1 ⴰ ⴰⵢⵜⵎⴰ, ⴰⵎⴻⵥⵔⵉ ⵏ ⵡⵓⵍ ⵉⵏⵓ ⵓ ⵜⴰⵥⴰⴵⵉⵜ ⵜⴻⵏⵏⵉ ⵥⵓⴵⴻⵖ ⵖⴰⵔ ⴰⵔⴻⴱⴱⵉ ⴷⵉ ⵟⵟⵡⴻⵄ ⵏ ⵉⵙⵔⴰⵢⵉⵍ, ⴰⵇⴰ-ⵜⵜ ⵃⵉⵎⴰ ⴰⴷ ⵖⴰⵔⵙⴻⵏ ⵜⵉⵍⵉ ⵜⵓⴷⴰⵔⵜ. 2 ⴰⵇⴰ ⵛⴻⵀⵀⴷⴻⵖ ⵅⴰⵙⴻⵏ ⴰⵇⴰ ⵏⵉⵜⵏⵉ ⵖⴰⵔⵙⴻⵏ ⵛⴹⴰⵔⴻⵜ ⵉ ⴰⵔⴻⴱⴱⵉ, ⵎⴰⵛⴰ ⴱⵍⴰ ⵜⵓⵙⵙⵏⴰ. ^■   3 ⵎⴰⵖⴰⵔ ⵡⴰⵔ ⵙⵙⵉⵏⴻⵏ ⵜⴰⵙⴻⴳⴷⴰ ⵏ ⴰⵔⴻⴱⴱⵉ, ⵎⴰⵛⴰ ⴰⵔⴻⵥⵥⵓⵏ ⴰⴷ ⵟⵟⴼⴻⵏ ⴷⵉ ⵜⵙⴻⴳⴷⴰ ⵏ ⵉⵅⴻⴼ ⵏⵙⴻⵏ. ⵙ ⵓⵢⴰ ⵡⴰⵔ ⵙⵙⵡⴰⴹⵄⴻⵏ ⵉⵅⴻⴼ ⵏⵙⴻⵏ ⵉ ⵜⵙⴻⴳⴷⴰ ⵏ ⴰⵔⴻⴱⴱⵉ.

4 ⵎⵉⵏⵥⵉ ⴰⴽⴻⵎⵎⴻⵍ ⵏ ⵛⵛⴰⵔⵉⵄⴰ ⵏⴻⵜⵜⴰ ⴷ ⵍⵎⴰⵙⵉⵃ, ⵉ ⵜⵙⴻⴳⴷⴰ ⵉ ⴽⵓⵍ ⵉⵊⵊⴻⵏ ⵉ ⵉⵜⵜⴰⵎⵏⴻⵏ. ^■   5 ⵎⵉⵏⵥⵉ ⵎⵓⵙⴰ ⵢⵓⵔⴰ ⵥⵉ ⵊⵊⵉⵀⴻⵜ ⵏ ⵜⵙⴻⴳⴷⴰ ⴷⵉ ⵛⵛⴰⵔⵉⵄⴰ:

“ⵡⴻⵏⵏⵉ ⵉⵜⵜⴻⴳⴳⴻⵏ ⵎⴰⵏ ⴰⵢⴰ,

ⴰⴷ ⵥⵥⴰⵢⴻⵙ ⵉⴷⴷⴰⵔ.” ^■  

6 ⵎⴰⵛⴰ ⵜⴰⵙⴻⴳⴷⴰ ⵜⴻⵏⵏⵉ ⵥⵉ ⵍ’ⵉⵎⴰⵏ ⵜⴻⵇⵇⴰⵔ ⴰⵎⵎⵓ:

“ⵡⴰⵔ ⵜⴻⵇⵇⴰⵔ ⴷⴻⴳ ⵡⵓⵍ ⵏⵏⴻⴽ:

‘ⵡⵉ ⵉ ⵖⴰ ⵉⴳⴻⵄⵄⴷⴻⵏ ⵖⴰⵔ ⵓⵊⴻⵏⵏⴰ ⵓⵛⴰ ⵉⵙⵙⴻⵀⵡⴰ ⵍⵎⴰⵙⵉⵃ?” ^■  

7 ⵏⵉⵖ:

“ⵡⵉ ⵉ ⵖⴰ ⵉⵀⵡⴰⵏ ⴷⴻⴳ ⵡⴻⵃⴼⵓⵔ ⵏ ⵍⴰⵅⴰⵔⵜ,

ⵓⵛⴰ ⵉⵙⵙⴳⴻⵄⵄⴻⴷ ⵍⵎⴰⵙⵉⵃ ⵥⵉ ⵜⴰⴷⴷⴰⵔⵜ ⵏ ⵉⵎⴻⵜⵜⵉⵏⴻⵏ?”

8 ⵎⴰⵛⴰ ⵎⵉⵏ ⵖⴰ ⵜⵉⵏⵉ ⵜⵙⴻⴳⴷⴰ?

“ⴰⵡⴰⵍ ⵢⵓⴷⴻⵙ ⵉ ⵛⴻⴽ, ⴰⵇⴰ-ⵜ ⴷⴻⴳ ⵓⵇⴻⵎⵎⵓⵎ ⵏⵏⴻⴽ ⵓⵍⴰ ⴷⴻⴳ ⵡⵓⵍ ⵏⵏⴻⴽ.”

ⵡⴰ ⴷ ⴰⵡⴰⵍ ⵏ ⵍ’ⵉⵎⴰⵏ ⵉ ⵥⵉ ⵏⴻⵜⵜⴱⴰⵔⵔⴻⵃ.” ^■  

9 ⵎⴰⵍⴰ ⵜⵛⴻⵀⴷⴻⴷ ⵙⵉⴷⵉⵜⵏⴻⵖ ⵢⴻⵛⵛⵓ ⵙ ⵓⵇⴻⵎⵎⵓⵎ ⵏⵏⴻⴽ ⵓⵛⴰ ⴰⴷ ⵜⴰⵎⵏⴻⴷ ⵙ ⵡⵓⵍ ⵏⵏⴻⴽ ⴱⴻⵍⵍⵉ ⴰⵔⴻⴱⴱⵉ ⵉⵙⵙⵏⴻⴽⴽⴰⵔ ⵉ-ⵜ ⵥⵉ ⵜⴰⴷⴷⴰⵔⵜ ⵏ ⵉⵎⴻⵜⵜⵉⵏⴻⵏ, ⴰⴷ ⵜⴻⴷⴷⴰⵔⴻⴷ.

10 ⵎⵉⵏⵥⵉ ⵓⵍ ⵉ ⴷⴰⵢⴻⵙ ⵉⵜⵜⴰⵎⴻⵏ, ⴰⴷ ⵉⵜⵜⵡⴰⵙⴻⴳⴳⴻⴷ, ⵓⵛⴰ ⴰⵇⴻⵎⵎⵓⵎ ⵉ ⵥⵥⴰⵢⴻⵙ ⵉⵛⴻⵀⵀⴷⴻⵏ, ⴰⴷ ⵉⴷⴷⴰⵔ.

11 ⵎⵉⵏⵥⵉ ⵜⵉⵔⴰ ⵉⵇⴻⴷⴷⵙⴻⵏ ⵇⵇⴰⵔⴻⵏⵜ:

“ⵎⴰⵔⵔⴰ ⵡⵉ ⵥⵥⴰⵢⴻⵙ ⵉ ⵖⴰ ⵢⴰⵎⵏⴻⵏ,

ⵡⴰⵔ ⵉⵜⵜⵙⴻⴹⵃⵉ ⵛⴰ.” ^■  

12 ⵎⵉⵏⵥⵉ ⵡⴰⵔ ⵉⵜⵜⴻⴳⴳ ⴱⵓ ⵍⴼⴰⵔⵥ ⵊⴰⵔ ⵡⵓⴷⴰⵢ ⴷ ⵉⵔⴰⵎⵉⵢⵢⴻⵏ, ⵎⵉⵏⵥⵉ ⵏⴻⵜⵜⴰ ⴷ ⵉⵊⵊⴻⵏ, ⵙⵉⴷⵉ ⵏⵙⴻⵏ ⵎⴰⵔⵔⴰ, ⵡⴻⵏⵏⵉ ⴷ ⴱⵓ-ⵡⴰⴳⵍⴰ ⵉ ⵎⴰⵔⵔⴰ ⵉⵏⵏⵉ ⵅⴰⵙ ⴷⴷ-ⵉⵜⵜⵍⴰⵖⴰⵏ. ^■  

13 “ⵎⵉⵏⵥⵉ ⴽⵓⵍ ⵉⵊⵊⴻⵏ ⵡⴻⵏⵏⵉ ⵉ ⵖⴰ ⵉⵍⴰⵖⴰⵏ ⵙ ⵢⵉⵙⴻⵎ ⵏ ⵙⵉⴷⵉ,

ⴰⴷ ⵉⵏⵊⴻⵎ.” ^■  

14 ⵎⴰⵎⵎⴻⵛ ⵉ ⵖⴰ ⵍⴰⵖⴰⵏ ⵅ ⵡⴻⵏⵏⵉ ⴷⵉ ⵡⴰⵔ ⵓⵎⵉⵏⴻⵏ ⵛⴰ? ⵏⵉⵖ ⵎⴰⵎⵎⴻⵛ ⵉ ⵖⴰ ⵢⴰⵎⵏⴻⵏ ⴷⴻⴳ ⵡⴻⵏⵏⵉ ⵓⵎⵉ ⵡⴰⵔ ⵙⵍⵉⵏ, ⵏⵉⵖ ⵎⴰⵎⵎⴻⵛ ⵉ ⵖⴰ ⵙⵍⴻⵏ ⵎⴰⵍⴰ ⵓⵍⴰ ⴷ ⵉⵊⵊ ⵡⴰⵔ ⵥⵥⴰⵢⴻⵙ ⵉⴱⴰⵔⵔⴻⵃ ⵛⴰ?

15 ⵎⴰⵎⵎⴻⵛ ⵉ ⵖⴰ ⴱⴰⵔⵔⵃⴻⵏ ⵎⴰⵍⴰ ⵡⴰⵔ ⴷⴷ-ⵜⵜⵡⴰⵙⴻⴽⴽⴻⵏ? ⴰⵎ ⵎⴰⵎⵎⴻⵛ ⵜⵓⵔⴰ:

“ⵎⴻⵛⵃⴰⵍ ⴹⴰⵔⴼⴻⵏ ⵉⴹⴰⵔⴻⵏ ⵏ ⵢⵉⵏⵏⵉ ⵉⵜⵜⴱⴰⵔⵔⵃⴻⵏ ⵙ ⵍⴻⵀⵏⴰ,

ⵏ ⵢⵉⵏⵏⵉ ⵉⵜⵜⴱⴰⵔⵔⵃⴻⵏ ⵙ ⵜⴻⴱⵔⴰⵜⵉⵏ ⵜⵉⵚⴻⴱⵃⴰⵏⵉⵏ.” ^■  

16 ⵅⴻⵏⵏⵉ ⵎⴰⵛⵉ ⵎⴰⵔⵔⴰ ⵟⵟⴰⵄⴻⵏ ⵉ ⵍⴻⵅⴱⴰⵔ ⴰⵚⴻⴱⵃⴰⵏ, ⵎⵉⵏⵥⵉ ⵉⵛⴰⵄⵢⴰ ⵉⵇⵇⴰⵔ:

“ⴰ ⵙⵉⴷⵉ ⵉⵏⵓ, ⵡⵉ ⵉ ⵖⴰ ⵢⴰⵎⵏⴻⵏ ⵥⵉ ⵜⴻⴱⵔⴰⵜ ⵏⵏⴻⵖ?” ^■  

17 ⴰⵇⴰ ⵍ’ⵉⵎⴰⵏ ⵥⴻⴳ ⵓⵙⵃⴻⵙⵙⵉ ⵓⵛⴰ ⴰⵙⵃⴻⵙⵙⵉ ⵥⴻⴳ ⵡⴰⵡⴰⵍ ⵏ ⴰⵔⴻⴱⴱⵉ.

18 ⵎⴰⵛⴰ ⴰⴷ ⵉⵏⵉⵖ:

“ⵎⴰ ⵥⴻⵄⵎⴰ ⵏⵉⵜⵏⵉ ⵡⴰⵔ ⵙⵍⵉⵏ?”,

ⵓ:

“ⵅⵥⴰⵔ, ⵍⵃⴻⵙⵙ ⵏⵙⴻⵏ ⵉⴼⴼⴻⵖ-ⴷⴷ ⵖⴰⵔ ⵎⴰⵔⵔⴰ ⵜⴰⵎⵎⵓⵔⵜ,

ⵓⵛⴰ ⴰⵡⴰⵍⴻⵏ ⵏⵙⴻⵏ ⵖⴰⵔ ⵜⵏⴻⴳⴳⵓⵔⴰ ⵏ ⴷⴷⵓⵏⴻⵛⵜ.” ^■  

19 ⵎⴰⵛⴰ ⴰⴷ ⵉⵏⵉⵖ:

“ⵎⴰ ⵉⵙⵔⴰⵉⵍ ⵡⴰⵔ ⵜⴻⴼⵀⵉⵎ ⵛⴰ ⵎⴰⵏ ⴰⵢⴰ?”

ⵖⴰⵔ ⵓⵎⴻⵥⵡⴰⵔ ⵎⵓⵙⴰ ⵉⵏⵏⴰ:

“ⴰⴷ ⴷⴰⵢⵡⴻⵎ ⴳⴳⴻⵖ ⵜⵓⵙⵎⵉ ⵥⴻⴳ ⵉⵏⵏⵉ ⵡⴰⵔ ⵉⴵⵉⵏ ⵛⴰ ⴷ ⵍⴳⴻⵏⵙ

ⵓⵛⴰ ⵙ ⵢⵉⵊⵊ ⵏ ⵍⴳⴻⵏⵙ ⴰⴼⵖⵓⵍ ⴰⴷ ⴷⴰⵢⵡⴻⵎ ⴳⴳⴻⵖ ⴰⵅⴻⵢⵢⴻⵇ.” ^■  

20 ⵅⴻⵏⵏⵉ ⵉⵛⴰⵄⵢⴰ ⵉⵥⵄⴻⵎ ⴰⴷ ⵢⵉⵏⵉ:

“ⴰⵇⴰ ⵓⴼⵉⵏ ⴰⵢⵉ, ⵉⵏⵏⵉ ⵡⴰⵔ ⵅⴰⴼⵉ ⵢⴰⵔⴻⵥⵥⵓⵏ,

ⴰⵇⴰ ⴷⴻⵡⵍⴻⵖ ⴱⴰⵏⴻⵖ-ⴷⴷ ⵉ ⵢⴻⵏⵏⵉ ⵡⴰⵔ ⵅⴰⴼⵉ ⵉⵙⵙⴻⵇⵙⵉⵏ.” ^■  

21 ⵎⴰⵛⴰ ⵥⵉ ⵊⵊⵉⵀⴻⵜ ⵏ ⵉⵙⵔⴰⵉⵍ ⵉⵇⵇⴰⵔ:

“ⴰⵙⵙ ⵉⴽⵎⴻⵍ ⵙⵙⵡⵉⵥⵥⴹⴻⵖ ⵉⴼⴰⵙⵙⴻⵏ ⵉⵏⵓ

ⵉ ⵉⵊⵊ ⵏ ⵍⴳⴻⵏⵙ ⵉⵜⵜⴻⵎⵛⴻⴱⴱⵛⴻⵏ, ⵉⵄⴻⵚⵚⴰⵏ.”^■