1 ⴷⴻⴳ ⵓⵎⴻⵥⵡⴰⵔⵓ ⵜⵓⵖⴰ ⵉⴵⴰ ⵡⴰⵡⴰⵍ, ⴰⵡⴰⵍ ⵜⵓⵖⴰ-ⵜ ⵖⴰⵔ ⴰⵔⴻⴱⴱⵉ, ⴰⵡⴰⵍ ⵜⵓⵖⴰ-ⵜ ⴷ ⴰⵔⴻⴱⴱⵉ. ^■   2 ⵡⴰ ⵉⴵⴰ ⴰⴽ-ⴷ ⴰⵔⴻⴱⴱⵉ ⴷⴻⴳ ⵓⵎⴻⵥⵡⴰⵔⵓ. ^■  

3 ⵣⵥⴰⵢⴻⵙ ⵏⴻⵜⵜⴰ ⵉⴵⴰ ⴽⵓⵍⵛⵉ ⵓ ⴱⵍⴰ ⵏⴻⵜⵜⴰ ⵡⴰⵔ ⵜⴻⴵⴰ ⵓⵍⴰ ⴷ ⵉⵛⵜ ⵏ ⵜⵎⴻⵙⵍⴰⵛⵜ ⵥⵉ ⵎⵉⵏ ⵉⴵⴰⵏ. ^■   4 ⴷⴰⵢⴻⵙ ⵉ ⵜⴻⴵⴰ ⵜⵓⴷⴰⵔⵜ ⵓ ⵜⵓⴷⴰⵔⵜ ⵜⵓⵖⴰ-ⵜⵜ ⴷ ⵜⴰⴼⴰⵡⵜ ⵏ ⵉⵡⴷⴰⵏ. ^■   5 ⵜⴰⴼⴰⵡⵜ ⵜⴰⵔⴻⵇⵇ ⴷⵉ ⵜⴰⴵⴻⵙⵜ, ⵜⴰⴵⴻⵙⵜ ⵡⴰⵔ ⵜⵜ ⵜᵉⵟⵟⵉⴼ. ^■  

6 ⵜⵓⵖⴰ ⴷⵉⵏ ⵉⵊⵊ ⵏ ⴱⵏⴰⴷⴻⵎ ⵉⵙⵙⴻⴽⴽ ⵉ-ⵜ-ⵉ-ⴷⴷ ⴰⵔⴻⴱⴱⵉ, ⵇⵇⴰⵔⴻⵏ ⴰⵙ ⵢⵓⵃⴰⵏⵏⴰ. ^■   7 ⵏⴻⵜⵜⴰ ⵢⵓⵙⴰ-ⴷⴷ ⴰⵎ ⵛⵛⴰⵀⴻⴷ ⵃⵉⵎⴰ ⴰⴷ ⵉⵛⵀⴻⴷ ⵉ ⵜⴼⴰⵡⵜ, ⵃⵉⵎⴰ ⴰⴷ ⵥⵥⴰⵢⴻⵙ ⴰⵎⵏⴻⵏ ⵎⴰⵔⵔⴰ. 8 ⵏⴻⵜⵜⴰ ⵡⴰⵔ ⵉⴵⵉ ⵛⴰ ⴷ ⵜⴰⴼⴰⵡⵜ, ⵎⴰⵛⴰ ⵜⵓⵖⴰ-ⵜ ⵃⵉⵎⴰ ⴰⴷ ⵉⵛⵀⴻⴷ ⵉ ⵜⴼⴰⵡⵜ.

9 ⵎⴰⵖⴰⵔ ⵡⴰⵏⵉⵜⴰ ⵜⵓⵖⴰ ⴷ ⵜⴰⴼⴰⵡⵜ ⵏ ⵜⵉⴷⴻⵜⵜ ⵉ ⵉⵜⵜⵉⵛⴻⵏ ⵜⴰⴼⴰⵡⵜ ⵉ ⴽⵓⵍ ⴱⵏⴰⴷⴻⵎ ⵉ ⴷⴷ-ⵉⵜⵜⴰⵙⴻⵏ ⵖⴰⵔ ⴷⴷⵓⵏⴻⵛⵜ. ^■  

10 ⵏⴻⵜⵜⴰ ⵜⵓⵖⴰ-ⵜ ⴷⵉ ⴷⴷⵓⵏⴻⵛⵜ ⵓ ⵥⵥⴰⵢⴻⵙ ⵜᵉⵜⵜⵡⴰⴳⴳ ⴷⴷⵓⵏⴻⵛⵜ ⵓ ⴷⴷⵓⵏⴻⵛⵜ ⵡⴰⵔ ⵜ ⵜⴻⵙⵙⵉⵏ ⵛⴰ. ^■  

11 ⵢⵓⵙⴰ-ⴷⴷ ⵖⴰⵔ ⵡⵉ ⵉⴵⴰⵏ ⵏⵏⴻⵙ, ⵎⴰⵛⴰ ⵡⵉ ⵉⴵⴰⵏ ⵏⵏⴻⵙ ⵡⴰⵔ ⵜ ⵇⴱⵉⵍⴻⵏ.

12 ⵎⴰⵛⴰ ⵎⴰⵔⵔⴰ ⵉⵏⵏⵉ ⵜ ⵉⵇⴻⴱⵍⴻⵏ, ⵉⵡⵛⴰ ⴰⵙⴻⵏ ⵚⵚⵓⵍⵟⴰ ⵃⵉⵎⴰ ⴰⴷ ⴷⴻⵡⵍⴻⵏ ⴷ ⵜⴰⵔⵡⴰ ⵏ ⴰⵔⴻⴱⴱⵉ, ⵉ ⵢⴻⵏⵏⵉ ⵉⵜⵜⴰⵎⵏⴻⵏ ⴷⴻⴳ ⵢⵉⵙⴻⵎ ⵏⵏⴻⵙ, ^■  

13 ⵉⵏⵏⵉ ⵡⴰⵔ ⴷⴷ-ⵉⵅⵍⵉⵇⴻⵏ ⵓⵍⴰ ⵥⴻⴳ ⵉⴷⴰⵎⵎⴻⵏ ⵓⵍⴰ ⵥⵉ ⵎⵉⵏ ⵉⵅⵙ ⴷⴷⴰⵜ ⵏ ⴱⵏⴰⴷⴻⵎ ⵓⵍⴰ ⵥⵉ ⵎⵉⵏ ⵉⵅⵙ ⵡⴻⵔⵢⴰⵥ, ⵎⴰⵛⴰ ⵥⵉ ⴰⵔⴻⴱⴱⵉ ⵉ ⵥⵉ ⴷⴷ-ⵉⵜⵜⵡⴰⵅⴻⵍⵇⴻⵏ.

14 ⴰⵡⴰⵍ ⵉⴷⵡⴻⵍ ⴷ ⴷⴷⴰⵜ, ⵉⵥⴷⴻⵖ ⵊⴰⵔ ⴰⵏⴻⵖ, ⵏⴻⵛⵛⵉⵏ ⵏⴻⵥⵔⴰ ⴰⵄⵓⴵⵉ ⵏⵏⴻⵙ, ⴰⵄⵓⴵⵉ ⵏ ⵓⵢⴻⵏⵏⵉ ⵏ ⵎⵎⵉⵙ ⵥⵉ ⵖⴰⵔ ⴱⴰⴱⴰⵙ ⵉ ⵉⵛⵛⵓⵔⴻⵏ ⵙ ⴰⵔⴹⴰ ⴷ ⵜⵉⴷⴻⵜⵜ. ^■  

15 ⵉⵛⵀⴻⴷ ⵅⴰⵙ ⵢⵓⵃⴰⵏⵏⴰ, ⵉⵍⴰⵖⴰ, ⵉⵏⵏⴰ: “ⴷ ⵡⴰ ⵎⵉⵏ ⵅⴻⴼ ⵏⵏⵉⵖ, ⴰⵇⴰ ⵏⴻⵜⵜⴰ ⴰⴷ ⴷⴷ-ⵢⴰⵙ ⴰⵡⴰⵔⵏⵉ ⴰⵢⵉ, ⵡⴰⵅⵅⴰ ⴰⵎⴻⵏⵏⵉ ⵏⴻⵜⵜⴰ ⵉⴷⵡⴻⵍ ⵥⵥⴰⵜⵉ, ⵎⵉⵏⵥⵉ ⵏⴻⵜⵜⴰ ⵜⵓⵖⴰ-ⵜ ⵇⴱⴻⵍ ⵉⵏⵓ.” ^■  

16 ⵣⵉ ⵍⴻⴽⵎⴰⵍⴻⵜ ⵏⵏⴻⵙ ⵏⵉⵡⵉ-ⴷⴷ ⵎⴰⵔⵔⴰ, ⴰⵔⴹⴰ ⵅ ⴰⵔⴹⴰ. ^■  

17 ⵛⵛⴰⵔⵉⵄⴰ ⵜⴻⵎⵎⴻⵡⵛ ⵅ ⵓⴼⵓⵙ ⵏ ⵎⵓⵙⴰ, ⵎⴰⵛⴰ ⴰⵔⴹⴰ ⴷ ⵜⵉⴷⴻⵜⵜ ⵓⵙⵉⵏ-ⴷⴷ ⵥⵉ ⵢⴻⵛⵛⵓ ⵍⵎⴰⵙⵉⵃ. ^■  

18 ⵓⵍⴰ ⴷ ⵉⵊⵊ ⵡⴰⵔ ⵉⵥⵔⵉ ⴰⵔⴻⴱⴱⵉ. ⴰⵢⴻⵏⵏⵉ ⵏ ⵎⵎⵉⵙ ⵉ ⵉⴵⴰⵏ ⴷⴻⴳ ⵡⴻⵃⵙⵉⵏ ⵏ ⴱⴰⴱⴰⵙ ⴷ ⵏⴻⵜⵜⴰ ⵉ ⵥⵥⴰⵢⴻⵙ ⵉⵙⵙⵅⴻⴱⴱⴰⵔⴻⵏ. ^■  

19 ⵜⴰ ⴷ ⵛⵛⵀⴰⴷⴻⵜ ⵏ ⵢⵓⵃⴰⵏⵏⴰ ⵍⴰⵎⵉ ⴷⴷ-ⵙⵙⴻⴽⴽⴻⵏ ⵡⵓⴷⴰⵢⴻⵏ ⵛⴰ ⵏ ⵉⴽⴻⵀⵀⴰⵏⴻⵏ ⴷ ⵉⵍⴰⵡⵉⵢⵢⴻⵏ ⵥⵉ ⵓⵔⵛⴰⵍⵉⵎ ⵃⵉⵎⴰ ⴰⴷ ⵜ ⵙⵙⴻⵇⵙⴰⵏ: “ⵎⵉⵏ ⵜⴻⵄⵏⵉⴷ ⵛⴻⴽ?” ^■   20 ⵜⵓⵖⴰ ⵉⵛⵀⴻⴷ, ⵡⴰⵔ ⵉⵙⵙⵏⵓⴼⴼⴰⵔ ⵛⴰ, ⵉⵛⵀⴻⴷ: “ⵏⴻⵛⵛ ⵡⴰⵔ ⴵⵉⵖ ⵛⴰ ⴷ ⵍⵎⴰⵙⵉⵃ.” ^■   21 ⵙⵙⴻⵇⵙⴰⵏ ⵜ: “ⵉ ⵎⵉⵏ ⵜⴻⵄⵏⵉⴷ ⵛⴻⴽ ⵅⴻⵏⵏⵉ? ⵎⴰ ⴷ ⵛⴻⴽ ⴷ ⴰⵏⴰⴱⵉ ⵉⵍⵉⵢⴰ?” ⵉⵏⵏⴰ: “ⵍⵍⴰ, ⵡⴰⵔ ⴵⵉⵖ ⴷ ⵏⴻⵛⵛ!” “ⵎⴰ ⴷ ⵛⴻⴽ ⴷ ⴰⵏⴰⴱⵉ?” ⵢⴰⵔⵔⴰ-ⴷⴷ: “ⵍⵍⴰ!” 22 ⵅⴰⵙ ⵓⵛⴰ ⵏⵏⴰⵏ ⴰⵙ: “ⵎⵉⵏ ⵜⴻⵄⵏⵉⴷ ⵛⴻⴽ? ⵉⵜⵜⵅⴻⵚⵚⴰ ⴰⵏⴻⵖ ⴰⴷ ⵏⴰⵔⵔ ⵉ ⵢⴻⵏⵏⵉ ⴷ ⴰⵏⴻⵖ ⴷⴷ-ⵉⵙⵙⴻⴽⴽⴻⵏ. ⵎⵉⵏ ⵜⴻⵇⵇⴰⵔⴻⴷ ⵅ ⵢⵉⵅⴻⴼ ⵏⵏⴻⴽ?” 23 ⵉⵏⵏⴰ: “ⵏⴻⵛⵛ ⴷ ⵜⵎⵉⵊⵊⴰ ⵉ ⵉⵜⵜⵍⴰⵖⴰⵏ ⴷⵉ ⵍⴻⵅⵍⴰ: ‘ⵙⴻⴳⴳⵎⴻⵎ ⴰⴱⵔⵉⴷ ⵏ ⵙⵉⴷⵉ ⵏⵉⵛⴰⵏ!’, ⴰⵎ ⵎⴰⵎⵎⴻⵛ ⵉⵏⵏⴰ ⵓⵏⴰⴱⵉ ⵉⵛⴰⵄⵢⴰ.” ^■  

24 ⵉⵏⵏⵉ ⴷⴷ-ⵉⵜⵜⵡⴰⵙⵙⴻⴽⴽⴻⵏ, ⵜⵓⵖⴰ ⴰⵜⴻⵏ ⵥⴻⴳ ⵉⴼⴰⵔⵉⵙⵉⵢⵢⴻⵏ, 25 ⵓⵛⴰ ⵙⵙⴻⵇⵙⴰⵏ ⵜ, ⵏⵏⴰⵏ ⴰⵙ: “ⵎⴰⵍⴰ ⵡⴰⵔ ⵜⴻⴵⵉⴷ ⵛⴰ ⴷ ⵍⵎⴰⵙⵉⵃ ⵓⵍⴰ ⴷ ⵉⵍⵉⵢⴰ ⵓⵍⴰ ⴷ ⴰⵏⴰⴱⵉ, ⵉ ⵅⴻⵏⵏⵉ ⵎⴰⵢⴻⵎⵎⵉ ⵜⵙⴻⵖⴹⴰⵚⴻⴷ?” ^■   26 ⵢⵓⵃⴰⵏⵏⴰ ⵢⴰⵔⵔⴰ-ⴷⴷ, ⵉⵏⵏⴰ ⴰⵙⴻⵏ: “ⵏⴻⵛⵛ ⵙⵙⴻⵖⴹⴰⵚⴻⵖ ⴷⴻⴳ ⵡⴰⵎⴰⵏ, ⵎⴰⵛⴰ ⴰⵇⴰ ⴷⵉⵏ ⵊⴰⵔ ⴰⵡⴻⵎ ⵡⴻⵏⵏⵉ ⵡⴰⵔ ⵜⴻⵙⵙⵉⵏⴻⵎ ⵛⴰ. ^■   27 ⵏⴻⵜⵜⴰ ⴷ ⵡⴻⵏⵏⵉ ⵉ ⴷⴷ ⵖⴰ ⵢⴰⵙⴻⵏ ⴰⵡⴰⵔⵏⵉ ⴰⵢⵉ, ⵏⴻⵜⵜⴰ ⵉⴵⴰ ⵇⴱⴻⵍ ⵉⵏⵓ, ⵏⴻⵛⵛ ⵡⴰⵔ ⵙⴷⵉⵀⴻⴵⴻⵖ ⴰⴷ ⴰⵙ ⴼⴻⵙⵢⴻⵖ ⵉⴼⵉⵍⴰⵏ ⵏ ⵙⴰⵏⴷⴰⵍⵉⵢⴰⵜ ⵏⵏⴻⵙ.”

28 ⵎⴰⵏ ⴰⵢⴰ ⵉⵎⵙⴰⵔ ⴷⵉ ⴱⴰⵢⵜⵄⴰⵏⵢⴰ ⵅ ⵓⵊⴻⵎⵎⴰⴹ ⵏ ⵍ'ⵓⵔⴷⵓⵏ, ⵎⴰⵏⵉ ⵜⵓⵖⴰ ⵢⵓⵃⴰⵏⵏⴰ ⵉⵙⵙⴻⵖⴹⴰⵚ.

29 ⵜⵉⵡⴻⵛⵛⴰ ⵏⵏⴻⵙ ⵉⵥⵔⴰ ⵢⵓⵃⴰⵏⵏⴰ ⵢⴻⵛⵛⵓ ⵉⴳⴳⵓⵔ-ⴷⴷ ⵖⴰⵔⴻⵙ, ⵉⵏⵏⴰ: “ⵅⵥⴰⵔⴻⵎ, ⴰⵇⴰ-ⵜ ⴷ ⵉⵥⵎⴰⵔ ⵏ ⴰⵔⴻⴱⴱⵉ ⵉ ⵉⵜⵜⴻⴽⴽⵙⴻⵏ ⴷⴷⵏⵓⴱ ⵅ ⴷⴷⵓⵏⴻⵛⵜ! ^■   30 ⴷ ⵡⴰ ⵎⵉⵏ ⵅⴻⴼ ⵏⵏⵉⵖ: ‘ⴰⴷ ⴷⴷ-ⵢⴰⵙ ⴰⵡⴰⵔⵏⵉ ⴰⵢⵉ ⵉⵊⵊ ⵏ ⵡⴻⵔⵢⴰⵥ ⵏⵏⵉ ⵉⴵⴰⵏ ⵥⵥⴰⵜⵉ, ⵎⵉⵏⵥⵉ ⵏⴻⵜⵜⴰ ⵜⵓⵖⴰ-ⵜ ⵇⴱⴻⵍ ⵉⵏⵓ.’ 31 ⵏⴻⵛⵛ ⵡⴰⵔ ⵜ ⵙⵙⵉⵏⴻⵖ ⵛⴰ, ⵎⴰⵛⴰ ⵃⵉⵎⴰ ⴰⴷ ⵉⵜⵜⵡⴰⵙⵙⴰⵔⴳⴻⴱ ⵖⴰⵔ ⵉⵙⵔⴰⵉⵍ, ⵅ ⵓⵢⴻⵏⵏⵉ ⵓⵙⵉⵖ-ⴷⴷ ⵃⵉⵎⴰ ⴰⴷ ⵙⵙⵖⴻⴹⵚⴻⵖ ⴷⴻⴳ ⵡⴰⵎⴰⵏ.”

32 ⵢⵓⵃⴰⵏⵏⴰ ⵉⵛⵀⴻⴷ, ⵉⵏⵏⴰ: “ⵥⵔⵉⵖ ⴰⵔⵔⵓⵃ ⵉⵀⵡⴰ-ⴷⴷ ⴰⵎ ⵉⵛⵜ ⵏ ⵜⴻⴷⴱⵉⵔⵜ ⵥⴻⴳ ⵓⵊⴻⵏⵏⴰ, ⵜⴰⵔⵙⴰ ⵅⴰⵙ. ^■   33 ⵏⴻⵛⵛ ⵡⴰⵔ ⵜ ⵙⵙⵉⵏⴻⵖ ⵛⴰ, ⵎⴰⵛⴰ ⵡⴻⵏⵏⵉ ⴷ ⴰⵢⵉ ⴷⴷ-ⵉⵙⵙⴻⴽⴽⴻⵏ ⵃⵉⵎⴰ ⴰⴷ ⵙⵙⵖⴻⴹⵚⴻⵖ ⴷⴻⴳ ⵡⴰⵎⴰⵏ, ⵏⴻⵜⵜⴰ ⵉⵏⵏⴰ ⴰⵢⵉ: ‘ⵡⴻⵏⵏⵉ ⵜⴻⵥⵔⵉⴷ ⵉⵀⵡⴰ-ⴷⴷ ⵅⴰⵙ ⴰⵔⵔⵓⵃ ⵓⵛⴰ ⵢⴰⵔⵙⴰ ⵅⴰⵙ, ⴷ ⵡⴰ ⴷ ⵡⴻⵏⵏⵉ ⵉⵙⵙⴻⵖⴹⴰⵚⴻⵏ ⵙ ⴰⵔⵔⵓⵃ ⵉⵇⴻⴷⴷⵙⴻⵏ.’ 34 ⵓ ⵏⴻⵛⵛ ⵥⵔⵉⵖ, ⵛⴻⵀⴷⴻⵖ ⴱⴻⵍⵍⵉ ⵡⴰⵏⵉⵜⴰ ⴷ ⵎⵎⵉⵙ ⵏ ⴰⵔⴻⴱⴱⵉ.”

35 ⵜⵉⵡⴻⵛⵛⴰ ⵏⵏⴻⵙ ⵜⵓⵖⴰ ⵢⵓⵃⴰⵏⵏⴰ ⵉⴱⴻⴷⴷ ⴰⴽ-ⴷ ⵜⵏⴰⵢⴻⵏ ⵏ ⵉⵎⴻⵃⴹⴰⵔⴻⵏ ⵏⵏⴻⵙ. 36 ⴰⵎ ⵜⵓⵖⴰ ⵉⵅⴻⵥⵥⴰⵔ ⵖⴰⵔ ⵢⴻⵛⵛⵓ ⵉ ⴷⵉⵏ ⵉⴳⴳⵓⵔⴻⵏ, ⵉⵏⵏⴰ: “ⵅⵥⴰⵔⴻⵎ, ⴷ ⵡⴰ ⴷ ⵉⵥⵎⴰⵔ ⵏ ⴰⵔⴻⴱⴱⵉ!” ^■   37 ⵜⵏⴰⵢⴻⵏ ⵏ ⵉⵎⴻⵃⴹⴰⵔⴻⵏ ⵙⵍⵉⵏ ⴰⵙ ⴰⵎ ⵜⵜ ⵉⵇⵇⴰⵔ ⵓⵛⴰ ⴹⴼⴰⵔⴻⵏ ⵢⴻⵛⵛⵓ. 38 ⵉⵏⵏⴻⵇⵍⴻⴱ-ⴷⴷ ⵢⴻⵛⵛⵓ, ⵉⵥⵔⴰ ⵉ-ⵜⴻⵏ ⴹⴻⴼⴼⴰⵔⴻⵏ ⵜ-ⵉ-ⴷⴷ, ⵉⵙⵙⴻⵇⵙⴰ ⵜⴻⵏ: “ⵎⵉⵏ ⵅⴻⴼ ⵜⴰⵔⴻⵥⵥⵓⵎ?” ⵏⵉⵜⵏⵉ ⵏⵏⴰⵏ ⴰⵙ: “ⴰ ⴰⵎⵙⴻⵍⵎⴰⴷ ⵏⵏⴻⵖ, ⵎⴰⵏⵉ ⵜⵥⴻⴷⴷⵖⴻⴷ?” 39 ⵉⵏⵏⴰ ⴰⵙⴻⵏ: “ⴰⵔⴰⵃⴻⵎ-ⴷⴷ, ⴰⴷ ⵜⵥⴰⵔⴻⵎ!” ⵔⵓⵃⴻⵏ ⴰⴽⵉⴷⴻⵙ, ⵥⵔⵉⵏ ⵎⴰⵏⵉ ⵉⵥⴷⴻⵖ, ⵇⵇⵉⵎⴻⵏ ⴰⴽⵉⴷⴻⵙ ⴰⵙⵙ ⵏⵏⵉ. ⵜⴰⵙⴰⵄⵄⴻⵜ ⵜⵓⵖⴰ-ⵜⵜ ⵄⵍⴰⵃⴰⵍ ⴷ ⵄⴻⵛⵔⴰ.

40 ⴰⵏⴷⵔⴰⵡⵓⵙ, ⵓⵎⴰⵙ ⵏ ⵛⵉⵎⵄⵓⵏ, ⵜⵓⵖⴰ-ⵜ ⴷ ⵉⵊⵊⴻⵏ ⵥⴻⴳ ⵢⴻⵏⵏⵉ ⵉⵙⵍⵉⵏ ⴰⵢⴰ ⵥⵉ ⵢⵓⵃⴰⵏⵏⴰ ⵓⵛⴰ ⴹⴻⴼⴼⴰⵔⴻⵏ ⵢⴻⵛⵛⵓ. 41 ⴷ ⵡⴰ ⵉ ⵢⵓⴼⵉⵏ ⴰⵎⴻⵥⵡⴰⵔⵓ ⵓⵎⴰⵙ ⵛⵉⵎⵄⵓⵏ, ⵉⵏⵏⴰ ⴰⵙ: “ⴰⵇⴰ ⵏⵓⴼⴰ ⵍⵎⴰⵙⵉⵃ!” 42 ⵉⵙⵙⵉⵡⴻⴹ ⵉ-ⵜ-ⵉ-ⴷⴷ ⵖⴰⵔ ⵢⴻⵛⵛⵓ. ⵉⵅⵥⴰⵔ ⴷⴰⵢⴻⵙ ⵢⴻⵛⵛⵓ, ⵉⵏⵏⴰ: “ⵛⴻⴽ ⴷ ⵛⵉⵎⵄⵓⵏ, ⵎⵎⵉⵙ ⵏ ⵢⵓⵏⴰ, ⴰⴷ ⴰⵛ ⵍⴰⵖⴰⵏ: ‘ⴽⵉⴼⴰ!’ ”, ⵉⵙⴻⵎ ⵡⴰⵏⵉⵜⴰ ⵉⵅⵙ ⴰⴷ ⵢⵉⵏⵉ ‘ⴱⵓⵟⵔⵓⵙ’, ⴰⵇⴰ-ⵜ ⴷ ‘ⴰⵥⵔⵓ’. ^□  ■  

43 ⵜⵉⵡⴻⵛⵛⴰ ⵏⵏⴻⵙ ⵜⵓⵖⴰ ⵉⵅⵙ ⵢⴻⵛⵛⵓ ⴰⴷ ⵉⵔⴰⵃ ⵖⴰⵔ ⵍⵊⴰⵍⵉⵍ. ⵉⵎⵎⴻⵍⵇⴰ ⴰⴽ-ⴷ ⴼⵉⵍⵉⴱⴱⵓⵙ, ⵉⵏⵏⴰ ⴰⵙ: “ⴹⴼⴰⵔ ⴰⵢⵉ-ⴷⴷ!” 44 ⴼⵉⵍⵉⴱⴱⵓⵙ ⵜⵓⵖⴰ ⵥⵉ ⴱⴰⵢⵜⵚⴰⵢⴷⴰ, ⵜⴰⵏⴷⵉⵏⵜ ⵏ ⴰⵏⴷⵔⴰⵡⵓⵙ ⴷ ⵛⵉⵎⵄⵓⵏ. ^■   45 ⴼⵉⵍⵉⴱⴱⵓⵙ ⵢⵓⴼⴰ ⵏⴰⵜⴰⵏⴰⵢⵉⵍ, ⵉⵏⵏⴰ ⴰⵙ: “ⵏⵓⴼⴰ ⵡⴻⵏⵏⵉ ⵅⴻⴼ ⵢⵓⵔⴰ ⵎⵓⵙⴰ ⴷⵉ ⵛⵛⴰⵔⵉⵄⴰ ⵓⵍⴰ ⴷ ⵉⵏⴰⴱⵉⵢⵢⴻⵏ, ⴰⵇⴰ-ⵜ ⴷ ⵢⴻⵛⵛⵓ, ⵎⵎⵉⵙ ⵏ ⵢⵓⵙⵓⴼ ⵥⵉ ⵏⵏⴰⵚⵉⵔⴰ.” ^■   46 ⵏⴰⵜⴰⵏⴰⵢⵉⵍ ⵉⵏⵏⴰ ⴰⵙ: “ⵎⴰ ⴰⴷ ⵜⴰⵖ ⵉⵥⴻⵎⵎⴰⵔ ⴰⴷ ⴷⴷ-ⵜⴻⴼⴼⴻⵖ ⵥⵉ ⵏⵏⴰⵚⵉⵔⴰ ⵛⴰ ⵏ ⵜⵛⵓⵏⵉ?” ⴼⵉⵍⵉⴱⴱⵓⵙ ⵉⵏⵏⴰ ⴰⵙ: “ⴰⵔⴰⵃ-ⴷⴷ, ⵜⴻⵅⵥⴰⵔⴻⴷ!” 47 ⵢⴻⵛⵛⵓ ⵉⵥⵔⴰ ⵏⴰⵜⴰⵏⴰⵢⵉⵍ ⵉⴳⴳⵓⵔ-ⴷⴷ ⵖⴰⵔⴻⵙ, ⵉⵏⵏⴰ ⵅⴰⵙ: “ⵅⵥⴰⵔ, ⵡⴰ ⴷ ⵉⵊⵊ ⵏ ⵎⵎⵉⵙ ⴷ ⵜⵉⴷⴻⵜⵜ ⵏ ⵉⵙⵔⴰⵉⵍ ⵏⵏⵉ ⵡⴰⵔ ⴷⴰⵢⴻⵙ ⴱⵓ ⵍⵖⴻⵛⵛ!” 48 ⵏⴰⵜⴰⵏⴰⵢⵉⵍ ⵉⵏⵏⴰ ⴰⵙ: “ⵎⴰⵏⵉⵙ ⴷ ⴰⵢⵉ ⵜⴻⵙⵙⵏⴻⴷ?” ⵢⴻⵛⵛⵓ ⵉⵏⵏⴰ ⴰⵙ: “ⵥⵔⵉⵖ ⵛⴻⴽ ⵙⵡⴰⴷⴷⴰⵢ ⵉ ⵡⴰⵔⵜⵓ ⵇⴱⴻⵍ ⵎⴰ ⴰⴷ ⴰⵛ ⴷⴷ-ⵉⵍⴰⵖⴰ ⴼⵉⵍⵉⴱⴱⵓⵙ.” 49 ⵏⴰⵜⴰⵏⴰⵢⵉⵍ ⵢⴰⵔⵔⴰ-ⴷⴷ ⵅⴰⵙ: “ⴰ ⴰⵎⵙⴻⵍⵎⴰⴷ ⵉⵏⵓ, ⵛⴻⴽ ⴷ ⵎⵎⵉⵙ ⵏ ⴰⵔⴻⴱⴱⵉ, ⵛⴻⴽ ⴷ ⴰⵊⴻⴵⵉⴷ ⵏ ⵉⵙⵔⴰⵉⵍ.” 50 ⵢⴻⵛⵛⵓ ⵉⵏⵏⴰ ⴰⵙ: “ⵎⴰ ⵜⵓⵎⵏⴻⴷ ⵙ ⵎⵉⵏ ⴷ ⴰⵛ ⵏⵏⵉⵖ: ‘ⴰⵇⴰ ⵥⵔⵉⵖ ⵛⴻⴽ ⵙⵡⴰⴷⴷⴰⵢ ⵉ ⵡⴰⵔⵜⵓ!’? ⴰⴷ ⵜⵥⴰⵔⴻⴷ ⵎⵉⵏ ⵉⴵⴰⵏ ⴽⵜⴰⵔ ⵥⵉ ⵎⴰⵏ ⴰⵢⴰ.” 51 ⵉⵏⵏⴰ ⴰⵙ: “ⵙ ⵜⵉⴷⴻⵜⵜ, ⵙ ⵜⵉⴷⴻⵜⵜ, ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ, ⵥⵉ ⵙⵙⴰ ⴷ ⵜⵙⴰⵡⴻⵏⵜ ⴰⴷ ⵜⵥⴰⵔⴻⵎ ⴰⵊⴻⵏⵏⴰ ⵉⵏⵏⵓⵔⵥⴻⵎ ⵓ ⵍⵎⴰⵍⴰⴽⴰⵜ ⵏ ⴰⵔⴻⴱⴱⵉ ⵜⵜⴰⵍⵢⴻⵏⵜ ⵀⴻⴽⴽⵡⴰⵏⵜ ⵖⴰⵔ ⵎⵎⵉⵙ ⵏ ⴱⵏⴰⴷⴻⵎ!” ^■