أَسِيزّڒْ زِي أَرِّيمثْ ن يرْيَازنْ ذ ثمْغَارِينْ
15
1 إِسِّيوڒْ سِيذِي أَكْ-ذ مُوسَا ذ هَارُونْ، إِنَّا: 2 ”سِيوڒْ أَكْ-ذ أَيْثْ ن إِسْرَائِيل، إِنِيمْ أَسنْ ’مَاڒَا أَرْيَازْ غَارسْ إِجّْ ن ؤُسيّڒْ زِي أَرِّيمثْ نّسْ، خنِّي أَذْ يِيڒِي إِخْمجْ زِي سِّيبّثْ ن ؤُسيّڒْ. 3 وَا أَذْ يِيڒِي ذ ڒخْمجْ نّسْ زِي سِّيبّثْ ن ؤُسيّڒْ نّسْ: مَاڒَا أَرِّيمثْ نّسْ ثتّجَّا أَسيّڒْ نّسْ نِيغْ أَرِّيمثْ نّسْ ثسّْبدَّا أَسيّڒْ نّسْ، أَقَا-ث ذ ڒخْمجْ نّسْ. 4 كُوڒْ قَامَا مِينْ خفْ غَا إِطّصْ ونِّي ذِي إِدْجْ ؤُسيّڒْ، أَذْ يِيڒِي إِخْمجْ ؤُ كُوڒْ ڒْقشْعثْ إِ خفْ غَا إِقِّيمْ، أَذْ ثِيڒِي ثخْمجْ. 5 مَارَّا وِي غَا إِحَاذَانْ قَامَا نّسْ، أَذْ إِصبّنْ أَرُّوضْ نّسْ، أَذْ إِسِّيرْذْ نتَّا إِخفْ نّسْ عَاوذْ س وَامَانْ ؤُشَا أَذْ يِيڒِي إِخْمجْ أَڒْ ثَامذِّيثْ. 6 ونِّي إِ غَا إِقِّيمنْ خْ شَا خْ مِينْ خفْ ثُوغَا إِقِّيمْ ونِّي ذِي إِدْجْ ؤُسيّڒْ، أَذْ إِصبّنْ أَرُّوضْ نّسْ، أَذْ إِسِّيرْذْ إِخفْ نّسْ عَاوذْ س وَامَانْ ؤُشَا أَذْ يِيڒِي إِخْمجْ أَڒْ ثَامذِّيثْ. 7 ونِّي إِ غَا إِحَاذَانْ أَرِّيمثْ ن ونِّي ذِي إِدْجْ ؤُسيّڒْ، أَذْ إِصبّنْ أَرُّوضْ نّسْ ؤُشَا نتَّا سِيمَانْثْ نّسْ أَذْ إِسِّيرْذْ س وَامَانْ، ؤُشَا أَذْ يِيڒِي إِخْمجْ أَڒْ ثَامذِّيثْ. 8 مَاڒَا ونِّي ذِي إِدْجْ ؤُسيّڒْ إِسُّوسفْ خْ إِجّْ ن ؤُمزْذَاڭْ، أَقَا وَا خنِّي أَذْ إِصبّنْ أَرُّوضْ نّسْ، أَذْ إِسِّيرْذْ إِخفْ نّسْ س وَامَانْ ؤُشَا أَذْ يِيڒِي إِخْمجْ أَڒْ ثَامذِّيثْ. 9 كُوڒْ ثْرِيشْثْ مِينْ خفْ إِقِّيمْ ونِّي ذِي إِدْجْ ؤُسيّڒْ، أَذْ ثِيڒِي ثخْمجْ.
10 مَارَّا وِي غَا إِحَاذَانْ مَامّشْ مَا ڒْقشْعثْ نِّي إِدْجَانْ سَاذُو نّسْ، أَذْ يِيڒِي إِخْمجْ أَڒْ ثَامذِّيثْ ؤُشَا وِي ت غَا إِكْسِينْ، أَذْ إِصبّنْ أَرُّوضْ نّسْ، أَذْ إِسِّيرْذْ إِخفْ نّسْ س وَامَانْ ؤُشَا أَذْ يِيڒِي إِخْمجْ أَڒْ ثَامذِّيثْ.
11 مَارَّا وِي غَا إِتّْوَاحَاذَانْ زڭْ ونِّي ذِي إِدْجْ ؤُسيّڒْ بْڒَا مَا أَذْ إِسِّيرْذْ وَا إِفَاسّنْ نّسْ أَمزْوَارُو، أَذْ إِصبّنْ أَرُّوضْ نّسْ، أَذْ إِسِّيرْذْ إِخفْ نّسْ س وَامَانْ ؤُشَا أَذْ يِيڒِي إِخْمجْ أَڒْ ثَامذِّيثْ.
12 طّبْصِي ن ثْڒَاخْثْ نِّي ت إِحَاذَا ونِّي ذِي إِدْجْ ؤُسيّڒْ إِتّْخصَّا أَذْ إِتّْوَارْژْ، مَاشَا مَارَّا ڒْقشْعثْ ن ثفْڒوْثْ أَذْ ثتّْوَاسِيرْذْ س وَامَانْ. ▪
13 خْمِي ونِّي ذِي إِدْجْ ؤُسيّڒْ أَذْ إِتّْوَاسِيزْذڭْ زڭْ ؤُسيّڒْ نّسْ، إِتّْخصَّا أَسْ سِيمَانْثْ نّسْ أَذْ إِحْسبْ إِ سبْعَا ن وُوسَّانْ. خنِّي أَذْ إِصبّنْ أَرُّوضْ نّسْ، أَذْ إِسِّيرْذْ أَرِّيمثْ نّسْ س وَامَانْ إِدَّارنْ ؤُشَا أَذْ يِيڒِي إِزْذِيڭْ.
14 ذڭْ وَاسّْ وِيسّْ ثْمنْيَا أَذْ إِكْسِي ثْنَاينْ ن ثجْلِيلِّيحِينْ نِيغْ ثْنَاينْ ن إِذْبِيرنْ إِمژْيَاننْ ؤُشَا أَذْ د-يَاسْ زَّاثْ إِ وُوذمْ ن سِيذِي غَارْ وَاذَافْ ن ؤُقِيضُونْ ن ؤُمْسَاڭَارْ ؤُشَا أَذْ ثنْ إِوْشْ إِ ؤُكهَّانْ.
15 أَكهَّانْ أَذْ إِسّوْجذْ إِشْثْ ن ثْغَارْصْثْ ن دّنْبْ ذ إِشْثْ ن ثْغَارْصْثْ ن وشْمَاضْ. أَمُّو إِ خَاسْ غَا إِفْذِي ؤُكهَّانْ زَّاثْ إِ وُوذمْ ن سِيذِي خْ ؤُسيّڒْ نّسْ. ▫
16 مَاڒَا إِفّغْ-د ؤُسيّڒْ ن وَادْجُو زڭْ ورْيَازْ، أَذْ إِسِّيرْذْ أَرِّيمثْ نّسْ مَارَّا س وَامَانْ ؤُشَا أَذْ يِيڒِي إِخْمجْ أَڒْ ثَامذِّيثْ.
17 كُوڒْ أَرُّوضْ ذ كُوڒْ إِڒمْ إِ خفْ إِدْجْ ؤُسيّڒْ ن وَادْجُو، إِتّْخصَّا أَذْ إِتّْوَاسِيرْذْ س وَامَانْ ؤُشَا أَذْ يِيڒِي إِخْمجْ أَڒْ ثَامذِّيثْ.
18 مَاشَا مَاڒَا إِطّصْ يِيجّْ ورْيَازْ أَكْ-ذ ثمْغَارْثْ ؤُشَا إِنْضَارْ ذَايسْ نتَّا، خنِّي أَذْ سِّيرْذنْ س ثْنَاينْ إِذْسنْ س وَامَانْ ؤُشَا أَذْ إِڒِينْ خمْجنْ أَڒْ ثَامذِّيثْ.
19 مَاڒَا ثَامْغَارْثْ ثُوغَا-ت ثْسيّڒْ، أَقَا خَاسْ إِذَامّنْ ذِي أَرِّيمثْ نّسْ، خنِّي أَذْ ثعْزڒْ سبْعَا ن وُوسَّانْ. مَارَّا وِي ت غَا إِحَاذَانْ أَذْ يِيڒِي إِخْمجْ أَڒْ ثَامذِّيثْ. ▫ 20 مَارَّا مِينْ خفْ ثُوغَا ثطّصْ ذڭْ وعْزَاڒْ نّسْ، أَذْ يِيڒِي إِخْمجْ ؤُشَا مَارَّا مِينْ خفْ ثُوغَا ثقِّيمْ، أَذْ يِيڒِي إِخْمجْ. 21 مَارَّا وِي غَا إِحَاذَانْ قَامَا نّسْ، أَذْ إِسِّيرْذْ أَرُّوضْ نّسْ، أَذْ إِسِّيرْذْ إِخفْ نّسْ س وَامَانْ ؤُشَا أَذْ يِيڒِي إِخْمجْ أَڒْ ثَامذِّيثْ. 22 مَارَّا وِي غَا إِحَاذَانْ شَا ن ڒْقشْعثْ مِينْ خفْ ثُوغَا ثتّْغِيمَا، أَذْ إِصبّنْ أَرُّوضْ نّسْ، أَذْ إِسِّيرْذْ إِخفْ نّسْ س وَامَانْ ؤُشَا أَذْ يِيڒِي إِخْمجْ أَڒْ ثَامذِّيثْ. 23 نِيغْ مَاڒَا إِرُوحْ أَذْ إِقِّيمْ خْ قَامَا نِيغْ خْ ڒْقشْعثْ إِ خفْ ثُوغَا ثقِّيمْ نتَّاثْ، ؤُمِي ث إِحَاذَا أَذْ يِيڒِي إِخْمجْ أَڒْ ثَامذِّيثْ. 24 مَاڒَا إِطّصْ أَكِيذسْ إِجّْ ن ورْيَازْ ؤُشَا يُوسَا-د خَاسْ وعْزَاڒْ نّسْ، خنِّي أَذْ يِيڒِي إِخْمجْ سبْعَا ن وُوسَّانْ. كُوڒْ قَامَا إِ خْ ثُوغَا إِطّصْ، أَذْ ثِيڒِي ثخْمجْ. ▪ 25 مَاڒَا خْ إِشْثْ ن ثمْغَارْثْ، ؤُسِينْ أَسْ-د إِذَامّنْ أَطَّاسْ ن وُوسَّانْ بَارَّا إِ ڒْمِيجَاڒْ ن وعْزَاڒْ نّسْ نِيغْ مَاڒَا ثُوغَا أَسيّڒْ كْثَارْ خْ ڒْمِيجَاڒْ ن وعْزَاڒْ نّسْ، خنِّي أَذْ ثِيڒِي ثخْمجْ مَارَّا ؤُسَّانْ ن ؤُسيّڒْ إِ د-يُوسِينْ أَكْ-ذ ڒخْمجْ نّسْ، أَمْ ذڭْ وُوسَّانْ ن وعْزَاڒْ نّسْ. ▪ 26 كُوڒْ قَامَا مِينْ خفْ ثطّصْ مَارَّا ؤُسَّانْ ن ؤُسيّڒْ نّسْ، أَذْ أَسْ يِيڒِي أَمشْنَاوْ قَامَا ن وعْزَاڒْ نّسْ ؤُ مَارَّا ڒْقشْعثْ مِينْ خفْ ثقِّيمْ، أَذْ ثِيڒِي ثخْمجْ، أَمشْنَاوْ ڒخْمجْ ن وعْزَاڒْ نّسْ. 27 مَارَّا وِي غَا إِحَاذَانْ ثِيمسْڒَايِينْ نِّي، أَذْ يِيڒِي إِخْمجْ. أَذْ إِصبّنْ أَرُّوضْ نّسْ ؤُشَا أَذْ إِسِّيرْذْ إِخفْ نّسْ س وَامَانْ ؤُشَا أَذْ يِيڒِي إِخْمجْ أَڒْ ثَامذِّيثْ. 28 مَاڒَا ثتّْوَاسِيزْذڭْ زڭْ ؤُسيّڒْ نّسْ، إِتّْخصَّا أَذْ ثحْسبْ إِ يِيخفْ نّسْ سبْعَا ن وُوسَّانْ، أَوَارْنِي أَسْ أَذْ ثِيڒِي ثزْذڭْ. 29 ذڭْ وَاسّْ وِيسّْ ثْمنْيَا أَذْ ثكْسِي إِ يِيخفْ نّسْ ثْنَاينْ ن ثجْلِيلِّيحِينْ نِيغْ ثْنَاينْ ن إِذْبِيرنْ إِمژْيَاننْ ؤُشَا أَذْ ثنْ ثَاوِي غَارْ ؤُكهَّانْ غَارْ وَاذَافْ ن ؤُقِيضُونْ ن ؤُمْسَاڭَارْ. 30 أَكهَّانْ أَذْ إِسّوْجذْ إِشْثْ ن ثْغَارْصْثْ ن دّنْبْ ذ إِشْثْ ن ثْغَارْصْثْ ن وشْمَاضْ ؤُشَا أَكهَّانْ أَذْ خَاسْ إِفْذِي ذِي ثْمسْڒَاشْثْ ن ؤُسيّڒْ ن ڒخْمجْ نّسْ زَّاثْ إِ وُوذمْ ن سِيذِي.
31 أَمُّو إِ غَا ثْعزْڒذْ أَيْثْ ن إِسْرَائِيل خْ ڒخْمجْ نْسنْ حِيمَا وَارْ تّْمتِّينْ ذِي ڒخْمجْ نْسنْ، ؤُمِي سّْخمَّاجنْ ثَازذِّيغْثْ إِنُو ثنِّي إِدْجَانْ ذِي ڒْوسْثْ نْسنْ.“ 32 وَا ذ أَزرْفْ إِ ونِّي غَارْ إِدْجْ ؤُسيّڒْ ؤُشَا إِ ونِّي زِي غَا إِفّغْ وَادْجُو نّسْ ؤُشَا أَذْ يِيڒِي إِخْمجْ 33 ؤُ عَاوذْ إِ ثنِّي مِينْ خفْ إِدْجْ إِذَامّنْ ؤُشَا خنِّي ثعْزڒْ إِخفْ نّسْ ؤُ عَاوذْ إِ وِي ذِي ثُوغَا ؤُسيّڒْ، إِ ورْيَازْ ؤُڒَا إِ ثمْغَارْثْ، ؤُشَا عَاوذْ إِ ورْيَازْ إِ ثُوغَا إِطّْصنْ أَكْ-ذ ثنِّي إِدْجَانْ ثخْمجْ.