‏1 إِسِّيوڒْ سِيذِي أَكْ-ذ مُوسَا، إِنَّا:

‏2 ”إِنِي إِ أَلِيعَازَارْ، مِّيسْ ن ؤُكهَّانْ هَارُونْ، بلِّي أَذْ إِكْسِي ثِيمجْمَارِينْ زڭْ ؤُحَاذُوقْ ن ثْمسِّي ؤُشَا أَذْ إِسُّويسْ ڒفْحمْ إِتّحْذُوذُوقنْ ذِي ڒَاڭّْوَاجْ، مِينْزِي أَقَا نِيثنْثِي قدّْسنْثْ إِ دْجَانْثْ! ‏3 جّمْ أَسنْ أَذْ ثْكثْكنْ ثِيمجْمَارِينْ ن يرْيَازنْ نِّي ثُوغَا إِخطَّانْ ضِيدّْ إِ ڒعْمُورْ نْسنْ، ثِيڒْوِيحِينْ ذ ثِيزِيرَارِينْ إِ دُّورِي إِ ؤُعَالْطَارْ، مِينْزِي سّْقَارّْبنْ-د ثنْثْ زَّاثْ إِ وُوذمْ ن سِيذِي، س ؤُيَا إِ زِي تّْوَاقدّْسنْثْ. أَذْ إِڒِينْثْ ذ إِجّْ ن ؤُشيَّارْ إِ أَيْثْ ن إِسْرَائِيل. ‏4 خنِّي إِكْسِي ؤُكهَّانْ أَلِيعَازَارْ ثِيمجْمَارِينْ ن نّْحَاسْ نِّي د-سّْقَارّْبنْ إِنِّي إِتّْوَاشمْضنْ أَمْ ثوْهِيبْثْ، ؤُشَا ثْكثْكنْ ثنْثْ حِيمَا أَذْ زَّايْسنْثْ ذْڒنْثْ أَعَالْطَارْ، ‏5 إِ ڒِيذَارثْ إِ أَيْثْ ن إِسْرَائِيل، حِيمَا ؤُڒَا ذ إِجّْ ن ورْيَازْ نِّي وَارْ إِدْجِينْ زِي زَّارِيعثْ ن هَارُونْ، وَارْ د-إِتّْقَارِّيبْ شَا بْڒَا تّسْرِيحْ زَّاثْ إِ وُوذمْ ن سِيذِي، حِيمَا أَذْ إِسّْبخَّارْ ڒبْخُورْ مَاحنْذْ وَارْ ذ أَسْ إِڒْقفْ مِينْ إِڒقْفنْ قُورَاحْ ذ ؤُبَارُّو نّسْ، أَمْ مَامّشْ ثُوغَا إِسِّيوڒْ سِيذِي س ؤُقمُّومْ ن مُوسَا.

‏6 ثِيوشَّا نّسْ ثُوغَا مَارَّا ثَامسْمُونْثْ ن أَيْثْ ن إِسْرَائِيل ثتّْنذْقَامْ ضِيدّْ إِ مُوسَا ذ هَارُونْ، نَّانْ: ”كنِّيوْ ثنْغِيمْ ڒْڭنْسْ ن سِيذِي!“ ‏7 ؤُشَا ؤُمِي ثْمُونْ ثْمسْمُونْثْ ضِيدّْ إِ مُوسَا ذ هَارُونْ ؤُشَا بْذَانْ ؤُيُورنْ غَارْ ؤُقِيضُونْ ن ؤُمْسَاڭَارْ، خْزَارْ، أَقَا أَسيْنُو ونِّي ث إِذْڒِينْ ؤُشَا إِبَانْ-د ؤُعُودْجِي ن سِيذِي. ‏8 يُوسَا-د مُوسَا أَكْ-ذ هَارُونْ، بدّنْ زَّاثْ إِ ؤُقِيضُونْ ن ؤُمْسَاڭَارْ.

‏9 إِسِّيوڒْ سِيذِي أَكْ-ذ مُوسَا، إِنَّا:

‏10 ”كَّارمْ، أَڭّْوجمْ زِي ڒْوسْثْ ن ثْمسْمُونْثْ ؤُ نشّْ أَذْ ثنْ مْحِيغْ ذڭْ إِجّْ ن ورْمَاشْ ن وَابْڒِيونْ!“ خنِّي وْضَانْ خْ وُوذمْ نْسنْ.

‏11 إِنَّا مُوسَا إِ هَارُونْ: ”كْسِي ذغْيَا إِجّْ ن ڒْمجْمَارْ، أڭّْ خَاسْ ثِيمسِّي ن ؤُعَالْطَارْ ؤُشَا سَارْسْ خَاسْ ڒبْخُورْ. أَزّڒْ غَارْ ثْمسْمُونْثْ ؤُشَا فْذِي خَاسنْ، مِينْزِي إِفّغْ-د ؤُذُوقّزْ ن وغْضَابْ زِي زَّاثْ إِ وُوذمْ ن سِيذِي، أَقَا ذَا جّْرِيحشْثْ أَمْ ثبْذَا عَاذْ.“

‏12 إِكْسِي هَارُونْ ڒْمجْمَارْ، أَمْ مَامّشْ إِنَّا مُوسَا، ؤُشَا يُوزّڒْ غَارْ ڒْوسْثْ ن وڭْرَاوْ ن ڒْڭنْسْ، ؤُشَا خْزَارْ، جّْرِيحشْثْ ثُوغَا أَمْ ثبْذَا عَاذْ جَارْ ڒْڭنْسْ ؤُشَا نتَّا إِسَّارْسْ ذَايسْ ڒبْخُورْ ؤُشَا إِفْذِي خْ ڒْڭنْسْ. ^▫  

‏13 ثُوغَا إِبدّْ جَارْ إِمتَّانْ ذ إِمدَّارنْ ؤُشَا ثتّْوَاسْبدّْ جّْرِيحشْثْ.

‏14 وِي إِمُّوثنْ زِي جّْرِيحشْثْ ثُوغَا أَثنْ ذِي أَرْبعْطَاشْ-أَڒفْ ؤُ-سبْعَا-مْيَا، بْڒَا إِنِّي إِمُّوثنْ ذِي سِّيبّثْ ن قُورَاحْ.

‏15 إِذْوڒْ هَارُونْ غَارْ مُوسَا غَارْ وَاذَافْ ن ؤُقِيضُونْ ن ؤُمْسَاڭَارْ. أَقَا ثتّْوَاسْبدّْ جّْرِيحشْثْ.

‏16 إِسِّيوڒْ سِيذِي أَكْ-ذ مُوسَا، إِنَّا:

‏17 ”سِيوڒْ أَكْ-ذ أَيْثْ ن إِسْرَائِيل ؤُشَا كْسِي زَّايْسنْ إِجّْ ن وعْمُوذْ إِ كُوڒْ ثَادَّارْثْ ن إِبَابَاثنْ نْسنْ، زِي مَارَّا إِمْغَارنْ نْسنْ، عْلَاحْسَابْ لْعَاذَاذْ ن ثُوذْرِينْ ن إِبَابَاثنْ نْسنْ، ثنْعَاشْ ن إِعُومَاذْ. إِتّْخصَّا أَذْ ثَارِيذْ إِسمْ ن كُوڒْ إِجّْ زَّايْسنْ خْ وعْمُوذْ نّسْ.

‏18 أَذْ ثَارِيذْ إِسمْ ن هَارُونْ خْ وعْمُوذْ ن لَاوِي، مِينْزِي أَذْ ذِينْ يِيڒِي إِجّْ ن وعْمُوذْ إِ يِيجّْ ن ؤُزدْجِيفْ ن ثَادَّارْثْ ن إِبَابَاثنْ نْسنْ.

‏19 أَذْ ثنْ ثڭّذْ ذڭْ ؤُقِيضُونْ ن ؤُمْسَاڭَارْ، زَّاثْ إِ شّْهَاذثْ، مَانِي كِيذْومْ إِ غَا مْسَاڭَارغْ. ^▪   ‏20 خنِّي ڭُّورْ أَذْ إِمْسَارْ، أَقَا أَذْ إِنُووَّارْ وعْمُوذْ ن ورْيَازْ نِّي إِخْضَارغْ نشّْ ؤُشَا أَذْ سّْبدّغْ أَنذْقمْ ضِيدّْ إِنُو إِ زِي خَاومْ نّْذقْمنْ أَيْثْ ن إِسْرَائِيل.“

‏21 إِسِّيوڒْ مُوسَا أَكْ-ذ أَيْثْ ن إِسْرَائِيل ؤُشَا مَارَّا إِمْغَارنْ نْسنْ وْشِينْ إِجّْ ن وعْمُوذْ إِ مْكُوڒْ إِجّْ ن ؤُمْغَارْ، عْلَاحْسَابْ ڒْقدّْ ن ثُوذْرِينْ ن إِبَابَاثنْ نْسنْ، ثنْعَاشْ ن إِعُومَاذْ. ؤُشَا أَعْمُوذْ ن هَارُونْ ثُوغَا-ث جَارْ إِعُومَاذْ نْسنْ. ‏22 مُوسَا إِسَّارْسْ إِعُومَاذْ نِّي زَّاثْ إِ وُوذمْ ن سِيذِي ذڭْ ؤُقِيضُونْ ن شّْهَاذثْ. ‏23 ثِيوشَّا نّسْ إِمْسَارْ بلِّي يُوذفْ مُوسَا غَارْ ؤُقِيضُونْ ن شّْهَاذثْ، ؤُشَا خْزَارْ، أَعْمُوذْ ن هَارُونْ ذِي طّْوعْ ن ثَادَّارْثْ ن لَاوِي ثُوغَا إِڭَّا ثَامْرِيسْثْ ن ؤُغمُّويْ ؤُشَا ثَامْرِيسْثْ ثسُّوفّغْ-د ؤُشَا نُّووَّارْ نّسْ يَارْزمْ ؤُشَا يِيوِي-د دْجُوزْ يِيوْضنْ. ‏24 خنِّي إِسُّوفّغْ مُوسَا مَارَّا إِعُومَاذْ زِي زَّاثْ إِ وُوذمْ ن سِيذِي غَارْ مَارَّا أَيْثْ ن إِسْرَائِيل. ژْرِينْ أَيَا ؤُشَا طّْفنْ كُوڒْ إِجّْ أَعْمُوذْ نّسْ.

‏25 خنِّي إِنَّا سِيذِي إِ مُوسَا: ”أَرّْ أَعْمُوذْ ن هَارُونْ زَّاثْ إِ شّْهَاذثْ، أَذْ ث ثحْضِيذْ أَمْ إِجّْ ن ؤُشيَّارْ ضِيدّْ إِ ينِّي إِغوّْغنْ. أَمُّو إِ غَا ثسّْبدّذْ أَنذْقمْ نْسنْ ضِيدّْ إِنُو مَاحنْذْ نِيثْنِي وَارْ تّْمتِّينْ شَا.“ ^▪   ‏26 ؤُشَا إِڭَّا مُوسَا أَمْ مَامّشْ ذ أَسْ يُومُورْ سِيذِي، أَمُّو إِڭَّا نتَّا. ‏27 خنِّي سِّيوْڒنْ أَيْثْ ن إِسْرَائِيل أَكْ-ذ مُوسَا، نَّانْ: ”خْزَارْ، أَذْ زَّايْنغْ إِفّغْ بُوحْبڒْ، أَذْ نتّْوَاهلّكْ، أَذْ نتّْوَاهلّكْ مَارَّا نشِّينْ! ‏28 مَانْ ونْ مَا إِ د غَا إِقَارّْبنْ غَارْ ؤُقِيضُونْ ن سِيذِي، أَذْ إِمّثْ. مَا أَذْ نتّْوَاثحَّا أَڒْ زَّايْنغْ إِفّغْ بُوحْبڒْ؟“