1 ⵍⴰⵎⵉ ⵜⵓⵖⴰ ⴰⴱⵓⵍⵍⵓⵙ ⴷⵉ ⴽⵓⵔⵉⵏⵜⵓⵙ, ⵉⵛⵓⵇⵇ ⴱⵓⵍⵓⵙ ⴷⵉ ⵊⵊⵡⴰⵢⴻⵀ ⵢⵓⵄⵍⴰⵏ ⵏ ⵜⴻⵎⵎⵓⵔⵜ, ⵢⵉⵡⴻⴹ-ⴷⴷ ⵖⴰⵔ ⴰⴼⴰⵙⵓⵙ, ⵓⵛⴰ ⵉⴱⴷⴰ ⵉⵜⵜⵙⴻⵇⵙⴰ ⵉⵎⴻⵃⴹⴰⵔⴻⵏ ⵉ ⴷⵉⵏ ⵢⵓⴼⴰ. ^■   2 ⵉⵙⵙⴻⵇⵙⴰ ⵜⴻⵏ: “ⵎⴰ ⵜⵇⴻⴱⵍⴻⵎ ⴰⵔⵔⵓⵃ ⵉⵇⴻⴷⴷⵙⴻⵏ ⵍⴰⵎⵉ ⵜⵓⵎⵏⴻⵎ?” ⵏⵉⵜⵏⵉ ⴰⵔⵔⵉⵏ-ⴷⴷ ⵅⴰⵙ, ⵏⵏⴰⵏ: “ⵡⴰⵔ ⵏⴻⵙⵍⵉ ⵇⴰⵄ ⴱⴻⵍⵍⵉ ⴷⵉⵏ ⴰⵔⵔⵓⵃ ⵉⵇⴻⴷⴷⵙⴻⵏ.” 3 ⵅⴰⵙ ⵓⵛⴰ ⵉⵏⵏⴰ ⴰⵙⴻⵏ: “ⵅⴻⵏⵏⵉ ⵎⵉⵏ ⵥⵉ ⵜᵉⵜⵜⵡⴰⵙⵖⴻⴹⵚⴻⵎ?” ⵏⵏⴰⵏ ⴰⵙ: “ⵙ ⵓⵙⴻⵖⴹⴻⵚ ⵏ ⵢⵓⵃⴰⵏⵏⴰ!” 4 ⵅⴻⵏⵏⵉ ⵉⵏⵏⴰ ⴱⵓⵍⵓⵙ: “ⵜⵓⵖⴰ ⵢⵓⵃⴰⵏⵏⴰ ⵉⵙⵙⴻⵖⴹⴰⵚ ⵍⴳⴻⵏⵙ ⵙ ⵓⵙⴻⵖⴹⴻⵚ ⵏ ⵜⵜⵓⴱⴻⵜ, ⵉⵇⵇⴰⵔ ⴰⵙⴻⵏ ⵉⵜⵜⵅⴻⵚⵚⴰ ⴰⴷ ⴰⵎⵏⴻⵏ ⵙ ⵡⴻⵏⵏⵉ ⵉ ⴷⴷ ⵖⴰ ⵢⴰⵙⴻⵏ ⴰⵡⴰⵔⵏⵉ ⴰⵙ, ⴰⵇⴰ ⵏⴻⵜⵜⴰ ⴷ ⵢⴻⵛⵛⵓ ⵍⵎⴰⵙⵉⵃ.” ^■   5 ⴰⵡⴰⵔⵏⵉ ⵍⴰⵎⵉ ⵙⵍⵉⵏ ⵜⵉⵎⴻⵙⵍⴰⵢⵉⵏ ⴰⵢⴰ, ⵜⵜⵡⴰⵙⵖⴻⴹⵚⴻⵏ ⴷⴻⴳ ⵢⵉⵙⴻⵎ ⵏ ⵙⵉⴷⵉⵜⵏⴻⵖ ⵢⴻⵛⵛⵓ ⵍⵎⴰⵙⵉⵃ. 6 ⴰⵡⴰⵔⵏⵉ ⵍⴰⵎⵉ ⵅⴰⵙⴻⵏ ⵉⵙⵙⴰⵔⵙ ⴱⵓⵍⵓⵙ ⵉⴼⴰⵙⵙⴻⵏ, ⵉⵀⵡⴰ-ⴷⴷ ⵅⴰⵙⴻⵏ ⴰⵔⵔⵓⵃ ⵉⵇⴻⴷⴷⵙⴻⵏ, ⵓⵛⴰ ⴱⴷⴰⵏ ⵙⵙⴰⵡⴰⵍⴻⵏ ⵙ ⵉⵊⵊ ⵏ ⵢⵉⵍⴻⵙ ⵏⵏⴻⵖⵏⵉ ⵓⵛⴰ ⴱⴷⴰⵏ ⵜⵜⵏⴰⴱⴱⴻⵏ. ^■   7 ⵜⵓⵖⴰ-ⵜⴻⵏ ⵇⴰⵄ ⵜⴻⵏⵄⴰⵛ ⵏ ⵢⴻⵔⵢⴰⵥⴻⵏ.

8 ⵢⵓⴷⴻⴼ ⴱⵓⵍⵓⵙ ⵖⴰⵔ ⵜⴻⵎⵥⵉⴷⴰ, ⵉⵙⵙⴰⵡⴰⵍ ⴰⴽⵉⴷⵙⴻⵏ ⵜⴻⵍⵜ ⵏ ⵉⵢⵓⵔⴻⵏ ⵙ ⵜⴻⵔⵢⴰⵙⵜ, ⵉⵜⵜⵃⴻⴷⴷⴰⵜ ⵖⴰⵔⵙⴻⵏ, ⵢⴰⵔⴻⵥⵥⵓ ⴰⴷ ⵜⴻⵏ ⵉⵙⵙⴻⵇⵏⴰⵄ ⴷⵉ ⵎⵉⵏ ⵉⵜⵜⵀⴻⵎⵎⴰⵏ ⵜⴰⴳⴻⵍⴷⵉⵜ ⵏ ⴰⵔⴻⴱⴱⵉ.

9 ⵎⴰⵛⴰ ⵍⴰⵎⵉ ⴷⴻⵡⵍⴻⵏ ⵛⴰ ⵥⵥⴰⵢⵙⴻⵏ ⵇⴻⵙⵃⴻⵏ, ⵡⴰⵔ ⵟⵟⵉⵄⴻⵏ, ⵛⴻⵇⵇⴼⴻⵏ ⴷⴻⴳ ⵡⴻⴱⵔⵉⴷ ⵏ ⴰⵔⴻⴱⴱⵉ ⵥⵥⴰⵜ ⵉ ⵍⵖⴰⵛⵉ, ⵅⴻⵏⵏⵉ ⵉⴳⴳⵯⴻⵊ ⵅⴰⵙⴻⵏ ⵓⵛⴰ ⵉⵙⵙⴱⴻⵄⵄⴻⴷ ⵅⴰⵙⴻⵏ ⵉⵎⴻⵃⴹⴰⵔⴻⵏ, ⵉⴱⴷⴰ ⵉⵙⵙⴰⵡⴰⵍ ⴰⴽⵉⴷⵙⴻⵏ ⴽⵓⵍ ⴰⵙⵙ ⴷⵉ ⵜⴻⵎⵥⵉⴷⴰ ⵏ ⵉⵊⵊ ⵏ ⵡⴻⵔⵢⴰⵥ ⵇⵇⴰⵔⴻⵏ ⴰⵙ ⵜⵉⵔⴰⵏⵏⵓⵙ. ^■  

10 ⴰⵎⵎⵓ ⵉ ⵢⴻⴳⴳⴰ ⵜⵏⴰⵢⴻⵏ ⵏ ⵉⵙⴻⴳⴳⵯⵓⵙⴰ ⴰⵍⴰⵎⵉ ⵎⴰⵔⵔⴰ ⵉⵏⵏⵉ ⵜⵓⵖⴰ ⵉⵥⴻⴷⴷⵖⴻⵏ ⴷⵉ ⴰⵙⵉⵢⴰ, ⵙⵍⵉⵏ ⴰⵡⴰⵍ ⵏ ⵙⵉⴷⵉ, ⴰⵎ ⵓⴷⴰⵢⴻⵏ ⴰⵎ ⵉⵔⴰⵎⵉⵢⵢⴻⵏ.

11 ⵜⵓⵖⴰ ⴰⵔⴻⴱⴱⵉ ⵉⵜⵜⴻⴳⴳ ⵍⴻⵄⵊⴰⵢⴻⴱ ⵉⵎⴻⵇⵇⵔⴰⵏⴻⵏ ⵙ ⵉⴼⴰⵙⵙⴻⵏ ⵏ ⴱⵓⵍⵓⵙ, ^■  

12 ⴰⵍⴰⵎⵉ ⴽⵙⵉⵏ ⵍⴻⵎⵃⴰⵎⴰⵜ ⵏ ⵍⴻⵇⵟⴻⵏ ⴷ ⵡⴻⵙⵜⴰⵡⴻⵏ ⵏ ⵉⴱⵓⵢⴰⵙ ⵉ ⵉⴵⴰⵏ ⴰⵔⵔⵓⴹ ⵅ ⴰⵔⵔⵉⵎⴻⵜ ⵏⵏⴻⵙ, ⵙⵙⴰⵔⵙⴻⵏ ⵜⴻⵏ ⵅ ⵉⵎⴻⵀⵍⴰⵛ, ⵓⵛⴰ ⵅⴻⵏⵏⵉ ⵔⵓⵃⴻⵏⵜ ⵅⴰⵙⴻⵏ ⵍⴻⵀⵍⴰⵛⴰⵜ ⵓ ⵍⴰⵔⵢⴰⵃ ⵉⵎⴻⵏⴳⴰⵙ ⴼⴼⵖⴻⵏ ⵥⵥⴰⵢⵙⴻⵏ.

13 ⵎⴰⵛⴰ ⵜⵓⵖⴰ ⴷⵉⵏ ⵄⴰⵡⴻⴷ ⵛⴰ ⵏ ⵡⵓⴷⴰⵢⴻⵏ ⵉⵏⵏⵉ ⵜⵓⵖⴰ ⵉⴳⴳⵓⵔⴻⵏ ⴷⵉ ⵜⴻⵎⵎⵓⵔⵜ, ⵜⵓⵖⴰ ⵙⵙⵓⴼⴼⵓⵖⴻⵏ ⵛⵛⵡⴰⵟⴻⵏ. ⵏⵉⵜⵏⵉ ⵜⵜⵄⴻⵥⵥⵎⴻⵏ ⵅ ⵢⴻⵏⵏⵉ ⴷⵉ ⵉⴵⴰ ⵍⴰⵔⵢⴰⵃ ⴰⵄⴻⴼⴼⴰⵏ ⵙ ⵢⵉⵙⴻⵎ ⵏ ⵙⵉⴷⵉⵜⵏⴻⵖ ⵢⴻⵛⵛⵓ, ⵇⵇⴰⵔⴻⵏ: “ⵏⴻⵛⵛⵉⵏ ⵏⴻⵜⵜⵄⴻⵥⵥⴻⵎ ⵅⴰⴽ ⵙ ⵢⵉⵙⴻⵎ ⵏ ⵢⴻⵛⵛⵓ ⵉ ⵥⵉ ⵉⵜⵜⴱⴰⵔⵔⴻⵃ ⴱⵓⵍⵓⵙ.”

14 ⵉⵏⵏⵉ ⵜ ⵉⴳⴳⵉⵏ, ⴰⵇⴰ ⵏⵉⵜⵏⵉ ⴷ ⵙⴻⴱⵄⴰ ⵏ ⵜⴰⵔⵡⴰ ⵏ ⵙⴽⵉⵡⴰ, ⵡⴻⵏⵏⵉ ⴷ ⵉⵊⵊ ⵏ ⵓⵎⴻⵇⵇⵔⴰⵏ ⵏ ⵉⴽⴻⵀⵀⴰⵏⴻⵏ ⴷ ⵓⴷⴰⵢ.

15 ⵎⴰⵛⴰ ⵛⵛⵉⵟⴰⵏ ⵢⴰⵔⵔⴰ-ⴷⴷ, ⵉⵏⵏⴰ ⴰⵙⴻⵏ: “ⵢⴻⵛⵛⵓ ⵙⵙⵏⴻⵖ ⵜ ⵓⵍⴰ ⴷ ⴱⵓⵍⵓⵙ ⵙⵙⵏⴻⵖ ⵜ, ⵎⴰⵛⴰ ⵎⵉⵏ ⵜⴻⵄⵏⴰⵎ ⴽⴻⵏⵏⵉⵡ?”

16 ⵓⵛⴰ ⴱⵏⴰⴷⴻⵎ ⵉ ⴷⵉ ⵉⴵⴰ ⵍⴰⵔⵢⴰⵃ ⴷ ⴰⵄⴻⴼⴼⴰⵏ ⵉⵏⴳⴻⵥ ⵅⴰⵙⴻⵏ, ⵉⵖⴻⵍⴱ ⵉ-ⵜⴻⵏ, ⵉⵏⴹⴰⵔ ⵉ-ⵜⴻⵏ ⵅ ⵜⴻⵎⵎⵓⵔⵜ ⵓⵛⴰ ⵉⵊⵀⴻⴷ ⵅⴰⵙⴻⵏ ⴰⵍⴰⵎⵉ ⴰⵔⴻⵡⵍⴻⵏ ⵥⵉ ⵜⴰⴷⴷⴰⵔⵜ ⴷ ⵉⵄⴰⵔⵢⴰⵏⴻⵏ ⴷ ⵉⵢⴻⵥⵎⴻⵏ.

17 ⵍⴻⵅⴱⴰⵔ-ⴰ ⵉⴼⴼⴻⵖ-ⴷⴷ ⵖⴰⵔ ⵎⴰⵔⵔⴰ ⵡⵓⴷⴰⵢⴻⵏ ⴷ ⵉⵔⴰⵎⵉⵢⵢⴻⵏ ⵉⵏⵏⵉ ⵉⵥⴻⴷⴷⵖⴻⵏ ⴷⵉ ⴰⴼⴰⵙⵓⵙ. ⵜⴻⵡⴹⴰ-ⴷⴷ ⵉⵛⵜ ⵏ ⵜⵉⴳⴳⵯⵓⴷⵉ ⵜⴻⵎⵖⴰⵔ ⵅ ⵎⴰⵔⵔⴰ ⵏⵉⵜⵏⵉ ⵓⵛⴰ ⵉⵜⵜⵡⴰⵙⵙⴻⵎⵖⴰⵔ ⵉⵙⴻⵎ ⵏ ⵙⵉⴷⵉⵜⵏⴻⵖ ⵢⴻⵛⵛⵓ ⵍⵎⴰⵙⵉⵃ.

18 ⴰⵟⵟⴰⵙ ⵏ ⵢⵉⵏⵏⵉ ⵢⵓⵎⵏⴻⵏ ⵓⵙⵉⵏ-ⴷⴷ, ⵏⴻⵄⵎⴻⵏ ⵙ ⵎⵉⵏ ⵜⵓⵖⴰ ⵜⵜⴻⴳⴳⴻⵏ. ^■  

19 ⴰⵟⵟⴰⵙ ⵏ ⵉⵙⴻⵃⵃⴰⵔⴻⵏ ⵢⴰⵔⵡⴻⵏ ⵉⴷⵍⵉⵙⴻⵏ ⵏⵙⴻⵏ, ⵙⵙⵛⴻⵎⵎⴹⴻⵏ ⵜⴻⵏ ⵥⵥⴰⵜ ⵉ ⵎⴰⵔⵔⴰ. ⵏⵉⵜⵏⵉ ⴳⴳⵉⵏ ⴰⵙⴻⵏ ⵍⴻⵃⵙⴰⴱ ⵓⵛⴰ ⵓⴼⵉⵏ ⴱⴻⵍⵍⵉ ⵙⵙⴻⴽⴽⵡⴰⵏ ⵅⴻⵎⵙⴰ-ⴰⵍⴰⴼ ⵏ ⵍⴻⵡⵥⴰⵏ ⵏ ⵏⵏⵓⵇⴰⵔⵜ. 20 ⴰⵎⵎⵓ ⵜⵓⵖⴰ ⵍⵉⵎⴰⵏ ⵏ ⴰⵔⴻⴱⴱⵉ ⵉⴳⴳⴰⵎ, ⵢⴰⵔⴻⵏⵏⵉ ⴷⵉ ⵊⵊⴻⵀⴷ. ^■  

21 ⴰⵍⴰⵎⵉ ⴽⴻⵎⵎⵍⴻⵏⵜ ⵜⵎⴻⵙⵍⴰⵢⵉⵏ-ⴰ, ⵉⴳⴳⴰ ⴱⵓⵍⵓⵙ ⵙ ⴰⵔⵔⵓⵃ, ⴰⵡⴰⵔⵏⵉ ⵍⴰⵎⵉ ⵉⵛⵓⵇⵇ ⴷⵉ ⵎⴰⴽⵉⴷⵓⵏⵉⵢⴰ ⴷ ⴰⵅⴰⵢⴰ, ⵃⵉⵎⴰ ⴰⴷ ⵉⵙⴰⴼⴰⵔ ⵖⴰⵔ ⵓⵔⵛⴰⵍⵉⵎ, ⵉⵏⵏⴰ: “ⵅⵎⵉ ⴷⵉⵏ ⵉ ⵖⴰ ⵔⴻⵃⵃⴳⴻⵖ, ⵉⵜⵜⵅⴻⵚⵚⴰ ⴰⵢⵉ ⴰⴷ ⵥⴰⵔⴻⵖ ⵔⵓⵎⴰ ⵄⴰⵡⴻⴷ.” ^■   22 ⵉⵙⵙⴻⴽⴽ ⵜⵏⴰⵢⴻⵏ ⵏ ⵢⵉⵏⵏⵉ ⵜⵓⵖⴰ ⵉⵅⴻⴷⴷⵎⴻⵏ ⴰⴽⵉⴷⴻⵙ ⵖⴰⵔ ⵎⴰⴽⵉⴷⵓⵏⵉⵢⴰ, ⵉⵏⴰ ⴷ ⵜⵉⵎⵓⵜⵉⵢⵓ ⴷ ⵉⵔⴰⵙⵜⵓⵙ, ⵎⴰⵛⴰ ⵏⴻⵜⵜⴰ ⵙⵉⵎⴰⵏⵜ ⵏⵏⴻⵙ ⵜⵓⵖⴰ ⵉⵇⵇⵉⵎ ⴷⵉⵏ ⵄⴰⴷ ⵛⴰ ⵏ ⵍⵡⴻⵇⵜ ⴷⵉ ⴰⵙⵉⵢⴰ.

23 ⴷⵉ ⵍⵡⴻⵇⵜ ⵏⵏⵉ ⵉⴽⴽⴰⵔ ⴷⵉⵏ ⵉⵊⵊ ⵏ ⵓⵅⴰⵔⵡⴻⴹ ⵡⴰⵔ ⵉⴵⵉ ⴷⵔⵓⵙⵜ ⵅ ⵙⵙⵉⴱⴱⴻⵜ ⵏ ⵡⴻⴱⵔⵉⴷ ⵏ ⴰⵔⴻⴱⴱⵉ. ^■   24 ⵎⵉⵏⵥⵉ ⵜⵓⵖⴰ ⴷⵉⵏ ⵉⵊⵊ ⵏ ⵓⵙⵉⵢⴰⵖ ⵏ ⵏⵏⵓⵇⴰⵔⵜ, ⵇⵇⴰⵔⴻⵏ ⴰⵙ ⴷⵉⵎⵉⵜⵔⵉⵢⵓ, ⵡⴻⵏⵏⵉ ⵜⵓⵖⴰ ⵉⵜⵜⵚⴻⵏⵏⴰⵄ ⵜⵉⵥⴰⵡⵉⵢⵢⵉⵏ ⵜⵉⵎⴻⵥⵢⴰⵏⵉⵏ ⵏ ⴰⵔⵜⵉⵎⵉⵙ ⴷⵉ ⵍⴻⵇⵡⴰⵍⴻⴱ, ⵢⴰⵔⴱⴻⵃ ⵉ ⴰⵢⵜ ⵏ ⵚⵚⴻⵏⵄⴻⵜ ⵏⵏⴻⵙ ⵉⵊⵊ ⵏ ⴰⵔⴱⴻⵃ ⴷ ⴰⵎⴻⵇⵇⵔⴰⵏ. ^■   25 ⵉⵙⵙⵎⵓⵏ-ⴷⴷ ⴰⵢⵜ ⵏ ⵚⵚⴻⵏⵄⴻⵜ ⵏⵏⴻⵙ ⴰⴽ-ⴷ ⵉⵏⵏⵉ ⵉⵅⴻⴷⴷⵎⴻⵏ ⴰⴽⵉⴷⵙⴻⵏ, ⵉⵏⵏⴰ ⴰⵙⴻⵏ: “ⴰ ⵉⵔⵢⴰⵥⴻⵏ, ⴽⴻⵏⵏⵉⵡ ⵜⴻⵙⵙⵏⴻⵎ ⴱⴻⵍⵍⵉ ⵎⴰⵔⵔⴰ ⴰⵔⴱⴻⵃ ⵏⵏⴻⵖ ⵢⵓⵙⴰ-ⴷⴷ ⴰⴽ-ⴷ ⵚⵚⴻⵏⵄⴻⵜ-ⴰ. 26 ⴽⴻⵏⵏⵉⵡ ⵜⴻⵙⵍⵉⵎ ⵓ ⵜⴻⵙⵙⵏⴻⵎ ⴱⴻⵍⵍⵉ ⴱⵓⵍⵓⵙ ⵡⴰⵏⵉⵜⴰ ⵉⵙⵙⴻⵇⵏⴰⵄ ⴰⵟⵟⴰⵙ ⵏ ⵉⵡⴷⴰⵏ, ⵡⴰⵔ ⵉⴵⵉ ⵉⵏⵏⵉ ⵥⵉ ⴰⴼⴰⵙⵓⵙ ⵡⴰⵀⴰ, ⵎⴰⵛⴰ ⵓⵍⴰ ⴷ ⵉⴱⴰⵔⵔⵓⵜⴻⵏ ⵏ ⵎⴰⵔⵔⴰ ⴰⵙⵉⵢⴰ, ⴰⵇⴰ ⵉⵙⵙⴱⴻⵄⵄⴻⴷ ⵉ-ⵜⴻⵏ ⵅ ⵍⴻⵅⵢⴰⵍⴰⵜ, ⵉⵇⵇⴰⵔ: ‘ⵉⵔⴻⴱⴱⵉⵜⴻⵏ ⵉ ⵉⵜⵜⵡⴰⴳⴳⴻⵏ ⵙ ⵉⴼⴰⵙⵙⴻⵏ ⵡⴰⵔ ⴵⵉⵏ ⵛⴰ ⴷ ⵉⵔⴻⴱⴱⵉⵜⴻⵏ!’ ^■   27 ⵡⴰⵔ ⵜⴻⴵⵉ ⵜⵙⴻⴱⴱⴰⴱⵜ-ⴰ ⵡⴰⵀⴰ ⴷⵉ ⵍⵅⴰⵟⴰⵔ ⵓⵛⴰ ⵜⴻⴳⴳⵓⵔ ⴰⴷ ⵜⴻⴷⵡⴻⵍ ⴷ ⵉⵛⵜ ⵏ ⵜⵎⴻⵙⵍⴰⵛⵜ ⵉⴱⴻⵟⵟⵍⴻⵏ, ⵎⴰⵛⴰ ⵓⵍⴰ ⴷ ⵥⵥⴰⵡⴻⵛⵜ ⵏ ⴰⵔⵜⵉⵎⵉⵙ ⵜⴰⵔⴻⴱⴱⵉⵜ ⵜⴰⵎⴻⵇⵇⵔⴰⵏⵜ ⴰⴷ ⵜⵜ ⵃⴻⵙⴱⴻⵏ ⴷ ⵡⴰⵍⵓ ⵓⵛⴰ ⴰⴷ ⵉⵙⵙⴻⵃⵇⴰⵔ ⵜⴰⵔⴻⴱⴱⵉⵜ-ⴰ ⵉ ⵜⵄⴻⴱⴱⴻⴷ ⵜⴻⵎⵎⵓⵔⵜ ⵏ ⴰⵙⵉⵢⴰ ⵓⵍⴰ ⴷ ⵎⴰⵔⵔⴰ ⵍⴻⴳⵏⵓⵙ.”

28 ⵓⵎⵉ ⵜⵜ ⵙⵍⵉⵏ, ⴷⴻⵡⵍⴻⵏ ⵅⴻⵢⵇⵇⴻⵏ ⴰⵟⵟⴰⵙ. ⵙⵖⵓⵢⵢⵓⵏ, ⵏⵏⴰⵏ: “ⵜⴰⵎⴻⵇⵇⵔⴰⵏⵜ ⴷ ⵜⴰⵔⴻⴱⴱⵉⵜ ⴰⵔⵜⵉⵎⵉⵙ ⵏ ⵉⴼⴰⵙⵓⵙⵉⵢⵢⴻⵏ!” 29 ⵜⴰⵏⴷⵉⵏⵜ ⵇⴰⵄ ⵜⵅⴰⵔⵡⴻⴹ ⴰⵎ ⵜⴻⴽⵎⴻⵍ ⵓⵛⴰ ⵓⵥⵥⵍⴻⵏ ⵖⴰⵔ ⵓⵎⴻⵙⴳⵓⵏ ⴰⵎ ⵉⵊⵊ ⵏ ⴱⵏⴰⴷⴻⵎ, ⵓⵛⴰ ⵅⴰⵢⵓⵙ ⴷ ⴰⵔⵉⵙⵜⴰⵔⵅⵓⵙ, ⵉⵔⵢⴰⵥⴻⵏ ⵥⵉ ⵎⴰⵙⵉⴷⵓⵏⵉⵢⴰ, ⵉⵏⵏⵉ ⴷ ⵉⵎⵄⴰⵛⴰⵔⴻⵏ ⵏ ⴱⵓⵍⵓⵙ ⴷⴻⴳ ⵓⵙⴰⴼⴰⵔ ⵏⵏⴻⵙ, ⵟⵟⴼⴻⵏ ⵜⴻⵏ ⵙ ⵊⵊⴻⵀⴷ ⵓⵛⴰ ⵉⵡⵢⴻⵏ ⵜⴻⵏ-ⴷⴷ ⴰⴽⵉⴷⵙⴻⵏ. ^■   30 ⵓⵍⴰ ⴷ ⴱⵓⵍⵓⵙ ⵜⵓⵖⴰ ⵉⵅⵙ ⴰⴷ ⵢⴰⴷⴻⴼ ⵖⴰⵔ ⵍⵎⴻⵙⵔⴰⵃ, ⵎⴰⵛⴰ ⵉⵎⴻⵃⴹⴰⵔⴻⵏ ⵏⵏⴻⵙ ⵡⴰⵔ ⵜ ⵊⵊⵉⵏ. 31 ⵓⵍⴰ ⴷ ⵛⴰ ⵏ ⵉⵎⴹⴻⴱⴱⴰⵔⴻⵏ ⵏ ⵊⵊⵡⴰⵢⴻⵀ ⵏ ⴰⵙⵉⵢⴰ, ⵉⵏⵏⵉ ⵜⵓⵖⴰ ⴰⵜⴻⵏ ⴷ ⵉⵎⴻⴷⴷⵓⴽⴽⴰⵍ ⵏⵏⴻⵙ, ⵜⵜⴰⵔⴻⵏ ⵥⵥⴰⵢⴻⵙ ⵃⵉⵎⴰ ⵡⴰⵔ ⵉⵜⵜⵉⴷⴻⴼ ⵖⴰⵔ ⵓⵎⴻⵙⴳⵓⵏ.

32 ⵍⵖⴰⵛⵉ ⴷⴻⴳ ⵓⵎⴻⵙⴳⵓⵏ ⵜⵓⵖⴰ ⴷ ⵉⵊⵊ ⵏ ⵓⵅⴰⵔⵡⴻⴹ ⵎⴰⵔⵔⴰ. ⵏⵉⵜⵏⵉ ⵙⵖⵓⵢⵢⵓⵏ ⵉⵊⵊ ⵉ ⵡⴻⵏⵏⴻⵖⵏⵉ, ⵎⴰⵖⴰⵔ ⴰⵥⵢⴻⵏ ⴰⵎⴻⵇⵇⵔⴰⵏ ⵥⵥⴰⵢⴻⵙ ⵡⴰⵔ ⵉⵙⵙⵉⵏ ⵎⵉⵅⴻⴼ ⵜⵓⵖⴰ ⵎⵓⵏⴻⵏ. 33 ⵍⵖⴰⵛⵉ ⵏ ⵡⵓⴷⴰⵢⴻⵏ ⵉ ⴷⵉⵏ ⵉⴵⴰ, ⵏⴻⴷⵀⴻⵏ ⵉⵊⵊ ⵏ ⵡⴻⵔⵢⴰⵥ ⵖⴰⵔ ⵥⵥⴰⵜ, ⵇⵇⴰⵔⴻⵏ ⴰⵙ ⴰⵍⵉⴽⵙⴰⵏⴷⵉⵔ. ⵏⴻⵜⵜⴰ ⵉⴽⴽⴰⵔ, ⵉⵛⴻⵢⵢⴰⵔ ⵙ ⵓⴼⵓⵙ ⵏⵏⴻⵙ, ⵓ ⵜⵓⵖⴰ ⵉⵅⵙ ⴰⴷ ⵉⵙⵙⵉⵡⴻⵍ ⵙ ⵊⵊⴻⵀⴷ ⵅ ⵓⴷⴰⴼⴻⵄ ⵥⵥⴰⵜ ⵉ ⵍⴳⴻⵏⵙ. 34 ⵎⴰⵛⴰ ⵓⵎⵉ ⴼⴻⵀⵎⴻⵏ ⴱⴻⵍⵍⵉ ⴰⵇⴰ-ⵜ ⴷ ⵓⴷⴰⵢ, ⵙⵖⵓⵢⵢⴻⵏ ⵎⴰⵔⵔⴰ ⵙ ⵜⵎⵉⵊⵊⴰ ⴷ ⵉⵛⵜⴻⵏ ⵄⵍⴰⵃⴰⵍ ⵜⵏⴰⵢⴻⵏ ⵏ ⵜⵙⴰⵄⵄⴻⵜⵉⵏ: “ⵜⴰⵎⴻⵇⵇⵔⴰⵏⵜ ⴷ ⴰⵔⵜⵉⵎⵉⵙ ⵏ ⵉⴼⴰⵙⵓⵙⵉⵢⵢⴻⵏ!”

35 ⵍⵡⴰⵍⵉ ⵏ ⵜⴻⵏⴷⵉⵏⵜ ⵉⵙⵙⵀⴻⴷⴷⴻⵏ ⵍⵖⴰⵛⵉ, ⵉⵏⵏⴰ: “ⴰ ⵉⵔⵢⴰⵥⴻⵏ ⵏ ⴰⴼⴰⵙⵓⵙ, ⵎⴰⵏ ⵡⴻⵏ ⵡⴰⵔ ⵉⵙⵙⵉⵏⴻⵏ ⴱⴻⵍⵍⵉ ⵜⴰⵏⴷⵉⵏⵜ ⵏ ⵉⴼⴰⵙⵓⵙⵉⵢⵢⴻⵏ ⵜⵃⴻⵟⵟⴰ ⵅ ⵥⵥⴰⵡⴻⵛⵜ ⵏ ⴰⵔⵜⵉⵎⵉⵙ ⵓ ⵅ ⵍⴻⵅⵢⴰⵍ ⵉ ⴷⴷ-ⵉⵡⴹⴰⵏ ⵥⴻⴳ ⵓⵊⴻⵏⵏⴰ! 36 ⵙ ⵓⵢⴻⵏⵏⵉ, ⵓⵎⵉ ⵡⴰⵔ ⵉⵥⴻⵎⵎⴰⵔ ⵓⵍⴰ ⴷ ⵉⵊⵊⴻⵏ ⴰⴷ ⵉⵄⴻⴽⴽⴻⵙ ⵜⵉⵎⴻⵙⵍⴰⵢⵉⵏ-ⴰ, ⵉⵛⵓⵡⵡⴰⵔ ⴰⵡⴻⵎ ⴰⴷ ⵜⴰⵔⵙⴻⵎ, ⵡⴰⵔ ⵜⵜⴻⴳⴳⴻⵎ ⵛⴰ ⵙ ⵓⵇⴻⴵⴻⵇ, 37 ⵎⵉⵏⵥⵉ ⵜⵉⵡⵢⴻⵎ-ⴷⴷ ⵉⵔⵢⴰⵥⴻⵏ-ⴰ ⴷⴰⵏⵉⵜⴰ, ⵉⵏⵏⵉ ⵡⴰⵔ ⵉⴵⵉⵏ ⴷ ⵉⵛⴻⴼⴼⴰⵔⴻⵏ ⵏ ⵜⵥⴰⵡⵉⵢⵢⵉⵏ ⵓⵍⴰ ⵍⴰ ⴷ ⵏⵉⵜⵏⵉ ⵡⴰⵔ ⵜⵜⵛⴻⵇⵇⴰⴼⴻⵏ ⴷⵉ ⵜⵔⴻⴱⴱⵉⵜ ⵏⵏⴻⵖ. 38 ⵎⴰⵛⴰ ⵎⴰⵍⴰ ⵜⵓⵖⴰ ⵖⴰⵔ ⴷⵉⵎⵉⵜⵔⵉⵢⵓ ⵓ ⵖⴰⵔ ⵢⴻⵏⵏⵉ ⵉⴵⴰⵏ ⴰⴽⵉⴷⴻⵙ ⴷⵉ ⵚⵚⴻⵏⵄⴻⵜ ⵛⴰ ⵏ ⵓⵛⴻⵜⵛⵉ ⵅ ⵢⵉⵊⵊⴻⵏ, ⴰⵇⴰ ⴷⵉⵏ ⵉⵊⵊ ⵏ ⵍⵄⴰⵎⵉⵍ ⴷⵉ ⵜⴻⵏⴷⵉⵏⵜ. ⴻⵊⵊ ⵉ-ⵜⴻⵏ ⴰⴷ ⵇⴰⵔⵔⴱⴻⵏ ⵓ ⴰⴷ ⵛⴰⵔⵔⵄⴻⵏ ⴰⴽ-ⴷ ⵡⴰⵢⴰⵡⵢⴰ ⴷⵉⵏ. 39 ⵎⴰⵛⴰ ⵎⴰⵍⴰ ⵜⴻⵅⵙⴻⵎ ⵛⴰ ⵏ ⵜⵎⴻⵙⵍⴰⵛⵜ ⵉ ⵡⴰⵔ ⵉⵄⴻⴷⴷⵍⴻⵏ ⵥⵉ ⵊⵊⵉⵀⴻⵜ ⵏ ⵛⵛⴰⵔⵉⵄⴰ, ⵉⵜⵜⵅⴻⵚⵚⴰ ⴰⴷ ⵉⵜⵜⵡⴰⵇⴹⴰ ⵡⴻⴳⵔⴰⵡ, 40 ⵎⵉⵏⵥⵉ ⴰⵇⴰ ⴰⵏⴻⵖ ⴷⵉ ⵍⵅⴰⵟⴰⵔ ⴰⴷ ⵅⴰⵏⴻⵖ ⵃⴻⴽⵎⴻⵏ ⴰⵙⵙ-ⴰ ⵙ ⵓⵖⵓⵡⵡⴻⵖ, ⵎⵉⵏⵥⵉ ⵡⴰⵔ ⴷⵉⵏ ⴱⵓ ⵍⴻⵙⴱⴰⴱ ⵉ ⵥⵉ ⵏⵥⴻⵎⵎⴰⵔ ⴰⴷ ⴷⴷ-ⵏⴰⵔⵔ ⵙ ⵢⵉⵊⵊ ⵏ ⵡⴰⵡⴰⵍ ⴷⵉ ⵜⵎⴻⵙⵍⴰⵛⵜ ⵏ ⵓⵅⴰⵔⵡⴻⴹ-ⴰ ⴷⴻⴳ ⵡⴰⵙⵙ-ⴰ, ⵎⵉⵏⵥⵉ ⵏⴻⵙⵙⵎⵓⵏⴰ ⴷⵉ ⵍⴱⴰⵟⴻⵍ ⵓ ⵏⴻⵜⵜⵖⴻⵡⵡⴻⵖ ⴰⵎⴻⵏⵏⵉ ⵡⴰⵀⴰ.” 41 ⴰⵡⴰⵔⵏⵉ ⵍⴰⵎⵉ ⵉⵏⵏⴰ ⴰⵢⴰ, ⵉⵙⵎⴻⵃ ⵉ ⵡⴻⴳⵔⴰⵡ ⴰⴷ ⵢⵓⵢⵓⵔ.