‏1 خنِّي إِنَّا بَالْعَامْ إِ بَالَاكْ: ”بْنَا سبْعَا ن إِعَالْطَارنْ ذَانِيثَا إِ نشّْ ؤُشَا سوْجذْ أَيِي سبْعَا ن إِينْذُوزنْ ذ سبْعَا ن إِشَارِّييّنْ.“ ‏2 بَالَاكْ إِڭَّا أَمْ مَامّشْ ذ أَسْ إِنَّا بَالْعَامْ ؤُشَا بَالَاكْ ذ بَالْعَامْ قدّْمنْ إِجّْ ن ؤُينْذُوزْ ذ إِجّْ ن إِشَارِّي خْ كُوڒْ إِجّْ ن ؤُعَالْطَارْ. ‏3 خنِّي بَالْعَامْ إِنَّا إِ بَالَاكْ: ”بدّْ ذِينْ زَّاثْ إِ ثْغَارْصْثْ ن وشْمَاضْ نّكْ، خنِّي نشّْ أَذْ رَاحغْ. أَذْ ثَاغْ أَكْ كِيذِي إِمْسَاڭَارْ سِيذِي ؤُشَا مَانْ أَوَاڒْ نِّي ذ أَيِي غَا إِسّْشنْ، نشّْ أَذْ أَشْ ث-إِ-د-سَّارْڭْبغْ.“ خنِّي إِرُوحْ بَالْعَامْ غَارْ ثْقِيشَّاثْ ذ ثَاقشَّارْثْ ن وذْرَارْ.

‏4 ؤُ أَربِّي إِمّڒْقَا أَكْ-ذ بَالْعَامْ ؤُشَا نتَّا إِنَّا أَسْ: ”أَقَا سّْڭعّْذغْ سبْعَا ن إِعَالْطَارنْ ؤُشَا قدّْمغْ إِجّْ ن ؤُينْذُوزْ ذ إِجّْ ن إِشَارِّي خْ كُوڒْ إِجّْ ن ؤُعَالْطَارْ.“ ‏5 خنِّي إِڭَّا سِيذِي إِجّْ ن وَاوَاڒْ ذڭْ ؤُقمُّومْ ن بَالْعَامْ ؤُشَا إِنَّا: ”ذْوڒْ غَارْ بَالَاكْ ؤُشَا سِيوڒْ أَكِيذسْ أَمُّو.“

‏6 ؤُشَا ؤُمِي غَارسْ-د إِذْوڒْ، خْزَارْ، إِبدّْ زَّاثْ إِ ثْغَارْصْثْ ن وشْمَاضْ نّسْ، جْمِيعْ أَكْ-ذ ڒْحُوكَّامْ ن مُوآبَ. ‏7 خنِّي إِبْذَا إِقَّارْ أَوَاڒْ نّسْ إِوزْننْ، إِنَّا:

”زِي أَرَامْ إِنْذهْ أَيِي-د بَالَاكْ، أَجدْجِيذْ ن مُوآبَ،

زڭْ إِذُورَارْ ن شَّارْقْ، إِنَّا:

’أَسْ-د، نْعڒْ أَيِي يَاعْقُوبْ،

أَسْ-د، زَاوَارْ إِسْرَائِيل!‘

‏8 مَاشَا مَامّشْ إِ غَا نعْڒغْ،

ونِّي وَارْ إِتّْوَانعْڒنْ زِي أَربِّي،

ؤُ مَامّشْ إِ غَا زَاوَارغْ

ونِّي وَارْ إِزَاوَارْ سِيذِي؟

‏9 مِينْزِي زِي ثْقِيشَّاثْ ن ثْصُوضَارْ ثْوَاڒِيغْ ث

ؤُشَا زِي ثِيوْرِيرِينْ خزَّارغْ ذَايسْ.

أَقَا وَا ذ إِجّْ ن ڒْڭنْسْ إِزدّْغنْ وحّْذسْ

ؤُ وَارْ إِحسّبْ إِخفْ نّسْ جَارْ ڒڭْنُوسْ. ^▪  

‏10 وِي إِ غَا إِحسْبنْ أَشَاڒْ ن يَاعْقُوبْ

نِيغْ وِي إِ غَا إِحسْبنْ ڒْقدّْ ن أَرْبعْ زِي إِسْرَائِيل؟

أجّْ أَذْ إِمّثْ ڒعْمَارْ إِنُو ڒْموْثْ ن إِمْسڭَّاذنْ

ؤُ أجّْ عَاوذْ أَذْ يِيڒِي ؤُنڭَّارْ ن ثُوذَارْثْ إِنُو أَذْ إِمْقُودَّا أَكِيذسْ!“

‏11 ؤُشَا خنِّي بَالَاكْ إِنَّا إِ بَالْعَامْ: ”مِينْ ذ أَيِي ثڭِّيذْ؟ نشّْ إِوْيغْ شكْ حِيمَا أَذْ ثْنعْڒذْ ڒْعذْيَانْ إِنُو، مَاشَا خْزَارْ، أَقَا نِيشَانْ ثْبَارْكذْ ثنْ!“

‏12 نتَّا يَارَّا-د، إِنَّا: ”مَا وَارْ إِتّْخصِّي أَذْ حْضِيغْ مَاحنْذْ أَذْ سِّيوْڒغْ مِينْ إِڭَّا سِيذِي ذڭْ ؤُقمُّومْ إِنُو؟“

‏13 خنِّي إِنَّا بَالَاكْ: ”تّْزَاوْڭغْ شكْ أَذْ د-ثَاسذْ أَكِيذِي غَارْ إِجّْ ن ومْشَانْ نّغْنِي زِي مَانِيسْ إِ غَا ثْژَارذْ ڒْڭنْسْ عَاوذْ. أَذْ ثْژَارذْ طّْرُوفَا نّسْ وَاهَا، وَارْ ث ثْژَارّذْ مَارَّا. سّنِّي أَذْ ث ثْنعْڒذْ ذِي طّْوعْ إِنُو!“

‏14 ؤُشَا يِيوْيِي إِ-ث غَارْ ڒوْضَا ن صُوفِيمْ خْ ثْقِيشَّاثْ ن فِيسْجَا ؤُشَا إِبْنَا ذِينْ سبْعَا ن إِعَالْطَارنْ ؤُشَا خْ كُوڒْ إِجّْ ن ؤُعَالْطَارْ إِقدّمْ ذِينْ إِجّْ ن ؤُينْذُوزْ ذ إِجّْ ن إِشَارِّي.

‏15 نتَّا إِنَّا إِ بَالَاكْ: ”مَاڒَا شكْ أَذْ ثْبدّذْ ذَا زَّاثْ إِ ثْغَارْصْثْ ن وشْمَاضْ نّكْ، خنِّي نشّْ أَذْ كِيسْ مّْسَاڭَارغْ ذِينْ.“

‏16 ؤُشَا إِمْسَاڭَارْ سِيذِي أَكْ-ذ بَالْعَامْ ؤُشَا إِڭَّا إِجّْ ن وَاوَاڒْ ذڭْ ؤُقمُّومْ نّسْ، إِنَّا: ”ذْوڒْ غَارْ بَالَاكْ ؤُشَا إِنِي أَسْ أَمُّو.“ ^▪  

‏17 ؤُشَا نتَّا يُوسَا-د غَارسْ، ؤُ خْزَارْ، نتَّا ثُوغَا إِبدّْ زَّاثْ إِ ثْغَارْصْثْ ن وشْمَاضْ نّسْ ؤُشَا ڒْحُوكَّامْ ن مُوآبَ بدّنْ زَّاثسْ. إِنَّا أَسْ بَالَاكْ: ”مِينْ إِنَّا سِيذِي؟“

‏18 خنِّي إِبْذَا نتَّا أَوَاڒْ نّسْ إِوزْننْ، إِنَّا:

”كَّارْ، بَالَاكْ، سْحسّْ!

سڒْ غَارِي، شكْ، مِّيسْ ن صِيفُّورْ!

‏19 أَربِّي وَارْ إِدْجِي ذ مِّيسْ ن بْنَاذمْ، مَاحنْذْ زعْمَا أَذْ إِسّْخَارِّيقْ،

نِيغْ ذ مِّيسْ ن بْنَاذمْ مَاحنْذْ زعْمَا أَذْ ث إِڒْقفْ ونْذَامْ.

مَا أَذْ يِينِي ؤُشَا وَارْ ت إِتّڭّْ،

نِيغْ أَذْ إِسِّيوڒْ ؤُشَا وَارْ ت إِتّْكمِّيڒْ؟ ^▪  

‏20 خْزَارْ، أَقَا طّْفغْ ڒُومُورْ حِيمَا أَذْ بَارْكغْ.

ؤُمِي إِبَاركْ نتَّا،

نشّْ وَارْ زمَّارغْ أَذْ د-أَرّغْ أَيَا.

‏21 وَارْ إِتّْوِيڒِي ڒْمُوعْصِييّثْ ن يَاعْقُوبْ

ؤُ أَرْبرْ ن إِسْرَائِيل وَارْ ث إِژَارْ.

سِيذِي، أَربِّي نّسْ، أَقَا-ث أَكِيذسْ

ؤُشَا أَصُوضِي سْ وسْرُودّحْ ذِي ڒْپُوقْ ذِي طّْوعْ ن ؤُجدْجِيذْ أَقَا-ث ذَايسْ. ^▪  

‏22 أَربِّي إِسُّوفغْ إِ-ثنْ-د زِي مِيصْرَا.

نتَّا إِ نِيثْنِي أَمْ وَاشَّاونْ ن ؤُفُونَاسْ ن ڒخْڒَا. ^▪  

‏23 أَقَا زعْمَا وَارْ ذِينْ أَڭزّنْ ذِي يَاعْقُوبْ

ؤُ وَارْ ذِينْ أَعزّمْ ذِي إِسْرَائِيل.

ثَا ذ ڒْوقْثْ إِ ذِي ثتّْوَانَّا خْ يَاعْقُوبْ ذ إِسْرَائِيل:

’أَقَا خْزَارْ، مِينْ إِڭَّا أَربِّي!‘

‏24 أَقَا ذَا، ڒْڭنْسْ أَذْ إِكَّارْ أَمشْنَاوْ إِشْثْ ن ثيْرَاذْثْ

ؤُ أَذْ د-إِڭعّذْ أَمْ ويْرَاذْ.

وَارْ إِسّزّڒْ إِخفْ نّسْ أَڒْ غَا يشّْ ثَايْمَارْثْ نّسْ

ؤُشَا أَذْ إِسُّو إِذَامّنْ ن مِينْ إِمزّقْ.“ ^▫  

‏25 خنِّي بَالَاكْ إِنَّا إِ بَالْعَامْ: ”مَاڒَا خنِّي وَارْ ثخْسذْ قَاعْ أَذْ ث ثْنعْڒذْ، وَارْ ث تّْبَارَاكْ شَا عَاوذْ.“

‏26 بَالْعَامْ يَارَّا-د ؤُشَا إِنَّا إِ بَالَاكْ: ”مَا وَارْ ذ أَشْ نِّيغْ: ’مَارَّا مِينْ ذ أَيِي غَا يِينِي سِيذِي، أَذْ ث ڭّغْ؟‘ “

‏27 خنِّي إِنَّا بَالَاكْ إِ بَالْعَامْ: ”تّْزَاوْڭغْ شكْ أَذْ د-ثَاسذْ، أَذْ شكْ أَوْيغْ غَارْ إِجّْ ن ومْشَانْ نّغْنِي. أَذْ ثَاغْ أَذْ يِيڒِي نِيشَانْ ذِي ثِيطَّاوِينْ ن أَربِّي مَاڒَا أَذْ ث ثْنعْڒذْ سّنِّي ذِي طّْوعْ إِنُو.“ ‏28 ؤُشَا بَالَاكْ إِنْذهْ بَالْعَامْ غَارْ ثْقِيشَّاثْ ن فَاغُورْ نِّي إِخزَّارنْ غَارْ ثْنزْرُوفْثْ. ‏29 خنِّي بَالْعَامْ إِنَّا إِ بَالَاكْ: ”بْنَا ذَانِيثَا سبْعَا ن إِعَالْطَارنْ ؤُشَا سوْجذْ أَيِي ذَانِيثَا سبْعَا ن إِينْذُوزنْ ذ سبْعَا ن إِشَارِّييّنْ.“ ‏30 بَالَاكْ إِڭَّا أَمْ مَامّشْ ذ أَسْ إِنَّا بَالْعَامْ ؤُشَا خْ كُوڒْ إِجّْ ن ؤُعَالْطَارْ إِقدّمْ ذِينْ إِجّْ ن ؤُينْذُوزْ ذ إِجّْ ن إِشَارِّي.