1 ⴷⴻⴳⴳⴰ ⴰⵇⴰ ⴳⴳⵉⵖ ⵜ ⴷⴻⴳ ⵢⵉⵅⴻⴼ ⵉⵏⵓ, ⴰⵇⴰ ⵡⴰⵔ ⵖⴰⵔⵡⴻⵎ ⴷⴷ-ⵓⵙⵉⵖ ⵜⵡⴰⵍⴰ ⵏⵏⴻⵖⵏⵉⵜ ⵙ ⵡⴻⵛⴹⴰⵏ. 2 ⵎⵉⵏⵥⵉ ⵎⴰⵍⴰ ⵥⴻⵄⵎⴰ ⵏⴻⵛⵛ ⵙⵙⴼⴼⵓⴳⵎⴻⵖ ⴽⴻⵏⵏⵉⵡ, ⵡⵉ ⵅⴻⵏⵏⵉ ⴷ ⴰⵢⵉ ⵖⴰ ⵉⵙⵙⴼⴰⵔⵃⴻⵏ ⵎⵖⵉⵔ ⵡⴻⵏⵏⵉ ⴷⵉ ⴳⴳⵉⵖ ⴰⴼⵓⴳⴻⵎ? 3 ⵓⵔⵉⵖ ⴰⵡⴻⵎ-ⴷⴷ ⵎⴰⵏ ⴰⵢⴰ, ⵃⵉⵎⴰ ⵏⴻⵛⵛ, ⵅⵎⵉ ⴷⴷ ⵖⴰ ⵢⴰⵡⴹⴻⵖ ⴷⵉⵏ, ⵡⴰⵔ ⵜⵜⵡⴰⵙⴼⴼⵓⴳⵎⴻⵖ ⵛⴰ ⵥⴻⴳ ⵉⵏⵏⵉ ⵉⵜⵜⵅⴻⵚⵚⴰ ⴰⴷ ⵥⵥⴰⵢⵙⴻⵏ ⴼⴰⵔⵃⴻⵖ. ⴰⵇⴰ ⵜⵜⵉⵇⵇⴻⵖ ⴷⴰⵢⵡⴻⵎ ⵎⴰⵔⵔⴰ, ⴱⴻⵍⵍⵉ ⵍⴻⴼⵔⴰⵃⴻⵜ ⵉⵏⵓ, ⴰⵇⴰ-ⵜⵜ ⴷ ⵍⴻⴼⵔⴰⵃⴻⵜ ⵏⵡⴻⵎ ⵎⴰⵔⵔⴰ. ^■   4 ⵎⵉⵏⵥⵉ ⵓⵔⵉⵖ ⴰⵡⴻⵎ-ⴷⴷ ⴷⵉ ⵍⴻⵃⵚⴰⵔⴻⵜ ⵜⴻⵎⵖⴰⵔ ⵙ ⵡⴰⵟⵟⴰⵙ ⵏ ⵉⵎⴻⵟⵟⴰⵡⴻⵏ ⵓⵍⴰ ⵙ ⵡⵓⵍ ⵢⴰⵔⴻⵊⴼⴻⵏ, ⵡⴰⵔ ⵉⴵⵉ ⵃⵉⵎⴰ ⴰⴷ ⵜⴼⴼⵓⴳⵎⴻⵎ, ⵎⴰⵛⴰ ⵃⵉⵎⴰ ⴰⴷ ⵜⴻⵙⵙⵏⴻⵎ ⵜⴰⵢⵔⵉ ⵉ ⵖⴰⵔⵉ ⵉ ⴽⴻⵏⵏⵉⵡ ⵙ ⵓⴼⴻⵢⵢⴻⴹ.

5 ⵎⴰⵛⴰ ⵎⴰⵍⴰ ⴷⵉⵏ ⵡⴻⵏⵏⵉ ⵉⵙⵙⴼⴼⵓⴳⵎⴻⵏ, ⵏⴻⵜⵜⴰ ⵡⴰⵔ ⴷ ⴰⵢⵉ ⵉⵙⵙⴼⴼⵓⴳⴻⵎ ⵡⴰⵀⴰ, ⵎⴰⵛⴰ ⵥⴻⴳ ⵉⵊⵊ ⵏ ⵓⵖⴻⵥⴷⵉⵙ ⵉ ⴽⴻⵏⵏⵉⵡ ⵎⴰⵔⵔⴰ, ⴰⵍⴰⵎⵉ ⵡⴰⵔ ⴽⴻⵏⵏⵉⵡ ⵙⵙⴹⴻⵇⵍⴻⵖ ⵙ ⵡⴰⵡⴰⵍ-ⴰ. 6 ⵛⴼⴰ-ⵢ-ⴰⵙ ⵉ ⵡⴰⵏⵉⵜⴰ, ⴰⵇⴰ ⴰⵥⵢⴻⵏ ⴰⵎⴻⵇⵇⵔⴰⵏ ⵥⵥⴰⵢⵡⴻⵎ ⵜⵓⵖⴰ ⵉⵡⴻⴱⴱⴻⵅ ⵉ-ⵜ. ^■   7 ⵣⵉ ⵊⵊⵉⵀⴻⵜ ⵏⵏⴻⵖⵏⵉ ⴰⵇⴰ ⵉⵜⵜⵅⴻⵚⵚⴰ ⴰⵡⴻⵎ ⵍⴻⵅⵅⵓ ⴰⴷ ⴰⵙ ⵜⵙⴰⵎⵃⴻⵎ ⵓⵛⴰ ⴰⴷ ⵅⴰⵙ ⵜⴻⵙⵙⴼⴻⵡⵡⵊⴻⵎ, ⵃⵉⵎⴰ ⵡⴰⵔ ⵅⴰⵙ ⵢⴰⵔⴻⵏⵏⵉ ⵓⴼⵓⴳⴻⵎ ⴰⵍ ⴰⵏⴻⴳⴳⴰⵔⵓ. 8 ⵙ ⵓⵢⴻⵏⵏⵉ ⵥⴰⵡⴳⴻⵖ ⴽⴻⵏⵏⵉⵡ ⵎⴰⵃⴻⵏⴷ ⴰⴷ ⴰⵙ ⵜⴻⵙⵙⵜⴻⴱⴱⵜⴻⵎ ⵜⴰⵢⵔⵉ ⵏⵡⴻⵎ ⵉ ⵏⴻⵜⵜⴰ, 9 ⵎⵉⵏⵥⵉ ⵄⴰⵡⴻⴷ ⵉ ⵎⴰⵏ ⴰⵢⴰ ⵓⵔⵉⵖ ⴰⵡⴻⵎ-ⴷⴷ, ⵃⵉⵎⴰ ⴰⴷ ⵙⵙⵏⴻⵖ ⵙ ⵜⵉⴷⴻⵜⵜ, ⵎⴰ ⵜᵉⵟⵟⴰⵄⴻⵎ ⴷⵉ ⵎⴰⵔⵔⴰ.

10 ⵡⴻⵏⵏⵉ ⵓⵎⵉ ⵜⵙⴰⵎⵃⴻⵎ, ⵏⴻⵛⵛ ⵄⴰⵡⴻⴷ ⴰⴷ ⴰⵙ ⵙⴰⵎⵃⴻⵖ. ⵎⵉⵏⵥⵉ ⵎⴰⵍⴰ ⵜⵓⵖⴰ ⴷⵉⵏ ⵅ ⵎⵉⵅⴻⴼ ⵙⴰⵎⵃⴻⵖ, ⵎⵉⵅⴻⴼ ⵓⵎⵉ ⵙⴰⵎⵃⴻⵖ, ⵙⴰⵎⵃⴻⵖ ⵜ ⴷⵉ ⵟⵟⵡⴻⵄ ⵏⵡⴻⵎ ⵇⵉⴱⴰⵞ ⵉ ⵡⵓⴷⴻⵎ ⵏ ⵍⵎⴰⵙⵉⵃ,

11 ⵃⵉⵎⴰ ⵅⴻⵏⵏⵉ ⵛⵛⵉⵟⴰⵏ ⵡⴰⵔ ⴷ ⴰⵏⴻⵖ ⵉⵥⴻⵎⵎⴰⵔ, ⵎⵉⵏⵥⵉ ⵏⴻⵙⵙⴻⵏ ⵉⵅⴰⵔⵔⵉⵚⴻⵏ ⵏⵏⴻⵙ.

12 ⵅⴻⵏⵏⵉ ⵍⴰⵎⵉ ⴷⴷ-ⵉⵡⴹⴻⵖ ⵖⴰⵔ ⵜⵔⵓⵡⴰⵙ ⵙ ⵍⴻⵅⴱⴰⵔ ⴰⵚⴻⴱⵃⴰⵏ ⵏ ⵍⵎⴰⵙⵉⵃ ⵓⵛⴰ ⵜⴻⵏⵏⵓⵔⵥⴻⵎ ⴰⵢⵉ-ⴷⴷ ⵜⴻⵡⵡⴰⵔⵜ ⵙ ⵓⴼⵓⵙ ⵏ ⵙⵉⴷⵉ, ^■  

13 ⵜⵓⵖⴰ ⵡⴰⵔ ⴰⵔⴻⵢⵢⵃⴻⵖ ⵛⴰ ⴷⵉ ⴰⵔⵔⵓⵃ ⵉⵏⵓ, ⵎⵉⵏⵥⵉ ⵡⴰⵔ ⵓⴼⵉⵖ ⵛⴰ ⵓⵎⴰ ⵜⵉⵜⵓⵙ. ⵙ ⵓⵢⴻⵏⵏⵉ ⵎⵎⵙⴻⴱⴹⵉⵖ ⵅⴰⵙⴻⵏ ⵓⵛⴰ ⵓⵢⵓⵔⴻⵖ ⵖⴰⵔ ⵎⴰⴽⵉⴷⵓⵏⵉⵢⴰ.

14 ⵎⴰⵛⴰ ⴰⵇⴰⴷⵉ ⵉ ⴰⵔⴻⴱⴱⵉ ⵡⴻⵏⵏⵉ ⴷ ⴰⵏⴻⵖ ⴷⴷ-ⵉⵜⵜⴰⵡⵢⴻⵏ ⴷ ⴰⴼⵓⵔⵔⴻⵊ ⴷⵉ ⵍⵎⴰⵙⵉⵃ ⵍⴻⴱⴷⴰ, ⵓⵛⴰ ⵉⵙⵙⵛⴰⵏ ⵥⵥⴰⵢⵏⴻⵖ ⵍⴻⴼⵡⴰⵃⴻⵜ ⵏ ⵜⵓⵙⵙⵏⴰ ⵏⵏⴻⵙ ⴷⵉ ⵎⴰⵔⵔⴰ ⵉⵎⵓⵛⴰⵏ. ^■  

15 ⵎⵉⵏⵥⵉ ⵏⴻⴵⴰ ⴷ ⵉⵛⵜ ⵏ ⵍⴻⴼⵡⴰⵃⴻⵜ ⵉⵛⵏⴰⵏ ⵉ ⴰⵔⴻⴱⴱⵉ ⴷⵉ ⵍⵎⴰⵙⵉⵃ, ⵉ ⵢⴻⵏⵏⵉ ⵉⴷⴷⴰⵔⴻⵏ ⵓ ⵉ ⵢⴻⵏⵏⵉ ⵉ ⵖⴰ ⵉⵜⵜⵡⴰⵀⴻⵍⵍⴽⴻⵏ,

16 ⵉ ⵉⵏⴻⴳⴳⵓⵔⴰ ⴷ ⴰⵔⵔⵉⵃⴻⵜ ⵏ ⵍⵎⴻⵡⵜ ⵉ ⵍⵎⴻⵡⵜ ⵓⵛⴰ ⵉ ⵉⵏⵏⵉ ⵉⵎⴻⵥⵡⵓⵔⴰ ⴷ ⵍⴻⴼⵡⴰⵃⴻⵜ ⵏ ⵜⵓⴷⴰⵔⵜ ⵉ ⵜⵓⴷⴰⵔⵜ. ⵓⵛⴰ ⵎⴰⵏ ⵡⴻⵏ ⴷ ⴰⵙ ⵉⵇⴻⴷⴷⴻⵏ ⵉ ⵙⵙⵓⵇ-ⴰ? ^■  

17 ⵏⴻⵛⵛⵉⵏ ⵡⴰⵔ ⵏⴻⴵⵉ ⴰⵏⴻⵛⵜ ⵉⵏⵏⴻⵖⵏⵉ ⵉⵏⵏⵉ ⵉⵙⵙⴼⴰⵔⵔⴰⵖⴻⵏ ⴰⵡⴰⵍ ⵏ ⴰⵔⴻⴱⴱⵉ, ⵎⴰⵛⴰ ⵏⴻⵙⵙⵉⵡⴻⵍ ⴷⵉ ⵍⵎⴰⵙⵉⵃ ⵇⵉⴱⴰⵞ ⵉ ⴰⵔⴻⴱⴱⵉ ⵄⵍⴰⵃⵙⴰⴱ ⵜⵉⴷⴻⵜⵜ ⵓ ⵄⵍⴰⵃⵙⴰⴱ ⵎⵉⵏ ⵉⴵⴰⵏ ⵥⵉ ⴰⵔⴻⴱⴱⵉ.