1 ⴰⵡⴰⵔⵏⵉ ⴰⵙ ⵙⵍⵉⵖ ⵉⵊⵊ ⵏ ⵍⵃⴻⵙⵙ ⴰⵎⴻⵇⵇⵔⴰⵏ ⵏ ⵡⴰⵟⵟⴰⵙ ⵏ ⵍⵖⴰⵛⵉ ⴷⴻⴳ ⵓⵊⴻⵏⵏⴰ, ⵏⵏⴰⵏ:

“ⵀⴰⵍⵍⵉⵍⵓ-ⵢⴰⵀ,

ⵍⴻⴼⴷⵉⵢⵢⴻⵜ ⴷ ⵓⵄⵓⴵⵉ ⴷ ⵊⵊⴻⵀⴷ ⴰⵇⴰ ⴰⵜⴻⵏ ⵙ ⴰⵔⴻⴱⴱⵉ ⵏⵏⴻⵖ.

2 ⵎⵉⵏⵥⵉ ⵍⴻⵃⴽⴰⵎⴰⵜ ⵏⵏⴻⵙ ⵎⵖⵉⵔ ⴷ ⵜⵉⴷⴻⵜⵜ ⴷ ⵍⵃⴻⵇⵇ,

ⵓⵎⵉ ⵉⵃⴰⵙⴻⴱ ⵅ ⵜⴻⵎⵖⴰⵔⵜ ⵏ ⴼⴰⵔⵇ-ⵛⵛⵖⴻⵍ ⵜⴰⵥⵓⵡⴰⵔⵜ,

ⵜⴻⵏⵏⵉ ⵢⴰⵔⴻⴷⴷⴵⴻⵏ ⴷⴷⵓⵏⴻⵛⵜ ⵙ ⴼⴰⵔⵇ-ⵛⵛⵖⴻⵍ ⵏⵏⴻⵙ,

ⵓⵛⴰ ⵏⴻⵜⵜⴰ ⵢⵓⵖⴰ ⵜⴰⵙⵖⴰⵔⵜ ⵅ ⵉⴷⴰⵎⵎⴻⵏ ⵏ ⵉⵎⵙⴻⵅⵅⴰⵔⴻⵏ ⵏⵏⴻⵙ

ⵉ ⵢⵓⵎⵙⴻⵏ ⵖⴰⵔ ⵉⴼⴰⵙⵙⴻⵏ ⵏⵏⴻⵙ.” ^■  

3 ⵏⵏⴰⵏ ⵉ ⵓⵎⵓⵔ ⵡⵉⵙⵙ ⵜⵏⴰⵢⴻⵏ:

“ⵀⴰⵍⵍⵉⵍⵓ-ⵢⴰⵀ!”

ⵓⵛⴰ ⴰⴷ ⵢⴰⵍⵉ ⴷⴷⴻⵅⵅⴰⵏ ⵏⵏⴻⵙ ⵖⴰⵔ ⵓⵊⴻⵏⵏⴰ ⵉ ⵍⴻⴱⴷⴰ ⵇⴰⵄ.” ^■  

4 ⵓⵛⴰ ⴰⵔⴻⴱⵄⴰ ⵓ-ⵄⵉⵛⵔⵉⵏ ⵏ ⵉⵎⵖⴰⵔⴻⵏ ⴷ ⴰⵔⴻⴱⵄⴰ ⵏ ⵉⵎⴻⴷⴷⴰⵔⴻⵏ ⵡⴹⴰⵏ ⵖⴰⵔ ⵜⴻⵎⵎⵓⵔⵜ, ⵙⴻⵊⴷⴻⵏ ⵉ ⴰⵔⴻⴱⴱⵉ ⵡⴻⵏⵏⵉ ⵉⵇⵇⵉⵎⴻⵏ ⵅ ⵍⵄⴰⵔⵛ, ⵏⵏⴰⵏ:

“ⴰⵎⵉⵏ, ⵀⴰⵍⵍⵉⵍⵓ-ⵢⴰⵀ!”

5 ⵓⵛⴰ ⵜⵓⵙⴰ-ⴷⴷ ⵉⵛⵜ ⵏ ⵜⵎⵉⵊⵊⴰ ⵥⵉ ⵍⵄⴰⵔⵛ, ⵜⴻⵏⵏⴰ:

“ⵙⴻⵎⵖⴰⵔⴻⵎ ⴰⵔⴻⴱⴱⵉ ⵏⵏⴻⵖ,ⴰ ⴽⴻⵏⵏⵉⵡ ⵎⴰⵔⵔⴰ ⵉⵎⵙⴻⵅⵅⴰⵔⴻⵏ ⵏⵏⴻⵙ,

ⵓ ⵎⴰⵔⵔⴰ ⵉⵏⵏⵉ ⵜ ⵉⵜⵜⴻⴳⴳⵯⴻⴷⴻⵏ,

ⴰⵎ ⵓⵎⴻⵥⵢⴰⵏ ⴰⵎ ⵓⵎⴻⵇⵇⵔⴰⵏ!”

6 ⵓⵛⴰ ⵙⵍⵉⵖ ⴰⵇⴰ ⵇⵇⴰⵔⴻⵏ ⴰⵎⴻⵛⵏⴰⵡ ⵙ ⵜⵎⵉⵊⵊⴰ ⵏ ⵓⴱⴰⵔⵔⵓ ⵏ ⵍⵖⴰⵛⵉ, ⴰⵎⴻⵛⵏⴰⵡ ⵙ ⵍⵃⴻⵙⵙ ⵏ ⵡⴰⵟⵟⴰⵙ ⵏ ⵡⴰⵎⴰⵏ, ⴰⵎⴻⵛⵏⴰⵡ ⵙ ⵥⵥⵀⵉⵔ ⵏ ⵡⴰⵊⵊⴰⵊ ⴰⵎⴻⵇⵇⵔⴰⵏ:

“ⵀⴰⵍⵍⵉⵍⵓ-ⵢⴰⵀ, ⵎⵉⵏⵥⵉ ⵙⵉⴷⵉ ⴰⵔⴻⴱⴱⵉ,

ⴰⵎⵥⴻⵎⵎⴰⵔ ⵅ ⴽⵓⵍⵛⵉ, ⴰⵇⴰ ⵉⵃⴻⴽⴽⴻⵎ ⴰⵎ ⵓⵊⴻⴵⵉⴷ. ^■  

7 ⵏⴼⴰⵔⵃ, ⴰⴷ ⵏⴻⵙⵍⵉⵡⵍⵉⵡ,

ⴰⴷ ⴰⵙ ⵏⴻⴳⴳ ⴰⵄⵓⴵⵉ,

ⵎⴰⵖⴰⵔ ⵓⵔⴰⵔ ⵏ ⵢⴻⵥⵎⴰⵔ ⵢⵉⵡⴻⴹ-ⴷⴷ,

ⵓⵛⴰ ⵜⴰⵎⵖⴰⵔⵜ ⵏⵏⴻⵙ ⴰⵇⴰ ⵜⵃⴻⵥⵥⴻⵎ, ^■  

8 ⵓⵛⴰ ⵜⴻⵎⵎⴻⵡⵛ ⴰⵙ ⴰⴷ ⵜⵢⴰⵔⴹ ⴰⵔⵔⵓⴹ

ⵥⵉ ⵍⵇⴻⵟⵟⴰⵏ ⵉⴼⵙⵓⵙⴻⵏ ⵉⵜⵜⵉⵙⵙⵉⵇⴻⵏ ⵉⵥⴷⵉⴳⴻⵏ,

ⵎⵉⵏⵥⵉ ⵍⵇⴻⵟⵟⴰⵏ ⵏⵏⵉ ⵉⴼⵙⵓⵙⴻⵏ ⵏⵏⵉ ⵏⴻⵜⵜⴰ ⴷ ⵜⴰⵙⴻⴳⴷⴰ ⵏ ⵉⵎⵇⴻⴷⴷⴰⵙⴻⵏ.”

9 ⵏⵉⵜⵉ ⵏⵏⴰⵏ ⴰⵢⵉ:

“ⴰⵔⵉ: ⵙⵙⴻⵄⴷ ⵏ ⵢⵉⵏⵏⵉ ⵉⵜⵜⵡⴰⵄⴰⵔⴹⴻⵏ

ⵖⴰⵔ ⵓⵎⴻⵏⵙⵉ ⵏ ⵡⵓⵔⴰⵔ ⵏ ⵉⵥⵎⴰⵔ.’

ⵅⴻⵏⵏⵉ ⵉⵏⵏⴰ ⴰⵢⵉ ⵛⴰ ⵏ ⵢⵉⵊⵊⴻⵏ:

“ⵉⵏⴰ ⴷ ⴰⵡⴰⵍⴻⵏ ⵏ ⵜⵉⴷⴻⵜⵜ ⵏ ⴰⵔⴻⴱⴱⵉ.” ^■  

10 ⵓⵛⴰ ⵡⴹⵉⵖ ⴰⵙ ⵖⴰⵔ ⵉⴹⴰⵔⴻⵏ ⵏⵏⴻⵙ ⵃⵉⵎⴰ ⴰⴷ ⵜ ⵄⴻⴱⴷⴻⵖ. ⵓⵛⴰ ⵏⴻⵜⵜⴰ ⵉⵏⵏⴰ ⴰⵢⵉ:

“ⵍⵍⴰ, ⵡⴰⵔ ⵜⵜⴻⴳⴳ ⵛⴰ ⵎⴰⵏ ⴰⵢⴰ! ⴰⵇⴰ ⵏⴻⵛⵛ ⴷ ⴰⵎⵙⴻⵅⵅⴰⵔ ⴰⵎ ⵛⴻⴽ ⴷ ⴰⵢⵜⵎⴰⵛ ⵉⵏⵏⵉ ⵖⴰⵔ ⵜⴻⴵⴰ ⵛⵛⵀⴰⴷⴻⵜ ⵏ ⵢⴻⵛⵛⵓ. ⵄⴻⴱⴷⴻⵜ ⴰⵔⴻⴱⴱⵉ, ⵎⵉⵏⵥⵉ ⵛⵛⵀⴰⴷⴻⵜ ⵏ ⵢⴻⵛⵛⵓ ⵏⴻⵜⵜⴰⵜ ⴷ ⴰⵔⵔⵓⵃ ⵏ ⵎⵉⵏ ⵉⵜⵜⵡⴰⵏⴰⴱⴱⴻⵏ.” ^■  

11 ⴰⵡⴰⵔⵏⵉ ⴰⵢⴰ ⵥⵔⵉⵖ ⴰⵊⴻⵏⵏⴰ ⵉⵏⵏⵓⵔⵥⴻⵎ, ⵓ ⵅⵥⴰⵔ, ⴰⵇⴰ ⴷⵉⵏ ⵉⵊⵊ ⵏ ⵓⵢⵉⵙ ⴷ ⴰⵛⴻⵎⵍⴰⵍ ⴷ ⵡⴻⵏⵏⵉ ⵅⴰⵙ ⵉⵏⵢⵉⵏ, ⵇⵇⴰⵔⴻⵏ ⴰⵙ ‘ⵡⴻⵏⵏⵉ ⴷ ⴰⵎⵜⵉⵇⵇⵉ ⴷ ⵜⵉⴷⴻⵜⵜ!’, ⵓⵛⴰ ⵏⴻⵜⵜⴰ ⴰⴷ ⵉⵃⴰⵙⴻⴱ ⵓ ⴰⴷ ⵉⵎⵏⴻⵖ ⵙ ⵜⵙⴻⴳⴷⴰ. ^■  

12 ⵜⵓⵖⴰ ⵜⵉⵟⵟⴰⵡⵉⵏ ⵏⵏⴻⵙ ⴰⵎⴻⵛⵏⴰⵡ ⵉⵃⵓⴷⴰⵇ ⵏ ⵜⵎⴻⵙⵙⵉ, ⵖⴰⵔⴻⵙ ⵅ ⵓⵥⴻⴵⵉⴼ ⵏⵏⴻⵙ ⴰⵟⵟⴰⵙ ⵏ ⵜⵜⴰⵊⴰⵜ, ⵉⵜⵜⵡⴰⵔⵉ ⵅⴰⵙⴻⵏ ⵉⵙⴻⵎ ⵉ ⵡⴰⵔ ⵜ ⵉⵙⵙⵉⵏ ⵃⴻⴷ ⵎⵖⵉⵔ ⵏⴻⵜⵜⴰ ⵡⴰⵀⴰ. ^■  

13 ⵜⵓⵖⴰ ⵢⴰⵔⴹ ⵉⵊⵊ ⵏ ⵡⴰⵔⵔⵓⴹ ⵉⵜⵜⵡⴰⵙⵙⵖⴻⴹⵚⴻⵏ ⴷⴻⴳ ⵉⴷⴰⵎⵎⴻⵏ, ⵓⵛⴰ ⵡⴰ ⴷ ⵉⵙⴻⵎ ⵏⵏⴻⵙ: ‘ⴰⵡⴰⵍ ⵏ ⴰⵔⴻⴱⴱⵉ’. ^■  

14 ⵍⵄⴻⵙⴽⴰⵔⴰⵜ ⵏ ⵓⵊⴻⵏⵏⴰ ⴹⴼⴰⵔⴻⵏ ⵜ-ⵉ-ⴷⴷ ⵅ ⵢⴻⵢⵙⴰⵏ ⵉⵛⴻⵎⵍⴰⵍⴻⵏ, ⴰⵔⴹⴻⵏ ⵍⵇⴻⵟⵟⴰⵏ ⴷ ⴰⵛⴻⵎⵍⴰⵍ ⵉⵥⴷⵉⴳ. ^■  

15 ⴼⴼⴻⵖ-ⴷⴷ ⵍⴻⵙⵢⵓⴼ ⵉⵇⴻⴹⵄⴻⵏ ⵥⴻⴳ ⵉⵇⴻⵎⵎⵓⵎⴻⵏ ⵏⵙⴻⵏ ⵎⴰⵃⴻⵏⴷ ⴰⴷ ⵥⵥⴰⵢⵙⴻⵏ ⵏⵖⴻⵏ ⵍⴻⴳⵏⵓⵙ, ⵓ ⵏⴻⵜⵜⴰ ⴰⴷ ⵜⴻⵏ ⵉⵃⴹⴰ ⵙ ⵓⵥⴻⴵⴰⴹ ⵏ ⵡⵓⵥⵥⴰⵍ, ⵓ ⵏⴻⵜⵜⴰ ⵙⵉⵎⴰⵏⵜ ⵏⵏⴻⵙ ⴰⴷ ⵉⵄⴼⴻⵙ ⴷⵉ ⵜⵙⵉⵔⵜ ⵏ ⵜⴻⴼⵇⴻⵃⵜ ⵏ ⵡⴻⵖⴹⴰⴱ ⵏ ⴰⵔⴻⴱⴱⵉ, ⴰⵎⵥⴻⵎⵎⴰⵔ ⵅ ⴽⵓⵍⵛⵉ. ^■  

16 ⵅ ⵡⴰⵔⵔⵓⴹ ⵏⵏⴻⵙ ⵓ ⵅ ⵜⵎⴻⵚⵚⴰⵟ ⵏⵏⴻⵙ ⵉⵜⵜⵡⴰⵔⵉ ⵅⴰⵙⴻⵏ ⵉⵙⴻⵎ-ⴰ ⵡⴰⵏⵉⵜⴰ: ‘ⴰⵊⴻⴵⵉⴷ ⵅ ⵎⴰⵔⵔⴰ ⵉⵊⴻⴵⵉⴷⴻⵏ, ⵙⵉⴷⵉ ⵅ ⵎⴰⵔⵔⴰ ⵍⴻⵃⴽⴰⵎⴰⵜ.’ ^■  

17 ⵓⵛⴰ ⵥⵔⵉⵖ ⵉⵊⵊ ⵏ ⵍⵎⴰⵍⴰⴽ ⵏⵏⴻⵖⵏⵉ ⵉⴱⴻⴷⴷ ⴷⵉ ⵜⴼⵓⵛⵜ. ⵏⴻⵜⵜⴰ ⵉⵍⴰⵖⴰ ⵙ ⵊⵊⴻⵀⴷ, ⵉⵏⵏⴰ ⵉ ⵎⴰⵔⵔⴰ ⵉⵊⴹⴰⴹ ⵉⵟⵟⴰⵡⴻⵏ ⴷⵉ ⵍⵡⴻⵙⵜ ⵏ ⵓⵊⴻⵏⵏⴰ:

“ⴰⵙⴻⵜⵜⵉⵡ-ⴷ, ⵎⵓⵏⴻⵜⵜⵉⵡ-ⴷⴷ

ⵖⴰⵔ ⵓⵎⴻⵏⵙⵉ ⴰⵎⴻⵇⵇⵔⴰⵏ ⵏ ⴰⵔⴻⴱⴱⵉ, ^■  

18 ⵃⵉⵎⴰ ⴰⴷ ⵜⴻⵛⵛⴻⵎ ⴰⵢⵙⵓⵎ ⵏ ⵉⵊⴻⴵⵉⴷⴻⵏ

ⴷ ⵡⴻⵢⵙⵓⵎ ⵏ ⵉⵎⴻⵇⵇⵔⴰⵏⴻⵏ ⵅ ⵡⴰⵍⴻⴼ

ⴷ ⵡⴻⵢⵙⵓⵎ ⵏ ⵢⵉⵏⵏⵉ ⵉⵊⴻⵀⴷⴻⵏ

ⴷ ⵡⴻⵢⵙⵓⵎ ⵏ ⵉⵢⵙⴰⵏ ⴷ ⵢⴻⵏⵏⵉ ⵅⴰⵙⴻⵏ ⵉⵏⵢⵉⵏ,

ⴷ ⵡⴻⵢⵙⵓⵎ ⵏ ⵉⵃⵓⵔⵔⵉⵢⵢⴻⵏ ⴷ ⵉⵙⴻⵎⵖⴰⵏ,

ⴰⵎ ⵏ ⵉⵎⴻⵥⵢⴰⵏⴻⵏ ⴰⵎ ⵏ ⵉⵎⴻⵇⵇⵔⴰⵏⴻⵏ.”

19 ⵓⵛⴰ ⵥⵔⵉⵖ ⵍⵡⴻⵃⵛ ⴰⴽ-ⴷ ⵉⵊⴻⴵⵉⴷⴻⵏ ⵏ ⵜⴻⵎⵎⵓⵔⵜ ⴷ ⵉⵄⴻⵙⴽⴰⵔⵔⵉⵢⵢⴻⵏ ⵏⵙⴻⵏ ⵉⵏⵏⵉ ⵉⵎⵓⵏⴻⵏ ⵃⵉⵎⴰ ⴰⴷ ⵎⵎⴻⵏⵖⴻⵏ ⴰⴽ-ⴷ ⵡⴻⵏⵏⵉ ⵉⵏⵢⵉⵏ ⵅ ⵓⵢⵉⵙ ⵓ ⴰⴽ-ⴷ ⵉⵄⴻⵙⴽⴰⵔⵉⵢⵢⴻⵏ ⵏⵏⴻⵙ. 20 ⴰⵇⴰ ⵉⵜⵜⵡⴰⵟⵟⴻⴼ ⵍⵡⴻⵃⵛ ⴰⴽ-ⴷ ⵓⵏⴰⴱⵉ ⵉⵙⵙⵅⴰⵔⵔⵉⵇⴻⵏ, ⵡⴻⵏⵏⵉ ⵉⴳⴳⵉⵏ ⵥⵥⴰⵜⴻⵙ ⵍⴻⵄⵍⴰⵎⴰⵜ ⵏⵏⵉ ⵥⵉ ⵜⵓⵖⴰ ⵉⵖⴻⵛⵛ ⵉⵏⵏⵉ ⵉⴽⵙⵉⵏ ⵍⴻⵄⵍⴰⵎⴻⵜ ⵏ ⵍⵡⴻⵃⵛ ⵓⵛⴰ ⵙⴻⵊⴷⴻⵏ ⵉ ⵍⴻⵅⵢⴰⵍ ⵏⵏⴻⵙ. ⵏⵉⵜⵏⵉ ⵙ ⵜⵏⴰⵢⴻⵏ ⵉⴷⵙⴻⵏ ⵜⵜⵡⴰⵎⵎⴻⵏⴹⴰⵔⴻⵏ ⴷⴻⴳ ⵓⵢⴻⵍⵎⴰⵎ ⵏ ⵜⵎⴻⵙⵙⵉ ⵉⵜⵜⵛⴻⴼⵛⵓⴼⴻⵏ ⵄⴰⵡⴻⴷ ⵙ ⵍⴻⵛⴱⴰⵔⴻⵢⵢⴻⵜ. ^■   21 ⵡⵉ ⵉⵇⵇⵉⵎⴻⵏ ⵜⵜⵡⴰⵏⵖⴻⵏ ⵙ ⵡⵓⵥⵥⴰⵍ ⵉ ⴷⴷ-ⵉⴽⴽⵉⵏ ⵥⴻⴳ ⵓⵇⴻⵎⵎⵓⵎ ⵏ ⵡⴻⵏⵏⵉ ⵉⵏⵢⵉⵏ ⵅ ⵓⵢⵉⵙ. ⵓⵛⴰ ⵎⴰⵔⵔⴰ ⵉⵊⴹⴰⴹ ⵉⵜⵜⴽⴻⵛⵛⴰⴹⴻⵏ ⵊⵊⵉⵡⵏⴻⵏ ⵙ ⵡⴻⵢⵙⵓⵎ ⵏⵙⴻⵏ.