1 ⴷⴻⴳ ⵡⵓⵙⵙⴰⵏ ⵏⵏⵉ, ⵍⴰⵎⵉ ⵜⵓⵖⴰ ⴽⵜⴰⵔⴻⵏ ⵉⵎⴻⵃⴹⴰⵔⴻⵏ ⴰⵟⵟⴰⵙ, ⴰⵇⴰ ⵉⵎⴻⵃⴹⴰⵔⴻⵏ ⵉⵏⵏⵉ ⵖⴰⵔⵙⴻⵏ ⵍⵀⴰⵔⴷ ⵏ ⵉⵢⵓⵏⴰⵏⵉⵢⵢⴻⵏ ⵄⴻⴽⵙⴻⵏ ⵉⵄⵉⴱⵔⴰⵏⵉⵢⵢⴻⵏ ⵎⵉⵏⵥⵉ ⵜⵉⵊⵊⴰⵍ ⵏⵙⴻⵏ ⴼⴰⵔⵔⴹⴻⵏ ⴷⴰⵢⵙⴻⵏⵜ ⴷⵉ ⵜⵙⴻⵅⵅⴰⵔⵜ ⵏ ⵥⵥⴰⴷ ⵏ ⴽⵓⵍ ⴰⵙⵙ. 2 ⵙ ⵓⵢⴰ ⵍⴰⵖⴰⵏ ⵜⴻⵏⵄⴰⵛ ⵏ ⵔⵔⵓⵙⵓⵍ ⵅ ⵎⴰⵔⵔⴰ ⴰⴳⵔⴰⵡ ⵏ ⵉⵎⴻⵃⴹⴰⵔⴻⵏ ⵎⴰⵃⴻⵏⴷ ⴰⴷ ⵎⵓⵏⴻⵏ, ⵏⵏⴰⵏ ⴰⵙⴻⵏ: “ⵡⴰⵔ ⵉⵄⴻⴷⴷⴻⵍ ⴰⴷ ⵏⵙⴻⵅⵅⴰⵔ ⵟⵟⵡⴰⴱⴻⵍ ⵉ ⵎⴰⵛⵛⴰ ⴰⵎ ⵏⴻⵜⵜⴻⵊⵊⴰ ⴷⴻⴳ ⵡⴰⵡⴰⵍ ⵏ ⴰⵔⴻⴱⴱⵉ. ^□  ■   3 ⴰⵔⵥⵓⵎ ⵅⴻⵏⵏⵉ, ⴰ ⴰⵢⵜⵎⴰ, ⵓ ⵅⴹⴰⵔⴻⵎ ⵙⴻⴱⵄⴰ ⵏ ⵢⴻⵔⵢⴰⵥⴻⵏ ⵥⵥⴰⵢⵡⴻⵎ ⵉⵏⵏⵉ ⵖⴰⵔ ⵜⴻⴵⴰ ⵛⵛⵀⴰⴷⴻⵜ ⵜⴻⵛⵏⴰ, ⵛⵛⵓⵔⴻⵏ ⵙ ⴰⵔⵔⵓⵃ ⵏ ⵙⵉⴷⵉ ⴷ ⵜⵉⵖⵉⵜ, ⵓⵛⴰ ⵏⴻⵛⵛⵉⵏ ⴰⴷ ⵜⴻⵏ ⵏⴽⴻⵍⵍⴻⴼ ⵅⴻⵏⵏⵉ ⵙ ⵜⵎⴻⵙⵍⴰⵛⵜ-ⴰ. ^■   4 ⵎⴰⵛⴰ ⵏⴻⵛⵛⵉⵏ ⴰⴷ ⵏⴻⵚⴱⴰⵔ ⴷⵉ ⵜⵥⴰⴵⵉⵜ ⵓ ⴷⵉ ⵜⵙⴻⵅⵅⴰⵔⵜ ⵏ ⵡⴰⵡⴰⵍ.” 5 ⵉⵄⵊⴻⴱ ⵡⴰⵡⴰⵍ-ⴰ ⵉ ⵎⴰⵔⵔⴰ ⵍⵖⴰⵛⵉ ⵓⵛⴰ ⵏⵉⵜⵏⵉ ⵉⵅⴹⴰⵔⴻⵏ ⵙⵜⵉⴼⴰⵏⵓⵙ, ⵉⵊⵊ ⵏ ⵡⴻⵔⵢⴰⵥ ⵉⵛⵛⵓⵔⴻⵏ ⵙ ⵍ’ⵉⵎⴰⵏ ⴷ ⴰⵔⵔⵓⵃ ⵉⵇⴻⴷⴷⵙⴻⵏ, ⵅⴻⵏⵏⵉ ⴼⵉⵍⵉⴱⴱⵓⵙ ⴷ ⴱⵔⵓⵅⵓⵔⵓⵙ ⴷ ⵏⵉⴽⴰⵏⵓⵔ ⴷ ⵜⵉⵎⵓⵏ ⴷ ⴱⴰⵔⵎⵉⵏⴰⵙ ⴷ ⵏⵉⴽⵓⵍⴰⵙ, ⵉⵊⵊ ⵏ ⵓⵎⵄⴰⵛⴰⵔ ⵏ ⵡⵓⴷⴰⵢⴻⵏ ⵥⵉ ⴰⵏⵜⵉⵢⵓⵅⵉⵢⴰ. ^■   6 ⵙⵙⴱⴻⴷⴷⴻⵏ ⵜⴻⵏ ⵇⵉⴱⴰⵞ ⵉ ⵔⵔⵓⵙⵓⵍ ⵓⵛⴰ ⴰⵡⴰⵔⵏⵉ ⵍⴰⵎⵉ ⵥⵥⵓⴵⴻⵏ, ⵙⵙⴰⵔⵙⴻⵏ ⵅⴰⵙⴻⵏ ⵉⴼⴰⵙⵙⴻⵏ ⵏⵙⴻⵏ. ^■  

7 ⵜⵓⵖⴰ ⴰⵡⴰⵍ ⵏ ⴰⵔⴻⴱⴱⵉ ⵉⴳⴳⴰⵎ ⴷ ⵍⵇⴻⴷⴷ ⵏ ⵉⵎⴻⵃⴹⴰⵔⴻⵏ ⴷⵉ ⵓⵔⵛⴰⵍⵉⵎ ⵜⵓⵖⴰ ⵉⵎⴻⵇⵇⴰⵔ ⴰⵟⵟⴰⵙ. ⵉⵊⵊ ⵏ ⵓⴱⴰⵔⵔⵓ ⴷ ⴰⵎⴻⵇⵇⵔⴰⵏ ⵏ ⵡⵓⴷⴰⵢⴻⵏ ⵉⵟⴰⵄ ⵉ ⵍ’ⵉⵎⴰⵏ. ^■  

8 ⵙⵜⵉⴼⴰⵏⵓⵙ, ⵉⵛⵛⵓⵔ ⵙ ⴰⵔⴹⴰ ⴷ ⵊⵊⴻⵀⴷ, ⵜⵓⵖⴰ ⵉⵜⵜⴻⴳⴳ ⵍⴻⵄⵍⴰⵎⴰⵜ ⴷ ⵍⴻⵄⵊⴰⵢⴻⴱ ⵎⵖⴰⵔⴻⵏⵜ ⵊⴰⵔ ⵍⴳⴻⵏⵙ. 9 ⴽⴽⴰⵔⴻⵏ ⵎⴰⵛⴰ ⵢⴻⵔⵢⴰⵥⴻⵏ ⵥⵉ ⵜⴻⵎⵥⵉⴷⴰ ⵓⵎⵉ ⵇⵇⴰⵔⴻⵏ ‘ⵜⴰⵍⵉⴱⴻⵔⵜⵉⵏⵉⵜ’. ⴰⵇⴰ-ⵜⴻⵏ ⴷ ⵉⵡⴷⴰⵏ ⵥⵉ ⵇⴰⵢⵔⴰⵡⴰⵏ ⴷ ⵉⵙⴽⴰⵏⴷⴰⵔⵉⵢⵢⴰ, ⵓⵍⴰ ⵥⵉ ⴽⵉⵍⵉⴽⵉⵢⴰ ⴷ ⴰⵙⵉⵢⴰ, ⵜⵓⵖⴰ ⵜⵜⵇⴰⵛⴰⵃⴻⵏ ⵙⵜⵉⴼⴰⵏⵓⵙ.

10 ⵎⴰⵛⴰ ⵡⴰⵔ ⵥⴻⵎⵎⴰⵔⴻⵏ ⴰⴷ ⵄⴻⴽⵙⴻⵏ ⵜⵉⵖⵉⵜ ⴷ ⴰⵔⵔⵓⵃ ⵉ ⵥⵥⴰⵢⴻⵙ ⵜⵓⵖⴰ ⵉⵙⵙⴰⵡⴰⵍ. ^■  

11 ⵍⴻⵅⴷⴻⵏⵏⵉ ⵙⵙⴻⴽⴽⴻⵏ ⵉⵔⵢⴰⵥⴻⵏ, ⵄⴰⵔⵔⵏⴻⵏ ⵜⴻⵏ ⵎⴰⵃⴻⵏⴷ ⴰⴷ ⵉⵏⵉⵏ: “ⴰⵇⴰ ⵏⴻⵙⵍⴰ ⴰⵙⴻⵏ, ⵙⵙⴰⵡⴰⵍⴻⵏ ⵙ ⵡⴰⵡⴰⵍⴻⵏ ⵉⵛⴻⵇⵇⴼⴻⵏ ⴷⵉ ⵎⵓⵙⴰ ⵓ ⴷⵉ ⴰⵔⴻⴱⴱⵉ!” ^■  

12 ⴰⵇⴰ ⵙⵙⵖⴻⵡⵡⵖⴻⵏ ⵍⴳⴻⵏⵙ ⴷ ⵉⵎⵖⴰⵔⴻⵏ ⵏ ⵍⴳⴻⵏⵙ ⴷ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ ⵓⵛⴰ ⵓⵎⵉ ⵅⴰⵙ-ⴷⴷ ⴷⴷⵓⵇⵇⵥⴻⵏ, ⵟⵟⴼⴻⵏ ⵜ, ⵏⴻⴷⵀⴻⵏ ⵜ ⵖⴰⵔ ⵍⵎⴻⵃⴽⴰⵎⴰ ⵜⴰⵎⴻⵇⵇⵔⴰⵏⵜ.

13 ⴳⴳⵉⵏ ⵍⴻⵛⵀⵓⴷ ⵏ ⵥⵓⵔ, ⵉⵏⵏⵉ ⵉⵏⵏⴰⵏ: “ⴱⵏⴰⴷⴻⵎ-ⴰ ⵡⴰⵔ ⵉⵙⵙⴱⴻⴷⴷⵉ ⴰⴷ ⵉⵛⴻⵇⵇⴻⴼ ⴷⵉ ⵛⵛⴰⵔⵉⵄⴰ ⵓ ⴷⴻⴳ ⵡⴻⵎⵛⴰⵏ-ⴰ ⵉⵇⴻⴷⴷⵙⴻⵏ,

14 ⵎⵉⵏⵥⵉ ⵏⴻⵙⵍⴰ ⴰⵙ ⵉⵇⵇⴰⵔ ⴱⴻⵍⵍⵉ ⵢⴻⵛⵛⵓ ⵏⵏⴰⵚⵉⵔⵉ ⵡⴰⵏⵉⵜⴰ ⴰⴷ ⵢⴰⵔⴻⴷⴷⴻⴵ ⴰⵎⵛⴰⵏ-ⴰ, ⴰⴷ ⵉⴱⴻⴷⴷⴻⵍ ⵟⵟⴱⴰⵢⴻⵄ ⵉ ⴷ ⴰⵏⴻⵖ ⵉⵡⵛⴰ ⵎⵓⵙⴰ.”

15 ⵎⴰⵔⵔⴰ ⵉⵏⵏⵉ ⵜⵓⵖⴰ ⵖⴰⵔ ⵉⴵⴰ ⵍⴽⵓⵔⵙⵉ ⴷⵉ ⵍⵎⴻⵃⴽⴰⵎⴰ ⵜⴰⵎⴻⵇⵇⵔⴰⵏⵜ ⵏ ⵡⵓⴷⴰⵢⴻⵏ, ⵃⴻⴽⴽⴰⵔⴻⵏ ⴷⴰⵢⴻⵙ ⵓ ⵥⵔⵉⵏ ⴰⵖⴻⵎⴱⵓⴱ ⵏⵏⴻⵙ ⴰⵎⴻⵛⵏⴰⵡ ⴰⵖⴻⵎⴱⵓⴱ ⵏ ⵉⵊⵊ ⵏ ⵍⵎⴰⵍⴰⴽ.