1 ⴰⵡⴰⵔⵏⵉ ⴰⵙ ⵥⵔⵉⵖ ⵉⵊⵊ ⵏ ⵍⵎⴰⵍⴰⴽ ⵏⵏⴻⵖⵏⵉ ⵉⵀⴻⴽⴽⵡⴰ-ⴷⴷ ⵥⴻⴳ ⵓⵊⴻⵏⵏⴰ, ⵖⴰⵔⴻⵙ ⵚⵚⵓⵍⵟⴰ ⵜⴰⵎⴻⵇⵇⵔⴰⵏⵜ, ⵓⵛⴰ ⵟⵟⵢⴰ ⵏ ⵓⵄⵓⴵⵉ ⵏⵏⴻⵙ ⵜⴻⴳⴳⴰ ⵜⴰⴼⴰⵡⵜ ⴽⵓⵍⵛⵉ ⵉ ⵜⴻⵎⵎⵓⵔⵜ. 2 ⵏⴻⵜⵜⴰ ⵉⵍⴰⵖⴰ ⵙ ⵜⵎⵉⵊⵊⴰ ⵜⴻⵊⵀⴻⴷ, ⵉⵇⵇⴰⵔ:

“ⴰⵇⴰ ⵜⴻⵡⴹⴰ, ⵜⴻⵡⴹⴰ ⴱⴰⴱⵉⵍⵓⵏ ⵜⴰⵎⴻⵇⵇⵔⴰⵏⵜ,

ⵜⴻⴷⵡⴻⵍ ⴷ ⵜⴰⵥⴻⴷⴷⵉⵖⵜ ⵏ ⵛⵛⵡⴰⵟⴻⵏ

ⴷ ⵍⴻⵃⴱⴻⵙ ⵉ ⴽⵓⵍ ⵍⴰⵔⵢⴰⵃ ⴰⵎⴻⵏⴳⵓⵙ ⴰⵎⴻⵏⵄⵉ, ^■  

3 ⵎⵉⵏⵥⵉ ⵜⵅⴻⴵⴻⴹ ⴱⵉⵏⵓ ⵏ ⴼⴰⵔⵇ-ⵛⵛⵖⴻⵍ ⵏⵏⴻⵙ ⵉ ⵎⴰⵔⵔⴰ ⵍⴻⴳⵏⵓⵙ,

ⵓ ⵎⵉⵏⵥⵉ ⵉⵊⴻⴵⵉⴷⴻⵏ ⵏ ⵜⴻⵎⵎⵓⵔⵜ ⴰⵇⴰ ⵙⵙⴼⴻⵙⴷⴻⵏ ⵉⵅⴻⴼ ⵏⵙⴻⵏ ⵥⵥⴰⵢⴻⵙ,

ⵓ ⵎⵉⵏⵥⵉ ⵉⵙⴻⴱⴱⴰⴱⴻⵏ ⵏ ⵜⴻⵎⵎⵓⵔⵜ ⴷⴻⵡⵍⴻⵏ ⴷ ⵜⵡⴰⵊⵊⴰⵔ

ⵙ ⵊⵊⴻⵀⴷ ⵏ ⵓⵟⴻⵎⵎⴻⵙ ⵏⵏⴻⵙ.” ^■  

4 ⵓⵛⴰ ⵙⵍⵉⵖ ⵉ ⵜⵎⵉⵊⵊⴰ ⵏⵏⴻⵖⵏⵉ ⵜⵍⴰⵖⴰ-ⴷⴷ ⵥⴻⴳ ⵓⵊⴻⵏⵏⴰ:

“ⴼⴼⴻⵖ ⵥⵥⴰⵢⴻⵙ, ⴰ ⵍⴳⴻⵏⵙ ⵉⵏⵓ,

ⵃⵉⵎⴰ ⵡⴰⵔ ⵜⵜⵉⵍⵉⵏ ⴷⴷⵏⵓⴱ ⵏⵏⴻⵙ ⵅ ⵢⵉⵔⵉ ⵏⵏⴻⴽ,

ⵓⵛⴰ ⵡⴰⵔ ⵜⴽⴻⵙⵙⵉⴷ ⵥⵉ ⵊⵊⵔⴰⵢⴻⵃ ⵏⵏⴻⵙ, ^■  

5 ⵎⵉⵏⵥⵉ ⴷⴷⵏⵓⴱ ⵏⵏⴻⵙ ⴰⵇⴰ ⵉⵡⴹⴻⵏ ⵖⴰⵔ ⵓⵊⴻⵏⵏⴰ,

ⵓⵛⴰ ⴰⵔⴻⴱⴱⵉ ⴰⵇⴰ ⵉⵄⵇⴻⵍ ⵅ ⵍⵎⵓⵄⵚⵉⵢⵢⴻⵜ ⵏⵏⴻⵙ.^■  

6 ⴰⵔⵔⴻⵎ-ⴷⴷ ⵅⴰⵙ ⴰⵎ ⵎⴰⵎⵎⴻⵛ ⴷⴷ-ⵜⴰⵔⵔⴰ ⵏⴻⵜⵜⴰⵜ,

ⴰⵔⵔⴻⵎ-ⴷⴷ ⵅⴰⵙ ⵙ ⵓⴹⴻⴼⴼⵓⵙ ⵄⵍⴰⵃⵙⴰⴱ ⵍⴻⵅⴷⴰⵢⴻⵎ ⵏⵏⴻⵙ,

ⵅⴻⴵⴻⴹ ⴰⵙ ⵙ ⵓⴹⴻⴼⴼⵓⵙ ⴷⴻⴳ ⵓⵖⴰⵔⵔⴰⴼ ⵏⵏⵉ ⵜⵓⵖⴰ ⵜⵅⴻⴵⴻⴹ ⵏⴻⵜⵜⴰⵜ. ^■  

7 ⵅⴻⵍⴼⴻⵎ ⴰⵙ-ⴷⴷ ⴰⵄⴻⴷⴷⴻⴱ ⴷ ⵡⴻⵛⴹⴰⵏ

ⴰⵏⴻⵛⵜ ⵜⵓⵖⴰ ⵏⴻⵜⵜⴰⵜ ⵜⴻⵙⵙⵄⵓⴵⵉ ⵓ ⵜⴻⵙⵙⴳⴻⵄⵄⴻⴷ ⵉⵅⴻⴼ ⵏⵏⴻⵙ

ⵎⵉⵏⵥⵉ ⵜⴻⵇⵇⴰⵔ ⴷⴻⴳ ⵡⵓⵍ ⵏⵏⴻⵙ:

‘ⴰⵇⴰ ⵇⵇⵉⵎⴻⵖ ⴰⵎ ⵜⵊⴻⴵⵉⴷⵜ, ⵡⴰⵔ ⴵⵉⵖ ⴷ ⵜⴰⵊⵊⴰⵞ,

ⵓⵛⴰ ⴰⵛⴹⴰⵏ ⵡⴰⵔ ⵜ ⵥⴰⵔⵔⴻⵖ ⵛⴰ!’ ^■  

8 ⵙ ⵓⵢⴻⵏⵏⵉ ⴷⴻⴳ ⵉⵊⵊ ⵏ ⵡⴰⵙⵙ ⴰⴷ ⵅⴰⵙ ⵡⴹⴰⵏⵜ ⵎⴰⵔⵔⴰ ⵊⵊⵔⴰⵢⴻⵃ ⵏⵏⴻⵙ: ⵍⵎⴻⵡⵜ, ⴰⵛⴹⴰⵏ ⴷ ⵍⴰⵥ, ⵓⵛⴰ ⴰⴷ ⵜᵉⵜⵜⵡⴰⵙⴻⵛⵎⴻⴹ ⴷⵉ ⵜⵎⴻⵙⵙⵉ, ⵎⵉⵏⵥⵉ ⵙⵉⴷⵉ, ⴷ ⵡⴻⵏⵏⵉ ⵅⴰⵙ ⵉ ⵖⴰ ⵉⵃⴻⴽⵎⴻⵏ, ⴰⵇⴰ ⵉⵊⵀⴻⴷ. ^■  

9 ⵉⵊⴻⴵⵉⴷⴻⵏ ⵏ ⵜⴻⵎⵎⵓⵔⵜ, ⵉⵏⵏⵉ ⴽⵉⴷⴻⵙ ⵉⴳⴳⵉⵏ ⴼⴼⴰⵔⵇ-ⵛⵖⴻⵍ ⵓ ⵙⵙⴳⴻⵄⵄⴷⴻⵏ ⵉⵅⴻⴼ ⵏⵙⴻⵏ, ⴰⴷ ⵅⴰⵙ ⵔⵓⵏ, ⴰⴷ ⵅⴰⵙ ⵡⵜⴻⵏ ⴰⴳⴻⵊⴷⵓⵔ ⵅⵎⵉ ⵉ ⵖⴰ ⵥⴰⵔⴻⵏ ⴷⴷⴻⵅⵅⴰⵏ ⵏ ⵜⵎⴻⵙⵙⵉ ⵏⵏⴻⵙ. ^■  

10 ⵏⵉⵜⵏⵉ ⴰⴷ ⵇⵇⵉⵎⴻⵏ ⴱⴻⴷⴷⴻⵏ ⵖⴰⵔ ⵍⴰⴳⴳⵯⴰⵊ ⵥⵉ ⵜⴻⴳⴳⵯⵓⴷⵉ ⵏ ⵓⵄⴻⴷⴷⴻⴱ ⵏⵏⴻⵙ, ⵇⵇⴰⵔⴻⵏ:

“ⵓⵛⵜ, ⵓⵛⵜ, ⵓⵛⵜ, ⵅⴰⵎ, ⴰ ⵜⴰⵏⴷⵉⵏⵜ ⵜⴰⵎⴻⵇⵇⵔⴰⵏⵜ,

ⴱⴰⴱⵉⵍⵓⵏ, ⴰ ⵜⴰⵏⴷⵉⵏⵜ ⵉⵊⴻⵀⴷⴻⵏ,

ⵎⵉⵏⵥⵉ ⴰⵇⴰ ⵢⵓⵙⴰ-ⴷⴷ ⵍⵃⵓⴽⵎ ⵏⵏⴻⵎ ⴷⴻⴳ ⵉⵛⵜ ⵏ ⵜⵙⴰⵄⵄⴻⵜ!” ^■  

11 ⵉⵙⴻⴱⴱⴰⴱⴻⵏ ⵏ ⵜⴻⵎⵎⵓⵔⵜ ⴰⴷ ⵅⴰⵙ ⵔⵓⵏ, ⴰⴷ ⵛⴻⴹⵏⴻⵏ, ⵎⵉⵏⵥⵉ ⵓⵍⴰ ⴷ ⵉⵊⵊ ⵡⴰⵔ ⵉⵙⵙⵉⵖ ⵄⴰⴷ ⵙⵙⴻⵍⵄⴻⵜ ⵏⵙⴻⵏ:

12 ⵙⵙⴻⵍⵄⴻⵜ ⵏ ⵡⵓⵔⴻⵖ ⴷ ⵏⵏⵓⵇⴰⵔⵜ ⴷ ⵢⴻⵥⵔⴰ ⵢⵉⵖⵍⴰⵏ ⴷ ⵜⵢⴰⵇⵓⵜⵉⵏ ⴷ ⵍⴻⵇⵟⴻⵏ ⴰⵥⴷⴰⴷ ⴷ ⴰⵔⵊⵓⵡⴰⵏⵉ ⴷ ⵍⴻⵃⵔⵉⵔ ⴰⵥⴻⴳⴳⵯⴰⵖ ⵉⵃⴻⴷⵇⴻⵏ ⴷ ⵄⵍⴰⵎ ⴽⵓⵍ ⴰⴽⴻⵛⵛⵓⴹ ⵉⵜⵜⴼⵓⵃⴻⵏ ⴷ ⵄⵍⴰⵎ ⴽⵓⵍ ⵍⴻⵇⵛⵓⵄ ⵥⵉ ⵍⵄⴰⵊ ⴷ ⵄⵍⴰⵎ ⴽⵓⵍ ⵍⴻⵇⵛⵓⵄ ⵥⴻⴳ ⵓⴽⴻⵛⵛⵓⴹ ⵉⵖⵍⴰⵏ ⴷ ⵏⵏⵃⴰⵙ ⴷ ⵡⵓⵥⵥⴰⵍ ⴷ ⵍⵎⴰⵔⵎⵓⵔ ^□  

13 ⴷ ⵍⵇⴰⵔⴼⴰ ⴷ ⵍⴻⴱⵅⵓⵔ ⴷ ⴷⴷⵀⴻⵏ ⵉⵜⵜⴼⵓⵃⴻⵏ ⴷ ⵊⵊⴰⵡⵉ ⴷ ⴱⵉⵏⵓ ⴷ ⵥⵥⴻⵛⵜ ⵏ ⵥⵥⵉⵜⵓⵏ ⴷ ⴰⵔⴻⵏ ⵏ ⵙⵙⵎⵉⴷ ⴷ ⵢⵉⵔⴷⴻⵏ ⴷ ⵍⵎⴰⵍ ⴷ ⵡⵓⴵⵉ ⴷ ⵢⴻⵢⵙⴰⵏ ⴷ ⵉⴽⴰⵔⵔⵓⵜⴻⵏ ⵓⵍⴰ ⴷ ⴰⵔⵔⵉⵎⴰⵜ ⴷ ⵍⴻⵄⵎⵓⵔ ⵏ ⵉⵡⴷⴰⵏ. ^■  

14 ⴰⵇⴰ ⵍⵖⵉⴵⴻⵜ ⵉ ⴷⵉ ⵜⵓⵖⴰ ⵜᵉⵜⵜⵎⴻⵥⵔⵉ ⵜⵏⴻⴼⵙⴻⵛⵜ ⵏⵏⴻⵎ, ⴰⵇⴰ ⵜⵉⴳⴳⵯⴻⵊ ⵅⴰⵎ, ⵓⵛⴰ ⵎⴰⵔⵔⴰ ⵎⵉⵏ ⵜⵓⵖⴰ ⵖⴰⵔⴻⵎ ⴷ ⴰⴳⵍⴰ ⴷ ⵎⵉⵏ ⵉⵜⵜⵉⵙⵙⵉⵇⴻⵏ, ⴰⵇⴰ ⵉⵡⴻⴷⴷⴰⵔ, ⵡⴰⵔ ⵜ ⵜⵥⴰⵔⵔⴻⴷ ⵄⴻⵎⵎⴰⵔⵚ ⵄⴰⴷ.

15 ⵉⵙⴻⴱⴱⴰⴱⴻⵏ ⵏ ⵍⴻⵃⵡⴰⵢⴻⵊ-ⴰ, ⵉⵏⵏⵉ ⵉⴷⴻⵡⵍⴻⵏ ⵥⵥⴰⵢⵙⴻⵏⵜ ⴷ ⵜⵡⴰⵊⵊⴰⵔ, ⵡⴰⵔ ⵜⴻⵏⵜ ⵜⵜⵉⴼⴻⵏ ⵄⴰⴷ, ⵓⵛⴰ ⴰⴷ ⵇⵇⵉⵎⴻⵏ ⵖⴰⵔ ⵍⴰⴳⴳⵯⴰⵊ ⵥⵉ ⵜⴻⴳⴳⵯⵓⴷⵉ ⵏ ⵓⵄⴻⴷⴷⴻⴱ ⵏⵏⴻⵙ, ⴰⵎ ⵜⵜⵔⵓⵏ ⵓ ⴰⵎ ⵛⴻⵟⵟⵏⴻⵏ,

16 ⴰⴷ ⵉⵏⵉⵏ:

“ⵓⵛⵜ, ⵓⵛⵜ ⵅⴰⵎ, ⴰ ⵛⴻⵎ, ⵜⴰⵏⴷⵉⵏⵜ ⵜⴰⵎⴻⵇⵇⵔⴰⵏⵜ

ⵉ ⵢⴰⵔⴹⴻⵏ ⵍⴻⵇⵟⴻⵏ ⴰⵥⴷⴰⴷ ⴷ ⴰⵔⵊⵓⵡⴰⵏⵉ

ⴷ ⴰⵥⴻⴳⴳⵡⴰⵖ ⵉⵃⴻⴷⵇⴻⵏ ⵉⵇⵇⴻⵏ ⵙ ⵡⵓⵔⴻⵖ

ⴷ ⵢⴻⵥⵔⴰ ⵉⵖⵍⴰⵏ ⴷ ⵜⵢⴰⵇⵓⵜⵉⵏ, ^■  

17 ⵙ ⵎⵉⵏⵥⵉ ⴷⴻⴳ ⵉⵛⵜ ⵏ ⵜⵙⴰⵄⵄⴻⵜ

ⴰⵇⴰ ⵉⵡⴻⴷⴷⴰⵔ ⵡⴰⴳⵍⴰ ⴰⵎⴻⵇⵇⵔⴰⵏ ⵏⵏⴻⵙ!”

ⵎⴰⵔⵔⴰ ⵉⵏⵏⵉ ⵉⵏⴻⴷⴷⵀⴻⵏ ⵉⵖⴰⵔⵔⵓⴱⴰ ⴷ ⵎⴰⵔⵔⴰ ⵉⴱⴻⵃⵔⵉⵢⵢⴻⵏ ⴷ ⵎⴰⵔⵔⴰ ⵉⵏⵏⵉ ⵉⵅⴻⴷⴷⵎⴻⵏ ⴷⵉ ⵍⴻⴱⵃⴰⵔ ⵇⵇⵉⵎⴻⵏ ⴱⴻⴷⴷⴻⵏ ⵖⴰⵔ ⵍⴰⴳⴳⵯⴰⵊ,

18 ⵓ ⵏⵉⵜⵏⵉ ⵛⴻⵜⵛⴰⵏ ⵓⵎⵉ ⵥⵔⵉⵏ ⴷⴷⴻⵅⵅⴰⵏ ⵏ ⵜⵎⴻⵙⵙⵉ ⵏⵏⴻⵙ, ⵇⵇⴰⵔⴻⵏ:

“ⵡⵉ ⵉⵥⴻⵎⵎⴰⵔⴻⵏ ⴰⴷ ⵉⵎⵇⵓⴷⴷⴰ ⴰⴽ-ⴷ ⵜⴻⵏⴷⵉⵏⵜ-ⴰ ⵜⴰⵎⴻⵇⵇⵔⴰⵏⵜ?” ^■  

19 ⵙⵙⵓⵢⵓⵙⴻⵏ ⵓⵛⴰⵍ ⵅ ⵉⵥⴻⴵⵉⴼⴻⵏ ⵏⵙⴻⵏ ⵓⵛⴰ ⵙⵖⵓⵢⵢⴻⵏ, ⴰⵎ ⵜⵜⵔⵓⵏ ⵓ ⴰⵎ ⵜⵜⴻⵛⴹⵉⵏⴻⵏ, ⵇⵇⴰⵔⴻⵏ:

“ⵓⵛⵜ, ⵓⵛⵜ ⵅⴰⵎ, ⴰ ⵛⴻⵎ, ⵜⴰⵏⴷⵉⵏⵜ ⵜⴰⵎⴻⵇⵇⵔⴰⵏⵜ,

ⵜⴻⵏⵏⵉ ⵉ ⵥⵉ ⴷⴻⵡⵍⴻⵏ ⴷ ⵜⵡⴰⵊⵊⴰⵔ

ⵎⴰⵔⵔⴰ ⵉⵏⵏⵉ ⵖⴰⵔ ⵉⴵⴰ ⵉⵖⴰⵔⵔⵓⴱⴰ ⴷⵉ ⵍⴻⴱⵃⴰⵔ,

ⵙ ⵓⴱⴰⵔⵔⵓ ⵏ ⵡⴰⴳⵍⴰ ⵏⵏⴻⵙ,

ⵎⵉⵏⵥⵉ ⴷⴻⴳ ⵉⵛⵜ ⵏ ⵜⵙⴰⵄⵄⴻⵜ ⵜⵡⴻⴷⴷⴰⵔ!

20 ⴼⴰⵔⵃⴻⵜ ⵥⵥⴰⵢⴻⵙ, ⴰ ⴰⵊⴻⵏⵏⴰ,

ⴷ ⵉⵎⵇⴻⴷⴷⴰⵙⴻⵏ ⴷ ⵔⵔⵓⵙⵓⵍ ⴷ ⵉⵏⴰⴱⵉⵢⵢⴻⵏ,

ⵎⵉⵏⵥⵉ ⴰⵔⴻⴱⴱⵉ ⴰⵇⴰ ⵉⵙⵙⵓⴼⴼⴻⵖ-ⴷⴷ ⵍⴻⵃⴽⴰⵎⴻⵜ ⵏⵏⴻⵙ ⵅⴰⵙ!” ^□  ■  

21 ⵓⵛⴰ ⵉⵊⵊ ⵏ ⵍⵎⴰⵍⴰⴽ ⵉⵊⴻⵀⴷⴻⵏ ⵉⵙⵙⴳⴻⵄⵄⴻⴷ ⵉⵊⵊ ⵏ ⵡⴻⵥⵔⵓ ⴰⵎⴻⵇⵇⵔⴰⵏ ⴰⵏⴻⵛⵜ ⵏ ⵜⴻⵚⴹⴰⵔⵜ ⵏ ⵜⵙⵉⵔⵜ, ⵉⵏⴹⴰⵔ ⵉ-ⵜ ⴷⵉ ⵍⴻⴱⵃⴰⵔ, ⵉⵇⵇⴰⵔ:

“ⴰⵎⵎⵓ ⵙ ⵊⵊⴻⵀⴷ ⴰⴷ ⵜⴻⵎⵎⴻⵏⴹⴰⵔ ⴱⴰⴱⵉⵍⵓⵏ,

ⵜⴰⵏⴷⵉⵏⵜ ⵜⴰⵎⵎⴻⵇⵔⴰⵏⵜ ⵏⵏⵉ

ⵓⵛⴰ ⵡⴰⵔ ⵜᵉⵜⵜⵡⵉⴼ ⵄⴰⴷ ⵄⴻⵎⵎⴰⵔⵚ! ^■  

22 ⵍⵃⴻⵙⵙ ⵏ ⴰⵢⵜ ⵏ ⵍⵀⴰⵔⴱⴰ ⵓ ⵏ ⵓⵚⵓⴹⵉ ⴷⴻⴳ ⵓⵢⵉⵛⵛ ⵏ ⵉⵛⴰⵔⵔⵉ,

ⵓ ⵏ ⵄⵍⴰⵎ ⴽⵓⵍ ⴰⵖⴻⵏⵏⴻⵊ ⴷ ⵜⵖⵓⵢⵢⵉⵜ,

ⵡⴰⵔ ⵉⵜⵜⵡⴰⵙⴻⵍ ⵄⴰⴷ ⴷⴰⵢⴻⵎ. ^■  

23 ⵄⴻⵎⵎⴰⵔⵚ ⴰⴷ ⴷⴰⵢⴻⵎ ⵜⴰⵔⵢⴻⵖ ⵄⴰⴷ ⵟⵟⵢⴰ ⵏ ⵍⴻⴼⵏⴰⵔ,

ⵓⵛⴰ ⵓⵍⴰ ⴷ ⵍⵃⴻⵙⵙ ⵏ ⵡⴻⵙⵍⵉ ⴷ ⵜⴻⵙⵍⵉⵜ

ⵡⴰⵔ ⵉⵜⵜⵡⴰⵙⴻⵍ ⵄⴰⴷ ⴷⴰⵢⴻⵎ.

ⵉⵙⴻⴱⴱⴰⴱⴻⵏ ⵏⵏⴻⵎ ⵜⵓⵖⴰ ⴰⵜⴻⵏ ⴷ ⵉⵎⴻⵇⵇⵔⴰⵏⴻⵏ ⵏ ⵜⴻⵎⵎⵓⵔⵜ,

ⵎⵉⵏⵥⵉ ⵙ ⵜⵙⴻⵃⵃⴰⵔⵜ ⵏⵏⴻⵎ, ⴰⵇⴰ ⵜⵜⵡⴰⵅⴻⴷⵄⴻⵏ ⵍⴻⴳⵏⵓⵙ ⵎⴰⵔⵔⴰ. ^■  

24 ⴰⵇⴰ ⵉⵜⵜⵡⴰⴼ ⴷⴰⵢⴻⵎ ⵉⴷⴰⵎⵎⴻⵏ ⵏ ⵉⵏⴰⴱⵉⵢⵢⴻⵏ

ⵓ ⵏ ⵉⵎⵇⴻⴷⴷⴰⵙⴻⵏ ⵉⵏⵏⵉ ⵉⵜⵜⵡⴰⵏⵖⴻⵏ ⴷⵉ ⵜⴻⵎⵎⵓⵔⵜ.” ^■