1 ⵓⵛⴰ ⵥⵔⵉⵖ ⴷⴻⴳ ⵓⵊⴻⵏⵏⴰ ⵉⵛⵜ ⵏ ⵍⴻⵄⵍⴰⵎⴻⵜ ⵏⵏⴻⵖⵏⵉ, ⴷ ⵜⴰⵎⴻⵇⵇⵔⴰⵏⵜ ⴷ ⵜⴰⵏⴻⴱⵀⴻⵜ: ⵙⴻⴱⵄⴰ ⵏ ⵍⵎⴰⵍⴰⴽⴰⵜ ⵏⵏⵉ ⴷⴷ-ⵉⵡⵢⴻⵏ ⵙⴻⴱⵄⴰ ⵏ ⵊⵊⵔⴰⵢⴻⵃ ⵜⵉⵏⴻⴳⴳⵓⵔⴰ, ⵎⵉⵏⵥⵉ ⵉⴽⵎⴻⵍ ⵥⵥⴰⵢⵙⴻⵏⵜ ⵡⴻⵖⴹⴰⴱ ⵏ ⴰⵔⴻⴱⴱⵉ. ^■  

2 ⵓⵛⴰ ⵥⵔⵉⵖ ⴰⵎⴻⵛⵏⴰⵡ ⵍⴻⴱⵃⴰⵔ ⵏ ⵥⵥⴰⵊ, ⵡⴻⵏⵏⵉ ⵉⵅⴻⴵⴹⴻⵏ ⴰⴽ-ⴷ ⵜⵎⴻⵙⵙⵉ, ⵓⵛⴰ ⵉⵏⵏⵉ ⵉⵖⴻⵍⵍⴱⴻⵏ ⵅ ⵍⵡⴻⵃⵛ ⴷ ⵍⴻⵅⵢⴰⵍ ⵏⵏⴻⵙ ⴷ ⵏⵏⵓⵎⵔⵓ ⵏ ⵢⵉⵙⴻⵎ ⵏⵏⴻⵙ, ⴱⴻⴷⴷⴻⵏ ⵅ ⵜⵎⴰ ⵏ ⵍⴻⴱⵃⴰⵔ ⵏ ⵥⵥⴰⵊ, ⵖⴰⵔⵙⴻⵏ ⵍⵀⴰⵔⴱⴰⵜ ⵏ ⴰⵔⴻⴱⴱⵉ. ^■   3 ⵏⵉⵜⵏⵉ ⵖⴻⵏⵏⵊⴻⵏ ⵉⵥⵍⵉ ⵏ ⵎⵓⵙⴰ, ⴰⵎⵙⴻⵅⵅⴰⵔ ⵏ ⴰⵔⴻⴱⴱⵉ, ⴷ ⵢⴻⵥⵍⵉ ⵏ ⵢⴻⵥⵎⴰⵔ, ⵇⵇⴰⵔⴻⵏ:

“ⴷ ⵜⵉⵎⴻⵇⵇⵔⴰⵏⵉⵏ ⴷ ⵜⵚⴻⴱⵃⴰⵏⵉⵏ ⵍⴻⵅⴷⴰⵢⴻⵎ ⵏⵏⴻⴽ,

ⴰ, ⵙⵉⴷⵉ ⴰⵔⴻⴱⴱⵉ, ⴰⵎⵥⴻⵎⵎⴰⵔ ⵅ ⴽⵓⵍⵛⵉ,

ⵍⴻⵅⴷⴰⵢⴻⵎ ⵏⵏⴻⴽ ⴷ ⵜⴰⵙⴻⴳⴷⴰ ⴷ ⵜⵉⴷⴻⵜⵜ,

ⴰ ⴰⵊⴻⴵⵉⴷ ⵏ ⵎⴰⵔⵔⴰ ⵉⴽⵓⴷⴻⵏ! ^■  

4 ⵎⴰⵏ ⵡⴻⵏ ⵡⴰⵔ ⵛⴻⴽ ⵉⵜⵜⴻⴳⴳⵯⴻⴷⴻⵏ, ⴰ ⵙⵉⴷⵉ,

ⵎⴰⵏ ⵡⴻⵏ ⵡⴰⵔ ⵉⵙⵙⴻⵎⵖⴰⵔⴰⵏ ⵉⵙⴻⵎ ⵏⵏⴻⴽ?

ⵛⴻⴽ ⵡⴻⵃⵃⴷⴻⴽ ⵉ ⵉⴵⴰⵏ ⴷ ⴰⵎⵇⴻⴷⴷⴰⵙ,

ⵎⴰⵖⴰⵔ ⵎⴰⵔⵔⴰ ⵍⴻⴳⵏⵓⵙ ⴰⴷ ⴷⴷ-ⴰⵙⴻⵏ,

ⴰⴷ ⵙⴻⵊⴷⴻⵏ ⵥⵥⴰⵜⴻⴽ,

ⵎⵉⵏⵥⵉ ⵛⴻⴽ ⴷ ⵜⵉⴷⴻⵜⵜ.” ^■  

5 ⴰⵡⴰⵔⵏⵉ ⴰⵙ ⵥⵔⵉⵖ, ⴰⵇⴰ ⵜⴻⵏⵏⵓⵔⵥⴻⵎ ⵣⵥⴰⵡⴻⵛⵜ ⴷⵉ ⵜⵥⴻⴷⴷⵉⵖⵜ ⵏ ⵛⵛⵀⴰⴷⴻⵜ ⴷⴻⴳ ⵓⵊⴻⵏⵏⴰ. ^■   6 ⵙⴻⴱⵄⴰ ⵏ ⵍⵎⴰⵍⴰⴽⴰⵜ ⵏⵏⵉ ⵖⴰⵔ ⵉⴵⴰ ⵙⴻⴱⵄⴰ ⵏ ⵊⵊⵔⴰⵢⴻⵃ ⴼⴼⵖⴻⵏⵜ ⵉ-ⴷⴷ ⵥⵉ ⵣⵥⴰⵡⴻⵛⵜ, ⵢⴰⵔⴹⴻⵏ ⵍⴻⵇⵟⴻⵏ ⴰⵥⴷⴰⴷ ⵉⵥⴷⵉⴳⴻⵏ ⵉⵜⵜⵉⵙⵙⵉⵇⴻⵏ, ⵓⵛⴰ ⵖⴰⵔⵙⴻⵏ ⵅ ⵉⴷⵎⴰⵔⴻⵏ ⵉⵊⵊ ⵏ ⵡⴻⴱⵢⴰⵙ ⵏ ⵡⵓⵔⴻⵖ. ^■   7 ⵓⵛⴰ ⵉⵊⵊⴻⵏ ⵥⵉ ⴰⵔⴻⴱⵄⴰ ⵏ ⵉⵎⴻⴷⴷⴰⵔⴻⵏ ⵉⵡⵛⴰ ⴰⵙⴻⵏ ⵉ ⵙⴻⴱⵄⴰ ⵏ ⵍⵎⴰⵍⴰⴽⴰⵜ ⵙⴻⴱⵄⴰ ⵏ ⵟⵟⴰⵡⵢⴰⵜ, ⵛⵛⵓⵔⴻⵏⵜ ⵙ ⵡⴻⵖⴹⴰⴱ ⵏ ⴰⵔⴻⴱⴱⵉ ⵡⴻⵏⵏⵉ ⴷ ⵜⵓⴷⴰⵔⵜ ⵉ ⵍⴻⴱⴷⴰ ⵇⴰⵄ. ⴰⵎⵉⵏ! 8 ⵓⵛⴰ ⵜᵉⵜⵜⵡⴰⵄⴻⵎⵎⴰⵔ ⵣⵥⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵙ ⴷⴷⴻⵅⵅⴰⵏ ⵉ ⴷⴷ-ⵉⵜⵜⴻⴼⴼⵖⴻⵏ ⵥⴻⴳ ⵓⵄⵓⴵⵉ ⵏ ⴰⵔⴻⴱⴱⵉ ⵓ ⵏ ⵊⵊⴻⵀⴷ ⵏⵏⴻⵙ. ⵓⵍⴰ ⴷ ⵉⵊⵊⴻⵏ ⵡⴰⵔ ⵉⵥⴻⵎⵎⴰⵔ ⴰⴷ ⴷⴷ-ⵢⴰⴷⴻⴼ ⵖⴰⵔ ⵣⵥⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⴰⵍ ⵖⴰ ⴽⴽⴻⵏⵜ ⵙⴻⴱⵄⴰ ⵏ ⵊⵊⵔⴰⵢⴻⵃ ⵜⵉⵏⵏⵉ ⴷⴷ-ⵉⵡⵢⴻⵏ ⵙⴻⴱⵄⴰ ⵏ ⵍⵎⴰⵍⴰⴽⴰⵜ. ^■