‏1 إِنَّا سِيذِي إِ هَارُونْ:

”شكْ ذ إِحنْجِيرنْ نّكْ ذ ثَادَّارْثْ ن بَابَاشْ أَكِيذكْ، أَذْ ثَارْپُومْ ڒْمُوعْصِييّثْ ن زَّاوشْثْ إِقدّْسنْ نْومْ. شكْ ذ إِحنْجِيرنْ نّكْ أَكِيذكْ أَذْ أَرْپُونْ ڒْمُوعْصِييّثْ ن ثُوكهَّانْثْ نْومْ. ‏2 أَذْ د-ثسّْقَارّْبذْ ؤُڒَا ذ أَيْثْمَاشْ، ثَاقْبِيتْشْ ن لَاوِي، ثَاقْبِيتْشْ ن بَابَاشْ. نِيثْنِي أَذْ د-مَّارنْينْ غَاركْ، أَذْ أَشْ سخَّارنْ، مَاشَا شكْ، جْمِيعْ أَكْ-ذ إِحنْجِيرنْ نّكْ، أَذْ ثْسخَّارذْ زَّاثْ إِ وُوذمْ ن ؤُقِيضُونْ ن شّْهَاذثْ. ‏3 أَذْ طّْفنْ أَشْبَارْ نّكْ ؤُشَا أَذْ حْضَانْ خْ مَارَّا أَقِيضُونْ، مَاشَا وَارْ زمَّارنْ أَذْ د-قَارّْبنْ غَارْ ڒقْشُوعْ ن زَّاوشْثْ إِقدّْسنْ ؤُ غَارْ ؤُعَالْطَارْ حِيمَا وَارْ تّْمتِّينْ، وَارْ إِدْجِي ڒَا ذ نِيثْنِي ؤُڒَا ذ كنِّيوْ. ‏4 إِتّْخصَّا أَسنْ أَذْ مَّارنْينْ غَاركْ ؤُشَا أَذْ طّْفنْ أَشْبَارْ خْ ؤُقِيضُونْ ن ؤُمْسَاڭَارْ ؤُ خْ مَارَّا ثَاسخَّارْثْ ن ؤُقِيضُونْ. ونِّي وَارْ غَارْ إِدْجِي تّسْڒِيحْ وَارْ إِزمَّارْ أَذْ غَارْومْ-د إِقَارّبْ. ‏5 أَذْ ثطّْفمْ أَشْبَارْ خْ زَّاوشْثْ إِقدّْسنْ ؤُڒَا خْ ؤُعَالْطَارْ، حِيمَا وَارْ د-إِتِّيسْ عَاذْ ؤُذُوقّزْ ن وغْضَابْ خْ أَيْثْ ن إِسْرَائِيل. ‏6 نشّْ، أَقَا ذَا نشّْ، كْسِيغْ أَوْمَاثنْ نْومْ، إِلَاوِييّنْ، زِي جَارْ ڒْوسْثْ ن أَيْثْ ن إِسْرَائِيل. أَقَا نِيثْنِي أَمْ إِشْثْ ن ثوْهِيبْثْ إِ كنِّيوْ، ثنِّي إِتّْوَاوهْبنْ إِ سِيذِي مَاحنْذْ أَذْ سخَّارنْ نِيثْنِي ذڭْ ؤُقِيضُونْ ن ؤُمْسَاڭَارْ. ^▪   ‏7 مَاشَا شكْ ذ إِحنْجِيرنْ نّكْ أَكِيذكْ أَذْ ثطّْفمْ ثُوكهَّانْثْ نْومْ ذِي مَارَّا مِينْ إِقّْننْ أَكْ-ذ ؤُعَالْطَارْ ذ مِينْ إِدْجَانْ ذَاخڒْ إِ ؤُڒحَّافْ ؤُشَا أَمُّو أَذْ ثْسخَّارمْ كنِّيوْ. نشّْ أَذْ أَومْ وْشغْ ثُوكهَّانْثْ ذ ثْسخَّارْثْ أَمشْنَاوْ إِشْثْ ن ثرْزفْثْ. ونِّي د غَا إِقَارّْبنْ مَاڒَا وَارْ غَارسْ بُو تّسْرِيحْ، أَذْ إِتّْوَانغْ.“

‏8 إِسِّيوڒْ سِيذِي أَكْ-ذ هَارُونْ:

”نشّْ، خْزَارْ، أَقَا ذ نشّْ إِ ذ أَشْ إِوْشِينْ حطُّو خْ ثوْهِيبِينْ ن ؤُسْڭعّذْ إِنِّي إِتّْوَاقدّْمنْ إِ نشّْ. نشّْ وْشِيغْ ثنْثْ أَكْ-ذ مَارَّا ثِيمسْڒَايِينْ ثِيمْقدَّاسِينْ ن أَيْثْ ن إِسْرَائِيل أَمْ ثسْغَارْثْ إِتّْوَاسْذهْننْ إِ شكْ ؤُ إِ إِحنْجِيرنْ نّكْ، أَمْ إِشْثْ ن ثوْصيّثْ إِ ڒبْذَا. ‏9 وَا أَذْ يِيڒِي نّكْ زِي مَارَّا ثِيمسْڒَايِينْ إِقدّْسنْ قَاعْ زِي ثْمسِّي: كُوڒْ ثَاوْهِيبْثْ نْسنْ إِ كُوڒْ ثَاوْهِيبْثْ نْسنْ ن ڒْغِيدْجثْ، إِ كُوڒْ ثَاغَارْصْثْ نْسنْ ن دّنْبْ، ؤُ إِ كُوڒْ ثَاغَارْصْثْ نْسنْ ن ؤُمَارْوَاسْ نِّي ذ أَيِي د غَا يَارّنْ. وَا أَذْ يِيڒِي ذ أَمْقدَّاسْ قَاعْ إِ شكْ ؤُ إِ إِحنْجِيرنْ نّكْ.

‏10 أَذْ ثشّذْ أَيَا ذڭْ إِجّْ ن ومْشَانْ ذ أَمْقدَّاسْ قَاعْ. كُوڒْ أَوْثمْ أَذْ زَّايسْ يشّْ. أَيَا أَذْ يِيڒِي ذ أَمْقدَّاسْ إِ كنِّيوْ.

‏11 عَاوذْ ذ مَانْ أَيَا أَذْ يِيڒِي إِ شكْ: ثَاوْهِيبْثْ ن ؤُسْڭعّذْ ن ثوْهِيبْثْ نْسنْ أَكْ-ذ مَارَّا ثِيوْهِيبِينْ ن ونْهزِّي ن أَيْثْ ن إِسْرَائِيل. وْشِيغْ ثنْثْ إِ شكْ ؤُ إِ وَارَّاونْ نّكْ ذ ثَارَّاوِينْ نّكْ إِنِّي أَكِيذكْ إِدْجَانْ. أَقَا-ت ذ إِشْثْ ن ثوْصيّثْ إِ ڒبْذَا. كُوڒْ إِجّنْ ذِي ثَادَّارْثْ نّكْ نِّي إِدْجَانْ ذ أَمزْذَاڭْ، أَذْ زَّايْسنْثْ يشّْ. ^▪  

‏12 مِينْ إِدْجَانْ مْخيَّارْ ن زّشْثْ ذ مِينْ إِدْجَانْ مْخيَّارْ ن بِينُو ن جْذِيذْ ؤُ زڭْ إِرْذنْ، ذ ثَامزْوَارُوثْ إِ زَّايْسنْ أَذْ وْشنْ إِ سِيذِي، أَقَا وْشِيغْ أَشْ ت.

‏13 ثَامنْزُوثْ ن مَارَّا مِينْ إِدْجَانْ خْ ثمُّورْثْ نْسنْ، إِنِّي د غَا يَاوْينْ غَارْ سِيذِي، أَقَا مَارَّا مَانْ أَيَا أَذْ يِيڒِي إِ شكْ. كُوڒْ إِجّنْ ونِّي إِدْجَانْ ذ أَمزْذَاڭْ ذِي ثَادَّارْثْ نّكْ، إِزمَّارْ أَذْ زَّايسْ يشّْ.

‏14 مَارَّا مِينْ إِتّْوَاحَارّْمنْ إِ سِيذِي ذِي إِسْرَائِيل، أَذْ يِيڒِي نّكْ. ^▪  

‏15 مَارَّا مِينْ يَارزْمنْ ڒمْڒَاوَاثْ ذ أَمزْوَارُو جَارْ مَارَّا أَيْسُومْ إِ غَا قدّْمنْ إِ سِيذِي، زِي بْنَاذمْ نِيغْ زِي ڒبْهِيمثْ، أَذْ يِيڒِي نّكْ. مَاشَا أَذْ ثفْذِيذْ قَاعْ أَمنْزُو ن إِوْذَانْ ؤُشَا إِتّْخصَّا عَاوذْ أَذْ ثفْذِيذْ أَمنْزُو ن ڒبْهَايمْ إِخمْجنْ. ^▪  

‏16 وِي زَّايْسنْ إِ غَا تّْوَافْذِينْ، أَذْ تّْوَافْذِينْ ذ مِّيسْ ن إِجّْ ن ؤُيُورْ عْلَاحْسَابْ ڒْقِيمثْ إِ ثْقدَّارذْ شكْ ذِي نُّوقَارْثْ، خمْسَا ن إِشِيقْلنْ عْلَاحْسَابْ أَشِيقْلْ ن زَّاوشْثْ إِقدّْسنْ، ونِّي إِدْجَانْ عِيشْرِينْ ن ’إِجِيرَاثْ‘. ^▪  

‏17 مَاشَا أَمنْزُو ن ؤُفُونَاسْ ذ ؤُمنْزُو ن ؤُحُوڒِي ذ ؤُمنْزُو ن إِغَايْضْ، وَارْ ث ثْفذِّيمْ شَا. أَقَا أَثنْ ذ إِمْقدَّاسِينْ. أَذْ ثْزدْجْعذْ إِذَامّنْ نْسنْ خْ ؤُعَالْطَارْ ؤُ ثَاذُونْثْ نْسنْ أَذْ ت ثسّْبخَّارذْ أَمْ ثوْهِيبْثْ ن ثْمسِّي، أَمْ إِشْثْ ن ڒفْوَاحثْ إِتّْفُوحنْ إِ سِيذِي.

‏18 أَيْسُومْ نّسْ أَذْ يِيڒِي نّكْ، أَمْ إِذْمَارنْ ن ونْهزِّي ؤُڒَا ذ أَشكْرُوذْ أَفُوسِي أَذْ إِڒِينْ نّكْ.

‏19 مَارَّا ثِيوْهِيبِينْ ن ؤُسْڭعّذْ زِي ثْمسْڒَايِينْ ثِيمْقدَّاسِينْ نِّي إِ غَا سّْڭعّْذنْ أَيْثْ ن إِسْرَائِيل إِ سِيذِي، وْشِيغْ ثنْثْ إِ شكْ ؤُ إِ إِحنْجِيرنْ نّكْ ذ ثْحنْجِيرِينْ نّكْ إِنِّي أَكِيذكْ إِدْجَانْ. أَقَا-ث ذ إِشْثْ ن ثوْصيّثْ إِ ڒبْذَا، أَذْ يِيڒِي ذ إِجّْ ن ڒْعَاهْذْ س ڒمْڒَاحثْ إِ ڒبْذَا زَّاثْ إِ وُوذمْ ن سِيذِي، إِ شكْ ؤُ إِ زَّارِيعثْ نّكْ نِّي أَكِيذكْ إِدْجَانْ.“

‏20 إِنَّا سِيذِي إِ هَارُونْ:

”وَارْ ثتّطّْفذْ ذ ڒْوَارْثْ ذِي ثمُّورْثْ نْسنْ ؤُ وَارْ غَاركْ ثتِّيڒِي بُو ثسْغَارْثْ ذِي ڒْوسْثْ نْسنْ. نشّْ ذ ثَاسْغَارْثْ نّكْ ذ ڒْوَارْثْ نّكْ ذِي ڒْوسْثْ ن أَيْثْ ن إِسْرَائِيل. ^▪   ‏21 خْزَارْ، نشّْ وْشِيغْ إِ أَيْثْ ن لَاوِي مَارَّا ڒعْشُورْ ذِي إِسْرَائِيل ذ ڒْوَارْثْ ذِي طّْوعْ ن ثْسخَّارْثْ نِّي ڭِّينْ نِيثْنِي، ثَاسخَّارْثْ ن ؤُقِيضُونْ ن ؤُمْسَاڭَارْ. ‏22 أَيْثْ ن إِسْرَائِيل وَارْ د-تّْقَارّْبنْ عَاذْ غَارْ ؤُقِيضُونْ ن ؤُمْسَاڭَارْ حِيمَا وَارْ د-ثِيوْينْ أَمُّو دّنْبْ خْ يِيخفْ نْسنْ ؤُشَا أَذْ مّْثنْ. ‏23 مَاشَا إِلَاوِييّنْ أَذْ سخَّارنْ ذِي ثْسخَّارْثْ ن ؤُقِيضُونْ ن ؤُمْسَاڭَارْ ؤُشَا أَذْ أَرْپُونْ ڒْمُوعْصِييّثْ نْسنْ. أَقَا-ت ذ إِشْثْ ن ثوْصيّثْ إِ ڒبْذَا إِ مَارَّا جِّيڒَاثْ نْومْ، أَقَا نِيثْنِي وَارْ تّطّْفنْ ڒْوَارْثْ ذِي ڒْوسْثْ ن أَيْثْ ن إِسْرَائِيل، ‏24 مِينْزِي ڒعْشُورْ ن أَيْثْ ن إِسْرَائِيل نِّي سّْڭعّْذنْ نِيثْنِي إِ سِيذِي أَمْ ثوْهِيبْثْ ن ؤُسْڭعّذْ، وْشِيغْ ثنْ إِ إِلَاوِييّنْ. س ؤُيَا نِّيغْ أَسنْ: ’وَارْ تّْوَارِيثنْ ذِي ڒْوسْثْ ن أَيْثْ ن إِسْرَائِيل!‘ “

‏25 إِسِّيوڒْ سِيذِي أَكْ-ذ مُوسَا، إِنَّا:

‏26 ”أَمُّو إِ غَا ثسِّيوْڒذْ أَكْ-ذ إِلَاوِييّنْ ؤُشَا أَذْ أَسنْ ثِينِيذْ: ’خْمِي ثكْسِيمْ ڒعْشُورْ ن أَيْثْ ن إِسْرَائِيل نِّي وْشِيغْ كنِّيوْ ذ ڒْوَارْثْ، خنِّي أَذْ زَّايْسنْ ثسّْڭعّْذمْ إِشْثْ ن ثوْهِيبْثْ ن ؤُسْڭعّذْ إِ سِيذِي، ڒعْشُورْ زِي ڒعْشُورْ. ‏27 أَذْ أَومْ د-ثتّْوَاحْسبْ أَمْ ثوْهِيبْثْ ن ؤُسْڭعّذْ، أَمْ إِرْذنْ ن ؤُنذْرَارْ ؤُ أَمْ ثشُّورثْ ن ثْسِيرْثْ ن ؤُضِيڒْ. ‏28 أَمُّو إِ ذَاومْ إِتّْخصَّا أَذْ ثسّْڭعّْذمْ إِشْثْ ن ثوْهِيبْثْ ن ؤُسْڭعّذْ إِ سِيذِي زِي مَارَّا ڒعْشُورْ نْومْ نِّي إِ غَا ثكْسِيمْ زڭْ أَيْثْ ن إِسْرَائِيل. إِتّْخصَّا أَذْ ثوْشمْ ثَاوْهِيبْثْ نِّي ثسّْڭعّْذمْ زَّايْسنْ إِ سِيذِي غَارْ ؤُكهَّانْ هَارُونْ. ‏29 زِي مَارَّا مِينْ ذ أَومْ غَا وْشنْ، أَذْ ثسّْڭعّْذمْ ثَاوْهِيبْثْ ن ؤُسْڭعّذْ ثْمُونْ إِ سِيذِي، زِي ڒمْخيَّارْ نّسْ، ثَاسْغَارْثْ نّسْ إِقدّْسنْ زَّايسْ.‘

‏30 ؤُشَا إِتّْخصَّا أَشْ أَذْ أَسنْ ثِينِيمْ: ’مَاڒَا ثكْسِيمْ زَّايسْ ڒمْخيَّارْ نّسْ، أَقَا أَيَا أَذْ د-إِتّْوَاحْسبْ ذ ڒْغِيدْجثْ ن ؤُنذْرَارْ ذ ڒْغِيدْجثْ ن ثْسِيرْثْ ن ؤُضِيڒْ إِ إِلَاوِييّنْ. ‏31 أَذْ ثشّمْ أَيَا ذِي كُوڒْ أَمْشَانْ، كنِّيوْ ذ أَيْثْبَابْ ن ثَادَّارْثْ نْومْ، مِينْزِي ثَا ذ ڒْمُونثْ إِ ثْسخَّارْثْ نْومْ ذڭْ ؤُقِيضُونْ ن ؤُمْسَاڭَارْ. ‏32 مَاڒَا أَذْ زَّايسْ ثكْسِيمْ مِينْ إِدْجَانْ حْسنْ، خنِّي وَارْ خَاومْ ثَاربُّومْ دّنْبْ. وَارْ إِعدّڒْ أَذْ ثْفسْذمْ ثِيوْهِيبِينْ ثِيمْقدَّاسِينْ ن أَيْثْ ن إِسْرَائِيل، حِيمَا وَارْ ثْمتِّيمْ شَا.‘ “