أَذِْلِيسْ إِقدّسنْ

ڒْعَاهْذْ أَقْذِيمْ 

ذڭْ ؤُمزْوَارُو إِخْڒقْ-د أَربِّي أَجنَّا ذ ثمُّورْثْ ذ مَارَّا مِينْ ذَايْسنْ. إِخْڒقْ إِثنْ-د مَارَّا ذِي ستَّا ن وُوسَّانْ. ذڭْ وَاسّْ وِيسّْ ستَّا إِخْڒقْ-د بْنَاذمْ: أَذَامْ. زڭْ ؤُغزْذِيسْ ن أَذَامْ إِكْسِي أَربِّي حَاوَا ؤُشَا إِڭَّا إِ-ت ذ ثَامْغَارْثْ إِ أَذَامْ، ؤُشَا إِڭَّا إِ-ثنْ س ثْنَاينْ ذِي جّنّثْ ن عَاذْنْ. ذڭْ وَاسّْ وِيسّْ سبْعَا يَاريّحْ أَربِّي زِي مَارَّا مِينْ د-إِخْڒقْ ذ مِينْ إِڭَّا. (خْزَارْ أَذْلِيسْ أَمزْوَارُو 1 ذ 2). 

أَذْلِيسْ إِقَّارْ: ”ؤُشَا إِژْرَا أَربِّي مَارَّا مِينْ إِڭَّا، ؤُ خْزَارْ، ثُوغَا إِصْبحْ أَطَّاسْ. ثذْوڒْ ذ ثَامذِّيثْ ؤُشَا إِذْوڒْ ذ صّْبحْ: أَسّْ وِيسّْ ستَّا. أَمُّو إِ إِتّْوَاكمّڒْ ؤُجنَّا ذ ثمُّورْثْ ذ قَاعْ أَستّفْ نْسنْ ن ثْزمَّارْ.  ذڭْ وَاسّْ وِيسّْ سبْعَا إِكمّڒْ أَربِّي ڒْْخذْمثْ نّسْ إِ إِڭَّا ؤُشَا يَاريّحْ ذڭْ وَاسّْ وِيسّْ سبْعَا زِي مَارَّا ڒْْخذْمثْ نّسْ إِ إِڭَّا. إِبَاركْ أَربِّي أَسّْ وِيسّْ سبْعَا ؤُشَا إِقدّسْ إِ-ث، مِينْزِي ذَايسْ إِ يَاريّحْ زِي مَارَّا ڒْْخذْمثْ نّسْ إِ د-إِخْڒقْ أَربِّي مَاحنْذْ أَذْ ت إِڭّْ أَمنِّي. " (أَمزْوَارُو 1:31-2:3).

سْ ثِيذتّْ ثُوغَا أَذَامْ ذ مِّيسْ ن أَربِّي أَمزْوَارُو إِ د-إِخْڒقْ (خْزَارْ عَاوذْ لُوكَا 3:38). أَربِّي وَارْ غَارسْ بُو ثمْغَارْثْ أَمْ بْنَاذمْ إِفنَّانْ ذ أَمذْنُوبْ غَارسْ ثَامْغَارْثْ ؤُشَا يُويُورْ أَكِيذسْ. هَاشَا، أَربِّي ذ أَمْقدَّاسْ، وَارْ إِزمَّارْ أَذْ إِقْبڒْ ؤُڒَا ذ إِجّْ ن بْنَاذمْ ذ أَمذْنُوبْ أَذْ يِيڒِي أَكِيذسْ. إِخْڒقْ-د أَربِّي أَذَامْ زڭْ ؤُشَاڒْ ن ثمُّورْثْ ؤُشَا خنِّي إِڭَّا أَربِّي حَاوَا زڭْ ؤُغزْذِيسْ نّسْ. مَانْ ونْ إِدْجَانْ ذ بَابَاسْ ن أَذَامْ ؟  مْغِيرْ أَربِّي ذ ونِّي إِ إِدْجَانْ ذ بَابَاسْ ن أَذَامْ. مَا نْزمَّارْ أَذْ نِينِي: أَربِّي وَارْ غَارسْ بُو مِّيسْ أَمْ ث قَّارنْ وَاطَّاسْ ن إِوْذَانْ ؟ عمَّارْصْ. س ثِيذتّْ أَربِّي غَارسْ إِجّْ ن مِّيسْ إِ د-إِڭَّا زڭْ ؤُشَاڒْ ن ثمُّورْثْ ڒَْامِي د-إِصُوضْ ڒعْوِينْ ن ثُوذَارْثْ ذڭْ ونْژَارنْ نّسْ (أَمز. 2:7) ؤُشَا إِذْوڒْ ذ إِجّْ ن بْنَاذمْ إِدَّارنْ!

أَوَارْنِي مَانْ أَيَا إِمْسَارْ أَقَا أَذَامْ ذ حَاوَا خْضَانْ أَكْ-ذ أَربِّي، كْسِينْ زِي ڒْغِيدْجثْ ن ثْشجَّارْثْ ن ثُوسّْنَا ن ڒْْخَارْ ذ ڒْْغَارْ ذِي ڒْوسْثْ ن جّنّثْ أَوَارْنِي ڒَْامِي إِغْوَا شِّيطَانْ حَاوَا، ڒَْامِي خَاسْ د-إِخْضڒْ س وَادُّوذْ ن ؤُفِيغَارْ ... خَاسْ ؤُشَا ثوْشَا حَاوَا زِي ڒْْغِيدْجثْ ن ثْشجَّارْثْ إِ أَذَامْ. نتَّا وَارْ يُوڭِي، إِخْضَا أَكْ-ذ أَربِّي زِي مِينْزِي يُومُورْ أَربِّي أَذَامْ مَاحنْذْ وَارْ تّتّنْ زِي ثْشجَّارْثْ ن ثُوسّْنَا ن ڒْْخَارْ ذ ڒْْغَارْ، ؤُڒَا زِي ثْشجَّارْثْ ن ثُوذَارْثْ، ثِينِّي زِي ڒْوسْثْ ن جّنّثْ عَاذْنْ. 

أَذَامْ ثُوغَا غَارسْ ثُوذَارْثْ أَكْ-ذ أَربِّي إِ ڒبْذَا، ثُوغَا غَارسْ ڒهْنَا ذ مَارَّا ڒْْخَارْ ن جّنّثْ ن عَاذْنْ! مَاشَا إِسّخْسَارْ مَارَّا أَيَا س إِجّْ ن دّنْبْ إِ إِجَّا أَذْ ث ثڭّْ ثَامْغَارْثْ نّسْ، خنِّي نتَّا س يِيخفْ نّسْ إِخْضَا أَكْ-ذ أَربِّي. إِسُّوفّغْ أَربِّي أَذَامْ ذ حَاوَا زِي جّنّثْ ن عَاذْنْ، يَارزُّو أَذْ إِنغْ بْنَاذمْ زڭْ ؤُغزْذِيسْ ن دّنْبْ إِ إِڭَّا أَذَامْ، مَاشَا زڭْ ؤُغزْذِيسْ ن أَرّحْمثْ نّسْ ثَامقّْرَانْثْ إِخْسْ أَربِّي أَذْ إِسّنْجمْ بْنَاذمْ ... 

أَوَارْنِي ڒَامِي إِسُّوفّغْ أَربِّي أَذَامْ ذ حَاوَا زِي جّنّثْ ن عَاذْنْ، سّضْحَانْ نِيثْنِي إِجّْ زڭْ ونّغْنِي، ذوْڒنْ ذ إِوْذَانْ إِفنَّانْ، وَارْ غَارْسنْ عَاذْ ثُوذَارْثْ إِتّْذُومَانْ أَكْ-ذ أَربِّي أَمْ قْبڒْ. 

مَاشَا أَربِّي ذ ونِّي، أَقَا-ث ذ ثُوذَارْثْ إِ وَارْ إِفنِّينْ، ثُوذَارْثْ إِتّْذُومَانْ إِ إِدْجَانْ زِي ڒبْذَا ؤُشَا أَذْ ثِيڒِي إِ ڒبْذَا ن ڒبْذَاثْ!  

سْ دّنْبْ ن بْنَاذمْ إِذْوڒْ ذِينْ إِجّْ ن وحْفُورْ ذ أَمقّْرَانْ جَارْ أَربِّي ذ بْنَاذمْ، إِجّْ ن وحْفُورْ وَارْ إِزمَّارْ ؤُڒَا ذ إِجّْ ن بْنَاذمْ أَذْ ث إِژْوَا. أَطَّاسْ ن إِوْذَانْ قَّارنْ: أَربِّي ذ أَرْحِيمْ، أَذْ ثَاغْ أَذْ أَيِي إِسَامحْ دّْنُوبْ إِ ڭِّيغْ. أَذْ ثَاغْ أَذْ زمَّارغْ أَذْ عْذُوغْ أَحْفُورْ، عَاذْ مَاڒَا إِتّْخصَّا أَيِي أَذْ كّغْ ذِي ثْمسِّي. أَمُّو إِ ذ أَسنْ إِتّْغِيڒْ إِ وَاطَّاسْ ن إِوْذَانْ. مَاشَا ثَامسْڒَاشْثْ وَارْ ثدْجِي أَمنِّي. أَربِّي وَارْ إِدْجِي ذ أَرْحِيمْ وَاهَا، مَاشَا نتَّا عَاوذْ ذ أَمْقدَّاسْ ذ أَمْسڭّذْ. مَا إِزمَّارْ أَربِّي أَذْ إِبْضڒْ ثِيفْرَاسْ نّسْ إِسڭّْذنْ أَمْ إِ غَا إِقْبڒْ إِجّْ بْنَاذمْ إِخمْجنْ أَكْ-ذ مَارَّا دّْنُوبْ نّسْ إِ إِڭَّا ؟ عمَّارْصْ. زِي جِّيهثْ نّغْنِي، مَا إِزمَّارْ أَربِّي أَذْ إِهلّكْ مَارَّا إِوْذَانْ س مِينْزِي نتَّا ذ أَمْسڭّذْ ذ أَمْقدَّاسْ ؤُ نِيثْنِي ذ إِمذْنَابْ ؟  مَا إِزمَّارْ أَربِّي أَذْ إِبْضڒْ أَرّحْمثْ ثَامقّْرَانْثْ نّسْ ذِي طّْوعْ ن ثْسڭْذَا نّسْ ؟ عمَّارْصْ! 

مِينْ ذِينْ عَاذْ …  ؟  

أَربِّي إِوْشَا إِجّْ ن وَاوَاڒْ إِ أَذَامْ ذ حَاوَا، ؤُمِي ثُوغَا إِنَّا إِ شِّيطَانْ أَمقّْرَانْ، ونِّي د-إِخضْڒنْ  غَارْ حَاوَا أَمْ ؤُفِيغَارْ: "أَذْ ڭّغْ ڒعْذَاوَاثْ جَارْ أَشْ ذ ثمْغَارْثْ، جَارْ زَّارِيعثْ نّكْ ذ زَّارِيعثْ نّسْ. ذ ثنِّي نّسْ أَذْ ثڒْبزْ أَزدْجِيفْ نّكْ، ؤُ شكْ أَذْ أَسْ ثْڒبْزذْ أَنِيرْزْ نّسْ." (خْزَارْ أَذْلِيسْ أَمزْوَارُو 3:15). 

مَانْ أَيَا إِخْسْ أَذْ يِينِي أَقَا ذِينْ إِشْثْ ن ثوَّارْثْ إِ ؤُسنْجمْ إِ أَذَامْ ذ حَاوَا س وبْرِيذْ ن وَاوَاڒْ إِ إِوْشَا أَربِّي زِي جِّيهثْ ن زَّارِيعثْ ن ثمْغَارْثْ، إِخْسْ أَذْ يِينِي زِي جِّيهثْ ن ؤُحنْجِيرْ نّسْ. 

ثُورُو-د حَاوَا إِحنْجِيرنْ: قَايِينْ ذ هَابِيلْ ؤُ أَوَارْنِي أَسنْ إِنّغْنِي. مَاشَا قَايِينْ، أَحنْجِيرْ أَمزْوَارْ، إِنْغَا ؤُمَا أَسْ هَابِيلْ (أَحنْجِيرْ نّسْ وِيسّْ ثْنَاينْ). أَمُّو د-إِبَانْ أَقَا قَايِينْ وَارْ ث ثُوغِي ذ زَّارِيعثْ ن ثمْغَارْثْ إِ إِوَاعْذْ أَربِّي إِ حَاوَا، مِينْزِي نتَّا وَارْ إِڒْبِيزْ شَا أَزدْجِيفْ ن ؤُفِيغَارْ، مَاشَا إِنْغَا ؤُمَا أَسْ. أَربِّي إِڭَّا أَذْ إِسّكّْ قَايِينْ غَارْ إِجّْ ن ومْشَانْ إِڭّْوجْ. "خنِّي إِنَّا قَايِينْ إِ سِيذِي: 'لْعِيقَابْ إِنُو إِمْغَارْ ونِّي ؤُمِي وَارْ زمَّارغْ أَذْ ث كْسِيغْ. أَقَا شكْ أَسّْ-أَ ثُوژّْڒذْ-د خَافِي زڭْ ؤُغمْپُوبْ ن ثمُّورْثْ-أَ ؤُشَا زڭْ ؤُغمْپُوبْ نّكْ أَذْ تّْوَافَّارغْ، أَذْ إِڒِيغْ ذ أَمنّجْرُو ذ أَمثْلُوعْ ذِي ثمُّورْثْ ؤُشَا أَذْ يِيڒِي مَارَّا ونِّي ذ أَيِي إِ غَا يَافنْ أَذْ أَيِي إِنغْ.' خنِّي إِنَّا أَسْ سِيذِي: 'س ؤُيَا مَارَّا ونِّي إِ غَا إِنْغنْ قَايِينْ، أَذْ زَّايسْ نْثَاقْمنْ سبْعَا ن ثْوَاڒَاوِينْ.' ؤُشَا إِڭَّا سِيذِي ڒعْڒَامثْ إِ قَايِينْ بلِّي وَارْ ث إِنقّْ شَا ونِّي ث غَا يَافنْ." (أَذْلِيسْ أَمزْوَارُو 4:13-15) س ؤُينِّي نتّْوَاڒَا بلِّي أَربِّي يَارْحمْ خْ قَايِينْ، مَاشَا ذِي ڒْْوقْثْ ذ إِشْثنْ إِقِّيمْ أَربِّي إِتّطّفْ ذِي ثْسڭْذَا ذ ڒْْمَانثْ نّسْ أَمْ إِسِّيڭّْوجْ قَايِينْ زِي ثمُّورْثْ أَمْ مَامّشْ د-إِسُّوفّغْ ؤُڒَا ذ أَذَامْ ذ حَاوَا زِي جّنّثْ عَاذْنْ. مَاشَا ذِي ڒْْوقْثْ ذ إِشْثنْ إِقِّيمْ إِطّفْ ؤُڒَا ذڭْ وَاوَاڒْ نّسْ إِ إِوَاعْذْ زَّاثْ إِ وُوذمْ ن أَذَامْ ذ حَاوَا. 

 إِبَانْ-د ڒخُّو أَقَا إِحنْجِيرنْ ن أَذَامْ ذ حَاوَا ذ إِمذْنَابْ أَمْ أَذَامْ س يِيخفْ نّسْ، أَوَارْنِي ڒَْامِي إِوْضَا ذِي دّنْبْ، إِذْوڒْ ذ إِجّْ ن بْنَاذمْ ذ أَمذْنُوبْ. ؤُ مَارَّا نشِّينْ ذ ثَارْوَا ن أَذَامْ، مَانْ أَيَا إِخْسْ أَذْ يِينِي بلِّينْ نشِّينْ ذ إِمذْنَابْ. نتّْوَاڒَا خنِّي أَقَا س دّنْبْ ن إِجّنْ إِذْوڒْ دّنْبْ غَارْ مَارَّا. 

مَاشَا مَانْ ونْ زِي جِّيڒْ ن أَذَامْ ذ حَاوَا أَذْ يِيڒِي ذ أَمْسنْجمْ إِ ثُوغَا إِوَاعْذْ أَربِّي أَذَامْ ذ حَاوَا ؟  أَربِّي إِقْبڒْ ثَاغَارْصْثْ ن حَابِيلْ، مَاشَا حَابِيلْ إِمُّوثْ، أَشهَّاذْ ذ أَمزْوَارُو ذِي طّْوعْ ن لِيمَانْ ذِي أَربِّي، مِينْزِي إِذَامّنْ نّسْ إِسڭّذنْ تّْڒَاغَانْ-د إِ أَربِّي. مَاشَا هَابِيلْ س يِيخفْ نّسْ وَارْ إِزمَّارْ أَذْ إِعْذُو أَحْفُورْ ن ڒْْموْثْ نِّي د-يُوسِينْ زِي سِّيبّثْ ن دّنْبْ! س دّنْبْ ن يِيجّنْ إِمُوطِّي دّنْبْ غَارْ مَارَّا. نتّْوَاڒَا أَقَا أَوَاڒْ  إِ إِوْشَا أَربِّي وَارْ إِتّْوَاكمّڒْ عَاذْ.   

لْكُوفْرْ ذ ثُوعفّْنَا ن إِوْذَانْ خْ ثمُّورْثْ تّْرَاحْ تّْمَارْنِي عَاذْ كْثَارْ. وَارْ نْذِيمنْ وَارْ ثُوبنْ شَا ذِي سِّيبّثْ ن مَارَّا مِينْ إِمْسَارنْ أَكْ-ذ أَذَامْ ذ حَاوَا، ؤُشَا مَارَّا ؤُيُورنْ أَبْرِيذْ نْسنْ. أَربِّي ثُوغَا إِخْسْ أَذْ ثنْ إِسّْهلّكْ مَارَّا س إِشْثْ ن سّحْڒثْ ذ ثَامقّْرَانْثْ مَاحنْذْ أَذْ غَارْقنْ مَارَّا. مَاشَا أَربِّي إِڭَّا ڒحْسَابْ إِ إِجّْ ن ورْيَازْ ذ أَمْسڭّذْ، نتَّا أَقَا-ث ذ أَذَامْ. إِخْضَارْ أَربِّي نُوحْ حِيمَا أَذْ ث إِسّنْجمْ أَكْ-ذ ثمْغَارْثْ نّسْ ذ ثْڒَاثَا ن إِحنْجِيرنْ نّسْ ذ ثمْغَارِينْ نْسنْ. يُومُورْ أَربِّي نُوحْ حِيمَا أَذْ إِبْنَا إِجّْ ن ؤُغَارَّاپُو ذ أَمقّْرَانْ ؤُشَا نُوحْ إِڭَّا مِينْ ذ أَسْ إِنَّا أَربِّي. ڒَْامِي إِكمّڒْ ڒبْنِي ن ؤُغَارَّاپُو، إِنَّا أَربِّي إِ نُوحْ: ”أَذفْ شكْ ذ مَارَّا (ڒَْادْجْ ن) ثَادَّارْثْ نّكْ ذڭْ ؤُغَارَّاپُو، مِينْزِي ژْرِيغْ شكْ ذ أَمْسڭّذْ زَّاثْ إِ وُوذمْ إِنُو ذِي جِّيڒْ-أَ." (خْزَارْ أَذْلِيسْ أَموَارُو - ؤُذمْ وِيسّْ 7:1). إِحسْبْ إِ-ث- أَربِّي ذ أَمْسڭّذْ زِي سِّيبثْ ن لِيمَانْ إِ غَارسْ ذِي أَربِّي، نُوحْ إِتِّيقّْ ذِي أَربِّي (خْزَارْ أَذْلِيسْ أَمزْوَارُو - ؤُذمْ 9:21). أَربِّي إِسّْهلّكْ مَارَّا إِوْذَانْ س سّحْڒثْ ثَامقّْرَانْثْ إِ إِڭَّا خْ ثمُّورْثْ ؤُ خْ مَارَّا ثِيقِيشَّاثِينْ ن إِذُورَارْ يُوعْڒَانْ. تّْوَاسّْنجْمنْ مْغِيرْ نُوحْ ذ ثمْغَارْثْ نّسْ ذ ثْڒَاثَا ن إِحنْجِيرنْ نّسْ أَكْ-ذ ثمْغَارِينْ نْسنْ وَاهَا، ثْمنْيَا ن إِوْذَانْ أَكْ-ذ مَارَّا إِمُودَّارنْ مِينْ خفْ إِوصَّا أَربِّي أَذْ ثنْ إِكْسِي ذڭْ ؤُغَارَّاپُو. 

مَايمِّي تّْوَاسّْنجْمنْ نِيثْنِي ؟  س مِينْزِي أَربِّي إِخْضَارْ نُوحْ ؤُ إِڭَّا أَسْ ڒحْسَابْ إِ لِيمَانْ نّسْ (مَانْ أَيَا إِخْسْ أَذْ يِينِي تِّيقّثْ نّسْ ذِي أَربِّي) ذ ثْسڭْذَا أَمْ مَامّشْ نقَّارْ ذڭْ وذْلِيسْ إِقدّْسنْ ذِي ثبْرَاثْ إِ إِعِيبْرَانِييّنْ 11:7: "س لِيمَانْ ثُوغَا نُوحْ إِتّڭّْوذْ، أَوَارْنِي ڒَْامِي ذ أَسْ إِتّْوَانَّا مِينْ ثُوغَا عَاذْ وَارْ د-إِبِيننْ، ؤُشَا إِڭَّا أَغَارَّاپُو إِ ؤُسنْجمْ ن إِحنْجِيرنْ ن ثْوَاشُونْثْ نّسْ. س مَانْ أَيَا أَقَا إِحْكمْ دُّونشْثْ ؤُشَا إِذْوڒْ ذ أَوْرِيثْ ن ثْسڭْذَا ثنِّي إِدْجَانْ عْلَاحْسَابْ لِيمَانْ."  

تّْوَاسّْنجْمنْ ثْڒَاثَا ن إِحنْجِيرنْ ن نُوحْ أَكِيذسْ: شَامْ، حَامْ ذ يَافِيطْ. ؤُرْونْ أَسنْ-د عَاوذْ إِحنْجِيرنْ. إِحنْجِيرنْ ن شَامْ ثُوغَا-ثنْ ذ عِيلَامْ، أَشُّورْ، أَرْفَاكْشَاذْ، لُوذْ ذ أَرَامْ. … أَرْفَاكْشَاذْ إِجَّا-د شَالَاحْ ؤُ شَالَاحْ إِجَّا-د عَابِيرْ. خنِّي: ”تّْوَارْونْ-د إِ عَابِيرْ ثْنَاينْ ن إِحنْجِيرنْ. إِجّنْ قَّارنْ أَسْ فَالَاجْ، مِينْزِي ذڭْ وُوسَّانْ نّسْ ثتّْوَافدْجقْ ثمُّورْثْ، ؤُ قَّارنْ إِ ؤُمَاسْ يُوقْطَانْ.“ (أَمزْوَارُو 10:25). أَذْ ثَاغْ ثُوغَا ثَامُّورْثْ قْبڒْ عَاذْ ذ إِشْثنْ ؤُشَا ثتّْوَافدْجقْ ثمُّورْثْ ذڭْ وُوسَّانْ نِّي. ذڭْ ؤُمزْرُويْ ن وخْڒَاقْ ن دُّونِّيثْ نُوفَا أَوَاڒنْ-أَ: ”ؤُشَا إِنَّا أَربِّي: ”أَذْ مُوننْ وَامَانْ إِ إِدْجَانْ سْوَادَّايْ إِ ؤُجنَّا غَارْ إِجّْ ن ومْشَانْ مَاحنْذْ أَذْ د-إِبَانْ ڒْْبَارّْ!“ ؤُشَا أَمُّو إِ ثمْسَارْ.“ (أَمزْوَارُو 1:9)

خنِّي نُوفَا بلِّي ثُوغَا ذِينْ إِجّْ ن ومْشَانْ ن وَامَانْ ؤُ أَرنْذَاذْ نّسْ إِشْثْ ن ثمُّورْثْ وَارْ ثتّْوَامْسبْضِي، ثُوژغْ، وَارْ إِدْجِي أَمْ مَامّشْ ت نُوفَا ڒخُّو: إِشْثْ ن ثَامُّورْثْ ثتّْوَامْسبْضَا ذڭْ ’إِزِييْنَانْ‘ إِمقّْرَاننْ ؤُمِي نقَّارْ إِفْرِيقِييَا، ؤُرُوبَا، أَمْرِيكَا، أَسِييَا، ؤُسْثْرَالِييَا أَكْ-ذ ثڭْزِيرِينْ نْسنْ ذ ڒبْحُورْ جَارْ أَسنْ. 

مَاڒَا ثُوغَا ذِينْ س ثِيذتّْ إِشْثْ ن ثمُّورْثْ ثُوژغْ وَارْ ث أتّْوَامْسبْضِي، أَذْ ثَاغْ ثتّْوَافدْجقْ ثمُّورْثْ نِّي ذڭْ وُوسَّانْ ن فَالَاجْ ؤُشَا بَاننْ ت إِ-د ثْحزِّيزِينْ ؤُشَا بْذَانْ وَامَانْ أَذْ أَزّْڒنْ ذَايْسنْثْ، ذوْڒنْثْ ذْ ڒبْحُورْ، أَمْ ثنْ نتّْوَارَا ڒخُّو.

مَانْ أَيَا مَارَّا إِمْسَارْ وَارْ إِدْجِي أَطَّاسْ ن إِسڭّْوُوسَا أَوَارْنِي ڒَْامِي د-ثُوسَا صّحْڒثْ. 

مَاشَا ثمْسَارْ ؤُڒَا ذ إِشْثْ ن ثْمسْڒَاشْثْ نّغْنِي ذڭْ وُوسَّانْ نِّي إِ زِي زعْمَا ’ثتّْوَافْدْجقْ‘ ثمُّورْثْ. أَوَارْنِي إِ سّحْڒثْ تّْوَابزّْعنْ إِوْذَانْ خْ ثْمُّورَا ؤُمِي إِسّمْسبْضَا أَربِّي إِڒْسَاونْ نْسنْ جَارْ أَسنْ ڒَْامِي ثُوغَا بنَّانْ لْپُورْجْ ن بَابِيلْ ذِي ثمُّورْثْ ن شِينْعَارْ (لْعِيرَاقْ ن يِيضَا). أَرزُّونْ أَذْ أَوْضنْ غَارْ ؤُجنَّا، مِينْزِي ذوْڒنْ ذ إِمْعفَّارنْ ذڭْ وُوڒَاونْ نْسنْ (خْزَارْ أَمزْوَارُو 11). أَمْ بْذَانْ سَّاوَاڒنْ س إِڒْسَاونْ إِفَارْزنْ، وَارْ زمَّارنْ عَاذْ أَذْ زذْغنْ أَكْ-ذ وَايَاوْيَا، ڭّْوذنْ إِجّْ زڭْ ونّغْنِي. مْكُوڒْ ڒْڭنْسْ إِطّفْ أَبْرِيذْ نّسْ، غَارْ إِشْثْ ن ثمُّورْثْ إِ ذ أَسنْ إِسّْشنْ أَربِّي. أَمُّو د-ذْحَارنْ ڒڭْنُوسْ ن دُّونشْثْ، دُّونشْثْ وَارْ ثدْجِي عَاذْ ذ ثمُّورْثْ ذ إِجّنْ أَمْ قْبڒْ ؤُ إِڒسْ ن بْنَاذمْ وَارْ إِدْجِي عَاذْ ذ يِيڒسْ ذ إِجّنْ أَمْ قْبڒْ ؤُ إِوْذَانْ وَارْ دْجِينْ عَاذْ ذ ڒْْڭنْسْ ذ إِجّنْ أَمْ مَامّشْ ثنْ ثُوغَا زڭْ ؤُمزْوَارُو. أَقَا ذِينْ ثِيمُّورَا إِفَارْزنْ ذ ڒڭْنُوسْ إِفَارْزنْ أَكْ-ذ إِڒْسَاونْ نْسنْ إِفَارْزنْ.

 إِخْضَارْ سِيذِي أَربِّي إِبْرَاهِيمْ، إِنَّا أَسْ: ”فّغْ زِي ثمُّورْثْ نّكْ، زِي ثمُّورْثْ مَانِي د-ثْخڒْقذْ ؤُ زِي ثَادَّارْثْ ن بَابَاشْ، رُوحْ غَارْ ثمُّورْثْ إِ ذ أَشْ إِ غَا سّشْنغْ. أَذْ زَّايكْ د-سُّوفّْغغْ إِجّْ ن ڒْْڭنْسْ إِمْغَارْ، أَذْ أَشْ بَارْكغْ ؤُ أَذْ سّمْغَارغْ إِسمْ نّكْ ؤُشَا إِڒِي ذ شكْ عَاوذْ ذ لْبَارَاكَا. أَذْ بَارْكغْ ونِّي شكْ إِ غَا إِبَارْكنْ ؤُ ونِّي شكْ إِ غَا إِنعْڒنْ، أَذْ ث نعْڒغْ. ذَايكْ إِ غَا تّْوَابَارْكنْثْ مَارَّا ثْوَاشُونِينْ ن ثمُّورْثْ.“ (أَمزْوَارُو 12:1، 2)

أَربِّي إِخْضَارْ إِبْرَاهِيمْ، إِوَاعْذْ أَسْ أَذْ زَّايسْ د-يجّْ إِجّْ ن ڒْْڭنْسْ إِمْغَارْ إِ غَا يِيڒِينْ ذ لْبَارَاكَا إِ مَارَّا ڒڭْنُوسْ. إِوَاعْذْ أَسْ عَاوذْ إِشْثْ ن ثمُّورْثْ، مَاشَا مَانْ أَيَا وَارْ إِتِّيڒِي أَمْ مَامّشْ ث إِڭَّا أَكْ-ذ ڒڭْنُوسْ ن دُّونشْثْ إِنِّي إِتّْوَامْسبْضَانْ خْ ثمُّورْثْ عْلَاحْسَابْ إِڒْسَاونْ نْسنْ ذ ثِيمُّورَا نْسنْ. لَّ، مَانْ أَيَا أَذْ يِيڒِي س وَاوَاڒْ إِ إِوْشَا أَربِّي إِ إِبْرَاهِيمْ. 

رَاجَانْ إِبْرَاهِيمْ ذ سَارَا أَذْ يِيڒِي لْوَاعْذْ إِ إِبْرَاهِيمْ، رَاجَانْ أَڒَامِي ذوْڒنْ وَارْ زمَّارنْ أَذْ طّْفنْ إِحنْجِيرنْ ؤُمِي ذوْڒنْ مْغَارنْ أَطَّاسْ. ذڭْ وُوسَّانْ نِّي إِضْهَارْ-د أَربِّي إِ إِبْرَاهِيمْ ذ سَارَا، إِوَاعْذْ إِ-ثنْ س إِجّْ ن ؤُحنْجِيرْ. أَوَارْنِي ڒَْامِي إِعْذُو ڒْْمِيجَاڒْ ن ڒْْوقْثْ إِ إِنَّا أَربِّي إِ سَارَا، ثُورُو-د أَحنْجِيرْ، ثُوغَا أَحنْجِيرْ-أَ خْ ڒحْسَابْ ن لْوَاعْذْ ن أَربِّي. مَا ثُوغَا نتَّا ذ زَّارِيعثْ إِ زِي إِوَاعْذْ أَربِّي حَاوَا ؟  أجّْ أَنغْ أَذْ نْژَارْ. 

 إِتَّارْ أَربِّي زِي إِبْرَاهِيمْ مَاحنْذْ أَذْ أَسْ إِوْشْ مِّيسْ إِسْحَاقْ ذ ثَاغَارْصْثْ (=دّْبِيحثْ). إِبْرَاهِيمْ إِسّْڭَاعّذْ ثَاخذْمشْثْ حِيمَا أَذْ إِغَارْصْ إِ مِّيسْ، مَاشَا ذِي ثْسَاعّثْ نِّي إِڒَاغَا أَسْ-د لْمَالَاكْ ن سِيذِي زڭْ ؤُجنَّا: ”إِبْرَاهِيمْ، إِبْرَاهِيمْ!“ نتَّا إِنَّا: ”نشّْ أَقَا أَيِي ذَا!“ خنِّي إِنَّا أَسْ: ”وَارْ سْوِيژِّيضْ أَفُوسْ نّكْ غَارْ ؤُحنْجِيرْ نِيغْ أَذْ أَسْ ثڭّذْ شَا، مِينْزِي ڒخُّو أَقَا سّْنغْ بلِّي ثڭّْوذذْ أَربِّي ؤُ وَارْ خَافِي ثسّْعِيزّذْ أَينِّي ن مِّيشْ.“ (أَمزْوَارُو 22:10، 11). 

مَايمِّي إِمْنعْ أَربِّي إِبْرَاهِيمْ مَاحنْذْ أَذْ إِوْشْ مِّيسْ ذ ثَاغَارْصْثْ ؤُشَا إِوْشَا أَسْ خنِّي إِزْمَارْ. مَا إِزْمَارْ حْسنْ زِي مِّيسْ ؟ عمَّارْصْ! مَايمِّي خنِّي ؟  مَا مِينْزِي أَربِّي إِخْسْ أَذْ إِجَارّبْ إِبْرَاهِيمْ وَاهَا ؟  لَّ! أَقَا ذِينْ إِشْثْ ذ ڒْْحَاجّثْ ذ ثَامقّْرَانْثْ خْ ثَانِيثَا. مَانْ ثَا ؟  أَقَا مِّيسْ ن إِبْرَاهِيمْ وَارْ إِزمَّارْ أَذْ إِكّسْ دّنْبْ إِ إِڭَّا أَذَامْ، مِينْزِي مَارَّا إِوْذَانْ ذ إِمذْنَابْ. ؤُڒَا ذ مِّيسْ ن إِبْرَاهِيمْ وَارْ إِنفّعْ إِ ؤُخدْجصْ ن دّنْبْ ن بْنَاذمْ، س مِينْزِي مَارَّا إِوْذَانْ ذ إِمذْنَابْ. ؤُڒَا ذ مِّيسْ ن إِبْرَاهِيمْ وَارْ إِزمَّارْ أَذْ إِكّسْ دّْنُوبْ إِ ذَايسْ إِزذْغنْ ؤُ ذِي مَارَّا إِوْذَانْ. 

زِي إِبْرَاهِيمْ إِتّْوَاخْڒقْ-د ڒْْڭنْسْ ن إِسْرَايِيلْ، مِينْزِي نتَّا إِجَّا-د إِسْحَاقْ، إِسْحَاقْ إِجَّا-ذ يَاعْقُوبْ ؤُ يَاعْقُوبْ إِجَّا-د 12 ن إِحنْجِيرنْ نّسْ ؤُشَا أَربِّي إِسمَّا أَسْ إِسْرَايِيلْ. خنِّي ذوْڒنْ 12 ن إِحنْجِيرنْ ذ 12 ن ثْقبَّاڒْ ن إِسْرَايِيلْ. يُوسُوفْ ذ إِجّنْ زَّايْسنْ، مَاشَا ؤُمِي أَيْثْمَاسْ شَارْهنْثْ، زّنْزنْ ث ذِي مِيصْرَا. مَاشَا يُوسُوفْ إِتِّيقّْ ذِي أَربِّي ؤُشَا أَربِّي إِڭَّا إِ-ث ذ أَجدْجِيذْ ن مِيصْرَا سَاذُو ؤُفُوسْ ن فِيرْعُونْ، أَجدْجِيذْ ن مِيصْرَا. مَاشَا ثُوغَا إِجّْ ن ڒَْاژْ ذ أَمقّْرَانْ إِڭُّورْ أَذْ إِڒْقفْ ثَامُّورْثْ ن مِيصْرَا إِ يِيجّْ ن ڒْْمِيجَاڒْ ن سبْعَا ن إِسڭّْوُوسَا أَوَارْنِي إِ سبْعَا ن إِسڭّْوُوسَا ن ؤُفيّضْ. إِزْوَارْ إِسِّيوڒْ أَربِّي خْ ڒَْاژْ نِّي إِ فِيرْعُونْ ذِي ثِيرْجَا ؤُشَا يُوسُوفْ إِفسَّارْ أَسْ مِينْ ثخْسْ أَذْ ثِينِّي ثِيرْجَا نّسْ. إِڭَّا يُوسُوفْ س ثِيغِيثْ ؤُشَا إِخمّڒْ أَطَّاسْ ن إِمنْذِي ذِي سبْعَا ن إِسڭّْوُوسَا ن ؤُفيّضْ حِيمَا أَذْ غَارْسنْ يِيڒِي مَاشَّا ذڭْ وُوسَّانْ نْ ڒَاژْ إِ د-يُوسِينْ خْ مِيصْرَا ؤُ خْ مَارَّا دُّونشْثْ. أَمُّو إِ إِسّنْجمْ يُوسُوفْ مَارَّا ڒڭْنُوسْ مَاغَارْ مَارَّا ؤُسِينْ-د غَارسْ ذِي مِيصْرَا، تَّارنْ زَّايسْ حِيمَا أَذْ طّْفنْ إِمنْذِي زڭْ إِفَاسّنْ نّسْ. ؤُڒَا ذ أَيْثْمَاسْ إِنِّي ثُوغَا يَارزُّونْ مَاشَّا، ؤُسِينْ-د غَارْ مِيسْڒَا. نِيثْنِي ؤُفِينْ أَقَا ؤُمَاثْسنْ يُوسُوفْ إِدَّارْ عَاذْ، إِذْوڒْ ذ أَجدْجِيذْ ن مِيصْرَا، ؤُشَا ڭّْوذنْ زَّايسْ. مَاشَا نتَّا يَارْحمْ خَاسنْ، إِغْفَارْ أَسنْ دّْنُوبْ نْسنْ إِ زِي كِيذسْ خْضَانْ، ؤُشَا إِوْشَا أَسنْ ؤُ إِ بَابَاسْ يَاعْقُوبْ مَاشَّا ذ إِجّْ ن ومْشَانْ ذِي ثمُّورْثْ ن مِيسْڒَا حِيمَا أَذْ ذِينْ زذْغنْ. 

ثُوغَا يُوسُوفْ ذ أَمْسنْجمْ ن دُّونشْثْ ذڭْ وُوسَّانْ نِّي، مَاشَا نتَّا وَارْ إِزمَّارْ أَذْ إِفكّْ بْنَاذمْ زِي دّْنُوبْ نّسْ ؤُ وَارْ إِزمَّارْ أَذْ إِبدّڒْ ؤُڒْ ن أَيْثْ ن إِسْرَايِيلْ أَڒَامِي وَارْ قِّيمنْ خطَّانْ أَكْ-ذ أَربِّي. نتَّا ذ إِجّْ ن ؤُمذْيَا ن إِجّْ ن ؤُجدْجِيذْ نّغْنِي ذ إِجّْ ن ؤُمْسنْجمْ نّغْنِي إِ وَارْ د-يُوسِينْ عَاذْ.

أَوَارْنِي أَطَّاسْ ن إِسڭّْوُوسَا فّْغنْ أَيْثْ ن إِسْرَايِيلْ زِي ثمُّورْثْ ن مِيصْرَا مِينْزِي إِجّْ ن فِيرْعُونْ نّغْنِي إِ وَارْ إِسِّينْ يُوسُوفْ إِسّقْسحْ خَاسنْ ثُوذَارْثْ ذِي مِيسْڒَا أَطَّاسْ. إِڭَّا إِ-ثنْ ذ إِسمْغَانْ، إِخْسْ أَذْ إِنغْ مَارَّا إِحنْجِي إِرنْ نْسنْ. مَاشَا أَربِّي إِسّنْجمْ مُوسَا زڭْ إِفَاسّنْ نْسنْ، إِجَّا ثَامْغَارْثْ ن فِيرْعُونْ أَذْ ث ثكْسِي ذ مِّيسْ غَارسْ زڭْ وَامَانْ ن يغْزَارْ ن نِيلْ نِّي ذِي ث ثڭَّا يمَّاسْ زِي ثِيڭّْوُوذِي ن ڒُْومُورْ ن فِيرْعُونْ. أَمُّو إِ يَارَّا أَربِّي مُوسَا ذ إِشْثْ نْ ڒْقشْعثْ ذڭْ إِفَاسّنْ نّسْ، إِڭَّا زَّايسْ إِجّْ ن ؤُسنْجمْ ذ أَمقّْرَانْ أَمْ يُوسُوفْ، ونِّي إِ غَا إِسّْنجْمنْ ڒْْڭنْسْ نّسْ إِسْرَايِيلْ، زڭْ إِفَاسّنْ ن فِيرْعُونْ، ونِّي ذ أَمذْيَا ن ؤُمقّْرَانْ قَاعْ ن دُّونشْثْ-أَ، أَقَا-ث ذ شِّيطَانْ. 

أَربِّي إِڭَّا مُوسَا ذ ؤُمَاسْ هَارُونْ ذ إِمْڭوَّاذنْ ن ڒْْڭنْسْ. س ؤُفُوسْ ن مُوسَا إِسّهْوَا-د أَربِّي 10 ن جّْرَايحْ إِقسْحنْ خْ ثمُّورْثْ ن مِيصْرَا مِينْزِي فِيرْعُونْ وَارْ ثنْ إِجِّي أَذْ فّْغنْ زِي مِيصْرَا مَاحنْذْ أَفْعبْذنْ أَربِّي نْسنْ. غَارْ ؤُنڭَّارْ ن جّْرِيحشْثْ وِيسّْعشْرَا إِجَّا فِيرْعُونْ أَذْ إِفّغْ ڒْْڭنْسْ ن إِسْرَايِيلْ زِي مِيصْرَا، أَوَارْنِي ڒَْامِي يُومُورْ أَربِّي أَيْثْ ن إِسْرَايِيلْ مَاحنْذْ أَذْ خثْننْ مَارَّا إِرْيَازنْ ؤُ مَاحنْذْ أَذْ غَارْصنْ إِ يِيجّْ ن إِزْمَارْ إِ كُوڒْ  إِشْثْ ن ثْوَاشُونْثْ ن أَيْثْ ن إِسْرَايِيلْ. ثُوغَا إِتّْخصَّا أَذْ رُوشّنْ إِذَامّنْ ن إِزْمَارْ بَارَّا غَارْ ثوُّورَا نْسنْ ؤُ ذغْيَا ذِي دْجِيڒثْ أَوَارْنِي ڒَْامِي غَارْصنْ إِ إِزْمَارْ، شِّينْ ث ذِي ثُوذْرِينْ نْسنْ. 

ثَاغَارْصْثْ ثَانِيثَا قَّارنْ أَسْ ثَاغَارْصْثْ ن ؤُسعْذُو (نِيغْ ’بَاسْخَا‘) مِينْزِي أَربِّي ذِي دْجِيڒثْ أَوَارْنِي ڒَْامِي ذ أَسْ غَارْصنْ ثُوغَا أَربِّي إِتّكّْ خْ ثُوذْرِينْ ن مَارَّا إِوْذَانْ ذِي مِيصْرَا، ؤُشَا مَاڒَا وَارْ إِژْرِي إِذَامّنْ خْ ڒضْرُوفْ ن ثوَّارْثْ، إِتَّاذفْ نتَّا غَارْ ثَادَّارْثْ نِّي ؤُشَا إِنقّْ أَمنْزُو. أَمُّو إِ إِنْغَا أَربِّي إِمنْزَا ن مَارَّا إِمِيسْرِييّنْ ڒَْامِي وَارْ إِژْرِي إِذَامّنْ غَارْ ثِيوُّورَا نْسنْ، زڭْ ؤُمنْزُو ن فِيرْعُونْ أَڒْ أَمنْزُو ن ثسْمغْثْ ذ إِمنْزَا نْ ڒبْهَايمْ. 

مَاشَا ذِي دْجِيڒثْ نِّي فّْغنْ أَيْثْ ن إِسْرَايِيلْ زِي مِيصْرَا. مَاشَا إِضْفَارْ إِ-ثنْ فِيرْعُونْ س ڒْْعسْكَارْ نّسْ، إِخْسْ أَذْ ثنْ إِمْنعْ أَذْ رَاحنْ. أَربِّي إِڭَّا إِجّْ ن وبْرِيذْ خْ وُوذمْ نْ ڒبْحَارْ إِ أَيْثْ ن إِسْرَايِيلْ س ؤُفُوسْ ن مُوسَا، ؤُشَا ژْوَانْ ڒبْهَارْ خْ إِضَارنْ، أَمْ ثنْ ضفَّارنْ إِمِيصْرِييّنْ. مَاشَا ؤُمِي إِوْضنْ غَارْ ؤُجمَّاضْ، إِبلّعْ أَربِّي أَبْرِيذْ نِّي، إِجَّا أَمَانْ ن ڒبْحَارْ أَذْ أَزّْڒنْ ؤُشَا غَارْقنْ إِمِيصْرِييّنْ ذِي ڒبْحَارْ س إِكَارُّوثنْ نْسنْ، وَارْ إِجِّي ؤُڒَا ذ إِجّْ زَّايْسنْ. 

ضْفَارنْ أَيْثْ ن إِسْرَايِيلْ أَبْرِيذْ إِ ذ أَسنْ إِسّْشنْ أَربِّي ذِي ڒخْڒَا، أَڒَامِي إِوْضنْ غَارْ وذْرَارْ ن سِينَا مَانِي ذ أَسنْ إِوْشَا تَّاوْرَاثْ س ؤُفُوسْ ن مُوسَا. قّْننْ إِجّْ ن ڒْْعَاهْذْ أَكْ-ذ أَربِّي مَاحنْذْ أَذْ ڭّنْ مَارَّا مِينْ يُورَانْ ذِي تَّاوْرَاثْ. ثُوغَا أَرزُّونْ أَذْ ضْفَارنْ ڒْْعَاهْذْ إِ كِيذْسنْ إِڭَّا أَربِّي.

ذِي ڒْْعَاهْذْ نِّي إِڭَّا أَربِّي أَكْ-ذ أَيْثْ ن إِسْرَايِيلْ ذَايسْ 10 ن ثوْصِييَّاثْ ن تَّاوْرَاثْ، ذَايسْ ثِيوْهِيبِينْ ذ إِكهَّاننْ ذ إِجّْ ن ؤُقِيضُونْ إِقدّْسنْ ذ إِجّْ ن ڒفْنَارْ س 7 ن ثْفَاوِينْ س زّشْثْ ذ إِشْثْ ن طَّابْڒَا س وغْرُومْ ن وسْشَانْ ذ إِجّْ ن ؤُعَالْثَارْ نْ ڒبْخُورْ ذ تَّاپُوثْ (ذَايسْ إِ تّْوَاڭّنْثْ ثْنَاينْ ن ثڒْوِيحِينْ ن وژْرُو ن تَّاوْرَاثْ إِ إِوْشَا أَربِّي إِ مُوسَا أَكْ-ذ ثَاغَّارْشْثْ ن مُوسَا ذ وغْرُومْ إِ شِّينْ أَيْثْ ن إِسْرَايِيلْ ذِي ڒخْڒَا قَّارنْ أَسْ ’مَانَّا‘) ذ إِخِيرُوبنْ (لْمَالَاكَاثْ ن أَربِّي) نِّي إِبدّنْ خْ تَّاپُوثْ أَمْ خزَّارنْ غَارْ إِذَامّنْ إِ إِسِّيزڒْ ؤُكهَّانْ أَمقّْرَانْ خْ ثْقبَّارْثْ ن وصْڒَاحْ إِ إِدْجَانْ خْ تَّاپُوثْ، ؤُ ثُوغَا ذَايسْ عَاوذْ أَطَّاسْ ن ثْمسْڒَايِينْ نّغْنِي ... خْزَارْ أَذْلِيسْ وِيسّْ ثْنَاينْ ن ڒْْعَاهْذْ أَقْذِيمْ قَّارنْ أَسْ ؤُفُّوغْ (أخْoذُوسْ، أخْoذْo، أخْoذ). 

ثُوغَا أَعُودْجِي ن أَربِّي، إِخْسْ أَذْ يِينِي ڒْْعزّْ نّسْ إِقدّْسنْ ذ صُّولْطَا نّسْ، إِزدّغْ ذڭْ وقْذَاسْ ن ؤُقدَّاسْ ذڭْ وخَّامْ ن ذَاخڒْ غَارْ ضفَّارْ ن ؤُقِيضُونْ إِقدّْسنْ، وَارْ إِزمَّارْ أَذْ ذِينْ يَاذفْ ؤُڒَا ذ إِجّْ، مْغِيرْ أَكهَّانْ أَمقّْرَانْ إِشْثْ ن ثْوَاڒَا ذڭْ ؤُسڭّْوَاسْ وَاهَا مَاحنْذْ أَذْ إِرُوشّْ إِذَامّنْ ن ثْغَارْصَا (دّْبَايحْ) خْ ثْقبَّارْثْ ن وصْڒَاحْ إِ إِدْجَانْ خْ تَّاپُوثْ ؤُڒَا خْ ثمُّورْثْ زَّاثْ إِ تَّاپُوثْ. أَربِّي ذ أَمْقدَّاسْ قَاعْ، بْنَاذمْ وَارْ إِزمَّارْ أَذْ غَارسْ د-إِقَارّبْ أَمنِّي وَاهَا! 

أَطَّاسْ ن ثْغَارْصَا إِ ثُوغَا إِتّْخصَّانْ إِ وُوذَاينْ أَذْ ثنْثْ قدّْمنْ إِ أَربِّي، وَاخَّا إِوْشَا أَسنْ ثنْثْ أَربِّي س يِيخفْ نّسْ مِينْزِي نتَّا إِخْڒقْ-د مَارَّا إِمُودَّارنْ، أَمْ إِفُونَاسنْ أَمْ إِزْمَارنْ.  أَيْثْ ن إِسْرَايِيلْ إِوْينْ ثنْثْ غَارْ ؤُعَالْثَارْ مَاحنْذْ أَذْ ثنْثْ قدّْمنْ ذ ثَاغَارْصْثْ غَارسْ. أَذْلِيسْ إِقدّْسنْ إِقَّارْ: 

"مِينْزِي ڒعْمَارْ ن أَرِّيمثْ ذڭْ إِذَامّنْ ؤُشَا نشّْ وْشِيغْ أَومْ ثنْ خْ ؤُعَالْطَارْ (=ڒْمذْبحْ) مَاحنْذْ أَذْ فْذِينْ خْ ڒعْمُورْ نْومْ، مِينْزِي إِذَامّنْ ذ إِنَا إِ غَا فْذِينْ خْ ڒعْمَارْ." (لَاوِي 17:11)

 إِبَانْ-د زڭْ وَاوَاڒنْ-أَ أَقَا أَربِّي إِحْسبْ إِذَامّنْ ذ ڒفْذِييّثْ إِ دّْنُوبْ س مِينْزِي إِذَامّنْ ذ ڒعْمَارْ ن بْنَاذمْ نِيغْ إِذَامّنْ سكّْوَانْ ڒعْمَارْ ن بْنَاذمْ. مَاشَا إِذَامّنْ ن ڒْْمَاڒْ أَيْنَاوْ وَارْ زمَّارنْ أَذْ فْذِينْ دّنْبْ ن بْنَاذمْ س ثِيذتّْ، ؤُشَا ؤُڒَا ذ إِذَامّنْ ن بْنَاذمْ أَمذْنُوبْ أَمشْنَاوْ مِّيسْ ن إِبْرَاهِيمْ وَارْ سكّْوِينْ وَالُو إِ ؤُفكِّي ن بْنَاذمْ زِي ڒْحَاڒْ نّسْ إِ ذِي إِوْضَا زڭْ وَامِي إِخْضَا أَذَامْ.

أَوَارْنِي ؤُفُوغْ زِي مِيصْرَا إِنْذهْ أَربِّي ڒْْڭنْسْ ن إِسْرَايِيلْ غَارْ ثمُّورْثْ ن كنْعَانْ نِّي إِوَاعْذْ أَربِّي زِيشْ إِ إِبْرَاهِيمْ ذ إِحنْجِيرنْ نّسْ ذ ڒْْوَارْثْ. حسْبنْ أَيْثْ ن إِسْرَايِيلْ إِخفْ نْسنْ ذ ثَارْوَا ن إِبْرَاهِيمْ ؤُشَا أَرزُّونْ أَذْ ت طّْفنْ ذ ڒْْوَارْثْ سَاذُو ؤُفُوسْ ن مُوسَا. مَاشَا ؤُمِي ژْرِينْ ثَامُّورْثْ ذ ڒڭْنُوسْ إِ ذَايسْ، ڭّْوذنْ أَطَّاسْ زڭْ ؤُمنْغِي أَكِيذْسنْ حِيمَا أَذْ ت طّْفنْ. نِيثْنِي وَارْ تِّيقّنْ (= ؤُمِيننْ) أَربِّي بلِّي نتَّا أَذْ ثنْ ت إِوْشْ ذڭْ إِفَاسّنْ نْسنْ. ؤُڭِينْ أَذْ ت أَذْفنْ. س ؤُينِّي إِجَّا إِ-ثنْ أَربِّي أَذْ ثلْعنْ أَرْبْعِينْ ن إِسڭّْوُوسَا ذِي ڒخْڒَا أَكْ-ذ مُوسَا ذ هَارُونْ، س ؤُقِيضُونْ إِقدّْسنْ ذ مَارَّا ڒقْشُوعْ نّسْ، ثلْعنْ زڭْ ومْشَانْ غَارْ ومْشَانْ نّغْنِي أَمْ ذ أَسنْ إِزْوَارْ أَربِّي ذڭْ إِجّْ ن ؤُسيْنُو س ؤُزِيڒْ ؤُ س دْجِيڒثْ نتَّا إِضْفَارْ إِ-ثنْ، إِذْوڒْ ؤُسيْنُو نِّي ذ إِجّْ ن ؤُقلِّيجْ ن ثْمسِّي غَارْ ضفَّارْ نْ ڒْڭنْسْ. أَمُّو إِ-ثنْ إِنْذهْ أَربِّي س ؤُزِيڒْ ؤُ إِسَّارْ خَاسنْ س دْجِيڒثْ أَڒَامِي وَارْ زمَّارنْ ڒْْعذْيَانْ أَذْ غَارْسنْ د-قَارّْبنْ زِي ضفَّارْ زِي سِّيبّثْ ن ؤُقلِّيجْ ن ثْمسِّي إِ ذِي ثُوغَا أَربِّي يُويُورْ أَكِيذْسنْ. 

أَوَارْنِي 40 ن إِسڭّْوُوسَا ؤُذْفنْ نِيثْنِي غَارْ ثمُّورْثْ ن كنْعَانْ سَاذُو ؤُفُوسْ ن ؤُمْڭوَّاذْ يَاشُووَا.غلّْبنْ خْ إِمزْذَاغْ ن كنْعَانْ، زذْغنْ ذِينْ عْڒَاينْ 400 ن إِسڭّْوُوسَا أَڒْ ؤُسَّانْ ن ؤُجدْجِيذْ ذَاوُوذْ، ونِّي ذ أَجدْجِيذْ وِيسّْ ثْنَاينْ ن إِسْرَايِيلْ أَوَارْنِي شَاوُولْ، ونِّي ثُوغَا ذ أَجدْجِيذْ أَمزْوَارُو. مَاشَا أَجدْجِيذْ شَاوُولْ وَارْ ثُوغِي مْلِيحْ أَكْ-ذ أَربِّي، س ؤُينِّي إِخْضَارْ أَربِّي ذَاوُوذْ ذ أَجدْجِيذْ أَوَارْنِي أَسْ.    

زِي ثمْژِي نّسْ ثُوغَا ذَاوُوذْ ذ أَمكْسَا. إِحطَّا ؤُدْجِي، ثُوغَا إِتّْمنْغَا أَكْ-ذ ڒوْحُوشْ، إِنْغَا أَيْرَاذْ. وَارْ إِتّڭّْوذْ حذْ، إِتِّيقّْ ذِي أَربِّي ن إِسْرَايِيلْ. ؤُمِي ثُوغَا ذَاوُوذْ عَاذْ ذ أَحُوذْرِي ثُوغَا أَجدْجِيذْ شَاوُولْ إِتّْمنْغَا أَكْ-ذ إِفِيلِيسْطِينِييّنْ. أَيْثْ ن إِسْرَايِيلْ ڭّْوذنْ أَطْثَاسْ ڒَْامِي جِّيحرْ ن إِفِيلِيسْطِينِييّنْ قَّارنْ أَسْ جُولِييَاثْ، إِسّحْقَارَا زَّايْسنْ، إِتَّارْ زَّايْسنْ إِجّْ ن ورْيَازْ مَاحنْذْ أَذْ كِيذسْ إِمْنغْ.ثُوغَا جُولِييَاثْ ذ أَمقّْرَانْ أَطَّاسْ، عْڒَاينْ 3 مِيثْرُو ن ڒُْوعْڒَا ؤُ غَارسْ ڒسْنَاحْ إِسَّاڭّْوَاذنْ ؤُ يَارْضْ ثَاسدَّارْثْ نْ ڒْعسْكَارْ ن وُوزَّاڒْ. مَاشَا ذَاوُوذْ يُوزّڒْ غَارسْ-د، إِغلّبْ خَاسْ س يِيسمْ ن أَربِّي ن إِسْرَايِيلْ ڒَْامِي ث إِڒْقفْ س إِجّْ ن وژْرُو:  

"إِوْثَا ذَاوُوذْ غَارْ ثشْيَارْثْ نّسْ ن ثَاروْسَا، إِكّسْ-د إِجّْ ن وژْرُو، إِحجَّارْ (إِ-ث) س إِدْجِييْ ؤُشَا إِڒْقفْ أَفِيلِيسْطِينِي ذِي ثنْيَارْثْ نّسْ. أَژْرُو إِڒْقفْ ثَانْيَارْثْ نّسْ ؤُشَا إِوْضَا نتَّا خْ ؤُغمْپُوبْ نّسْ غَارْ ثمُّورْثْ. أَمُّو إِ إِغْڒبْ ذَاوُوذْ أَفِيلِيسْطِينِي س إِجّْ ن يِيدْجِييْ ؤُ س إِجّْ ن وژْرُو. نتَّا إِڒْقفْ أَفِيلِيسْطِينِي، إِنْغَا إِ-ث. وَارْ غَارسْ ثُوغِي إِ ذَاوُوذْ قَاعْ سِّيفْ ذڭْ ؤُفُوسْ نّسْ." (1 صَامْوِيلْ  17:49، 50).

ذَاوُوذْ إِغلّبْ خْ مَارَّا ڒْْعذْيَانْ نّسْ زِي ذَاخڒْ ؤُ زِي بَارَّا ثَامُّورْثْ ن إِسْرَايِيلْ، ثَامُّورْثْ نِّي طّْفنْ نِيثْنِي ذ ڒْْوَارْثْ زڭْ ؤُفُوسْ ن إِفِيلِيسْطِينِييّنْ. نتَّا ثُوغَا إِتّخْسْ أَربِّي ن إِسْرَايِيلْ أَطَّاسْ أَڒَامِي إِخْسْ أَذْ أَسْ إِبْنَا إِشْثْ ن ثَادَّارْثْ ذِي ؤُرْشَالِيمْ، إِشْثْ ن زَّاوشْثْ ذ ثَامقّْرَانْثْ إِ أَربِّي. مَاشَا أَربِّي وَارْ ث إِجِّي أَذْ إِبْنَا ثَادَّارْثْ نِّي، زِي سِّيبّثْ ن إِذَامّنْ إِ إِسِّيزڒْ ذَاوُوذْ ذڭْ وَاطَّاسْ ن إِمنْغَانْ إِ إِمْنغْ. إِسَامْحْ أَسْ أَربِّي مَاحنْذْ أَذْ إِسّوْجذْ ڒبْنِي وَاهَا، إِنَّا أَقَا مِّيسْ سُولِيمَانْ أَذْ ت إِبْنَا. 

ثُوغَا ذَاوُوذْ ذ إِجّْ ن ؤُجدْجِيذْ ذ أَمقّْرَانْ إِ إِمّنْغنْ أَطَّاسْ س يِيسمْ ن أَربِّي ن إِسْرَايِيلْ ؤُ ثكَّا خَاسْ أَطَّاسْ ن ثَامَارَا ذ ؤُمَارّثْ. إِتِّيرَارْ لْهَارْبَا، يُورَا إِزْڒَانْ إِ أَربِّي، قَّارنْ أَسنْ 'إِزهِّيذنْ'، نتَّا ذ أَمْوَاضعْ أَطَّاسْ زَّاثْ إِ وُوذمْ ن أَربِّي، إِتّْنَابَّا خْ لْمَاسِيحْ إِ د غَا يَاسنْ أَمْ وَاطَّاسْ ن إِنَابِييّنْ إِ د-يُوسِينْ أَوَارْنِي أَسْ: إِشَاعْيَا، إِرْمِييَا، حَازْقِييَالْ، ذَانِييَالْ، حُوشِيعَا، يُووِيلْ، عَامُوسْ، عُوبَاذْيَا، يُونُوسْ، مِيخَا، نَاحُومْ، حَابَاقُّوقْ، صَافَانْيَا، حَاڭَّايِي، زَاكَارِييَّا ذ مَالَاخِي. 

مِينْ إِعْنَا لْمَاسِيحْ نِّي خفْ إِتّْنَابَّا ذَاوُوذْ ؤُڒَا ذ مَارَّا إِنَابِييّنْ ؟  أَوَاڒْ لْمَاسِيحْ إِخْسْ أَذْ يِينِي ’أَمذْهُونْ‘، إِجّْ ن بْنَاذمْ ذهْننْ ث س زّشْثْ خْ ؤُزدْجِيفْ نّسْ. إِسمْ ’خْرِيسْثُوسْ‘ (أَوَاڒْ-أَ إِفّغْ-د زڭْ إِڒسْ ن ثْيُونَانِيثْ) ذَايسْ سِيمَانْثْ ن ڒْْمعْنَا: ’أَمذْهُونْ‘. إِتّْخصَّا أَنغْ أَذْ نسّنْ أَقَا مَارَّا إِكهَّاننْ ذ إِجدْجِيذنْ ذِي إِسْرَايِيلْ تّْوَاذهْننْ. (خْزَارْ لَاوِي 4:3، 1 صَامْوِيلْ 10:1، 1 صَامْوِيلْ 16:13، 1 إِجدْجِيذنْ 1:50-53). مُوسَا إِذْهنْ عَاوذْ أَقِيضُونْ إِقدّْسنْ ذ مَارَّا ڒقْشُوعْ إِ ذَايسْ قْبڒْ مَا أَذْ بْذَانْ أَذْ ذَايسْ سخَّارنْ إِ أَربِّي. مُوسَا إِذْهنْ أَكهَّانْ هَارُونْ، ؤُشَا أَوَارْنِي أَطَّاسْ ن إِسڭّْوُوسَا إِذْهنْ أَنَابِي شَامْوِيلْ عَاوذْ شَاوُولْ، أَجدْجِيذْ أَمزْوَارُو ن إِسْرَايِيلْ، ؤُ أَوَارْنِي أَسْ ؤُڒَا ذ أَجدْجِيذْ ذَاوُوذْ. نتّْوَاڒَا خنِّي أَقَا إِجدْجِيذنْ ذ إِكهَّاننْ نِيثْنِي ذ ’إِمَاسِيحنْ‘ ن إِسْرَايِيلْ، ؤُ عَاوذْ ذَاوُوذْ سِيمَانْثْ نّسْ ثُوغَا ذ إِجّْ ن ’لْمَاسِيحْ‘، إِجّْ ن ؤُمذْهُونْ. 

مَا ثُوغَا ذَاوُوذْ ذ مَارَّا إِنَابِييّنْ تّْرَاجَانْ إِخفْ نْسنْ، ؤُمِي ثُوغَا تّْنَابَّانْ خْ لْمَاسِيحْ إِ د غَا يَاسنْ.عمَّارْصْ. مَاشَا ثُوغَا سَّاوَاڒْ خْ إِجّنْ أَذْ د-يَاسْ أَوَارْنِي أَسنْ، إِجّنْ نِّي ذ مِّيسْ ذ أَكهَّانْ ذ أَجدْجِيذْ ذڭْ يِيخفْ نّسْ ذڭْ ؤُمُورْ ذ إِجّْ، مِينْزِي عَاذْ أَجدْجِيذْ أَمقّْرَانْ ذَاوُوذْ وَارْ إِزمَّارْ أَذْ إِفكّْ إِخفْ نّسْ زِي دّنْبْ إِ إِزدّْغنْ ذڭْ وُوڒْ نّسْ. 

سْ ؤُينِّي إِوَاعْذْ أَربِّي إِ ذَاوُوذْ أَمُّو:

”ؤُمِي إِقِّيمْ ؤُجدْجِيذْ ذَاوُوذْ ذِي ثَادَّارْثْ نّسْ ؤُ سِيذِي ثُوغَا إِڭَّا أَسْ ڒهْنَا زِي مَارَّا ڒْْعذْيَانْ نّسْ إِ ذ أَسْ د-إِنّْضنْ، إِمْسَارْ، أَقَا إِنَّا ؤُجدْجِيذْ إِ ؤُنَابِي نَاثَانْ: ”خْزَارْ، نشّْ زدّْغغْ ذڭْ إِشْثْ ن ثَادَّارْثْ ن ؤُكشُّوضْ ن ثْشجَّارْثْ ن ثنْڭلْثْ، مَاشَا تَّاپُوثْ ن سِيذِي إِزدّغْ ذِي ڒْْوسْثْ ن ثْجَارْثِيڒِينْ ن ؤُقِيضُونْ.“ نَاثَانْ إِنَّا إِ ؤُجدْجِيذْ: ”ؤُيُورْ وَاهَا، أڭّْ مَارَّا مِينْ غَاركْ ذڭْ وُوڒْ نّكْ، مَاغَارْ سِيذِي أَكِيذكْ.“ 

ذِي دْجِيڒثْ نِّي إِمْسَارْ أَقَا إِفّغْ وَاوَاڒْ ن سِيذِي غَارْ نَاثَانْ، إِنَّا: ”ؤُيُورْ، إِنِي إِ ؤُمْسخَّارْ إِنُو، إِ ذَاوُوذْ: ’أَمُّو إِ إِقَّارْ سِيذِي: مَا شكْ ثخْسذْ أَذْ أَيِي ثبْنِيذْ إِشْثْ ن ثَادَّارْثْ، مَاحنْذْ أَذْ ذَايسْ زذْغغْ ؟ عمَّارْصْ وَارْ زْذِيغغْ ذڭْ إِشْثْ ن ثَادَّارْثْ زڭْ وَاسّْ ؤُمِي د-سّْڭَاعّْذغْ أَيْثْ ن إِسْرَايِيلْ زِي مِيصْرَا غَارسْ أَڒْ أَسّْ-أَ، مَاشَا ذُورّْيغْ ذڭْ إِجّْ ن ؤُقِيضُونْ، ذڭْ إِشْثْ ن ثْزذِّيغْثْ. مَانِي مَّا ذُورّْيغْ أَكْ-ذ أَيْثْ ن إِسْرَايِيلْ، مَا نشّْعمَّارْصْ سِّيوْڒغْ ؤُڒَا س إِجّْ ن وَاوَاڒْ إِ إِشْثْ زِي ثْقبَّاڒْ ن إِسْرَايِيلْ ثِينِّي إِ ؤُمُورغْ أَذْ أَرْوسنْ ڒْْڭنْسْ إِنُو إِسْرَايِيلْ، ؤُ نِّيغْ: مَايمِّي وَارْ ذ أَيِي ثبْنِيمْ إِشْثْ ن ثَادَّارْثْ ن ؤُكشُّوضْ ن ثْشجَّارْثْ ن ثنْڭلْثْ ؟ ‘ “

خنِّي ڒخُّو، أَمُّو إِ إِتّْخصَّا أَذْ ثِينِيذْ إِ ؤُمْسخَّارْ إِنُو، إِ ذَاوُوذْ: ”أَمُّو إِ إِقَّارْ سِيذِي ن ڒْْعسْكَارَاثْ: نشّْ إِوْيغْ-د شكْ زِي ڒْْكُورِي، زِي ضفَّارْ ن وُودْجِي، مَاحنْذْ أَذْ ثِيڒِيذْ ذ أَمْڭوَّاذْ خْ ڒْْڭنْسْ إِنُو، خْ إِسْرَايِيلْ. مَانِي مَا ثُويُورذْ، نشّْ أَقَا أَيِي أَكِيذكْ ؤُ نشّْ قْضِيغْ خْ مَارَّا ڒْْعذْيَانْ زَّاثْ إِ وُوذمْ نّكْ. نشّْ ڭِّيغْ أَشْ إِجّْ ن إِسمْ ذ أَمقّْرَانْ أَمشْنَاوْ إِسْمَاونْ ن إِمقّْرَاننْ نِّي إِدْجَانْ خْ ثمُّورْثْ. نشّْ نيّْشغْ إِجّْ ن ومْشَانْ إِ ڒْْڭنْسْ إِنُو، إِ إِسْرَايِيلْ، ؤُشَا ژُّوغْ ث ذِينْ مَاحنْذْ أَذْ إِزْذغْ ذڭْ ومْشَانْ نّسْ ؤُ وَارْ إِثْوَاسّنْهزِّي عَاذْ ؤُڒَا وَارْ ث سّْحصَّارِينْ عَاذْ أَيْثْ ن ڒْْمُوعْصِييّثْ أَمْ ذڭْ ؤُمزْوَارُو، زڭْ وَاسّْ نِّي ڭِّيغْ نشّْ ڒْْقُوضَاثْ خْ ڒْْڭنْسْ إِنُو إِسْرَايِيلْ. نشّْ وْشِيغْ أَشْ ڒهْنَا زِي مَارَّا ڒْْعذْيَانْ نّكْ ؤُشَا ڒخُّو أَذْ أَشْ إِسّْشنْ سِيذِي، أَقَا سِيذِي أَذْ أَشْ إِڭّْ إِشْثْ ن ثَادَّارْثْ. ڒَْامِي تّْوَاكمّْڒنْ وُوسَّانْ نّكْ ؤُشَا ثتّْوَاسَّارْسذْ ذڭْ ونْضڒْ جَارْ ڒجْذُوذْ نّكْ، أَذْ د-سّكَّارغْ زَّارِيعثْ نّكْ إِ د-إِتّفّْغنْ زِي ذَاخڒْ نّكْ ؤُ نشّْ أَذْ سّْمثْنغْ ثَاڭلْذِيثْ نّسْ. نتَّا أَذْ إِبْنَا إِشْثْ ن ثَادَّارْثْ إِ يِيسمْ إِنُو ؤُ نشّْ أَذْ سّْمثْنغْ ڒْْكُورْسِي ن ثَاڭلْذِيثْ نّسْ إِ ڒبْذَا. نشّْ أَذْ إِڒِيغْ ذ بَابَا أَسْ إِ نتَّا ؤُ نتَّا أَذْ يِيڒِي إِ نشّْ ذ مِّي. مَاڒَا نتَّا إِفَّارْيضْ، أَذْ ث أَربِّيغْ س وعْمُوذْ ذ ثيِّيثَا ن بْنَاذمْ. ثَامخْسِيوْثْ إِنُو إِشوَّارنْ وَارْ زَّايسْ تّْخنّسْ أَمْ مَامّشْ ثسّْخنْسغْ نشّْ خْ شَاوُولْ، ونِّي إِ د-كّْسغْ زِي زَّاثْ ن وُوذمْ نّكْ. ثَادَّارْثْ نّكْ ذ ثْڭلْذِيثْ نّكْ أَذْ تّْوَاسّْمثْننْثْ زَّاثْ إِ وُوذمْ نّكْ إِ ڒبْذَا، ڒْْكُورْسِي إِڭلّْذنْ نّكْ أَذْ إِقِّيمْ إِبدّْ إِ ڒبْذَا.‘ “ نَاثَانْ إِسِّيوڒْ غَارْ ذَاوُوذْ أَوَاڒنْ-أَ ذ إِجّنْ ذ مَارَّا أَسَارْڭبْ-أَ. (2 صَامْ. 7:1-17)

نثْوَاڒَا أَقَا أَربِّي إِوَاعْذْ ذَاوُوذْ إِجّْ مِّيسْ نِّي إِ غَا يِيڒِينْ خْ ڒْْكُورْسِي ن ثْڭلْذِيثْ نّسْ إِ ڒبْذَا. مَانْ أَيَا إِخْسْ أَذْ يِينِي بلِّي مِّيسْ ن ذَاوُوذْ نِّي أَذْ يِيڒِي ذ بْنَاذمْ زڭْ إِجّْ ن ؤُغزْذِيسْ مَاشَا زڭْ ؤُغزْذِيسْ نّغْنِي أَذْ يِيڒِي أَمْ أَربِّي ونِّي غَارْ ثدْجْ ثُوذَارْثْ إِ وَارْ إِفنِّينْ، مِينْزِي نغْرَا أَقَا ثَاڭلْذَا ذ ڒْْعَارْشْ ذ ثْڭلْذِيثْ ن مِّيسْ ن ذَاوُوذْ أَذْ قِّيمنْ إِ ڒبْذَا! أَمُّو إِ ثُوغَا تّْنَابّنْ عَاوذْ مَارَّا إِنَابِييّنْ خْ ثْوَاسِيثْ ن ؤُجدْجِيذْ أَمقّْرَانْ ن إِسْرَايِيلْ ؤُ خْ ثْڭلْذِيثْ إِتّْذُومَانْ إِ ڒبْذَا إِ-د غَا يَاسنْ.

مَاشَا أَمْ نِيزْوَارْ ننَّا، ذَاوُوذْ وَارْ إِزمَّارْ أَذْ إِفكّْ إِخفْ نّسْ زِي دّنْبْ إِ إِدَّارنْ ذڭْ وُوڒْ نّسْ، وَاخَّا غَارسْ ڒمْغَارثْ أَطَّاسْ ؤُڒَا ذ إِجدْجِيذنْ، ثَارْوَا نّسْ أَوَارْنِي أَسْ وَارْ زمَّارنْ، ذنّْبنْ مَاهُو،عبّْذنْ لَاصْنَامْ، فّْغنْ زڭْ وبْرِيذْ ن ؤُعْبذْ ن أَربِّي ن إِسْرَايِيلْ، فسّْذنْ زَّاوشْثْ نّسْ إِقدّْسنْ ذِي ؤُرْشَالِيمْ، سِّيذْفنْ ذَايْسنْ إِربِّيثنْ إِغْرِيبنْ أَڒَامِي إِخيّقْ أَربِّي أَطَّاسْ س وَاطَّاسْ، إِسُّوفّغْ إِ-ثنْ زِي ثمُّورْثْ إِ ذ أَسنْ إِوْشَا أَوَارْنِي ڒَْامِي د-فّْغنْ زِي مِيصْرَا، إِنْذهْ إِ-ثنْ غَارْ ثمُّورْثْ ن بَابِيلْ (لْعِيرَاقْ ن ڒخُّو). نَاپُوخَاذْنَاصَّارْ، أَجدْجِيذْ ن بَابِيلْ إِهْذمْ زَّاوشْثْ إِقدّْسنْ ذِي ؤُرْشَالِيمْ، إِوْيِي أَكِيذسْ ڒقْشُوعْ إِقدّْسنْ زَّايسْ، إِسَّارْسْ إِ-ثنْ ذِي زَّاوشْثْ ن إِربِّيثنْ نّسْ ذِي بَابِيلْ ؤُشَا ثذْوڒْ ثنْذِينْثْ ن ؤُرْشَالِيمْ ذ ڒْْخَارْبثْ ؤُ إِمزْذَاغْ ن ثمُّورْثْ، أَيْثْ ن إِسْرَايِيلْ إِنْذهْ إِ-ثنْ ذِي لْمنْفَا غَارْ بَابِيلْ، زذْغنْ ذِينْ 70 إِسڭّْوُوسَا. 

نْثَافْ خنِّي أَقَا ڒْْعَاهْذْ أَقْذِيمْ وَارْ إِنفّعْ شَا إِ أَيْثْ ن إِسْرَايِيلْ مِينْزِي نِيثْنِي وَارْ زمَّارنْ أَذْ كمّْڒنْ مَارَّا لْفَارَايِيضْ ذ ثْوصَّا إِ ذ أَسنْ إِوْشَا أَربِّي س ؤُفُوسْ ن مُوسَا. فشْڒنْ س سِّيبّثْ ن دّنْبْ إِ إِدَّارنْ ذڭْ وُوڒَاونْ ن بْنَاذمْ زڭْ وَامِي إِخْضَا أَذَامْ، بْنَاذمْ أَمزْوَارُو. أَذَامْ إِخْضَا ؤُ حَاوَا ثتّْوَاسّغْوَا. س ؤُينِّي ذوْڒنْ مَارَّا إِوْذَانْ ذ إِمذْنَابْ زڭْ وُوسَّانْ ن أَذَامْ أَڒْ ؤُسَّانْ ن نُوحْ، ؤُ زڭْ وُوسَّانْ ن نُوحْ أَڒْ ؤُسَّانْ ن إِبْرَاهِيمْ، ؤُ زڭْ وُوسَّانْ ن إِبْرَاهِيمْ أَڒْ ؤُسَّانْ ن يَاعْقُوبْ، ؤُ زڭْ وُوسَّانْ ن يَاعْقُوبْ ذ 12 إِحنْجِيرنْ نّسْ أَڒْ ؤُسَّانْ ن مُوسَا، ؤُ زڭْ وُوسَّانْ ن مُوسَا أَڒْ ؤُسَّانْ ن ؤُجدْجِيذْ ن إِسْرَايِيلْ ذَاوُوذْ، ؤُ زڭْ وُوسَّانْ ن ذَاوُوذْ أَڒْ ؤُسَّانْ ن لْمَاسِيحْ ونِّي د-إِخڒْقنْ زِي مَارْيَامْ (ثَامْغَارْثْ ثُوذَاشْثْ زِي ثقْبِيتْشْ ن ؤُجدْجِيذْ ذَاوُوذْ) س أَرُّوحْ إِقدّْسنْ.  

نْثَافْ خنِّي أَقَا أَذَامْ إِسّخْسَارْ ثُوذَارْثْ نّسْ إِتّْذُومَانْ أَكْ-ذ أَربِّي، ؤُڒَا ذ أَيْثْ ن إِسْرَايِيلْ وَارْ زمَّارنْ أَذْعذْڒنْ ثُويُورْثْ ثَامذْنُوبْثْ نْسنْ س ؤُكمّڒْ ن مَارَّا مِينْ إِتّْوَاوصَّانْ ذِي شَّارِيعَا ن مُوسَا نِيغْ س ثوْهِيبْثْ ن ڒُْوڒُوفْ ن إِمُودَّارنْ خْ ؤُعَالْثَارْ زَّاثْ إِ ؤُقِيضُونْ إِقدّْسنْ ذ زَّاوشْثْ ثَامقّْرَانْثْ نْسنْ ذِي ؤُرْشَالِيمْ إِ ؤُعْبَاذْ ن سِيذِي أَربِّي خْ ڒحْسَابْ ن لْفَارَايِيضْ ذ ثْوصَّا نّسْ. 

أَوَارْنِي 70 ن إِسڭّْوُوسَا ذِي بَابِيلْ يَارَّا أَربِّي ڒْْحَاكمْ ن لْفُورْسْ، قَّارنْ أَسْ قُورَاشْ، ونِّي إِزْوَارنْ إِطّفْ ثَاڭلْذِيثْ ن بَابِيلْ، مَاحنْذْ أَذْ إِبَارّحْ س ثِيڒلِّي إِ ڒْْڭنْسْ ن وُوذَاينْ إِ ذِينْ إِدْجَانْ. وِي ثُوغَا إِخْسْ أَذْ د-إِعْقبْ أَقَا غَارسْ تّسْرِيحْ زَّايسْ. مْغِيرْ إِجّْ ن وزْينْ ذ أَمژْيَانْ ن أَيْثْ ن إِسْرَايِيلْ طّْفنْ ثَاوَّارْثْ نِّي، ذوْڒنْ-د غَارْ ثمُّورْثْ ن يَاهُوذَا ذ ثنْذِينْثْ ن ؤُرْشَالِيمْ ذ زَّاوشْثْ ثَامقّْرَانْثْ إِ إِتّْوَاهذْمنْ أَڒْ ذْسَاسْ نّسْ. غَارْ ؤُمزْوَارُوعذْڒنْ زَّاوشْثْ، خنِّي بْنَانْ ڒحْيُوضْ عَاوذْ. إِنِّي ذ أَسنْ د-إِنّْضنْ أَرزُّونْ أَذْ ثنْ سِّيڭّْوْذنْ ذِي مَارَّا مَانْ أَيَا، مَاشَا أَربِّي إِوْشَا أَسنْ أَفُوسْ. مَاشَا ثَاڭلْذِيثْ ن إِسْرَايِيلْ وَارْ د-ثذْوِيڒْ عَاوذْ، س مِينْزِي قِّيمنْ سَاذُو ؤُفُوسْ ن لْفُورْسْ، ؤُ أَوَارْنِي أَسْ سَاذُو ؤُفُوسْ ن إِيُونَانِييّنْ ذ ڒْْحَاكمْ نْسنْ أَلِيكْسَانْذِيرْ أَمقّْرَانْ، ؤُ أَوَارْنِي أَسْ سَاذُو أَفُوسْ ن إِرُومَانِييّنْ، ڒْْوقْثْ نِّي ذِي د-إِخْڒقْ يشُّو لْمَاسِيحْ. 

مَامّشْ إِ غَا يِيڒِي خنِّي ؤُسنْجمْ ن أَربِّي إِ إِوَاعْذْ أَذَامْ ذ حَاوَا ؟  أَربِّي ثُوغَا يَارزُّو إِجّْ ن مِّيسْ ن بْنَاذمْ بْڒَا ڒْْعِيبْ ذڭْ ومْشَانْ ن أَذَامْ، مَاشَا ؤُمِي وَارْ ث يُوفِي جَارْ ثَارْوَا ن بْنَاذمْ ؤُ وَارْ ث يُوفِي عَاوذْ جَارْ أَيْثْ ن إِسْرَايِيلْ، إِسكّْ-د مِّيسْ ونِّي د-إِقَّارْصنْ زڭْ وُوذَاينْ، إِخْسْ أَذْ يِينِي زِي ثعْزَارشْثْ مَارْيَامْ، س أَرُّوحْ إِقدّْسنْ، ؤُ ثَانِيثَا ثُوغَا ت ذ زَّارِيعثْ ن ثمْغَارْثْ: يشُّو لْمَاسِيحْ. ؤُشَا ؤُمِي ثُوغَا يُوسُوفْ، ونِّي حسْبنْ نِيثْنِي ذ بَابَا أَسْ، إِفّغْ-د زِي ثَارْوَا ن ؤُجدْجِيذْ ذَاوُوذْ (وَاخَّا وَارْ ذِينْ ثدْجِي ثَاڭلْذِيثْ ذڭْ وُوسَّانْ نِّي)، ثُوغَا يشُّو لْمَاسِيهْ ذِي ڒْْوقْثْ ذ إِجّنْ ؤُڒَا ذ مِّيسْ ن ذَاوُوذْ ؤُشَا ؤُڒَا ذ مِّيسْ ن إِبْرَاهِيمْ، ونِّي إِدْجَانْ ذ بَابَاسْ ن ڒْْڭنْسْ ن إِسْرَايِيلْ. 

أَذْلِيسْ ن ؤُمزْرُويْ ن وخْڒَاقْ ن يشُّو لْمَاسِيحْ، مِّيسْ ن ذَاوُوذْ، مِّيسْ ن إِبْرَاهِيمْ إِقَّارْ (لْإِنْجِيلْ مَاتَّا 1).

 إِبْرَاهِيمْ إِجَّا-د إِسْحَاقْ، إِسْحَاقْ إِجَّا-د يَاعْقُوبْ، يَاعْقُوبْ إِجَّا-د يَاهُوذَا ذ أَيْثْمَاسْ. يَاهُوذَا إِجَّا-د فَارِيصْ ذ زَارَاحْ أَكْ-ذ ثَامَارْ، فَارِيصْ إِجَّا-د حَاصْرُونْ، حَاصْرُونْ إِجَّا-د أَرَامْ، أَرَامْ إِجَّا-د عَامِّينَاذَابْ، عَامِّينَاذَابْ إِجَّا-د نَاحْشُونْ، نَاحْشُونْ إِجَّا-د سَالْمُونْ، سَالْمُونْ إِجَّا-د بُوعَازْ أَكْ-ذ رَاحَابْ، بُوعَازْ إِجَّا-د عُوبِيذْ أَكْ-ذ رَاعُوثْ، عُوبِيذْ إِجَّا-د يَاسَّا، يَاسَّا إِجَّا-د ذَاوُوذْ، أَجدْجِيذْ، ؤُشَا ذَاوُوذْ، أَجدْجِيذْ، إِجَّا-د سُولِيمَانْ أَكْ-ذ ثمْغَارْثْ ن ؤُرِييَا. 

سُولِيمَانْ إِجَّا-د رَاحَابْعَامْ، رَاحَابْعَامْ إِجَّا-د أَبِييَا، أَبِييَا إِجَّا-د أَسَا، أَسَا إِجَّا-د يَاهُوشَافَاطْ، يَاهُوشَافَاطْ إِجَّا-د يُورَامْ، يُورَامْ إِجَّا-د عُوزِّييَا، عُوزِّييَا إِجَّا-د يُوثَامْ، يُوثَامْ إِجَّا-د أَحَازْ، أَحَازْ إِجَّا-د حِيزْقِييَا، حِيزْقِييَا إِجَّا-د مَانَاسَّا، مَانَاسَّا إِجَّا-د أَمُونْ، أَمُونْ إِجَّا-د يُوشِييَا، يُوشِييَا إِجَّا-د يَاكُونْيَا ذ أَيْثْمَاسْ ذِي ڒْْوقْثْ ن ثْمحْبَاسْثْ ذِي بَابِيلْ. 

أَوَارْنِي ڒَْامِي خَاسنْ ؤُژّْڒنْ غَارْ بَابِيلْ، يَاكُونْيَا إِجَّا-د شَاعَالْثِييِيلْ، شَاعَالْثِييِيلْ إِجَّا-د زَارُوبَّابِيلْ.  زَارُوبَّابِيلْ إِجَّا-د أَبِيهُوذْ، أَبِيهُوذْ إِجَّا- د أَلْيَاقِيمْ، أَلْيَاقِيمْ إِجَّا-د عَازُورْ، عَازُورْ إِجَّا-د صَاذُوقْ، صَاذُوقْ إِجَّا- د أَخِيمْ، أَخِيمْ إِجَّا-د أَلِييُوذْ، أَلِييُوذْ إِجَّا-د أَلِيعَازَارْ، أَلِيعَازَارْ إِجَّا-د مَاتَّانْ، مَاتَّانْ إِجَّا-د يَاعْقُوبْ، يَاعْقُوبْ إِجَّا-د يُوسُوفْ، أَرْيَازْ ن مَارْيَامْ، ثنِّي إِ د-إِجِّينْ يشُّو ؤُمِي قَّارنْ لْمَاسِيحْ. 

سْ ؤُينِّي مَارَّا أَرَّاونْ زِي إِبْرَاهِيمْ أَڒْ ذَاوُوذْ إِوْضنْ أَرْبعْطَاشْ ن وَارَّاونْ. زِي ذَاوُوذْ أَڒْ ثَامحْبَاسْثْ ذِي بَابِيلْ أَرْبعْثَاشْ ن وَارَّاونْ ؤُشَا زِي ثْمحْبَاسْثْ ذِي بَابِيلْ أَڒْ لْمَاسِيحْ أَرْبعْثَاشْ ن وَارَّاونْ. 

— أَمُّو إِ يمْسَارْ وخْڒَاقْ ن يشُّو لْمَاسِيحْ. ؤُمِي يمَّاسْ مَارْيَامْ ثُوغَا-ت ذ ثَانخْضبْثْ ن يُوسُوفْ، إِضْهَارْ-د بلِّي نتَّاثْ ثكْسِي أَعذِّيسْ زِي أَرُّوحْ إِقدّْسنْ قْبڒْ إِ غَا مڒْشنْ. ؤُمِي أَرْيَازْ نّسْ يُوسُوفْ ثُوغَا إِڭُّورْ نِيشَانْ، ؤُ وَارْ إِخْسْ شَا أَذْ ت إِسّْبهْذڒْ، ثُوغَا يَارزُّو أَذْ أَسْ إِدْجفْ س ثْنُوفّْرَا. ؤُمِي ثُوغَا إِتّْخَارَّاصْ ذِي مَانْ أَيَا، إِضْهَارْ أَسْ-د لْمَالَاكْ ن سِيذِي ذِي ثَارْجِيثْ، إِنَّا: ”أَ يُوسُوفْ، أَ مِّيسْ ن ذَاوُوذْ، وَارْ تّڭّْوذْ أَذْ د-ثَاوْيذْ مَارْيَامْ ذ ثَامْغَارْثْ نّكْ، مِينْزِي ونِّي إِ ذَايسْ د-إِخڒْقنْ، أَقَا نتَّا زِي أَرُّوحْ إِقدّْسنْ. نتَّاثْ أَذْ ثَارُووْ أَحنْجِيرْ، أَذْ ث ثْسمِّيذْ يشُّو، مِينْزِي نتَّا أَذْ إِسّنْجمْ ڒْْڭنْسْ نّسْ زِي دّْنُوبْ نْسنْ.“ 

مَارَّا أَيَا إِمْسَارْ حِيمَا أَذْ إِتّْوَاكمّڒْ مِينْ إِنَّا سِيذِي س ؤُقمُّومْ ن ؤُنَابِي، ؤُمِي إِنَّا: 

”خْژَارْ، ثَاعْزَارشْثْ أَذْ ثكْسِي دّيْسثْ ؤُشَا أَذْ ثَارُووْ أَحنْجِيرْ، أَذْ أَسْ ثڭّذْ ’عِيمَّانُو-إِلْ‘
مِينْ إِخْسْ أَذْ يِينِي: ’أَربِّي أَقَا-ث أَكِيذْنغْ‘.“ 

ڒَامِي د-إِفَاقْ يُوسُوفْ زڭْ إِضصْ، إِڭَّا أَمْ مَامّشْ ت يُومُورْ لْمَالَاكْ ن سِيذِي ؤُشَا يِيوْيِي-د ثَامْغَارْثْ نّسْ غَارسْ، ؤُشَا نتَّا وَارْ غَارسْ د-إِقَارّبْ شَا أَڒَامِي د-ثُورُووْ مِّيسْ أَمنْزُو ؤُشَا ثْسمَّا إِ-ث ’يشُّو‘. 

مَا يشُّو وَانِيثَا ذ ثِيذتّْ ذ مِّيسْ ن ذَاوُوذْ ؟  … وَاهْ، نِيشَانْ، نتَّا زِي جِّيڒْ ن ذَاوُوذْ … إِخْسْ أَذْ يِينِي أَمْ مَامّشْ تّْوَاڒَانْ إِوْذَانْ ؤُ عْلَاحْسَابْ لْفَارَايِيضْ ن شَّارِيعَا. نِيثْنِي حسّْبنْ ث ذ مِّيسْ ن يُوسُوفْ ذ مَارْيَامْ، ؤُشَا سّْننْ أَقَا غَارسْ أَيْثْمَاسْ ذ يسّْمَاسْ! (خْزَارْ لْإِنْجِيلْ مَاتَّا 12:46، 13:55-56، لْإِنْجِيلْ مَارْكُوسْ 3:31-32، 6:3 ؤُ لْإِنْجِيلْ لُوكَا 8:19-20، لْإِنْجِيلْ يُوحَانَّا 2:12). مَانْ أَيَا زِي جِّيهثْ ن وخْڒَاقْ نّسْ عْلَاحْسَابْ شَّارِيعَا.

مَاشَا زِي جِّيهثْ ن أَرُّوحْ نتَّا زِي أَرُّوحْ إِقدّْسنْ، إِخْسْ أَذْ يِينِي زِي أَربِّي، س مِينْزِي أَرُّوحْ إِقدّْسنْ ذ أَرُّوحْ ن أَربِّي. أَرُّوحْ نِيغْ بُوحْبڒْ نّغْ ذ إِجّْ ن بُوحْبڒْ إِوسّخْ زِي سِّيبّثْ ن دّْنُوبْ إِ ذَايْنغْ، مَاشَا أَرُّوحْ ن أَربِّي ذ أَمزْذَاڭْ مَارَّا، وَارْ ذَايسْ ؤُڒَا ذ إِجّْ ن ڒْْعِيبْ. س ؤُينِّي أَرُّوحْ ن أَربِّي ذ أَرُّوحْ إِقدّْسنْ. يشُّو إِتّْوَاخْڒقْ-د س أَرُّوحْ إِقدّْسنْ! ذ مَانْ أَيَا وَارْ إِمْسَارْعمَّارْسْ زڭْ وَامِي د-إِڭَّا أَربِّي إِجنْوَانْ ذ دُّونشْثْ ذ مَارَّا مِينْ ذَايسْ. 

أَذَامْ ذ مِّيسْ ن أَربِّي زڭْ ؤُشَاڒْ أَمْ مَامّشْ نِيزْوَارْ ننَّا (لْإِنْجِيلْ لُوكَا 3:38). مَا نْزمَّارْ أَذْ نِينِي أَقَا ؤُڒَا ذ يشُّو لْمَاسِيهْ ذ مِّيسْ ن أَربِّي زِي أَرُّوحْ نّسْ إِ وَارْ إِفنِّينْ ؟  وَاهْ، نتَّا زِي أَرُّوحْ إِقدّْسنْ زِي جِّيهثْ ن أَرُّوحْ نّسْ، ؤُ نتَّا زڭْ ؤُشَاڒْ زِي جِّيهثْ ن أَرِّيمثْ نّسْ إِ ذ أَسْ إِوْشِينْ أَربِّي ؤُمِي د-يُوذفْ س أَرُّوحْ إِقدّْسنْ ذڭْ ؤُعذِّيسْ ن مَارْيَامْ. أَمْ أَرُّوحْ نّسْ، أَمْ أَرِّيمثْ نّسْ، وَارْ ذَايسْ بُو دّنْبْ س مِينْزِي مَارَّا زِي أَربِّي بْڒَا مَا إِوْشَا أَسْ أَفُوسْ ؤُڒَا ذ إِجّنْ!

ڒْعَاهْذْ ن جْذِيذْ ذِي يشُّو لْمَاسِيحْ

أَقَا-ث ذ لْإِنْجِيلْ: ڒخْبَارْ  أَصبْحَانْ

قْبڒْ نتّْوَاڒَا أَقَا أَربِّي ذِي أَرّحْمثْ نّسْ ثَامقّْرَانْثْ ذ ثْسڭْذَا نّسْ إِكمّْڒنْ يَارزُّو:

- إِجّْ ن مِّيسْ ن بْنَاذمْ بْڒَا دّنْبْ ذڭْ ومْشَانْ ن أَذَامْ،

- إِجّْ ن ؤُكهَّانْ إِ إِسْذَاحدْجنْ أَذْ غَارسْ د-إِقَارّبْ ڒبْذَا، وَارْ إِدْجِي إِشْثْ ن ثْوَاڒَا ذڭْ ؤُسڭّْوَاسْ وَاهَا  س إِذَامّنْ ن ڒْْمَاڒْ إِفنَّانْ، مَاشَا س إِذَامّنْ إِمزْذَاڭنْ ن بْنَاذمْ ذ أَمزْذَاڭْ،

- إِشْثْ ن ثْغَارْصْثْ (دّْبِيحثْ) ثنِّي غَارْ إِدْجْ إِذَامّنْ ذ إِمزْذَاڭنْ حِيمَا أَذْ سِّيزْڒنْ إِذَامّنْ نِّي زَّاثسْ إِ وغْفَارْ ذ ڒفْذِييّثْ ن دّْنُوبْ،

- إِجّْ ن ؤُجدْجِيذْ ذ أَمْسڭّذْ ونِّي إِحكّْمنْ س ثِيذتّْ ذ ثْسڭْذَا، ونِّي ذ مِّيسْ ن ذَاوُوذْ إِ ڒبْذَا.

أَربِّي ثُوغَا يَارزُّو خْ مَانْ أَيَا حِيمَا أَذْ إِكمّڒْ مَارَّا أَوَاڒنْ نّسْ إِ إِڭَّا إِ أَذَامْ ذ حَاوَا، ؤُ إِ إِبْرَاهِيمْ ؤُ إِ مُوسَا ؤُ إِ ؤُجدْجِيذْ ذَاوُوذْ إِ ؤُسنْجمْ ن جِّيڒْ ن بْنَاذمْ زِي دّْنُوبْ نْسنْ.  

ڒْعَاهْذْ أَقْذِيمْ إِ إِڭَّا أَكْ-ذ مُوسَا ذ أَيْثْ ن إِسْرَايِيلْ، إِسّْشنْ أَنغْ بلِّي أَربِّي ذ أَمْقدَّاسْ ذ أَيْثْ ن إِسْرَايِيلْ ذ إِمذْنَابْ، أَمْ نِيزْوَارْ نژْرَا. مَا خنِّي ؤُذَاينْ ذ إِمذْنَابْ كْثَارْ زڭْ إِوْذَانْ زِي ڒڭْنُوسْ نّغْنِي ؟ عمَّارْصْ، مَاشَا أَربِّي إِخْضَارْ إِ-ثنْ ذ ڒْْڭنْسْ نّسْ ؤُ إِسّضْهَارْ-د ذَايْسنْ أَقَا أَربِّي ذ أَمْقدّسْ ؤُ ؤُذَايْ ذ أَمذْنُوبْ. ڒْْعَاهْذْ أَقْذِيمْ إِسّْشنْ أَنغْ أَقَا ؤُڒَا ذ إِجّْ ن بْنَاذمْ إِ د-إِقَّارْسنْ زِي أَذَامْ وَارْ إِزمَّارْ أَذْ د-يَاسْ خْ ڒْْخَاضَارْ غَارْ أَربِّي زِي سِّيبّثْ ن دّنْبْ ذڭْ وُوڒْ ن بْنَاذمْ. زِي كُوڒْ ڒْْڭنْسْ إِ إِدْجَانْ ذَايسْ إِجّْ ن بْنَاذمْ، أَربِّي وَارْ إِزمَّارْ أَذْ ث إِقْبڒْ زِي سِّيبّثْ ن دّنْبْ. 

يشُّو لْمَاسِيحْ إِقَّارْ: 

”وَارْ ذِينْ ؤُڒَا ذ إِشْثْ ن ڒْْحَاجّثْ إِ د-إِتَّاذْفنْ غَارْ بْنَاذمْ زِي بَارَّا ثْزمَّارْ أَذْ ث ثسّخْمجْ. مَاشَا مِينْ إِ د-إِتّفّْغنْ زِي بْنَاذمْ، أَقَا مَانْ أَيَا إِسّخْمَاجْ بْنَاذمْ.“ … إِنَّا أَسنْ إِ إِمحْضَارنْ نّسْ: ”مَا كنِّيوْ عَاذْ بْڒَا ڒفْهَامثْ ؟  مَا وَارْ ثفْهِيممْ شَا بلِّي مَارَّا مِينْ إِ غَا يَاذْفنْ بْنَاذمْ زِي بَارَّا، وَارْ إِزمَّارْ أَذْ ث إِسّخْمجْ، مِينْزِي مَانْ أَيَا وَارْ د-إِتِّيذفْ شَا غَارْ وُوڒْ نّسْ، مَاشَا غَارْ ؤُعذِّيسْ، خنِّي أَذْ إِفّغْ غَارْ ومْشَانْ نّسْ، أَمْ إِسِّيزْذڭْ مَارَّا مَاشَّا.“ خنِّي إِنَّا: ”مِينْ إِ د-إِتّفّْغنْ زِي بْنَاذمْ ذ مَانْ أَيَا إِسّْخمَّاجْ بْنَاذمْ. مِينْزِي زِي ذَاخڒْ، زڭْ وُوڒَاونْ ن إِوْذَانْ إِ د-إِتّفّْغنْ إِخَارِّيصنْ إِعفَّاننْ: زِّينَا، فَارْقْ-شّْغڒْ، ثُوكَّارْضَا، أَنْغَايْ، طّْمعْ، ڒْْغَارْ، ثَاحْرَايْمشْثْ، أَفُوشّحْ، ثِيطّْ ثَاعفَّانْثْ، أَشقّفْ، ثُوفّثْ، ثُوبُّوهڒْيَا. مَارَّا ثِيمسْڒَايِينْ-أَ ثِيعفَّانِينْ تّفّْغنْثْ-إِ-د زِي ذَاخڒْ ؤُشَا سّْخمَّاجنْثْ بْنَاذمْ.“  (لْإِنْجِيلْ مَارْكُوسْ 7:15-23)

لْإِنْجِيلْ إِسّضْحَارْ أَنغْ بلِّي يشُّو لْمَاسِيحْ ونِّي إِدْجَانْ زِي أَربِّي س أَرُّوحْ إِقدّْسنْ، إِتّْوَاصلّبْ أَمْ مَامّشْ نقَّارْ ذڭْ وذْلِيسْ ن ؤُنَابِي أَمقّْرَانْ إِشَاعْيَا ونِّي ثُوغَا إِنَّانْ أَوَاڒنْ-أَ عْڒَاينْ 700 ن إِسڭّْوُوسَا قْبڒْ إِ وخْڒَاقْ ن يشُّو لْمَاسِيحْ (إِشا. 53:5-7): 

”إِتّْوَاسْنُوقّبْ خْ إِعذِّيينْ نّغْ، خْ ڒْْمُوعْصِييّثْ نّغْ ڒبْزنْ ث. ثمَّارْسْ خَاسْ ثشْثِي نِّي ذ أَنغْ د-إِسَّاكّْوَاضنْ ڒهْنَا، ؤُ س إِيزِّيمنْ نّسْ إِذْوڒْ أَنغْ ذ أَڭنْفِي. مَارَّا نشِّينْ ثُوغَا نْودَّارْ أَمْ وُودْجِي، نذْوڒْ-د كُوڒْ  إِجّْ غَارْ وبْرِيذْ نّسْ، مَاشَا سِيذِي إِجَّا أَذْ خَاسْ د-ثوْضَا ڒْْمُوعْصِييّثْ نّغْ مَارَّا. ذدْجنْ ث، ؤُشَا إِجَّا إِ-ثنْ أَذْ ث سّْبهْذْڒنْ. وَارْ يَارْزِيمْ أَقمُّومْ نّسْ. أَمْ إِزْمَارْ نذْهنْ ث غَارْ ثْغَارْصْثْ، أَمشْنَاوْ ثِيخْسِي ثڭْنُو قِيبَاتْشْ إِ ونِّي ت إِدْجَاسنْ، أَمُّو وَارْ يَارْزِيمْ نتَّا أَقمُّومْ نّسْ.“ 

لْإِنْجِيلْ يُوحَانَّا إِقَّارْ: 

"أَمُّو إِخْسْ أَربِّي دُّونشْثْ أَڒْ مَانِي إِوْشَا أَينِّي ن مِّيسْ حِيمَا كُوڒْ إِجّنْ ونِّي زَّايسْ إِ غَا يَامْننْ، وَارْ إِتّْوَاهلِّيكْ شَا، مَاشَا أَذْ غَارسْ ثِيڒِي ثُوذَارْثْ إِتّْذُومَانْ." (يُوحَانَّا 3:16)

 ؤُ ثَابْرَاثْ إِ إِعْبْرَانِييّنْ ثقَّارْ:

"أَربِّي، أَوَارْنِي ڒَْامِي إِسِّيوڒْ أَطَّاسْ ن ثْوَاڒَاوِينْ ؤُ ذڭْ وَاطَّاسْ ن إِبْرِيذنْ أَكْ-ذ ڒجْذُوذْ س إِنَابِييّنْ، أَقَا إِسِّيوڒْ أَكِيذْنغْ ذڭْ وُوسَّانْ-أَ إِنڭُّورَا س مِّيسْ، ونِّي إِڭَّا ذ أَوْرِيثْ ن كُوڒْشِي، س ونِّي عَاوذْ إِ إِڭِّينْ دُّونشْثْ. وَا ذ ثَاللّشْثْ ن ؤُعُودْجِي نّسْ ؤُڒَا ذ طَّابعْ ن ثفْرَاسْ ن ثْوصَّافْ نّسْ، ونِّي يَاربُّونْ مَارَّا ثِيمسْڒَايِينْ س جّهْذْ ن وَاوَاڒْ نّسْ، أَقَا نتَّا، أَوَارْنِي ڒَْامِي إِسِّيزْذڭْ دّْنُوبْ نّغْ س يِيخفْ نّسْ، أَقَا إِقِّيمْ غَارْ يفُوسْ ن لْعَاضِيمْ ذِي ڒُْوعْڒَا. نتَّا إِمْغَارْ أَطَّاسْ خْ لْمَالَاكَاثْ أَمْ إِوَارْثْ إِسمْ إِشْنَانْ كْثَارْ زَّايْسنْ."  (إِعْبْرَانِييّنْ 1:1-3)

 ؤُشَا عَاوذْ:

”مِينْزِي لْمَاسِيحْ وَارْ يُوذِيفْ شَا ذِي زَّاوشْثْ إِقدّْسنْ إِ إِتّْوَاڭّنْ س إِفَاسّنْ، ذ ونِّي نتَّا ذ لْمَاثَالْ ن مِينْ إِدْجَانْ ذ ثِيذتّْ، مَاشَا ذڭْ ؤُجنَّا سِيمَانْثْ نّسْ، حِيمَا أَذْ د-إِضْهَارْ غَارْنغْ قِيبَاتْشْ إِ أَربِّي. وَارْ إِدْجِي عَاوذْ حِيمَا أَذْ إِقدّمْ إِخفْ نّسْ أَطَّاسْ ن ثْوَاڒَاوِينْ أَمْ مَامّشْ ثُوغَا إِتَّاذفْ أَرَّايسْ ن إِكهَّاننْ كُوڒْ أَسڭّْوَاسْ س إِذَامّنْ ن إِنّغْنِي غَارْ زَّاوشْثْ إِقدّْسنْ، - مِينْزِي مَاڒَا أَمُّو إِ إِدْجْ، إِڒِي إِتّْخصَّا أَذْ إِودّبْ أَطَّاسْ ن ثْوَاڒَاوِينْ زڭْ وَامِي ثتّْوَاڭّْ دُّونشْثْ - ، مَاشَا غَارْ ؤُنڭَّارْ ن دُّونشْثْ إِوْشَا إِخفْ نّسْ إِشْثْ ن ثْوَاڒَاثْ حِيمَا أَذْ إِبطّڒْ دّْنُوبْ س ثْغَارْصْثْ ن يِيخفْ نّسْ، أَمشْنَاوْ مَامّشْ ذ إِتّْوَاسَّارْسْ إِ إِوْذَانْ أَذْ مّثنْ إِشْثْ ن ثْوَاڒَا، خنِّي أَوَارْنِي إِ ڒْْموْثْ نْسنْ أَذْ د-يَاسْ ڒْْحُوكْمْ. أَمُّو عَاوذْ إِمّوْشْ لْمَاسِيحْ إِشْثْ ن ثْوَاڒَاثْ ذ ثَاغَارْصْثْ، إِوْشَا ذڭْ يِيخفْ نّسْ ثَاغَارْصْثْ ن دّْنُوبْ ن وَاطَّاسْ، مَاشَا غَارْ ثْوَاسِيثْ نّسْ إِ ثْوَاڒَا وِيسّْ ثْنَاينْ أَذْ إِتّْوَاژَارْ بْڒَا دّنْبْ إِ ثُوذَارْثْ ن ينِّي ث إِتّْرَاجَانْ.“ (إِعِيبْرَانِييّنْ 9:24-28)

أَذْلِيسْ إِقدّْسنْ إِسَّارْڭبْ أَنغْ أَقَا أَطَّاسْ ن وُوذَاينْ حسّْبنْ لْمَاسِيحْ ذ مِّيسْ ن ذَاوُوذْ: 

”ؤُمِي ژْرِينْ إِمقّْرَاننْ ن إِكهَّاننْ ذ إِمْسڒْمَاذنْ ن إِذْلِيسنْ لْمُوعْجِيزَاثْ إِ يڭَّا ؤُ أَقَا إِحنْجِيرنْ تّْڒَاغَانْ ذِي زَّاوشْثْ ثَامقّْرَانْثْ، قَّارنْ: ’ؤُصَانَّا إِ مِّيسْ ن ذَاوُوذْ!‘، خيّْقنْ أَطَّاسْ …“ (لْإِنْجِيلْ س ؤُفُوسْ ن مَاتَّا 21:15)

”يشُّو إِنَّا: ’مِينْ د أَومْ إِضْهَارنْ ذِي لْمَاسِيحْ ؟  ؤُمِي إِڭَّا مِّيسْ ؟ ‘ نَّانْ أَسْ: ’ن ذَاوُوذْ.‘ “ (لْإِنْجِيلْ س ؤُفُوسْ ن مَاتَّا 22:42)

’ؤُمِي إِسْڒَا بلِّي يشُّو نَّاصِيرِي أَقَا-ث ذِينْ، إِبْذَا إِسْغُويُّو، إِقَّارْ: ’أَ يشُّو، مِّيسْ ن ذَاوُوذْ، أَرْحمْ أَيِي!‘ وبّْخنْ ث أَطَّاسْ حِيمَا أَذْ إِسْقَارْ، مَاشَا نتَّا إِقِّيمْ إِسْغُويُّو كْثَارْ: ’أَ مِّيسْ ن ذَاوُوذْ، أَرْحمْ أَيِي!‘ “ (لْإِنْجِيلْ س ؤُفُوسْ ن مَارْكُوسْ 10:47، 48) 

 إِتّْوَاصلّبْ مِّيسْ ن ذَاوُوذْ وَانِيثَا عْلَاحْسَابْ نُّوپُووَاثْ إِ خَاسْ نَابّنْ إِنَابِييّنْ زِي إِسْرَايِيلْ، ؤُ عْلَاحْسَابْ أَوَاڒنْ ن لْمَاسِيحْ خْ يِيخفْ نّسْ ؤُمِي إِزْوَارْ إِسِّيوِيڒْ خْ ؤُودّبْ نّسْ إِ غَا إِمْسَارنْ ذِي ؤُرْشَالِيمْ: أَقَا أَذْ ث سلّْمنْ إِ إِمقّْرَاننْ ن ڒْْڭنْسْ ؤُ إِ إِكهَّاننْ ؤُ أَذْ خَاسْ حكْمنْ س ڒْْموْثْ خْ صَّالِيبْ ؤُشَا ذڭْ وَاسّْ وِيسْ ثْڒَاثَا أَذْ د-إِكَّارْ. مَانْ أَيَا مَارَّا إِمْسَارْ أَمْ مَامّشْ ث نَّانْ إِنَابِييّنْ ؤُڒَا ذ لْمَاسِيحْ سِيمَانْثْ نّسْ ؤُ مَارَّا أَيَا إِتّْوَارِي ذِي لْإِنْجِيلْ. 

ڒَامِي ثُوغَا يُويڒْ غَارْ صَّالِيبْ، يَارْپُو لْعِيقَابْ نِّي س ؤُغِيڒْ ثُوغَا إِتّْخصَّا أَذْ خَاسْ يِيڒِي حِيمَا أَذْ خَانغْ إِفْذِي س إِذَامّنْ نّسْ: غَارسْ نتَّا لْعِيقَابْ، غَارْنغْ نشِّينْ أَسنْجمْ ذڭْ يِيسمْ نّسْ، أَمُّو إِ إِكمّڒْ أَربِّي ثَاسڭْذَا نّسْ ذَايسْ أَڒَامِي نشِّينْ إِنِّي إِخْضَانْ، أَذْ تّْوَاسّْنجْمنْ أَمْ مَامّشْ ث ينَّا يُوحَانَّا أَمْسغْضَاصْ: 

”خْزَارمْ، أَقَا-ث ذ إِزْمَارْ ن أَربِّي إِ إِتّكّْسنْ دّْنُوبْ خْ دُّونشْثْ!“ ((لْإِنْجِيلْ س ؤُفُوسْ ن يُوحَانَّا 1:29)

مَا ثِيوْضذْ أَذْ ثْفهْمذْ ڒخُّو سِّيرْ أَمقّْرَانْ وَانِيثَا ؟  يشُّو لْمَاسِيحْ وَانِيثَا نتَّا ذ مِّيسْ  ن بْنَاذمْ نِيشَانْ ذ أَمْسڭّذْ، بْڒَا دّنْبْ مَاشَا س ڒْْعكْسْ ن أَذَامْ، نتَّا ذ أَكهَّانْ أَمقّْرَانْ ونِّي إِقدّْمنْ إِخفْ نّسْ ذ ثَاغَارْصْثْ نِّي زِي إِتّْوَازدْجْعنْ إِذَامّنْ نّسْ إِزْذِيڭنْ زَّاثْ إِ ڒْْكُورْسِي إِڭلّْذنْ ن أَربِّي إِ وغْفَارْ ن دّْنُوبْ، نتَّا ذ أَرُّويَاسْ ن إِكهَّاننْ نِّي إِزمَّارنْ أَذْ د-أَذْفنْ ڒبْذَا غَارْ زَّاوشْثْ ثَامقّْرَانْثْ ن أَربِّي ذڭْ ؤُجنَّا س ثْنُوكْرَا نّسْ زڭْ إِمتِّيننْ ذ ثْمكْسِي نّسْ غَارْ ؤُجنَّا (خْزَارْ ڒخْذَايمْ ن رُّوسُولْ 1:1-11) ؤُ نتَّا عَاوذْ ذ مِّيسْ ن ذَاوُوذْ، ذ أَجدْجِيذْ إِ ڒبْذَا س ثُوذَارْثْ نّسْ إِ وَارْ إِفنِّينْ س ثْنُوكْرَا نّسْ زڭْ إِمتِّيننْ أَوَارْنِي ڒَْامِي إِمُّوثْ خْ صَّالِيبْ إِسِّيزْذڭْ أَنغْ س إِذَامّنْ ن يِيخفْ نّسْ.

 إِ ڒخُّو مِينْ إِ غَا ثڭّذْ ؟  أَذْ ثَاغْ أَذْ إِنْهزّْ ذْسَاسْ ن ثُوذَارْثْ نّكْ مَاڒَا ثغْرِيذْ مَارَّا مَانْ أَيَا إِ ثْوَاڒَاثْ ثَامزْوَارُوثْ. مَا مَانْ أَيَا نِيشَانْ، مَا مَانْ أَيَا ذ ثِيذتّْ ؟  أَذْ ثَاغْ أَذْ ثَافذْ أَقَا غَاركْ أَطَّاسْ ن إِسقْسِيثنْ نِيغْ وَارْ ذ أَشْ إِعْجِيبْ شَا ڒْْحَاڒْ نِيغْ غَاركْ مژْرِي مَاحنْذْ أَذْ ثسّْنذْ كْثَارْ. نتّْشجَّاعْ كُوڒْ إِجّنْ ونِّي / ثنِّي إِ غَا إِغَارنْ أَوَاڒنْ-أَ حِيمَا أَذْ إِخَارّصْ مْلِيحْ، أَذْ يَارْزُو ذڭْ وذْلِيسْ إِقدّْسنْ، س مِينْزِي أَربِّي إِزمَّارْ أَذْ يَارْزمْ ڒعْقڒْ نّكْ ذ وُوڒْ نّكْ، مَا مَانْ أَيَا ذ ثِيذتّْ نِيغْ لّْلَا! مَاشَا إِتّْخصَّا أَذْ ثَارْزُوذْ مْلِيحْ. أَذْلِيسْ إِقدّْسنْ إِقَّارْ: 

”مَاشَا بْڒَا لِيمَانْ وَارْ إِزمَّارْ أَذْ إِتّْوَارْضَا أَربِّي. مِينْزِي ونِّي إِ د-إِقَارّْبنْ غَارْ أَربِّي، إِتّْخصَّا أَسْ أَذْ يَامنْ بلِّي نتَّا أَقَا-ث ذِينْ ؤُ نتَّا ذ أَمْخدْجصْ ن ينِّي خَاسْ يَارزُّونْ.“ (ثَابْرَاثْ إِ عِيبْرَانِييّنْ 11:6)

مَا ثخْسذْ أَذْ د-ثَاذْفذْ غَارْ ڒْْعَاهْذْ ن جْذِيذْ أَكْ-ذ أَربِّي مَاحنْذْ أَذْ غَاركْ يِيڒِي وغْفَارْ ن دّْنُوبْ نّكْ ذ وسْڒحْ أَكِيذسْ زِي ڒعْذَاوثْ إِ إِدْجَانْ ذڭْ وُوڒْ نّكْ ؤُمِي وَارْ ثُومِينذْ ذِي مِّيسْ إِ ذ أَنْغْ إِوْشِينْ س وَاطَّاسْ ن ؤُودّبْ ذ ؤُمَارّثْ. أَرْزُو مْلِيحْ ذڭْ وذْلِيسْ إِقدّْسنْ إِ غَاركْ/غَارمْ جَارْ إِفَاسّنْ. 

سْ وذْلِيسْ نّسْ إِزمَّارْ أَربِّي أَذْ أَشْ إِسِّيوڒْ ذڭْ وُوڒْ ذ ڒعْقڒْ نّكْ. أَقَا ذِينْ أَطَّاسْ ن ثْمسْڒَايِينْ نِّي عَاذْ وَارْ نْزمَّارْ أَذْ ثنْثْ نْفسَّارْ، مَاشَا أَربِّي إِزمَّارْ أَذْ أَشْ / أَمْ إِفسَّارْ مَارَّا مَانْ أَيَا خْمِي إِ غَا ثَارْزْمذْ أَذْلِيسْ إِقدّْسنْ، أَذْ ثبْذِيذْ أَذْ ثْغَارذْ س يِيخفْ نّكْ س وُوڒْ يَارْزمْ ؤُ س ڒعْقڒْ يَارزُّونْ حِيمَا أَذْ ثسّْنذْ مِينْ إِخْسْ أَذْ يِينِي أَربِّي ؤُ مِينْ إِعْنَا يشُّو لْمَاسِيحْ. يشُّو إِقَّارْ: 

”تَّارمْ، أَذْ أَومْ إِمّوْشْ، أَرْزُومْ، أَذْ ثَافمْ، سْقَارْقْبمْ، أَذْ أَومْ إِتّْوَارْزمْ.  مَاغَارْ مَارَّا ونِّي إِ غَا إِتَّارنْ، أَذْ إِطّفْ ؤُ ونِّي إِ غَا يَارْزُونْ أَذْ يَافْ، ؤُ ونِّي إِ غَا إِسّْقَارْقْبنْ أَذْ أَسْ إِتّْوَارْزمْ.“ (لْإِنْجِيلْ مَاتَّا 7:7-8) 

مَا ثُوفِيذْ أَقَا أَربِّي إِسّْشنْ أَشْ / أَمْ أَبْرِيذْ إِ إِدْجَانْ نِيشَانْ، خنِّي خَارّصْ مْلِيهْ ؤُ حْسبْ تَّامَانْ ن وضْفَارْ ن يشُّو لْمَاسِيحْ، مِينْزِي إِوْذَانْ شَارْهنْ ث، ؤُشَا أَذْ شَارْهنْ عَاوذْ إِمحْضَارنْ ذ إِمضْفَارنْ نّسْ. خْزَارْ لْإِنْجِيلْ س ؤُفُوسْ ن لُوكَا 9:57-62 خْ مَانْ أَيَا. خْزَارْ عَاوذْ لُوكَا 18:28-30 ذ لُوكَا 14:25-35 خْ ڒفْضرْ أَمقّْرَانْ ن وضْفَارْ ن يشُّو لْمَاسِيحْ ذ ڒْْمُونثْ إِ د-إِتّْڒِيقنْ إِ ينِّي إِ ذ أَسْ إِ غَا إِضْفَارنْ. 

لْإِنْجِيلْ ن يشُّو لْمَاسِيحْ، ڒخْبَارْ أَصبْحَانْ يِيوضْ-د ڒخُّو غَارْ إِنڭُّورَا ن دُّونشْثْ س كْثَارْ ن 2000 إِڒْسَاونْ. أَطَّاسْ وَارْ ذَايسْ أَرزُّونْ، أَطَّاسْ عَاذْ وَارْ ذ أَسْ فْهِيمنْ، أَطَّاسْ قَّارنْ أَذْلِيسْ إِقدّْسنْ حَارْفنْ ث إِوْذَانْ، أَطَّاسْ ن ڒْْحُوكَّامْ ذ إِمقّْرَاننْ ن دُّونشْثْ شَارْهنْ ث، منّْعنْ إِنِّي سَاذُو ڒْْحُوكْمْ نْسنْ أَذْ ث غَارنْ، أَطَّاسْ ن إِوْذَانْ قَّارنْ مَامّشْ إِ غَا تّْوَاغْفَارنْ دّْنُوبْ أَمنِّي وَاهَا (تُّونْ بلِّي لْمَاسِيحْ إِمَارّثْ سنّجْ إِ ڒْْمِيجَاڒْ إِ نْزمَّارْ أَذْ ث نكْسِي نشِّينْ)، أَطَّاسْ وَارْ فْهِيمنْ بلِّي لِيمَانْ ذِي لْمَاسِيحْ وَارْ إِدْجِي ذ إِشْثْ ثْمسْڒَاشْثْ ثَارْخصْ مَاشَا س ڒْْعكْسْ ذ إِشْثْ ن ثْمسْڒَاشْثْ إِ خْ إِتّْخصَّا بْنَاذمْ أَذْ إِخْسَارْ ثُوذَارْثْ نّسْ حِيمَا أَذْ ت يَافْ. 

يشُّو لْمَاسِيحْ إِقَّارْ:

”مَاڒَا حذْ يُوسَا-د غَارِي ؤُشَا وَارْ إِشَارْهْ بَابَا أَسْ نِيغْ يمَّا أَسْ، أَيْثْمَاسْ نِيغْ يسّْمَاسْ، ثَامْغَارْثْ نّسْ نِيغْ ثَارْوَا نّسْ، ؤُ عَاذْ ؤُڒَا ذ إِخفْ نّسْ، وَارْ إِزمَّارْ نتَّا أَذْ يِيڒِي ذ أَمحْضَارْ إِنُو. ونِّي وَارْ إِكْسِينْ صَّالِيبْ نّسْ، أَذْ أَيِي د-إِضْفَارْ، وَارْ إِزمَّارْ أَذْ يِيڒِي ذ أَمحْضَارْ إِنُو. ونِّي وَارْ إِكْسِينْ صَّالِيبْ نّسْ، أَذْ أَيِي د-إِضْفَارْ، وَارْ إِزمَّارْ أَذْ يِيڒِي ذ أَمحْضَارْ إِنُو.“ (لْإِنْجِيلْ س ؤُفُوسْ ن لُوكَا 14:26-27)

سْ ؤُينِّي نْثَافْ أَقَا دّنْبْ أَمزَارُو ؤُ دّنْبْ أَمقّْرَانْ مَارَّا، نتَّا ذ بْڒَا لِيمَانْ ذِي يشُّو لْمَاسِيحْ، مِّيسْ ن أَربِّي. نقَّارْ مَانْ أَيَا ذِي لْإِنْجِيلْ س ؤُفُوسْ ن يُوحَانَّا:

”أَمُّو إِخْسْ أَربِّي دُّونشْثْ أَڒْ مَانِي إِوْشَا أَينِّي ن مِّيسْ حِيمَا كُوڒْ إِجّنْ ونِّي زَّايسْ إِ غَا يَامْننْ، وَارْ إِتّْهلِّيكْ شَا، مَاشَا أَذْ غَارسْ ثِيڒِي ثُوذَارْثْ إِتّْذُومَانْ. مِينْزِي أَربِّي وَارْ د-إِسّكّْ شَا مِّيسْ غَارْ دُّونشْثْ حِيمَا أَذْ إِحَاسبْ دُّونشْثْ، مَاشَا إِسّكّْ إِ-ث-إِ-د حِيمَا أَذْ زَّايسْ ثنْجمْ دُّونشْثْ. ونِّي زَّايسْ إِ غَا يَامْننْ وَارْ إِتّثْوَاحَاسبْ شَا. ونِّي وَارْ إِتِّيمْننْ شَا أَقَا إِتّْوَاحَاسبْ زِي ڒخُّو مِينْزِي نتَّا وَارْ يُومِينْ شَا ذڭْ يِيسمْ ن ؤُينِّي ن مِّيسْ ن أَربِّي. ذ وَا ذ ڒحْكَامْ، أَقَا ثَافَاوْثْ ثُوسَا-د غَارْ دُّونشْثْ، إِوْذَانْ خْسنْ ثَادْجسْثْ خْ ثْفَاوْثْ، مِينْزِي ثِيمڭَّا نْسنْ ثُوغَا أَثنْثْ ذ ثِيعفَّانِينْ. مَارَّا ونِّي إِتّڭّنْ ثُوعفّْنَا، إِشَارّهْ ثَافَاوْثْ، وَارْ د-إِتِّيسْ شَا غَارْ ثْفَاوْثْ، حِيمَا وَارْ تّْوَاوبّْخنْثْ شَا ثِيمڭَّا نّسْ. ونِّي إِتّڭّنْ ثِيذتّْ أَذْ د-يَاسْ غَارْ ثْفَاوْثْ، حِيمَا أَذْ بَاننْثْ ثِيمڭَّا نّسْ، أَقَا تّْوَاڭّنْثْ ذِي أَربِّي.“ (لْإِنْجِيلْ س ؤُفُوسْ ن يُوحَانَّا 3:16-21)

مَاڒَا بْنَاذمْ يُومنْ ذِي لْمَاسِيحْ أَقَا مّكْسِينْ خَاسْ دّْنُوبْ نّسْ س ثَاغَارْصْثْ ن إِزْمَارْ ن أَربِّي ذڭْ ومْشَانْ نّسْ، ؤُشَا مَارَّا دّْنُوبْ إِ نڭَّا أَذْ أَنغْ تّْوَاغْفَارنْ س يِيسمْ نّسْ، نذْوڒْ ذ إِجّْ بْنَاذمْ ن جْذِيذْ أَمْ مَامّشْ ثُورَا: 

”س ؤُينِّي مَاڒَا حذْ ذِي لْمَاسِيحْ إِ إِدْجْ، أَقَا نتَّا إِتّْوَاخْڒقْ-د زِي جْذِيذْ. خنِّي مِينْ إِدْجَانْ ذ أَقْذِيمْ إِعْذُو. مَارَّا إِذْوڒْ ذ جْذِيذْ س أَربِّي ونِّي ذ أَنغْ إِسّصْڒحْ أَكِيذسْ س لْمَاسِيحْ ؤُشَا إِوْشْ أَنغْ ثَاسخَّارْثْ ن وصْڒَاحْ.“ (ثَابْرَاثْ إِ إِكُورِينْثِييّنْ وِيسّْ ثْنَاينْ 5:17، 18) 

خنِّي أَذْ نُويُورْ ذِي ثُوذَارْثْ ن جْذِيذْ ؤُشَا أَذْ نقِّيمْ ذ إِحنْجِيرنْ ن أَربِّي بْڒَا ڒْْعِيبْ س ؤُرُوشِّي أَكْ-ذ إِذَامّنْ نّسْ. أَذْ نِيڒِي ذ إِمزْذَاڭنْ، وَارْ إِدْجِي س ڒخْذَايمْ نّغْ نِّي نڭَّا، مَاشَا س لِيمَانْ ذَايسْ أَقَا نمُوطِّي زِي ثَادْجسْثْ غَارْ ثْڭلْذِيثْ ن مِّيسْ ن أَربِّي ثنِّي إِ د غَا يَاسنْ ذغْيَا.  

لْمَاسِيحْ إِقَّارْ:

”أَسمْ-د غَارِي مَارَّا كنِّيوْ، إِنِّي يُوحْڒنْ ذ ينِّي يَارْپُونْ دّْقڒْ، أَذْ أَومْ وْشغْ أَرَّاحثْ، كْسِيمْ-د أَزَايْڒُو إِنُو خَاومْ، ڒمْذمْ زَّايِي، (مِينْزِي) نشّْ ذ أَمْهِينْ ذ أَمْوَاضعْ ن وُوڒْ ؤُشَا أَذْ ثَافمْ أَرَّاحثْ إِ ڒعْمُورْ نْومْ. مِينْزِي أَزَايْڒُو ذ ڒحْمڒْ إِنُو فْسُوسنْ.“ (لْإِنْجِيلْ س ؤُفُوسْ ن مَاتَّا 11:28-30).