ثَاخْشفْثْ إِ إِڭَّا يُوسُوفْ
44
1 إِسّكّْ يُوسُوفْ غَارْ ؤُمْسخَّارْ نِّي ثُوغَا خْ ثَادَّارْثْ نّسْ، إِنَّا أَسْ: ”عمَّارْ ثِيخُونْشَايْ ن يرْيَازنْ نِّي س مَاشَّا، مَارَّا مِينْ زمَّارنْ أَذْ كْسِينْ. أڭّْ نُّوقَارْثْ ن كُوڒْ إِجّْ ذڭْ وَارْزَامْ ن ؤُقمُّومْ ن ثْخَانْشثْ نّسْ. 2 سَارْسْ ڒْكَاسْ إِنُو، ڒْكَاسْ ن نُّوقَارْثْ، ذڭْ وَارْزَامْ ن ؤُقمُّومْ ن ثْخَانْشثْ ن ؤُمژْيَانْ، أَكْ-ذ ثْمنْيَاثْ ن نُّوقَارْثْ ن يِيرْذنْ نّسْ.“ ؤُشَا إِڭَّا أَمْ مَامّشْ ذ أَسْ إِنَّا يُوسُوفْ. 3 غَارْ ضّْبحْ ؤُمِي د-يفُّو ڒْهَاڒْ، جِّينْ إِرْيَازنْ أَذْ ؤُيُورنْ، نِيثْنِي أَكْ-ذ يغْيَاڒْ نْسنْ. 4 ؤُمِي فّْغنْ نِيثْنِي زِي ثنْذِينْثْ، ثُوغَا عَاذْ وَارْ ڭّْوِيجنْ شَا، إِنَّا يُوسُوفْ إِ ونِّي ثُوغَا خْ ثَادَّارْثْ نّسْ: ”كَّارْ، ضْفَارْ إِرْيَازنْ نِّي ؤُشَا، خْمِي خَاسنْ غَا ثعْذُوذْ، إِنِي أَسنْ: ’مَاغَارْ د-ثَارَّامْ ڒْخَارْ س ڒْغَارْ؟ 5 مَا وَارْ إِدْجِي ذ وَا ذ ڒْكَاسْ إِ زِي إِسسّْ سِيذِي إِنُو ؤُ مَا وَارْ إِدْجِي س وَا إِ زِي غَا إِكَاشفْ مِينْ غَا إِمْسَارنْ ثِيوشَّا؟ أَقَا ثڭِّيمْ ڒْغَارْ ؤُمِي ثڭِّيمْ أَمْيَا.‘ “ 6 أَمْ ثنْ إِعْذُو، إِنَّا أَسنْ أَوَاڒنْ-أَ سِيمَانْثْ نْسنْ. 7 نِيثْنِي أَرِّينْ-د خَاسْ: ”مَايمِّي إِقَّارْ سِيذِي نّغْ أَوَاڒنْ-أَ؟ عمَّارْصْ أَذْ ڭّنْ إِمْسخَّارنْ نّكْ مَانْ أَيَا. 8 خْزَارْ، نُّوقَارْثْ إِ نُوفَا ذڭْ وَارْزَامْ ن ؤُقمُّومْ ن ثْخُونْشَايْ نّغْ، أَقَا نَارّْ أَشْ ت-إِ-د زِي ثمُّورْثْ ن كنْعَانْ. مَامّشْ عَاذْ إِ غَا نڭّْ أَذْ نَاشَارْ نُّوقَارْثْ نِيغْ ؤُرغْ زِي ثَادَّارْثْ ن سِيذِي نّكْ؟ 9 وِي غَارْ إِ غَا إِتّْوَافْ زڭْ إِمْسخَّارنْ نّكْ، أَذْ إِمّثْ، ؤُشَا نشِّينْ عَاوذْ أَذْ نِيڒِي ذ إِسمْغَانْ ن سِيذِي إِنُو!“
10 إِنَّا نتَّا: ”خنِّي ڒخُّو أَذْ يِيڒِي أَمْ مَامّشْ ثنَّامْ كنِّيوْ. ونِّي غَارْ ث إِ غَا نَافْ، ذ نتَّا أَذْ يِيڒِي ذ إِسْمغْ إِنُو، مَاشَا كنِّيوْ أَذْ ثِيڒِيمْ ذ إِفُورَّا.“
11 ؤُشَا كُوڒْ إِجّْ زَّايْسنْ إِقدْجقْ أَذْ إِسَّارْسْ ثَاخَانْشثْ نّسْ ذِي ثمُّورْثْ ؤُشَا مَارَّا إِذْسنْ أَرزْمنْ ثَاخَانْشثْ.
12 ؤُشَا نتَّا إِفتّشْ إِ-ثنْثْ، إِبْذَا زڭْ ؤُمقّْرَانْ ؤُ إِكمّڒْ زڭْ ؤُمژْيَانْ ؤُشَا ؤُفِينْ ڒْكَاسْ ذِي ثْخَانْشثْ ن بِينْيَامِينْ.
13 خنِّي شَارّْڭنْ أَرُّوضْ نْسنْ ؤُشَا كُوڒْ إِجّْ إِسَّارْپُو عَاوذْ خْ وغْيُوڒْ نّسْ، ؤُشَا عقْبنْ غَارْ ثنْذِينْثْ.
14 ؤُشَا يِيوضْ يَاهُوذَا أَكْ-ذ أَيْثْمَاسْ غَارْ ثَادَّارْثْ ن يُوسُوفْ، ونِّي ثُوغَا ذِينْ عَاذْ، ؤُشَا وْضَانْ أَسْ غَارْ ثمُّورْثْ زَّاثْ إِ ؤُغمْپُوبْ نّسْ.
15 إِنَّا أَسنْ يُوسُوفْ: ”مَانَا شْغڒْ-أَ إِ ثڭِّيمْ؟ مَا وَارْ ثفْهِيممْ شَا بلِّي إِجّْ ن ورْيَازْ أَمشْنَاوْ نشّْ، إِڭُّورْ أَذْ خَاسْ إِكَاشفْ نِيشَانْ؟“
16 إِنَّا يَاهُوذَا: ”مِينْ إِ غَا نِينِي إِ سِيذِيثْنغْ ذ مِينْ غَا نِينِي نِيغْ س مِينْ زِي غَا نْسڭّذْ إِخفْ نّغْ؟ أَربِّي إِقدْجبْ دّنْبْ ن إِمْسخَّارنْ نّكْ، خْزَارْ، نشِّينْ ذ إِمْسخَّارنْ ن سِيذِيثْنغْ، نشِّينْ ذ وِي غَارْ ؤُفِينْ ڒْكَاسْ.“
17 مَاشَا نتَّا يَارَّا: ”عمَّارْصْ نشّْ أَذْ ڭّغْ أَيَا! أَرْيَازْ نِّي غَارْ ؤُفِينْ ڒْكَاسْ، نتَّا أَذْ يِيڒِي ذ إِسْمغْ إِنُو، مَاشَا كنِّيوْ رُوحمْ ذِي ڒهْنَا غَارْ بَابَاثْومْ.“
18 خنِّي يِيوضْ-د يَاهُوذَا غَارسْ، إِنَّا: ”أَ سِيذِي إِنُو، أجّْ أَذْ إِسِّيوڒْ ؤُمْسخَّارْ نّكْ إِجّْ ن وَاوَاڒْ ذڭْ ؤُمزُّوغْ ن سِيذِي إِنُو ؤُ وَارْ يَارقّْ ؤُخيّقْ نّكْ خْ ؤُمْسخَّارْ نّكْ، مِينْزِي أَقَا شكْ أَمشْنَاوْ فِيرْعُونْ.
19 سِيذِي إِنُو إِسّقْسَا إِمْسخَّارنْ نّسْ، إِنَّا: ’مَا غَارْومْ عَاذْ ثَابَابَاثْ نِيغْ ثَاوْمَاثْ؟‘ 20 ؤُشَا نشِّينْ نَارَّا خْ سِيذِي إِنُو: ’أَقَا غَارْنغْ بَابَاثْنغْ ذ أَوسَّارْ ذ يِيجّْ ن ؤُحنْجِيرْ، ونِّي ذ أَسْ د-إِتّْوَاخڒْقنْ خْ ثوْسَارْ نّسْ، ذ أَمَاژُوژْ عَاذْ. ؤُمَاسْ إِمُّوثْ، نتَّا إِقِّيمْ وحّْذسْ زِي يمَّاسْ، ؤُ بَابَاسْ إِتّخْسْ إِ-ث.‘ 21 ؤُشَا شكْ ثنِّيذْ إِ إِمْسخَّارنْ نّكْ: ’أَوْيمْ ث-إِ-د ذَا غَارِي، حِيمَا أَذْ ث ژَترغْ س ثِيطَّاوِينْ إِنُو.‘ ▪ 22 ؤُشَا نشِّينْ ننَّا إِ سِيذِيثْنغْ: ’وَارْ إِزمَّارْ ؤُحنْجِيرْ أَذْ يجّْ بَابَاسْ، مِينْزِي مَاڒَا إِجَّا إِ-ث، بَابَاسْ أَذْ إِمّثْ.‘ 23 خنِّي ثنِّيذْ إِ إِمْسخَّارنْ نّكْ: ’مَاڒَا ؤُمَاثْومْ أَمَاژُوژْ وَارْ د-يُوسِي أَكِيذْومْ، وَارْ ثْژَارّمْ عَاذْ ؤُذمْ إِنُو.‘ ▪ 24 ؤُ ڒَامِي نْڭعّذْ غَارْ بَابَا، أَمْسخَّارْ نّكْ، نسّعْذُو أَسْ أَوَاڒنْ ن سِيذِيثْنغْ. 25 ؤُشَا بَابَاثْنغْ إِنَّا: ’عقْبمْ عَاوذْ مَاحنْذْ أَذْ ثسْغمْ شْوَايْثْ ن مَاشَّا إِ نشِّينْ.‘ 26 نشِّينْ نَارَّا-د: ’وَارْ نْزمَّارْ أَذْ نْرَاحْ. مَاشَا مَاڒَا ؤُمَاثْنغْ إِرُوحْ أَكِيذْنغْ، أَذْ نْرَاحْ، مِينْزِي وَارْ نْزمَّارْ أَذْ نْژَارْ ؤُذمْ ن ورْيَازْ نِّي، مْغِيرْ مَاڒَا أَقَا أَكِيذْنغْ ؤُمَاثْنغْ أَمژْيَانْ.‘ 27 خنِّي إِنَّا أَنغْ ؤُمْسخَّارْ نّكْ، بَابَاثْنغْ: ’كنِّيوْ ثسّْنمْ بلِّي ثْنَاينْ ن إِحنْجِيرنْ إِ ذ أَيِي د-ثُورُووْ ثمْغَارْثْ إِنُو. 28 إِفّغْ إِجّنْ زِي غَارِي ؤُشَا نِّيغْ: أَقَا س ثِيذتّْ إِتّْوَابتّقْ! ؤُ أَڒْ ڒخُّو عَاذْ وَارْ ث ژْرِيغْ. ▪ 29 مَاڒَا عَاوذْ ثكّْسمْ أَيِي وَا ؤُشَا إِمْسَارْ شَا ن ڒْغَارْ، أَذْ ثسّهْوَامْ شِّيبْ إِنُو س وشْضَانْ غَارْ ڒَاخَارْثْ!‘ ▪ 30 ڒخُّو خنِّي، مَاڒَا رُوحغْ نشّْ غَارْ ؤُمْسخَّارْ نّكْ، بَابَا، ؤُشَا أَحنْجِيرْ وَارْ كِيذِي إِدْجِي، - ڒعْمَارْ نّسْ إِڒْصقْ غَارْ ڒعْمَارْ ن بَابَاسْ - ، 31 أَقَا إِڭُّورْ أَذْ إِمّثْ خْمِي إِ غَا إِژَارْ أَحنْجِيرْ وَارْ إِدْجِي، ؤُشَا إِمْسخَّارنْ نّكْ أَذْ سّهْوَانْ شِّيبْ ن ؤُمْسخَّارْ نّكْ، بَابَاثْنغْ، س وشْضَانْ غَارْ ڒَاخَارْثْ. 32 أَقَا زعْمَا أَمْسخَّارْ نّكْ ذ أَضْمَانْ إِ ؤُحنْجِيرْ-أَ غَارْ بَابَا ؤُمِي إِنَّا: ’مَاڒَا وَارْ ذ أَشْ ث-إِ-د-أَرِّيغْ، ڒخْذنِّي نشّْ أَذْ إِڒِيغْ ذ أَمذْنُوبْ إِ بَابَا إِ ڒبْذَا!‘ ▪ 33 إِوَا ڒخُّو، أجّْ أَمْسخَّارْ نّكْ أَذْ إِقِّيمْ ذڭْ ومْشَانْ ن ؤُحنْجِيرْ-أَ أَمْ إِسْمغْ غَارْ سِيذِي إِنُو، ؤُشَا أجّْ أَحنْجِيرْ أَذْ إِرَاحْ أَكْ-ذ أَيْثْمَاسْ! 34 مَاغَارْ مَامّشْ إِ غَا ڭّغْ أَذْ ڭعّْذغْ غَارْ بَابَا، بْڒَا أَحنْجِيرْ-أَ أَكِيذِي؟ مَامّشْ إِ غَا ژَترغْ ڒمْحَاينْ إِ د غَا إِوْضَانْ خْ بَابَا؟“