‏1 خنِّي وَارْ إِزمَّارْ عَاذْ يُوسُوفْ أَذْ إِطّفْ إِخفْ نّسْ زَّاثْ إِ ينِّي أَكِيذسْ مَارَّا ؤُشَا إِڒَاغَا: ”سُوفّْغمْ مَارَّا إِنِّي أَكِيذِي ذَا!“ وَارْ إِقِّيمْ حذْ أَكِيذسْ ڒَامِي إِسّْشنْ يُوسُوفْ إِ يَايْثْمَاسْ مِينْ إِعْنَا. ‏2 ڒخْذنِّي يَارْخُو ثْمِيجَّا نّسْ س إِغُويَّانْ، أَڒَامِي ذ أَسْ سْڒِينْ إِمِيصْرِييّنْ ؤُڒَا ذ ثَادَّارْثْ ن فِيرْعُونْ ثسْڒَا أَيَا. ‏3 إِنَّا يُوسُوفْ إِ يَايْثْمَاسْ: ”نشّْ ذ يُوسُوفْ! مَا إِدَّارْ عَاذْ بَابَا؟ أَيْثْمَاسْ وَارْ زمَّارنْ أَذْ خَاسْ أَرّنْ، مِينْزِي ثُوغَا ڭّْوذنْ زَّايسْ. ‏4 إِنَّا يُوسُوفْ إِ يَايْثْمَاسْ: ”قَارّْبمْ-د ڒخُّو غَارِي!“ ؤُشَا نِيثْنِي قَارّْبنْ غَارسْ. إِنَّا خنِّي: ”نشّْ ذ يُوسُوفْ ؤُمَاثْومْ، ونِّي ثزّنْزمْ إِ مِيصْرَا. ^▪   ‏5 ڒخُّو، وَارْ كسِّيمْ س ومْنُوسْ ؤُ وَارْ ث تّجِّيمْ أَذْ يِيڒِي ذ أَخيّقْ ذِي ثِيطَّاوِينْ نْومْ ؤُمِي ذ أَيِي ثزّنْزمْ ذَانِيثَا إِ مِيصْرَا، أَقَا أَربِّي إِسّكّْ أَيِي-د مَاحنْذْ أَذْ كنِّيوْ جّغْ ثدَّارمْ. ^▪   ‏6 أَقَا ڒخُّو عَاذْ ثْنَاينْ ن إِسڭّْوُوسَا ن ڒَاژْ ذِي ثمُّورْثْ ؤُشَا أَقَا إِقِّيمْ عَاذْ خمْسَا ن إِسڭّْوُوسَا وَارْ ذَايْسنْ إِتِّيڒِي ثْيَارْزَا نِيغْ ثَاميْرَا. ‏7 مَاشَا أَربِّي إِسّكّْ أَيِي-د زَّاثْومْ، حِيمَا أَذْ أَومْ ڭّغْ مِينْ إِقِّيمنْ خْ ثمُّورْثْ ؤُ حِيمَا أَذْ حْضِيغْ ثُوذَارْثْ نْومْ إِ يِيجّْ ن ؤُسنْجمْ إِمْغَارْ. ‏8 أَمُّو ڒخُّو، كنِّيوْ وَارْ ذ أَيِي د-ثسّكّمْ شَا ذَا، مَاشَا أَربِّي ذ ونِّي ذ أَيِي إِڭِّينْ ذ ثَابَابَاثْ إِ فِيرْعُونْ ذ سِيذِي خْ مَارَّا ثَادَّارْثْ نّسْ ذ ڒْحَاكمْ خْ مَارَّا ثَامُّورْثْ ن مِيصْرَا. ‏9 قدْجْقمْ ذغْيَا، سْڭعّْذمْ غَارْ بَابَا، إِنِيمْ أَسْ: ’أَمُّو إِ إِقَّارْ مِّيشْ يُوسُوفْ: أَربِّي إِڭَّا أَيِي ذ سِيذِي ن مَارَّا مِيصْرَا. أَرَاحْ-د غَارِي، وَارْ تّعْڭِيزْ.

‏10 أَذْ ثْزذْغذْ ذِي ثمُّورْثْ ن جُوشَانْ أَذْ ثِيڒِيذْ زَّاثِي، شكْ ذ إِحنْجِيرنْ نّكْ، ذ إِحنْجِيرنْ ن إِحنْجِيرنْ نّكْ، ذ وُودْجِي ذ إِفُونَاسنْ ذ ثْفُونَاسِينْ ؤُڒَا ذ مَارَّا مِينْ غَاركْ.

‏11 أَذْ أَشْ ڭّغْ أَرْزقْ ذِينْ، مِينْزِي أَذْ د-أَسنْ عَاذْ خمْسَا ن إِسڭّْوُوسَا ن ڒَاژْ، حِيمَا وَارْ ثتّضْعِيفذْ، شكْ لَّ، ثَادَّارْثْ نّكْ لَّ، ؤُڒَا ذ مَارَّا مِينْ غَاركْ لَّ!

‏12 خْزَارْ، كنِّيوْ ؤُڒَا ذ ؤُمَا بِينْيَامِينْ ثتّْوَاڒَامْ س ثِيطَّاوِينْ نْومْ، أَقَا ذ نشّْ إِ كِيذْومْ إِسَّاوَاڒنْ.

‏13 عڒْممْ إِ بَابَا خْ مَارَّا أَعُودْجِي إِنُو ذِي مِيصْرَا ؤُ خْ مَارَّا مِينْ ثژْرِيمْ. قدْجْقمْ ذغْيَا، ثِيوْيمْ-د بَابَا ذَا.“ ^▪  

‏14 ؤُشَا إِنْڭزْ خْ يِيرِي ن بِينْيَامِينْ ؤُمَاسْ، إِرُو، ؤُشَا بِينْيَامِينْ إِرُو خْ يِيرِي نّسْ.

‏15 إِسُّوذمْ مَارَّا أَيْثْمَاسْ، إِرُو خَاسنْ. أَوَارْنِي مَانْ أَيَا سِّيوْڒنْ أَكِيذسْ أَيْثْمَاسْ.

‏16 ڒَامِي ثسْڒَا ثَادَّارْثْ ن فِيرْعُونْ ڒخْبَارْ-أَ، نَّانْ: ”أَيْثْمَاسْ ن يُوسُوفْ ؤُسِينْ-د!“. ثُوغَا-ث ذ ڒخْبَارْ أَسبْحَانْ ذِي ثِيطَّاوِينْ ن فِيرْعُونْ ذ إِمْسخَّارنْ نّسْ.

‏17 إِنَّا فِيرْعُونْ إِ يُوسُوفْ: ”إِنِي إِ أَيْثْمَاشْ: ’ڭّمْ أَيَا: سَارْپُومْ زْوَايڒْ نْومْ ؤُشَا ڭعّْذمْ، رُوحمْ غَارْ ثمُّورْثْ ن كنْعَانْ.

‏18 كْسِيمْ-د بَابَاثْومْ ذ رَادْجْ نْومْ، ثُوسِيمْ-د غَارِي ؤُشَا أَقَا أَذْ أَومْ وْشغْ لمْلِيحْ ن ثمُّورْثْ ن مِيصْرَا ؤُشَا أَذْ ثشّمْ زِي مِينْ إِشْنَانْ ن ثمُّورْثْ. ^▫  

‏19 ذ مَانْ أَيَا إِ ذ أَومْ ؤُمُورغْ، ڭّمْ أَيَا: كْسِيمْ زِي ثمُّورْثْ ن مِيصْرَا إِكَارُّوثنْ إِ إِحنْجِيرنْ نْومْ ؤُ إِ ثمْغَارِينْ نْومْ، أَوْيمْ-د زَّايسْ بَابَاثْومْ ؤُشَا أَسمْ-د ذَا. ‏20 وَارْ ثجِّيمْ ثِيطَّاوِينْ نْومْ أَذْ سّْحِيسّْفنْثْ إِ ڒْقشّْ نْومْ، مِينْزِي لمْلِيحْ ن ثمُّورْثْ ن مِيصْرَا أَذْ يِيڒِي نْومْ.‘ “

‏21 ؤُشَا أَمُّو إِ ڭِّينْ أَيْثْ ن إِسْرَائِيل. إِوْشَا أَسنْ يُوسُوفْ إِكَارُّوثنْ خْ وَاوَاڒْ ن ڒُومُورْ ن فِيرْعُونْ ؤُشَا إِوْشَا أَسنْ عَاوذْ مَاشَّا إِ وبْرِيذْ. ‏22 إِوْشَا إِ كُوڒْ إِجّْ زَّايْسنْ وحّْذسْ أَرُّوضْ ن جْذِيذْ، مَاشَا إِ بِينْيَامِينْ إِوْشَا أَسْ ثڒْثْ-مْيَا ن ؤُقِييَّاثْ ن نُّوقَارْثْ ذ خمْسَا ن ثْيُويَا ن وَارُّوضْ ذ جْذِيذْ. ‏23 ؤُ أَمُّو عَاوذْ إِسّكّْ إِ بَابَاسْ عشْرَا ن يغْيَاڒْ شُّورنْ س مِينْ إِفَارْزنْ ن مِيصْرَا ؤُ عشْرَا ن ثغْيَاڒْ شُّورنْثْ س إِمنْذِي ذ وغْرُومْ ذ مَاشَّا إِ بَابَا أَسْ خْمِي إِ غَا يِيڒِي ذڭْ وبْرِيذْ. ‏24 إِقبّضْ أَيْثْمَاسْ ؤُشَا رُوحنْ، إِنَّا أَسنْ نتَّا: ”وَارْ تّْمنْغِيمْ شَا ذڭْ وبْرِيذْ.“ ‏25 ڭَاعّْذنْ زِي مِيصْرَا، إِوْضنْ غَارْ ثمُّورْثْ ن كنْعَانْ غَارْ يَاعْقُوبْ، بَابَاثْسنْ. ‏26 وْشِينْ أَسْ ڒخْبَارْ، نَّانْ: ”يُوسُوفْ أَقَا إِدَّارْ عَاذْ، وَاهْ، أَقَا-ث ذ ڒْحَاكمْ ن مَارَّا ثَامُّورْثْ ن مِيصْرَا!“ خنِّي إِسْخفْ وُوڒْ نّسْ، مِينْزِي وَارْ ثنْ يُومِينْ شَا. ‏27 ؤُمِي ذ أَسْ عَاوْذنْ مَارَّا أَوَاڒنْ ن يُوسُوفْ إِنِّي ذ أَسنْ إِنَّا ؤُ ڒَامِي إِژْرَا إِكَارُّوثنْ إِنِّي د-إِسّكّْ يُوسُوفْ حِيمَا أَذْ ث أَوْينْ، إِعْقبْ-د بُوحْبڒْ ن بَابَاثْسنْ يَاعْقُوبْ. ‏28 ؤُشَا إِنَّا إِسْرَائِيل: ”كْفَا! يُوسُوفْ مِّي أَقَا إِدَّارْ! أَذْ رَاحغْ ؤُشَا أَذْ ث ژَترْغْ قْبڒْ مَا أَذْ مّْثغْ!“