أَذْلِيسْ إِقدّْسنْ س ثْرِيفِيثْ ( AIT )

©  www.tarifit.info  -   CC SA-BY 2.0 

contact@tarifit.info

ثَامزْوَارُوثْ

 إِ ونِّي إِ غَا إِغَارنْ ... 

ذڭْ وذْلِيسْ إِقدّْسنْ س ثْرِيفِيثْ أَذْ ثَافمْ ڒَْا مِينْ ثُوفِيمْ ذِي ڒْْعَاهْذْ أَقْذِيمْ (ذَايسْ تَّاوْرَاثْ، زَّاپُورْ ذ إِنَابِييّنْ) ؤُڒَا مِينْ ثُوفِيمْ ذِي ڒْْعَاهْذْ ن جْذِيذْ (ڒخْبَارْ أَصبْحَانْ نِيغْ لْ'إِنْجِيلْ). مَانْ أَيَا إِخْسْ أَذْ يِينِي أَقَا أَذْلِيسْ إِقدّْسنْ س ثْرِيفِيثْ ذَايسْ مَارَّا إِذْلِيسنْ إِ ذ أَنغْ إِمّوْشنْ زِي أَربِّي، زڭْ وذْلِيسْ أَمزْوَارُو ؤُمِي قَّارنْ 'أَمزْوَارُو' (Genesis, Génèse, Génesis) أَڒْ أَذْلِيسْ أَنڭَّارُو ؤُمِي قَّارنْ 'أَسَارْڭبْ' (Apocalipsis, Apocalyps, Revelation, Offenbarung, Openbaring)، 66 ن إِذْلِيسنْ: ڒْْعَاهْذْ أَقْذِيمْ ذَايسْ 39 ن إِذْلِيسنْ، ڒْْعَاهْذْ ن جْذِيذْ ذَايسْ 27 ن إِذْلِيسنْ.  

لْ'إِنْجِيلْ س ؤُفُوسْ ن مَاتَّا إِفّغْ-د عَاذْ ذڭْ ؤُسڭّْوَاسْ 1887 ؤُ لْ'إِنْجِيلْ س ؤُفُوسْ ن يُوحَانَّا إِفّغْ-د ذڭْ ؤُسڭّْوَاسْ ن 1890.  ذڭْ ؤُسڭّْوَاسْ 2009 إِفّغْ-د ڒْْعَاهْذْ ن جْذِيذْ (س ڒْْحُورُوفْ ن ثْلَاثِينِيثْ ذ ثِيفِينَاغْ ذ ڒْْحُورُوفْ ن ثعْرَابْثْ). 

ڒْعَاهْذْ ن جْذِيذْ ذ إِجّْ ن وَاوَاڒْ نّغْنِي إِ ڒخْبَارْ أَصبْحَانْ (لْ'إِنْجِيلْ). ڒْْعَاهْذْ ن جْذِيذْ ذَايسْ 4 ن إِذْلِيسنْ، ذَايْسنْ ڒخْبَارْ أَصبْحَانْ: إِجّْ ن وذْلِيسْ يُورَانْ س ؤُفُوسْ ن مَاتَّا، إِجّنْ س ؤُفُوسْ ن مَارْكُوسْ، إِجّنْ س ؤُفُوسْ ن لُوكَا ؤُ ونِّي أَنڭَّارُو س ؤُفُوسْ ن يُوحَانَّا. أَوَارْنِي أَسنْ أَقَا ذِينْ أَذْلِيسْ ن ڒخْذَايمْ ن رُّوسُولْ ذ ثبْرَاثِينْ ن رَّاسُولْ بُولُوسْ إِ ثْمسْمُونِينْ (لْكَانَايِيسْ) ؤُ إِ شَا ن إِمْسخَّارنْ ن لْمَاسِيحْ إِنِّي ثُوغَا كِيذسْ إِخدّْمنْ إِ ؤُبَارّحْ ن لْ'إِنْجِيلْ جَارْ ڒڭْنُوسْ. أَوَارْنِي إِ ثبْرَاثِينْ ن بُولُوسْ أَقَا ذِينْ ثَابْرَاثْ ن يَاعْقُوبْ، ذ ثْنَاينْ ن ثبْرَاثِينْ ن بُوطْرُوسْ ذ ثْڒَاثَا ن ثبْرَاثِينْ ن يُوحَانَّا ذ إِشْثْ ن ثبْرَاثْ ن يَاهُوذَا. أَذْلِيسْ أَنڭَّارْ ن ڒْْعَاهْذْ ن جْذِيذْ ذ أَذْلِيسْ قَّارنْ أَسْ 'أَسَارْڭبْ'، مِينْزِي ذَايسْ إِسَّارْڭبْ لْمَاسِيحْ س ؤُفُوسْ ن إِجّْ ن لْمَالَاكْ إِ رُّوسُولْ يُوحَانَّا مَامّشْ د إِ غَا إِضْهَارْ غَارْ ؤُنڭَّارْ ن دُّونِيثْ ؤُ مَامّشْ إِ غَا إِغلّبْ خْ مَارَّا إِنِّي وَارْ ذَايسْ ؤُمِيننْ ؤُ مَامّشْ إِ غَا يڭّْ مَاحنْذْ أَذْ إِسّمْثنْ ثَاڭلْذَا نّسْ إِ إِجّْ ن ڒْْقدّْ ن وَاڒفْ ن إِسڭّْوُوسَا. أَوَارْنِي مَانْ أَيَا أَذْ يِيڒِي ؤُجنَّا ذ ثمُّورْثْ ن جْذِيذْ إِ ڒبْذَا  ثَانْذِينْثْ ن ؤُرْشَالِيمْ إِ د-إِهْوَانْ زڭْ ؤُجنَّا أَمشْنَاوْ ثَاسْڒِيثْ إِزهّْجنْ إِ وسْڒِي، ؤُشَا أَعُودْجِي ن أَربِّي أَذْ ذَايسْ يَارغْ ؤُشَا إِزْمَارْ (إِخْسْ أَذْ يِينِي لْمَاسِيحْ إِ إِتّْوَاصلّْبنْ خْ ثمُّورْثْ-أَ ذِي ڒْْوقْثْ ن إِرُومَانِييّنْ) أَذْ يِيڒِي ذ ڒفْنَارْ نّسْ. 

أَذْلِيسْ إِقدّْسنْ قَّارنْ أَسْ عَاوذْ: ثِيرَا إِقدّْسنْ. ڒخُّو أَقَا إِفّغْ-د أَذْلِيسْ إِقدّْسنْ أَمْ إِكْمڒْ: ڒْْعَاهْذْ أَقْذِيمْ ذ ڒْْعَاهْذْ ن جْذِيذْ، مَاشَا نِيثنْثِي س ثْنَاينْ ذ أَذْلِيسْ ذ إِجّنْ. 

أَذْ ثَافذْ أَذْلِيسْ إِقدّْسنْ (ڒشْثَابْ إِقدّْسنْ) ذِي فُورْمَا ن إِجّْ ن APP إِ أَنْذْرْوُيْذْ ؤُ ذِي فُورْمَا ن إِجّْ ن PWA

(Pressive Web App) إِ MacOS، iOS، أَنْذْرْوُيْذْ، لِينُوكْسْ ذ وِينْذْوُوْسْ. خْزَارْ: https://www.tarifit.info

أَطَّاسْ ن إِوْذَانْ وَارْ زمَّارنْ أَذْ غَارنْ ذغْيَا ثَارِيفِيثْ، مَاشَا زمَّارنْ أَذْ سْڒنْ إِ وَاوَاڒْ ن أَربِّي. أَقَا نبْذَا أَذْ نَارْنِي ؤُذِييُو، 'audio'، أَكْ-ذ كُوڒْ 'update'. غَارْ ؤُمزْوَارُو أَذْ ثَافمْ لْ'إِنْجِيلْ ن مَاتَّا ذ مَارْكُوسْ. 

 إِ ونِّي ؤُمِي إِتّعْجِيبْ ثْغُورِي خْ ثوْرِيقْثْ، أَقَا نڭَّا مَارَّا إِذْلِيسنْ ن وذْلِيسْ إِقدّْسنْ س ڒْْحُورُوفْ ن ثْلَاثِينِيثْ  ذ ثِيفِينَاغْ ذِي فُورْمَا PDF ذَانِيثَا حِيمَا إِزمَّارْ كُوڒْ إِجّنْ أَذْ ثنْ إِسُّوفّغْ إِ طّبْعْ. خْزَارْ:

https://www.tarifit.info/adlis-iqeddsen.html    

مَاڒَا ثخْسذْ أَذْ ثنْ ثْغَارذْ 'on-line' ذِي فُورْمَا HTML، أَرْزُو ذَانِيثَا: 

https://www.tarifit.info/seř---ɣar-online.html   

أَذْ شكْ / شمْ إِبَاركْ أَربِّي ذڭْ يِيسمْ ن يشُّو لْمَاسِيحْ، لْمُوبَاركْ!