1 ⵏⴻⵛⵛ ⵙⵙⴳⴻⵄⵄⴷⴻⵖ ⵜⵉⵟⵟⴰⵡⵉⵏ ⵉⵏⵓ ⵓⵛⴰ ⵥⵔⵉⵖ, ⵓ ⵅⵥⴰⵔ ⴰⵇⴰ ⴷⵉⵏ ⴰⵔⴻⴱⵄⴰ ⵏ ⵡⴰⵛⵛⴰⵡⴻⵏ. 2 ⵏⴻⵛⵛ ⵏⵏⵉⵖ ⵉ ⵍⵎⴰⵍⴰⴽ ⵏⵏⵉ ⴽⵉⴷⵉ ⵉⵙⵙⴰⵡⴰⵍⴻⵏ: “ⵎⵉⵏ ⵄⵏⴰⵏ ⵉⵏⴰ?” ⵏⴻⵜⵜⴰ ⵢⴰⵔⵔⴰ-ⴷⴷ ⵅⴰⴼⵉ: “ⵉⵏⴰ ⴷ ⴰⵔⴻⴱⵄⴰ ⵏ ⵡⴰⵛⵛⴰⵡⴻⵏ ⵏⵏⵉ ⵉⵥⵓⵥⵥⴰⵔⴻⵏ ⵢⴰⵀⵓⴷⴰ, ⵉⵙⵔⴰⵉⵍ ⴷ ⵓⵔⵛⴰⵍⵉⵎ.”

3 ⵅⴻⵏⵏⵉ ⵉⵙⵙⵛⴻⵏ ⴰⵢⵉ ⵙⵉⴷⵉ ⴰⵔⴻⴱⵄⴰ ⵏ ⵉⵎⵥⵉⵍⴻⵏ. 4 ⵍⴻⵅⴷⴻⵏⵏⵉ ⵏⴻⵛⵛ ⵏⵏⵉⵖ: “ⵎⵉⵏ ⵓⵎⵉ ⴷⴷ-ⵓⵙⵉⵏ ⵏⵉⵜⵏⵉ, ⵎⵉⵏ ⵖⴰ ⴳⴳⴻⵏ?” ⵏⴻⵜⵜⴰ ⵉⵙⵙⵉⵡⴻⵍ, ⵉⵏⵏⴰ: “ⵉⵏⴰ ⴷ ⴰⵛⵛⴰⵡⴻⵏ ⵏⵏⵉ ⵉⵥⵓⵥⵥⴰⵔⴻⵏ ⵢⴰⵀⵓⴷⴰ, ⴰⵍⴰⵎⵉ ⵡⴰⵔ ⴷⴷ-ⵉⵙⵙⴳⴻⵄⵄⴻⴷ ⵄⴰⴷ ⵓⵍⴰ ⴷ ⵉⵊⵊ ⴰⵥⴻⴵⵉⴼ ⵏⵏⴻⵙ, ⵎⴰⵛⴰ ⵉⵏⴰ ⵓⵙⵉⵏ-ⴷⴷ ⵃⵉⵎⴰ ⴰⴷ ⵜⴻⵏ ⵙⵙⵏⴻⵅⵍⵄⴻⵏ, ⵃⵉⵎⴰ ⴰⴷ ⵏⴹⴰⵔⴻⵏ ⴰⵛⵛⴰⵡⴻⵏ ⵏ ⵍⴻⴳⵏⵓⵙ ⵏⵏⵉ ⴷⴷ-ⵉⵙⵙⴳⴻⵄⵄⴷⴻⵏ ⵉⵛⵛ ⴹⵉⴷⴷ ⵉ ⵜⴻⵎⵎⵓⵔⵜ ⵏ ⵢⴰⵀⵓⴷⴰ ⵃⵉⵎⴰ ⴰⴷ ⵜⵜ ⵥⵓⵥⵥⴰⵔⴻⵏ.”

5 ⵏⴻⵛⵛ ⵙⵙⴳⴻⵄⵄⴷⴻⵖ ⵜⵉⵟⵟⴰⵡⵉⵏ ⵉⵏⵓ, ⵥⵔⵉⵖ, ⵓ ⵅⵥⴰⵔ, ⴰⵇⴰ ⴷⵉⵏ ⵉⵊⵊ ⵏ ⵡⴻⵔⵢⴰⵥ ⵙ ⵓⴼⵉⵍⵓ ⵏ ⵍⴻⵄⴱⴰⵔ ⴷⴻⴳ ⵓⴼⵓⵙ ⵏⵏⴻⵙ. 6 ⵏⴻⵛⵛ ⵏⵏⵉⵖ: “ⵎⴰⵏⵉ ⵉ ⵖⴰ ⵜⵔⴰⵃⴻⴷ ⵛⴻⴽ?” ⵏⴻⵜⵜⴰ ⵢⴰⵔⵔⴰ-ⴷⴷ “ⵏⴻⵛⵛ ⴰⴷ ⵔⴰⵃⴻⵖ ⵃⵉⵎⴰ ⴰⴷ ⵄⴱⴰⵔⴻⵖ ⵓⵔⵛⴰⵍⵉⵎ ⵎⴰⵃⴻⵏⴷ ⴰⴷ ⵥⴰⵔⴻⵖ ⵎⴻⵛⵃⴰⵍ ⵜⴻⴵⴰ ⵜⵉⵔⵓ ⵏⵏⴻⵙ ⵓ ⵎⴻⵛⵃⴰⵍ ⵜⴻⴵⴰ ⵜⵓⵥⵥⴻⴳⴳⴰⵔⵜ ⵏⵏⴻⵙ.” 7 ⵓ ⵅⵥⴰⵔ, ⵉⴼⴼⴻⵖ-ⴷⴷ ⵍⵎⴰⵍⴰⴽ ⵏⵏⵉ ⴽⵉⴷⵉ ⵉⵙⵙⴰⵡⴰⵍⴻⵏ ⵓⵛⴰ ⵉⵊⵊ ⵏ ⵍⵎⴰⵍⴰⴽ ⵏⵏⴻⵖⵏⵉ ⵉⴼⴼⴻⵖ-ⴷⴷ ⵃⵉⵎⴰ ⴰⴷ ⴽⵉⴷⴻⵙ ⵉⵎⵎⴻⵍⵇⴰ, 8 ⵉⵏⵏⴰ ⴰⵙ: “ⴷⴻⵖⵢⴻⵜ, ⵙⵉⵡⴻⵍ ⴰⴽ-ⴷ ⵓⵃⵓⴷⵔⵉ ⵏⵏⵉ, ⵉⵏⵉ:

‘ⵓⵔⵛⴰⵍⵉⵎ ⴰⴷ ⵜⵉⵍⵉ ⴷ ⵉⵛⵜ ⵏ ⴷⴷⴻⵎⵏⴻⵜ ⵜⴻⵏⵏⵓⵔⵥⴻⵎ ⵜⴻⵎⵖⴰⵔ

ⵥⵉ ⵙⵙⵉⴱⴱⴻⵜ ⵏ ⵡⴰⵟⵟⴰⵙ ⵏ ⵉⵡⴷⴰⵏ ⴷ ⵍⵎⴰⵍ ⵉ ⵉⴵⴰⵏ ⴷⵉ ⵍⵡⴻⵙⵜ ⵏⵏⴻⵙ.

9 ⵏⴻⵛⵛ ⴰⴷ ⴰⵙ ⵉⵍⵉⵖ ⴷ ⵉⵊⵊ ⵏ ⵍⵃⵉⴹ ⵏ ⵜⵎⴻⵙⵙⵉ ⵉ ⴷ ⴰⵙ-ⴷⴷ ⵉⵜⵜⴻⵏⵏⴹⴻⵏ, ⵉⵇⵇⴰⵔ ⵙⵉⴷⵉ,

ⵓ ⴷⵉ ⵍⵡⴻⵙⵜ ⵏⵏⴻⵙ ⴰⴷ ⴰⵙ ⵉⵍⵉⵖ ⵉ ⵓⵄⵓⴵⵉ.

10 ⴷⴻⵖⵢⴰⵎ, ⴷⴻⵖⵢⴰⵎ, ⴰⵔⴻⵡⵍⴻⵎ ⵥⵉ ⵜⴻⵎⵎⵓⵔⵜ ⵏ ⵛⵛⴰⵎⴰⵍ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ,

\qt ⵎⴰⵖⴰⵔ ⵏⴻⵛⵛ ⴰⴷ ⴽⴻⵏⵏⵉⵡ ⴱⴹⵉⵖ ⵅ ⴰⵔⴻⴱⵄⴰ ⵏ ⵉⵙⴻⵎⵎⵉⴹⴻⵏ ⵏ ⵓⵊⴻⵏⵏⴰ,

ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ.

11  ⴷⴻⵖⵢⴰⵜ, ⵚⵉⵀⵢⵓⵏ, ⴼⴻⴽⴽⴻⵜ,

ⵛⴻⵎ ⴷ ⵜⴻⵏⵏⵉ ⵉⵥⴻⴷⴷⵖⴻⵏ ⵖⴰⵔ ⵢⴻⴵⵉⵙ ⵏ ⴱⴰⴱⵉⵍ!’ ”

12 “ⵎⴰⵖⴰⵔ ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ:

ⴷⵉ ⵟⵟⵡⴻⵄ ⵏ ⵓⵄⵓⴵⵉ,

ⵉⵙⵙⴻⴽⴽ ⴰⵢⵉ-ⴷⴷ ⵏⴻⵜⵜⴰ ⵖⴰⵔ ⵍⴻⴳⵏⵓⵙ ⵏⵏⵉ ⴽⴻⵏⵏⵉⵡ ⵉⴽⴻⵛⵛⴹⴻⵏ,

ⵎⴰⵖⴰⵔ ⵡⴻⵏⵏⵉ ⴽⴻⵏⵏⵉⵡ ⵉ ⵖⴰ ⵉⵃⴰⴷⴰⵏ, ⵉⵃⴰⴷⴰ ⵎⵓⵎⵎⵓ ⵏ ⵜⵉⵟⵟ ⵉⵏⵓ.

13 ⵎⴰⵖⴰⵔ ⵅⵥⴰⵔ, ⵏⴻⵛⵛ ⵙⵙⴻⵏⵀⴻⵥⵥⴻⵖ ⴰⴼⵓⵙ ⵉⵏⵓ ⵅⴰⵙⴻⵏ,

ⵓ ⵏⵉⵜⵏⵉ ⴰⴷ ⴷⴻⵡⵍⴻⵏ ⴷ ⵜⴰⴽⴻⵛⵛⴰⴹⵜ ⵏ ⵉⵎⵙⴻⵅⵅⴰⵔⴻⵏ ⵏⵙⴻⵏ.

ⴽⴻⵏⵏⵉⵡ ⴰⴷ ⵜⴻⵙⵙⵏⴻⵎ

ⴰⵇⴰ ⵉⵙⵙⴻⴽⴽ ⴰⵢⵉ-ⴷⴷ ⵙⵉⴷⵉ ⵏ ⵍⵄⴻⵙⴽⴰⵔⴰⵜ.

14 ⵙⵍⵉⵡⵍⴻⵡ ⵓ ⴼⴰⵔⵃ, ⴰ ⵜⴰⵢⴻⴵⵉⵜ ⵚⵉⵀⵢⵓⵏ,

ⵎⴰⵖⴰⵔ ⵅⵥⴰⵔ, ⵏⴻⵛⵛ ⴰⴷ ⴷⴷ-ⴰⵙⴻⵖ ⵓ ⴰⴷ ⵥⴻⴷⵖⴻⵖ ⴷⵉ ⵍⵡⴻⵙⵜ ⵏⵏⴻⵎ,

ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ. ^■  

15 ⴷⴻⴳ ⵡⴰⵙⵙ ⵏⵏⵉ ⴰⴷ ⵇⵇⵏⴻⵏ ⵡⴰⵟⵟⴰⵙ ⵏ ⵍⴻⴳⵏⵓⵙ ⵖⴰⵔ ⵙⵉⴷⵉ,

ⵓ ⵏⵉⵜⵏⵉ ⴰⴷ ⵉⵍⵉⵏ ⴷ ⵍⴳⴻⵏⵙ ⵉⵏⵓ,

ⵓ ⵏⴻⵛⵛ ⴰⴷ ⵥⴻⴷⵖⴻⵖ ⴷⵉ ⵍⵡⴻⵙⵜ ⵏⵏⴻⵎ ⵓ ⴰⴷ ⵜⴻⵙⵙⵏⴻⴷ,

ⴰⵇⴰ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⵉⵙⵙⴻⴽⴽ ⴰⵢⵉ-ⴷⴷ ⵖⴰⵔⴻⵎ.

16 ⵙⵉⴷⵉ ⴰⴷ ⵉⵟⵟⴻⴼ ⵢⴰⵀⵓⴷⴰ ⴷ ⵜⴰⵖⴰⵔⵙⵜ ⵅ ⵜⴻⵎⵎⵓⵔⵜ ⵉⵇⴻⴷⴷⵙⴻⵏ.

ⵏⴻⵜⵜⴰ ⴰⴷ ⵉⴼⴰⵔⵥ ⵓⵔⵛⴰⵍⵉⵎ ⵄⴰⴷ.

17 ⴻⵊⵊ ⵎⴰⵔⵔⴰ ⴷⴷⴰⵜ ⴰⴷ ⵉⵙⵙⴻⵖⴷ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ,

ⵎⴰⵖⴰⵔ ⵏⴻⵜⵜⴰ ⵉⴼⴰⵇ-ⴷⴷ ⵥⵉ ⵜⵥⴻⴷⴷⵉⵖⵜ ⵏⵏⴻⵙ ⵉⵇⴻⴷⴷⵙⴻⵏ.”