1 ⵉⵎⵙⴰⵔ ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⴰⵔⴻⴱⵄⴰ ⵏ ⵓⵊⴻⴵⵉⴷ ⴷⴰⵔⵉⵢⵓⵙ, ⵍⴰⵎⵉ ⴷⴷ-ⵢⵓⵙⴰ ⵡⴰⵡⴰⵍ ⵏ ⵙⵉⴷⵉ ⵖⴰⵔ ⵣⴰⴽⴰⵔⵉⵢⵢⴰ, ⴷⴻⴳ ⵡⴰⵙⵙ ⵡⵉⵙⵙ ⴰⵔⴻⴱⵄⴰ ⵏ ⵓⵢⵓⵔ ⵡⵉⵙⵙ ⵜⴻⵙⵄⴰ, ⴷⴻⴳ ⵓⵢⵓⵔ ⵏ ⴽⵉⵙⵍⵓ,

2 ⴰⵇⴰ ⵉⵙⵙⴻⴽⴽ ⵍⴳⴻⵏⵙ ⵏ ⴱⴰⵢⵜ-ⵉⵍ ⵛⴰⵔⴰⵚⵉⵔ ⴷ ⵔⴰⵊⴰⵎ-ⵎⴰⵍⵉⴽ ⴷ ⵢⴻⵔⵢⴰⵥⴻⵏ ⵏⵏⴻⵙ ⵎⴰⵃⴻⵏⴷ ⴰⴷ ⵜⵜⴰⵔⴻⵏ ⴰⵔⴹⴰ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ, 3 ⵓⵎⵉ ⵙⵙⴰⵡⴰⵍⴻⵏ ⴰⴽ-ⴷ ⵉⴽⴻⵀⵀⴰⵏⴻⵏ, ⵉⵏⵏⵉ ⵉⴵⴰⵏ ⴷⵉ ⵜⴰⴷⴷⴰⵔⵜ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⵓ ⴰⴽ-ⴷ ⵉⵏⴰⴱⵉⵢⵢⴻⵏ, ⵇⵇⴰⵔⴻⵏ: “ⵎⴰ ⴰⴷ ⴰⵔⵏⵉⵖ ⴷⴻⴳ ⵓⵢⵓⵔ ⵡⵉⵙⵙ ⵅⴻⵎⵙⴰ ⴰⴷ ⵔⵓⵖ ⵓ ⴰⴷ ⵄⴻⵥⵍⴻⵖ ⵉⵅⴻⴼ ⵉⵏⵓ ⴰⵎ ⵎⴰⵎⵎⴻⵛ ⵜ ⵜⵜⴻⴳⴳⴻⵖ ⵍⴻⵅⵅⵓ ⵄⴰⴷ ⴰⵟⵟⴰⵙ ⵏ ⵉⵙⴻⴳⴳⵯⵓⵙⴰ?”

4 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⵉⵏⵏⴰ:

5 “ⵙⵉⵡⴻⵍ ⴰⴽ-ⴷ ⵎⴰⵔⵔⴰ ⵍⴳⴻⵏⵙ ⵓ ⴰⴽ-ⴷ ⵉⴽⴻⵀⵀⴰⵏⴻⵏ, ⵉⵏⵉ: ⵍⴰⵎⵉ ⴽⴻⵏⵏⵉⵡ ⵜⵥⵓⵎⵎⴻⵎ ⵓ ⵜⴻⵡⵜⵉⵎ ⵅ ⵉⴷⵎⴰⵔⴻⵏ ⵏⵡⴻⵎ ⵥⴻⴳ ⵡⴻⵛⴹⴰⵏ, ⴷⴻⴳ ⵓⵢⵓⵔ ⵡⵉⵙⵙ ⵅⴻⵎⵙⴰ ⵓ ⴷⴻⴳ ⵓⵢⵓⵔ ⵡⵉⵙⵙ ⵙⴻⴱⵄⴰ, ⵓ ⵎⴰⵏ ⴰⵢⴰ ⵍⴻⵅⵅⵓ ⵄⴰⴷ ⴰⵟⵟⴰⵙ ⵏ ⵉⵙⴻⴳⴳⵯⵓⵙⴰ, ⵎⴰ ⵜⵥⵓⵎⵎⴻⵎ ⴽⴻⵏⵏⵉⵡ ⵅⴻⵏⵏⵉ ⵉ ⵏⴻⵛⵛ, ⵙ ⵜⵉⴷⴻⵜⵜ ⵉ ⵏⴻⵛⵛ? 6 ⵍⴰⵎⵉ ⵜⴻⵛⵛⵉⵎ ⵓ ⵍⴰⵎⵉ ⵜⴻⵙⵡⵉⵎ, ⵎⴰ ⵡⴰⵔ ⵜⵓⵖⵉ ⴽⴻⵏⵏⵉⵡ ⴷ ⵉⵏⵏⵉ ⵉⵛⵛⵉⵏ ⵓ ⵎⴰ ⵡⴰⵔ ⵜⵓⵖⵉ ⴽⴻⵏⵏⵉⵡ ⴷ ⵉⵏⵏⵉ ⵉⵙⵡⵉⵏ? 7 ⵎⴰ ⵡⴰⵔ ⵉⴵⵉ ⴷ ⴰⵡⴰⵍⴻⵏ ⵉ ⵉⵊⵊⴰ ⵙⵉⴷⵉ ⴰⴷ ⵜⵜⵡⴰⴱⴰⵔⵔⵃⴻⵏ ⵙ ⵓⴼⵓⵙ ⵏ ⵉⵏⴰⴱⵉⵢⵢⴻⵏ ⵏ ⵥⵉⵛ ⵓⵎⵉ ⵜⵓⵖⴰ ⵜⴻⵇⵇⵉⵎ ⵓⵔⵛⴰⵍⵉⵎ ⵄⴰⴷ ⵙ ⵉⵎⴻⵥⴷⴰⵖ ⴷⵉ ⵍⵀⵓⴷⵏⴻⵜ ⴰⴽ-ⴷ ⵜⵏⴻⴷⴷⴰⵎ ⵉ ⴷ ⴰⵙ ⴷⴷ-ⵉⵏⵏⴹⴻⵏ, ⵓ ⵍⴰⵎⵉ ⵜⵓⵖⴰ ⵄⴰⴷ ⵉⵎⴻⵥⴷⴰⵖ ⴷⵉ ⵜⴰⵎⵎⵓⵔⵜ ⵏ ⵍⵊⴰⵏⵓⴱ ⵓ ⴷⵉ ⵜⴻⵎⵎⵓⵔⵜ ⵉⵡⴰⵟⴰⵏ?”

8 ⵢⵓⵙⴰ-ⴷⴷ ⵡⴰⵡⴰⵍ ⵏ ⵙⵉⴷⵉ ⵖⴰⵔ ⵣⴰⴽⴰⵔⵉⵢⵢⴰ, ⵉⵏⵏⴰ:

9 “ⴰⵎⵎⵓ ⵉ ⵉⵙⵙⴰⵡⴰⵍ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⵉⵇⵇⴰⵔ: ⵃⴻⴽⵎⴻⵎ ⵙ ⵉⵊⵊ ⵏ ⵍⵃⵓⴽⵎ ⵉⵙⴻⴳⴳⴷⴻⵏ ⵓ ⴳⴳⴻⵎ ⵙ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷ ⴰⵔⵔⴻⵃⵎⴻⵜ ⵉⵊⵊ ⴰⴽ-ⴷ ⵡⴻⵏⵏⴻⵖⵏⵉ.

10 ⵡⴰⵔ ⵃⴻⵚⵚⴰⵔⴻⵎ ⵜⴰⵊⵊⴰⵞ ⵓⵍⴰ ⴷ ⴰⵢⵓⵊⵉⵍ ⵏⵉⵖ ⵍⴱⴰⵔⵔⴰⵏⵉ ⵓⵍⴰ ⴷ ⴰⵎⴻⵥⵍⵓⴹ, ⵓ ⵡⴰⵔ ⵜⵜⴻⵊⵊⵉⵎ ⵓⵍⴰ ⴷ ⵉⵊⵊ ⴰⴷ ⵉⵅⴰⵔⵔⴻⵚ ⴷⵉ ⵍⵖⴰⵔ ⴹⵉⴷⴷ ⵉ ⵓⵎⴰⵙ ⴷⴻⴳ ⵡⵓⵍ ⵏⵏⴻⵙ.”^■  

11 ⵎⴰⵛⴰ ⵏⵉⵜⵏⵉ ⵓⴳⵉⵏ ⴰⴷ ⵡⵛⴻⵏ ⵜⴰⵢⵏⵉⵜ ⵓ ⵏⵉⵜⵏⵉ ⴳⴳⵉⵏ ⵎⴰⵔⵔⴰ ⵙ ⵍⵎⴻⵇⵍⵓⴱ ⵓ ⴱⴻⵍⵍⵄⴻⵏ ⵉⵎⴻⵥⵥⵓⵖⴻⵏ ⵏⵙⴻⵏ, ⵃⵉⵎⴰ ⵡⴰⵔ ⵜⵜⴻⵙⵍⵉⵏ.

12 ⵏⵉⵜⵏⵉ ⵙⵙⵇⴻⵙⵃⴻⵏ ⵓⵍ ⵏⵙⴻⵏ ⴰⵎ ⵉⵛⵜ ⵏ ⵜⴻⵍⵡⵉⵥⵜ ⵎⴰⵃⴻⵏⴷ ⵡⴰⵔ ⵜⵜⴻⵙⵍⵉⵏ ⵛⵛⴰⵔⵉⵄⴰ ⴷ ⵡⴰⵡⴰⵍⴻⵏ ⵏⵏⵉ ⴷⴷ-ⵉⵙⵙⴻⴽⴽ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⵙ ⴰⵔⵔⵓⵃ ⵏⵏⴻⵙ ⵙ ⵓⴼⵓⵙ ⵏ ⵉⵏⴰⴱⵉⵢⵢⴻⵏ ⵏ ⵥⵉⵛ, ⴰⵍⴰⵎⵉ ⴷⴷ-ⵢⵓⵙⴰ ⵉⵊⵊ ⵏ ⵓⴷⵓⵇⵇⴻⵥ ⴷ ⴰⵎⴻⵇⵇⵔⴰⵏ ⵏ ⵡⴻⵖⴹⴰⴱ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ.”

13 “ⴰⵇⴰ ⵉⵎⵙⴰⵔ ⴰⵎ ⵎⴰⵎⵎⴻⵛ ⵉⵍⴰⵖⴰ ⵏⴻⵜⵜⴰ ⵥⵉⵛ, ⵎⴰⵛⴰ ⵏⵉⵜⵏⵉ ⵡⴰⵔ ⵙⵍⵉⵏ ⵛⴰ. ⵙ ⵓⵢⴻⵏⵏⵉ ⵍⴰⵖⴰⵏ ⵍⴻⵅⵅⵓ ⵏⵉⵜⵏⵉ ⵓ ⵏⴻⵛⵛ ⵡⴰⵔ ⵜⵜⴻⵙⵍⵉⵖ ⵛⴰ, ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ. ^■  

14 ⵏⴻⵛⵛ ⴰⴷ ⵜⴻⵏ ⵥⵓⵥⵥⴰⵔⴻⵖ ⵅ ⵎⴰⵔⵔⴰ ⵍⴻⴳⵏⵓⵙ ⵏⵏⵉ ⵜⵓⵖⴰ ⵡⴰⵔ ⵙⵙⵉⵏⴻⵏ ⵓ ⴰⵡⴰⵔⵏⵉ ⴰⵙⴻⵏ ⴰⴷ ⵜᵉⵜⵜⵡⴰⵅⴰⵔⵔⴻⴱ ⵜⴻⵎⵎⵓⵔⵜ, ⵓⵍⴰ ⴷ ⵉⵊⵊ ⵄⴰⴷ ⵡⴰⵔ ⵅⴰⵙ ⵉⵥⴻⴽⴽⵡⵉ ⵓ ⵓⵍⴰ ⴷ ⵉⵊⵊ ⵄⴰⴷ ⵡⴰⵔ ⴷⴷ-ⵉⴷⴷⵉⴽⴽⵡⵉⵍ. ⵏⵉⵜⵏⵉ ⴰⵔⵔⵉⵏ ⵜⴰⵎⵎⵓⵔⵜ ⵉⵄⵉⵥⵥⴻⵏ ⴷ ⵍⵅⴰⵔⴱⴻⵜ.