1 ⴰⵡⴰⵔⵏⵉ ⵍⴰⵎⵉ ⵉⴽⴻⵎⵎⴻⵍ ⵎⴰⵔⵔⴰ ⴰⵡⴰⵍⴻⵏ ⵏⵏⴻⵙ ⴰⵎ ⴷ ⴰⵙ ⵙⵍⴰⵏ ⵉⵡⴷⴰⵏ, ⵢⵓⴷⴻⴼ ⵖⴰⵔ ⴽⴰⴼⴰⵔⵏⴰⵃⵓⵎ. 2 ⵎⴰⵛⴰ ⵉⵊⵊ ⵏ ⵓⵎⵙⴻⵅⵅⴰⵔ ⵏ ⵉⵊⵊ ⵏ ⵍⵇⴻⴱⵟⴰⵏ ⵅ ⵎⵢⴰ, ⵡⴻⵏⵏⵉ ⵜⵓⵖⴰ ⵉⵙⵙⵄⵉⵥⵥ ⴰⵟⵟⴰⵙ, ⵜⵓⵖⴰ ⵉⵀⵍⴻⵛ, ⵜⵓⵖⴰ ⵉⴳⴳⵓⵔ ⴰⴷ ⵉⵎⵎⴻⵜ. 3 ⵓⵎⵉ ⵉⵙⵍⴰ ⵅ ⵢⴻⵛⵛⵓ, ⵉⵙⵙⴻⴽⴽ ⵖⴰⵔⴻⵙ ⵛⴰ ⵏ ⵉⵎⵖⴰⵔⴻⵏ ⵏ ⵡⵓⴷⴰⵢⴻⵏ, ⵉⵜⵜⴰⵔ ⴰⵙ ⵎⴰⵃⴻⵏⴷ ⴰⴷ ⴷⴷ-ⵢⴰⵙ ⵓⵛⴰ ⴰⴷ ⵉⵙⵙⴻⵏⵊⴻⵎ ⴰⵎⵙⴻⵅⵅⴰⵔ ⵏⵏⴻⵙ. 4 ⵍⴰⵎⵉ ⴷⴷ-ⵉⵡⴹⴻⵏ ⵖⴰⵔ ⵢⴻⵛⵛⵓ, ⵃⴻⵛⵛⵎⴻⵏ ⵜ ⴰⵟⵟⴰⵙ, ⵏⵏⴰⵏ: “ⴰⵇⴰ ⵉⵙⴷⴰⵀⴻⴵ ⴰⴷ ⴰⵙ ⵜⴻⴳⴳⴻⴷ ⴰⵢⴰ, 5 ⵎⵉⵏⵥⵉ ⵏⴻⵜⵜⴰ ⵉⵜⵜⴻⵅⵙ ⵍⴳⴻⵏⵙ ⵏⵏⴻⵖ ⵓ ⵉⴱⵏⴰ ⴰⵏⴻⵖ ⵜⴰⵎⵥⵉⴷⴰ.”

6 ⵅⴰⵙ ⵓⵛⴰ ⵉⵔⵓⵃ ⵢⴻⵛⵛⵓ ⴰⴽⵉⴷⵙⴻⵏ. ⴰⵍⴰⵎⵉ ⵜⵓⵖⴰ ⵡⴰⵔ ⵉⴳⴳⵯⵉⵊ ⵄⴰⴷ ⵅ ⵜⴰⴷⴷⴰⵔⵜ, ⵉⵙⵙⴻⴽⴽ ⵍⵇⴻⴱⵟⴰⵏ ⵅ ⵎⵢⴰ ⵛⴰ ⵏ ⵉⵎⴻⴷⴷⵓⴽⴽⴰⵍ ⵖⴰⵔⴻⵙ, ⵏⵏⴰⵏ ⴰⵙ: “ⴰ ⵙⵉⴷⵉ, ⵡⴰⵔ ⵙⵙⵉⵃⵉⵍ ⵉⵅⴻⴼ ⵏⵏⴻⴽ, ⵎⵉⵏⵥⵉ ⵏⴻⵛⵛ ⵡⴰⵔ ⵙⴷⵉⵀⴻⴵⴻⵖ ⴰⴷ ⵜⴰⴷⴼⴻⴷ ⵙⴰⴷⵓ ⵜⴰⵥⴻⵇⵇⴰ ⵉⵏⵓ. 7 ⵙ ⵓⵢⴻⵏⵏⵉ ⵏⴻⵛⵛ ⵡⴰⵔ ⵃⴻⵙⴱⴻⵖ ⵉⵅⴻⴼ ⵉⵏⵓ ⵙⴷⴰⵀⴻⴵⴻⵖ ⵃⵉⵎⴰ ⴰⴷ ⵖⴰⵔⴻⴽ ⴷⴷ-ⴰⵙⴻⵖ, ⵎⴰⵛⴰ ⵉⵏⵉ ⴰⵡⴰⵍ ⵡⴰⵀⴰ ⵓⵛⴰ ⴰⴷ ⵉⴳⴳⴻⵏⴼⴰ ⵓⵎⵙⴻⵅⵅⴰⵔ ⵉⵏⵓ. 8 ⵎⵉⵏⵥⵉ ⵓⵍⴰ ⴷ ⵏⴻⵛⵛ ⵄⴰⵡⴻⴷ ⴷ ⵉⵊⵊ ⵏ ⴱⵏⴰⴷⴻⵎ ⵙⴰⴷⵓ ⵉⴼⴰⵙⵙⴻⵏ ⵉ ⴵⵉⵖ ⵓ ⵖⴰⵔⵉ ⵉⵄⴻⵙⴽⴰⵔⵉⵢⵢⴻⵏ ⵙⵡⴰⴷⴷⴰⵢ ⵉ ⵓⴼⵓⵙ ⵉⵏⵓ. ⵇⵇⴰⵔⴻⵖ ⵉ ⵡⴰ: ‘ⵔⵓⵃ!’, ⵅⴻⵏⵏⵉ ⵉⵜⵜⵔⴰⵃ, ⵉ ⵡⴻⵏⵏⴻⵖⵏⵉ: ‘ⴰⵙ-ⴷⴷ!’, ⵅⴻⵏⵏⵉ ⵉⵜⵜⴰⵙ-ⴷⴷ ⵓⵛⴰ ⵉ ⵓⵎⵙⴻⵅⵅⴰⵔ ⵉⵏⵓ: ‘ⴻⴳⴳ ⴰⵢⴰ!’, ⵅⴻⵏⵏⵉ ⵉⵜⵜⴻⴳⴳ ⵉ-ⵜ.”

9 ⵓⵎⵉ ⵉⵙⵍⴰ ⵢⴻⵛⵛⵓ ⴰⵢⴰ, ⵉⵜⵜⴻⴱⵀⴻⵜ ⴷⴰⵢⴻⵙ. ⵉⵏⵏⴻⵇⵍⴻⴱ ⵓⵛⴰ ⵉⵏⵏⴰ ⵉ ⵍⵖⴰⵛⵉ ⵡⴻⵏⵏⵉ ⵜⵓⵖⴰ ⵉ-ⵜ-ⵉ-ⴷⴷ-ⵉⴹⴻⴼⴼⴰⵔⴻⵏ: “ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ, ⵡⴰⵔ ⵓⴼⵉⵖ ⵓⵍⴰ ⴷⵉ ⵎⴰⵔⵔⴰ ⵉⵙⵔⴰⵉⵍ ⵍ’ⵉⵎⴰⵏ ⴰⵎⴻⵇⵇⵔⴰⵏ ⴰⵎⴻⵛⵏⴰⵡ ⵍⵇⴻⴷⴷ ⵏ ⵡⴰ.”

10 ⴰⵍⴰⵎⵉ ⵄⴻⵇⴱⴻⵏ ⵉⵏⵏⵉ ⵉⵜⵜⵡⴰⵙⵙⴻⴽⴽⴻⵏ ⵖⴰⵔ ⵜⴰⴷⴷⴰⵔⵜ, ⵓⴼⵉⵏ ⴰⵎⵙⴻⵅⵅⴰⵔ ⴰⵎⴻⵀⵍⵓⵛ ⵉⴳⴳⴻⵏⴼⴰ.

11 ⵜⵉⵡⴻⵛⵛⴰ ⵏⵏⴻⵙ ⵉⵔⵓⵃ ⵖⴰⵔ ⵉⵛⵜ ⵏ ⵜⴻⵏⴷⵉⵏⵜ ⵇⵇⴰⵔⴻⵏ ⴰⵙ ⵏⴰⵢⵉⵏ. ⵜⵓⵖⴰ ⴷⵉⵏ ⴰⴽⵉⴷⴻⵙ ⵉⵎⴻⵃⴹⴰⵔⴻⵏ ⵏⵏⴻⵙ ⴷ ⵉⵊⵊ ⵏ ⵍⵖⴰⵛⵉ ⴷ ⴰⵎⴻⵇⵇⵔⴰⵏ.

12 ⴰⵍⴰⵎⵉ ⴷⴷ-ⵉⵇⴰⵔⵔⴻⴱ ⵖⴰⵔ ⵜⴻⵡⵡⴰⵔⵜ ⵏ ⵜⴻⵏⴷⵉⵏⵜ, ⵅⵥⴰⵔ, ⴽⵙⵉⵏ-ⴷⴷ ⵉⵊⵊ ⵏ ⵓⵎⴻⵜⵜⵉⵏ ⵅ ⵍⵎⴻⵃⵎⴻⵍ ⵖⴰⵔ ⴱⴰⵔⵔⴰ. ⵏⴻⵜⵜⴰ ⴷ ⴰⵢⴻⵏⵏⵉ ⵏ ⵡⴻⵏⵏⵉ ⵉ ⵜⵓⵖⴰ ⵖⴰⵔ ⵢⴻⵎⵎⴰⵙ. ⵢⴻⵎⵎⴰⵙ ⵜⵓⵖⴰ-ⵜⵜ ⴷ ⵜⴰⵊⵊⴰⵞ ⵓ ⵜⵓⵖⴰ ⴰⴽⵉⴷⴻⵙ ⴰⵟⵟⴰⵙ ⵏ ⵍⵖⴰⵛⵉ ⵥⵉ ⵜⴻⵏⴷⵉⵏⵜ.

13 ⵓⵎⵉ ⵜⵜ ⵉⵥⵔⴰ ⵢⴻⵛⵛⵓ ⵜⴻⵥⵥⵉⴵⴻⵥ ⴰⵙ ⵓⵛⴰ ⵉⵏⵏⴰ ⴰⵙ: “ⵡⴰⵔ ⵜⵜⵔⵓ!”

14 ⵅⴻⵏⵏⵉ ⵉⵇⴰⵔⵔⴻⴱ-ⴷⴷ, ⵉⵃⴰⴷⴰ ⵍⵎⴻⵃⵎⴻⵍ ⵓⵛⴰ ⴱⴻⴷⴷⴻⵏ ⵢⵉⵏⵏⵉ ⵜ ⵢⴰⵔⴱⵓⵏ, ⵉⵏⵏⴰ: “ⴰ ⴰⴱⵍⵉⵖ, ⵉ ⵛⴻⴽ ⵓⵎⵉ ⵖⴰ ⵉⵏⵉⵖ, ⴽⴽⴰⵔ-ⴷⴷ!” ^■  

15 ⵉⵇⵇⵉⵎ ⵓⵎⴻⵜⵜⵉⵏ, ⵉⴱⴷⴰ ⵉⵙⵙⴰⵡⴰⵍ, ⵅⴻⵏⵏⵉ ⵢⴰⵔⵔⴰ ⴰⵙ ⵜ-ⵉ-ⴷⴷ ⵉ ⵢⴻⵎⵎⴰⵙ.

16 ⵜⵓⴷⴻⴼ ⵜⵉⴳⴳⵯⵓⴷⵉ ⴷⵉ ⵎⴰⵔⵔⴰ ⵓⵛⴰ ⵙⵙⴻⵎⵖⴰⵔⴻⵏ ⴰⵔⴻⴱⴱⵉ, ⵏⵏⴰⵏ: “ⴰⵇⴰ ⵉⴽⴽⴰⵔ-ⴷⴷ ⴷⴰⵢⵏⴻⵖ ⵓⵏⴰⴱⵉ ⵉⵎⵖⴰⵔ!” ⵓⵛⴰ: “ⴰⵇⴰ ⵉⵙⵙⵉⵊⵊ-ⴷⴷ ⴰⵔⴻⴱⴱⵉ ⵅ ⵍⴳⴻⵏⵙ ⵏⵏⴻⵙ.” ^■  

17 ⵉⴼⴼⴻⵖ ⵍⴻⵅⴱⴰⵔ-ⴰ ⵅⴰⵙ ⵖⴰⵔ ⵎⴰⵔⵔⴰ ⵢⴰⵀⵓⴷⵉⵢⵢⴰ ⴷ ⵍⴻⴷⵛⵓⵔ ⵉ ⴷ ⴰⵙ ⴷⴷ-ⵉⵏⵏⴹⴻⵏ.

18 ⵉⵎⴻⵃⴹⴰⵔⴻⵏ ⵏ ⵢⵓⵃⴰⵏⵏⴰ ⵄⴰⵡⴷⴻⵏ ⴰⵙ ⵎⴰⵏ ⴰⵢⴰ ⵎⴰⵔⵔⴰ. ^■  

19 ⵉⵍⴰⵖⴰ ⵢⵓⵃⴰⵏⵏⴰ ⵉ ⵜⵏⴰⵢⴻⵏ ⵥⴻⴳ ⵉⵎⴻⵃⴹⴰⵔⴻⵏ ⵏⵏⴻⵙ ⵓⵛⴰ ⵉⵙⵙⴻⴽⴽ ⵉ-ⵜⴻⵏ ⵖⴰⵔ ⵢⴻⵛⵛⵓ, ⵉⵇⵇⴰⵔ ⵙ ⵓⵇⴻⵎⵎⵓⵎ ⵏⵙⴻⵏ: “ⵎⴰ ⴷ ⵛⴻⴽ ⴷ ⵡⴻⵏⵏⵉ ⴷⴷ ⵖⴰ ⵢⴰⵙⴻⵏ ⵏⵉⵖ ⴰⴷ ⵏⵔⴰⵊⴰ ⵡⴻⵏⵏⴻⵖⵏⵉ?” 20 ⵓⵎⵉ ⵖⴰⵔⴻⵙ ⵔⵓⵃⴻⵏ ⵢⴻⵔⵢⴰⵥⴻⵏ, ⵏⵏⴰⵏ ⴰⵙ: “ⵢⵓⵃⴰⵏⵏⴰ ⴰⵎⵙⴻⵖⴹⴰⵚ ⴰⵇⴰ ⵉⵙⵙⴻⴽⴽ ⴰⵏⴻⵖ-ⴷⴷ ⵖⴰⵔⴻⴽ, ⵉⵏⵏⴰ: ‘ⵎⴰ ⴷ ⵛⴻⴽ ⴷ ⵡⴻⵏⵏⵉ ⵉ ⴷⴷ ⵖⴰ ⵢⴰⵙⴻⵏ ⵏⵉⵖ ⴰⴷ ⵏⵔⴰⵊⴰ ⵡⴻⵏⵏⴻⵖⵏⵉ?’ ”

21 ⴷⵉ ⵜⵙⴰⵄⵄⴻⵜ ⵏⵏⵉ ⵜⵓⵖⴰ ⵉⵙⵙⴳⴻⵏⴼⴰ ⴰⵟⵟⴰⵙ ⵏ ⵉⵡⴷⴰⵏ ⵥⵉ ⵍⴻⵀⵍⴰⵛⴰⵜ ⴷ ⵓⵡⴻⴷⴷⴻⴱ ⵏⵙⴻⵏ ⵓ ⵥⵉ ⵍⴰⵔⵢⴰⵃ ⵉⵎⴻⵏⴳⴰⵙ, ⵓⵛⴰ ⵢⴰⵔⵔⴰ ⴰⵟⵟⴰⵙ ⵏ ⵉⴷⴰⵔⵖⴰⵍⴻⵏ ⵜⵜⵡⴰⵍⴰⵏ. 22 ⵢⴰⵔⵔⴰ-ⴷⴷ ⵢⴻⵛⵛⵓ, ⵉⵏⵏⴰ ⴰⵙⴻⵏ: “ⵔⵓⵃⴻⵎ, ⵄⴰⵡⴷⴻⵎ ⵉ ⵢⵓⵃⴰⵏⵏⴰ ⵎⵉⵏ ⵜⴻⵥⵔⵉⵎ ⴷ ⵎⵉⵏ ⵜⴻⵙⵍⵉⵎ. ⴰⵇⴰ ⵉⴷⴰⵔⵖⴰⵍⴻⵏ ⵜⵜⵡⴰⵍⴰⵏ ⵓ ⵉⵏⴻⵄⴹⴰⴱⴻⵏ ⴳⴳⵓⵔⴻⵏ ⵓ ⵢⴻⵏⵏⵉ ⴷⵉ ⵉⴵⴰ ⵍⴱⴰⵔⵚ ⵜⵜⵡⴰⵙⵉⵥⴷⴻⴳⴻⵏ ⵓ ⵉⴷⴻⵀⵛⴰⵔ ⵜⵜⴻⵙⵍⴰⵏ ⵓ ⵉⵎⴻⵜⵜⵉⵏⴻⵏ ⵜⵜⴻⴽⴽⴰⵔⴻⵏ ⵓⵛⴰ ⵉⵜⵜᵉⵜⵜⵡⴰⴱⴰⵔⵔⴻⵃ ⵙ ⵍⴻⵅⴱⴰⵔ ⴰⵚⴻⴱⵃⴰⵏ ⵉ ⵉⵎⴻⵥⵍⴰⴹ. ^■   23 ⵙⵙⴻⵄⴷ ⵏ ⵡⴻⵏⵏⵉ ⵡⴰⵔ ⴷ ⴰⵢⵉ ⵉⵏⴷⴻⵔⴼⴻⵏ.”

24 ⵓⵎⵉ ⴼⴼⵖⴻⵏ ⵉⵎⴻⵃⴹⴰⵔⴻⵏ ⵏ ⵢⵓⵃⴰⵏⵏⴰ, ⵉⴱⴷⴰ ⵉⵇⵇⴰⵔ ⵉ ⵍⵖⴰⵛⵉ ⵅ ⵢⵓⵃⴰⵏⵏⴰ: “ⵎⵉⵏ ⵖⴰⵔ ⵉ ⵖⴰ ⴷⴷ-ⵜⴻⴼⴼⵖⴻⵎ ⵖⴰⵔ ⵍⴻⵅⵍⴰ ⴰⴷ ⵜⵥⴰⵔⴻⵎ? ⵎⴰ ⵉⵊⵊ ⵏ ⵓⵖⴰⵏⵉⵎ ⵉⵙⵙⴻⵏⵀⴻⵥⵥⴰ ⵜ ⵓⵙⴻⵎⵎⵉⴹ? ^■   25 ⵎⴰⵍⴰ ⵍⵍⴰ, ⵎⵉⵏ ⵖⴰⵔ ⵜⵓⵖⴰ ⴷⴷ-ⵜⴻⴼⴼⵖⴻⵎ ⴰⴷ ⵜⵥⴰⵔⴻⵎ? ⵎⴰ ⵉⵊⵊ ⵏ ⴱⵏⴰⴷⴻⵎ ⵢⴰⵔⴹ ⴰⵔⵔⵓⴹ ⵢⴰⵔⴹⴻⴱ? ⵅⵥⴰⵔ ⵉⵏⵏⵉ ⵢⴰⵔⴹⴻⵏ ⴰⵔⵔⵓⴹ ⵉⵖⵍⴰⵏ ⵓ ⴷⴷⴰⵔⴻⵏ ⴷⴻⴳ ⵓⴼⵓⵀⴰⵔⵜ, ⴰⵇⴰ ⴰⵜⴻⵏ ⴷⵉ ⵍⴻⵇⵚⵓⵔ ⵏ ⵉⵊⴻⴵⵉⴷⴻⵏ. 26 ⵅⴻⵏⵏⵉ ⵎⵉⵏ ⵖⴰⵔ ⵜⵓⵖⴰ ⴷⴷ-ⵜⴻⴼⴼⵖⴻⵎ ⴰⴷ ⵜⵥⴰⵔⴻⵎ? ⵎⴰ ⵉⵊⵊ ⵏ ⵓⵏⴰⴱⵉ? ⵡⴰⵀ, ⴰⴷ ⴰⵡⴻⵎ ⵉⵏⵉⵖ ⴷ ⴰⵎⴻⵇⵇⵔⴰⵏ ⴽⵜⴰⵔ ⵥⴻⴳ ⵓⵏⴰⴱⵉ. 27 ⴰⵇⴰ ⴷ ⵡⴰ ⵉ ⵅⴻⴼ ⵉⵜⵜⵡⴰⵔⵉ: ‘ⴰⵇⴰ ⵏⴻⵛⵛ ⴰⴷ ⵙⵙⴻⴽⴽⴻⵖ ⴰⵔⴻⵇⵇⴰⵙ ⵉⵏⵓ ⵥⵥⴰⵜ ⵉ ⵓⵖⴻⵎⴱⵓⴱ ⵏⵏⴻⴽ, ⵡⴻⵏⵏⵉ ⵉ ⵖⴰ ⵉⵙⵙⵡⴻⵊⴷⴻⵏ ⴰⴱⵔⵉⴷ ⵏⵏⴻⴽ ⵖⴰⵔ ⵥⵥⴰⵜ ⵏⵏⴻⴽ.’ ^■   28 ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ, ⵊⴰⵔ ⵉⵏⵏⵉ ⴷⴷ-ⵉⵜⵜⵡⴰⵅⴻⵍⵇⴻⵏ ⵥⵉ ⵜⴻⵎⵖⴰⵔⵉⵏ ⵓⵍⴰ ⴷ ⵉⵊⵊ ⵡⴰⵔ ⵉⴵⵉ ⴷ ⴰⵏⴰⴱⵉ ⴰⵎⴻⵇⵇⵔⴰⵏ ⵅ ⵢⵓⵃⴰⵏⵏⴰ ⴰⵎⵙⴻⵖⴹⴰⵚ, ⵎⴰⵛⴰ ⵡⴰⵅⵅⴰ ⴰⵎⴻⵏⵏⵉ ⴷ ⴰⵎⴻⵥⵢⴰⵏ ⵇⴰⵄ ⴷⵉ ⵜⴳⴻⵍⴷⵉⵜ ⵏ ⴰⵔⴻⴱⴱⵉ ⵉⵎⵖⴰⵔ ⵅⴰⵙ.” 29 ⵎⴰⵔⵔⴰ ⵉⵡⴷⴰⵏ ⵏⵏⵉ ⴷ ⴰⵙ ⵉⵙⵍⵉⵏ, ⵓⵍⴰ ⴷ ⴰⵢⵜ ⵏ ⴹⴹⴰⵔⵉⴱⴰ ⵛⴻⵀⴷⴻⵏ ⵉ ⵜⵙⴻⴳⴷⴰ ⵏ ⴰⵔⴻⴱⴱⵉ, ⵎⵉⵏⵥⵉ ⵏⵉⵜⵏⵉ ⵜⵜⵡⴰⵙⵖⴻⴹⵚⴻⵏ ⵙ ⵓⵙⴻⵖⴹⴻⵚ ⵏ ⵢⵓⵃⴰⵏⵏⴰ. 30 ⵎⴰⵛⴰ ⵉⴼⴰⵔⵉⵙⵉⵢⵢⴻⵏ ⴷ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ ⵓⴳⵉⵏ ⵅ ⵛⵛⵡⴰⵔ ⵏ ⴰⵔⴻⴱⴱⵉ ⴷⵉ ⴷⴰⵅⴻⵍ ⵏⵙⴻⵏ, ⵎⵉⵏⵥⵉ ⵓⴳⵉⵏ ⴰⴷ ⵥⵥⴰⵢⴻⵙ ⵜⵜⵡⴰⵙⵖⴻⴹⵚⴻⵏ.

31 ⵉⵏⵏⴰ ⵏⴻⵜⵜⴰ: “ⵎⵉⵏ ⵥⵉ ⵖⴰ ⵛⴻⴱⴱⵀⴻⵖ ⵉⵡⴷⴰⵏ ⵏ ⵊⵊⵉⵍ-ⴰ? ⵡⵉ ⴷⵉ ⵢⴰⵔⵡⴻⵙⴻⵏ? ^■  

32 ⵏⵉⵜⵏⵉ ⴰⵎⴻⵛⵏⴰⵡ ⵉⵃⴻⵏⵊⵉⵔⴻⵏ ⵉ ⵉⵇⵇⵉⵎⴻⵏ ⴷⵉ ⵙⵙⵓⵇ, ⵜⵜⵍⴰⵖⴰⵏ ⵉⵊⵊⴻⵏ ⵡⴻⵏⵏⴻⵖⵏⵉ, ⵇⵇⴰⵔⴻⵏ: ‘ⵏⴻⵛⵛⵉⵏ ⵏⴻⵡⵜⴰ ⴰⵡⴻⵎ ⴷⵉ ⵜⴻⵎⵊⴰ, ⴽⴻⵏⵏⵉⵡ ⵡⴰⵔ ⵜⴻⵛⴹⵉⵃⴻⵎ, ⵓ ⵏⴻⵛⵛⵉⵏ ⵏⵖⴻⵏⵏⴻⵊ ⵉⵊⵊ ⵏ ⵡⴻⵥⵔⵉ ⵏ ⵡⴻⵛⴹⴰⵏ ⵉ ⴽⴻⵏⵏⵉⵡ, ⵎⴰⵛⴰ ⴽⴻⵏⵏⵉⵡ ⵡⴰⵔ ⵜⵔⵓⵎ ⵛⴰ.’ 33 ⵎⵉⵏⵥⵉ ⵢⵓⵙⴰ-ⴷⴷ ⵢⵓⵃⴰⵏⵏⴰ ⴰⵎⵙⴻⵖⴹⴰⵚ, ⵡⴰⵔ ⵉⵜⵜⴻⵜⵜ ⴰⵖⵔⵓⵎ, ⵡⴰⵔ ⵉⵙⴻⵙⵙ ⴱⵉⵏⵓ ⵓⵛⴰ ⵜⴻⵏⵏⴰⵎ: ‘ⴰⵇⴰ ⴷⴰⵢⴻⵙ ⵛⵛⵉⵟⴰⵏ!’ ^■   34 ⵢⵓⵙⴰ-ⴷⴷ ⵎⵎⵉⵙ ⵏ ⴱⵏⴰⴷⴻⵎ ⵉⵜⵜⴻⵜⵜ, ⵉⵙⴻⵙⵙ, ⵜⴻⵇⵇⴰⵔⴻⵎ: ‘ⵅⵥⴰⵔ, ⴱⵏⴰⴷⴻⵎ-ⴰ ⵉⵍⵀⴻⴼ ⵅ ⵎⴰⵛⵛⴰ ⴷ ⴱⵉⵏⵓ, ⴰⵇⴰ-ⵜ ⴷ ⴰⵎⴻⴷⴷⵓⴽⴽⴻⵍ ⵏ ⴰⵢⵜ ⵏ ⴹⴹⴰⵔⵉⴱⴰ ⴷ ⵉⵎⴻⴷⵏⴰⴱ.’ 35 ⴰⵇⴰ ⵜⵉⵖⵉⵜ ⵜᵉⵜⵜⵡⴰⵙⴻⴳⴳⴻⴷ ⵥⵉ ⵎⴰⵔⵔⴰ ⵍⴻⵅⴷⴰⵢⴻⵎ ⵏⵏⴻⵙ.”

36 ⵉⵄⴰⵔⴹ ⵉ-ⵜ ⵉⵊⵊ ⵏ ⵓⴼⴰⵔⵉⵙⵉ ⵃⵉⵎⴰ ⴰⴷ ⴽⵉⵙ ⵉⵛⵛ. ⵢⵓⴷⴻⴼ ⵖⴰⵔ ⵜⴰⴷⴷⴰⵔⵜ ⵏ ⵓⴼⴰⵔⵉⵙⵉ ⵓⵛⴰ ⵉⵇⵇⵉⵎ ⵖⴰⵔ ⵟⵟⴰⴱⵍⴰ. ^■   37 ⵜⵓⵖⴰ ⵜⵥⴻⴷⴷⴻⵖ ⵉⵛⵜ ⵏ ⵜⴻⵎⵖⴰⵔⵜ ⵜⴰⵎⴻⴷⵏⵓⴱⵜ ⴷⵉ ⵜⴻⵏⴷⵉⵏⵜ ⵏⵏⵉ. ⵓⵎⵉ ⵜⴻⵙⵙⴻⵏ ⴰⵇⴰ ⵉⵇⵇⵉⵎ ⵖⴰⵔ ⵟⵟⴰⴱⵍⴰ ⴷⵉ ⵜⴰⴷⴷⴰⵔⵜ ⵏ ⵓⴼⴰⵔⵉⵙⵉ, ⵜⵓⵙⴰ-ⴷⴷ ⵙ ⵉⵛⵜ ⵏ ⵜⵥⵉⵢⵢⴰⵜ ⵏ ⴰⵍⴰⴱⴰⵙⵜⴻⵔ ⴷⴰⵢⴻⵙ ⵥⵥⴻⵛⵜ ⵉ ⵡⴻⴷⵀⴰⵏ, 38 ⵓⵛⴰ ⵓⵎⵉ ⴷⴷ-ⵜⴱⴻⴷⴷ ⵖⴰⵔ ⵉⴹⴰⵔⴻⵏ ⵏⵏⴻⵙ ⵖⴰⵔ ⴹⴻⴼⴼⴰⵔ ⵏⵏⴻⵙ, ⵜⵔⵓ ⵓⵛⴰ ⵜⴻⴱⴷⴰ ⵜⴻⵙⵙⵓⴼⴼⴰ ⵉⴹⴰⵔⴻⵏ ⵏⵏⴻⵙ ⵙ ⵉⵎⴻⵟⵟⴰⵡⴻⵏ ⵓⵛⴰ ⵜⴻⴱⴷⴰ ⵜⴻⵙⵙⴰⵥⴰⵖ ⵉ-ⵜⴻⵏ ⵙ ⵓⵛⵓⵡⵡⴰⴼ ⵏ ⵓⵥⴻⴵⵉⴼ ⵏⵏⴻⵙ, ⵜⴻⵙⵙⵓⴷⴻⵎ ⴰⵙ ⵉⴹⴰⵔⴻⵏ ⵓⵛⴰ ⵜⴻⵎⵙⴻⵃ ⵉ-ⵜⴻⵏ ⵙ ⵉⵛⵜ ⵏ ⵥⵥⴻⵛⵜ ⵏ ⵡⴻⴷⵀⴰⵏ. 39 ⵓⵎⵉ ⵉⵥⵔⴰ ⵓⴼⴰⵔⵉⵙⵉ ⵡⴻⵏⵏⵉ ⵉ-ⵜ-ⵉ-ⴷⴷ-ⵉⵄⴰⵔⴹⴻⵏ ⵎⴰⵏ ⴰⵢⴰ, ⵉⵅⴰⵔⵔⴻⵚ ⴷⴻⴳ ⵢⵉⵅⴻⴼ ⵏⵏⴻⴽ, ⵉⵏⵏⴰ: “ⵎⴰⵍⴰ ⵡⴰ ⴷ ⴰⵏⴰⴱⵉ ⵙ ⵜⵉⴷⴻⵜⵜ, ⵉⵍⵉ ⴰⵇⴰ ⵉⵙⵙⴻⵏ ⵎⵉⵏ ⵜⴻⵄⵏⴰ ⵜⴰⵏⵉⵜⴰ ⵓ ⵎⴰⵎⵎⴻⵛ ⵜᵉⵜⵜⵡⴰⵙⵙⴻⵏ ⵏⴻⵜⵜⴰⵜ, ⵎⵉⵏⵥⵉ ⵜⴻⵏⵏⵉ ⵜ ⵉⵃⴰⴷⴰⵏ, ⴰⵇⴰ-ⵜⵜ ⴷ ⵜⴰⵎⴻⴷⵏⵓⴱⵜ.”

40 ⵢⴰⵔⵔⴰ-ⴷⴷ ⵢⴻⵛⵛⵓ, ⵉⵏⵏⴰ ⴰⵙ: “ⴰ ⵛⵉⵎⵄⵓⵏ, ⵖⴰⵔⵉ ⵉⵛⵜ ⵏ ⵍⵃⴰⵊⵊⴻⵜ ⴰⴷ ⴰⵛ ⵜⵜ ⵉⵏⵉⵖ.” ⵉⵏⵏⴰ ⴰⵙ: “ⵉⵏⵉ ⵜⵜ, ⴰ ⴰⵎⵙⴻⵍⵎⴰⴷ ⵉⵏⵓ!” 41 ⵉⵏⵏⴰ ⴰⵙ ⵢⴻⵛⵛⵓ: “ⵉⵊⵊ ⵏ ⴱⴰⴱ ⵏ ⵓⵎⴰⵔⵡⴰⵙ ⵜⵓⵖⴰ ⵖⴰⵔⴻⵙ ⵜⵏⴰⵢⴻⵏ ⵜⵜⵓⵔⵙⴻⵏ ⴰⵙ. ⵉⵊⵊⴻⵏ ⵜⵓⵖⴰ ⵉⵜⵜⵓⵔⵙ ⴰⵙ ⵅⴻⵎⵙⴰ-ⵎⵢⴰ ⵏ ⴷⵉⵏⴰⵔ ⵓ ⵡⴻⵏⵏⴻⵖⵏⵉ ⵅⴻⵎⵙⵉⵏ. 42 ⴰⵎ ⵡⴰⵔ ⵜⵓⵖⵉ ⵖⴰⵔⵙⴻⵏ ⵎⵉⵏ ⵥⵉ ⵖⴰ ⴰⵔⵔⴻⵏ ⴰⵎⴰⵔⵡⴰⵙ, ⵉⵙⴰⵎⵃ ⴰⵙⴻⵏ ⴰⵎⴰⵔⵡⴰⵙ ⵙ ⵜⵏⴰⵢⴻⵏ ⵉⴷⵙⴻⵏ. ⵉⵏⵉ ⴰⵢⵉ, ⵡⵉ ⵥⵥⴰⵢⵙⴻⵏ ⵜ ⵖⴰ ⵉⵅⵙⴻⵏ ⴽⵜⴰⵔ?” 43 ⵢⴰⵔⵔⴰ-ⴷⴷ ⵛⵉⵎⵄⵓⵏ, ⵉⵏⵏⴰ ⴰⵙ: “ⵉⵜⵜⵖⵉⵍ ⴰⵢⵉ ⵡⴻⵏⵏⵉ ⵓⵎⵉ ⵉⵙⴰⵎⵃ ⴽⵜⴰⵔ.” ⵉⵏⵏⴰ ⴰⵙ: “ⵛⴻⴽ ⵜⵃⴻⴽⵎⴻⴷ ⵙ ⵚⵚⴰⵃ.” 44 ⵅⴰⵙ ⵓⵛⴰ ⵉⵏⵏⴻⵇⵍⴻⴱ ⵢⴻⵛⵛⵓ ⵖⴰⵔ ⵜⵎⴻⵟⵟⵓⵜ ⵏⵏⵉ, ⵉⵏⵏⴰ ⵉ ⵛⵉⵎⵄⵓⵏ: “ⵎⴰ ⵜᵉⵜⵜⵡⴰⵍⵉⴷ ⵜⴰⵎⵖⴰⵔⵜ-ⴰ? ⴰⵇⴰ ⵓⴷⴼⴻⵖ ⵖⴰⵔ ⵜⴰⴷⴷⴰⵔⵜ ⵏⵏⴻⴽ. ⴰⵎⴰⵏ ⵉ ⵉⴹⴰⵔⴻⵏ ⵉⵏⵓ ⵡⴰⵔ ⴷ ⴰⵢⵉ ⵜⴻⵏ ⵜⴻⵡⵛⵉⴷ. ⵎⴰⵛⴰ ⵏⴻⵜⵜⴰⵜ ⵜⴻⵙⵙⵉⵔⴷ ⵉⴹⴰⵔⴻⵏ ⵉⵏⵓ ⵙ ⵉⵎⴻⵟⵟⴰⵡⴻⵏ ⵏⵏⴻⵙ ⵓⵛⴰ ⵜⴻⵙⵙⵉⵥⴻⵖ ⵉ-ⵜⴻⵏ ⵙ ⵓⵛⵓⵡⵡⴰⴼ ⵏ ⵓⵥⴻⴵⵉⴼ ⵏⵏⴻⵙ. 45 ⵛⴻⴽ ⵡⴰⵔ ⴷ ⴰⵢⵉ ⵜⴻⵙⵙⵓⴷⵎⴻⴷ, ⵎⴰⵛⴰ ⵏⴻⵜⵜⴰⵜ, ⵥⴻⴳ ⵡⴰⵎⵉ ⴷⴷ-ⵓⴷⴼⴻⵖ, ⵡⴰⵔ ⵜⴱⴻⴷⴷ ⵥⴻⴳ ⵓⵙⵓⴷⴻⵎ ⵏ ⵉⴹⴰⵔⴻⵏ ⵉⵏⵓ. 46 ⵙ ⵥⵥⴻⵛⵜ ⵡⴰⵔ ⵜⴻⴷⵀⵉⵏⴻⴷ ⵛⴰ ⴰⵥⴻⴵⵉⴼ ⵉⵏⵓ, ⵎⴰⵛⴰ ⵏⴻⵜⵜⴰⵜ ⵜⴻⵎⵙⴻⵃ ⵉⴹⴰⵔⴻⵏ ⵉⵏⵓ ⵙ ⵥⵥⴻⵛⵜ ⵏ ⵡⴻⴷⵀⴰⵏ. 47 ⵙ ⵓⵢⴻⵏⵏⵉ ⴰⴷ ⴰⵛ ⵉⵏⵉⵖ: ⴰⵇⴰ ⵉⵜⵜⵡⴰⵖⴼⴰⵔ ⴰⵙ ⴰⵟⵟⴰⵙ ⵏ ⴷⴷⵏⵓⴱ ⵏⵏⴻⵙ, ⵎⵉⵏⵥⵉ ⵜⴻⵅⵙ ⴰⵟⵟⴰⵙ. ⵡⴻⵏⵏⵉ ⵓⵎⵉ ⵉⵜⵜⵡⴰⵖⴼⴰⵔ ⴷⵔⵓⵙ, ⴰⴷ ⵖⴰⵔⴻⵙ ⵢⵉⵍⵉ ⴷⵔⵓⵙ ⵏ ⵜⴰⵢⵔⵉ.” 48 ⵅⴻⵏⵏⵉ ⵉⵏⵏⴰ ⴰⵙ: “ⴰ ⵜⴰⵎⴻⵟⵟⵓⵜ, ⴰⵇⴰ ⵜⵜⵡⴰⵖⴼⴰⵔⴻⵏ ⴷⴷⵏⵓⴱ ⵏⵏⴻⵎ.” ^■  

49 ⵉⵏⵏⵉ ⴰⴽⵉⴷⴻⵙ ⵉⵇⵇⵉⵎⴻⵏ ⵖⴰⵔ ⵟⵟⴰⴱⵍⴰ ⴱⴷⴰⵏ ⵇⵇⴰⵔⴻⵏ ⴷⴻⴳ ⵉⵅⴻⴼ ⵏⵙⴻⵏ: “ⵎⵉⵏ ⵉⵄⵏⴰ ⵡⴰⵏⵉⵜⴰ ⵎⴰⵃⴻⵏⴷ ⴰⴷ ⵉⵖⴼⴰⵔ ⵓⵍⴰ ⵉ ⴷⴷⵏⵓⴱ.” ^■   50 ⵉⵏⵏⴰ ⴰⵙ ⵢⴻⵛⵛⵓ ⵉ ⵜⵎⴻⵟⵟⵓⵜ ⵏⵏⵉ: “ⵍⵉⵎⴰⵏ ⵏⵏⴻⵎ ⴰⵇⴰ ⵉⵡⵛⴰ ⴰⵎ ⵜⵓⴷⴰⵔⵜ. ⵔⵓⵃ ⴷⵉ ⵍⴻⵀⵏⴰ.”