‏1 إِسِّيوڒْ سِيذِي أَكْ-ذ مُوسَا ذ هَارُونْ، إِنَّا:

‏2 ”مَاڒَا حذْ غَارسْ ذِي ثڒْمشْثْ ن أَرِّيمثْ نّسْ أَعبُّوزْ، نِيغْ إِشْثْ ن ثْحبُّوشْثْ، نِيغْ إِجّْ ن ونْڭَازْ إِشّمْڒڒْ ن ثڒْمشْثْ، ؤُشَا وَانِيثَا إِزمَّارْ أَذْ إِذْوڒْ ذ ؤُضُونْ ن ڒْبَارْصْ ذِي ثڒْمشْثْ ن أَرِّيمثْ نّسْ، أَذْ إِتّْوَانْذهْ غَارْ هَارُونْ، أَكهَّانْ، نِيغْ غَارْ يِيجّنْ زڭْ إِحنْجِيرنْ نّسْ، إِكهَّاننْ. ‏3 أَكهَّانْ أَذْ إِخْزَارْ غَارْ وُوضُونْ ذِي ثڒْمشْثْ ن أَرِّيمثْ نّسْ ؤُشَا مَاڒَا إِژْرَا أَقَا إِژُوطَّانْ ذڭْ ومْشَانْ ن وُوضُونْ ذوْڒنْ ذ إِشمْڒَاڒنْ ؤُشَا إِبَانْ وُوضُونْ عَاذْ يُودْجغْ خْ ثڒْمشْثْ ن أَرِّيمثْ نّسْ، أَقَا خنِّي ذ ؤُضُونْ ن ڒْبَارْصْ. خْمِي ث غَا إِژَارْ ؤُكهَّانْ، أَذْ ث إِبَارّحْ ذ أَمخْمُوجْ. ‏4 مَاشَا مَاڒَا أَنْڭَازْ إِشّمْڒڒْ ذِي ثڒْمشْثْ ن أَرِّيمثْ نّسْ ذ أَشمْڒَاڒْ ؤُ وَارْ يُودْجِيغْ خْ ثڒْمشْثْ ؤُ إِژطَّانْ وَارْ ذْوِيڒنْ ذ إِشمْڒَاڒنْ، خنِّي أَكهَّانْ أَذْ إِبلّعْ خْ ونِّي ذِي إِدْجْ ؤُضُونْ نِّي سبْعَا ن وُوسَّانْ. ‏5 مَاڒَا إِژْرَا إِ-ث ؤُكهَّانْ ذڭْ وَاسّْ وِيسّْ سبْعَا ؤُشَا إِژْرَا أَقَا ؤُضُونْ أَمنِّي إِقِّيمْ، وَارْ إِمْغِيرْ وُوضُونْ ذِي ثڒْمشْثْ، خنِّي أَذْ ث إِبلّعْ ؤُكهَّانْ عَاوذْ سبْعَا ن وُوسَّانْ نّغْنِي. ‏6 ذڭْ وَاسّْ وِيسّْ سبْعَا أَذْ ث إِژَارْ ؤُكهَّانْ عَاوذْ ؤُشَا مَاڒَا إِبَانْ أَقَا ؤُضُونْ يَارْسَا ؤُشَا وَارْ إِمْغِيرْ عَاذْ كْثَارْ خْ ثڒْمشْثْ، خنِّي أَكهَّانْ أَذْ ث إِبَارّحْ ذ أَمزْذَاڭْ. ثُوغَا-ت ذ إِشْثْ ن ثْفُورِييْ. أَذْ إِسِّيرْذْ أَرُّوضْ نّسْ ؤُشَا أَذْ يِيڒِي إِزْذِيڭْ. ‏7 مَاشَا مَاڒَا إِمْغَارْ وُوضُونْ أَطَّاسْ خْ ثڒْمشْثْ أَوَارْنِي ث إِژْرَا ؤُكهَّانْ ذِي طّْوعْ ن ؤُسِيزْذڭْ نّسْ، إِتّْخصَّا أَذْ إِسّْشنْ إِخفْ نّسْ إِ ؤُكهَّانْ ثْوَاڒَا نّغْنِي. ‏8 مَاڒَا إِژْرَا ؤُكهَّانْ، أَقَا ڒهْڒَاشْ إِمْغَارْ خْ ثڒْمشْثْ، أَذْ ث إِبَارّحْ ذ أَمخْمُوجْ. أَقَا-ث ذ ڒهْڒَاشْ ن ڒْبَارْصْ إِ إِدْجْ.

‏9 مَاڒَا ؤُضُونْ نْ ڒْبَارْصْ أَقَا-ث ذڭْ إِجّْ ن بْنَاذمْ، أَذْ ث أَوْينْ غَارْ ؤُكهَّانْ.

‏10 مَاڒَا إِژْرَا ؤُكهَّانْ، أَقَا أَعبُّوزْ إِبَانْ إِمْڒڒْ ذِي ثڒْمشْثْ ؤُشَا إِژطَّانْ ذ إِشمْڒَاڒنْ ؤُشَا إِبَانْ-د ويْسُومْ إِدَّارْ ذڭْ ؤُعبُّوزْ،

‏11 أَقَا-ث ذ ڒْبَارْسْ إِتُّوثُوسنْ ذِي ثڒْمشْثْ ن أَرِّيمثْ نّسْ ؤُشَا أَكهَّانْ أَذْ زَّايسْ إِبَارّحْ ذ أَمخْمُوجْ. وَارْ خَاسْ إِتّْبلِّيعْ شَا، مِينْزِي نتَّا أَقَا إِخْمجْ.

‏12 مَاڒَا يُويُورْ ڒْبَارْصْ خْ ثِيڒْمشْثْ مَارَّا ؤُشَا إِذْڒَا ڒْبَارْصْ مَارَّا ثِيڒْمشْثْ ن ونِّي غَارْ إِدْجْ ؤُضُونْ زڭْ ؤُزدْجِيفْ نّسْ أَڒْ إِضَارنْ نّسْ، أَڒْ مَانِي إِزمَّارْ أَذْ إِژَارْ ؤُكهَّانْ س ثِيطَّاوِينْ نّسْ،

‏13 ؤُشَا إِژْرَا إِ-ث ؤُكهَّانْ، إِژْرَا ڒْبَارْسْ إِذْڒَا مَارَّا أَرِّيمثْ نّسْ، خنِّي نتَّا أَذْ إِبَارّحْ ذ أَمزْذَاڭْ إِ ونِّي ذِي إِدْجْ وُوضُونْ. ثِيڒْمشْثْ أَقَا-ت ذ ثَاشمْڒَاتْشْ قَاعْ. نتَّا أَقَا إِزْذِيڭْ.

‏14 مَاشَا ذڭْ وَاسّْ مَانِي ذَايسْ إِ غَا د-إِبَانْ ويْسُومْ إِدَّارْ، أَذْ يِيڒِي إِخْمجْ.

‏15 مَاڒَا إِژْرَا ؤُكهَّانْ أَيْسُومْ نِّي إِدَّارْ، أَذْ ث إِبَارّحْ ذ أَمخْمُوجْ. أَيْسُومْ إِدَّارنْ إِخْمجْ، أَقَا-ث ذ ڒهْڒَاشْ ن ڒْبَارْصْ.

‏16 مَاشَا خْمِي إِ غَا إِبدّڒْ ويْسُومْ إِدَّارنْ ؤُ إِذْوڒْ ذ أَشمْڒَاڒْ، إِتّْخصَّا أَسْ أَذْ د-يَاسْ غَارْ ؤُكهَّانْ.

‏17 مَاڒَا إِژْرَا إِ-ث ؤُكهَّانْ ؤُشَا أَقَا أَمْشَانْ ن ؤُضُونْ إِمْڒڒْ، أَذْ إِبَارّحْ ؤُكهَّانْ ذ أَمزْذَاڭْ إِ ونِّي ذِي إِدْجْ ڒهْڒَاشْ. نتَّا أَقَا إِزْذِيڭْ.

‏18 مَاڒَا ذِينْ خْ ثڒْمشْثْ ن ويْسُومْ إِشْثْ ن ثْحبُّوشْثْ ؤُ ثتّْوَاسْڭنْفَا ثَانِيثَا،

‏19 ؤُشَا ذڭْ ومْشَانْ ن ثْحبُّوشْثْ إِذْوڒْ ذ إِجّْ ن ؤُعبُّوزْ إِمْڒڒْ نِيغْ ذ إِجّْ ن ونْڭَازْ إِشّمْڒڒْ، أَشمْڒَاڒْ إِرُوحْ غَارْ ثزْوغْ، خنِّي أَذْ إِژَارْ ؤُكهَّانْ مَانْ أَيَا. ‏20 خْمِي ث إِ غَارسْ إِ غَا إِخْزَارْ ؤُكهَّانْ ؤُشَا إِژْرَا أَقَا-ث سَاذُو ثڒْمشْثْ ؤُشَا إِژطَّانْ نّسْ ذ إِشمْڒَاڒنْ، خنِّي أَكهَّانْ أَذْ ث إِبَارّحْ ذ أَمخْمُوجْ، أَقَا-ث ذ ؤُضُونْ ن ڒْبَارْصْ ونِّي يُويُورنْ س ثْحبُّوشْثْ. ‏21 مَاشَا مَاڒَا إِژْرَا إِ-ث ؤُكهَّانْ ؤُشَا وَارْ ذَايسْ يُوفِي ؤُڒَا ذ إِجّْ ن ؤُژطُّو ذ أَشمْڒَاڒْ ؤُشَا وَارْ إِذْوِيڒْ يُودْجغْ خْ ثڒْمشْثْ، مَاشَا إِذْوڒْ يَارْسَا، خنِّي أَذْ خَاسْ إِبلّعْ ؤُكهَّانْ سبْعَا ن وُوسَّانْ. ‏22 مَاڒَا ثُويُورْ خْ ثڒْمشْثْ مَارَّا، خنِّي أَكهَّانْ أَذْ ث إِبَارّحْ ذ أَمخْمُوجْ. أَقَا-ث ذ ؤُضُونْ ن ڒْبَارْصْ. ‏23 مَاشَا مَاڒَا أَنْڭَازْ إِشّمْڒڒْ ن ثڒْمشْثْ إِقِّيمْ ذڭْ ومْشَانْ نّسْ، وَارْ إِمْغِيرْ شَا، أَقَا-ث ذ شَّامثْ ن ثْحبُّوشْثْ ؤُشَا أَكهَّانْ أَذْ ث إِبَارّحْ ذ أَمزْذَاڭْ.

‏24 نِيغْ مَاڒَا إِذْوڒْ ذِي ثڒْمشْثْ ن أَرِّيمثْ إِجّْ ن ؤُيزِّيمْ ن وشْمَاضْ ؤُشَا أَيْسُومْ إِدَّارنْ ن ؤُيزِّيمْ ن وشْمَاضْ إِذْوڒْ ذ إِجّْ ن ونْڭَازْ إِشّمْڒڒْ، أَشمْڒَاڒْ إِرُوحْ غَارْ ثزْوغْ نِيغْ ذ أَشمْڒَاڒْ، ‏25 ؤُشَا إِژْرَا ؤُكهَّانْ مَانْ أَيَا، ؤُشَا خْزَارْ، إِژطَّانْ إِ إِدْجَانْ ذڭْ ونْڭَازْ إِشّمْڒڒْ أَقَا ذوْڒنْ ذ إِشمْڒَاڒنْ، ؤُشَا إِبَانْ-د ذ أَمْشَانْ ن ونْڭَازْ يُودْجغْ ذِي ثڒْمشْثْ، أَقَا-ث ذ ڒْبَارْصْ ونِّي د-إِفّْغنْ زڭْ ؤُيزِّيمْ ن وشْمَاضْ. أَكهَّانْ أَذْ ث إِبَارّحْ ذ أَمخْمُوجْ. أَقَا-ث ذ ؤُضُونْ ن ڒْبَارْصْ. ‏26 مَاشَا مَاڒَا أَكهَّانْ إِژْرَا مَانْ أَيَا ؤُشَا وَارْ إِتّْوِيڒِي إِژطَّانْ إِشمْڒَاڒنْ ذڭْ ونْڭَازْ إِشّمْڒڒْ ؤُشَا إِژْرَا أَنْڭَازْ وَارْ يُودْجِيغْ خْ ثڒْمشْثْ ؤُشَا ثنّيْڒَا، خنِّي أَذْ خَاسْ إِبلّعْ ؤُكهَّانْ سبْعَا ن وُوسَّانْ. ‏27 ذڭْ وَاسّْ وِيسّْ سبْعَا أَذْ ث إِخْزَارْ ؤُكهَّانْ ؤُشَا مَاڒَا إِمْغَارْ ونْڭَازْ كْثَارْ خْ ثڒْمشْثْ، أَكهَّانْ أَذْ ث إِبَارّحْ ذ أَمخْمُوجْ. أَقَا-ث ذ ؤُضُونْ ن ڒْبَارْصْ. ‏28 مَاشَا مَاڒَا أَنْڭَازْ إِمّْڒڒْ إِقِّيمْ ذڭْ ومْشَانْ نّسْ، وَارْ إِمْغِيرْ خْ ثڒْمشْثْ ؤُشَا يَارْسَا، أَقَا-ث ذ أَعبُّوزْ ن وشْمَاضْ. أَكهَّانْ أَذْ ث إِبَارّحْ ذ أَمزْذَاڭْ، مِينْزِي أَقَا-ت ذ شَّامثْ ن وشْمَاضْ.

‏29 مَاڒَا إِجّْ ن ورْيَازْ نِيغْ إِشْثْ ن ثمْغَارْثْ ذَايسْ ؤُضُونْ ذڭْ ؤُزدْجِيفْ نِيغْ ذِي ثْمَارْثْ ‏30 ؤُشَا إِخْزَارْ ؤُكهَّانْ ؤُضُونْ، ؤُ خْزَارْ، أَقَا إِتّْبَانْ يُودْجغْ ذِي ثڒْمشْثْ ؤُشَا ذَايسْ إِژطَّانْ إِوَارْغنْ ذ إِزْذَاذنْ، خنِّي أَكهَّانْ أَذْ ث إِبَارّحْ ذ أَمخْمُوجْ. أَقَا-ث ذ أَنْضَاوْ ن ؤُشوَّافْ، أَقَا-ث ذ ڒْبَارْصْ ن ؤُزدْجِيفْ نِيغْ ن ثْمَارْثْ. ‏31 مَاشَا مَاڒَا إِخْزَارْ ؤُكهَّانْ ؤُضُونْ ن ونْضَاوْ ن ؤُشوَّافْ، إِژْرَا أَقَا وَارْ يُودْجِيغْ ذِي ثڒْمشْثْ ؤُشَا وَارْ ذَايسْ إِژطَّانْ إِبَارْشَاننْ، خنِّي أَذْ خَاسْ إِبلّعْ ؤُكهَّانْ خْ ونِّي ذِي إِدْجْ وُوضُونْ ن ونْضَاوْ ن ؤُشوَّافْ سبْعَا ن وُوسَّانْ. ‏32 أَذْ إِژَارْ ؤُكهَّانْ ؤُضُونْ ذڭْ وَاسّْ وِيسّْ سبْعَا ؤُشَا مَاڒَا إِژْرَا، أَقَا أَنْضَاوْ ن ؤُشوَّافْ وَارْ إِمْغِيرْ، وَارْ ذَايسْ يُوفِي إِژطَّانْ إِوَارْغنْ ؤُشَا أَنْضَاوْ ن ؤُشوَّافْ وَارْ يُودْجِيغْ خْ ثڒْمشْثْ، ‏33 خنِّي نتَّا أَذْ إِحفّْ إِ يِيخفْ نّسْ، مَاشَا أَمْشَانْ ن ونْضَاوْ ن ؤُشوَّافْ وَارْ ث إِتّْحفِّي شَا ؤُشَا أَكهَّانْ أَذْ إِبلّعْ خْ ونِّي ذِي إِدْجْ ونْضَاوْ ن ؤُشوَّافْ عَاذْ إِشْثْ ن ثْوَاڒَا نّغْنِي إِ يِيجّْ ن ڒْمِيجَاڒْ ن سبْعَا ن وُوسَّانْ. ‏34 ذڭْ وَاسّْ وِيسّْ سبْعَا أَذْ إِخْزَارْ ؤُكهَّانْ أَنْضَاوْ ن ؤُشوَّافْ. مَاڒَا إِژْرَا أَقَا أَنْضَاوْ ن ؤُشوَّافْ وَارْ إِمْغِيرْ شَا، وَارْ يُودْجِيغْ خْ ثڒْمشْثْ، خنِّي أَكهَّانْ أَذْ ث إِبَارّهْ ذ أَمزْذَاڭْ. أَذْ إِسِّيرْذْ أَرُّوضْ نّسْ ؤُشَا أَذْ يِيڒِي إِزْذِيڭْ. ‏35 مَاشَا مَاڒَا أَنْضَاوْ ن ؤُشوَّافْ إِمْغَارْ أَطَّاسْ خْ ثڒْمشْثْ أَوَارْنِي إِ ؤُسِيزْذڭْ نّسْ، ‏36 ؤُشَا خْمِي غَارسْ إِ غَا إِخْزَارْ ؤُكهَّانْ ؤُشَا إِژْرَا أَنْضَاوْ ن ؤُشوَّافْ إِمْغَارْ خْ ثڒْمشْثْ، خنِّي وَارْ يَارزُّو ؤُكهَّانْ خْ إِژطَّانْ إِوْرَاغنْ عَاذْ. نتَّا أَقَا إِخْمجْ. ‏37 مَاشَا مَاڒَا أَنْضَاوْ ن ؤُشوَّافْ أَقَا إِبَانْ-د إِبدّْ ذِي ثِيطَّاوِينْ نّسْ ؤُشَا فّْغنْ-د زَّايسْ إِژطَّانْ إِبَارْشَاننْ، خنِّي أَقَا إِڭّنْفَا س ونْضَاوْ ن ؤُشوَّافْ ؤُشَا نتَّا أَقَا إِزْذڭْ. أَكهَّانْ أَذْ ث إِبَارّحْ ذ أَمزْذَاڭْ.

‏38 مَاڒَا بَاننْ-د إِمُوشَانْ شّمْڒڒنْ، إِشّمْڒڒنْ ذ إِشمْڒَاڒنْ، ذِي ثڒْمشْثْ ن إِجّْ ن ورْيَازْ نِيغْ ن إِشْثْ ن ثمْغَارْثْ، ‏39 ؤُشَا إِژْرَا ؤُكهَّانْ مَانْ أَيَا ؤُشَا إِژْرَا أَقَا ذِي ثڒْمشْثْ ن أَرِّيمثْ بَاننْ-د إِمُوشَانْ أَرْسَانْ، إِشمْڒَاڒنْ، خنِّي أَقَا-ت ذ إِشْثْ ن ثْفُورِي ن ثڒْمشْثْ.نتَّا أَقَا إِزْذڭْ.

‏40 مَاڒَا إِوْضَا ؤُشوَّافْ ن ؤُزدْجِيفْ ن إِجّْ ن ورْيَازْ، أَقَا ذ أَقشَّارْ، خنِّي نتَّا أَقَا إِزْذِيڭْ. ‏41 مَاڒَا ثَانْيَارْثْ نّسْ إِوْضَا أَسْ ؤُشوَّافْ، أَقَا ثَانْيَارْثْ نّسْ ثقُّوشَّارْ، خنِّي نتَّا أَقَا إِزْذِيڭْ. ‏42 مَاشَا مَاڒَا ذِينْ إِجّْ ن ؤُضُونْ إِمْڒڒْ إِرُوحْ غَارْ ثزْوغْ خْ ؤُزدْجِيفْ أَقشَّارْ نِيغْ خْ ثنْيَارْثْ ثَاقشَّارْثْ، أَقَا خنِّي ذ ڒْبَارْصْ نِّي د-إِفّْغنْ خْ ؤُزدْجِيفْ نّسْ أَقشَّارْ نِيغْ خْ ثنْيَارْثْ نّسْ ثَاقشَّارْثْ. ‏43 مَاڒَا إِخْزَارْ إِ-ث ؤُكهَّانْ ؤُشَا إِژْرَا أَقَا أَعبُّوزْ ن وُوضُونْ إِمْڒڒْ، إِرُوحْ غَارْ ثزْوغْ خْ ؤُزدْجِيفْ نّسْ أَقشَّارْ نِيغْ خْ ثنْيَارْثْ نّسْ ثَاقشَّارْثْ، إِتّْبَانْ-د أَمْ ڒْبَارْصْ ن ثڒْمشْثْ ن أَرِّيمثْ، ‏44 خنِّي أَقَا أَرْيَازْ ذ بُو-ڒْبَارْصْ إِ إِدْجْ، نتَّا أَقَا إِخْمجْ. أَكهَّانْ أَذْ ث إِبَارّحْ ذ أَمخْمُوجْ، ؤُضُونْ أَقَا-ث خْ ؤُزدْجِيفْ نّسْ.

‏45 إِتّْخصَّا أَذْ إِتّْوَاشَارّڭْ وَارُّوضْ ن بُو-ڒْبَارْصْ إِ ذِي إِدْجْ وُوضُونْ ؤُشَا أَذْ إِضْڒقْ إِ ؤُشوَّافْ خْ ؤُزدْجِيفْ نّسْ، أَذْ إِفَّارْ أَينْشِيشْ ن سنّجْ نّسْ، أَذْ إِڒَاغَا: ’أَمخْمُوجْ! أَمخْمُوجْ!‘ ^▪   ‏46 مَارَّا ؤُسَّانْ إِ ذَايسْ إِ غَا يِيڒِي وُوضُونْ، أَذْ يِيڒِي إِخْمجْ. نتَّا ذ أَمخْمُوجْ. نتَّا أَذْ إِزْذغْ وحّْذسْ ؤُشَا ثْزذِّيغْثْ نّسْ أَذْ ثِيڒِي بَارَّا إِ ڒْمَارْڭحْ ن ڒْعسْكَارْ.

‏47 مَاڒَا ؤُضُونْ ن ڒْبَارْصْ ذڭْ إِجّْ ن وَارُّوضْ، ذڭْ إِجّْ ن وَارُّوضْ ن ثَاضُوفْثْ نِيغْ ذڭْ إِجّْ ن وَارُّوضْ ن ڒقْطنْ، ‏48 نِيغْ ذڭْ ؤُفِيڒُو ذ أَزِيرَارْ نِيغْ ذڭْ ؤُفِيڒُو إِمُّوذنْ، نِيغْ س ڒقْطنْ نِيغْ س ثَاضُوفْثْ، نِيغْ غَارْ يِيڒمْ، نِيغْ غَارْ مَامّشْ مَا يِيڒمْ إِتّْوَاسْخذْمنْ، ‏49 ؤُ ثِيشْثِي إِتّْوَاوْثنْ ذڭْ وَارُّوضْ نِيغْ ذڭْ يِيڒمْ، نِيغْ غَارْ ؤُفِيڒُو ذ أَزِيرَارْ نِيغْ غَارْ ؤُفِيڒُو إِمُّوذنْ، نِيغْ ذِي مَامّشْ مَا ن ڒْقشْعثْ نِّي تّڭّنْ س يِيڒمْ، ثزِّيزُو نِيغْ ثزْوغْ، أَقَا-ث ذ ؤُضُونْ ن ڒْبَارْصْ. أَذْ إِتّْوَاسْشنْ أَيَا إِ ؤُكهَّانْ. ‏50 أَكهَّانْ أَذْ إِخْزَارْ غَارْ ومْشَانْ ن ؤُضُونْ ؤُشَا مِينْ إِضْننْ أَذْ ث إِبلّعْ سبْعَا ن وُوسَّانْ. ‏51 ذڭْ وَاسّْ وِيسّْ سبْعَا أَذْ إِخْزَارْ غَارْ وُوضُونْ. مَاڒَا إِمْغَارْ ؤُضُونْ ذڭْ وَارُّوضْ، نِيغْ غَارْ ؤُفِيڒُو ذ أَزِيرَارْ نِيغْ غَارْ ؤُفِيڒُو إِمُّوذنْ، نِيغْ ذڭْ يِيڒمْ ن مَامّشْ مَا ڒْقشْعثْ نِّي تّڭّنْ س يِيڒمْ، أَقَا ؤُضُونْ ذ ڒْبَارْسْ إِقسْحنْ إِ يدْجْ، أَقَا إِخْمجْ. ‏52 أَذْ إِسّشْمضْ أَرُّوضْ نِيغْ أَفِيڒُو ذ أَزِيرَارْ نِيغْ أَفِيڒُو إِمُّوذنْ، نِيغْ ن ثَاضُوفْثْ نِيغْ ن ڒقْطنْ إِ إِدْجْ، نِيغْ مَامّشْ مَا ڒْقشْعثْ نِّي تّڭّنْ س يِيڒمْ إِ ذَايسْ ثُوغَا ؤُضُونْ، مِينْزِي أَقَا-ث ذ ڒْبَارْصْ إِقسْحنْ. إِتّْخصَّا أَذْ إِتّْوَاسشْمضْ س ثْمسِّي. ‏53 مَاشَا مَاڒَا إِژْرَا ؤُكهَّانْ مَانْ أَيَا ؤُشَا أَقَا ؤُضُونْ وَارْ إِمْغِيرْ شَا ذڭْ وَارُّوضْ، نِيغْ ذڭْ ؤُفِيڒُو ذ أَزِيرَارْ نِيغْ ذڭْ ؤُفِيڒُو إِمُّوذنْ، نِيغْ ذِي مَامّشْ مَا ڒْقشْعثْ نِّي تّڭّنْ س يِيڒمْ، ‏54 خنِّي أَذْ يُومُورْ ؤُكهَّانْ أَذْ سِّيرْذنْ مِينْ ذِي يدْجْ وُوضُونْ، ؤُشَا أَوَارْنِي إِ مَانْ أَيَا أَذْ خَاسْ إِبلّعْ ثْوَاڒَا نّغْنِي ڒْقدّْ ن سبْعَا ن وُوسَّانْ. ‏55 مَاڒَا إِژْرَا ؤُكهَّانْ ؤُضُونْ أَوَارْنِي إِ ؤُسِيرْذْ، ؤُشَا إِژْرَا ؤُضُونْ وَارْ إِبدّڒْ شَا ؤُشَا ؤُضُونْ وَارْ إِمْغِيرْ، أَقَا مَانْ أَيَا إِخْمجْ. إِتّْخصَّا أَذْ ث ثسّشْمضذْ س ثْمسِّي. أَقَا ؤُضُونْ إِذْوڒْ يُودْجغْ إِتّتّْ غَارْ ضفَّارْ نِيغْ غَارْ زَّاثْ. ‏56 مَاشَا مَاڒَا إِخْزَارْ ؤُكهَّانْ مَانْ أَيَا ؤُشَا إِژْرَا بلِّي ؤُضُونْ يَارْسَا أَوَارْنِي إِ ؤُسِيرْذْ، خنِّي أَذْ ث إِقسّْ زڭْ وَارُّوضْ، نِيغْ زڭْ يِيڒمْ، نِيغْ زڭْ ؤُفِيڒُو ذ أَزِيرَارْ نِيغْ زڭْ ؤُفِيڒُو إِمُّوذنْ. ‏57 مَاشَا مَاڒَا إِبَانْ وُوضُونْ ثْوَاڒَا نّغْنِي ذڭْ وَارُّوضْ، نِيغْ غَارْ ؤُفِيڒُو ذ أَزِيرَارْ نِيغْ غَارْ ؤُفِيڒُو إِمُّوذنْ، نِيغْ ذِي مَامّشْ مَا ڒْقشْعثْ نِّي تّڭّنْ س يِيڒمْ، أَقَا إِدُّوقّزْ ڒْبَارْصْ. إِتّْخصَّا أَذْ ثسّشْمضْ س ثْمسِّي مِينْ ذَايسْ إِ إِدْجَانْ ؤُضُونْ. ‏58 أَرُّوضْ، نِيغْ أَفِيڒُو ذ أَزِيرَارْ نِيغْ أَفِيڒُو إِمُّوذنْ، نِيغْ مَامّشْ مَا ڒْقشْعثْ نِّي تّڭّنْ س يِيڒمْ، ونِّي ثسِّيرْذذْ ؤُشَا إِرُوحْ خَاسْ وُوضُونْ، أَذْ ث ثسِّيرْذذْ ثْوَاڒَا نّغْنِي ؤُشَا خنِّي أَذْ يِيڒِي إِزْذِيڭْ.“ ‏59 وَا ذ أَزرْفْ ن وُوضُونْ ن ڒْبَارْصْ ن وَارُّوضْ ن ثَاضُوفْثْ نِيغْ ن ڒقْطنْ، نِيغْ ن ؤُفِيڒُو ذ أَزِيرَارْ نِيغْ ن ؤُفِيڒُو إِمُّوذنْ، نِيغْ ن مَامّشْ مَا ن ڒْقشْعثْ نِّي تّڭّنْ س يِيڒمْ، مَاحنْذْ خنِّي أَذْ بَارّْحنْ س ثزْذڭْ نّسْ نِيغْ س ڒخْمجْ نّسْ.