9
1 ⵎⵉⵏⵥⵉ ⵃⴻⵙⴱⴻⵖ ⴱⴻⵍⵍⵉ ⵏⵀⵍⴰ ⵎⴰ ⵓⵔⵉⵖ ⴰⵡⴻⵎ-ⴷⴷ ⵅ ⵜⵙⴻⵅⵅⴰⵔⵜ ⵉ ⵜⵡⵉⵥⴰ ⵉ ⵉⵎⵇⴻⴷⴷⴰⵙⴻⵏ, ■ 2 ⵎⵉⵏⵥⵉ ⵙⵙⵏⴻⵖ ⵏⵏⴻⵢⵢⴻⵜ ⵏⵡⴻⵎ ⵉⵚⴻⴱⵃⴻⵏ ⵎⵉⵅⴻⴼ ⵅⴰⵡⴻⵎ ⵙⵙⴻⵎⵖⴰⵔⴻⵖ ⵊⴰⵔ ⵉⵏⵏⵉ ⵏ ⵎⴰⵙⵉⴷⵓⵏⵉⵢⴰ, ⴱⴻⵍⵍⵉ ⴰⵅⴰⵢⴰ ⵜⵓⵖⴰ ⵜⴻⵡⵊⴻⴷ ⵥⴻⴳ ⵓⵙⴻⴳⴳⵯⴰⵙ ⵉⵄⴷⵓⵏ ⵓⵛⴰ ⵛⴹⴰⵔⴻⵜ ⵏⵡⴻⵎ ⴰⵇⴰ ⵜⴻⵙⴼⴰⵇ ⴰⵥⵢⴻⵏ ⴰⵎⴻⵇⵇⵔⴰⵏ. 3 ⵎⴰⵛⴰ ⵙⵙⴻⴽⴽⴻⵖ-ⴷⴷ ⴰⵡⵎⴰⵜⴻⵏ-ⴰ, ⵎⴰⵃⴻⵏⴷ ⴰⵙⴻⵎⵖⴰⵔ ⵏⵏⴻⵖ ⴷⴰⵢⵡⴻⵎ ⵡⴰⵔ ⵉⵜⵜⵉⵍⵉ ⵛⴰ ⴱⴰⵟⴻⵍ ⴷⵉ ⵜⵎⴻⵙⵍⴰⵛⵜ-ⴰ, ⵃⵉⵎⴰ ⴰⴷ ⵜⵉⵍⵉⵎ ⵜⵃⴻⵥⵥⵎⴻⵎ ⴰⵎ ⵎⴰⵎⵎⴻⵛ ⵏⵏⵉⵖ, 4 ⵃⵉⵎⴰ, ⵅⵎⵉ ⴽⵉⴷⵉ ⵉ ⴷⴷ ⵖⴰ ⵢⴰⵙⴻⵏ ⵛⴰ ⵏ ⵉⵎⴰⵙⵉⴷⵓⵏⵉⵢⵢⴻⵏ ⵓⵛⴰ ⴰⴷ ⴽⴻⵏⵏⵉⵡ ⴰⴼⴻⵏ ⵄⴰⴷ ⵡⴰⵔ ⵜⵃⴻⵥⵥⵎⴻⵎ, ⵏⴻⵛⵛⵉⵏ, - ⵎⴰⵃⴻⵏⴷ ⵡⴰⵔ ⵇⵇⴰⵔⴻⵖ ⵛⴰ ‘ⴽⴻⵏⵏⵉⵡ’ -, ⵡⴰⵔ ⵏⵖⴻⵟⵟⴻⵔ ⵥⴻⴳ ⵓⵙⴻⵎⵖⴰⵔ ⵉ ⵥⵥⴰⵢⵡⴻⵎ ⵏⴻⵙⵙⴻⵎⵖⴰⵔ. 5 ⵙ ⵓⵢⴻⵏⵏⵉ ⴳⴳⵉⵖ ⴰⴷ ⵜⵜⴰⵔⴻⵖ ⴰⵡⵎⴰⵜⴻⵏ ⵏⵏⵉ, ⵎⴰⵃⴻⵏⴷ ⴰⴷ ⵖⴰⵔⵡⴻⵏ ⴷⴷ-ⴰⵙⴻⵏ ⴷ ⴰⵎⴻⵥⵡⴰⵔⵓ ⵓⵛⴰ ⴰⴷ ⵙⵙⴻⵡⵊⴷⴻⵏ ⵇⴱⴻⵍ ⵍⴱⴰⵔⴰⴽⴰ ⵏ ⵚⵚⴷⴰⵇⵉ ⵜⵉⵏⵏⵉ ⵅ ⵉⵜⵜⵡⴰⵏⵏⴰ ⵇⴱⴻⵍ ⵉ ⴽⴻⵏⵏⵉⵡ, ⴰⵇⴰ ⵉⵜⵜⵅⴻⵚⵚⴰ ⴰⴷ ⵜⵉⵍⵉ ⵚⵚⴻⴷⵇⴻⵜ-ⴰ ⵖⴰⵔ ⵓⴼⵓⵙ ⴰⵎ ⵉⵛⵜ ⵏ ⵍⴱⴰⵔⴰⴽⴰ, ⵡⴰⵔ ⵉⴵⵉ ⴰⵅⵎⵉ ⵜⵜ-ⵉ-ⴷⴷ-ⴽⴽⵙⴻⵏ ⵥⵉ ⵜⴻⵍⵎⴻⵛⵜ ⵏⵡⴻⵎ. 6 ⵎⴰⵛⴰ ⵙⵏⴻⵎ ⴷⴷⴻⴳⴳⴰ:
“ⵡⴻⵏⵏⵉ ⵉ ⵖⴰ ⵉⵥⴰⵔⵄⴻⵏ ⵙ ⵜⵛⴻⵟⵟⴰⵔⵜ, ⴰⴷ ⵉⵎⵊⴰⵔ ⵙ ⵜⴰⵛⴻⵟⵟⴰⵔⵜ,
ⵓⵛⴰ ⵡⴻⵏⵏⵉ ⵉ ⵖⴰ ⵉⵥⴰⵔⵄⴻⵏ ⵙ ⵜⴻⵛⵔⵉⵎⴻⵜ,
ⴰⴷ ⵉⵎⵊⴰⵔ ⵄⴰⵡⴻⴷ ⵙ ⵜⴻⵛⵔⵉⵎⴻⵜ.” ■
7 ⴰⴷ ⵉⴳⴳ ⴽⵓⵍ ⵉⵊⵊⴻⵏ ⴰⵎ ⵎⴰⵎⵎⴻⵛ ⵉⵏⵡⴰ ⴷⴻⴳ ⵡⵓⵍ ⵏⵏⴻⵙ, ⵡⴰⵔ ⵉⴵⵉ ⵙ ⵉⵎⴻⵟⵟⴰⵡⴻⵏ ⵏⵉⵖ ⵙ ⵓⵖⵉⵍ, ⵎⵉⵏⵥⵉ ⴰⵔⴻⴱⴱⵉ ⵉⵜⵜⴻⵅⵙ ⵡⴻⵏⵏⵉ ⵉⵜⵜⵉⵛⴻⵏ ⵙ ⵍⴻⴼⵔⴰⵃⴻⵜ, ■ 8 ⵓⵛⴰ ⴰⵔⴻⴱⴱⵉ ⴰⵇⴰ ⵉⵥⴻⵎⵎⴰⵔ ⴰⴷ ⴰⵡⴻⵎ ⵉⵡⵛ ⵙ ⴽⵓⵍ ⴰⵔⴹⴰ ⵙ ⵓⴼⴻⵢⵢⴻⴹ, ⵃⵉⵎⴰ ⵍⴻⴱⴷⴰ ⵓ ⴷⵉ ⵎⴰⵔⵔⴰ ⴰⴷ ⵖⴰⵔⵡⴻⵎ ⵢⵉⵍⵉ ⵎⵉⵏ ⵜⴻⵃⴷⴰⵊⴻⵎ ⵓⵛⴰ ⴰⴷ ⵜⴰⵔⵏⵉⵎ ⴰⵟⵟⴰⵙ ⴷⵉ ⵎⴰⵔⵔⴰ ⵍⵅⴻⴷⵎⴻⵜ ⵉⵚⴻⴱⵃⴻⵏ, 9 ⴰⵎ ⵎⴰⵎⵎⴻⵛ ⵜⵓⵔⴰ:
“ⴰⵇⴰ ⵉⴱⴻⵟⵟⴰ, ⵉⵡⵛⴰ ⵉ ⵉⵎⴻⵥⵍⴰⴹ,
ⵜⴰⵙⴻⴳⴷⴰ ⵏⵏⴻⵙ ⵜᵉⵜⵜⵖⵉⵎⴰ ⵉ ⵍⴻⴱⴷⴰ.” ■
10 ⴻⵊⵊ ⴰⴷ ⵢⵉⵍⵉ ⵡⴻⵏⵏⵉ ⵉⵜⵜⵉⵛⴻⵏ ⵥⵥⴰⵔⵉⵄⴻⵜ ⵉ ⵡⴻⵏⵏⵉ ⵉⵥⴰⵔⵄⴻⵏ ⵓⵍⴰ ⴷ ⴰⵖⵔⵓⵎ ⵉ ⵎⴰⵛⵛⴰ, ⴰⴷ ⵢⴰⵔⵏⵉ ⴷⵉ ⵥⵥⴰⵔⵉⵄⴻⵜ ⵏⵡⴻⵎ ⵓⵛⴰ ⴰⴷ ⵉⵙⵙⴻⴳⵎⴰ ⵍⵖⵉⴵⴻⵜ ⵏ ⵜⵙⴻⴳⴷⴰ ⵏⵡⴻⵎ,
11 ⵎⴰⵃⴻⵏⴷ ⴰⴷ ⵜⵉⵍⵉⵎ ⵜⵜⴻⵊⵊⴰⵔⴻⵎ ⴷⵉ ⵎⴰⵔⵔⴰ ⵉ ⵎⴰⵔⵔⴰ ⵜⴰⵛⵔⵉⵎⴻⵜ ⵜⴻⵏⵏⵉ ⵉⴽⴻⵎⵎⵍⴻⵏ ⵥⵥⴰⵢⵏⴻⵖ ⴰⵇⴰⴷⵉ ⵉ ⴰⵔⴻⴱⴱⵉ.
12 ⵎⵉⵏⵥⵉ ⵍⵅⴻⴷⵎⴻⵜ ⵏ ⵜⵙⴻⵅⵅⴰⵔⵜ ⵜⴰⵏⵉⵜⴰ ⵡⴰⵔ ⵜⴻⴵⵉ ⵡⴰⵀⴰ ⴷⵉ ⵟⵟⵡⴻⵄ ⵏ ⵎⵉⵏ ⵉⵏⴻⵇⵚⴻⵏ ⵉ ⵉⵎⵇⴻⴷⴷⴰⵙⴻⵏ, ⵎⴰⵛⴰ ⵜᵉⵜⵜⴰⵡⵉ ⵄⴰⵡⴻⴷ ⵖⴰⵔ ⵡⴰⵟⵟⴰⵙ ⵏ ⵓⵇⴰⴷⵉ ⵉ ⴰⵔⴻⴱⴱⵉ.
13 ⵎⵉⵏⵥⵉ ⵙ ⵜⵇⴻⴵⴻⴱⵜ ⵏ ⵜⵙⴻⵅⵅⴰⵔⵜ-ⴰ, ⴰⵇⴰ ⵙⵙⴻⵎⵖⴰⵔⴰⵏ ⴷⵉ ⴰⵔⴻⴱⴱⵉ ⵥⵉ ⵙⵙⵉⴱⴱⴻⵜ ⵏ ⵟⵟⴰⵄⴻⵜ ⵏⵡⴻⵎ ⴷⵉ ⵟⵟⵡⴻⵄ ⵏ ⵛⵛⵀⴰⴷⴻⵜ ⵉ ⵍⴻⵅⴱⴰⵔ ⴰⵚⴻⴱⵃⴰⵏ ⵏ ⵍⵎⴰⵙⵉⵃ ⵓⵍⴰ ⵥⵉ ⵙⵙⵉⴱⴱⴻⵜ ⵏ ⵜⴻⵛⵔⵉⵎⴻⵜ ⵏ ⵜⵡⵉⵥⴰ ⵏⵡⴻⵎ ⵉ ⵏⵉⵜⵏⵉ ⵓ ⵉ ⵎⴰⵔⵔⴰ.
14 ⵏⵉⵜⵏⵉ ⴰⴷ ⴷⴷ-ⵇⴰⵔⵔⴱⴻⵏ ⵖⴰⵔ ⴰⵔⴻⴱⴱⵉ ⵙ ⵜⵥⴰⴵⵉⵜⵉⵏ ⵉ ⴽⴻⵏⵏⵉⵡ, ⵙ ⵜⴰⵢⵔⵉ ⴰⵟⵟⴰⵙ ⵅ ⵙⵙⵉⴱⴱⴻⵜ ⵏ ⵓⴼⴻⵢⵢⴻⴹ ⵏ ⴰⵔⴹⴰ ⵏ ⴰⵔⴻⴱⴱⵉ ⵏⵏⵉ ⵅⴰⵡⴻⵎ ⵉⴵⴰⵏ.
15 ⵜⵇⴰⴷ ⴰⵙ ⵉ ⴰⵔⴻⴱⴱⵉ ⵅ ⵜⴻⵡⵀⵉⴱⵜ ⵏⵏⴻⵙ ⵉ ⵡⴰⵔ ⵏⵥⴻⵎⵎⴰⵔ ⴰⴷ ⵥⵥⴰⵢⴻⵙ ⵏⴻⵏⵟⴻⵇ.