1 ⵍⵃⵓⴽⵎ ⵉⵙⵙⴰⴳⴳⵯⴰⴷⴻⵏ ⵏ ⵙⵉⴷⵉ ⵅ ⵉⵙⵔⴰⵉⵍ.

ⵙⵉⴷⵉ ⵉⵙⵙⴰⵡⴰⵍ, ⵏⴻⵜⵜⴰ ⴷ ⵡⴻⵏⵏⵉ ⵉⵜⵜⴱⴻⵥⵥⴰⵄⴻⵏ ⴰⵊⴻⵏⵏⴰ ⵓ ⵉⵙⵙⵔⵓⵙⴰ ⴷⵙⴰⵙ ⵏ ⵜⴻⵎⵎⵓⵔⵜ ⵓ ⵉⵙⵙⴱⴻⴷⴷⴰ ⴰⵔⵔⵓⵃ ⵏ ⴱⵏⴰⴷⴻⵎ ⴷⵉ ⴷⴰⵅⴻⵍ ⵏⵏⴻⵙ:

2 “ⵅⵥⴰⵔⴻⵎ, ⵏⴻⵛⵛ ⴰⴷ ⴳⴳⴻⵖ ⵓⵔⵛⴰⵍⵉⵎ ⴷ ⵟⵟⴻⴱⵚⵉ ⵏ ⵓⴷⴻⵡⵡⴻⵅ ⵉ ⵎⴰⵔⵔⴰ ⵍⴻⴳⵏⵓⵙ ⵉ ⴷ ⴰⵙ ⴷⴷ-ⵉⵏⵏⴹⴻⵏ ⵓⵛⴰ ⴰⴷ ⴷⴷ-ⵢⴰⵙ ⵟⵟⴻⴱⵚⵉ ⵏⵏⵉ ⵓⵍⴰ ⵅ ⵢⴰⵀⵓⴷⴰ ⵖⴰⵔ ⵍⴻⵃⵚⴰⵔⴻⵜ ⵏ ⵓⵔⵛⴰⵍⵉⵎ.

3 ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵎⵙⴰⵔ ⴰⵇⴰ ⵏⴻⵛⵛ ⴰⴷ ⴰⵔⵔⴻⵖ ⵓⵔⵛⴰⵍⵉⵎ ⴷ ⵉⵊⵊ ⵏ ⵡⴻⵥⵔⵓ ⵉⴷⴻⵇⵍⴻⵏ ⵉ ⵎⴰⵔⵔⴰ ⵍⴻⴳⵏⵓⵙ. ⵎⴰⵔⵔⴰ ⵉⵏⵏⵉ ⵢⴰⵔⴻⵥⵥⵓⵏ ⴰⴷ ⵜ ⵙⵙⴳⴻⵄⵄⴷⴻⵏ, ⴰⴷ ⵙⵙⵢⴻⵥⵎⴻⵏ ⵉⵅⴻⴼ ⵏⵙⴻⵏ ⴰⵟⵟⴰⵙ ⵓ ⵎⴰⵔⵔⴰ ⵍⴻⴳⵏⵓⵙ ⵏ ⴷⴷⵓⵏⴻⵛⵜ ⴰⴷ ⵜⵜⵡⴰⵙⵎⵓⵏⴻⵏ ⴹⵉⴷⴷ ⵏⵏⴻⵙ.

4 ⴷⴻⴳ ⵡⴰⵙⵙ ⵏⵏⵉ, ⵉⵇⵇⴰⵔ ⵙⵉⴷⵉ, ⴰⴷ ⵡⵜⴻⵖ ⵎⴰⵔⵔⴰ ⵉⵢⵙⴰⵏ ⵙ ⴰⵔⵊⴻⴼ ⴷ ⵉⵎⵏⴰⵢⴻⵏ ⵏⵏⴻⵙ ⵙ ⵜⵓⴱⴱⵓⵀⴻⵍⵢⴰ, ⵎⴰⵛⴰ ⴰⴷ ⵇⵇⵉⵎⴻⵖ ⴰⵔⴻⵥⵥⵎⴻⵖ ⵜⵉⵟⵟⴰⵡⵉⵏ ⵉⵏⵓ ⵅ ⵜⴰⴷⴷⴰⵔⵜ ⵏ ⵢⴰⵀⵓⴷⴰ, ⵅⵎⵉ ⵉ ⵖⴰ ⵡⵜⴻⵖ ⵎⴰⵔⵔⴰ ⵉⵢⵙⴰⵏ ⵏ ⵍⴻⴳⵏⵓⵙ ⵙ ⵜⵓⴷⴷⴰⵔⵖⴻⵞ. 5 ⵉⵎⴳⴻⵡⵡⴰⴷⴻⵏ ⵏ ⵢⴰⵀⵓⴷⴰ ⴰⴷ ⵉⵏⵉⵏ ⴷⴻⴳ ⵡⵓⵍ ⵏⵙⴻⵏ: ‘ⵉⵎⴻⵥⴷⴰⵖ ⵏ ⵓⵔⵛⴰⵍⵉⵎ ⴰⴷ ⵉⵍⵉⵏ ⴷ ⵊⵊⴻⵀⴷ ⵉⵏⵓ ⵙ ⵓⴼⵓⵙ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⴰⵔⴻⴱⴱⵉ ⵏⵙⴻⵏ!’

6 ⴷⴻⴳ ⵡⴰⵙⵙ ⵏⵏⵉ ⴰⴷ ⴳⴳⴻⵖ ⵉⵎⴳⴻⵡⵡⴰⴷⴻⵏ ⵏ ⵢⴰⵀⵓⴷⴰ ⴰⵎ ⵉⵊⵊ ⵏ ⵍⵎⴻⵊⵎⴰⵔ ⵏ ⵜⵎⴻⵙⵙⵉ ⴷⵉ ⵜⴰⴼⴼⴰ ⵏ ⵓⴽⴻⵛⵛⵓⴹ ⵓ ⴰⵎ ⵉⵊⵊ ⵏ ⵡⴻⵚⴼⴻⴹ ⵊⴰⵔ ⵜⵉⵇⴻⴱⴱⵉⴹⵉⵏ ⵏ ⵉⵎⴻⵏⴷⵉ ⵓ ⵏⵉⵜⵏⵉ ⴰⴷ ⴼⴼⵥⴻⵏ ⵎⴰⵔⵔⴰ ⵍⴻⴳⵏⵓⵙ ⵉ ⴷ ⴰⵙⴻⵏ ⴷⴷ-ⵉⵏⵏⴹⴻⵏ, ⵖⴰⵔ ⵢⴻⴼⴼⵓⵙ ⵓ ⵖⴰⵔ ⵓⵥⴻⵍⵎⴰⴹ, ⵓⵛⴰ ⵓⵔⵛⴰⵍⵉⵎ ⴰⴷ ⵜⴻⵇⵇⵉⵎ ⵄⴰⴷ ⴷⴻⴳ ⵡⴻⵎⵛⴰⵏ ⵏⵏⴻⵙ, ⴷⵉ ⵓⵔⵛⴰⵍⵉⵎ. 7 ⵙⵉⴷⵉ ⴰⴷ ⵉⵙⵙⴻⵏⵊⴻⵎ ⴰⵎⴻⵥⵡⴰⵔ ⵉⵇⵉⴹⴰⵏ ⵏ ⵢⴰⵀⵓⴷⴰ ⵃⵉⵎⴰ ⵛⵛⴰⵏ ⵏ ⵜⴰⴷⴷⴰⵔⵜ ⵏ ⴷⴰⵡⵓⴷ ⴷ ⵛⵛⴰⵏ ⵏ ⵉⵎⴻⵥⴷⴰⵖ ⵏ ⵓⵔⵛⴰⵍⵉⵎ ⵡⴰⵔ ⵉⴷⴷⵉⴽⴽⵡⵉⵍ ⴷ ⴰⵎⴻⵇⵇⵔⴰⵏ ⴰⵟⵟⴰⵙ ⵇⵉⴱⴰⵞ ⵉ ⵢⴰⵀⵓⴷⴰ.

8 ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵙⵙⴷⵓⵍⵉ ⵙⵉⴷⵉ ⵉⵎⴻⵥⴷⴰⵖ ⵏ ⵓⵔⵛⴰⵍⵉⵎ ⵓ ⵡⴻⵏⵏⵉ ⵉ ⵖⴰ ⵉⵏⵏⵇⴰⵔⴹⴻⵏ ⵊⴰⵔ ⴰⵙⴻⵏ ⴰⴷ ⵢⵉⵍⵉ ⴷⴻⴳ ⵡⴰⵙⵙ ⵏⵏⵉ ⴰⵎ ⴷⴰⵡⵓⴷ, ⵓⵛⴰ ⵜⴰⴷⴷⴰⵔⵜ ⵏ ⴷⴰⵡⵓⴷ ⴰⴷ ⵜⵉⵍⵉ ⴰⵎ ⴰⵔⴻⴱⴱⵉ, ⴰⵎ ⵍⵎⴰⵍⴰⴽ ⵏ ⵙⵉⴷⵉ ⵥⵥⴰⵜ ⵉ ⵡⵓⴷⴻⵎ ⵏⵙⴻⵏ.

9 ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵎⵙⴰⵔ, ⴰⵇⴰ ⵏⴻⵛⵛ ⴰⴷ ⵔⴻⴽⴽⵥⴻⵖ ⴰⴷ ⵎⵃⵉⵖ ⵎⴰⵔⵔⴰ ⵍⴻⴳⵏⵓⵙ ⵉ ⴷⴷ ⵖⴰ ⵢⴰⵙⴻⵏ ⵉ ⵍⴻⵃⵚⴰⵔⴻⵜ ⵖⴰⵔ ⵓⵔⵛⴰⵍⵉⵎ.

10 ⵎⴰⵛⴰ ⴰⴷ ⴼⴰⵔⵔⵖⴻⵖ ⴰⵔⵔⵓⵃ ⵏ ⴰⵔⴹⴰ ⴷ ⵜⵥⴰⴵⵉⵜⵉⵏ ⵅ ⵜⴰⴷⴷⴰⵔⵜ ⵏ ⴷⴰⵡⵓⴷ ⵓ ⵅ ⵉⵎⴻⵥⴷⴰⵖ ⵏ ⵓⵔⵛⴰⵍⵉⵎ ⵓ ⵏⵉⵜⵏⵉ ⴰⴷ ⵖⴰⵔⵉ ⴷⴷ-ⵅⵥⴰⵔⴻⵏ ⵡⴻⵏⵏⵉ ⴷⵉ ⵙⵙⵏⵓⵇⵇⴱⴻⵏ, ⵓ ⵏⵉⵜⵏⵉ ⴰⴷ ⵅⴰⵙ ⵡⵜⴻⵏ ⴰⵢⴻⵊⴷⵓⵔ ⴰⵎ ⵡⵜⵉⵏ ⴰⴳⴻⵊⴷⵓⵔ ⵅ ⵓⵢⴻⵏⵏⵉ ⵏ ⵎⵎⵉⵙ ⵓ ⴰⴷ ⵅⴰⵙ ⵛⴻⴹⵏⴻⵏ ⵙ ⵜⴻⵔⵥⵓⴳⵉ ⴰⵎ ⵡⴻⵏⵏⵉ ⵉⵜⵜⴻⵛⴹⵉⵏⴻⵏ ⵅ ⵎⵎⵉⵙ ⴰⵎⴻⵏⵥⵓ. ^■  

11 ⴷⴻⴳ ⵡⴰⵙⵙ ⵏⵏⵉ ⴰⴷ ⵜⵉⵍⵉ ⵜⵖⵓⵢⵢⵉⵜ ⵏ ⵡⴻⵛⴹⴰⵏ ⵜⴻⵎⵖⴰⵔ ⴷⵉ ⵓⵔⵛⴰⵍⵉⵎ, ⴰⵎ ⵜⵖⵓⵢⵢⵉⵜ ⵏ ⵡⴻⵛⴹⴰⵏ ⵅ ⵀⴰⴷⴰⴷ-ⵔⵉⵎⵎⵓⵏ ⴷⵉ ⵜⴻⵖⵥⵓⵔⵜ ⵏ ⵎⴰⵊⵉⴷⴷⵓⵏ. ^■  

12 ⵜⴰⵎⵎⵓⵔⵜ ⴰⴷ ⵜⴻⵙⵖⵓⵢⵢ ⵥⴻⴳ ⵡⴻⵛⴹⴰⵏ, ⴽⵓⵍ ⵍⴰⴵ ⵡⴻⵃⵃⴷⴻⵙ.

ⵍⴰⴵ ⵏ ⵜⴰⴷⴷⴰⵔⵜ ⵏ ⴷⴰⵡⵓⴷ ⵡⴻⵃⵃⴷⴻⵙ ⴷ ⵜⴻⵎⵖⴰⵔⵉⵏ ⵏⵙⴻⵏ ⵡⴻⵃⵃⴻⴷⵙⴻⵏⵜ

ⵓ ⵍⴰⴵ ⵏ ⵜⴰⴷⴷⴰⵔⵜ ⵏ ⵏⴰⵜⴰⵏ ⵡⴻⵃⵃⴷⴻⵙ ⴷ ⵜⴻⵎⵖⴰⵔⵉⵏ ⵏⵙⴻⵏ ⵡⴻⵃⵃⴻⴷⵙⴻⵏⵜ.

13 ⵍⴰⴵ ⵏ ⵜⴰⴷⴷⴰⵔⵜ ⵏ ⵍⴰⵡⵉ ⵡⴻⵃⵃⴷⴻⵙ ⴷ ⵜⴻⵎⵖⴰⵔⵉⵏ ⵏⵙⴻⵏ ⵡⴻⵃⵃⴻⴷⵙⴻⵏⵜ,

ⵍⴰⴵ ⵏ ⵛⵉⵎⵄⵉ ⵡⴻⵃⵃⴷⴻⵙ ⴷ ⵜⴻⵎⵖⴰⵔⵉⵏ ⵏⵙⴻⵏ ⵡⴻⵃⵃⴻⴷⵙⴻⵏⵜ.

14 ⵎⴰⵔⵔⴰ ⵍⴰⴵⴰⵜ ⵏⵏⴻⵖⵏⵉ, ⴽⵓⵍ ⵍⴰⴵ ⵡⴻⵃⵃⴷⴻⵙ ⵓⵍⴰ ⴷ ⵜⵉⵎⵖⴰⵔⵉⵏ ⵡⴻⵃⵃⴻⴷⵙⴻⵏⵜ.”