْ ن ؤُمْزمَّارْ خْ كُوڒْشِي،

إِوْضَانْ أَمْ ذ أَسْ تّْوَارزْمنْثْ ثِيطَّاوِينْ.

‏5 أَ يَاعْقُوبْ، مشْحَاڒْ صبْحنْ إِقِيضَانْ نّكْ

ذ ثْزذِّيغِينْ نّكْ، أَ إِسْرَائِيل!

‏6 أَمشْنَاوْ ثِيغْزُورِينْ إِتّْوَاسْوِيژّْضنْ،

أَمشْنَاوْ أَغمُّويْ إِشوَّارنْ أَكْ-ذ يغْزَارْ،

أَمشْنَاوْ أَشْفِيڒْ نِّي إِژُّو سِيذِي،

أَمشْنَاوْ ثِيشجِّيرَا ن ثنْڭلْثْ زَّاثْ إِ وَامَانْ. ^▫  

‏7 زڭْ إِپُوقَاڒنْ نّسْ أَذْ سِّيزّْڒنْ وَامَانْ

ؤُشَا زَّارِيعثْ نّسْ أَذْ ثِيڒِي ذِي ثُوفّثْ.

أَجدْجِيذْ نّسْ أَذْ إِتّْوَاسْڭعّذْ خْ أَجَاجْ

ؤُ ثَاڭلْذِيثْ نّسْ أَذْ ثتّْوَاسُوعْڒَا.

‏8 أَربِّي إِسُّوفّغْ إِ-ث-إِ-د زِي مِيصْرَا.

جّهْذْ نّسْ أَمشْنَاوْ أَشَّاونْ ن ؤُفُونَاسْ ن ڒخْڒَا.

أَذْ يشّْ ڒڭْنُوسْ، إِغْرِيمنْ نّسْ،

أَذْ إِڒْبزْ إِغُوسَّانْ نْسنْ

ؤُشَا أَذْ ثنْ إِسّْنُوقّبْ س فْڒِيثْشَاثْ نّسْ. ^▪  

‏9 أَقَا إِغْنسْ،

إِسِّيزّڒْ إِخفْ نّسْ أَمشْنَاوْ أَيْرَاذْ، أَمشْنَاوْ ثَايْرَاذْثْ.

وِي ث إِ د غَا إِسّكَّارنْ؟

ونِّي شكْ إِ غَا إِبَاركْ، أَذْ إِتّْوَابَاركْ

ؤُ ونِّي شكْ غَا إِنْعڒْ، أَذْ يِيڒِي إِتّْوَانْعڒْ!‘ “^▪  

‏10 خنِّي يَارْغَا ؤُخيّقْ ن بَالَاكْ خْ بَالْعَامْ. إِوْثَا نتَّا ذڭْ إِفَاسّنْ نّسْ ؤُشَا بَالَاكْ إِنَّا إِ بَالْعَامْ: ”أَقَا ڒَاغِيغْ-د شكْ مَاحنْذْ أَذْ ثْنعْڒذْ ڒْعذْيَانْ إِنُو، مَاشَا خْزَارْ، أَقَا ثْبَارْكذْ إِ-ثنْ عَاذْ نِيشَانْ ثْڒَاثَا ن إِمُورنْ!

‏11 خنِّي ڒخُّو، أَرْوڒْ غَارْ ومْشَانْ نّكْ! نشّْ نِّيغْ أَشْ ث، أَذْ شكْ شنّْعغْ أَطَّاسْ، مَاشَا خْزَارْ، سِيذِي إِمْنعْ خَاكْ شّنْعثْ نِّي!“

‏12 خنِّي إِنَّا بَالْعَامْ إِ بَالَاكْ: ”مَا وَارْ سِّيوْڒغْ أَكْ-ذ إِرقَّاسنْ نِّي ذ أَيِي-د ثْسّكّذْ ؤُشَا نِّيغْ:

‏13 ’وَاخَّا بَالَاكْ أَذْ أَيِي إِوْشْ ثَادَّارْثْ نّسْ ثشُّورْ س نُّوقَارْثْ ذ وُورغْ، خنِّي نشّْ عَاذْ وَارْ زْمِيرغْ أَذْ عذِّيغْ خْ ڒُومُورْ ن سِيذِي مَاحنْذْ أَذْ ڭّغْ شَا ن ڒْحَاجّثْ ن ڒْخَارْ نِيغْ ن ڒْغَارْ إِ د-إِتّفّْغنْ زڭْ وُوڒْ إِنُو. مِينْ إِ غَا يِينِي سِيذِي، أَذْ ث إِنِيغْ.‘ ^▪  

‏14 ڒخُّو خنِّي، خْزَارْ، نشّْ أَذْ د-ذوْڒغْ غَارْ ڒْڭنْسْ إِنُو. أَسْ-د، نشّْ أَذْ شكْ سَّارڭْبغْ خْ ڒفْهَامثْ ؤُشَا أَذْ أَشْ إِنِيغْ مِينْ ذ أَشْ غَا يڭّْ ڒْڭنْسْ-أَ ذڭْ ؤُنڭَّارْ ن وُوسَّانْ.“

‏15 خنِّي إِبْذَا نتَّا أَوَاڒْ إِوزْننْ نّسْ، إِنَّا:

”أَوَاڒْ ن بَالْعَامْ، مِّيسْ ن بَاعُورْ،

أَوَاڒْ ن ورْيَازْ إِجهْذنْ، ونِّي ؤُمِي ثقّنْ ثِيطّْ!

‏16 ثَاوَاڒْثْ ن ونِّي إِسْڒِينْ أَوَاڒنْ ن أَربِّي،

ذ ونِّي إِسّْننْ زِي ثُوسّْنَا ن ونِّي ذ أَمْعُودْجِي خْ كُوڒْشِي،

ذ ونِّي، أَمْ إِخزَّارْ ثَامژْرِيوْثْ ن ؤُمْزمَّارْ خْ كُوڒْشِي،

إِوْضَانْ أَمْ ذ أَسْ تّْوَارزْمنْثْ ثِيطَّاوِينْ.

‏17 أَذْ ث ژَترْغْ، وَارْ إِدْجِي ڒخُّو،

أَذْ ث ثْوَاڒِيغْ، مَاشَا وَارْ إِدْجِي زِي ڒَاذَاسثْ.

أَذْ د-إِفّغْ إِثْرِي زِي يَاعْقُوبْ

ؤُشَا أَذْ ثكَّارْ ثغَّارْشْثْ ن ڒْحَاكمْ زِي إِسْرَائِيل،

ونِّي إِ غَا إِڒبْزنْ إِغزْذِيسنْ ن ؤُزدْجِيفْ ن مُوآبَ

ؤُشَا أَذْ إِڒْبزْ مَارَّا ثَارْوَا ن سّْذعْ ^▪  

‏18 ؤُشَا أَذْ إِتّْوَاطّفْ إِذُومْ ذ أَرْهَانْ

ؤُ سَاعِيرْونِّي ذ ڒعْذُو نّسْ، أَذْ ث طّْفنْ ذ ڒْوَارْثْ،

ؤُشَا أَمُّو إِ غَا إِڭّْ إِسْرَائِيل س ثَارْيَاسْثْ.

‏19 ؤُ ونِّي ذ إِ غَا إِفّْغنْ زِي يَاعْقُوبْ ڭُّورْ أَذْ إِحْكمْ

ؤُ نتَّا أَذْ إِسّْهلّكْ إِنِّي إِتّْوَاسْنجْمنْ زِي ثنْذِينْثْ.“ ^▪  

‏20 ؤُمِي نتَّا إِژْرَا عَامَالِيقْ، إِبْذَا أَوَاڒْ إِوزْننْ نّسْ، إِنَّا:

”عَامَالِيقْ ذ أَمزْوَارُو ن ڒڭْنُوسْ،

مَاشَا أَنڭَّارُو نّسْ أَذْ إِذْوڒْ ذ أَهلّكْ!“

‏21 ڒَامِي إِژْرَا إِقِينِييّنْ، إِبْذَا نتَّا أَوَاڒْ إِوزْننْ نّسْ، إِنَّا:

”ثَازذِّيغْثْ نّكْ ثمْثنْ

ؤُشَا ثڭِّيذْ ڒْعُوشّْ نّكْ ذِي ثصْضَارْثْ.

‏22 عَاذْ قَايِينْ أَذْ إِتّْوَاكتّفْ.

أَڒْ مڒْمِي إِزمَّارْ أَذْ أَشْ د-يَاوِي أَشُّورْ ذ أَمحْپُوسْ؟“

‏23 ؤُشَا إِبْذَا نتَّا أَوَاڒْ إِوزْننْ نّسْ، إِنَّا:

”أَيْ، وِي إِ غَا إِقِّيمنْ إِدَّارنْ خْمِي إِ غَا يڭّْ أَربِّي أَيَا؟

‏24 إِغَارُّوبَا زِي جّْوَايهْ ن كِيتِّيمْ أَذْ غزَّانْ أَشُّورْ

ؤُشَا أَذْ غزَّانْ عَاوذْ خْ عَابِيرْ

ؤُ نتَّا أَذْ إِتّْوَاثحَّا.“ ^▫  

‏25 إِكَّارْ بَالْعَامْ ؤُشَا يُويُورْ ؤُشَا إِذْوڒْ غَارْ ومْشَانْ نّسْ ن ثْزذِّيغْثْ. ؤُڒَا ذ بَالَاكْ إِطّفْ أَبْرِيذْ نّسْ.