1 ⵜⵓⵖⴰ ⴷⵉⵏ ⴷⵉ ⴰⵏⵜⵉⵢⵓⵅⵉⵢⴰ ⴷⵉ ⵜⵎⴻⵙⵎⵓⵏⵜ ⵉⵏⴰⴱⵉⵢⵢⴻⵏ ⴷ ⵉⵎⵙⴻⵍⵎⴰⴷⴻⵏ: ⴱⴰⵔⵏⴰⴱⴰ, ⴷ ⵛⵉⵎⵄⵓⵏ ⵡⴻⵏⵏⵉ ⵉⵜⵜⴽⴻⵏⵏⴰⵏ ⵏⵉⵊⴻⵔ, ⴷ ⵍⵓⴽⵉⵢⵓⵙ ⵥⵉ ⵇⴰⵢⵔⴰⵡⴰⵏ, ⴷ ⵎⴰⵏⴰⵄⵉⵏ ⵡⴻⵏⵏⵉ ⴷ ⵎⵎⵉⵙ ⵏ ⵡⴻⵏⵏⵉ ⵢⴰⵔⴻⴱⴱⴰⵏ ⵀⵉⵔⵓⴷⵓⵙ, ⵍⵃⴰⴽⴻⵎ ⵅ ⵉⵊⵊ ⵏ ⴰⵔⴱⴰⵄ ⵏ ⵜⴻⵎⵎⵓⵔⵜ, ⴷ ⵛⴰⵡⵓⵍ. ^■   2 ⴰⵎ ⵜⵓⵖⴰ ⵜⵜⵥⵓⵎⵎⴰⵏ, ⵜⵜⵥⴰⵡⴳⴻⵏ ⴰⵔⴻⴱⴱⵉ, ⵉⵏⵏⴰ ⴰⵙⴻⵏ ⴰⵔⵔⵓⵃ ⵉⵇⴻⴷⴷⵙⴻⵏ: “ⴼⴰⵔⵥⴻⵎ ⴰⵢⵉ-ⴷⴷ ⴱⴰⵔⵏⴰⴱⴰ ⴷ ⵛⴰⵡⵓⵍ ⵉ ⵍⵅⴻⴷⵎⴻⵜ ⵜⴻⵏⵏⵉ ⵓⵎⵉ ⴷ ⴰⵙⴻⵏ ⴷⴷ-ⵍⴰⵖⵉⵖ.” ^■   3 ⴰⵡⴰⵔⵏⵉ ⵍⴰⵎⵉ ⵥⵓⵎⵎⴻⵏ, ⵥⵥⵓⴵⴻⵏ, ⵙⵙⴰⵔⵙⴻⵏ ⵅⴰⵙⴻⵏ ⵉⴼⴰⵙⵙⴻⵏ, ⵙⴻⴽⴽⴻⵏ ⵜⴻⵏ. ^■  

4 ⵍⴰⵎⵉ ⵜⵓⵖⴰ ⴷⴷ-ⵜⵜⵡⴰⵙⴻⴽⴽⴻⵏ ⵥⵉ ⴰⵔⵔⵓⵃ ⵉⵇⴻⴷⴷⵙⴻⵏ, ⵀⵡⴰⵏ-ⴷⴷ ⵖⴰⵔ ⵙⴰⵍⵓⴽⵉⵢⴰ ⵓⵛⴰ ⵙⵙⴻⵏⵏⵉ ⵔⵓⵃⴻⵏ ⴷⵉ ⵍⴻⴱⵃⴰⵔ ⵖⴰⵔ ⵇⵓⴱⵔⵓⵙ. 5 ⵓⵎⵉ ⵉⵡⴹⴻⵏ ⵖⴰⵔ ⵙⴰⵍⴰⵎⵉⵙ, ⴱⴰⵔⵔⵃⴻⵏ ⵙ ⵡⴰⵡⴰⵍ ⵏ ⵙⵉⴷⵉⵜⵏⴻⵖ ⴷⵉ ⵜⴻⵎⵥⵉⴷⴰⵡⵉⵏ ⵏ ⵡⵓⴷⴰⵢⴻⵏ. ⵜⵓⵖⴰ ⵢⵓⵃⴰⵏⵏⴰ ⵉⵜⵜⵙⴻⵅⵅⴰⵔ ⵉ-ⵜⴻⵏ. ^■  

6 ⴰⵡⴰⵔⵏⵉ ⵍⴰⵎⵉ ⵥⵡⴰⵏ ⵎⴰⵔⵔⴰ ⵜⴰⴳⵥⵉⵔⵜ, ⵉⵡⴹⴻⵏ-ⴷⴷ ⵖⴰⵔ ⴱⴰⴼⵓⵙ, ⵓⴼⵉⵏ ⴷⵉⵏ ⵉⵊⵊ ⵏ ⵡⴻⵔⵢⴰⵥ ⴷ ⵓⴷⴰⵢ, ⵜⵓⵖⴰ ⵡⴰⵏⵉⵜⴰ ⴷ ⴰⵙⴻⵃⵃⴰⵔ, ⴷ ⴰⵏⴰⴱⵉ ⵉⵙⵙⵅⴰⵔⵔⵉⵇⴻⵏ, ⵇⵇⴰⵔⴻⵏ ⴰⵙ ⴱⴰⵔ-ⵛⵓⵎⴰ. ^□  ■   7 ⵏⴻⵜⵜⴰ ⵜⵓⵖⴰ ⴷ ⴰⵎⴻⴹⴼⴰⵔ ⵏ ⵉⵊⵊ ⵏ ⴱⵏⴰⴷⴻⵎ ⴷ ⴰⵎⵉⵖⵉⵙ, ⵍⵄⴰⵎⵉⵍ ⵓⵎⵉ ⵇⵇⴰⵔⴻⵏ ⵙⴰⵔⵊⵉⵢⵓⵙ ⴱⵓⵍⵓⵙ. ⵉⵍⴰⵖⴰ-ⴷⴷ ⵍⵄⴰⵎⵉⵍ ⵉ ⴱⴰⵔⵏⴰⴱⴰ ⴷ ⵛⴰⵡⵓⵍ, ⵜⵓⵖⴰ ⵉⵎⵎⴻⵥⵔⵉ ⴰⴷ ⵉⵙⴻⵍ ⴰⵡⴰⵍ ⵏ ⴰⵔⴻⴱⴱⵉ. 8 ⵎⴰⵛⴰ ⴰⵙⴻⵃⵃⴰⵔ ⴱⴰⵔ-ⵛⵓⵎⴰ, ⵉⵙⴻⵎ ⵡⴰⵏⵉⵜⴰ ⵉⵜⵜⵡⴰⵜⴰⵔⵊⴻⵎ ⵙ ⵉⵍⵉⵎⴰⵙ, ⵜⵓⵖⴰ ⵉⵜⵜⵄⴻⴽⴽⴰⵙ ⵉ-ⵜⴻⵏ, ⵢⴰⵔⵥⵓ ⴰⴷ ⵉⵙⵙⴱⴻⵄⵄⴻⴷ ⵍⵡⴰⵍⵉ ⵅ ⵍ’ⵉⵎⴰⵏ. ^■   9 ⵎⴰⵛⴰ ⵛⴰⵡⵓⵍ ⵓⵎⵉ ⵇⵇⴰⵔⴻⵏ ⵄⴰⵡⴻⴷ ⴱⵓⵍⵓⵙ, ⵉⵜⵜⵡⴰⵛⵛⵓⵔ ⵙ ⴰⵔⵔⵓⵃ ⵉⵇⴻⴷⴷⵙⴻⵏ ⵓⵛⴰ ⵉⵊⵄⴰⵔ ⴷⴰⵢⴻⵙ ⵎⵍⵉⵃ, ⵉⵏⵏⴰ:

10 “ⴰ ⵛⴻⴽ, ⴰⵇⴰ ⵜⴻⵛⵛⵓⵔⴻⴷ ⵙ ⴽⵓⵍ ⵍⵖⴻⵛⵛ ⴷ ⵜⴻⵃⵔⴰⵢⵎⴻⵛⵜ, ⴰ ⵛⴻⴽ ⵎⵎⵉⵙ ⵏ ⵉⴱⵍⵉⵙ ⴷ ⵍⴻⵄⴷⵓ ⵏ ⵎⴰⵔⵔⴰ ⵜⴰⵙⴻⴳⴷⴰ. ⵎⴰ ⴰⵇⴰ ⵛⴻⴽ ⵡⴰⵔ ⵜⴱⴻⴷⴷⴻⴷ ⵄⴻⵎⵎⴰⵔⵚ ⴰⴷ ⵜⵅⴰⵔⴻⵡⴹⴻⴷ ⵉⴱⵔⵉⴷⴻⵏ ⵉⵙⴻⴳⴳⴷⴻⵏ ⵏ ⵙⵉⴷⵉ?

11 ⵍⴻⵅⵅⵓ, ⵅⵥⴰⵔ, ⴰⵇⴰ ⴷⴰ ⴰⴼⵓⵙ ⵏ ⵙⵉⴷⵉ ⴹⵉⴷⴷ ⵏⵏⴻⴽ, ⴰⴷ ⵜⴷⴻⵡⵍⴻⴷ ⴷ ⴰⴷⴰⵔⵖⴰⵍ, ⵡⴰⵔ ⵜᵉⵜⵜⵡⵉⵍⵉⴷ ⵜⴼⵓⵛⵜ ⵄⴰⴷ ⵉ ⵢⵉⵊⵊ ⵏ ⵍⵎⵉⵊⴰⵍ.” ⵍⴻⵅⴷⴻⵏⵏⵉ ⵜⴻⵡⴹⴰ-ⴷⴷ ⵅⴰⵙ ⵜⴰⵢⵢⵓⵜ ⴷ ⵜⴰⴵⴻⵙⵜ ⵓⵛⴰ ⵉⴱⴷⴰ ⵉⴷⴷⵓⵔⴰ, ⵢⴰⵔⴻⵥⵥⵓ ⵡⵉ ⵜ ⵖⴰ ⵉⴳⴻⵡⵡⴷⴻⵏ ⵥⴻⴳ ⵓⴼⵓⵙ.

12 ⵍⴰⵎⵉ ⵉⵥⵔⴰ ⵍⵄⴰⵎⵉⵍ ⵎⵉⵏ ⵉⵎⵙⴰⵔⴻⵏ, ⵉⵜⴻⴱⵀⴻⵜ ⵓⵛⴰ ⵢⵓⵎⴻⵏ ⴷⵉ ⵜⵖⵓⵔⵉ ⵏ ⵙⵉⴷⵉ.

13 ⴱⵓⵍⵓⵙ ⴷ ⴱⴰⵔⵏⴰⴱⴰ ⴽⴽⵉⵏ ⵅ ⵍⴻⴱⵃⴰⵔ ⵥⵉ ⵜⴻⵏⴷⵉⵏⵜ ⵏ ⴱⴰⴼⵓⵙ ⵓⵛⴰ ⵉⵡⴹⴻⵏ ⵖⴰⵔ ⵜⴻⵏⴷⵉⵏⵜ ⵏ ⴱⵉⵔⵅⴰ ⴷⵉ ⴱⴰⵎⴼⵉⵍⵉⵢⴰ. ⵙⵙⴻⵏⵏⵉ ⵢⵓⵢⵓⵔ ⵅⴰⵙⴻⵏ ⵢⵓⵃⴰⵏⵏⴰ, ⵉⵄⵇⴻⴱ ⵖⴰⵔ ⵓⵔⵛⴰⵍⵉⵎ. ^■  

14 ⵎⴰⵛⴰ ⵏⵉⵜⵏⵉ ⵔⵓⵃⴻⵏ ⵥⵉ ⴱⵉⵔⵅⴰ, ⴽⴽⵉⵏ ⵅ ⵜⴻⵎⵎⵓⵔⵜ, ⵓⵛⴰ ⵉⵡⴹⴻⵏ ⵖⴰⵔ ⴰⵏⵜⵉⵢⵓⵅⵉⵢⴰ, ⵉⵛⵜ ⵏ ⵜⴻⵏⴷⵉⵏⵜ ⴷⵉ ⵊⵊⵡⴰⵢⴻⵀ ⵏ ⴱⵉⵙⵉⴷⵉⵢⴰ ⵓⵛⴰ ⵓⴷⴼⴻⵏ ⵖⴰⵔ ⵜⴻⵎⵥⵉⴷⴰ ⵓⵛⴰ ⵇⵇⵉⵎⴻⵏ ⴷⵉⵏⵏⵉ ⴷⴻⴳ ⵡⴰⵙⵙ ⵏ ⵙⵙⴻⴱⵜ.

15 ⴰⵡⴰⵔⵏⵉ ⵜⵉⵖⵔⵉ ⵏ ⵛⵛⴰⵔⵉⵄⴰ ⴷ ⵉⵏⴰⴱⵉⵢⵢⴻⵏ, ⵙⵙⴻⴽⴽⴻⵏ ⵖⴰⵔⵙⴻⵏ ⵉⵎⵖⴰⵔⴻⵏ ⵏ ⵜⴻⵎⵥⵉⴷⴰ, ⵏⵏⴰⵏ: “ⴰ ⵉⵔⵢⴰⵥⴻⵏ ⵜⴰⵡⵎⴰⵜ, ⵎⴰⵍⴰ ⵜⵓⵖⴰ ⵖⴰⵔⵡⴻⵎ ⵉⵊⵊ ⵏ ⵡⴰⵡⴰⵍ ⵏ ⵓⵛⴻⵊⵊⴻⵄ ⵉ ⵉⵡⴷⴰⵏ, ⴱⴰⵔⵔⵃⴻⵎ ⵥⵥⴰⵢⴻⵙ ⵉ ⵍⴳⴻⵏⵙ!”

16 ⵅⴻⵏⵏⵉ ⵉⴽⴽⴰⵔ ⴱⵓⵍⵓⵙ ⵉⵛⴻⵢⵢⴰⵔ ⵙ ⵓⴼⵓⵙ ⵏⵏⴻⵙ, ⵉⵏⵏⴰ:

“ⴰ ⴽⴻⵏⵏⵉⵡ, ⵉⵔⵢⴰⵥⴻⵏ ⵏ ⵉⵙⵔⴰⵉⵍ ⵓ ⴽⴻⵏⵏⵉⵡ ⵉⵏⵏⵉ ⵉⵜⵜⴻⴳⴳⵯⴻⴷⴻⵏ ⴰⵔⴻⴱⴱⵉ, ⵙⵍⴻⵎ! ^■  

17 ⴰⵔⴻⴱⴱⵉ ⵏ ⵍⴳⴻⵏⵙ-ⴰ ⵜⵓⵖⴰ ⵉⴼⴰⵔⵥ ⵍⴻⵊⴷⵓⴷ ⵏⵏⴻⵖ ⵓⵛⴰ ⵉⵙⵙⴳⴻⵄⵄⴻⴷ ⵉ-ⵜⴻⵏ ⵍⴰⵎⵉ ⵜⴻⵏ ⵜⵓⵖⴰ ⴷ ⵉⴱⴰⵔⵔⴰⵏⵉⵢⵢⴻⵏ ⴷⵉ ⵜⴻⵎⵎⵓⵔⵜ ⵏ ⵎⵉⵚⵔⴰ ⵓⵛⴰ ⵉⵙⵙⵓⴼⴼⴻⵖ ⵉ-ⵜⴻⵏ ⵙ ⵓⴼⵓⵙ ⵏⵏⴻⵙ ⵢⵓⵄⵍⴰⵏ ^■  

18 ⵓⵛⴰ ⵉⵙⵙⴻⵛⵛⴰ ⵉ-ⵜⴻⵏ ⵍⵎⵉⵊⴰⵍ ⵏ ⴰⵔⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ ⴷⵉ ⵍⴻⵅⵍⴰ. ^■  

19 ⵉⵜⴻⵃⵃⴰ ⵙⴻⴱⵄⴰ ⵏ ⵍⴻⴳⵏⵓⵙ ⴷⵉ ⵜⴻⵎⵎⵓⵔⵜ ⵏ ⴽⴻⵏⵄⴰⵏ, ⵓⵛⴰ ⵉⵡⵛⴰ ⴰⵙⴻⵏ ⵜⴻⵎⵎⵓⵔⵜ ⵏⵙⴻⵏ ⴷ ⵍⵡⴰⵔⵜ ⵉ ⵏⵉⵜⵏⵉ. ^■   20 ⵏⴻⵜⵜⴰ ⵉⵡⵛⴰ ⴰⵙⴻⵏ ⵍⵇⵓⴹⴰⵜ ⵉ ⵉⵊⵊ ⵏ ⵍⵎⵉⵊⴰⵍ ⵏ ⴰⵔⴻⴱⵄⴰ-ⵎⵢⴰ ⵓ-ⵅⴻⵎⵙⵉⵏ ⵏ ⵉⵙⴻⴳⴳⵯⵓⵙⴰ, ⴰⵍ ⵍⵡⴻⵇⵜ ⵏ ⵓⵏⴰⴱⵉ ⵛⴰⵎⵡⵉⵍ. ^■  

21 ⵅⴻⵏⵏⵉ ⵜⵜⴰⵔⴻⵏ ⵉⵊⵊ ⵏ ⵓⵊⴻⴵⵉⴷ ⵉ ⵢⵉⵅⴻⴼ ⵏⵙⴻⵏ ⵓⵛⴰ ⴰⵔⴻⴱⴱⵉ ⵉⵡⵛⴰ ⴰⵙⴻⵏ ⵛⴰⵡⵓⵍ, ⵎⵎⵉⵙ ⵏ ⴽⵉⵙ, ⵉⵊⵊ ⵏ ⵡⴻⵔⵢⴰⵥ ⵥⵉ ⵜⴻⵇⴱⵉⵞ ⵏ ⴱⵉⵏⵢⴰⵎⵉⵏ, ⵍⵎⵉⵊⴰⵍ ⵏ ⴰⵔⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ. ^■   22 ⵅⴻⵏⵏⵉ ⵉⴽⴽⴻⵙ ⵉ-ⵜ, ⵉⵙⵙⴳⴻⵄⵄⴻⴷ ⴰⵙⴻⵏ ⴷⴰⵡⵓⴷ ⴷ ⴰⵊⴻⴵⵉⴷ, ⵡⴻⵏⵏⵉ ⵓⵎⵉ ⵅ ⵉⵛⵀⴻⴷ ⵄⴰⵡⴻⴷ ⴰⵎⵎⵓ: ‘ⵓⴼⵉⵖ ⴷⴰⵡⵓⴷ ⵎⵎⵉⵙ ⵏ ⵢⴰⵙⵙⴰ, ⴰⵇⴰ-ⵜ ⴷ ⵉⵊⵊ ⵏ ⵡⴻⵔⵢⴰⵥ ⵢⵓⵙⴰ-ⴷⴷ ⵅ ⵍⵅⴰⴹⴰⵔ ⵉⵏⵓ, ⵡⴻⵏⵏⵉ ⵉ ⵖⴰ ⵉⴳⴳⴻⵏ ⵎⴰⵔⵔⴰ ⵎⵉⵏ ⵅⵙⴻⵖ ⵏⴻⵛⵛ.’ ^■  

23 ⵣⵉ ⵥⵥⴰⵔⵉⵄⴻⵜ ⵏⵏⴻⵙ ⵉⴳⴳⴰ ⴰⵔⴻⴱⴱⵉ ⵉ ⵉⵙⵔⴰⵉⵍ ⵢⴻⵛⵛⵓ ⴰⵎⵙⴻⵏⵊⴻⵎ ⴰⵎ ⵎⴰⵎⵎⴻⵛ ⵜⵓⵖⴰ ⵥⵥⴰⵢⴻⵙ ⵉⵡⴰⵄⴷ. 24 ⵉⵙⵙⴻⴽⴽ ⵢⵓⵃⴰⵏⵏⴰ ⵃⵉⵎⴰ ⴰⴷ ⵉⴱⴰⵔⵔⴻⵃ ⵇⴱⴻⵍ ⵜⵡⴰⵙⵉⵜ ⵏⵏⴻⵙ ⵉ ⵎⴰⵔⵔⴰ ⵍⴳⴻⵏⵙ ⵏ ⵉⵙⵔⴰⵉⵍ ⵙ ⵓⵚⴻⵖⴹⴰⵚ ⵏ ⵜⵜⵓⴱⴻⵜ. ^■   25 ⵓⵎⵉ ⴷⴷ-ⵢⵉⵡⴻⴹ ⵢⵓⵃⴰⵏⵏⴰ ⵉⴽⴻⵎⵎⴻⵍ ⵜⴰⵙⴻⵅⵅⴰⵔⵜ ⵏⵏⴻⵙ, ⵉⵏⵏⴰ: ‘ⵎⵉⵏ ⴷ ⴰⵡⴻⵎ ⵉⵜⵜⵖⵉⵍ ⴰⵇⴰ ⴷ ⵏⴻⵛⵛ? ⵡⴰⵔ ⴵⵉⵖ ⴷ ⵍⵎⴰⵙⵉⵃ, ⵎⴰⵛⴰ, ⵅⵥⴰⵔ, ⵏⴻⵜⵜⴰ ⴰⴷ ⴷⴷ-ⵢⴰⵙ ⴰⵡⴰⵔⵏⵉ ⴰⵢⵉ, ⵡⴻⵏⵏⵉ ⵓⵎⵉ ⵏⴻⵛⵛ ⵡⴰⵔ ⵙⴷⵉⵀⴻⴵⴻⵖ ⴰⴷ ⴰⵙ ⴼⴻⵙⵢⴻⵖ ⵉⴼⵉⵍⴰⵏ ⵏ ⵙⴰⵏⴷⴰⵍⵉⵢⴰⵜ ⵏⵏⴻⵙ!’ ^■  

26 ⴰ ⵉⵔⵢⴰⵥⴻⵏ ⵜⴰⵡⵎⴰⵜ, ⵜⴰⵔⵡⴰ ⵏ ⵜⴻⵇⴱⵉⵞ ⵏ ⵉⴱⵔⴰⵀⵉⵎ ⴷ ⵉⵏⵏⵉ ⴰⴽⵉⴷⵡⴻⵎ ⵉⵜⵜⴻⴳⴳⵯⴻⴷⴻⵏ ⴰⵔⴻⴱⴱⵉ, ⵉ ⴽⴻⵏⵏⵉⵡ ⵓⵎⵉ ⴷⴷ-ⵉⵜⵜⵡⴰⵙⵙⴻⴽⴽ ⴰⵡⴰⵍ ⵏ ⵜⵓⴷⴰⵔⵜ. ^■   27 ⵎⵉⵏⵥⵉ ⵉⵎⴻⵥⴷⴰⵖ ⵏ ⵓⵔⵛⴰⵍⵉⵎ ⴷ ⵉⵎⴻⵇⵇⵔⴰⵏⴻⵏ ⵏⵙⴻⵏ ⵡⴰⵔ ⴷ ⴰⵙ ⴼⵀⵉⵎⴻⵏ ⵓⵍⴰ ⴷ ⵉⴷⵍⵉⵙⴻⵏ ⵏ ⵉⵏⴰⴱⵉⵢⵢⴻⵏ ⵉ ⵉⵇⵇⴰⵔⴻⵏ ⴽⵓⵍ ⴰⵙⵙ ⵏ ⵙⵙⴻⴱⵜ, ⵡⴰⵔ ⵜⴻⵏ ⴼⵀⵉⵎⴻⵏ ⵛⴰ, ⵎⴰⵛⴰ ⵃⴻⴽⵎⴻⵏ ⵅⴰⵙ ⵓ ⴰⵎⵎⵓ ⴽⴻⵎⵎⵍⴻⵏ ⵏⵉⵜⵏⵉ ⵎⴰⵔⵔⴰ ⵎⵉⵏ ⵢⵓⵔⴰⵏ. ^■   28 ⵡⴰⵅⵅⴰ ⵡⴰⵔ ⵓⴼⵉⵏ ⵓⵍⴰ ⴷ ⵉⵊⵊ ⵏ ⵍⴻⵙⴱⴰⴱ ⵃⵉⵎⴰ ⴰⴷ ⵅⴰⵙ ⵃⴻⴽⵎⴻⵏ ⵙ ⵍⵎⴻⵡⵜ, ⵡⴰⵅⵅⴰ ⴰⵎⴻⵏⵏⵉ ⵜⵜⴰⵔⴻⵏ ⵥⵉ ⴱⵉⵍⴰⵟⵓⵙ ⵜⵜⴻⵙⵍⵉⵃ ⵃⵉⵎⴰ ⴰⴷ ⵜ ⵏⵖⴻⵏ. ^■   29 ⵓⵎⵉ ⴽⴻⵎⵎⵍⴻⵏ ⵎⴰⵔⵔⴰ ⵎⵉⵏ ⵅⴰⵙ ⵢⵓⵔⴰⵏ, ⵙⵙⴻⵀⵡⴰⵏ ⵜ-ⵉ-ⴷⴷ ⵥⵉ ⵜⴻⵃⵏⴰⵛⵜ ⵓⵛⴰ ⵙⵙⴰⵔⵙⴻⵏ ⵜ ⴷⴻⴳ ⵡⴻⵏⴹⴻⵍ. 30 ⵎⴰⵛⴰ ⴰⵔⴻⴱⴱⵉ ⵉⵙⵙⵏⴻⴽⴽⴰⵔ ⵉ-ⵜ-ⵉ-ⴷⴷ ⵥⵉ ⵜⴰⴷⴷⴰⵔⵜ ⵏ ⵉⵎⴻⵜⵜⵉⵏⴻⵏ. ^■   31 ⵉⴹⵀⴰⵔ ⴰⵙⴻⵏ-ⴷⴷ ⴰⵟⵟⴰⵙ ⵏ ⵡⵓⵙⵙⴰⵏ ⵉ ⵢⴻⵏⵏⵉ ⴰⴽⵉⵙ ⵉⴳⴻⵄⵄⴷⴻⵏ ⵥⵉ ⵍⵊⴰⵍⵉⵍ ⵖⴰⵔ ⵓⵔⵛⴰⵍⵉⵎ ⵓⵛⴰ ⵍⴻⵅⵅⵓ ⴰⵇⴰ ⴰⵜⴻⵏ ⴷ ⵍⴻⵛⵀⵓⴷ ⵏⵏⴻⵙ ⵥⵥⴰⵜ ⵉ ⵍⴳⴻⵏⵙ. ^■   32 ⵅⵥⴰⵔ, ⵓⵍⴰ ⴷ ⵏⴻⵛⵛⵉⵏ ⵏⴻⵜⵜⴱⴰⵔⵔⴻⵃ ⵉ ⴽⴻⵏⵏⵉⵡ ⵙ ⵡⴰⵡⴰⵍ ⵏ ⵍⵡⴰⵄⴷ ⵉ ⵉⵜⵜⵡⴰⵏⵏⴰⵏ ⵉ ⵍⴻⵊⴷⵓⴷ ⵏⵏⴻⵖ. ^■   33 ⵅⵥⴰⵔ, ⴰⵔⴻⴱⴱⵉ ⵉⴽⴻⵎⵎⴻⵍ ⵍⵡⴰⵄⴷ ⵉ ⵏⴻⵛⵛⵉⵏ, ⵉⵏⵏⵉ ⵉⴵⴰⵏ ⴷ ⵜⴰⵔⵡⴰ ⵏⵙⴻⵏ, ⵓⵎⵉ ⴷⴷ-ⵉⵙⵙⵏⴻⴽⴽⴰⵔ ⵢⴻⵛⵛⵓ ⵥⵉ ⵍⵎⴻⵡⵜ. ⴰⵎ ⵎⴰⵎⵎⴻⵛ ⵜⵓⵔⴰ ⴷⴻⴳ ⵓⵥⴻⵀⵀⵉⴷ ⵡⵉⵙⵙ ⵜⵏⴰⵢⴻⵏ:

‘ⵛⴻⴽ ⴷ ⵎⵎⵉ, ⴰⵙⵙ-ⴰ ⵊⵊⵉⵖ-ⴷⴷ ⵛⴻⴽ!’ ^■  

34 ⵙ ⵓⵢⴰ ⵉⵙⵙⵏⴻⴽⴽⴰⵔ ⵉ-ⵜ-ⵉ-ⴷⴷ ⴰⵔⴻⴱⴱⵉ ⵥⵉ ⵜⴰⴷⴷⴰⵔⵜ ⵏ ⵉⵎⴻⵜⵜⵉⵏⴻⵏ ⴰⵍⴰⵎⵉ ⵡⴰⵔ ⴷⴷ-ⵉⴷⴷⵉⴽⴽⵡⵉⵍ ⵄⴻⵎⵎⴰⵔⵚ ⴰⵍⴰⵎⵉ ⵉ ⵖⴰ ⵉⴽⵉⵛⵛⵓ, ⴰⵎ ⵜ ⵉⵏⵏⴰ:

‘ⵏⴻⵛⵛ ⴰⴷ ⴰⵡⴻⵎ ⵡⵛⴻⵖ ⵜⵉⵎⴻⴳⴳⴰ ⵏ ⵜⵎⴻⵅⵙⵉⵡⵜ ⵓ ⵏ ⵍⴰⵎⴰⵏ ⵉⵛⴻⵡⵡⴰⵔⴻⵏ ⵏ ⴷⴰⵡⵓⴷ.’ ^■  

35 ⵙ ⵓⵢⴻⵏⵏⵉ ⵉⵇⵇⴰⵔ ⵄⴰⵡⴻⴷ ⴷⴻⴳ ⵉⵊⵊ ⵏ ⵥⵥⵀⵉⴷ ⵏⵏⴻⵖⵏⵉ:

‘ⵛⴻⴽ ⵡⴰⵔ ⵜᵉⵜⵜⴻⵊⵊⵉⴷ ⴰⵎⵙⵉⵥⴷⴻⴳ ⵏⵏⴻⴽ ⴰⴷ ⵉⴽⵉⵛⵛⵓ.’ ^■  

36 ⵎⵉⵏⵥⵉ ⴷⴰⵡⵓⴷ ⵉⵙⴻⵅⵅⴰⵔ ⵊⴰⵔ ⵊⵊⵉⵍ ⵏⵏⴻⵙ ⵄⵍⴰⵃⵙⴰⴱ ⵎⵉⵏ ⵉⵅⵙ ⴰⵔⴻⴱⴱⵉ, ⵓⵛⴰ ⵉⵎⵎⵓⵜ, ⵏⴻⴹⵍⴻⵏ ⵜ ⵖⴰⵔ ⵍⴻⵊⴷⵓⴷ ⵏⵏⴻⵙ, ⵅⴻⵏⵏⵉ ⵉⴽⵉⵛⵛⵓ. ^■   37 ⵎⴰⵛⴰ ⵡⴰⵏⵉⵜⴰ ⵡⴻⵃⵃⴷⴻⵙ, ⵡⴻⵏⵏⵉ ⴷⴷ-ⵉⵙⵙⵏⴻⴽⴽⴰⵔ ⴰⵔⴻⴱⴱⵉ, ⵡⴰⵔ ⵉⵜⵜⴽⵉⵛⵛⵉⵡ.

38 ⵙⵏⴻⵎ ⵅⴻⵏⵏⵉ, ⴰ ⵜⴰⵡⵎⴰⵜ, ⴰⵇⴰ ⵙ ⵡⴰ ⵉⵜⵜⵡⴰⴱⴰⵔⵔⴻⵃ ⵙ ⵡⴻⵖⴼⴰⵔ ⵏ ⴷⴷⵏⵓⴱ ⵉ ⴽⴻⵏⵏⵉⵡ, ^■   39 ⵓ ⵙⵏⴻⵎ ⴰⵇⴰ ⵥⵉ ⵎⴰⵔⵔⴰ ⵎⵉⵏ ⵥⵉ ⵡⴰⵔ ⵜⵥⴻⵎⵎⴰⵔⴻⵎ ⴰⴷ ⵜᵉⵜⵜⵡⴰⵙⴻⴳⴳⴷⴻⵎ ⵙ ⵛⵛⴰⵔⵉⵄⴰ ⵏ ⵎⵓⵙⴰ, ⴰⵇⴰ ⴰⴷ ⵜⵜⵡⴰⵙⴻⴳⴳⴷⴻⵏ ⵎⴰⵔⵔⴰ ⵉⵏⵏⵉ ⵢⵓⵎⵏⴻⵏ ⵥⵥⴰⵢⴻⵙ ⵏⴻⵜⵜⴰ. ^■   40 ⵃⴹⴰⵎ ⵅⴻⵏⵏⵉ ⵃⵉⵎⴰ ⵡⴰⵔ ⵅⴰⵡⴻⵎ ⴷⴷ-ⵉⵡⴻⵟⵟⵉ ⵛⴰ ⵏ ⵎⵉⵏ ⵢⵓⵔⴰⵏ ⴷⴻⴳ ⵉⴷⵍⵉⵙⴻⵏ ⵏ ⵉⵏⴰⴱⵉⵢⵢⴻⵏ:

41 ‘ⵅⵥⴰⵔⴻⵎ, ⴰ ⴽⴻⵏⵏⵉⵡ ⵉⵏⵏⵉ ⵉⵜⵜⴱⵓⵚⴰⵔⴻⵏ, ⵜⵄⴻⵊⴱⴻⵎ ⵓ ⵜⵡⴻⴷⴷⴰⵔⴻⵎ,

ⵎⵉⵏⵥⵉ ⵏⴻⵛⵛ ⴰⴷ ⴳⴳⴻⵖ ⵉⵛⵜ ⵏ ⵍⵅⴻⴷⵎⴻⵜ ⴷⴻⴳ ⵡⵓⵙⵙⴰⵏ ⵏⵡⴻⵎ

ⵉ ⵡⴰⵔ ⵜᵉⵜⵜⵉⵇⵇⵉⵎ ⵡⴰⵅⵅⴰ ⵉⵄⴰⵡⴻⴷ ⴰⵡⴻⵎ ⵜⵜ ⵛⴰ ⵏ ⵉⵊⵊⴻⵏ.’ ” ^■  

42 ⵍⴰⵎⵉ ⵥⵥⴰⵢⵙⴻⵏ ⴷⴷ-ⴼⴼⵖⴻⵏ, ⵜⵜⴰⵔⴻⵏ ⵥⵥⴰⵢⵙⴻⵏ ⵃⵉⵎⴰ ⴰⴷ ⴽⵉⵙⴻⵏ ⵙⵙⵉⵡⵍⴻⵏ ⵙ ⵡⴰⵡⴰⵍⴻⵏ ⴷ ⵉⵊⵊⴻⵏ ⴷⴻⴳ ⵉⵊⵊ ⵏ ⵡⴰⵙⵙ ⵏⵏⴻⵖⵏⵉ. 43 ⵍⴰⵎⵉ ⵉⵎⵙⴻⴱⴹⴰ ⵓⵎⵓⵏⵉ ⵏ ⵜⴻⵎⵥⵉⴷⴰ, ⴰⵟⵟⴰⵙ ⵏ ⵡⵓⴷⴰⵢⴻⵏ ⴷ ⵡⴰⵟⵟⴰⵙ ⵏ ⵉⵎⵄⴰⵛⴰⵔⴻⵏ ⵏ ⵡⵓⴷⴰⵢⴻⵏ ⵉⴷⵉⵢⴰⵏⵉⵢⵢⴻⵏ ⴹⴼⴰⵔⴻⵏ ⴱⵓⵍⵓⵙ ⴷ ⴱⴰⵔⵏⴰⴱⴰ. ⵏⵉⵜⵏⵉ ⵜⵓⵖⴰ ⴽⵉⵙⴻⵏ ⵙⵙⴰⵡⴰⵍⴻⵏ, ⵄⴻⵍⵎⴻⵏ ⴰⵙⴻⵏ ⵃⵉⵎⴰ ⴰⴷ ⵇⵇⵉⵎⴻⵏ ⴷⴻⴳ ⴰⵔⴹⴰ ⵏ ⴰⵔⴻⴱⴱⵉ. ^■  

44 ⴷⴻⴳ ⵡⴰⵙⵙ ⵏ ⵙⵙⴻⴱⵜ ⵉ ⴷⴷ-ⵢⵓⵙⵉⵏ ⵜⵓⵙⴰ-ⴷⴷ ⵜⴻⵏⴷⵉⵏⵜ ⵄⵍⴰⵃⴰⵍ ⵎⴰⵔⵔⴰ ⵃⵉⵎⴰ ⴰⴷ ⵜⵙⴻⵍ ⵉ ⵡⴰⵡⴰⵍ ⵏ ⴰⵔⴻⴱⴱⵉ. 45 ⴰⵍⴰⵎⵉ ⵥⵔⵉⵏ ⵡⵓⴷⴰⵢⴻⵏ ⴰⴱⴰⵔⵔⵓ ⵏ ⵍⵖⴰⵛⵉ, ⴷⴻⵡⵍⴻⵏ ⵄⴻⵎⵎⴰⵔⴻⵏ ⵙ ⵍⴻⵃⵙⴻⴷ, ⵄⴻⴽⵙⴻⵏ ⵎⵉⵏ ⵅⴻⴼ ⵉⵙⵙⵉⵡⴻⵍ ⴱⵓⵍⵓⵙ, ⵇⴰⵛⵃⴻⵏ ⵓ ⵛⴻⵇⵇⴼⴻⵏ ⴷⴰⵢⴻⵙ. 46 ⵎⴰⵛⴰ ⴱⵓⵍⵓⵙ ⴷ ⴱⴰⵔⵏⴰⴱⴰ ⵏⵏⴰⵏ ⵙ ⵜⴻⵔⵢⴰⵙⵜ: “ⵜⵓⵖⴰ ⵉⵜⵜⵍⵉⵇ ⴰⴷ ⴰⵡⴻⵎ ⵏⴻⵙⵙⵉⵡⴻⵍ ⴷ ⴰⵎⴻⵥⵡⴰⵔⵓ ⴰⵡⴰⵍ ⵏ ⴰⵔⴻⴱⴱⵉ, ⵎⴰⵛⴰ ⵓⵎⵉ ⵜ ⵜⵓⴳⵉⵎ, ⵓ ⵜⴻⴽⴽⵙⴻⵎ ⴰⵡⴰⵍ ⴷⵉⴹⴹ ⵉ ⵢⵉⵅⴻⴼ ⵏⵡⴻⵎ ⴱⴻⵍⵍⵉ ⵡⴰⵔ ⵜⴻⵙⴷⵉⵀⴻⴵⴻⵎ ⵜⵓⴷⴰⵔⵜ ⵉⵜⵜⴷⵓⵎⴰⵏ, ⵅⵥⴰⵔ, ⴰⵇⴰ ⵍⴻⵅⵅⵓ ⵏⴻⵛⵛⵉⵏ ⴰⴷ ⵏⵡⴻⵊⵊⴻⵀ ⵍⴻⴳⵏⵓⵙ. ^■   47 ⵎⵉⵏⵥⵉ ⴰⵎⵎⵓ ⴷ ⴰⵏⴻⵖ ⵉⵡⴻⵚⵚⴰ ⵙⵉⴷⵉⵜⵏⴻⵖ, ⵉⵇⵇⴰⵔ:

‘ⵏⴻⵛⵛ ⴰⵔⵔⵉⵖ ⵛⴻⴽ ⴷ ⵜⴰⴼⴰⵡⵜ ⵉ ⵍⴻⴳⵏⵓⵙ,

ⵃⵉⵎⴰ ⴰⴷ ⵜⵉⵍⵉⴷ ⵉ ⵜⵓⴷⴰⵔⵜ ⴰⵍ ⵟⵟⵔⵓⴼⴰ ⵏ ⴷⴷⵓⵏⴻⵛⵜ.’ ” ^■  

48 ⵓⵎⵉ ⵙⵍⵉⵏ ⵍⴻⴳⵏⵓⵙ ⵎⴰⵏ ⴰⵢⴰ, ⴼⴰⵔⵃⴻⵏ ⵙⵙⴻⵎⵖⴰⵔⴻⵏ ⴰⵡⴰⵍ ⵏ ⵙⵉⴷⵉ ⵓⵛⴰ ⵓⵎⵏⴻⵏ ⵎⴰⵔⵔⴰ ⵉⵏⵏⵉ ⵜⵓⵖⴰ ⵉⵜⵜⵡⴰⴼⴰⵔⵥⴻⵏ ⵉ ⵜⵓⴷⴰⵔⵜ ⵉⵜⵜⴷⵓⵎⴰⵏ. 49 ⵓⵛⴰ ⵉⴼⴼⴻⵖ ⴰⵡⴰⵍ ⵏ ⵙⵉⴷⵉ ⵖⴰⵔ ⵜⴻⵎⵎⵓⵔⵜ ⵏⵏⵉ ⵎⴰⵔⵔⴰ.

50 ⵎⴰⵛⴰ ⵓⴷⴰⵢⴻⵏ ⵙⵙⵃⴰⵔⵔⵛⴻⵏ ⵉⵎⵛⴻⵏⵏⵄⴻⵏ ⵏ ⵜⴻⵏⴷⵉⵏⵜ ⴷ ⵜⴻⵎⵖⴰⵔⵉⵏ ⵜⵉⵏⵏⵉ ⵖⴰⵔⵙⴻⵏⵜ ⵛⵛⴰⵏ ⵓ ⵄⴻⴱⴱⴷⴻⵏⵜ ⵉ ⴰⵔⴻⴱⴱⵉ, ⵓ ⴰⵎⵎⵓ ⵙⵙⴻⴽⴽⴰⵔⴻⵏ ⵏⵉⵜⵏⵉ ⵉⵛⵜ ⵏ ⵓⵎⴰⵔⵔⴻⵜ ⵅ ⴱⵓⵍⵓⵙ ⴷ ⴱⴰⵔⵏⴰⴱⴰ ⵓⵛⴰ ⵙⵙⵓⴼⴼⵖⴻⵏ ⵜⴻⵏ ⴱⴰⵔⵔⴰ ⵉ ⵜⴻⵎⵎⵓⵔⵜ ⵏⵙⴻⵏ. ^■   51 ⵎⴰⵛⴰ ⵏⵉⵜⵏⵉ ⵥⵥⴻⵔⵥⴻⵏ ⵜⴰⵄⴻⵊⵊⴰⵊⵜ ⵥⴻⴳ ⵉⴹⴰⵔⴻⵏ ⵏⵙⴻⵏ ⵅⴰⵙⴻⵏ ⵓⵛⴰ ⵉⵡⴹⴻⵏ ⵖⴰⵔ ⵜⴻⵏⴷⵉⵏⵜ ⵏ ⵉⴽⵓⵏⵉⵢⴰ 52 ⵉⵎⴻⵃⴹⴰⵔⴻⵏ ⴷⴻⵡⵍⴻⵏ ⵛⵛⵓⵔⴻⵏ ⵙ ⵍⴻⴼⵔⴰⵃⴻⵜ ⵏ ⴰⵔⵔⵓⵃ ⵉⵇⴻⴷⴷⵙⴻⵏ.