‏1 إِسِّيوڒْ سِيذِي أَكْ-ذ مُوسَا أَوَارْنِي إِ ڒْموْثْ ن ثْنَاينْ ن إِحنْجِيرنْ ن هَارُونْ، أَوَارْنِي ڒَامِي د-قَارّْبنْ نِيثْنِي زَّاثْ إِ وُوذمْ ن سِيذِي ؤُشَا مُّوثنْ.^▪   ‏2 سِيذِي إِنَّا إِ مُوسَا: ”سِيوڒْ أَكْ-ذ هَارُونْ، ؤُمَاشْ، حِيمَا وَارْ إِتِّيذفْ ڒبْذَا غَارْ ؤُقدَّاسْ ذَاخڒْ إِ ؤُڒحَّافْ، زَّاثْ إِ ثْقبَّارْثْ ن وصْڒَاحْ نِّي إِدْجَانْ خْ تَّاپُوثْ، حِيمَا وَارْ إِتّْمتِّي شَا، مِينْزِي نشّْ تّْبَانغْ-د ذڭْ إِجّْ ن ؤُسيْنُو سنّجْ إِ ثْقبَّارْثْ ن وصْڒَاحْ. ^▪   ‏3 س ؤُيَا أَذْ يَاذفْ هَارُونْ غَارْ ؤُقدَّاسْ: س إِجّْ ن ؤُينْذُوزْ، أَمژْيَانْ ن ؤُفُونَاسْ، إِ ثْغَارْصْثْ ن دّنْبْ ؤُشَا س يِيجّْ ن إِشَارِّي إِ ثْغَارْصْثْ ن وشْمَاضْ. ‏4 أَذْ يَارْضْ أَرُّوضْ إِقدّْسنْ ن ڒقْطنْ ؤُشَا سَّارْوَاڒْ نْ ڒقْطنْ أَذْ يِيڒِي خْ أَرِّيمثْ نّسْ. أَذْ إِبْيسْ ثَاحزَّامْثْ ن ڒقْطنْ ؤُشَا أَذْ يَاركّبْ أَرژّثْ ن ڒقْطنْ. أَقَا مَانْ أَيَا ذ أَرُّوضْ إِقدّْسنْ. مَاڒَا أَذْ ثنْ يَارْضْ، إِتّْخصَّا أَسْ أَذْ إِسِّيرْذْ أَرِّيمثْ نّسْ س وَامَانْ. ‏5 أَذْ إِكْسِي زِي ثْمسْمُونْثْ ن أَيْثْ ن إِسْرَائِيل ثْنَاينْ ن إِغَايْضنْ إِمژْيَانِينْ إِ ثْغَارْصْثْ ن دّنْبْ ذ إِجّْ ن إِشَارِّي إِ ثْغَارْصْثْ ن وشْمَاضْ. ‏6 أَذْ د-إِسّْقَارّبْ هَارُونْ أَينْذُوزْ ن ثْغَارْصْثْ ن وشْمَاضْ، ونِّي إِدْجَانْ إِ يِيخفْ نّسْ، ؤُشَا أَذْ إِفْذِي خْ يِيخفْ نّسْ ؤُ خْ ثَادَّارْثْ نّسْ. ^▫  ▪   ‏7 خنِّي أَذْ إِكْسِي ثْنَاينْ ن إِغَايْضنْ ؤُشَا أَذْ ثنْ إِڭّْ زَّاثْ إِ وُوذمْ ن سِيذِي غَارْ وَاذَافْ ن ؤُقِيضُونْ ن ؤُمْسَاڭَارْ. ‏8 أَذْ إِنْضَارْ هَارُونْ ثَاقدُّوحْثْ خْ ثْنَاينْ ن إِغَايْضنْ، إِشْثْ ن ثْقدُّوحْثْ خْ سِيذِي ؤُ إِشْثْ ن ثْقدُّوحْثْ خْ إِغَايْضْ إِنُّوفْسْڒنْ. ‏9 أَذْ د-إِسّْقَارّبْ هَارُونْ إِغَايْضْ نِّي خْ د-ثوْضَا ثَاقدُّوحْثْ إِ سِيذِي ؤُشَا أَذْ ث إِسّوْجذْ ذ ثْغَارْصْثْ ن دّنْبْ.

‏10 إِغَايْضْ إِ خْ د-ثوْضَا ثَاقدُّوحْثْ ن إِغَايْضْ إِنُّوفْسْڒنْ، أَذْ ث إِڭّْ إِدَّارْ زَّاثْ إِ وُوذمْ ن سِيذِي مَاحنْذْ أَذْ خَاسْ إِفْذِي ؤُشَا خنِّي أَذْ ث إِسّكّْ أَمْ إِغَايْضْ إِنُّوفْسْڒنْ غَارْ ڒخْڒَا.

‏11 ؤُشَا أَذْ د-إِسّْقَارّبْ هَارُونْ أَينْذُوزْ إِ ثْغَارْصْثْ ن دّنْبْ، ونِّي ثُوغَا إِ يِيخفْ نّسْ، ؤُشَا أَذْ إِفْذِي خْ يِيخفْ نّسْ ؤُ خْ أَيْثْبَابْ ن ثَادَّارْثْ نّسْ ؤُشَا أَذْ إِغَارْصْ إِ ؤُينْذُوزْ ن ثْغَارْصْثْ ن دّنْبْ، ونِّي إِدْجَانْ إِ يِيخفْ نّسْ.

‏12 أَذْ إِكْسِي عَاوذْ إِجّْ ن ڒْمجْمَارْ إِشُّورْ س ڒفْحمْ إِتّحْذُوذُوقنْ ن ؤُعَالْطَارْ زَّاثْ إِ وُوذمْ ن سِيذِي ؤُشَا أَذْ إِشُّورْ ثْنَاينْ ن إِفَاسّنْ نّسْ س ڒبْخُورْ أَزْذَاذْ إِتّْفُوحنْ ؤُشَا أَذْ يَاوِي مَارَّا أَيَا ذَاخڒْ إِ ؤُڒحَّافْ.

‏13 أَذْ إِڭّْ ڒبْخُورْ خْ ثْمسِّي زَّاثْ إِ وُوذمْ ن سِيذِي حِيمَا أَسيْنُو ن ڒفْوَارْ ن ڒبْخُورْ أَذْ إِذڒْ ثَاقبَّارْثْ ن وصْڒَاحْ إِ إِدْجَانْ خْ شّْهَاذثْ ؤُشَا وَارْ ڭُّورْ أَذْ إِمّثْ.

‏14 أَذْ إِكْسِي شْوَايْثْ زڭْ إِذَامّنْ ن ؤُينْذُوزْ ؤُشَا أَذْ ثنْ إِرُوشّْ س ؤُضَاضْ نّسْ خْ وُوذمْ ن ثْقبَّارْثْ ن وصْڒَاحْ غَارْ ؤُغزْذِيسْ ن شَّارْقْ ؤُشَا عَاوذْ أَذْ إِرُوشّْ شْوَايْثْ زڭْ إِذَامّنْ سبْعَا ن ثْوَاڒَاوِينْ س ؤُضَاضْ نّسْ زَّاثْ إِ ثْقبَّارْثْ ن وصْڒَاحْ. ^▪  

‏15 خنِّي أَذْ إِغَارْصْ إِ إِغَايْضْ ونِّي إِدْجَانْ إِ ڒْڭنْسْ ؤُشَا أَذْ يَاوِي إِذَامّنْ غَارْ ذَاخڒْ إِ ؤُڒحَّافْ ؤُشَا أَذْ إِڭّْ س إِذَامّنْ نّسْ أَمشْنَاوْ مَامّشْ إِڭَّا س إِذَامّنْ ن ؤُينْذُوزْ ؤُشَا أَذْ ثنْ إِرُوشّْ خْ ثْقبَّارْثْ ن وصْڒَاحْ ؤُ زَّاثْ إِ ثْقبَّارْثْ ن وصْڒَاحْ.

‏16 أَمُّو إِ غَا إِفْذِي خْ ؤُقدَّاسْ ذِي طّْوعْ ن ڒْحَاجَّاثْ إِخمْجنْ ن أَيْثْ ن إِسْرَائِيل ؤُ ذِي طّْوعْ ن إِخطَّانْ ؤُ عْلَاحْسَابْ مَارَّا دّْنُوبْ نْسنْ. أَمُّو إِ غَا يڭّْ ذِي سِّيبّثْ ن ؤُقِيضُونْ ن ؤُمْسَاڭَارْ، ونِّي إِدْجَانْ ذِي ڒْوسْثْ ن مَارَّا ثِيمسْڒَايِينْ إِخمْجنْ نْسنْ.

‏17 ؤُڒَا ذ إِجّْ ن بْنَاذمْ مَا أَذْ يِيڒِي عَاذْ ذڭْ ؤُقِيضُونْ ن ؤُمْسَاڭَارْ، زڭْ وَامِي إِ غَا يَاذفْ مَاحنْذْ أَذْ إِفْذِي ذڭْ ؤُقدَّاسْ أَڒْ غَا إِفّغْ عَاوذْ. أَمُّو إِ غَا إِفْذِي خْ يِيخفْ نّسْ ؤُ خْ مَارَّا أَڭْرَاوْ ن ڒْڭنْسْ ن إِسْرَائِيل.

‏18 ڭُّورْ أَذْ إِفّغْ أَڒْ ؤُعَالْطَارْ إِ إِدْجَانْ زَّاثْ إِ وُوذمْ ن سِيذِي ؤُشَا أَذْ خَاسْ إِفْذِي. أَذْ إِكْسِي شْوَايْثْ زڭْ إِذَامّنْ ن ؤُينْذُوزْ ؤُ شْوَايْثْ زڭْ إِذَامّنْ ن إِغَايْضْ ؤُشَا أَذْ إِسَّارْسْ أَيَا خْ وَاشَّاونْ ن ؤُعَالْطَارْ ذِي مِينْ ذ أَسْ د-إِنّْضنْ.

‏19 سبْعَا ن ثْوَاڒَاوِينْ ڭُّورْ أَذْ خَاسْ إِرُوشّْ س ؤُضَاضْ نّسْ شْوَايْثْ زڭْ إِذَامّنْ ؤُشَا أَذْ ث إِسِّيزْذڭْ ؤُ أَذْ ث إِسّْقدّسْ زِي ڒخْمجْ ن أَيْثْ ن إِسْرَائِيل. ‏20 ؤُمِي إِكمّڒْ لْفِيذْيَا خْ ؤُقدَّاسْ ؤُ خْ ؤُقِيضُونْ ن ؤُمْسَاڭَارْ ؤُ خْ ؤُعَالْطَارْ، ڭُّورْ أَذْ د-إِسّْقَارّبْ خنِّي إِغَايْضْ إِدَّارنْ. ‏21 أَذْ إِسَّارْسْ هَارُونْ أَفُوسْ نّسْ خْ ؤُزدْجِيفْ ن إِغَايْضْ إِدَّارنْ ؤُشَا ثِيوَا إِ ؤُيَا أَذْ إِنْعمْ خْ مَارَّا ڒْمُوعْصِييّثْ ن أَيْثْ ن إِسْرَائِيل ذ مَارَّا إِخطَّانْ نْسنْ إِ د-يُوسِينْ أَكْ-ذ مَارَّا دّْنُوبْ نْسنْ ؤُشَا أَذْ ثنْ إِسَّارْسْ خْ ؤُزدْجِيفْ ن إِغَايْضْ ؤُشَا أَذْ ث إِسّكّْ غَارْ ڒخْڒَا س ؤُفُوسْ ن إِجّْ ن ورْيَازْ ونِّي إِسّْوجْذنْ إِ دّڭَّا. ‏22 ؤُشَا إِغَايْضْ ڭُّورْ أَذْ يَاوِي أَكْ-ذ إِخفْ نّسْ مَارَّا ڒْمُوعْصِييّثْ نْسنْ غَارْ إِشْثْ ن جِّيهثْ ثخْڒَا. نتَّا أَذْ إِسّكّْ إِغَايْضْ غَارْ ڒخْڒَا.

‏23 خنِّي ڭُّورْ أَذْ يَاذفْ هَارُونْ غَارْ ؤُقِيضُونْ ن ؤُمْسَاڭَارْ ؤُشَا أَذْ إِكّسْ أَرُّوضْ ن ڒقْطنْ، ونِّي يَارْضْ حِيمَا أَذْ يَاذفْ غَارْ ؤُقدَّاسْ، ؤُشَا أَذْ ثنْ يجّْ ذِينْ. ‏24 أَذْ إِسِّيرْذْ أَرِّيمثْ نّسْ س وَامَانْ ذڭْ ومْشَانْ أَمْقدَّاسْ ؤُشَا أَذْ يَارْضْ أَرُّوضْ نّسْ. خنِّي أَذْ إِفّغْ، أَذْ إِسّوْجذْ ثَاغَارْصْثْ ن وشْمَاضْ نّسْ ذ ثْغَارْصْثْ ن ڒْڭنْسْ ؤُشَا أَذْ إِفْذِي خْ يِيخفْ نّسْ ؤُ خْ ڒْڭنْسْ. ‏25 أَذْ إِسّْبخَّارْ ثَاذُونْثْ ن ثْغَارْصْثْ نْ دّنْبْ خْ ؤُعَالْطَارْ.

‏26 وِي د-إِسكّنْ إِغَايْضْ إِنُّوفْسْڒنْ، أَذْ إِصبّنْ أَرُّوضْ نّسْ، أَذْ إِسِّيرْذْ أَرِّيمثْ نّسْ س وَامَانْ. أَوَارْنِي أَسْ أَذْ يَاذفْ غَارْ ڒْمَارْڭحْ ن ڒْعسْكَارْ.

‏27 ؤُشَا أَينْذُوزْ ن ثْغَارْصْثْ ن دّنْبْ ذ إِغَايْضْ ن طْغَارْصْثْ ن دّنْبْ، إِ زِي إِتّْوَاسِيذْفنْ إِذَامّنْ نْسنْ مَاحنْذْ أَذْ زَّايْسنْ إِتّْوَافْذِي ذڭْ ؤُقدَّاسْ، أَذْ ثنْ سُّوفّْغنْ بَارَّا إِ ڒْمَارْڭحْ ن ڒْعسْكَارْ ؤُشَا أَذْ زَّايْسنْ سّْشمْضنْ إِڒْمَاونْ نْسنْ ذ ويْسُومْ نْسنْ ذ ؤُمسَّاڒْ نْسنْ س ثْمسِّي. ^▪   ‏28 وِي ثنْ غَا إِسّْشمْضنْ، أَذْ إِصبّنْ أَرُّوضْ نّسْ، أَذْ إِسِّيرْذْ أَرِّيمثْ نّسْ س وَامَانْ. أَوَارْنِي أَسْ أَذْ يَاذفْ غَارْ ڒْمَارْڭحْ ن ڒْعسْكَارْ.

‏29 ثَا ذ إِشْثْ ن ثوْصيّثْ إِ ڒبْذَا إِ كنِّيوْ. ذڭْ ؤُيُورْ وِيسّْ سبْعَا، ذڭْ وَاسّْ وِيسّْ عشْرَا ن ؤُيُورْ، أَذْ ثسّْوَاضْعمْ إِخفْ نْومْ ؤُشَا وَارْ تّڭّمْ ؤُڒَا ذ إِشْثْ ن ڒْخذْمثْ، نِيغْ ونِّي د-إِخڒْقنْ ذِي ثمُّورْثْ ؤُڒَا ذ أَبَارَّانِي نِّي إِزدّْغنْ ذِي ڒْوسْثْ نْومْ. ^▪   ‏30 مِينْزِي ذڭْ وَاسّْ نِّي أَذْ خَاومْ إِتّْوَافْذِي مَاحنْذْ أَذْ ثتّْوَاسِيزذْڭمْ. كنِّيوْ مَارَّا أَذْ ثتّْوَاسِيزذْڭمْ زَّاثْ إِ وُوذمْ ن سِيذِي. ‏31 أَذْ يِيڒِي ذ إِجّْ وَاسّْ ن سّبْثْ، أَرَّاحثْ ثْمُونْ إِ كنِّيوْ. أَذْ ثسّْوَاضْعمْ إِخفْ نْومْ، أَقَا-ت ذ إِشْثْ ن ثوْصيّثْ إِ ڒبْذَا. ‏32 أَكهَّانْ، ونِّي ذهْننْ ؤُ ڒقّْمنْ نِيثْنِي ذڭْ ومْشَانْ ن بَابَاسْ مَاحنْذْ أَذْ يِيڒِي ذ أَكهَّانْ، أَذْ إِفْذِي ؤُشَا أَذْ يَارْضْ أَرُّوضْ ن ڒقْطنْ، أَرُّوضْ إِقدّْسنْ. ‏33 أَذْ إِفْذِي خْ زَّاوشْثْ إِقدّْسنْ ؤُ خْ ثْقِيضُونْثْ ن ؤُمْسَاڭَارْ ؤُ خْ ؤُعَالْطَارْ. أَذْ إِفْذِي عَاوذْ خْ مَارَّا إِكهَّاننْ ؤُ خْ مَارَّا ڒْڭنْسْ ن وڭْرَاوْ. ‏34 ثَا ذ إِشْثْ ن ثوْصيّثْ إِ ڒبْذَا إِ كنِّيوْ حِيمَا أَذْ ثفْذِيمْ إِشْثْ ن ثْوَاڒَا ذڭْ ؤُسڭّْوَاسْ خْ مَارَّا أَيْثْ ن إِسْرَائِيل إِ مَارَّا دّْنُوبْ نْسنْ.“ ؤُشَا إِڭَّا أَمْ مَامّشْ يُومُورْ سِيذِي إِ مُوسَا. ^▪